Pasiuna sa Basahon ni Ether
Ngano nga kinahanglang tun-an kini nga basahon?
Samtang ang mga estudyante magtuon sa basahon ni Ether, makakat-on sila kabahin sa mga Jaredite—usa ka grupo sa katawhan kinsa mipanaw ngadto sa Kasadpang Bahin sa Kalibutan ug mipuyo didto sa daghang mga siglo sa wala pa moabut ang katawhan ni Lehi. Ang mga estudyante makakat-on og importanting mga baruganan mahitungod sa pag-ampo, pagpadayag, ug ang relasyon tali sa pagpakita og hugot nga pagtuo kang Jesukristo ug sa pagdawat og espirituhanong kahibalo. Sila usab makakat-on kabahin sa tahas sa mga propeta sa pag-awhag sa mga tawo sa paghinulsol ug mahitungod sa mga sangputanan nga moabut niadtong mosalikway ni Jesukristo ug sa Iyang mga propeta.
Kinsa ang misulat niini nga basahon?
Si Moroni mipamubo niini nga basahon gikan sa 24 ka bulawang mga palid nga gitawag og mga palid ni Ether. Ang basahon ginganlan alang sa propeta nga si Ether, kinsa mao ang katapusang propeta sa mga Jaredite ug kinsa mihimo og usa ka rekord sa ilang kasaysayan (tan-awa sa Ether 15:33–34). Mga 500 ka tuig sa wala pa mohimo si Moroni sa iyang pagpamubo sa sagradong mga rekord, pipila sa mga tawo ni Limhi nakadiskobre sa mga palid ni Ether samtang nangita sila sa yuta sa Zarahemla (tan-awa sa Mosiah 8:7–11; Ether 1:2). Ang mga Nephite nga propeta ug mga tigtipig sa rekord mipasa sa mga palid ni Ether hangtud nga miabut kini ngadto sa mga kamot ni Moroni. Si Moroni mipahayag nga wala niya gilakip bisan “ang ikagatusan nga bahin” sa rekord diha sa iyang pagpamubo (Ether 15:33).
Para kang kinsa kini nga basahon gisulat ug ngano?
Tungod kay gimubo ni Moroni ang mga palid ni Ether human ang mga Jaredite ug ang iyang kaugalingong katawhan nalaglag, iyang gituyo kini nga basahon alang sa mga tawo sa atong panahon. Si Moroni mipahimangno sa mga Hentil sa ulahing mga adlaw sa paghinulsol, pagserbisyo sa Dios, ug sa pagwagtang sa tinago nga mga kalihokan (tan-awa sa Ether 2:11–12; 8:23). Girekord usab niya ang mga pulong ni Jesukristo, nga nagdapit sa “mga lumulupyo sa yuta” sa paghinulsol, pagduol ngadto Kaniya, pagpabunyag, ug pagdawat sa kahibalo nga gipugngan gikan sa kalibutan tungod sa kawalay pagtuo (tan-awa sa Ether 4:13–18).
Kanus-a ug diin kini gisulat?
Si Ether mikompleto sa rekord sa iyang katawhan atol ug human sa katapusang dakong gubat nga mipatay sa tanan gawas sa duha ka mga Jaredite—ang iyang kaugalingon ug si Coriantumr (tan-awa sa Ether 13:13–14; 15:32–33). Dayon iyang gitaguan ang iyang mga sinulat “sa usa ka paagi nga ang mga katawhan ni Limhi nakakita kanila” (Ether 15:33; tan-awa usab sa Mosiah 8:7–9). Si Moroni mipamubo sa rekord ni Ether tali sa A.D. 400 ug A.D. 421 (tan-awa sa Mormon 8:3–6; Moroni 10:1). Si Moroni misulat nga ang mga Jaredite gilaglag dinhi “niini nga amihan nga nasud” (Ether 1:1), nga nagpasabut nga tingali anaa siya sa dapit diin sila gilaglag sa dihang gimubo niya ang ilang rekord.
Unsa man ang pipila ka mga butang nga nakalahi niini nga basahon?
Dili sama sa ubang mga basahon diha sa Basahon ni Mormon, ang basahon ni Ether wala mosaysay sa kasaysayan sa kaliwatan ni Lehi. Ang basahon nagsaysay kon sa unsang paagi ang mga Jaredite mibiya gikan sa Tore sa Babel ug mipanaw ngadto sa yuta sa saad, diin sa katapusan sila nalaglag. Ang basahon ni Ether mao ang ikaduha nga saksi sa rekord sa mga Nephite nga naghulagway nga “bisan unsa nga nasud nga manag-iya sa [gisaad nga yuta] moalagad sa Dios, o sila pagalaglagon … sa panahon nga sila hinog na diha sa kadautan” (Ether 2:9).
Ang premortal nga pagpakita ni Jesukristo ngadto sa igsoong lalaki ni Jared “nalakip uban sa labing mahinungdanon nga mga higayon sa narekord nga kasaysayan.” Kini nga hitabo “mi-establisar sa igsoong lalaki ni Jared nga lakip sa labing mahinungdanong mga propeta sa Dios sa kahangturan” (Jeffrey R. Holland, Christ and the New Covenant: The Messianic Message of the Book of Mormon [1997], 17). Ang istorya ni Moroni sa panan-awon naghatag og gamhanang pagsaksi kabahin ni Jesukristo ug nagpresentar og talagsaong mga pagtulun-an mahitungod sa kinaiya sa espiritu nga mga lawas (tan-awa sa Ether 3:4–17).
Outline
Ether 1–3 Ang Ginoo mipreserbar sa pinulongan sa mga Jaredite didto sa Tore sa Babel ug misaad nga giyahan sila ngadto sa usa ka pinili nga yuta ug mohimo kanila nga usa ka bantugan nga nasud. Midala Siya kanila ngadto sa baybayon ug mitudlo kanila sa paghimo og mga kasko alang sa ilang panaw tabok sa dagat. Ang Ginoo mipadayag sa Iyang Kaugalingon ug “sa tanan nga mga butang” (Ether 3:26) ngadto sa igsoong lalaki ni Jared.
Ether 4–5 Si Moroni misilyo sa mga sinulat sa igsoong lalaki ni Jared. Iyang girekord ang pagpasabut ni Jesukristo nga kini nga mga sinulat ipadayag ngadto niadtong magpakita og hugot nga pagtuo diha Kaniya. Si Moroni nagtudlo nga ang tulo ka mga saksi sa ulahing mga adlaw moapil sa Amahan, sa Anak, ug sa Espiritu Santo sa pagpamatuod sa Basahon ni Mormon.
Ether 6–11 Ang mga Jaredite mipanaw ngadto sa gisaad nga yuta. Ang katawhan misanay ug misugod sa pagkatag ibabaw sa yuta. Ang nagsunod-sunod nga matarung ug dautan nga mga hari nagmando sulod sa daghang henerasyon. Ang mga Jaredite hapit malaglag tungod sa tinago nga mga kalihokan. Daghang mga propeta ang mipasidaan sa katawhan sa paghinulsol, apan ang katawhan misalikway kanila.
Ether 12 Si Moroni nagtudlo nga ang hugot nga pagtuo gikinahanglan sa dili pa ang tawo makadawat og espirituhanong saksi. Siya nagpahayag ngadto sa Ginoo sa iyang kabalaka nga ang mga Hentil sa umaabut mobiay-biay sa iyang kahuyang sa pagsulat sa sagrado nga rekord, ug iyang girekord ang tubag sa Ginoo kaniya. Si Moroni nag-awhag sa ulahing mga adlaw nga mga tigbasa sa pagpangita kang Jesukristo.
Ether 13–15 Si Moroni naghisgot sa panagna ni Ether kabahin sa Bag-ong Jerusalem. Human ang mga Jaredite misalikway kang Ether, siya nakasaksi ug mirekord sa ilang hingpit nga kalaglagan.