Pasiuna saAng Basahon ni Omni
Nganong tun-an kini nga basahon?
Pinaagi sa ilang pagtuon sa basahon ni Omni, ang mga estudyante makakat-on nga gipanalipdan sa Ginoo ang mga matarung nga Nephite ug gigiyahan sila ngadto sa yuta sa Zarahemla (tan-awa sa Omni 1:7, 12–13). Makakat-on usab sila mahitungod sa ubang mga grupo—ang mga Mulekite (o ang mga katawhan sa Zarahemla) ug ang mga Jaredite—kinsa gigiyahan sa Ginoo ngadto sa yuta sa saad.
Kinsa ang nagsulat niini nga basahon?
Ang basahon ni Omni gisulat sa lima ka lain-laing mga tawo: Omni, Amaron, Chemish, Abinadom, ug Amaleki. Si Omni anak nga lalaki ni Jarom ug usa ka apo sa apo nila ni Lehi og Sariah. Gihulagway niya ang iyang kaugalingon isip usa ka “dautan nga tawo” kinsa “wala makahupot … sa mga sugo sa Ginoo” (Omni 1:2). Si Amaron (anak nga lalaki ni Omni), si Chemish (igsoong lalaki ni Amaron), ug si Abinadom (anak nga lalaki ni Chemish) matag usa midugang og mga tala. Gisulat sa anak nga lalaki ni Abinadom nga si Amaleki ang kadaghanan sa basahon ni Omni ug mao ang katapusang tawo nga misulat diha sa gagmay nga mga palid ni Nephi. Gihatag niya ang mga palid ngadto ni Haring Benjamin.
Para kang kinsa kini nga basahon gisulat ug ngano?
Gipahayag ni Omni nga siya “gisugo sa [iyang] amahan, nga si Jarom, nga [siya] kinahanglan mosulat … aron sa pagtipig sa kasaysayan sa [ilang] kagikanan” (Omni 1:1). Kini nga pamahayag nagsugyot nga si Omni misulat alang sa kaayohan sa iyang mga kaliwat. Ang sunod nga tulo ka manunulat sa basahon ni Omni wala nagtunong og piho nga mga tawo o nagpahayag og usa ka katuyoan alang sa ilang pagsulat. Apan ang pagdapit ni Amaleki alang sa tanang mga katawhan nga “moduol ngadto kang Kristo … ug moambit sa iyang kaluwasan” (Omni1:26) nagpakita nga siya nabalaka mahitungod sa kaluwasan niadtong kinsa mobasa sa iyang mga pulong.
Kanus-a ug diin kini gisulat?
Ang lain-laing mga manunulat sa basahon ni Omni misulat sa mga panahon tali sa 361 B.C. ug 130 B.C. Ang unang upat ka mga manunulat misulat diha sa yuta sa Nephi. Gihimo ni Amaleki ang iyang rekord diha sa yuta sa Zarahemla.
Unsa ang pipila ka mga butang nga nakalahi niini nga basahon?
Ang basahon ni Omni mao ang katapusang basahon sa gagmay nga mga palid ni Nephi. Ang Omni mikabat og mas taas nga panahon kay sa ubang basahon diha sa gagmay nga mga palid. Diha sa tibuok Basahon ni Mormon, ang mga basahon lamang sa 4 Nephi ug Ether ang mikabat og mas taas nga yugto sa panahon kaysa gilangkob sa Omni.
Ang basahon ni Omni naghatag usab og mga detaye mahitungod sa pagmando sa una nga Haring Mosiah, kinsa mao ang amahan ni Haring Benjamin ug apohang lalaki sa ikaduha nga Haring Mosiah. Ang una nga Haring Mosiah migiya sa matarung nga mga Nephite pagawas sa yuta sa Nephi ug gihiusa sila ngadto sa mga katawhan sa Zarahemla (tan-awa sa Omni 1:12–23). Ang basahon ni Omni nagsaysay nga gigiyahan sa Ginoo ang mga katawhan sa Zarahemla (nailhan usab isip ang mga Mulekite) gikan sa Jerusalem ngadto sa yuta sa saad dili dugay human si Lehi ug ang iyang pamilya mibiya gikan sa Jerusalem (tan-awa sa Omni 1:15).
Ang Omni mao ang unang basahon diha sa Basahon ni Mormon nga naghisgot sa mga Jaredite. Kini usab naghisgot nga pipila sa mga Nephite mibiya sa Zarahemla aron mobalik ngadto sa yuta sa Nephi, nagtag-an sa mga panghitabo nga gisaysay diha sa Mosiah 7–24. Sa katapusan, ang basahon sa Omni nagpaila ni Haring Benjamin ug nagpasabut kon nganong gisalig ni Amaleki kaniya ang sagradong mga rekord (tan-awa sa Omni1:25).
Outline
Omni 1:1–3 Si Omni naghulagway og mga yugto sa kalinaw ug gubat tali sa mga Nephite ug sa mga Lamanite.
Omni1:4–11 Si Amaron, Chemish, ug Abinadom nagsulat diha sa gagmay nga mga palid ni Nephi. Niini nga panahon, ang mga Nephite anaa sa kahimtang sa apostasiya.
Omni 1:12–30 Si Amaleki nagrekord og importanting mga panghitabo nga nahitabo sulod sa mga pagmando ni Haring Mosiah ug Haring Benjamin. Nagdapit siya sa tanan sa pagduol ngadto kang Kristo.