Leksyon 119

3 Nephi 8–10

Pasiuna

Traynta y tres ka tuig human sa pagkakita sa timailhan sa pagkatawo sa Manluluwas, ang mga Nephite misugod sa pagpangita sa timailhan sa kamatayon sa Manluluwas nga gipanagna ni Samuel ang Lamanite. Bisan og daghan ang mga timailhan nga nahatag, ang mga pagduha-duha ug panaglalis mitumaw diha sa mga katawhan. Sulod sa sunod nga tuig, ang panagna ni Samuel natuman. Human sa dagkong bagyo, mga paglinog, ug ubang mga kalamidad nga nakahimo og dakong kalaglagan, ang kangitngit mitabon sa yuta sulod sa tulo ka adlaw. Diha sa kangitngit, ang mga katawhan nga nakalahutay sa kalaglagan nakadungog sa tingog ni Jesukristo. Siya midapit kanila sa paghinulsol ug mobalik ngadto Kaniya. Sa dihang miiway na ang kangitngit, ang panagbakho sa katawhan napulihan sa hingpit nga kalipay ug pagdayeg ni Jesukristo.

Mga Sugyot alang sa Pagtudlo

3 Nephi 8:1–18

Ang dakong kalaglagan nagtimaan sa kamatayon ni Jesukristo, sa pagtuman sa panagna ni Samuel ang Lamanite

Sugdi ang klase pinaagi sa pagpangutana sa mosunod:

• Aduna bay bisan unsang timailhan nga inyong nahibaloan nga nahitabo na, nga nagpakita nga ang Ikaduhang Pag-anhi sa Manluluwas duol na? (Mahimo nimong ipasabut nga daghang mga panagna, sama sa Pagpahiuli sa ebanghelyo, ang pag-anhi ni propeta Elijah, ug ang ebanghelyo gisangyaw sa tibuok kalibutan, natuman na o nagkatuman.)

• Unsa ang inyong bation kon inyong mailhan ang usa ka butang isip usa ka klarong timailhan nga nagsingabut na ang Ikaduhang Pag-anhi sa Manluluwas?

Ipasabut nga nagpuyo kita sa panahon nga susama sa panahon nga hapit na mibisita si Jesukristo sa mga Nephite. Sama sa mga Nephite nga nagbantay sa mga timailhan sa kamatayon ug Pagkabanhaw ni Jesukristo nga gipanagna ni Samuel ang Lamanite, kita kinahanglang magbantay sa mga timailhan sa Ikaduhang Pag-anhi sa Manluluwas.

Dapita ang mga estudyante sa pagbasa og hilum sa 3 Nephi 8:3–4, nga mangita sa kalainan kon unsa ang gibati sa pipila sa mga Nephite mahitungod sa mga timailhan. Hangyoa ang mga estudyante sa pagreport sa unsay ilang nakit-an. (Bisan og ang mga tawo nagbantay sa mga timailhan “uban sa dako nga tinguha”, adunay “dako kaayo nga mga pagduda ug mga panaglalis” taliwala kanila.)

• Sa unsang mga paagi nga ang sitwasyon nga gihulagway diha sa 3 Nephi 8:3–4 susama sa kahimtang sa kalibutan karon?

• Sa unsang paagi kita makapalig-on sa atong pagtuo kang Jesukristo bisan kon daghan sa nagpalibut kanato ang nagpahayag og pagduha-duha?

Pangutana sa mga estudyante kon nakasinati ba sila sukad og usa ka mapintas nga bagyo, linog, o laing kalamidad. Samtang motubag ang mga estudyante, dapita sila sa pagpakigbahin kon unsay ilang gibati sa panahon ug pagkahuman sa kasinatian.

Dapita ang usa ka estudyante sa pagbasa og kusog sa 3 Nephi 8:5–7. Hangyoa ang klase sa pagsunod, nga mangita kon unsay nahitabo sa ika-34 nga tuig human sa pagkatawo ni Jesukristo. Dayon dapita ang mga estudyante sa pagbasa og hilum sa 3 Nephi 8:8–18, nga mangita sa unsay nahitabo sa mga lumulupyo diha sa mga dakbayan. Ipareport sa mga estudyante kon unsay ilang nakit-an. Pahinumdumi ang mga estudyante nga si Samuel ang Lamanite nanagna niining mga butanga (tan-awa sa Helaman 14:20–27). Ipasabut og maayo nga ang tanang gipamulong sa mga propeta matuman ug nga ang Dios mohimo nga ang mga dautan manubag sa ilang mga binuhatan.

3 Nephi 8:19–25

Ang kangitngit mitabon sa yuta sulod sa tulo ka adlaw

Ipasabut nga paghunong sa mga unos ug linog, ang kangitngit mitabon sa yuta sulod sa tulo ka adlaw. Palunga ang mga suga sa kwarto sa makadiyot. Dayon pangutana sa mga estudyante kon nakasulay na ba sila sukad nga maanaa sa usa ka mangiob nga lugar, sama sa usa ka langub o usa ka kwarto nga walay mga bintana.

• Unsay inyong gibati sa dihang anaa kamo niana nga dapit?

Ipasabut nga ang kangitngit nga mitabon sa yuta sulod sa tulo ka adlaw lahi ra kay sa kangitngit gumikan sa pagpalong sa mga suga o pag-adto sa usa ka dapit nga walay mga bintana. Hangyoa ang mga estudyante sa pagbasa og hilum sa 3 Nephi 8:19–23, nga mangita sa mga pulong nga naghulagway sa kangitngit nga nasinati sa mga Nephite. (Ang mga tubag mahimong maglakip sa “bagâ nga kangitngit,” “inalisngaw sa kangitngit,” “mga gabon sa kangitngit”, ug “walay kahayag.”)

Hangyoa ang mga estudyante sa pagbasa og hilum sa 3 Nephi 8:23–25, nga mangita sa epekto sa kangitngit diha sa mga Nephite nga naluwas sa pagkalaglag. Ipareport sa mga estudyante kon unsay ilang nakit-an.

3 Nephi 9:1–14

Diha sa kangitngit, si Jesukristo nagdapit niadtong naluwas sa kalaglagan sa paghinulsol ug moduol ngadto Kaniya

Isulat ang mosunod nga mga pangutana diha sa pisara. Dapita ang mga estudyante sa pagbasa og hilum sa 3 Nephi 9:1–12, nga mangita sa mga tubag niining mga pangutana.

Ngano nga nahitabo kining kalaglagan?

Unsay reaksyon ni Satanas niining kalaglagan?

Unsay gitudlo niini mahitungod ni Satanas ug unsaon niya sa pagtratar kadtong mosunod kaniya?

Basaha og kusog ang 3 Nephi 9:13–14 ngadto sa klase. Hangyoa ang mga estudyante sa pagsunod, nga mangita sa imbitasyon sa Manluluwas alang niadtong naluwas gikan sa kalaglagan. Hangyoa ang mga estudyante sa paghunahuna niadtong mga Nephite, nga nagpaminaw sa tingog sa Manluluwas diha sa hingpit nga kangitngit. Sila “naluwas tungod kay [sila] labaw nga matarung kay” niadtong kinsa nangamatay, apan sila kinahanglan gihapon nga maghinulsol ug mag-usab (tan-awa sa 3 Nephi 9:13; 10:12).

• Unsa kaha ang gibati sa mga Nephite sa dihang sila nakabati niining imbitasyon gikan sa Manluluwas? Ngano man?

Dapita ang usa ka estudyante sa pagbasa sa mosunod nga pamahayag ni Elder C. Scott Grow sa Seventy:

“Si Jesukristo ang Bantugan nga Mag-aalim sa atong mga kalag. …

“Kon makasala kita, si Satanas moingon kanato nga nawala na kita. Sa sukwahi, ang atong Manunubos mitanyag og katubsanan ngadto sa tanan—bisan unsa pa ang sayop natong nahimo—bisan gani kaninyo ug kanako” (“Ang Milagro sa Pag-ula,” Ensign o Liahona, Mayo 2011, 109–10).

Ipamatuod nga ang imbitasyon sa Manluluwas sa 3 Nephi 9:13—sa pagduol ngadto Kaniya ug nga maayo—gipadangat sa matag usa kanato. Aron ang Manluluwas moayo kanato, kinahanglan gayud nga kita modawat sa Iyang imbitasyon sa pagduol ngadto Kaniya, maghinulsol sa atong mga sala, ug makabig. Hangyoa ang mga estudyante sa paghunahuna mahitungod sa mga aspeto sa ilang kinabuhi nga sila nagkinahanglan nga ayuhon sa Manluluwas. Dayon dapita sila sa pagtubag sa mosunod nga pangutana diha sa mga notebook o mga scripture study journal:

• Unsa man ang kinahanglan ninyong buhaton aron inyong madawat ang pagkaayo sa inyong kinabuhi gikan sa Manluluwas?

Personal nga mga pangutana

Ang personal nga mga pangutana makatabang sa mga estudyante nga magamit ang mga kamatuoran sa ebanghelyo. Hinoon, tungod sa matang niini nga mga pangutana, mahimong magduha-duha ang mga estudyante sa pagsulti sa ilang tubag niini. Ang pagdapit sa mga estudyante sa pagtubag sa personal nga mga pangutana pinaagi sa pagsulat nagtugot kanila nga makatubag sa tago, sa mas bukas ug kinasingkasing nga mga tubag. Bisan pa man, kinahanglan imo silang pahimangnoan nga dili magsulat mahitungod sa kompidensyal nga mga butang, sama sa nangaging mga sala o kalapasan.

3 Nephi 9:15–22

Ang Manluluwas namahayag nga pinaagi sa Iyang sakripisyo, ang balaod ni Moises natuman

Basaha og kusog ang 3 Nephi 9:19. Hangyoa ang klase sa pagsunod, nga mangita sa unsay gisulti ni Jesukristo nga dili na Siya modawat gikan sa mga Nephite. Tingali gikinahanglan nga mapahinumduman ang mga estudyante nga ang mga Nephite nagsunod sa balaod ni Moises niining panahona. Isip kabahin sa balaod ni Moises, ang Ginoo misugo sa Iyang mga katawhan sa paghalad og hayop nga isakripisyo isip usa ka matang ug pagkasama sa sakripisyo sa Manluluwas pinaagi sa Iyang Pag-ula.

Dapita ang mga estudyante sa pagbasa og hilum sa 3 Nephi 9:20, nga mangita kon unsay gisulti sa Manluluwas kon unsa nay ihalad sa mga Nephite karon isip usa ka sakripisyo. Ipareport sa mga estudyante kon unsay ilang nakit-an.

• Unsa kaha ang gipasabut sa pagtanyag og sakripisyo nga “usa ka masulub-on nga kasingkasing ug usa ka mahinulsulon nga espiritu”?

• Unsa nga mga panalangin ang gisaad sa Manluluwas ngadto niadtong moduol Kaniya uban sa masulub-on nga kasingkasing ug mahinulsulon nga espiritu?

Si Elder D. Todd Christofferson sa Korum sa Napulog Duha ka mga Apostoles mitudlo og usa ka paagi sa paghunahuna mahitungod sa mga pulong nga “masulub-on nga kasingkasing” ug “mahinulsulon nga espiritu.” Basaha ang mosunod nga pamahayag, nga maghangyo sa mga estudyante sa pagpaminaw alang sa mga pulong nga gigamit ni Elder Christofferson aron sa pagtabang kanato nga makasabut niini nga mga pulong:

“Inyong mahalad ngadto sa Ginoo ang gasa sa inyong masulub-on o mabasulon nga kasingkasing ug sa inyong mahinulsulon o masulundon, nga espiritu. Sa tinuod lang, mao kini ang gasa sa inyong kaugalingon—kon unsa gayud kamo ug kon unsa gayud ang inyong maabut.

“Aduna bay butang diha ninyo o sa inyong kinabuhi nga dili putli o dili takus? Kon inyo kining wagtangon, kana maoy usa ka gasa ngadto sa Manluluwas. Aduna bay maayong pamatasan o kalidad nga kulang diha sa inyong kinabuhi? Kon inyo kining sagupon ug mohimo niini nga parte sa inyong kinaiya, naghatag kamo og gasa ngadto sa Ginoo” (“Kon Makabig Na Kamo,” Ensign o Liahona, Mayo 2004, 12).

• Unsang pulonga ang gigamit ni Elder Christofferson aron atong masabtan ang mga pulong nga “masulub-on nga kasingkasing”? (Mahinulsulon.) Unsa kaha ang gipasabut sa mahinulsulon nga kasingkasing?

• Unsang pulonga ang gigamit ni Elder Christofferson aron atong masabtan ang mga pulong “mahinulsulon nga espiritu”? (Masulundon.) Unsaon nimo paghulagway ang usa ka tawo nga adunay usa ka masulundon nga espiritu?

Hangyoa ang mga estudyante sa pagbasa og hilum sa 3 Nephi 9:21–22, nga mangita sa paghulagway sa Manluluwas kon unsaon nato pagduol ngadto Kaniya. Ipareport nila kon unsa ang ilang makit-an. Ipakita ang litrato sa usa ka gamayng bata, mahimo kini nga gikan sa imong pamilya.

• Hunahunaa kon unsaon kaha sa pagduol sa gamayng bata ngadto sa Manluluwas? Sa unsang paagi nga kini makatabang kaninyo nga makasabut kon sa unsang paagi kita kinahanglan nga moduol ngadto sa Manluluwas?

Isulat ang mosunod diha sa pisara:

Kon kita moduol ngadto kang Kristo inubanan sa masulub-on nga kasingkasing ug mahinulsulon nga espiritu, Siya mo …

Dapita ang mga estudyante sa pagribyu sa 3 Nephi 9:13–15, 19–22 aron sa pagtino sa mga paagi nga makompleto ang pamahayag diha sa pisara. Dapita sila sa pagreport kon unsay ilang makit-an. Ang mga tubag mahimong maglakip nga Siya moayo kanato (tan-awa sa 3 Nephi 9:13), mohatag kanato og kinabuhing dayon (tan-awa sa 3 Nephi 9:14), ug modawat kanato (tan-awa sa 3 Nephi 9:22). Human makatubag ang mga estudyante, kompletuha ang pamahayag sa pisara: Kon moduol kita kang Kristo uban sa masulub-on nga kasingkasing ug mahinulsulon nga espiritu, Siya modawat kanato, moayo kanato, ug mohatag kanato og kinabuhing dayon.

3 Nephi 10

Ang Ginoo nagtanyag sa pagpundok sa Iyang mga katawhan ingon sa himongaan nga nagpundok sa iyang mga piso

I-summarize ang 3 Nephi 10:1–3 pinaagi sa pagpasabut nga human madungog ang tingog sa Manluluwas, ang mga katawhan natingala pag-ayo nga sila nahilum sulod sa daghang oras. Dayon Siya namulong pag-usab ngadto sa mga katawhan.

Dapita ang pipila ka estudyante nga magpuli-puli sa pagbasa og kusog sa 3 Nephi 10:4–6. Ipasabut nga dinhi niining mga bersikulo, ang Manluluwas namulong bahin sa balay ni Israel, ang Iyang mga katawhan sa pakigsaad.

• Sa unsang paagi nga ang Manluluwas sama sa usa ka himongaan nga nanalipod sa iyang mga piso gikan sa kakuyaw? Nganong ang Manluluwas wala mopundok ug manalipod sa tanan sa balay ni Israel? (Sila dili moduol ngadto Kaniya.)

• Unsa ang gisaad sa Manluluwas niadtong maghinulsol ug mobalik ngadto Kaniya? (Siya mopundok kanila sama sa himongaan nga nagpundok sa iyang mga piso.)

Dapita ang mga estudyante sa pagtubag sa mosunod nga pangutana diha sa mga notebook o mga scripture study journal. (Mahimo nimong isulat kining pangutana sa pisara o basahon kini sa hinay aron ang mga estudyante makasulat niini.)

• Kanus-a ninyo nabati ang imbitasyon sa Manluluwas sa pagdawat sa Iyang pag-amuma ug panalipod?

Dapita ang usa ka estudyante sa pagbasa og kusog sa 3 Nephi 10:9–11. Hangyoa ang klase sa pagsunod, nga mangita sa unsay nahitabo human ang Manluluwas namulong ngadto sa mga katawhan. Mahimo nimong tapuson sa pagpamatuod nga ang Manluluwas maloloy-on sa tanang moduol Kaniya uban sa masulub-on nga kasingkasing ug mahinulsulon nga espiritu. Mahimo usab nimong ipasabut nga sa sunod nga leksyon, ang mga estudyante maghisgot sa pagbisita sa Manluluwas ngadto sa mga tawo ug kon sa unsang paagi Siya personal nga nangalagad sa matag usa kanila.

Komentaryo ug Background nga Impormasyon

3 Nephi 9:2. “Ang yawa nagkatawa, ug ang iyang mga anghel nalipay”

Si Elder Robert D. Hales sa Korum sa Napulog Duha ka mga Apostoles mitudlo mahitungod sa reaksyon sa kaaway kon kita makasala:

“‘Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay.’ [2 Nephi 2:25.]

“Usahay malimot kita nga ang atong Langitnong Amahan nagtinguha nga kada usa kanato makabaton og hingpit nga kalipay. Diha lamang sa pagnunot sa pagtintal ug sala nga mapugngan kita sa hingpit nga kalipay. Ug ang pagpakasala maoy labing buot ni Satanas nga atong buhaton.

“Sa makausa nakahigayon ako og uban ni Presidente Spencer W. Kimball sa layo nga biyahe. Gisuroy kami sa nagkalain-laing lugar nianang dapita, lakip ang ilawom sa yuta nga mga langub—mga lubnganan alang sa mga tawo nga gilutos sa mga panatiko nga Kristiyanos. Samtang migawas kami niadtong mangiub, hagip-ot nga hagdanan sa maong dapit, gitudloan ako ni Presidente Kimball og usa ka dili makalimtan nga leksyon. Gibitad niya ang tumoy sa akong coat ug miingon, ‘Kanunay nga nagsamok kanako kining gibuhat sa kaaway nga naggamit sa pangalan sa atong Manluluwas.’ Dayon miingon siya, ‘Robert, dili gayud makabaton og kalipay ang kaaway gawas kon ikaw ug ako makasala.’

“Sa akong pagpamalandong niini nga komentaryo ug pagtuon sa mga kasulatan, nagsugod ako sa pagkasabut kon unsay gustong ipasabut ni Presidente Kimball. … Ang atong mga sala ang makahimo sa yawa sa pagkatawa, ang atong mga kagul-anan ang magdala kaniya og mini nga kalipay.

“Bisan kon magkatawa ang yawa, limitado ang iyang gahum. Ang pipila mahimong mahinumdom sa karaan nga panultihon: ‘Sayop sa yawa ang akong pagkasala.’ Gusto ko karon nga ipadangat, diha sa tukma ug piho nga mga pulong, nga ang kaaway dili makapahimo nato sa pagbuhat og bisan unsang butang. Maghulat lamang siya diha sa atong pultahan, sama sa giingon sa mga kasulatan, ug siya kanunay nga nagsunod kanato matag adlaw. Sa kada higayon nga mogula kita, sa kada desisyon nga atong himoon, mopili ba kita paingon sa iyang direksyon o sa direksyon sa atong Manluluwas. Pero ang kaaway kinahanglan gayud nga mopahawa kon sultihan nato siya sa pagpahawa. Dili siya makaimpluwensya kanato gawas kon ato siyang tugutan sa pagbuhat sa ingon, ug nasayud siya niana! Ang bugtong higayon nga makaapekto siya sa atong mga hunahuna ug lawas—sa ato mismong mga espiritu—kon tugutan nato siya sa pagbuhat sa ingon. Sa laing pagkasulti, dili kinahanglan nga mosugot kita sa iyang mga pagdani!” (“Ang Pagbuhat alang sa Atong Kaugalingon: Ang Gasa ug mga Panalangin sa Kabubut-on,” Ensign o Liahona, Mayo 2006, 5–6).

3 Nephi 9:19–20. “Usa ka masulub-on nga kasingkasing ug mahinulsulon nga espiritu”

Si Elder Neal A. Maxwell sa Korum sa Napulog Duha Ka mga Apostoles mihulagway sa unsay ipasabut sa paghalad sa Ginoo og usa ka masulub-on nga kasingkasing ug mahinulsulon nga espiritu:

“Ang tinuod, personal nga sakripisyo dili gayud ang pagbutang og hayop sa altar. Hinoon, mao kini ang kaandam sa pagbutang sa hayop nga ania kanato diha sa ibabaw sa altar ug tugutan kini nga maugdaw! Mao kini ang ‘pagsakripisyo ngadto sa Ginoo … sa usa ka masulub-on nga kasingkasing ug mahinulsulon nga espiritu’ (D&P 59:8)” ( “Deny Yourselves of All Ungodliness,“ Ensign, Mayo 1995, 68).