Leksyon sa Home-Study
2 Nephi 4–10 (Unit 6)
Materyal sa Pagpangandam alang sa Home-Study Teacher
Summary sa mga Leksyon sa Daily Home-Study
Ang mosunod nga summary sa mga doktrina ug mga baruganan nga nakat-unan sa mga estudyante samtang nagtuon sila sa 2 Nephi 4–10 (unit 6) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.
Day 1 (2 Nephi 4–5)
Samtang nagtuon ang mga estudyante sa 2 Nephi 4, nag-focus sila sa baruganan nga suportahan sa Dios kadtong mobutang sa ilang pagsalig diha Kaniya (tan-awa sa 2 Nephi 4:12–35) ug misulat diha sa ilang scripture study journal bahin sa usa ka paagi nga gusto nilang mapalambo ang ilang pagsalig sa Dios. Diha sa 2 Nephi 5 nakita nila ang mga ehemplo sa mosunod nga mga kamatuoran: Ang kahilwasan [safety] moabut gikan sa pagtuman sa mga pinadayag sa Dios (tan-awa sa 2 Nephi 5:1–8). Samtang ang ebangheyo ni Jesukristo nahimong paagi sa atong pagpakabuhi, molambo kita diha sa kalipay (tan-awa sa 2 Nephi 5:9–18, 26–27). Gisusi sa mga estudyante ang ilang kinabuhi ug mitino nga mobuhat sila og butang aron mas hingpit nga magpakabuhi “subay sa matang sa pagkamalipayon.”
Day 2 (2 Nephi 6–8)
Dinhi niini nga leksyon nakat-unan sa mga estudyante nga ang Ginoo maloloy-on niadtong mobalik ngadto Kaniya (tan-awa sa 2 Nephi 6). Namalandong sila kon sa unsang paagi nga ang Ginoo nagmaloloy-on ngadto kanila. Nakat-unan usab nila nga nagtinguha ang Manluluwas sa pagtubos sa Iyang mga katawhan sa pakigsaad ug duna sa tanang gahum sa pagbuhat sa ingon (tan-awa sa 2 Nephi 7–8).
Day 3 (2 Nephi 9)
Samtang gisugdan sa mga estudyante ang ilang pagtuon sa 2 Nephi 9, nakat-unan nila kon unsay mahitabo kon wala pa ang Pag-ula. Gitun-an usab nila ang mosunod nga mga kamatuoran: Ang Pag-ula ni Jesukristo mipalingkawas sa tanang katawhan gikan sa pisikal ug espirituhanong kamatayon nga miresulta tungod sa Pagkapukan (tan-awa sa 2 Nephi 9:1–22). Pinaagi sa Pag-ula ni Jesukristo, atong mabuntog ang mga sangputanan sa atong mga sala samtang kita magbaton og hugot nga pagtuo diha ni Jesukristo, maghinulsol, magpabunyag, ug molahutay hangtud sa katapusan (tan-awa sa 2 Nephi 9:14–27). Misulat og paragraph ang mga estudyante nga mipahayag sa ilang mga gibati bahin sa sakripisyo sa Manluluwas alang kanila.
Day 4 (2 Nephi 9–10)
Samtang nagtuon ang mga estudyante sa nahabilin sa 2 Nephi 9 ug nagtuon sa 2 Nephi 10, namalandong sila kon hain sa ilang mga pagpili ang mipabulag kanila gikan sa Ginoo ug hain ang nakatabang kanila nga mas mahiduol Kaniya. Nakat-unan nila nga samtang mopili kita nga moduol sa Ginoo ug magpakabuhi sumala sa Iyang kabubut-on, atong madawat ang kahingpitan sa mga panalangin sa Pag-ula.
Pasiuna
Lakip sa daghang importante nga mga kamatuoran nga gitun-an sa mga estudyante karong semanaha, hatagi og gibug-aton ang kamahinungdanon sa Pag-ula ni Jesukristo. Pag-ampo alang sa giya kon sa unsang paagi nga mas makatabang ka nga makasabut ug makasalig sila sa Pag-ula. Samtang magtudlo ka, awhaga ang mga estudyante sa pagpamalandong sa unsay kinahanglan nilang buhaton aron makadawat sa mga panalangin sa Pag-ula sa Manluluwas.
Hinumdumi: Samtang mainampuon kang mangandam sa imong leksyon, ikonsiderar ang mga panginahanglan sa imong mga estudyante—ilabi na ang mga panginahanglan niadtong tingali nanglimbasug. Samtang nag-ampo ka alang sa indibidwal nga mga estudyante ug alang sa giya kon unsaon nga mas makatudlo kanila sa mga doktrina ug mga baruganan nga makita diha sa mga kasulatan, ang Espiritu Santo modasig kanimo nga masayud kon unsaon pagtubag ang mga panginahanglan sa mga estudyante.
Mga Sugyot alang sa Pagtudlo
2 Nephi 4–5
Gipahayag ni Nephi ang iyang pagsalig sa Ginoo; gilahi sa Ginoo ang mga Nephite gikan sa mga Lamanite; ang mga Nephite nagpuyo subay sa matang sa pagkamalipayon
Isulat ang impormasyon sa mosunod nga tsart diha sa pisara, o andama kini isip usa ka handout.
|
|
Tungaa ang klase. Paandama ang katunga sa mga estudyante sa pagtudlo sa materyal ubos sa 2 Nephi 4 ug ang pikas katunga mangandam sa pagtudlo sa materyal ubos sa 2 Nephi 5.
Paresa ang matag estudyante nga gi-assign sa 2 Nephi 4 sa usa ka estudyante nga gi-assign sa 2 Nephi 5. Dapita ang mga estudyante sa pagpakigbahin sa ilang mga pares sa materyal nga ilang giandam alang sa ilang mga assignment.
2 Nephi 6–8
Nanagna si Jacob bahin sa pagkatibulaag ug pagpundok sa Israel ug mikutlo sa mga panagna ni Isaias bahin sa kamatinud-anon sa Manluluwas ngadto sa Iyang mga katawhan sa pakigsaad.
Pahinumdumi ang mga estudyante nga ang 2 Nephi 6–9 mao ang unang adlaw sa wali nga gihatag ni Jacob sa iyang katawhan. Ang ikaduhang adlaw sa iyang pagtudlo nagpadayon diha sa 2 Nephi 10. Diha sa 2 Nephi 6, nanagna si Jacob nga ang mga Judeo mosalikway sa Ginoo ug pagatibulaagon. Ipabasa sa mga estudyante ang 2 Nephi 7:1–2, ug dapita sila sa pagsulti og balik kon unsay gipasabut niini sa kaugalingon nilang mga pulong.
2 Nephi 9
Nagtudlo si Jacob kon sa unsang paagi nga ang Pag-ula sa Manluluwas makapalingkawas kanato gikan sa mga epekto sa Pagkapukan ug sa mga sangputanan sa sala
Ipakigbahin ang mosunod nga pamahayag ni Presidente Ezra Taft Benson:
“Ingon nga ang tawo dili magtinguha og pagkaon hangtud nga gutumon siya, dili usab siya magtinguha sa kaluwasan ni Kristo hangtud nga masayud siya nganong nagkinahanglan siya ni Kristo.
“Walay usa ang igo ug tukma nga nasayud nganong gikinahanglan niya si Kristo hangtud nga iyang masabtan ug madawat ang doktrina sa Pagkapukan ug ang epekto niini sa tanang katawhan. Ug walay laing basahon sa kalibutan nga mas mipasabut niining mahinungdanong doktrina sama sa Basahon ni Mormon” (“The Book of Mormon and the Doctrine and Covenants,” Ensign, Mayo 1987, 85).
Ipahunahuna sa mga estudyante nga dunay usa ka higala nga nangutana, “Nganong nagkinahanglan man kita sa Manluluwas?” Dapita ang klase nga mangandam sa pagtubag niini nga pangutana base sa unsay ilang nakat-unan diha sa 2 Nephi 9. Iparibyu nila ang 2 Nephi 9:7–10, 19–22 alang sa tubag. Hangyoa ang mga estudyante sa pagpakigbahin sa ilang mga tubag niini nga pangutana.
Aron matabangan ang mga estudyante nga mas makasabut kon sa unsang paagi nga si Jesukristo makaluwas kanato gikan sa mga sangputanan sa Pagkapukan, basaha ang analohiya ni Presidente Joseph Fielding Smith diha sa materyal sa leksyon alang sa 2 Nephi 9:10–27, sa Unit 6: Day 3, sa manwal sa estudyante. Mahimo nimong ikonsiderar ang pagdapit og usa ka estudyante nga magdrowing diha sa pisara o sa usa ka piraso nga papel sa unsay gihulagway ni Presidente Smith. Kon mopili ka nga ang usa ka estudyante magdrowing diha sa pisara o sa usa ka piraso nga papel, mahimo nimong dapiton ang estudyante nga ipasabut usab ang drowing.
Dapita ang mga estudyante nga maghunahuna bahin sa ilang kaugalingong mga pagbati nga natanggong sa lawom nga lungag ug nahibulag sa Dios tungod sa mga pagpili nga ilang nahimo. Ipasabut nga kon wala pa ang Pag-ula ni Jesukristo, walay mga oportunidad alang sa paghinulsol, walay paglaum, ug walay makalingkawas niining mga sangputanan sa sala.
Ipabasa sa usa ka estudyante ang 2 Nephi 9:21–23, ug hangyoa ang pipila ka mga estudyante sa pagpasabut niini sa kaugalingon nilang mga pulong. Bisan kon mahimong isulti nila kini sa lain-laing paagi, siguroha nga ang mosunod nga kamatuoran klaro: Pinaagi sa Pag-ula ni Jesukristo, atong mabuntog ang mga sangputanan sa atong mga sala.
Ipasabut nga usa sa dakong mga oportunidad nga anaa tungod sa pagtigum isip usa ka grupo mao ang kahigayunan sa pagpakigbahin sa mga pagbati ug mga pagpamatuod. Dapita ang mga estudyante sa pagpakigbahin sa ilang mga pagbati ug mga pagpamatuod bahin ni Jesukristo ug sa Iyang Pag-ula. Kon nanglimbasug sila sa pagpakigbahin, mahimo nimong ipabasa nila ang ilang gisulat diha sa ilang mga scripture study journal alang sa day 3, assignment 4. Mahimo nimong idugang ang imong pagpamatuod ngadto sa ilang pagpamatuod.
Ipahunahuna sa klase nga dunay usa ka tawo nga natakbuyan og grabe kaayo nga sakit. Dayon hisguti ang mosunod nga mga pangutana:
-
Nganong importante nga masabtan sa tawo ang panginahanglan nga mangayo og tabang?
-
Nganong importante nga masabtan usab sa tawo kon unsay buhaton aron makadawat og tabang?
-
Unsay resulta kon ang tawo nakasabut sa panginahanglan alang sa tabang apan wala makasabut kon unsay buhaton aron makadawat niini?
Pangutan-a ang mga estudyante kon nahibalo ba sila kon unsay kinahanglan gayud nilang buhaton aron makadawat sa mga panalangin sa Pag-ula. Pahinumdumi sila nga natun-an nila ang 2 Nephi 9:23, 42–52 ug nahibaloan ang pipila ka mga lihok ug mga kinaiya nga makatabang kanato nga moduol ngadto ni Kristo ug modapit sa gahum sa Iyang maulaong sakripisyo sa atong kinabuhi. Iparibyu nila ng mga kasulatan nga ilang gimarkahan ug ang lista nga ilang gihimo diha sa ilang mga scripture study journal bahin niadtong mga butang nga modala kanato ngadto sa Manluluwas (day 4, assignment 1). Dapita ang mga estudyante sa pagpakigbahin kon sa unsang paagi nga ang usa o dugang pa niining mga lihok ug mga kinaiya nakapaduol kanila ngadto sa Manluluwas. Ipakigbahin ang imong pagpamatuod nga ang pagsunod sa mga baruganan nga gitudlo niining mga bersikulo makatabang kanato nga makadawat sa kahingpitan sa mga panalangin sa Pag-ula.
2 Nephi 10
Giawhag ni Jacob ang iyang katawhan nga magmaya ug moduol sa Ginoo
Basaha ang 2 Nephi 10:23–24 uban sa mga estudyante. Pahinumdumi ang mga estudyante nga sa day 3, assignment 6, gidapit sila sa pagtino kon unsay ilang buhaton aron makig-uli sa ilang kaugalingon ngadto sa kabubut-on sa Dios. Awhaga sila sa pagsunod niini nga pagdapit.
Hangyoa ang mga estudyante sa pagpakigbahin og dugang nga mga hunahuna nga ilang nadawat gikan sa mga kapitulo nga ilang gitun-an karong semanaha. Kon itugot sa panahon, tapusa ang leksyon karong semanaha pinaagi sa pagkanta o pagbasa og dungan sa mga pulong sa himno nga “I Stand All Amazed [Ako Nagpabilin nga Natingala]” (Hymns, nu. 193) o laing himno bahin sa Pag-ula ni Jesukristo. Ipakigbahin ang imong pagpamatuod bahin sa kaimportante sa pagduol ngadto sa Manluluwas ug sa katinuod sa mga panalangin sa Pag-ula.
Sunod nga Unit (2 Nephi 11–25)
Samtang magtuon ang mga estudyante sa 2 Nephi 11–25 karong umaabut nga semana, mailhan nila ang mga pulong ni Isaias ug sa unsang paagi niya nakita ang atong panahon ug mipasidaan kanato base sa unsay iyang nakita. Ang pipila sa iyang mga pasidaan dunay kalabutan sa atong media, sa atong mga sinina, sa atong pamaagi sa pagpakabuhi, ug sa atong mga kinaiya. Awhaga ang mga estudyante sa pagbasa ug paghagdaw kutob sa ilang mahimo gikan sa 2 Nephi 11–25, bisan kon wala sila makasabut sa matag pulong.