Ether 6

Pasiuna

Human sa paghimo og mga pagpangandam sumala sa mga sugo sa Ginoo, ang mga Jaredite misakay sa ilang mga sakayan, misalig nga ang Ginoo modala kanila lahus sa ilang lisud nga panaw padulong sa gisaad nga yuta. Ang Ginoo mipadala og hangin nga mikuso-kuso sa mga kasko diha sa mga balud ug milubong niini sa dagat sa daghang mga higayon, apan kana nga hangin miduso sa mga kasko paingon sa gisaad nga yuta. Human maestablisar ang ilang mga kaugalingon diha sa bag-o nga yuta, ang katawhan mipili og hari, bisan pa sa mga pasidaan sa igsoong lalaki ni Jared.

Mga Sugyot alang sa Pagtudlo

Ether 6:1–12

Ang Ginoo mihimo sa hangin nga moduso sa mga kasko sa mga Jaredite padulong sa gisaad nga yuta

Sa dili pa magklase, isulat sa pisara ang mosunod:

Pagpakigbahin sa ebanghelyo ngadto sa usa ka higala

Pagpabiling limpyo og kadungganan

Pagpili og mga higala nga taas og mga sumbanan

Paghimo og hustong mga prayoridad sa kinabuhi

Ipasabut nga mga ehemplo kini sa mga butang nga gusto sa Ginoo nga atong buhaton. Hinoon, pipila ka mga tawo naghunahuna nga lisud kaayo kining mga butanga. Dapita ang mga estudyante sa paghunahuna og laing mga ehemplo nga mahimong idugang sa lista. Ipasabut nga ang istorya sa panaw sa mga Jaredite paingon sa gisaad nga yuta naglakip og mga baruganan nga makagiya kanato kon maglisud kita sa pagbuhat sa gisugo sa Ginoo. Awhaga ang mga estudyante samtang magtuon sila sa Ether 6 nga mangita sa mga baruganan nga makatabang kanila sa mga hagit sama niadtong nalista sa pisara.

Dapita ang usa ka estudyante sa pagbasa og kusog sa Ether 2:24–25. Hangyoa ang klase sa pagsunod, nga mangita sa pasidaan sa Ginoo ngadto sa mga Jaredite mahitungod sa kalisud sa ilang panaw padulong sa gisaad nga yuta.

Unsa man ang gisaad sa Ginoo nga Iyang buhaton aron sa pagtabang sa mga Jaredite nga moabut nga luwas ngadto sa gisaad nga yuta?

Pahinumdumi ang mga estudyante nga aron makasugakod sa mga balud ug hangin, ang mga Jaredite mihimo og mga kasko nga “hugot sama ngadto sa usa ka tadyaw” (Ether 2:17), nga adunay mga lungag sa ibabaw ug ubos nga mahimo nilang tangtangan sa tabon alang sa hangin. Dapita ang usa ka estudyante sa pagbasa og kusog sa Ether 6:1–4. Hangyoa ang klase sa pagsunod ug hibaloan ang ubang mga paagi nga nangandam ang mga Jaredite alang niini nga mga kalisdanan.

Unsa kaha ang gipasabut nga ang mga Jaredite milawig nga “nagtugyan sa ilang mga kaugalingon ngadto sa Ginoo nga ilang Dios”? (Ilang gisalig ang ilang mga kaugalingon ngadto sa Dios aron nga maatiman ug mapreserbar.)
Ngano kaha nga importante man alang sa mga Jaredite nga itugyan ang ilang mga kaugalingon ngadto sa Ginoo human mabuhat ang tanan nilang mahimo sa pag-andam sa ilang mga kaugalingon?
Ngano kaha nga daw lisud ang pagsalig sa Ginoo niini nga sitwasyon? (Kon ang mga estudyante dili mohisgut sa mosunod, mahimo nimong ipasabut nga ang mga Jaredite kinahanglang mohimo sa ilang kaugalingong mga kasko, dili sila makatimon sa ilang mga sakayan, ug labing siguro nga wala sila masayud sa agianan padulong sa gisaad nga yuta o unsa ka dugay molungtad ang panaw.)

Aron matabangan ang mga estudyante sa paghanduraw sa mga panghitabo nga gisaysay diha sa Ether 6, hangyoa sila sa paghimo og yano nga drowing sa kasko sa Jaredite diha sa mga notebook o mga scripture study journal. Dayon ipadrowing o ipalista kanila ang sulod sa mga kasko sumala sa Ether 6:1–4.

Dapita ang pipila ka mga estudyante nga magpuli-puli sa pagbasa og kusog sa Ether 6:5–11. Hangyoa ang klase sa pagtan-aw sa ilang mga drowing samtang maminaw sila ug sa paghunahuna kon sama sa unsa kaha ang pagbiyahe sa ingon nga mga sakayan.

Unsa kaha ang lisud nianang pagbiyahe sulod sa kasko sa Jaredite?
Sumala sa Ether 6:11, unsa ka dugay nga nagbiyahe ang mga Jaredite niini nga paagi?
Unsa kaha ang gipasabut sa mga pulong nga “bukid nga mga balud”? (Ether 6:6). Unsa kaha ang inyong bation kon anaa kamo sulod sa kasko sa Jaredite sa dihang ang ingon nga balud “[mo]lubong [niini] diha sa mga kahiladman sa dagat”? (Mahimo nimong pahinumduman ang mga estudyante nga ang mga Jaredite kinahanglang mohulat nga motunga ang ilang mga kasko sa ibabaw sa dili pa nila tangtangon ang tabon sa lungag aron makakuha og hangin.)

Aron matabangan ang mga estudyante nga mangandam sa pag-ila og usa ka baruganan, pangutana:

Sa unsang paagi ang mga Jaredite mipakita sa ilang pagsalig diha sa Ginoo sa ilang pagtabok sa dagat? (Tan-awa sa Ether 6:7, 9.)
Unsa ang pipila ka mga pulong diha sa Ether 6:5–11 nga naghulagway sa gibuhat sa Ginoo alang sa mga Jaredite tungod sa ilang pagsalig Kaniya?

Dapita ang mga estudyante sa pagbasa og hilum sa Ether 6:12, nga masayran ang resulta sa panaw sa mga Jaredite.

Nganong mihilak man sa kalipay ang mga Jaredite? Unsang “malumo nga mga kalooy” ang gihatag sa Ginoo kanila?

Aron matabangan ang mga estudyante sa pag-ila og baruganan nga gihulagway sa kasinatian sa mga Jaredite, pangutana:

Base sa inyong nakat-unan sa panaw sa mga Jaredite, unsay buhaton sa Ginoo alang kanato samtang kita mosalig Kaniya ug mobuhat sa Iyang kabubut-on? (Usa sa mga baruganan nga kinahanglang mailhan sa mga estudyante mao nga kon mosalig kita sa Ginoo ug mobuhat sa Iyang kabubut-on, giyahan Niya ang atong kinabuhi. Isulat kini nga baruganan diha sa pisara. Hangyoa ang mga estudyante sa pagpamalandong sa baruganan ug sa pagpakigbahin og mga kasinatian nga nakatabang kanila nga masayud nga kini tinuod. Mahimo usab nimong ipakigbahin giunsa nimo pagkasayud nga kini tinuod.)

Dapita ang mga estudyante sa paghunahuna kon unsaon nila nga mas mosalig sa Ginoo ug mosunod sa Iyang mga direksyon sa lisud nga mga sitwasyon nga tingali ilang giatubang karon. Ipasabut nga makadiskubre sila og uban pa nga mga baruganan diha sa Ether 6:1–12. Papasa ang tanan diha sa pisara gawas sa pamahayag mahitungod sa pagsalig sa Ginoo. Pagdrowing og yano nga kasko sa pikas bahin sa pisara. Sa pikas nga bahin, isulat ang Gisaad nga Yuta.

Sa unsa maikumpara ang gisaad nga yuta diha sa plano sa kaluwasan? (Kinabuhing dayon.)
Kon mag-atubang kita og mga kalisdanan sa kinabuhi, sa unsang paagi nato masunod ang ehemplo niini nga mga Jaredite? Sa unsang paagi motabang ang Ginoo kanato, sama sa Iyang pagtabang sa mga Jaredite, sa atong panaw sa pagkamortal? (Ang mga tubag sa mga estudyante kinahanglang magpakita sa mosunod nga baruganan: Kon mosalig kita sa Ginoo, mosuporta Siya kanato sa atong pag-uswag ug pagpangandam sa pagdawat sa kinabuhing dayon. Mahimo kang mosugyot nga ang mga estudyante mosulat niini nga baruganan diha sa ilang mga kasulatan tupad sa Ether 6:5–12.)

Dapita ang mga estudyante sa paghunahuna mahitungod sa kalisdanan nga ilang naagian o kasamtangang giatubang sa ilang mga kinabuhi. Pasulata sila diha sa mga notebook o mga scripture study journal mahitungod sa ilang gibati kon unsa sila ka matinud-anong miatubang niini nga mga kalisdanan ug sa unsang paagi ang Ginoo misuporta kanila.

Dapita ang pipila ka mga estudyante nga mopakigbahin sa unsay ilang gisulat. Dayon ipangutana ang mosunod:

Base sa unsay inyong gitun-an karon, unsa nga tambag ang inyong ihatag sa tawo nga nagsinati og kalisdanan?

Ether 6:13–18

Ang mga Jaredite mitudlo sa ilang mga anak nga molakaw nga mapainubsanon atubangan sa Ginoo

I-summarize ang Ether 6:13–18 pinaagi sa pagpasabut nga sa dihang ang mga Jaredite miabut sa gisaad nga yuta, misugod sila sa pag-establisar sa ilang mga pamilya ug sa pagpananom. Dapita ang mga estudyante sa pagbasa og hilum sa Ether 6:17, nga mangita kon unsay gitudlo sa mga Jaredite sa ilang mga anak. Dayon pangutan-a sa mosunod:

Unsa kaha ang gipasabut sa “paglakaw nga mapainubsanon sa atubangan sa Ginoo”? Unsay pipila ka mga ehemplo nga inyong nakita sa mga tawo nga nagsunod niini nga baruganan? Sa unsang paagi ang inyong mga ginikanan ug ang uban nag-awhag kaninyo sa paglakaw nga mapainubsanon atubangan sa Ginoo?
Unsay ipasabut nga matudloan “gikan sa kahitas-an”?
Unsa kaha ang relasyon tali sa paglakaw nga mapainubsanon sa atubangan sa Ginoo ug magtudloan gikan sa kahitas-an? (Ang mga tubag sa mga estudyante kinahanglang magpakita sa mosunod nga baruganan: Kon maglakaw kita nga mapainubsanon sa atubangan sa Ginoo, matudloan kita gikan sa kahitas-an.)

Mahimo nimong dapiton ang mga estudyante sa pagsulat mahitungod sa usa ka panahon dihang gibati nila nga sila “gitudloan gikan sa kahitas-an.” Awhaga ang pipila kanila sa pagpakigbahin sa unsay ilang gisulat. Dapita ang mga estudyante sa pagsunod sa mga baruganan nga girekord diha sa Ether 6:17.

Ether 6:19–30

Ang mga Jaredite mipili og hari

I-summarize ang Ether 6:19–22 pinaagi sa pagpasabut nga sa dihang si Jared ug ang iyang igsoong lalaki natigulang na, ang mga Jaredite nangayo og hari. Hangyoa ang mga estudyante sa pagsiksik sa Ether 6:23 sa pag-ila unsa ang gipasidaan sa igsoong lalaki ni Jared nga mahitabo kon mopili sila og usa ka hari.

Tapusa sa imong pagpamatuod sa mga baruganan niini nga leksyon.

Komentaryo ug Background nga Impormasyon

Ether 6:1–12. Ang mga Jaredite luwas nga mitabok sa dagat

Si Presidente Thomas S. Monson mitudlo kon unsaon nato nga makaandam alang sa mga hagit nga nag-atubang kanato:

“Nagpuyo kita sa panahon nga daghan dinhi sa kalibutan ang nawala gikan sa dapit sa kaluwasan nga makita sa pagsunod sa mga kasugoan. Panahon kini sa pagkamatuguton, sa kinatibuk-ang katilingban nga kanunay nagpasagad ug nagsupak sa mga balaod sa Dios. Sa kasagaran atong makita ang atong kaugalingon nga naglangoy sugat sa sulog, ug usahay ingon og ang sulog moanod kanato.

“Napahinumduman ako sa mga pulong sa Ginoo nga makita diha sa basahon ni Ether sa Basahon ni Mormon. Miingon ang Ginoo, ‘Kamo dili makatabok niining dako nga lawod gawas kon Ako moandam kaninyo batok sa mga balud sa dagat, ug sa mga hangin nga molabay ngadto, ug sa mga lunop nga moabut.’ [Ether 2:25.] Akong mga kaigsoonan, Siya nag-andam kanato. Kon kita maminaw sa Iyang mga pulong ug magsunod sa mga sugo, kita makaluhatay niining panahon sa pagkamatuguton ug pagkadautan—panahon nga matandi ngadto sa mga balud ug sa mga hangin ug sa mga baha nga makalaglag. Naghunahuna Siya kanunay kanato. Nahigugma Siya kanato ug mopanalangin kanato samtang kita nagbuhat unsa ang matarung” (“Panapos nga Pakigpulong,” Ensign o Liahona, Nob. 2009, 109).

Ether 6:22–24. Ang mga Jaredite mipili og hari

Sa tibuok mga kasulatan, ang mga propeta mipasidaan batok sa kakuyaw sa pagbaton og mga hari. Ikonsiderar ang mosunod nga mga ehemplo:

Ang igsoong lalaki ni Jared mipasidaan sa iyang katawhan nga ang pagbaton og hari modala kanila ngadto sa pagkabihag (tan-awa sa Ether 6:23).
Si Haring Mosiah mipasidaan sa iyang katawhan sa mga kakuyaw nga mapangulohan og dili matarung nga hari. Misugyot siya nga moestablisar hinoon sila og usa ka sistema sa mga maghuhukom. (Tan-awa sa Mosiah 29.)
Ang propeta sa Daang Tugon nga si Samuel mipasidaan sa mga problema sa harianon nga pagmando sa dihang ang iyang katawhan gusto nga adunay hari nga sila mahimo nga “sama sa tanang mga nasud” (tan-awa sa 1 Samuel 8).