Leksyon 55

Mosiah 5–6

Pasiuna

Ang Mosiah 5 naglangkob sa katapusan sa pakigpulong ni Haring Benjamin ngadto sa iyang mga katawhan, ang rekord diin nagsugod sa Mosiah 2. Isip resulta sa ilang pagtuo diha sa mga pulong ni Haring Benjamin, gisinati sa mga katawhan ang dakong kausaban sa kasingkasing. Misulod sila ngadto sa usa ka pakigsaad uban sa Dios ug midala diha sa ilang mga kaugalingon sa pangalan ni Jesukristo. Ingon nga girekord diha sa Mosiah 6, gitugyan ni Haring Benjamin ang iyang gingharian ngadto sa iyang anak nga lalaki nga si Mosiah, kinsa nagmando sumala sa panig-ingnan nga gipakita sa iyang amahan.

Mga Sugyot alang sa Pagtudlo

Mosiah 5:1–4

Ang mga katawhan ni Haring Benjamin mihulagway sa dakong kausaban nga ilang gisinati pinaagi sa Espiritu.

Sa dili pa magklase, isulat ang mosunod nga mga pangutana diha sa pisara:

Gibati ba ninyo nga kamo nanginahanglan og espirituhanong kausaban?

Unsay inyong gibuhat mahitungod niini?

Kon kamo nakasinati og kausaban, inyo bang gipadayon kana nga kausaban hangtud karong adlawa?

Dapita ang mga estudyante sa pagtubag niini nga mga pangutana diha sa ilang mga scripture study journal o mga class notebook. Dayon basaha ang mosunod nga pamahayag ni Elder David A. Bednar sa Korum sa Napulog Duha ka mga Apostoles:

“Ang lintunganay sa ebanghelyo ni Jesukristo nagkinahanglan sa sukaranan ug permanente nga kausaban sa atong pagkatawo nga mahimong posible pinaagi sa atong pagsalig diha sa ‘maayo nga buhat, ug kalooy, ug grasya sa Balaan nga Mesiyas’ (2 Nephi 2:8). Kon kita mopili sa pagsunod sa Ginoo, kita mipili nga mag-usab—espirituhanong magpakatawo pag-usab (“Kinahanglang Matawo Kamo Pag-usab,” Ensign o Liahona, Mayo 2007, 20).

Mahimo nimong isugyot nga isulat sa mga estudyante ang mosunod nga kinutlo diha sa ilang mga kasulatan tupad sa Mosiah 5:2 o diha sa ilang mga scripture study journal: “Samtang kita nagpili sa pagsunod sa Agalon, kita nagpili nga mahimong mausab” (Elder David A. Bednar).

• Sa unsa nga mga paagi kita nagpili nga mahimong mausab kon kita nagpili sa pagsunod ni Jesukristo?

Hatagi ang mga estudyante og pipila ka minuto sa pagribyu sa Mosiah 2–4. Mahimo nimong isugyot nga ilang basahon ang mga summary sa kapitulo. Pangutan-a sila kon unsa ang ilang nahinumduman mahitungod sa mga sulod niini nga mga kapitulo. Dayon dapita sila sa pagbasa og hilum sa Mosiah 5:1

• Unsa ang gitinguha ni Haring Benjamin nga mahibaloan gikan sa iyang mga katawhan?

Hangyoa ang mga estudyante sa pagbasa og hilum sa Mosiah 5:2–5, nga mangita sa tubag sa mga katawhan ngadto sa pangutana ni Haring Benjamin. Sa dili pa basahon sa mga estudyante, mahimo nimong ipasabut nga diha sa bersikulo 2, ang pulong nga hilig nagpasabut ngadto sa indibidwal nga kinaiyahan—ang iyang mga tinguha ug buot. Human nila mabasa, ipangutana ang mosunod aron sa pagtabang kanila og tuki sa mga bersikulo:

• Unsa ang gisulti sa mga katawhan mahitungod sa ilang mga hilig?

• Unsa ang nagdala mahitungod niini nga kausaban sa ilang mga hilig? (Mituo sila sa mga panudlo ni Haring Benjamin mahitungod ni Jesukristo ug sa Pag-ula ug ang Epiritu miusab sa ilang mga kasingkasing.)

Hatagi og gibug-aton nga ang kausaban sa kasingkasing labaw pa kay sa kausaban lamang sa kinaiya. Kon kita nagsinati og kausaban sa kasingkasing, mahimo kita nga bag-ong mga tawo, nausab pinaagi sa gahum sa Pag-ula sa Manluluwas. Aron matabangan ang mga estudyante nga makasabut niini nga kamatuoran, dapita ang usa ka estudyante sa pagbasa sa mosunod nga pamahayag ni Elder David A. Bednar sa Korum sa Napulog Duha ka mga Apostoles:

“Ang ebanghelyo ni Jesukristo nagtingub mas labaw pa kay sa paglikay, pagbuntog, ug pagkanalimpyohan sa sala ug sa dautang mga impluwensya sa atong mga kinabuhi; kini usab nagkinahanglan sa pagbuhat og maayo, sa pagpakamaayo, og sa pagkahimong mas maayo. … Kining dako nga kausaban dili lamang resulta sa pagpaningkamot pag-ayo o sa pag-ugmad og talagsaong tagsa tagsa nga disiplina. Kondili, tungod kay kini ang sinugdanan sa pagkausab sa atong mga tinguha, atong mga motibo, ug atong mga kinaiya nga nahimong posible pinaagi sa Pag-ula ni Kristo nga Ginoo. Ang atong espirituhanong katuyoan mao ang pagbuntog sa sala ug sa tinguha sa pagpakasala, sa mansa ug pagkaulipon sa sala” (“Limpyo nga mga Kamot ug Putli nga Kasingkasing,” Ensign o Liahona, Nob. 2007, 81).

• Ngano sa inyong hunahuna kita nagkinahanglan sa Pag-ula ni Jesukristo aron tinuoray nga mausab?

Giyahi ang atensyon sa mga estudyante ngadto sa hugpong sa mga pulong “tungod kay ang Espiritu sa Ginoong Makagagahum” diha sa Mosiah 5:2. Mahimong kinahanglan nimong ipatin-aw ang makagagahum, nga nagpasabut og gamhanan sa tanan.

• Unsa ang atong makat-unan gikan sa Mosiah 5:2–4 mahitungod kon unsaon nato nga makasinati og dako nga kausaban sa atong mga kinabuhi?

Samtang ang mga estudyante naghisgot niini nga pangutana, siguroha nga sila nakasabut nga kon kita nagpakita og hugot nga pagtuo diha ni Jesukristo ug nagdawat sa Balaang Espiritu, kita makasinati og dako nga kausaban sa kasingkasing.

Ipasabut nga ang pagsinati og dako nga kausaban sa kasingkasing usa ka proseso nga mahitabo sa tibuok natong kinabuhi, dili usa ra ka hitabo. Ipakigbahin ang mosunod nga pamahayag ni Presidente Ezra Taft Benson:

“Ang pagkahimong Kristohanon usa ka tibuok kinabuhi nga paninguha ug sa kasagaran gayud naglakip og pagtubo ug kausaban nga hinay, hapit dili mailhan. …

“… Ang tinuod nga paghinulsol naglakip og kausaban sa kasingkasing ug dili lamang kausaban sa kinaiya. “…Kadaghanan sa paghinulsol dili maglakip og kulba-hinam o makapaukay nga mga kausaban, apan hinoon usa ka tinagsa ka lakang, kanunay, ug lahutay nga lihok ngadto sa pagka-diosnon” (“A Mighty Change of Heart,” Ensign, Okt. 1989, 5).

Aron matabangan ang mga etudyante sa paggamit niini nga baruganan ug sa pagtimbang-timbang sa ilang pag-uswag sa pagsinati og dako nga kausaban diha sa ilang mga kasingkasing, hangyoa sila sa pagtubag diha sa ilang mga scripture study journal sa mosunod nga mga pangutana. (Mahimo nimong isulat kini nga mga pangutana diha sa pisara sa wala pay klase, mag-andam og handout uban ang mga pangutana, o basahon ang mga pangutana og hinay aron ang mga estudyante makasulat niini diha sa ilang mga scripture study journal.)

• Sa unsa nga paagi nausab ang inyong o kinaiya samtang kamo nagsunod sa Manluluwas?

• Unsa ang inyong gikinahanglan nga buhaton aron ang Ginoo mopadayon sa pagtabang kaninyo sa pagsinati niini nga kausaban?

Hatagi ang usa o duha ka mga estudyante sa oportunidad sa pagpakigbahin sa ilang mga tubag niini nga mga pangutana. Siguroha nga ilang masabtan nga sila dili kinahanglang mobati nga obligado sa pagpakigbahin og mga kasinatian o mga panghunahuna nga hilabihan ka personal o pribado.)

Mosiah 5:5–15

Ang mga katawhan ni Haring Benjamin misulod ngadto sa usa ka pakigsaad uban sa Dios ug gihatagan og bag-ong ngalan

Dapita ang mga estudyante sa pagbasa og kusog sa Mosiah 5:5. Hangyoa ang klase sa pagpangita sa unsay andam nga buhaton sa mga katawhan ni Haring Benjamin tungod kay ang ilang mga kasingkasing nausab.

• Unsay andam nga buhaton sa mga katawhan karon nga ang ilang mga kinaiya nausab pinaagi sa Pag-ula ni Jesukristo?

Aron matabangan ang mga estudyante nga madugangan ang ilang pagsabut sa mga pakigsaad, hatagi sila og pipila ka minuto sa pagtuon og tinagsa sa hilisgutan. Mahimo nimong isugyot nga sila magtuon sa hilisgutan diha sa Giya ngadto sa mga Kasulatan o diha sa Matinud-anon ngadto sa Tinuhoan o nga sila mangita og mga kasulatan kabahin sa hilisgutan diha sa index sa Basahon ni Mormon o sa triple combination. Human sa igong panahon, himoa nga ang mga estudyante magpares-pares ug ipasabut ang mga pakigsaad ngadto sa usag usa sa ilang kaugalingon nga mga pulong.

Tuguti ang mga estudyante sa pagpasabut

Matag karon og unya, hangyoa ang mga estudyante sa pagpasabut og mga doktrina ug mga baruganan ngadto sa usag usa. Pinaagi sa pagbuhat sa ingon, imong matabangan ang mga estudyante sa paglig-on sa ilang pagtuo ug pagdugang sa ilang pagsabut sa ebanghelyo ni Jesukristo. Imo usab silang matabangan sa pagkat-on kon unsaon ang pagpakigbahin sa mga kamatuoran sa ebanghelyo ngadto sa uban.

• Hain nga mga pulong diha sa Mosiah 5:5 ang nagpakita sa ka sinsero sa tinguha sa mga katawhan sa paghimo ug pagsunod og pakigsaad uban sa Dios? (Ang mga tubag mahimong maglakip sa “pagbuhat sa iyang kabubut-on,” “sa tanan nga mga butang,” ug “sa tanan nga nahibilin sa among mga adlaw.”)

• Hain sa mga pulong diha sa Mosiah 5:5 ang nagpahinumdom kaninyo sa mga saad nga atong gibag-o sa matag panahon nga kita moambit sa sakrament?

• Sa unsa nga paagi kaha nga ang paghimo ug paghupot sa mga pakigsaad nagtabang kanato sa pagpadayon diha sa proseso sa pagsinati og kausaban sa kasingkasing?

Dapita ang mga estudyante sa pagbasa og hilum sa Mosiah 1:11. Hangyoa sila sa pagpangita og usa ka rason nga gipundok ni Haring Benjamin ang mga katawhan. (Aron sa paghatag kanila og pangalan.) Ipasabut nga ang Mosiah 5:7–15 nagrekord sa pagpasabut ni Haring Benjamin sa pangalan nga iyang gisaad nga ihatag sa iyang mga katawhan. Hatagi ang mga estudyante og pipila ka minuto sa paglaktaw-laktaw og basa sa Mosiah 5:7–14, mangita sa mga pulong ngalan ug pagatawgon. Mahimo nimong isugyot nga markahan sa mga estudyante kini nga mga pulong sa matag higayon nga kini makita.

Dapita ang pipila ka mga estudyante sa pagsulti kon nganong sila gihatagan sa ilang mga ngalan. Sama pananglit, mahimo nimong hangyoon sila sa pagsulti mahitungod kon giunsa sa ilang mga ginikanan paghukom sa pagpangalan kanila, o mahimo nimong pangutan-on kon ang ilang mga ngalan aduna bay piho nga kahulugan. Dayon pangutan-a ang klase:

• Unsa ang kahulugan sa usa ka ngalan? (Diha sa pisara, i-summarize ang mga tubag sa mga estudyante niini nga pangutana. Ang mga tubag mahimong maglakip nga ang usa ka ngalan mao ang paagi nga kita mailhan, kini kauban sa atong pagkakinsa kita, kini usa ka paagi nga kita malahi gikan sa uban, ug kini kasagarang nagdala uban niini og reputasyon ug mga gipaabut tungod sa pamilya nga kauban niini.)

Dapita ang usa ka estudyante sa pagbasa og kusog sa Mosiah 5:7–8. Hangyoa ang klase sa pagpangita sa ngalan nga gihatag ni Haring Benjamin sa iyang mga katawhan. Hangyoa usab sila sa pagpangita sa mga pulong nga nagpakita sa importansya niana nga ngalan. Mahimo nimong awhagon sila nga markahan kini nga mga pulong ug hugpong sa mga pulong.

• Unsa nga ngalan ang gihatag ni Haring Benjamin sa iyang mga katawhan?

• Unsa nga mga pulong ang inyong namatikdan? Unsay gitudlo kaninyo niadto nga mga pulong mahitungod sa ngalan ni Kristo?

• Kanus-a kita nagdala diha sa atong mga kaugalingon sa ngalan ni Jesukristo? (Siguroha nga nasabtan sa mga estudyante nga kita nagdala diha sa atong mga kaugalingon sa ngalan ni Jesukristo kon kita naghimo ug naghupot og sagradong mga pakigsaad.)

Samtang ang mga estudyante naghisgot niini nga mga bersikulo, tingali sila nagkinahanglan og tabang sa pagsabut sa doktrina nga kita mahimong mga “anak ni Kristo” (Mosiah 5:7). Mahimo nimong ipasabut nga ang usa ka amahan naghatag og kinabuhi ngadto sa usa ka bata. Kita espiritung mga anak sa Langitnong Amahan. Kita usab mga anak sa atong yutan-ong mga amahan, kinsa, uban sa atong mga inahan, naghatag og oportunidad alang kanato sa pagpuyo sa yuta sa atong pisikal nga mga lawas. Nag-refer sa Mosiah 5:7, si Presidente Joseph Fielding Smith mitudlo nga si Jesukristo usab “mahimong atong Amahan” tungod kay Siya “nagtanyag kanato og kinabuhi, kinabuhing dayon, pinaagi sa pag-ula nga iyang gibuhat alang kanato.” Si Presidente Smith mipasabut, “Kita mahimong mga anak, lalaki ug babaye nga mga anak ni Jesukristo, pinaagi sa atong mga pakigsaad nga magmasulundon ngadto kaniya” (Doctrines of Salvation, comp. Bruce R. McConkie, 3 vols. [1954–56], 1:29).

I-refer ang mga estudyante sa mga pulong diha sa pisara nga naghulagway sa kahulugan sa usa ka ngalan.

• Sa unsa nga paagi nga ang mga pulong diha sa pisara nagtabang kanato sa pagsabut sa kahulugan sa pagdala diha sa atong mga kaugalingon sa ngalan ni Jesukristo?

Hangyoa ang mga estudyante sa pagbasa og hilum sa Mosiah 5:9–13, nga mangita pa og tambag gikan ni Haring Benjamin mahitungod sa pagdala sa ngalan ni Jesukristo diha sa atong mga kaugalingon. Mahimo nimong isugyot nga basahon sa mga estudyante kini nga mga bersikulo ingon og si Haring Benjamin nagsulti ngadto kanila sa personal. Pares-paresa ang mga estudyante, ug hangyoa sila sa paghisgot sa mosunod nga mga pangutana pinasikad sa unsay ilang gibasa. (Mahimo nimong isulat kini nga mga pangutana diha sa pisara o hatagi sila og handout.)

• Paghunahuna mahitungod sa kahulugan sa pagdala diha sa atong mga kaugalingon sa ngalan ni Kristo. Unsa sa inyong hunahuna ang gipasabut sa pagbaton sa ngalan ni Kristo nga nahisulat diha sa inyong kasingkasing? Unsa nga mga panalangin ang moabut ngadto niadtong kinsa nagbaton sa ngalan ni Kristo nga nahisulat diha sa ilang mga kasingkasing?

• Paghunahuna og mga tawo nga inyong nailhan kinsa nagpasidungog sa ngalan ni Kristo. Unsa ang gibuhat niini nga mga tawo sa pagpakita sa balaang pagtahud ug gugma nga sila aduna alang sa ngalan ni Kristo?

Hangyoa ang usa ka estudyante sa pagbasa og kusog sa Mosiah 5:15. Dapita ang klase sa pagpangita og mga lihok nga nagpaila niadtong kinsa naghupot sa ilang mga pakigsaad.

• Unsa ang pipila ka mga pangutana nga atong mapangutana sa atong mga kaugalingon sa pagtimbang-timbang kon unsa kita ka maayo sa pagdala diha sa atong mga kaugalingon sa ngalan ni Kristo?

Ipakigbahin ang imong mga pagbati mahitungod sa unsay gipasabut sa pagdala diha sa imong kaugalingon sa ngalan ni Jesukristo. Pagpamatuod sa importansya niini diha sa imong kinabuhi.

Mosiah 6:1–7

Nagsugod si Mosiah sa iyang pagmando isip hari

Hangyoa ang mga estudyante sa pagbasa og hilum sa Mosiah 6:1–3, nga mag-ila unsay gibuhat ni Haring Benjamin sa wala pa niya pabiyaa ang pundok sa mga katawhan.

• Ngano sa inyong hunahuna importante ang pagrekord sa mga ngalan sa tanang mga tawo kinsa misulod og pakigsaad? Ngano nga si Haring Benjamin mitudlo og mga pari taliwala sa mga katawhan?

Ipasabut nga human mamulong ngadto sa mga katawhan, gitugyan ni Haring Benjamin ang gingharian diha sa iyang anak nga lalaki nga si Mosiah. Paglabay sa tulo ka tuig, namatay si Haring Benjamin. Dapita ang usa ka estudyante sa pagbasa og kusog sa Mosiah 6:6–7. Hangyoa ang klase sa pagpangita sa mga pulong nga nagpakita nga gisunod ni Mosiah ang panig-ingnan sa iyang amahan ug gitabangan ang iyang mga katawhan sa pagpadayon sa pagsinati og dako nga kausaban diha sa ilang mga kasingkasing.

Komentaryo ug Background nga Impormasyon

Mosiah 5:15. “Makanunayon ug dili matarug”

Si Elder David A. Bednar sa Korum sa Napulog Duha ka mga Apostoles mipasabut kon unsay gipasabut sa magpabiling “makanunayon ug dili matarug”:

“Ang pulong nga ‘makanunayon’ gigamit sa pagsugyot og posisyon nga dili mabalhin, solido ug lig-on, dili mauyog ug determinado (Oxford English Dictionary Online, 2nd ed. [1989], “Steadfast”). Ang pulong nga ‘dili matarug’ gigamit sa pagpakita nga ang usa ka tawo o butang dili mausab, siguro ang kalig-on, ug dili ubos sa kausaban. Kini usab nagpaila og kalidad sa pagkadili monunot ug dili motipas gikan sa katuyoan (Oxford English Dictionary Online, “Immovable”). Busa, ang usa ka tawo nga makanunayon ug dili matarug maoy usa ka solido, lig-on, determinado, lig-on ang pagkamasaligon, ug dili motipas gikan sa pinakauna nga katuyoan o misyon” (“Steadfast and Immovable, Always Abounding in Good Works,” New Era, Ene. 2008, 2).