Leksyon 90: Alma 32

Leksyon 90

Alma 32

Pasiuna

Human nasaksihan ang matang sa pagsimba sa hingpit nang mibiya sa kamatuoran nga mga Zoramite, si Alma ug ang iyang mga kaubanan nagsugod sa pagsangyaw sa pulong sa Dios ngadto sa mga Zoramite. Nagsugod sila sa pagsinati og pipila ka kalampusan sa mga tawo kinsa mga kabus ug kinsa gisalikway sa ilang mga sinagoga. Pinaagi sa pagkomparar sa pulong sa Dios ngadto sa usa ka liso, gitudlo ni Alma sa mga tawo kon unsaon sa pagdawat ang pulong sa Dios ug madugangan ang ilang hugot nga pagtuo.

Mga Sugyot alang sa Pagtudlo

Alma 32:1–16

Ang mapainubsanon nga mga Zoramite nagpakita nga sila andam sa pagpaminaw sa pulong sa Dios

Dapita ang mga estudyante sa paghunahuna nga ikaw usa ka higala kinsa nangutana kanila kon giunsa nimo pagkahibalo kon ang ebanghelyo ni Jesukristo tinuod. Pangutan-a sila kon unsa ang ilang ikasulti aron matabangan ka nga makadawat sa imong pagpamatuod.

Human ang mga estudyante mipakigbahin sa ilang mga hunahuna, isulat sa pisara ang Unsaon sa pagdawat ug sa pagpalig-on sa usa ka pagpamatuod. Sultihi ang mga estudyante nga sa tibuok leksyon, imong ilista ang mga baruganan ug mga panabut nga ilang madiskubrihan mahitungod kon unsaon sa pagdawat ug sa pagpalig-on sa usa ka pagpamatuod.

Pahinumdumi ang mga estudyante nga si Alma ug ang iyang kaigsoonan nakaobserbar sa sayop nga pagsimba sa mga Zoramite, usa ka grupo sa mga Nephite nga hingpit nang mibiya sa kamatuoran. Tungod sa iyang kaguol sa kadautan sa mga tawo, siya nag-ampo alang sa kahupayan ug kusog aron makahimo sa pagtudlo kanila. (Tan-awa sa Alma 31.)

Dapita ang usa ka estudyante sa pagbasa og kusog sa Alma 32:1–3. Hangyoa ang klase sa pagpangita kon hain sa grupo sa mga Zoramite ang mipakita og interes diha sa mga mensahe sa mga misyonaryo. Hangyoa sila sa pagreport unsay ilang nakit-an.

Sumala sa Alma 32:3, sa unsang paagi nga kining mga tawhana kabus? (“Sila mga kabus sa mga butang nga kalibutanon; ug usab sila mga kabus sa kasingkasing.”)
Unsa man sa inyong hunahuna ang gipasabut sa “kabus sa kasingkasing”?

Aron matabangan ang mga estudyante sa pagtubag niining pangutana, dapita ang pipila kanila nga magpuli-puli sa pagbasa og kusog sa Alma 32:4–12. (Tingali ang mga estudyante mosugyot nga ang pagkakabus sa kasingkasing maglakip sa pagkamapainubsanon, mahinulsulon, ug andam nga makadungog sa pulong sa Dios.)

Sa unsang paagi nga ang pangutana sa Alma 32:5 nagpakita nga ang mga Zoramite mga kabus sa kasingkasing?
Sa unsang paagi nga ang kawad-on misangput ngadto sa mga panalangin alang niini nga grupo sa mga Zoramite?
Unsa ang gitudlo niini nga mga bersikulo mahitungod sa pagdawat ug pagpalig-on sa usa ka pagpamatuod? (Samtang mopakigbahin ang mga estudyante sa lain-laing mga baruganan, isulat kini ubos sa ulohan diha sa pisara. Siguroha nga ilang mailhan ang mosunod nga baruganan: Ang pagkamapainubsanon nag-andam kanato sa pagdawat sa pulong sa Dios.)
Nganong ang pagkamapainubsanon mahinungdanon diha sa proseso sa pagdawat ug pagpapalig-on sa usa ka pagpamatuod?

Dapita ang pipila ka estudyante nga magpuli-puli sa pagbasa og kusog sa Alma 32:13–16. Hangyoa ang klase sa pagpangita sa duha ka managlahi nga paagi nga ang mga tawo mahimong mapainubsanon. (Mahimo nga ang mga tawo mopili nga magmapainubsanon, o pugson sila nga magmapainubsanon.)

Unsa ang atong makat-unan mahitungod sa pagkamapainubsanon gikan niini nga mga bersikulo? (Tabangi ang mga estudyante nga mahibalo sa mosunod nga baruganan: kita mas mapanalanginan kon mopili kita nga magmapainubsanon kay sa kita mapugos nga magmapainubsanon.) Sa inyong hunahuna ngano kaha nga mas maayong mopili nga magmapainubsanon?
Sa inyong hunahuna unsa ang gipasabut sa magmapainubsanon sa kaugalingon “tungod sa pulong”? (Alma 32:14). Sa unsang paagi kini magamit sa atong mga kinaiya diha sa simbahan, sa seminary, o sa pagtuon sa kasulatan sa pamilya?

Alma 32:17–43

Si Alma nagtudlo sa mga Zoramite kon unsaon sa pagpalambo sa ilang pagtuo

Ipasabut nga si Alma miila sa dili tinuod nga ideya nga anaa sa daghang mga tawo mahitungod sa pagbaton og pagpamatuod. Hangyoa ang usa ka estudyante sa pagbasa og kusog sa Alma 32:17–18 samtang ang klase moila niining sayop nga ideya.

Unsa ang sayop nga ideya nga naa sa daghang mga tawo mahitungod sa pagbaton og pagpamatuod?
Unsa ang sayop sa pagpangayo og usa ka timailhan sa dili pa motuo? (Mahimo nimong pahinumduman ang mga estudyante sa ehemplo ni Sherem sa Jacob 7:13–16 ug ang ehemplo ni Korihor sa Alma 30:43–52. Mahimo usab nimong ipabasa nila ang Doktrina ug mga Pakigsaad 63:9 sa pagpasabut og maayo nga ang mga timailhan mao ang sangputanan sa hugot nga pagtuo, dili usa ka butang nga atong pangayoon sa dili pa kita makaangkon og hugot nga pagtuo.)

Ipasabut nga si Alma mitudlo sa mga tawo unsa ang hugot nga pagtuo. Dapita ang mga estudyante sa pagbasa sa hilum sa Alma 32:21, nga mangita sa kahulugan sa hugot nga pagtuo ni Alma. Ipasabut nga kining bersikulo usa ka scripture mastery passage. Mahimo nimong awhagon ang mga estudyante sa pagmarka niini sa lahi nga paagi aron sayon nila kining matultolan.

Hangyoa ang mga estudyante sa pagbasa sa hilum sa Alma 32:22, nga mangita sa tambag kon unsaon sa pagdawat ug pagpalig-on sa usa ka pagpamatuod. Dapita sila sa pagreport unsa ang ilang nadiskubrihan.

Idugang ang Hinumdumi ang kalooy sa Dios ug Tuohi ang pulong sa Dios ngadto sa lista sa pisara.

Nganong importante kini nga mga buhat diha sa pagpalambo sa atong pagtuo?

Ipasabut nga aron matabangan ang mga Zoramite nga makasabut kon usaon sa pagtuo sa pulong sa Dios, si Alma misugyot nga sila maghimo og usa ka eksperimento.

Ngano nga ang tawo magpahigayon og siyentipikanhon nga mga eksperimento? (Aron sa pagsusi kon ang usa ka teyoriya o ideya tinuod.)

Hangyoa ang usa ka estudyante sa paghulagway og mga eksperimento nga ilang nahimo diha sa klase sa siyensya o sa ubang sitwasyon. Tabangi sila nga makita nga ang mga ekperimento nagkinahanglan og aksyon, dili lang tag-an tag-an, sa habig sa tig-research. Ang proseso sa pagdawat o pagpalig-on sa usa ka pagpamatuod nagkinahanglan usab og aksyon.

Ipabasa og kusog sa usa ka estudyante ang Alma 32:27. Hangyoa ang klase sa pagpangita sa eksperimento nga gidapit ni Alma nga ipahigayon sa mga Zoramite. Idugang ang Eksperimento sa pulong ngadto sa lista diha sa pisara.

Unsa kaha ang gipasabut ni Alma sa dihang siya miingon nga “bisan ngadto sa pagsulay sa [iyang] mga pulong”?
Unsa kaha ang gipasabut ni Alma sa dihang siya miingon nga “mopukaw ug modasig sa inyong mga galamhan”? (Tingali kinahanglan nimong ipasabut nga ang pulong galamhan nagpasabut sa atong abilidad sa paghunahuna ug pagbuhat ug pagtuman sa mga butang. Si Alma nagdapit sa mga tawo sa pagbuhat sa iyang mga pulong. Mahimo nimong idugang ang Mopukaw ug modasig sa inyong galamhan ngadto sa lista diha sa pisara.)
Unsa man sa inyong hunahuna ang gipasabut sa “pagpakita og usa ka tipik sa hugot nga pagtuo”?

Aron matabangan ang mga estudyante sa pagdiskubre kon unsaon nila pagsugod sa paghimo niining eksperimento sa ilang mga kinabuhi, dapita sila sa pagbasa sa hilum sa Alma 32:28.

Sa unsa gikomparar ni Alma ang pulong sa Dios? (Usa ka liso.)
Unsa ang pipila ka mga tinubdan sa pulong sa Dios? (Ang mga tubag kinahanglang maglakip sa mga kasulatan, sa mga pagtulun-an sa mga propeta sa ulahing mga adlaw, ug sa personal nga pagpadayag gikan sa Espiritu Santo.)
Unsa ang gisulti ni Alma nga kinahanglan gayud natong buhaton niining “liso”?

Ilista ang mga tubag sa mga estudyante diha sa pisara. Mahimo nimo kining isulat sa ubos sa Sulayan ang pulong, nga imong gisulat sa sinugdanan. Ang lista mahimong maglakip sa mosunod nga mga elemento:

Hatagi og luna alang sa pulong (o liso) aron matanom diha sa inyong kasingkasing.
Ayaw ilabay ang pulong pinaagi sa inyong kawalay pagtuo.
Ilha ang pagtubo sa pulong diha kaninyo.

Aron matabangan ang mga estudyante nga masabtan unsa ang ilang nabasa mahitungod sa eksperimento, ipangutana ang mosunod:

Sa unsang paagi nga ang pulong sa Dios sama sa usa ka liso nga mahimong matisok sa atong mga kasingkasing? (Ang mga tubag mahimong maglakip nga kini motubo, nga kini makapalig-on kanato, ug nga kita kinahanglang moamuma niini.)

Samtang hisgutan sa mga estudyante ang pagkomparar sa pulong sa Dios ngadto sa usa ka liso, dapita sila sa pagbasa sa hilum sa Alma 33:22–23. Sa dili pa sila magbasa, hangyoa sila nga mangita sa pagpasabut ni Alma sa “kini nga pulong.” Tabangi sila nga makita nga kini nagpasabut ngadto ni Jesukristo ug sa Iyang Pag-ula.

Sa inyong hunahuna unsa kaha ang gipasabut niining “mohatag og luna” alang sa pulong nga matisok sa atong mga kasingkasing? (Tan-awa sa Alma 32:28. Ang mga tubag mahimong maglakip nga kita kinahanglang mobukas sa atong mga kasingkasing ug nga kita nagkinahanglan nga mohimo og dapit sa atong mga kinabuhi alang sa pagtuon sa kasulatan.)
Sa inyong hunahuna unsa ang gipasabut sa pagbati nga ang pulong sa Dios “nagtubo” diha sulod sa inyong kasingkasing? Kon ang pulong sa Dios nagtubo diha sulod sa inyong kasingkasing, nan unsa ang mahitabo sa inyong pagpamatuod ug hugot nga pagtuo?
Kanus-a nahitabo nga ang pulong sa Dios mipadako sa inyong kalag ug midan-ag sa inyong salabutan?

Hangyoa ang pipila ka estudyante nga magpuli-puli sa pagbasa sa Alma 32:29–34. Dapita ang klase sa pagsunod, nga mangita sa mga pulong nga naghulagway kon unsa ang atong makat-unan mahitungod sa pulong sa Dios. Dayon hangyoa ang mga estudyante sa pagbasa sa mga pulong nga ilang nakit-an ug ipasabut kon nganong sila mipili niini. Ipangutana:

Nganong ang atong hugot nga pagtuo dili pa hingpit pagkahuman og himo niining eksperimento? Unsa pa kaha ang gikinahanglan natong buhaton aron makadawat og usa ka malungtaron nga pagpamatuod sa ebanghelyo?
Sa unsang paagi nga ang proseso sa pagtabang sa usa ka punoan sa kahoy nga motubo susama sa proseso sa pagpalig-on sa usa ka pagpamatuod?

Dapita ang pipila ka estudyante nga magpuli-puli sa pagbasa og kusog sa Alma 32:35–40. Hangyoa ang klase sa pagpangita sa tambag ni Alma mahitungod kon unsaon sa pagkompleto sa eksperimento.

Sumala sa Alma 32:37–40, Unsa ang gikinahanglan natong buhaton aron ang atong pagtuo diha sa pulong sa Dios magpadayon sa pagtubo? (Idugang ang Amumahon ang pulong ngadto sa lista diha sa pisara.)
Unsa ang atong mahimo aron maamumahan kini? (Ang mga tubag mahimong maglakip nga kita makatuon sa mga kasulatan kada adlaw, mag-ampo alang sa giya samtang kita magtuon, mangita og paagi nga ang mga kasulatan ug ang mga pagtulun-an sa mga propeta sa ulahing mga adlaw magamit sa atong mga kinabuhi, ug ipakigbahin unsa ang atong nakat-unan.)
Unsa ang mahitabo kon atong ibaliwala ang punoan o mapakyas sa pag-amuma niini? Unsa ang mahitabo kon atong ibaliwala ang pulong sa Dios nga natisok diha sa atong mga kasingkasing?

Hangyoa ang mga estudyante sa pagsulat diha sa ilang mga notebook o scripture study journal unsa ang ilang nakat-unan gikan sa Alma 32 mahitungod kon unsaon nato sa pagdawat ug pagpalig-on sa usa ka pagpamatuod. Mahimo usab nimong isugyot nga ilang isulat kini nga mga summary diha sa ilang mga kasulatan duol sa Alma 32:37–43.

Dapita ang mga estudyante sa pagpakigbahin sa unsay ilang nasulat. Samtang sila mopakigbahin, siguroha nga sila mopahayag nga kon makugihon kitang moamuma sa pulong sa Dios diha sa atong kasingkasing, ang atong pagtuo ug ang atong pagpamatuod ni Jesukristo ug sa Iyang ebanghelyo motubo.

Hangyoa ang mga estudyante sa pagbasa sa Alma 32:41–43, nga mangita sa paghulagway ni Alma sa punoan sa kahoy ug sa bunga.

Asa pang dapita sa Basahon ni Mormon nga naglakip sa usa ka paghulagway sa usa ka punoan sa kahoy nga may bunga nga “kini hilabihan ka tam-is”? (Mahimo nga gikinahanglan nimong pahinumduman ang mga estudyante sa deskripsyon sa kahoy sa kinabuhi sa 1 Nephi 8:11–12 ug 1 Nephi 11:9–24.)
Diha sa panan-awon ni Lehi ug Nephi sa kahoy sa kinabuhi, unsa ang nagrepresentar sa kahoy ug sa bunga? (Ang kahoy nagrepresentar sa gugma sa Dios sumala sa gipahayag pinaagi sa Manluluwas ug sa Iyang Pag-ula, ug ang bunga nagrepresentar sa mga panalangin nga atong madawat pinaagi sa Pag-ula. Tan-awa sa leksyon 12 dinhi niini nga basahon.)
Diha sa panan-awon ni Lehi ug Nephi, sa unsang paagi nga nakaabut ang mga tawo sa kahoy? (Pinaagi sa pagsubay sa gunitanan nga puthaw, nga nagrepresentar sa pulong sa Dios.) Unsaon kini pagpahisama sa pagkompara ni Alma sa pulong sa Dios ngadto sa usa ka liso?

Dapita ang pipila ka estudyante sa pagpakigbahin kon sa unsang paagi nga sila misubay sa buluhaton nga gihulagway sa Alma 32. Pangutan-a sila kon sa unsang paagi nga kining buhat nakaimpluwensya sa ilang mga kinabuhi. Ikonsiderar ang pagpakigbahin sa inyong kaugalingong mga kasinatian sa dihang kamo mibati sa gahum sa pulong sa Dios.

Scripture Mastery—Alma 32:21

Hangyoa ang mga estudyante sa paggamit sa Alma 32:21 sa pag-ila kon sa unsang paagi nga ang mga tawo sa mosunod nga mga sitwasyon nakapakita og hugot nga pagtuo o wala nakapakita og hugot nga pagtuo.

Usa ka batan-ong babaye gusto og pisikal nga ebidensya nga ang Basahon ni Mormon tinuod sa dili pa siya motuo niini.
Usa ka batan-ong lalaki nakadungog nga ang tanang takus nga batan-ong lalaki kinahanglan moserbisyo og full-time nga misyon. Bisan og kabus ang iyang pamilya, determinado siya nga magserbisyo ug naghimo og mga pagpangandam sa pagserbisyo.
Usa ka batan-ong babaye gusto nga malimpyo gikan sa iyang mga sala pinaagi sa Pag-ula ni Jesukristo. Nasayud siya nga gikinahanglan niya nga mokumpisal sa iyang mga kalapasan ngadto sa iyang bishop aron hingpit nga makahinulsol. Nakigkita siya sa iyang bishop.

Pahinumdom: Mahimong makita nimo kini nga ideya atol sa leksyon samtang imong gipaila ang scriputure mastery passage, o mahimong imo kining gamiton sa katapusan sa leksyon.

Komentaryo ug Background nga Impormasyon

Alma 32:21–22, 26–27. Hugot nga pagtuo isip usa ka pagpili

Si Bishop Richard C. Edgley sa Presiding Bishopric mitudlo nga ang hugot nga pagtuo usa ka pagpili:

“Tungod sa mga panagbingkil ug mga hagit nga atong giatubang sa kalibutan karon, gusto ko nga mosugyot og usa ka pagpili—usa ka pagpili sa kalinaw ug panalipod ug usa ka pagpili nga angay alang sa tanan. Kana nga pagpili mao ang hugot nga pagtuo. Timan-i nga ang hugot nga pagtuo dili libre nga gasa nga gihatag sa walay paghunahuna, tinguha, o paningkamot. Dili kini moabut nga sama sa yamog nga matagak gikan sa langit. Ang Manluluwas miingon, ‘Umari kanako’ (Mateo 11:28) ug ‘Pangayo, ug kamo pagahatagan’ (Mateo 7:7). Kini mga pulong sa paglihok—duol, tuktok. Kini mga pagpili. Mao nga ako moingon, pilia ang hugot nga pagtuo. Pilia ang hugot nga pagtuo kay sa pagduha-duha, pilia ang hugot nga pagtuo kay sa kahadlok, pilia ang hugot nga pagtuo kay sa wala maila ug sa wala makita, ug pilia ang hugot nga pagtuo kay sa pagka-negatibo.

“Ang walay paglubad nga paghisgot ni Alma kabahin sa hugot nga pagtuo, ingon sa girekord diha sa ika-32 nga kapitulo sa Alma sa Basahon ni Mormon, mao ang nagsunod-sunod nga mga kapilian aron sa pagsiguro sa pagpalambo ug pagpatunhay sa atong hugot nga pagtuo. Si Alma mihatag kanato og direktiba sa pagpili. Ang iya mao ang mga pulong sa paglihok nga gipasiugdahan pinaagi sa pagpili. Iyang gigamit ang mga pulong pagmata, pagbangon, pagsulay, pagbansay, pagtinguha, pagtrabaho, ug pagtanom. Dayon si Alma mipasabut nga kon kita mohimo niini nga mga pagpili ug dili molabay sa liso pinaagi sa pagkawalay pagtuo, dayon ‘kini mosugod sa pagtubo diha sulod sa atong mga dughan’ (Alma 32:28).

“Oo, ang hugot nga pagtuo usa ka pagpili, ug kini kinahanglan gayud nga pagatinguhaon ug palamboon. Sa ingon, responsable kita sa atong kaugalingong hugot nga pagtuo. Responsable usab kita sa atong kakulang sa hugot nga pagtuo. Ang pagpili inyo” (“Hugot nga Pagtuo—ang Pagpili Inyo,” Ensign o Liahona, Nob. 2010, 31–32).

Alma 32:40–43. Pagtinguha og usa ka buhi nga pagpamatuod

Si Presidente Henry B. Eyring sa Unang Kapangulohan miila sa mga paagi nga kita makaamuma sa atong mga pagpamatuod:

“Ang pagpamatuod nagkinahanglan og pag-amuma pinaagi sa pag-ampo diha sa hugot nga pagtuo, ang pagkagutom alang sa pulong sa Dios diha sa kasulatan, ug ang pagkamasulundon sa kamatuoran nga atong nadawat. Adunay kakuyaw nianang pagpasagad sa pag-ampo. Adunay kakuyaw sa atong pagpamatuod nianang panagsang pagtuon ug pagbasa sa mga kasulatan. Kini ang gikinahanglan nga mga sustansya sa atong pagpamatuod. …

“Ang pagbusog diha sa pulong sa Dios, pag-ampo sa kinasingkasing, ug pagmasulundon sa mga sugo sa Ginoo kinahanglan nga idapat sa samang paagi ug sa kanunay aron ang inyong pagpamatuod motubo ug molambo. Usahay kitang tanan adunay mga kahimtang nga dili nato makontrolar nga makasanta sa atong sundanan sa pagtuon sa kasulatan. Tingali may mga panahon nga tungod sa usa ka rason kita dili moampo. Tingali may mga sugo nga gipili nato nga dili tumanon sa usa ka higayon.

“Apan kamo dili makaangkon nianang inyong tinguha alang sa usa ka buhing pagpamatuod kon inyong kalimtan ang pasidaan ug saad diha sa Alma [32:40–43]” (“Usa ka Buhing Pagpamatuod,” Ensign o Liahona, Mayo 2011, 127–28).