Leksyon 86

Alma 25–26

Pasiuna

Human sa pagguba sa siyudad sa Ammonihah, ang mga Lamanite adunay daghan pang mga gubat batok sa mga Nephite ug giabog og balik. Tungod kay nakaangkon og dakong kapildihan, daghang mga Lamanite ang mihunong sa paggamit sa ilang mga hinagiban sa gubat, naghinulsol, ug mipasakop sa mga Anti-Nephi-Lehi. Ang anak nga mga lalaki ni Mosiah ug ang ilang mga kaubanan mitapos sa ilang 14 ka tuig nga misyon diha sa mga Lamanite, si Ammon midayeg sa Ginoo ug mipadayag og pasalamat alang sa panalangin sa pagkahimong instrumento diha sa mga kamot sa Dios sa pagdala sa ebanghelyo ngadto sa mga Lamanite.

Mga Sugyot alang sa Pagtudlo

Alma 25:1–12

Ang mga panagna ni Abinadi ug Alma natuman

Sa dili pa magklase, kopyaha ang mosunod nga tsart diha sa pisara:

Panagna	Katumanan sa Panagna
Alma 9:12. Unsa ang gipanagna ni Alma ngadto sa katawhan sa Ammonihah?	Alma 25:1–2 (tan-awa usab sa Alma 16:2–3, 9–11)
Mosiah17:14–19. Unsa ang gipanagna ni Abinadi nga mahitabo ngadto sa mga kaliwatan ni Haring Noah ug sa iyang mga pari?	Alma 25:4–9

Isulat ang pulong nga salig diha sa pisara. Hangyoa ang mga estudyante sa paghingalan og pipila ka tawo kinsa kasagaran natong gisaligan. (Ang posibling mga tubag naglakip sa Ginoo, mga propeta, mga ginikanan, mga magtutudlo, ug mga coach.) Pangutan-a ang mga estudyante:

• Nganong mas sayon ang pagsalig sa pipila ka mga indibidwal kay sa uban?

• Sa tanang mga tawo sa kalibutan karon, si kinsa man ang labing sayon ninyong masaligan?

Sultihi ang mga estudyante nga ang Alma 25 naglangkob sa ebidensya nga ang pulong sa Ginoo ngadto sa Iyang mga propeta kanunayng matuman. Ipasabut nga ang mga estudyante mogamit sa tsart diha sa pisara aron matun-an ang duha ka mga panagna pinaagi sa mga propeta sa Basahon ni Mormon ug ang katumanan niadtong mga panagna. Hangyoa ang mga estudyante sa pagkopya sa tsart diha sa ilang mga notebook o scripture study journal. Sa unang kolum, ipasulat nila ang mga tubag sa mga pangutana, gamit ang gihatag nga mga pakisayran sa kasulatan. Sa ikaduha nga kolum, ipasulat nila ang mahitungod sa katumanan sa mga panagna. Dapita ang pipila ka mga estudyante nga moreport sa unsay ilang nakit-an.

Dapita ang usa ka estudyante sa pagbasa og kusog sa Alma 25:11–12. Hangyoa ang nahabilin sa klase sa pagsunod, nga mangita kon unsay gisulti ni Mormon nga nahitabo sa mga pulong ni Abinadi. Mahimo nimong isugyot nga markahan sa mga estudyante ang mga pulong nga “kini nga mga pulong namatud-an” sa bersikulo 12.

• Unsay gipasabut sa mga pulong nga “kini nga mga pulong namatud-an”?

Mahimo nimong isugyot nga isulat sa mga estudyante ang D&P 1:38 diha sa ilang mga kasulatan tupad sa Alma 25:12. Dapita ang usa ka estudyante sa pagbasa og kusog sa Doktrina ug mga Pakigsaad 1:38. Hangyoa ang klase sa pagsunod, nga mangita sa managsama nga mga pulong “kini nga mga pulong namatud-an.” (“Ang tanan matuman.”)

• Unsa ang atong makat-unan gikan sa Alma 25:1–12 mahitungod sa mga panagna ug mga saad nga gihimo sa mga propeta? (Isulat ang mosunod nga kamatuoran diha sa pisara: Ang tanang dinasig nga mga pulong sa mga propeta matuman.)

Ipasabut nga ang mga pananglitan diha sa tsart nagpakita nga ang mga pasidaan sa mga propeta ngadto sa dili matarung kanunayng matuman. Ang mga propeta nagpakigbahin usab sa mga saad alang niadtong mobalik sa Ginoo. Kini nga mga saad matuman usab. Aron matabangan ang mga estudyante nga makita ang paggamit niining baruganan sa ilang kinabuhi, basaha ang mosunod nga pamahayag sa Unang Kapangulohan gikan sa Alang sa Kalig-on sa mga Kabatan-onan. Hangyoa ang mga estudyante sa pagpaminaw sa mga saad niadtong nagtuman sa mga sumbanan diha sa booklet.

“Ang mga sumbanan niini nga booklet makatabang kaninyo diha sa importante nga mga pagpili nga inyong gihimo karon ug himoon pa sa umaabut. Kami mosaad nga kon kamo mosunod sa mga pakigsaad nga inyong gihimo ug niini nga mga sumbanan, kamo panalanginan og pagpakig-uban sa Espiritu Santo, ang inyong pagtuo ug pagpamatuod mas molig-on, ug inyong matagamtaman ang nagkadako nga kalipay” (Alang sa Kalig-on sa mga Kabatan-onan [booklet, 2011], ii).

• Unsa ang gisaad sa Unang Kapangulohan?

• Kanus-a ninyo nakita nga kining mga saad natuman?

Alma 25:13–17

Daghang mga Lamanite ang naghinulsol ug mipasakop sa mga Anti-Nephi-Lehi

Hangyoa ang usa ka estudyante sa pagbasa og kusog sa Alma 25:13–14. Hangyoa ang klase sa pagsunod, nga mangita kon unsa ang gibuhat sa daghang Lamanite human sila nakaamgo nga sila dili makapildi sa mga Nephite.

• Unsay inyong ganahan mahitungod sa mga gibuhat sa mga Lamanite?

Ipabasa sa mga estudyante sa hilum ang Alma 25:17, nga mangita sa mga pagbati sa anak nga mga lalaki ni Mosiah mahitungod sa kalampusan nga ilang naangkon sa mga Lamanite.

• Sa unsang paagi nga ang kalampusan sa anak nga mga lalaki ni Mosiah usa ka ehemplo sa mga pulong sa Ginoo nga namatud-an? (Kon ang mga estudyante nagkinahanglan og tabang sa pagtubag niining pangutana, i-refer sila ngadto sa Mosiah 28:5–7 ug Alma 17:11.)

Alma 26

Si Ammon nagmaya sa kalooy sa Ginoo ngadto kaniya ug sa iyang mga kaigsoonan ug ngadto sa mga Lamanite

Ipakita ang pipila ka mga kahimanan (sama sa martilyo, screwdriver, katala, ballpen o lapis, brush sa pintal, gunting, computer, ug usa ka instrumento sa musika). Ipasabut nga ang laing pulong sa himan mao ang instrumento.

• Unsay pipila ka mga butang nga mabuhat sa usa ka hanas nga mamumuo o artist gamit ang hustong instrumento?

• Sa imong hunahuna unsa man ang gipasabut sa usa ka tawo nga mahimong instrumento diha sa mga kamot sa Ginoo?

Dapita ang pipila ka estudyante nga magpuli-puli sa pagbasa og kusog sa Alma 26:1–5, 12. Hangyoa ang klase sa pag-ila og mga paagi nga si Ammon ug ang iyang isigka misyonaryo nahimong mga instrumento diha sa mga kamot sa Dios.

• Unsa ang nahimo sa Ginoo pinaagi ni Ammon ug sa iyang isigka mga misyonaryo?

• Unsaon ninyo pagsulti og usab sa Alma 26:12? Sa unsang paagi nga ang pamahayag ni Ammon niining bersikulo may kalabutan sa pagka-instrumento diha sa mga kamot sa Dios?

Dapita ang mga estudyante sa pagbasa sa hilum sa Alma 26:11, 13, 16, nga mangita sa tanang higayon nga ang mga pulong nga kalipay ug maglipay makita. Mahimo kang mosugyot nga markahan sa mga estudyante kini nga mga pulong diha sa ilang mga kasulatan. Dapita ang usa ka estudyante sa pagbasa og kusog sa Alma 26:13–16, ug hangyoa ang klase sa pagpangita sa mga rason nga gihatag ni Ammon alang sa iyang paglipay.

• Nganong naglipay si Ammon?

• Unsa nga mga baruganan ang atong makat-unan gikan niini nga mga bersikulo? (Ang mga estudyante mahimong mohisgut og nagkalain-laing mga baruganan. Ang mosunod nga baruganan mahimong magsilbing usa ka summary sa ilang mga komentaryo: Makasinati kita og kalipay samtang matinud-anon kitang nagserbisyo sa Ginoo ug sa Iyang mga anak. Mahimo nimong isulat sa pisara kini nga baruganan.)

• Ngano kaha nga makasinati man kita og kalipay kon anaa kita sa pagserbisyo sa Ginoo?

Isulat ang mosunod nga mga pakisayran ug mga pangutana diha sa pisara. (Ikonsiderar ang pagsulat niini sa dili pa magklase.) Ipares-pares ang mga estudyante. Hangyoa ang matag parisan sa pagpili ug pagbasa og usa sa mga tudling ug aron mahisgutan ang mga tubag sa kauban nga pangutana.

Alma 26:17–20. Unsang matang sa mga tawo sila si Ammon ug ang iyang mga kaigsoonan sa wala pa sila nakabig?

Alma 26:23–25. Sumala sa unsay gisulti sa mga Nephite ngadto ni Ammon ug sa iyang mga kaigsoonan, unsa man ang mga Lamanite sa wala pa sila nakabig?

Hatagi og panahon ang pipila ka mga estudyante sa pagpasabut sa ilang mga tubag niining mga pangutana. Dapita ang mga estudyante sa pagbasa sa hilum sa Alma 26:23–29, nga magtino sa mga babag nga gisagubang ni Ammon ug sa iyang mga igsoon diha sa ilang pagserbisyo ngadto sa Ginoo ug sa mga Lamanite.

• Hain niining mga babag sa inyong hunahuna ang giatubang sa mga misyonaryo karon?

• Sumala sa Alma 26:27, 30, unsa ang nakapadasig ni Ammon ug sa iyang isigka misyonaryo sa pagpadayon sa pagserbisyo? (Kahupayan ug mga saad gikan sa Ginoo ug usa ka tinguha nga “mahimo nga paagi sa pagluwas sa pipila ka mga kalag.”)

Hangyoa ang mga estudyante sa pagbasa sa hilum sa Alma 26:31–34, nga mangita sa pipila sa mga resulta sa mga kahago sa anak nga mga lalaki ni Mosiah. Kon sila nakagahin na og igong panahon sa pagbasa, hangyoa sila sa pagpakigbahin sa ilang nakit-an.

Dapita ang usa ka estudyante sa pagbasa og kusog sa Alma 26:35–37. Hangyoa ang klase sa pagsunod, nga mamalandong sa mga rason nga sila kinahanglang maglipay sa kamaayo sa Dios.

• Unsa nga mga mensahe ang inyong nakita niini nga mga bersikulo?

Ipasabut nga usa sa daghang mensahe niini nga mga bersikulo mao nga ang Ginoo maloloy-on ngadto sa tanan nga maghinulsol ug motuo sa Iyang ngalan. Aron matabangan ang mga estudyante nga mobati sa kamatuoran ug kaimportante niining baruganan, basaha ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:

President Boyd K. Packer

“Mga sulat nagagikan niadtong nakahimo og subo nga mga kasaypanan. Sila mangutana, ‘Mapasaylo ba gayud kaha ako?’

“Ang tubag kay oo!

“Ang ebanghelyo nagtudlo kanato nga ang kahupayan gikan sa kasakit ug kahasol sa konsensya maangkon pinaagi sa paghinulsol. Gawas niadtong pipila kinsa nasayop ngadto sa pagkalaglag human nasayud sa hingpit, walay batasan, walay pagkaadik, walay rebelyon, walay kalapasan, walay sayop ang dili maapil sa saad sa hingpit nga pagpasaylo” (“The Brilliant Morning of Forgiveness,” Ensign, Nob. 1995, 19).

Pagpamatuod sa gahum sa Pag-ula sa pagtugot sa kapasayloan sa mga sala, dako o gamay, alang niadtong kinsa nakabaton og hugot nga pagtuo kang Jesukristo ug maghinulsol. Pagpamatuod usab sa kalipay nga moabut sa atong kinabuhi kon kita moserbisyo isip mga instrumento diha sa mga kamot sa Ginoo.

Dugang nga Ideya sa Pagtudlo

Alma 26:1–37. “Rason sa paglipay”

Aron matabangan ang mga estudyante nga makasabut sa kalipay nga moabut gikan sa paghinulsol ug kapasayloan, basaha ang mosunod nga istorya ni Presidente Boyd K. Packer sa Korum sa Napulog Duha ka mga Apostoles:

“Niadtong Abril sa 1847, si Brigham Young nangulo sa unang grupo sa mga pioneer paggawas sa Winter Quarters. Sa samang higayon, dise sais ka gatus ka milya ngadto sa kasadpan ang mga nangaluya nga mga naluwas sa Grupo ni Donner hinay nga midulhog sa Kabukiran sa Sierra Nevada paingon sa Walog sa Sacramento.

“Sila nakasinati sa grabing kabugnaw nga natanggong sa nagpundok nga mga snow ubos sa kinatumyan sa bukid. Hapit dili katuohan nga adunay mabuhi sa kagutom sulod sa mga adlaw ug mga semana ug mga bulan ug dili mahulagway nga pag-antus.

“Apil kanila mao ang kinse anyos nga si John Breen. Sa gabii sa Abril 24, milakaw siya paingon sa Rancho sa mga Johnson. Katuigan ang milabay si John misulat:

“‘Gabii na kaayo nga miabut kami sa Rancho sa mga Johnson, mao nga una ko kining nakita sayo na sa buntag. Maayo ang panahon, ang yuta napuno sa berde nga mga sagbot, ang mga langgam nanag-awit gikan sa tumoy sa kakahoyan, ug ang panaw natapos na. Dili ko hapit makatuo nga nabuhi pa ko.

“‘Ang talan-awon nga akong nakita nianang buntaga daw dili mawala sa akong hunahuna. Kasagaran sa mga panghitabo dili na mahinumduman, apan kanunay nakong makit-an ang kampo duol sa Rancho sa mga Johnson.’ [“Pioneer Memories,” wala gimantala, isip kinutlo sa “The Americanization of Utah,” sibya sa PBS nga telebisyon.]

“Sa sinugdanan naglibog gyud ko sa iyang pamahayag nga ‘kasagaran sa mga panghitabo dili na mahinumduman.’ Unsang paagiha nga ang dugayng mga bulan sa grabe nga pag-antus ug kasubo mawala sa iyang hunahuna? Unsang paagiha nga kadtong grabe ka makalilisang nga tingtugnaw mapulihan og usa ka maanindot nga kabuntagon?

“Human sa dugang nga pagpamalandong, nakahukom ko nga dili gayud diay kini makalibog. Nakakita ko og susama nga butang nga nahitabo sa mga tawo nga akong kaila. Nakakita ko og usa ka tawo nga nakasinati og taas nga panahon sa pag-antus sa pagpakasala ug espirituhanong kagutom nga miabut sa buntag sa kapasayloan.

“Sa dihang ang kabuntagon miabut, sila nakakat-on niini:

“‘Tan-awa, siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila’ [D&P 58:42]” (“The Brilliant Morning of Forgiveness,” Ensign, Nob. 1995, 18).

Human sa pagbasa niining istorya, hangyoa ang mga estudyante sa pagsulti mahitungod sa usa ka panahon sa dihang ilang nakita ang kalipay nga miabut sa kinabuhi sa usa ka tawo nga naghinulsol. (Pahinumdumi ang mga estudyante nga sila dili kinahanglan nga mopakigbahin og bisan unsa nga personal o pribado kaayo.)