Leksyon 25
2 Nephi 3
Pasiuna
Ang 2 Nephi 3 naglangkob sa mga pulong ni Lehi ngadto sa iyang kinamanghurang anak nga lalaki, si Joseph. Gisaysay ni Lehi ang panagna ni Jose sa Ehipto kalabut sa tahas ni Propeta Joseph Smith, ang pag-abut sa Basahon ni Mormon, ug ng Pagpahiuli sa ebanghelyo.
Mga Sugyot alang sa Pagtudlo
2 Nephi 3:1–25
Gisaysay ni Lehi ang panagna ni Jose sa Ehipto kalabut ni Propeta Joseph Smith
Sa dili pa magklase, drowinga sa pisara ang mosunod nga diagram.
Sa pag-andam sa mga estudyante nga makasabut sa mga pagtulun-an diha sa 2 Nephi 3, pahibaloa sila nga kini nga kapitulo naglakip sa impormasyon bahin sa upat ka lalaki nga pareho og pangalan. Dapita ang mga estudyante sa pagpangita dayon sa scripture reference sa ubos sa matag hulagway diha sa pisara aron sa pagtino kon kinsa ang girepresentar sa matag hulagway. Kon ang usa ka estudyante makakita sa tubag, ipasulat kini niya diha sa pisara. (Ang unang hulagway nagrepresentar sa anak ni Lehi nga si Joseph. Ang ikaduha nagrepresentar ni propeta Jose nga gibaligya ngadto sa Ehipto mga 1,700 ka tuig sa wala pa matawo si Jesukristo. Ang ikatulo nagrepresentar ni Propeta Joseph Smith. Ang ikaupat nagrepresentar ni Joseph Smith Sr.)
Pag-display og hulagway ni Propeta Joseph Smith, sama sa Brother Joseph (62161; Libro sa mga Hulagway sa Ebanghelyo [2009], nu. 87). Pahibaloa ang mga estudyante nga kadaghanan sa 2 Nephi 3 nag-focus sa panagna ni Jose sa Ehipto kalabut ni Propeta Joseph Smith.
Dapita ang tulo ka estudyante nga magpuli-puli sa pagbasa og kusog gikan sa 2 Nephi 3:6–8. Hangyoa ang klase sa pagtino sa mga pulong nga gigamit ni Jose sa Ehipto sa paghulagway ni Joseph Smith ug sa buhat nga iyang pagatumanon. (Mahimong kinahanglan nimong ipasabut nga sa dihang gigamit ni Jose sa Ehipto ang mga pulong nga “bunga sa akong mga kaliwat,” nagpasabut siya sa iyang mga kaliwatan.) Diha sa pisara sa ubos sa hulagway nga nagrepresentar ni Joseph Smith, ilista ang mga pulong nga nakit-an sa mga estudyante. Kinahanglan nga ilang matino ang mga pulong sama sa “usa ka pinili nga manalagna ngadto sa bunga sa akong mga kaliwat,” “pagatahuron pag-ayo,” “sa pagdala kanila ngadto sa kasayuran sa mga pakigsaad,” ug “Ako mohimo kaniya nga halangdon sa akong mga mata.”
-
Samtang nagtuon kita sa 2 Nephi 3:6–8, unsay inyong nakat-unan bahin ni Propeta Joseph Smith? (Tabangi ang mga estudyante nga makasabut nga ang Ginoo mipatunhay ni Propeta Joseph Smith aron motabang sa pagpahinabo sa Pagpahiuli sa ebanghelyo.)
Dapita ang mga estudyante sa pagbasa og hilum sa 2 Nephi 3:11–15. Hangyoa sila sa pagpangita sa dugang nga mga pulong bahin sa unsay matuman sa Dios pinaagi ni Propeta Joseph Smith. Kon sila duna nay igong panahon sa pagtuon niining mga bersikulo, pangutan-a sila kon unsa ang ilang nakit-an. Idugang ang ilang mga tubag ngadto sa lista diha sa pisara ubos sa hulagway nga nagrepresentar ni Propeta Joseph Smith. (Ang mga tubag mahimong maglakip sa “pagdala sa akong pulong,” “gikan sa kahuyang siya pagalig-unon,” “sila nga nagtinguha sa pagpakaulaw kaniya pagalaglagon,” ug “pagatawgon … sama sa ngalan sa iyang amahan.”)
Aron matabangan pa ang mga estudyante nga makasabut ug makapamalandong sa tahas ni Propeta Joseph Smith diha sa Pagpahiuli sa ebanghelyo, basaha og kusog ang 2 Nephi 3:11, nga maghatag og espesyal nga gibug-aton sa mga pulong nga “gahum sa pagdala sa akong pulong.”
-
Unsa ang pipila ka mga ehemplo sa pulong sa Dios nga napagawas ni Joseph Smith? (Ang mga tubag mahimong maglakip sa Basahon ni Mormon, ang Doktrina ug mga Pakigsaad, ang Perlas nga Labing Bililhon, ang Hubad ni Joseph Smith, ug ang kaugalingong mga wali sa Propeta.)
Sa pagpadayon niini nga panaghisgutan, siguroha ang pagpasabut nga si Jose sa Ehipto nanagna nga si Propeta Joseph Smith mopagawas sa Basahon ni Mormon. Mahimong kinahanglan nimong ipasabut nga ang 2 Nephi 3:12 naghisgot og duha ka basahon: ang basahon nga gisulat sa mga kaliwatan ni Jose sa Ehipto mao ang Basahon ni Mormon; ang basahon nga gisulat sa mga kaliwatan ni Juda mao ang Biblia. Mahimo nimong isugyot nga isulat sa mga estudyante kini nga mga pagpasabut diha sa ilang mga kasulatan.
Dapita ang mga estudyante sa pagpangita diha sa 2 Nephi 3:12 alang sa mga pulong nga naghulagway sa epekto sa Basahon ni Mormon ug sa Biblia ngadto sa kalibutan samtang kini “magkahiusa.” (Pananglitan, ang mga estudyante mahimong mahibalo sa “pagsupak sa sayop nga mga doktrina,” “pagtapos sa mga panagbingkil,” ug “pagpahiluna sa kalinaw.”)
Aron matabangan ang mga estudyante nga makapamalandong kon sa unsang paagi nga ang Basahon ni Mormon nakaimpluwensya sa ilang kinabuhi, ipangutana:
-
Kanus-a ninyo nasinati ang gahum sa Basahon ni Mormon sa inyong kinabuhi o nakita ang impluwensya niini sa kinabuhi sa mga higala o mga sakop sa pamilya?
Dapita ang usa ka estudyante sa pagbasa og kusog sa 2 Nephi 3:15. Hangyoa ang klase sa paghatag og espesyal nga pagtagad sa mga pulong nga “modala sa akong mga katawhan ngadto sa kaluwasan.”
-
Sa unsang mga paagi nga ang Basahon ni Mormon makatabang sa pagdala sa mga katawhan ngadto sa kaluwasan?
-
Unsa ang kalainan nga nahimo sa Basahon ni Mormon diha sa inyong kinabuhi?
Aron matabangan ang mga estudyante nga makasabut ug makapasalamat sa gi-orden nang daan nga misyon ni Propeta Joseph Smith, hangyoa ang usa ka estudyante sa pagbasa og kusog sa mosunod nga pamahayag ni Presidente Brigham Young:
“Gitakda kini sa konseho sa kahangturan, dugay na sa wala pa ipahimutang ang mga pundasyon sa yuta, nga siya, si Joseph Smith, mao ang tawo, sa katapusang dispensasyon niini nga kalibutan, nga modala sa pulong sa Dios ngadto sa mga katawhan, ug sa pagdawat sa kahingpitan sa mga yawe ug gahum sa Priesthood sa Anak sa Dios. Ang Ginoo nag-obserbar kaniya, ug sa iyang amahan, ug sa amahan sa iyang amahan, ug sa ilang mga katigulangan balik … ngadto ni Adan. Siya nagbantay niana nga pamilya ug kana nga dugo nga nagdagan gikan sa tuburan niini ngadto sa pagkatawo niana nga tawo. Siya gi-orden nang daan sa kahangturan sa pagdumala niining katapusan nga dispensasyon” (Discourses of Brigham Young, sel. John A. Widtsoe [1954], 108).
I-summarize ang 2 Nephi 3:16–24 pinaagi sa pagpasabut nga si Jose sa Ehipto mitandi kang Joseph Smith ngadto ni Moises. Hangyoa ang mga estudyante sa pagpangita sa mga pulong nga naghulagway ni Propeta Joseph Smith diha sa 2 Nephi 3:24. Samtang mipakigbahin sila sa mga pulong nga ilang natino, idugang ang ilang mga tubag ngadto sa lista diha sa pisara.
Basaha ang mosunod nga pamahayag ni Presidente Gordon B. Hinckley. Hangyoa ang mga estudyante sa pagpaminaw alang sa mga kamatuoran nga gipadayag pinaagi ni Propeta Joseph Smith:
“Tuguti ako sa pagsulti og pipila ka mga doktrina ug mga gituohan nga nakapalahi kanato sa ubang mga simbahan, ug ang tanan miabut pinaagi sa pagpadayag ngadto sa batan-ong Propeta [nga si Joseph Smith]. …
“[Ang] kahibalo sa Dios. …
“Ang Basahon ni Mormon. …
“… Ang napahiuli nga priesthood. …
“… Ang plano sa kinabuhing dayon sa pamilya. …
“Ang pagka-inosente sa gagmayng mga bata. …
“… Ang importante nga doktrina sa kaluwasan alang sa mga patay. …
“Ang mahangturong kinaiya sa tawo. …
“… Ang baruganan sa moderno nga pagpadayag. …
“… Sa iyang mubo nga 38 ka tuig ug tunga nga kinabuhi, miabut nganha kaniya ang dili matandi nga paghatag sa kahibalo, mga gasa, ug doktrina” (“Ang Pinakaimportanteng mga Butang nga Gipadayag sa Dios,” Ensign o Liahona, Mayo 2005, 80–83).
Dapita ang usa ka estudyante sa pagdugang sa lista ni Presidente Hinckley ngadto sa lista diha sa pisara.
Ipabasa og kusog sa usa ka estudyante ang Doktrina ug mga Pakigsaad 135:3. Ipasabut nga si Elder John Taylor sa Korum sa Napulog Duha ka mga Apostoles, kinsa sa kaulahian nahimong ikatulo nga Presidente sa Simbahan, misulat niining mga pulong sa wala madugay human sa kamatayon ni Propeta Joseph Smith. Hangyoa ang mga estudyante sa pagpangita sa mga aytem niining bersikulo nga ilang madugang ngadto sa lista diha sa pisara. Idugang ang ilang mga tubag ngadto sa lista.
Hatagi ang mga estudyante og panahon sa pagribyu sa lista diha sa pisara. Dapita sila sa pagpamalandong kon unsay ilang nakat-unan bahin sa tahas ni Propeta Joseph Smith. Dapita sila sa pagpamalandong kon unsay ilang nahibaloan ug gibati bahin sa Propeta pinaagi sa pagsulat og tubag sa usa sa mosunod nga mga pangutana diha sa ilang mga scripture study journal o mga class notebook:
-
Unsa ang inyong nakat-unan o gibati karon nga nakapalig-on sa inyong pagpamatuod bahin ni Propeta Joseph Smith?
-
Unsa may gibuhat, gitudlo, o gipahiuli ni Joseph Smith nga inyong gibati nga “labing bililhon” (2 Nephi 3:7) nganha kaninyo?
Ipares-pares ang mga estudyante. Awhaga sila sa pagpakigbahin sa ilang mga pagpamatuod bahin ni Propeta Joseph Smith ngadto sa usag usa. Kon ikaw dunay panahon, mahimo nimong awhagon ang pipila ka mga estudyante sa pagpakigbahin ngadto sa tibuok klase. Ipakigbahin ang imong kaugalingong pagpamatuod nga ang Dios mipatunhay ni Joseph Smith aron mapahinabo ang Pagpahiuli. Dapita ang imong mga estudyante nga mainampuong mangita og mga paagi sa pagpakigbahin sa ilang mga pagpamatuod bahin ni Propeta Joseph Smith ug sa Basahon ni Mormon ngadto sa uban, ilabi na sa ilang mga higala ug pamilya.
Komentaryo ug Background nga Impormasyon
2 Nephi 3:12. Sa unsang paagi nga ang Basahon ni Mormon ug ang Biblia “magkahiusa”
Human sa publikasyon sa edisyon sa Mga Santos sa Ulahing mga Adlaw sa King James Bible, uban sa Topical Guide ug sa mga footnote niini nga nag-reference sa tanang sumbanan nga mga basahon, si Presidente Boyd K. Packer sa Korum sa Napulog Duha ka mga Apostoles mipasabut: “Ang Daang Tugon ug ang Bag-ong Tugon … ug … ang Basahon ni Mormon … nahiusa na karon sa ingon nga paagi nga samtang magtuon ka sa usa dad-on ka ngadto sa lain; samtang magkat-on ka sa usa malamdagan ka sa lain. Kini sa pagkatinuod usa na diha sa atong mga kamot” (“Scriptures,” Ensign, Nob. 1982, 53).
2 Nephi 3:18. Kinsa man ang tigpama-ba?
Si Elder Bruce R. McConkie sa Korum sa Napulog Duha ka mga Apostoles mikomentaryo bahin sa kailhanan [identity] sa mga tawo nga gihisgutan diha niini 2 Nephi 3:18. Ang mga pulong diha sa mga bracket mga gisukip ni Elder McConkie. Miingon siya: “Bantayi kining mga pulong sa Ginoo: ‘Ug Ako, tan-awa, Ako mohatag ngadto kaniya [Mormon] nga siya mosulat sa sinulat sa bunga sa imong mga kaliwat [ang mga Nephite], ngadto sa bunga sa imong mga kaliwat [ang mga Lamanite]; ug ang tigpama-ba sa imong mga bat-ang [Joseph Smith] mao ang mopadayag niini.’ Niana, gisulat ni Mormon ang Basahon ni Mormon, apan unsay iyang gisulat gikuha gikan sa mga sinulat sa mga propeta nga Nephite; ug kining mga sinulat, gihugpong ngadto sa usa ka basahon, gihubad ni Joseph Smith ug gipadala niya ngadto sa mga Lamanite” (A New Witness for the Articles of Faith [1985], 426).