Helaman 5

Pasiuna

Ang mga Nephite padayon sa kadautan hangtud nga ang kadaghanan kanila mipili sa pagkadautan kay sa pagkamatarung. Gigahin ni Nephi ug ni Lehi ang ilang kaugalingon sa pagsangyaw sa pulong sa Dios. Ang ilang amahan, si Helaman, mitudlo kanila sa paghinumdom sa ilang Manunubos ug sa paghimo Kaniya nga pundasyon sa ilang kinabuhi. Human matudloan ang mga Nephite, si Nephi ug Lehi nagsangyaw ngadto sa mga Lamanite, kinsa mibalhug kanila sa bilanggoan. Ang Ginoo milagrusong miluwas kanila, ug ang kadaghanan sa mga Lamanite naghinulsol ug nakabig sa ebanghelyo.

Mga Sugyot alang sa Pagtudlo

Helaman 5:1–13

Gitambagan ni Helaman ang iyang mga anak nga lalaki sa pagtuman sa mga sugo sa Dios, sa pagsangyaw sa ebanghelyo, ug sa paghinumdom sa matubsanong gahum ni Jesukristo

Sa dili pa magklase, pag-andam og unom ka ginunting nga papel nga i-display. Ang una kinahanglan nga gisulatan sa imong pangalan. Ang laing lima kinahanglan dunay sulat sa mosunod nga mga pulong: Mga Ginikanan, Ang Pag-ula ni Jesukristo, Mga Propeta, Paghinulsol modala sa kaluwasan, ug Tumana ang mga sugo.

Hatagi ang matag estudyante og gamay nga pirasong papel. Ipasabut nga ipakita nimo og kadiyot ang unom ka ginunting nga papel nga gisulatan og mga pulong. Dayon ilang isulat, gikan sa hunahuna, kadto nga mga pulong. Ipakita sa mga estudyante usa kada higayon ang ginunting nga papel.

Hangyoa ang mga estudyante sa pagsulat sa mga pulong nga ilang nahinumduman. Pagkahuman ipakita og balik ang unom ka ginunting nga papel. Ipangutana:

Sayon ra ba o lisud hinumduman kini nga mga pulong?
Unsa kaha ang kalainan kon kamo gisultian daan nga kinahanglan ninyong hinumduman kon unsay naa sa ginunting nga papel?

Hangyoa ang usa ka estudyante sa pagbasa sa mosunod nga pamahayag ni Presidente Spencer W. Kimball. Dapita ang klase sa pagpaminaw kon unsay iyang gisulti mahitungod sa kaimportante sa paghinumdom sa mga pagtulun-an sa ebanghelyo nga atong nadawat:

Imahe

President Spencer W. Kimball

“Kon mangita mo sa diksyonaryo para sa pinaka-importante nga pulong, nasayud ba mo kon unsa kini? Tingali ang hinumdumi. Tungod kay tanan kamo nakahimo og mga pakigsaad—nasayud na mo unsay buhaton ug nasayud mo unsaon kini sa paghimo—ang pinakadako natong panginahanglan mao ang paghinumdom” (“Circles of Exaltation” [address to CES religious educators, Hunyo 28, 1968], 5, si.lds.org).

Ipasabut sa klase nga karon makat-unan nila ang mahitungod sa duha ka tawo kinsa nakahimo og kalainan sa kinabuhi sa liboan pang uban tungod kay gihinumduman nila ug gilihok ang piho nga mga kamatuoran. Awhaga ang mga estudyante sa pagpamalandong atol sa leksyon karon kon unsa kaha ang gusto sa Ginoo nga ilang hinumduman.

I-summarize ang Helaman 5:1–4. Ipasabut nga tungod sa kadautan sa mga tawo, miluwat si Nephi sa iyang katungdanan isip labaw nga maghuhukom aron siya ug ang iyang igsoong si Lehi mogahin sa ilang kaugalingon sa pagsangyaw sa pulong sa Dios.

Isulat sa pisara ang mosunod nga mga pakisayran sa kasulatan: (Ayaw ilakip ang mga pulong nga naa sa parentheses.)

Helaman 5:5–7 (Tumana ang mga sugo, hinumdumi ang matarung nga mga ehemplo sa mga katigulangan.)

Helaman 5:9–11 (Hinumdumi ang Pag-ula ni Kristo; hinumdumi nga kita dili maluwas sa atong mga sala apan kita maluwas gikan sa atong mga sala pinaagi sa paghinulsol ug sa gahum sa Pag-ula.)

Helaman 5:12 (Hinumdumi nga si Jesukristo maoy gikinahanglan gayud nga atong pundasyon.)

Dapita ang mga estudyante sa pagpakli sa mga bersikulo nga gilista sa pisara, nga mangita sa pulong nga hinumdumi. Mahimo nimong isugyot nga markahan kini nga pulong sa matag higayon nga anaa kini. Dayon hatagi ang mga estudyante og pipila ka minutos sa pagbasa niini nga mga tudling sa hilum nga paagi, nga mangita kon unsay gusto ni Helaman nga mahinumduman sa iyang mga anak nga lalaki. Dapita ang mga estudyante sa pagreport unsay ilang nakit-an. Mahimo nimong isulat ang ilang mga tubag diha sa pisara tupad sa katugma nga mga pakisayran sa kasulatan.

Aron matabangan ang mga estudyante nga ma-analyze ug masabtan kini nga mga bersikulo, ipangutana ang mosunod:

Sa unsang paagi ang paghinumdom sa matarung nga mga ehemplo sa uban makatabang nimo nga mapili ang “paghimo sa unsay maayo”?
Unsay imong himoon aron mahinumduman ang Pag-ula ni Jesukristo?

Isulat sa pisara ang mosunod nga pamahayag: Kon kita … , si Satanas walay gahum batok kanato.

Dapita ang usa ka estudyante sa pagbasa og kusog sa Helaman 5:12. Hangyoa ang klase sa pagsunod, nga mangita sa paagi kon unsaon nila sa pagkompleto ang pamahayag nga naa sa pisara. Bisan og ang mga estudyante mogamit og lain-laing mga pulong, siguroa nga masulti nila nga kon atong itukod ang atong pundasyon diha kang Jesukristo, si Satanas walay gahum batok kanato. Mahimo nimong dapiton ang mga estudyante sa pagmarka sa mga pulong diha sa Helaman 5:12 nga nagpahayag niini nga baruganan. Ipasabut nga ang Helaman 5:12 usa ka scripture mastery passage. Mahimo nimong isugyot nga markahan sa mga estudyante ang mga scripture mastery passage sa lahi nga paagi aron sila sayon nga makapangita niini.

Aron matabangan ang mga estudyante sa pagsabut sa mga baruganan nga gitudlo niini nga bersikulo, pagtukod og gamay nga tore o balay gamit ang mga butang (sama sa mga bloke o mga libro), ug ipangutana ang sama sa mosunod:

Nganong mahinungdanon man nga ang usa ka building dunay lig-on nga pundasyon?
Unsa kaha ang buot ipasabut sa pagtukod sa atong pundasyon diha kang Jesukristo?
Unsa nga mga saad ang gihimo para niadtong nagtukod sa ilang pundasyon diha sa “lig-on nga tukuranan sa atong Manunubos”?
Unsay atong mahimo aron matukod ang atong pundasyon diha sa lig-ong tukuranan ni Jesukristo? (Mahimo nimong pangutan-on ang mga estudyante sa unsang paagi ang mga kamatuoran nga gitudlo diha sa Helaman 5:6–11 mao ang mga ehemplo sa mga paagi nga atong matukod ang atong pundasyon diha kang Jesukristo.)

Mahimo nimong ipasabut nga ang pagtukod og pundasyon diha sa Manluluwas dili makapugong sa pagpang-atake ni Satanas, apan kini maghatag kanato og kalig-on sa pagbuntog niini.

Kanus-a kamo nakabarug batok sa mga tintasyon o nakalahutay sa mga pagsulay tungod kay ang inyong pundasyon natukod diha kang Jesukristo?

Ipamatuod ang mahitungod sa kalig-on nga imong nadawat tungod kay gitukod nimo ang imong pundasyon diha sa lig-on nga tukuranan ni Jesukristo. Hatagi ang mga estudyante og panahon nga masulat diha sa ilang mga notebook o mga scripture study journal ang mahitungod sa usa ka paagi nga ila pang madugangan ang ilang kakugi sa pagpaningkamot nga matukod ang ilang lig-on nga tukuranan sa ilang Manunubos.

Helaman 5:14–52

Ang Ginoo mipanalipud ni Nephi ug Lehi sa prisohan, ug daghang Lamanite ang nakabig

I-summarize ang Helaman 5:14–19 pinaagi sa pagpasabut nga si Nephi ug Lehi misangyaw sa ebanghelyo uban sa dakong gahum ngadto sa mga Nephite ug Lamanite. Isip resulta, daghan sa masupilong mga Nephite mibalik sa ilang gituohan. Sa Zarahemla ug sa naglibut nga mga dapit, 8,000 ka mga Lamanite ang nabunyagan.

Kopyaha ang mosunod nga tsart diha sa pisara. Ipares-pares ang klase, ug hangyoa ang matag pares sa pagkopya sa tsart sa usa ka pirasong papel. Hangyoa ang matag pares sa pagtinabangay sa pagbasa sa mga tudling nga nalista sa tsart ug dayon magdrowing og yano nga litrato o magsulat og mubo nga summary sa unsay gihulagway sa matag tudling. (Samtang ang mga estudyante magkopya sa tsart, awhaga sila sa pagbilin og igong lugar ubos sa matag pakisayran nga kasulatan [scripture reference] alang sa ilang mga litrato o mga summary.)

Helaman 5:20–21	Helaman 5:22–25	Helaman 5:26–28
Helaman 5:29–34	Helaman 5:35–41	Helaman 5:42–44

Human sa igong panahon, dapita ang mga estudyante nga ipakita nila ug ipasabut sa daklit ang ilang mga litrato o summary ngadto sa laing managpares nga estudyante. Aron matabangan ang mga estudyante nga mapalawman pa ang ilang panabut bahin niini nga mga bersikulo, ipangutana ang mosunod:

Dihang ang mga Lamanite gipandungan sa kangitngit, unsay giawhag sa tingog nga ilang buhaton? (Tan-awa sa Helaman 5:29, 32.)
Giunsa sa paghulagway diha sa Helaman 5:30 ang tingog?
Kanus-a kamo mibati o nakadungog sa mga paghunghong sa “hagawhaw nga tingog nga hingpit sa kalumo”?
Unsa ang gitudlo ni Aminadab nga buhaton sa iyang mga kaigsoonan aron makuha o mawala ang kangitngit? (Tan-awa sa Helaman 5:41.)
Unsay nahitabo dihang ang mga Lamanite mituman sa tambag ni Aminadab ug migamit og pagtuo kang Kristo? (Tan-awa sa Helaman 5:43–44.)

Dapita ang mga estudyante sa pagbasa sa hilum nga paagi sa Helaman 5:44–47, nga mangita sa mga pulong nga naghulagway sa pipila ka mga resulta sa paghinulsol.

Gikan niini nga mga bersikulo, unsay inyong nakat-unan mahitungod sa paghinulsol? (Tabangi ang mga estudyante sa pag-ila sa mosunod nga kamatuoran: Kon kita mogamit og pagtuo kang Jesukristo ug maghinulsol sa atong mga sala, ang Espiritu Santo mopuno og kalinaw ug kalipay sa atong kasingkasing.)

I-summarize ang Helaman 5:48–52 pinaagi sa pagpasabut nga ang mga masupilon nga Lamanite ug Nephite kinsa nakasinati niini nga milagro nanglakaw ug nangalagad sa katawhan, ug “ang labaw nga bahin sa mga Lamanite” nakabig sa ebanghelyo.

Awhaga ang mga estudyante sa paghunahuna kon sila sa bag-o lang mibati ba og kalinaw ug kalipay sa ilang kinabuhi. Kon wala, dapita sila sa pagpamalandong unsay ilang mahimo aron matukod ang ilang pundasyon diha kang Jesukristo ug pagpawala sa panganod sa kangitngit nga naglibut kanila.

Scripture Mastery—Helaman 5:12

Dapita ang mga estudyante sa pagbasa sa Helaman 5:12. Aron matabangan sila sa pagmemorya niini nga bersikulo, hatagi sila og usa ka blangko nga papel. Ipasulat nila ang bersikulo diha sa papel nga mogamit lang og mga litrato ug tagsa ka letra. Alang sa mga pulong nga nagsugyot og mga simbolo (sama sa bato, pundasyon, hangin, unos, ug bagyo), padrowinga sila og yano nga mga litrato. Alang sa mga pulong nga wala magsugyot og mga simbolo (sama sa karon ug sa akong), ipasulat lang nila ang unang letra sa pulong. Dapita ang mga estudyante nga praktison nila ang pag-recite sa bersikulo gamit lamang ang mga litrato ug mga letra nga ilang gidrowing ug gisulat. Mahimo sab nimo silang dapiton nga mag-ilisay sila sa ilang mga papel ug i-recite ang bersikulo gamit ang pahinumdom nga gidrowing ug gisulat sa ilang mga classmate. Awhaga ang mga estudyante nga dad-on sa pagpauli ang ilang papel ug ibutang kini sa dapit diin makita nila kini kanunay alang sa ilang pagmemorya niini nga tudling.

Pahinumdom: Tungod sa gitas-on sa leksyon karon, mahimo nimong gamiton kini nga kalihokan sa lahi nga adlaw, kon may panahon pa.

Komentaryo ug Background nga Impormasyon

Helaman 5:12. Unsaon nato sa pagbatok ang “mapintas nga unos” sa kaaway?

Si Presidente Spencer W. Kimball mitudlo nga kita kinahanglang nakahupot sa ebanghelyo ni Jesukristo kon ang kaaway mobuhi na sa iyang pwersa batok kanato:

“Kita, usab, nag-atubang og mapintas, makalaglag nga pwersa nga gibuhian sa kaaway. Balud sa mga sala, kadautan, imoralidad, kalisud, pangdaug-daog, panglingla, mga pangdaot, ug pamakak nga naghulga natong tanan. Moabut kini uban sa talagsaong gahum ug gipaspason ug molaglag kanato kon dili kita magmabinantayon.

“Apan ang pasidaan gipalanog na alang kanato. Angay lang nga alerto kita ug maminaw ug mopalayo sa dautan alang sa atong kinabuhing dayon. Kon wala ang tabang dili kita makasugakod niini. Kinahanglan nga moadto kita sa mas taas nga dapit o hugot nga manggunit sa butang nga magpugong kanato sa pagkabanlas. Asa kita manggunit alang sa kasiguroan mao ang ebanghelyo ni Jesukristo. Kini ang atong panalipud gikan sa bisan unsang pwersa nga matigom sa dautan. Usa ka dinasig nga propeta sa Basahon ni Mormon mitambag sa iyang mga katawhan: ‘Hinumdumi nga kini diha sa lig-on nga sukaranan sa atong Manunubos kinsa mao si Kristo, ang Anak sa Dios, nga kamo kinahanglan gayud motukod sa inyong tukuranan; nga sa panahon nga ang yawa mopadala sa iyang mapintas nga mga hangin, oo, ang iyang mga panâ diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha kaninyo, kini walay gahum ibabaw kaninyo sa pagbitad kaninyo ngadto sa bung-aw sa pagkauyamot ug walay katapusan nga pagkaalaot’ (Hel. 5:12)” (“Hold Fast to the Iron Rod,” Ensign, Nob. 1978, 6).