Pasiuna sa Ikaduhang Basahon ni Nephi

Ngano nga kinahanglang tun-an kini nga basahon?

Ang basahon sa 2 Nephi makatabang sa mga estudyante nga makasabut sa sukaranang mga doktrina sa ebanghelyo, sama sa Pagkapukan ni Adan ug ni Eva, Pag-ula ni Jesukristo, ug kabubut-on. Dugang pa, kini nga basahon napuno sa mga panagna gikan nila ni Nephi, Jacob, ug Isaias, kinsa espesyal nga mga saksi sa Manluluwas. Nanagna sila bahin sa Pagpahiuli sa ebanghelyo sa ulahing mga adlaw, sa pagkatibulaag ug pagpundok sa mga katawhan sa pakigsaad sa Dios, sa Ikaduhang Pag-anhi ni Jesukristo, sa pag-abut sa Basahon ni Mormon, ug sa Milenyum. Ang basahon sa 2 Nephi naglangkob usab sa pagpasabut ni Nephi sa doktrina ni Kristo ug mitapos pinaagi sa pagpamatuod ni Nephi bahin sa Manluluwas.

Kinsa ang nagsulat niini nga basahon?

Ang anak ni Lehi nga si Nephi ang misulat niini nga basahon. Si Nephi usa ka propeta ug ang unang bantugan nga lider sa katawhan nga Nephite human sa ilang pagbulag gikan sa mga Lamanite. Ang iyang mga sinulat nagpadayag nga iyang nasinati ang matubsanong gugma sa Ginoo (tan-awa sa 2 Nephi 4:15–35; 33:6) ug nagtinguha sa tibuok niyang kalag nga mapadangat ang kaluwasan ngadto sa iyang katawhan (tan-awa sa 2 Nephi 33:3–4). Aron matuman kini nga katuyoan, gitudloan niya ang iyang katawhan nga motuo kang Jesukristo ug miestablisar og usa ka templo.

Para kang kinsa gisulat kini nga basahon ug ngano?

Nagsulat si Nephi nga naghunahuna og tulo ka pundok sa mga tawo: ang kaliwatan sa iyang amahan, ang mga katawhan sa pakigsaad sa Ginoo sa ulahing mga adlaw, ug ang tanang katawhan sa kalibutan (tan-awa sa 2 Nephi 33:3, 13). Ang basahon sa 2 Nephi gisulat diha sa gagmay nga mga palid ni Nephi, nga gitudlo sa Ginoo nga mahimong usa ka rekord sa “pagpangalagad ug [sa] mga panagna” ni Nephi ug sa iyang kaliwatan (1 Nephi 19:3–5). Niini nga mga palid, girekord ni Nephi “ang mga butang sa [iyang] kalag, ug daghan nga mga kasulatan diin gikulit diha sa mga palid nga tumbaga.” Gipasabut niya nga nagsulat siya “alang sa kasayuran ug kaayohan sa [iyang] mga anak” (2 Nephi 4:15). Namahayag siya, “Kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, ug kami nagsulat sumala sa among mga panagna, nga ang among mga anak mahimo nga masayud sa unsa nga tinubdan sila mahimo nga mangita alang sa kapasayloan sa ilang mga sala” (2 Nephi 25:26). Gitapos niya ang iyang rekord pinaagi sa pagdapit sa tanang katawhan sa “[pag]paminaw ngadto sa [iyang] mga pulong ug [mo]tuo diha ni Kristo” (2 Nephi 33:10).

Kanus-a ug diin kini gisulat?

Nagsugod sa pagsulat si Nephi sa istorya nga nahimong 2 Nephi niadtong mga 570 B.C., 30 ka tuig human siya ug ang iyang pamilya mibiya sa Jerusalem. Gisulat niya kini sa dihang didto siya sa yuta sa Nephi (tan-awa sa 2 Nephi 5:8, 28–34).

Unsa ang pipila ka mga butang nga nakalahi niini nga basahon?

Bisan tuod nga si Nephi mao ang tagsulat sa 2 Nephi, ang basahon usa ka hinugpong sa mga pagtulun-an gikan sa nagkadaiyang mga tinubdan. Sama sa gipakita sa mosunod nga lista, daghang mga kapitulo diha sa basahon naglakip sa mga kinutlo gikan sa ubang mga propeta. Tungod kay sila si Lehi, Jacob, ug Isaias nakakita man kang Jesukristo ug mga saksi Kaniya, gilakip ni Nephi ang pipila sa ilang mga pagtulun-an nga naningkamot sa pagdani sa mga magbabasa nga motuo kang Jesukristo. Sila si Lehi ug Jacob mikutlo usab sa ubang mga propeta diha sa ilang mga wali.

Ang mga pagtulun-an ni Lehi narekord diha sa 2 Nephi 1–4. Diha sa 2 Nephi 3:6–21, gikutlo ni Lehi si Jose sa Ehipto.
Ang mga pagtulun-an ni Nephi narekord diha sa 2 Nephi 4–5 ug 2 Nephi 11–33. Daghan og gikutlo si Nephi gikan ni Isaias diha sa 2 Nephi 12–24 and 2 Nephi 27.
Ang mga pagtulun-an ni Jacob narekord diha sa 2 Nephi 6–10. Diha sa 2 Nephi 6:6–7 ug 2 Nephi 7–8, gikutlo ni Jacob si Isaias.

Ang basahon sa 2 Nephi naghisgot usab sa kamatayon ni Lehi (tan-awa sa 2 Nephi 4:12) ug sa pagkabahin sa kaliwatan ni Lehi ngadto sa duha ka katawhan—ang mga Lamanite ug ang mga Nephite (tan-awa sa 2 Nephi 5).

Outline

2 Nephi 1–4 Sa wala pa siya namatay, gitambagan ug gipanalanginan ni Lehi ang iyang kaliwatan.

2 Nephi 4–8 Naghimaya si Nephi diha sa Ginoo. Gipangulohan niya ang iyang mga sumusunod ngadto sa usa ka dapit nga ilang gitawag og Nephi. Girekord ni Jacob ang mga pagtulun-an mahitungod sa pagkatibulaag ug pagpundok sa Israel.

2 Nephi 9–10 Nagtudlo si Jacob bahin sa Pag-ula ni Jesukristo. Gipanagna usab niya ang pagsalikway sa mga Judeo kang Jesukristo ug ang umaabut nga pagpundok sa mga Judeo ug mga Hentil diha sa gisaad nga yuta.

2 Nephi 11–24 Gipahayag ni Nephi ang iyang kahimuot diha sa pagpamatuod bahin ni Jesukristo. Gikutlo niya ang mga panagna ni Isaias kalabut sa pagkatibulaag ug pagpundok sa Israel, ang pagpaubos sa mapahitas-on ug dautan sa dili pa ang Ikaduhang Pag-anhi, ug ang pagkatawo, misyon, ug milenyal nga paghari sa Mesiyas.

2 Nephi 25–27 Gipanagna ni Nephi ang bahin sa Pagkalansang sa Krus sa Manluluwas, Pagkabanhaw, ug pagbisita ngadto sa mga Nephite; ang pagkatibulaag ug pagpundok sa mga Judeo; ang pagkalaglag sa mga Nephite; ang Apostasiya; ang pag-abut sa Basahon ni Mormon; ug ang Pagpahiuli.

2 Nephi 28–30 Mipasidaan si Nephi batok sa pagkadautan sa katapusang mga adlaw, mipasabut sa umaabut nga tahas sa Basahon ni Mormon, ug mga panagna bahin sa pagpundok sa mga kalag ngadto sa pakigsaad.

2 Nephi 31–33 Giawhag kita ni Nephi nga mosunod kang Kristo, magbusog sa Iyang mga pulong, ug molahutay hangtud sa katapusan. Nagpamatuod siya nga gisulat niya ang mga pulong ni Kristo.