Pasiuna sa Manwal sa Seminary Teacher sa Basahon ni Mormon

Ang Atong Katuyoan

Ang Tumong sa Seminaries and Institutes of Religion namahayag:

“Ang atong katuyoan mao ang pagtabang sa kabatan-onan ug mga young adult nga makasabut ug makasalig sa mga pagtulun-an ug sa Pag-ula ni Jesukristo nga mahimong sarang sa mga panalangin sa templo, ug maandam ang ilang kaugalingon, ilang pamilya, ug ang uban alang sa kinabuhing dayon uban sa Langitnong Amahan.”

Aron makab-ot ang atong katuyoan, atong tudloan ang mga estudyante sa mga doktrina ug baruganan sa ebanghelyo nga anaa sa mga kasulatan ug sa pulong sa mga propeta. Kini nga mga doktrina ug mga baruganan gitudlo sa paagi nga mogiya ngadto sa pagsabut ug pagkalig-on. Kita motabang sa mga estudyante nga sila makatuman sa ilang tahas sa proseso sa pagkat-on ug moandam kanila sa pagtudlo sa ebanghelyo ngadto sa uban.

Aron matuman kini nga mga tumong, ikaw ug ang mga estudyante nga imong tudloan giawhag sa paggamit sa mosunod nga Mga Sukaranan sa Pagtudlo ug Pagkat-on sa Ebanghelyo samtang dungan kamo nga magtuon sa mga kasulatan:

• Magtudlo ug magkat-on pinaagi sa Espiritu.

• Mag-ugmad og palibut sa pagkat-on inubanan sa gugma, pagtahud, ug katuyoan.

• Magtuon sa mga kasulatan matag adlaw, ug magbasa sa teksto sa kurso. (Ang tsart nga gamiton sa pagmonitor sa pagbasa sa kasulatan makita diha sa appendix dapit sa katapusan niining manwal.)

• Mosabut sa konteksto ug sulod sa mga kasulatan ug mga pulong sa mga propeta.

• Moila, mosabut, ug mobati sa kamatuoran ug sa kaimportante ug mogamit sa mga doktrina sa ebanghelyo ug mga baruganan.

• Mopasabut, mopakigbahin, ug mopamatuod sa mga doktrina ug mga baruganan sa ebanghelyo.

• Mo-master sa importanting mga tudling sa kasulatan ug Sukaranang mga Doktrina.

Kini nga manwal sa magtutudlo giandam sa pagtabang kanimo nga magmalampuson sa pagkab-ot niini nga mga tumong.

Pagpangandam sa Leksyon

Ang Ginoo misugo niadtong motudlo sa Iyang ebanghelyo nga “magtudlo sa mga baruganan sa akong ebanghelyo, nga anaa sa Biblia ug sa Basahon ni Mormon, diin anaa ang kahingpitan sa ebanghelyo” (D&P 42:12). Siya dugang nga misugo nga kini nga mga kamatuoran kinahanglang itudlo ingon nga “gimandoan pinaagi sa Espiritu,” nga “ihatag … pinaagi sa pag-ampo diha sa hugot nga pagtuo” (D&P 42:13–14). Samtang nag-andam ka sa matag leksyon, pagmainampuon sa pagtinguha sa giya sa Espiritu aron sa pagtabang kanimo sa pagsabut sa mga kasulatan ug sa mga doktrina ug mga baruganan nga anaa niini. Sa samang paagi, sunda ang mga aghat sa Espiritu samtang nagplano ka unsaon sa pagtabang sa imong mga estudyante nga makasabut sa mga kasulatan, matudloan pinaagi sa Espiritu Santo, ug mobati og tinguha sa paggamit sa unsay ilang nakat-unan.

Niini nga kurso, ang Basahon ni Mormon mao ang una nimong teksto sa imong pagpangandam ug pagtudlo. Magmainampuon sa pagtuon sa mga kapitulo o mga bersikulo nga imong itudlo. Tinguhaa ang pagsabut sa konteksto ug sulod sa scripture block, lakip ang dagan sa istorya, mga katawhan, mga dapit, ug mga panghitabo. Kon mapamilyar na nimo ang konteksto ug sulod sa matag scripture block, paningkamuti ang pag-ila sa mga doktrina ug mga baruganan nga naglangkob niini, ug desisyuni unsa nga mga kamatuoran ang labing importante nga masabtan ug magamit sa imong mga estudyante. Kon matino na nimo kon unsay imong tutukan, ideterminar unsa nga mga paagi ug mga kalihokan ang makatabang kaayo sa imong mga estudyante sa pagkat-on ug paggamit sa sagradong mga kamatuoran nga anaa diha sa mga kasulatan.

Kini nga manwal gidesinyo aron sa pagtabang kanimo niini nga proseso. Ribyuha og maayo ang materyal sa leksyon nga motukma sa scripture block nga imong itudlo. Mahimo kang mopili nga gamiton ang tanan o pipila sa mga gisugyot sa scripture block, o mahimo nimong ipahiangay ang gisugyot nga mga ideya ngadto sa mga panginahanglan ug kahimtang sa mga estudyante nga imong tudloan. Samtang imong ikonsiderar unsaon sa pagpahiangay sa mga materyal sa leksyon, siguroha nga masunod kini nga tambag gikan ni Elder Dallin H. Oaks sa Korum sa Napulog Duha ka mga Apostoles:

“Si Presidente Packer kanunayng nagtudlo, sa akong pandungog, nga una atong hangupon, dayon atong ipahiangay. Kon tinud-anay kitang nakatutok sa gitakda nga leksyon nga atong ihatag, nan makasunod kita sa Espiritu sa pagpahiangay niini” (“A Panel Discussion with Elder Dallin H. Oaks” [Seminaries and Institutes of Religion Satellite Broadcast, Ago. 7, 2012], 6, si.lds.org).

Samtang nangandam ka sa pagtudlo, pagmahunahunaon sa mga estudyante nga adunay piho nga mga panginahanglan. Ipahiangay ang mga kalihokan ug mga ekspektasyon aron sa pagtabang kanila nga magmalampuson. Ang pagpakigsulti ngadto sa mga ginikanan ug mga lider makatabang aron makahibalo ka sa mga panginahanglan sa mga estudyante ug makatabang nimo nga magmalampuson sa paghatag og makahuluganon ug makapalig-on nga kasinatian alang sa mga estudyante.

teacher preparing with scriptures and manual

Paggamit sa Manwal sa Daily Teacher

teacher manual example

Pasiuna sa Basahon

Ang mga pasiuna sa basahon naghatag og kinatibuk-ang pagpasabut sa matag basahon diha sa Basahon ni Mormon. Gawas sa uban pang mga butang, kini nagpasabut kinsa ang misulat sa matag basahon, naghulagway kini kon unsay mga katuyoan sa tagsulat sa pagsulat niini, ug naghatag kini og summary bahin sa sulod sa matag basahon.

teacher manual example

Pasiuna sa Scripture Block

Ang mga pasiuna sa scripture block naghatag og mubo nga overview sa konteksto ug sulod sa scripture block alang sa matag leksyon.

Grupo sa mga Bersikulo ug Summary base sa Konteksto

Ang mga scripture block kasagaran gibahin ngadto sa ginagmay nga mga segment o grupo sa mga bersikulo kon asa nausab ang hilisgutan o ang aksyon. Ang pakisayran alang sa matag grupo sa bersikulo gisundan og mubo nga summary sa mga panghitabo o mga pagtulun-an sulod niana nga grupo sa mga bersikulo.

Mga Tabang sa Pagtudlo

Ang mga tabang sa pagtudlo nagpasabut sa mga baruganan ug mga pamaagi sa pagtudlo sa ebanghelyo. Makatabang kini kanimo sa imong mga paningkamot sa paglambo isip usa ka magtutudlo.

Sulod sa Leksyon

Ang sulod sa leksyon naglakip og giya alang kanimo samtang magtuon ug magtudlo ka. Nagsugyot kini og mga ideya sa pagtudlo, lakip sa mga pangutana, mga kalihokan, mga kinutlo, mga diagram, ug mga tsart.

Mga Doktrina ug mga Baruganan

Samtang ang mga doktrina ug mga baruganan natural lang nga motumaw gikan sa pagtuon sa teksto sa kasulatan, kini gipabaga [bold] aron matabangan ka sa pag-ila ug pagtutok niini sa imong diskusyon uban sa mga estudyante.

Mga Litrato

Ang mga litrato sa mga lider sa Simbahan ug mga panghitabo gikan sa mga kasulatan nagrepresentar sa mga visual aid nga mahimo nimong ipakita, kon anaa, samtang magtudlo ka.

teacher manual example

Scripture Mastery

Ang 25 ka mga scripture mastery passage nga makita diha sa Basahon ni Mormon gihatagan og gibug-aton diha sa konteksto sa mga leksyon kon asa kini makita. Ang matag usa niini nga leksyon naglakip usab og ideya sa pagtudlo alang niini nga mga tudling. Aron matabangan ka nga makanunay ang pagtudlo sa mga scripture mastery, adunay mga kalihokan sa Pagribyu sa Scripture Mastery nga anaa sa tibuok manwal. Alang sa dugang nga mga ideya sa pagtudlo sa scripture mastery, tan-awa sa appendix dapit sa katapusan niining manwal.

Kolum nga Luna

Ang kolum nga luna magamit alang sa pagpangandam sa leksyon, lakip ang pagsulat og mubo nga mga sulat, mga baruganan, kasinatian, o ubang mga ideya, kon gibati nimo ang aghat sa Espiritu Santo.

Komentaryo ug Background nga Impormasyon

Ang dugang nga mga kinutlo ug pagpasabut gihatag diha dapit sa katapusan sa ubang mga leksyon aron mahatagan ka og dugang nga panabut sa piho nga mga konsepto o mga tudling sa kasulatan. Gamita ang impormasyon niini nga seksyon sa pagpangandam sa pagtubag sa mga pangutana ug sa paghatag og dugang nga mga ideya samtang magtudlo ka.

Dugang nga mga Ideya sa Pagtudlo

Ang dugang nga mga ideya sa pagtudlo makita diha dapit sa katapusan sa ubang mga leksyon. Naghatag kini og mga sugyot sa pagtudlo sa mga doktrina ug mga baruganan nga mahimong wala ipaila o ipasabut og maayo diha sa sulod sa leksyon. Kini usab makahatag og mga sugyot sa paggamit og biswal nga media, sama sa mga pagpasalida sa DVD.

teacher manual example

teacher manual example

teacher manual example

teacher manual example

teacher manual example

teacher manual example

Programa sa Daily Seminary (Released-Time ug Sayo sa Buntag)

Kini nga manwal naglakip sa mosunod nga mga elemento alang sa mga magtutudlo sa daily seminary: 160 ka mga leksyon sa daily teacher, mga tabang sa pagtudlo, ug mga kapanguhaan sa pagtudlo sa scripture mastery ug Sukaranang mga Doktrina.

Mga Leksyon sa Daily Teacher

Format sa Leksyon

Ang matag leksyon niini nga manwal nagtutok sa usa ka scripture block imbis sa usa ka partikular nga konsepto, doktrina, o baruganan. Kini nga format makatabang kanimo ug sa imong mga estudyante sa pagtuon sa mga kasulatan sa pasunod nga paagi ug sa paghisgut sa mga doktrina ug mga baruganan kon natural kini nga motumaw gikan sa teksto sa kasulatan. Samtang ang mga estudyante makakat-on sa konteksto kon asa makita ang usa ka doktrina o baruganan, ang ilang pagsabut niana nga kamatuoran mahimong molambo. Agig dugang, ang mga estudyante mas makakita ug makasabut sa hingpit nga tumong sa mga mensahe nga gustong ipasabut sa dinasig nga mga tigsulat sa kasulatan. Ang pagtudlo sa mga kasulatan niini nga paagi makatabang usab sa mga estudyante nga makakat-on unsaon sa pagdiskubre ug paggamit sa mahangturong mga kamatuoran diha sa ilang personal nga pagtuon sa kasulatan.

Sa matag leksyon, dili ang tanang mga bahin sa scripture block gihatagan og gibug-aton. Ang pipila ka bahin makadawat og minos nga pagtagad tungod kay kini dili kaayo mahinungdanon sa kinatibuk-ang mensahe sa dinasig nga tigsulat o tungod kay kini dili kaayo magamit sa mga kabatan-onan. Imong responsibilidad nga ipahaum kini nga mga materyal sumala sa mga panginahanglan ug mga interes sa mga estudyante nga imong gitudloan. Mahimo nimong ipahaum ang mga ideya sa leksyon niini nga manwal pinaagi sa pagpili nga mas hatagan og gibug-aton ang usa ka partikular nga doktrina o baruganan kay sa gihatag diha sa materyal sa leksyon o pinaagi sa pagpili nga dili kaayo hatagan og gibug-aton ang usa ka bahin sa scripture block nga gipasabut og maayo diha sa manwal. Tinguhaa ang giya sa Espiritu Santo sa pagtabang kanimo sa paghimo niini nga mga pagpahaum samtang nangandam ug nagtudlo ka.

Mga Doktrina ug mga Baruganan

Diha sa sulod sa matag leksyon, makita nimo nga ang pipila ka mahinungdanong mga doktrina ug mga baruganan gipaklaro pinaagi sa pagpabaga. Kining mga doktrina ug mga baruganan gitino diha sa kurikulum tungod kay (1) nagpakita kini sa importanting mensahe sa scripture block, (2) piho kining magamit ngadto sa mga panginahanglan ug mga kahimtang sa mga estudyante, o (3) mahinungdanon kini nga mga kamatuoran nga makatabang sa mga estudyante aron molambo ang ilang relasyon ngadto sa Ginoo. Sayri nga ang Basahon ni Mormon nagtudlo sa daghang mga kamatuoran nga sobra pa sa gitino diha sa kurikulum. Si Presidente Boyd K. Packer mitudlo nga ang mga kasulatan naglakip sa “walay katapusan nga mga kombinasyon sa kamatuoran nga mohaum sa panginahanglan sa matag indibidwal diha sa matag kahimtang” (“The Great Plan of Happiness” [CES Symposium on the Doctrine and Covenants/Church History, Aug. 10, 1993], 2, si.lds.org).

Samtang magtudlo ka, kanunay hatagi ang mga estudyante og mga oportunidad sa pag-ila sa mga doktrina ug mga baruganan diha sa mga kasulatan. Samtang ang mga estudyante mopahayag sa mga kamatuoran nga ilang madiskubrihan, sila kasagaran mogamit og mga pulong nga lahi kay sa giunsa pagpahayag ang usa ka doktrina o baruganan niini nga manwal. Sila mahimo usab nga makadiskubre og mga kamatuoran nga wala malakip diha sa outline sa leksyon. Pagmainampingon sa dili pag-ingon nga sayop ang mga tubag sa mga estudyante tungod lang kay ang mga pulong nga ilang gigamit sa pagpahayag niini lahi kay sa niadtong gigamit sa manwal o tungod kay sila miila og usa ka kamatuoran nga wala mahisguti sa kurikulum. Hinoon, kon ang gisulti sa usa ka estudyante sayop nga doktrina, imong responsibilidad ang hinay-hinay nga pagtabang sa estudyante nga korihian ang iyang pamahayag samtang imentinar ang usa ka palibut sa gugma ug pagsalig. Ang pagbuhat sa ingon makahatag og importanting kasinatian sa pagkat-on alang sa mga estudyante sa imong klase.

Gipaspason

Kini nga manwal adunay 160 ka mga leksyon sa daily seminary, diin gikonsiderar ang mga pagkabalda tungod sa iskedyul sa eskwelahan ug komunidad sa mga estudyante ug duna pay mahibilin nga mga adlaw sa pagribyu sa kasulatan o paghimo sa scripture mastery. Mahimo nimong ipahiangay ang mga leksyon ug gipaspason sigun sa gidugayon sa panahon nga imong itudlo kini nga kurso. (Tan-awa ang appendix dapit sa katapusan niini nga manwal alang sa usa ka sampol sa giya sa gipaspason.)

Apas nga Buluhaton [Make-up Work]

Ang Giya sa Pagtuon sa Basahon ni Mormon alang sa mga Estudyante sa Home-Study Seminary mahimong gamiton sa mga programa sa daily seminary isip kapanguhaan nga magamit sa mga estudyante nga adunay apas nga buluhaton. Ang mga leksyon nga naa sa giya sa pagtuon alang sa mga estudyante sa home-study motukma niadtong gipresentar niini nga manwal. Ang mga estudyante nga naghinobra ang palta sa klase mahimong i-assign sa pagkompleto sa mga assignment nga naa sa giya sa pagtuon nga motakdo sa hilisgutan nga ilang napaltahan sa klase. Ang mga assignment maimprinta gikan sa S&I website, mao nga dili na nimo kinahanglang ihatag ang tibuok manwal ngadto sa mga estudyante nga kinahanglan mobuhat sa apas nga buluhaton. Ang dugang nga impormasyon mahitungod sa Giya sa Pagtuon sa Basahon ni Mormon alang sa mga Estudyante sa Home-Study Seminary gihatag diha sa seksyon nga giulohan og “Programa sa Home-Study Seminary.”

Mga Tabang sa Pagtudlo

Ang mga tabang sa pagtudlo makita diha sa mga margin niini nga manwal. Kini nga mga tabang sa pagtudlo mopasabut ug mohulagway kon sa unsang paagi ikaw ug ang mga estudyante nga imong gitudloan makagamit sa Mga Sukaranan sa Pagtudlo ug Pagkat-on sa Ebanghelyo sa imong pagtuon sa Basahon ni Mormon. Kini usab nagtanyag og mga sugyot kon unsaon nga epektibong magamit ang lain-laing mga pamaagi ug mga kahanas sa pagtudlo. Samtang makasabut ka sa mga baruganan nga anaa sa mga tabang sa pagtudlo, pangita og mga paagi nga kanunay kini nga mapraktis ug magamit sa imong pagtudlo.

Scripture Mastery ug Sukaranang mga Doktrina

Aron matabangan ang mga estudyante nga mahatagan og bili ang mahangturong mga kamatuoran ug mapalambo ang ilang pagsalig sa pagkat-on ug pagtudlo gikan sa mga kasulatan, ang Seminaries and Institutes of Religion (S&I) mipili og pipila ka tudling sa kasulatan nga sag-ulohon sa mga estudyante sa matag kurso sa pagtuon. Dugang pa, usa ka lista sa Sukaranang mga Doktrina gilakip aron mahatagan og gibug-aton ang importanting mga doktrina nga kinahanglang masabtan, matuohan, ug masunod sa mga estudyante sa tibuok upat ka tuig nila sa seminary ug sa tibuok nilang kinabuhi. Ang manwal sa kada kurso sa seminary gihimo aron mahatagan og gibug-aton ang Sukaranang mga Doktrina kon makita kini sa estudyante atol sa pasunod nga pagtuon sa mga kasulatan. Daghan sa mga scripture mastery passage gipili diin ang Sukaranang mga Doktrina maoy gihunahuna, mao nga samtang kamo magtudlo sa mga scripture mastery passage ngadto sa mga estudyante, imo sab nga matudlo ang Sukaranang mga Doktrina.

Samtang ang mga estudyante mohatag og bili sa mahangturong mga kamatuoran diha sa ilang mga hunahuna ug kasingkasing, ang Espiritu Santo mopahinumdom kanila niini nga mga kamatuoran sa mga panahon sa panginahanglan ug mohatag nila og kaisug sa paglihok pinaagi sa hugot nga pagtuo (tan-awa sa Juan 14:26). Si Presidente Howard W. Hunter mitudlo:

“Kusganon akong moawhag kaninyo sa paggamit sa mga kasulatan sa inyong pagtudlo ug sa pagbuhat sa tanan diha sa inyong gahum sa pagtabang sa mga estudyante sa paggamit niini ug mahimong komportable niini. Gusto nako nga ang atong mga batan-on adunay pagsalig diha sa mga kasulatan. …

“… Gusto namo nga ang mga estudyante makabaton og pagsalig diha sa kalig-on ug mga kamatuoran sa mga kasulatan, pagsalig nga ang ilang Langitnong Amahan sa tinuod nakigsulti nganha kanila pinaagi sa mga kasulatan, ug pagsalig nga sila makabasa sa mga kasulatan ug makakaplag og mga tubag sa ilang mga problema ug sa ilang mga pag-ampo. …

“… Kami manghinaot nga wala kamo’y mga estudyante nga mobiya sa classroom nga may kahadlok o may kasagmuyo o may kaulaw nga wala nila makaplagi ang tabang nga ilang gikinahanglan tungod kay wala kaayo sila masuhito sa mga kasulatan aron makakaplag sa tukma nga mga tudling” (“Eternal Investments” [address to CES religious educators, Peb. 10, 1989], 2, si.lds.org).

Tan-awa ang appendix dapit sa katapusan niini nga manwal alang sa dugang impormasyon kabahin sa scripture mastery ug Sukaranang mga Doktrina.

Paggamit sa mga Leksyon sa Home-Study

teacher manual example

Summary sa mga Leksyon sa Estudyante

Ang summary motabang kanimo nga mapamilyar ang imong kaugalingon sa konteksto ug sa mga doktrina ug mga baruganan nga gitun-an sa mga estudyante atol sa semana diha sa giya sa pagtuon sa estudyante.

Pasiuna sa Leksyon

Ang pasiuna sa leksyon makatabang kanimo nga mahibalo kon unsa nga porsyon sa scripture block ang hatagan og gibug-aton diha sa leksyon.

Sulod sa Leksyon

Ang sulod sa leksyon naghatag og giya alang kanimo samtang magtuon ug magtudlo ka. Nagsugyot kini og mga ideya sa pagtudlo, lakip sa mga pangutana, mga kalihokan, mga kinutlo, mga diagram, ug mga tsart.Mga Doktrina ug mga BarugananSamtang ang mga doktrina ug mga baruganan natural lang nga motumaw gikan sa pagtuon sa teksto sa kasulatan, kini gipabaga [bold] aron matabangan ka sa pag-ila ug pagtutok niini sa imong diskusyon uban sa mga estudyante.

teacher manual example

Grupo sa mga Bersikulo ug Summary base sa Konteksto

Ang mga bersikulo gigrupo sumala kon asang dapita nausab ang konteksto o sulod sa tibuok scripture block. Ang pakisayran alang sa matag grupo sa bersikulo gisundan og mubo nga summary sa mga panghitabo o mga pagtulun-an sulod niana nga grupo sa mga bersikulo.

Pasiuna sa Sunod nga Unit

Ang katapusang paragraph sa matag leksyon naghatag og daklit nga panglantaw ngadto sa sunod nga unit. Ipakigbahin kini nga paragraph sa imong mga estudyante sa pagtapos sa matag leksyon aron sa pagtabang kanila sa mahinamon nga pagtuon sa mga kasulatan para sa umaabut nga semana.

Programa sa Home-Study Seminary

Ang programa sa home-study nagtugot sa mga estudyante nga makadawat og kredito sa seminary pinaagi sa pagkompleto sa tagsa-tagsa ka mga leksyon diha sa panimalay kay sa pagtambong og mga klase sa mga adlaw sulod sa semana. Kini nga mga leksyon makita diha sa lahi nga manwal nga gitawag og Giya sa Pagtuon sa Basahon ni Mormon alang sa mga Estudyante sa Home-Study Seminary. Kausa matag semana, ang mga estudyante mag-abut uban sa usa ka magtutudlo sa seminary aron sa pagsumiter sa ilang mga buhat ug pag-apil sa usa ka leksyon sa classroom. Ang giya sa pagtuon sa estudyante ug sinemanang mga leksyon sa classroom mas gipasabut og dugang sa ubos.

Giya sa Pagtuon alang sa mga Estudyante sa Home-Study

Ang Giya sa Pagtuon sa Basahon ni Mormon alang sa mga Estudyante sa Home-Study Seminary gidesinyo aron matabangan ang mga estudyante sa home-study nga makadawat og usa ka kasinatian sa pagtuon sa Basahon ni Mormon nga susama sa mga estudyante sa seminary nga magtambungan og klase sa mga adlaw sa semana. Busa, ang gipaspason sa giya sa pagtuon sa estudyante ingon man usab ang mga doktrina ug mga baruganan nga gihatagan og gibug-aton niini motukma sa materyal niini nga manwal. Ang giya sa pagtuon sa estudyante naglakip usab og instruksyon sa scripture mastery. Ang mga scripture mastery passage gihisgutan sa konteksto ingon nga kini makita diha sa teksto sa kasulatan. Ang dugang nga mga kalihokan anaa dapit sa katapusan sa mga leksyon diin ang mga tudling gihisgutan.

Matag semana, ang mga estudyante sa home-study seminary kinahanglang mokompleto og upat ka mga leksyon gikan sa giya sa pagtuon sa estudyante ug moapil sa sinemana nga leksyon nga ihatag sa ilang seminary teacher. Ang mga estudyante mokompleto sa ginumerohan nga mga assignment gikan sa giya sa pagtuon diha sa ilang mga scripture study journal. Ang mga estudyante kinahanglan nga adunay duha ka mga scripture study journal aron ikabilin ra nila ang usa diha sa ilang magtutudlo ug makapadayon sa pagtrabaho diha sa lain. Samtang ang mga estudyante makigtagbo sa ilang magtutudlo matag semana, ang usa ka journal i-sumiter ngadto sa home-study teacher ug ang lain ihatag og balik ngadto sa estudyante aron gamiton alang sa mga leksyon sa sunod semana. (Sama pananglit, sulod sa usa ka semana, ang estudyante mokompleto sa mga assignment sa journal 1. Ang estudyante dayon modala niini nga journal sa klase ug mohatag niini ngadto sa magtutudlo. Pagkasunod semana, ang estudyante mokompleto sa mga assignment sa journal 2. Kon ang estudyante mosumiter na sa journal 2, ang magtutudlo mouli sa journal 1. Gamiton dayon sa estudyante ang journal 1 aron kompletuhon ang mga assignment alang sa sunod nga semana.)

Ang tanang mga estudyante sa seminary giawhag sa pagtuon sa kasulatan sa matag adlaw ug sa pagbasa sa teksto alang sa kurso, apan ang mga estudyante sa home-study kinahanglang makasabut nga sila gilauman nga mogahin og dugang 30 ngadto sa 40 ka minutos sa matag usa sa upat ka mga leksyon sa home-study sa kada unit ug motambong sa sinemana nga leksyon sa home-study.

Sinemana nga mga Leksyon sa Home-Study Teacher

Ang matag unit diha sa Giya sa Pagtuon sa Basahon ni Mormon alang sa mga Estudyante sa Home-Study Seminary motakdo ngadto sa lima ka leksyon diha sa manwal sa daily teacher. Dapit sa katapusan sa tanang lima ka leksyon niini nga manwal, imong makita ang usa ka sinemana nga leksyon sa home-study teacher. Ang mga leksyon sa home-study motabang sa mga estudyante sa pagribyu, pagpalawom sa ilang pagsabut, ug paggamit sa mga doktrina ug mga baruganan nga ilang nakat-unan samtang ilang gikompleto ang mga leksyon sa giya sa pagtuon sa estudyante atol sa semana. Kini nga mga leksyon mahimo usab nga mosuhid og dugang nga mga kamatuoran nga wala maapil sa giya sa pagtuon sa estudyante. (Alang sa tabang sa pagplano sa eskedyul sa imong leksyon, tan-awa ang giya sa gipaspason alang sa mga home-study teacher sa appendix dapit sa katapusan niini nga manwal.)

Isip usa ka magtutudlo sa home-study, kinahanglang makaangkon ka og lawom nga pagsabut sa gitun-an sa imong mga estudyante diha sa panimalay matag semana aron makatubag ka sa mga pangutana ug makahimo og makahuluganon nga mga diskusyon kon makigtagbo ka kanila. Hangyoa ang mga estudyante sa pagdala sa ilang mga kasulatan, scripture study journal, ug mga giya sa pagtuon sa estudyante ngadto sa sinemana nga klase aron makadangup sila niini atol sa leksyon. Ipahiangay ang mga leksyon sumala sa panginahanglan sa mga estudyante nga imong gitudloan ug sumala sa giya sa Espiritu Santo. Mahimo usab ka nga modangup sa mga leksyon sa daily teacher niini nga manwal samtang mangandam ug magtudlo ka. Ang pagtuon sa mga tabang sa pagtudlo ug mga pamaagi nga gigamit sa mga leksyon sa kada adlaw makatabang sa pagpalambo sa imong sinemana nga pagtudlo. Atimana ang bisan unsang partikular nga mga panginahanglan sa mga estudyante nga imong gitudloan. Sama pananglit, kon ang usa ka estudyante maglisud sa pagsulat, tuguti siya nga mogamit og voice-recording device o modiktar sa iyang mga hunahuna ngadto sa usa ka sakop sa pamilya o higala kinsa maoy mosulat sa iyang mga tubag.

Sa katapusan sa matag sinemana nga leksyon, kolektaha ang mga scripture study journal sa mga estudyante ug dasiga sila sa ilang padayon nga pagtuon. Hatagi sila og scripture study journal para sa mga assignment sa mosunod nga semana. Tungod sa limitasyon sa panahon, wala kinahanglana nga dugangan pa nimo ang paghatag og gibug-aton sa scripture mastery ang imong sinemana nga mga leksyon. Samtang imong basahon ang mga assignment diha sa mga scripture study journal sa mga estudyante, tubaga matag karon ug unya ang ilang buhat pinaagi sa paghimo og mubo nga sulat o pagkomentaryo sa sunod higayon nga imo silang makit-an. Mahimo ka usab nga mangita og laing mga paagi sa paghatag og suporta ug makahuluganon nga feedback. Kini makatabang sa mga estudyante nga masayud nga nagpakabana ka sa ilang trabaho ug motabang sa pagdasig kanila nga tarungon og maayo ang ilang mga tubag.

Ubang mga Kapanguhaan

Ang mga magtutudlo makaadto sa website sa Seminaries and Institutes of Religion (si.lds.org) alang sa tabang sa pagpangandam sa leksyon ug sa pagpangita og dugang nga mga ideya sa pagtudlo. Ang mosunod nga mga kapanguhaan anaa sa internet, pinaagi sa imong supervisor, pinaagi sa lokal nga mga sentro sa pagpang-apud-apod sa Simbahan, ug pinaagi sa online store sa Simbahan (store.lds.org):

• DVD cover

  Mga DVD nga biswal nga kapanguhaan sa Seminary

• book cover

  Libro sa mga Hulagway sa Ebanghelyo

• journal cover

  Mga scripture study journal

• bookmark

  Mga bookmark sa seminary (nga naglakip sa mga kapanahunan [timeline] ug mga lista sa mga pakisayran [reference] sa scripture mastery ug mga key word)

• example card

  Mga card sa scripture mastery

• book cover

  Matinud-anon sa Tinuhoan: Usa ka Pakisayran sa Ebanghelyo

• booklet cover

  Alang sa Kalig-on sa Kabatan-onan

• data-poster cover

  Mga poster sa kapanahunan [timeline]

young woman studying