Leksyon 9
1 Nephi 5
Pasiuna
Samtang ang asawa ni Lehi, nga si Sariah, naghulat sa iyang mga anak nga lalaki nga mobalik gikan sa Jerusalem, nahadlok siya nga basin nangamatay sila sa ilang mga paningkamot sa pagkuha sa tumbaga nga mga palid. Sa dihang nakabalik sila nga luwas uban sa mga palid, nakaangkon siya og mas lig-ong saksi nga ang Dios naggiya ug nagpreserbar sa iyang pamilya. Gisiksik ni Lehi ang tumbaga nga mga palid ug nakita nga kini dako og bili sa iyang pamilya. Samtang nagbasa siya niini, napuno siya sa Balaang Espiritu, ug siya nanagna nga ang mga kasulatan nga anaa niini mapreserbar alang sa iyang kaliwatan.
Mga Sugyot alang sa Pagtudlo
1 Nephi 5:1–9
Ang mga anak nga lalaki ni Lehi luwas nga mibalik ngadto sa ilang pamilya sa kamingawan
Dapita ang usa ka estudyante sa pagbasa og kusog sa 1 Nephi 5:1–3. Hangyoa ang klase sa pagpangita sa mga rason ngano nga si Sariah nagsugod sa pagbagulbol.
-
Unsa ang gibagulbulan ni Sariah? (Ang mga tubag mahimong maglakip nga si Lehi usa ka tawo nga may panan-awon, nga iyang gidala ang iyang pamilya palayo sa yuta sa ilang kabilin, ug nga siya mihimo og mga desisyon nga tingali mosangpot sa pagkawala sa ilang mga anak nga lalaki ug nga mahimong mosangpot sa ilang kaugalingong kamatayon diha sa kamingawan.)
Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).
Hangyoa ang mga estudyante sa paghunahuna og panahon sa dihang sila nagbagulbol mahitungod sa usa ka sitwasyon bisan og wala sila sa tanang impormasyon mahitungod niana nga sitwasyon.
Dapita ang usa ka estudyante sa pagbasa og kusog sa 1 Nephi 5:4–6. Hangyoa ang klase sa paghatag og atensyon sa reaksyon ni Lehi sa mga pagbagulbol ni Sariah.
-
Unsay nakapadani ninyo bahin kon unsay reaksyon ni Lehi sa mga pagbagulbol ni Sariah? (Mahimo nimong itudlo nga si Lehi mitubag uban ang pagpamatuod ug pagsalig sa Ginoo kay sa kahadlok o pagduha-duha. Wala siya motubag nga masuk-anon o walay pasensya.)
-
Unsa ang atong makat-unan sa tubag ni Lehi ngadto ni Sariah?
Dapita ang usa ka estudyante sa pagbasa og kusog sa 1 Nephi 5:7–9.
-
Unsa ang naangkon ni Sariah gikan niini nga kasinatian?
1 Nephi 5:10–22
Gisiksik ni Lehi ang mga palid nga tumbaga
Hangyoa ang mga estudyante sa paghunahuna kon aduna bay bisan unsa nga ilang ikonsiderar nga isakripisyo sa ilang mga kinabuhi aron maangkon o aron tipigan.
Dapita ang mga estudyante sa pag-summarize sa 1 Nephi 3–4 ug mosulti sa mga sakripisyo nga gihimo sa pamilya ni Lehi aron makuha ang mga palid nga tumbaga. (Si Nephi ug ang iyang mga igsoong lalaki mirisgo sa ilang mga kinabuhi, misakripisyo sa ilang katigayunan, ug mipanaw og layo.)
-
Sa inyong hunahuna ngano nga ang maong sakripisyo gikinahanglan?
Ipasabut nga human mihalad ang pamilya og mga sakripisyo ug mihatag og mga pasalamat ngadto sa Ginoo, diha-diha si Lehi mibasa sa mga sulod sa mga palid. Dapita ang pipila ka mga estudyante nga magpuli-puli sa pagbasa og kusog sa 1 Nephi 5:11–16. Hangyoa ang klase sa pagpangita unsay nadiskobrehan ni Lehi sa mga palid nga tumbaga. Mahimo nimong ilista ang ilang mga tubag diha sa pisara.
Dapita ang mga estudyante sa pagbasa og hilum sa 1 Nephi 5:10. Hangyoa sila sa pagpangita sa pulong nga naghulagway sa pagbasa ni Lehi sa mga kasulatan. (Siya “misusi niini.”) Dapita ang mga estudyante nga magpares aron hisgutan ang mosunod nga pangutana:
-
Unsa ang kalainan tali sa pagsiksik sa mga kasulatan ug sa pagbasa lamang niini? (Mahimo nimong awhagon ang mga estudyante sa pagsulti og mga panahon kanus-a sila misiksik sa mga kasulatan.)
Basaha ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:
“Sa pagsulti ko nga ‘tun-an,’ nagpasabut ko nga labaw pa kay sa pagbasa lang. Maayo man na nga usahay mobasa og basahon sa kasulatan sulod sa gitakda nga oras aron makuha ang kinatibuk-ang kahulugan sa mensahe niini, pero sa konbersyon, kinahanglan mas hatagan ninyo og gibug-aton ang kadugayon sa panahon nga inyong gigahin sa mga kasulatan kay sa kadugayon nga nagbasa mo nianang panahona. Naghunahuna ko nga usahay magbasa mo og pipila ka mga bersikulo, mohunong aron mamalandong niini, magbasa og maayo sa mga bersikulo pagbalik, ug samtang naghunahuna mo bahin sa unsay gipasabut niini, mag-ampo para sa panabut, mangutana diha sa inyong hunahuna, maghulat sa espirituhanong mga impresyon, ug mosulat sa mga impresyon ug mga panghunahuna nga moabut aron mo makahinumdom ug makat-on og dugang pa. Sa pagtuon niining paagiha, mahimong dili daghan ang inyong mabasa nga mga kapitulo o mga bersikulo sulod sa tunga sa oras, pero makahatag kamo og luna sa inyong kasingkasing para sa pulong sa Dios, ug Siya makigsulti nganha kaninyo. Hinumdumi ang paghulagway ni Alma kabahin sa unsay bation: ‘Kini misugod sa pagpadako sa akong kalag; oo, kini misugod sa pagdan-ag sa akong salabutan, oo, kini misugod sa pagkaanindot ngari kanako’ [Alma 32:28]” (“Kon Makabig Na Kamo,” Ensign o Liahona, Mayo 2004, 11–12).
Hatagi ang mga estudyante og panahon sa pagpamalandong sa ilang kaugalingong pagtuon sa mga kasulatan. Hangyoa sila sa pagsulat diha sa ilang mga scripture study journal o mga class notebook mahitungod sa makahuluganong mga paagi sa ilang pagsiksik sa mga kasulatan. Human sila makasulat, dapita sila sa pagkonsiderar unsaon nila pagpalambo ang ilang pagtuon sa kasulatan. Hangyoa sila sa pagpili og paagi sa pagpalambo sa ilang personal nga pagsiksik sa mga kasulatan. Dapita sila sa pagsulat sa ilang mga tumong diha sa ilang mga scripture study journal. Mahimo kang mosugyot nga ang mga estudyante mopakigbahin sa ilang tumong sa lain (sama pananglit, diha kanimo, usa ka ginikanan, o laing estudyante) kinsa mopahinumdom nila sa tumong ug moawhag nila sa pagtuman niini.
Ipasabut nga ang Ginoo mipanalangin ni Lehi sa pagsiksik sa mga kasulatan. Sa pagtabang sa mga estudyante nga makadiskobre niini nga mga panalangin, dapita sila sa pagbasa sa hilum sa 1 Nephi 5:16–20.
-
Sa unsa nga paagi nga ang pagsiksik sa tumbaga nga mga palid nakaimpluwensya ni Lehi?
Ipasabut og maayo nga sa dihang si Lehi misiksik sa mga kasulatan, napuno siya sa Balaang Espiritu ug nakadawat og pagpadayag “mahitungod sa iyang binhi” (iyang kaliwatan). Ipaniguro sa mga estudyante nga samtang kita nagsiksik sa mga kasulatan, kita mapuno sa Balaang Espiritu ug makadawat og pagpadayag. Sa samang paagi, kon kita mosakripisyo sa atong panahon ug enerhiya sa pagsiksik sa mga kasulatan sama ni Lehi, makadawat kita og kalig-on sa pagtuman sa mga sugo sa Dios.
-
Sa unsa nga paagi kamo napanalanginan pinaagi sa pagsiksik sa mga kasulatan?
-
Kanus-a kamo mibati sa Balaang Espiritu samtang nagtuon sa mga kasulatan?
Dapita ang usa ka estudyante sa pagbasa sa mosunod nga pamahayag, diin si Elder Robert D. Hales sa Korum sa Napulog Duha ka mga Apostoles mipamatuod sa mga panalangin sa pagsiksik sa mga kasulatan:
“Kon kita gustong makigsulti sa Dios, mag-ampo kita. Ug kon kita gusto nga Siya makigsulti kanato, mosiksik kita sa mga kasulatan; kay ang Iyang mga pulong gisulti pinaagi sa Iyang mga propeta. Motudlo dayon Siya nato samtang kita maminaw sa mga pagdani sa Balaang Espiritu.
“Kon kamo wala makadungog sa Iyang tingog nga misulti karong bag-o pa, balik ngadto sa mga kasulatan nga morag primero pang nakakita ug morag primero pang nakadungog. Sila mao ang atong espiritwal nga sumpay sa atong kinabuhi” (“Balaan nga mga Kasulatan: Ang Gahum sa Dios alang sa Atong Kaluwasan,” Ensign o Liahona, Nob. 2006, 26–27).
Basaha og kusog ang 1 Nephi 5:21–22, maghangyo sa mga estudyante sa pagsunod diha sa ilang mga kasulatan. Samtang ikaw magbasa, ipasabut og maayo kini nga mga pulong: “Busa, kini mao ang kaalam sa Ginoo nga kami modala kanila uban kanamo, samtang kami nagpanaw sa kamingawan.”
-
Ngano nga maalamon alang nato sa pagdala sa mga kasulatan uban nato sa atong mga panaw?
-
Sa unsang mga pamaagi kita makadala sa mga kasulatan uban nato?
Ipasabut nga si Lehi ug ang iyang pamilya nakaangkon sa mga palid nga tumbaga pinaagi sa dakong sakripisyo. Kon wala ang mga kasulatan, si Lehi ug ang iyang pamilya dili unta magmalampuson sa ilang panaw. Awhaga ang mga estudyante sa pagtipig sa mga kasulatan uban nila samtang sila mopanaw sa mortalidad.
Dapita ang mga estudyante sa pagpamalandong sa ilang personal nga pagtuon sa kasulatan. Ikonsiderar ang pagdapit og usa ka estudyante kinsa kanunay nga mobasa sa mga kasulatan sa pag-awhag ug pagpamatuod sa iyang mga kauban. Awhaga ang mga estudyante sa paghimo niini nga kinaiya sa paggahin og panahon sa pagsiksik sa mga kasulatan.
Pahibalo: Ang gitas-on niini nga leksyon makahatag og panahon alang sa kalihokan sa scripture mastery gikan sa miaging leksyon.
Komentaryo ug Background nga Impormasyon
1 Nephi 5:10–22. Ang bili sa mga kasulatan
Sa pagtudlo kon unsaon nga kita makadawat og giya pinaagi sa atong pagtuon sa mga kasulatan, si Elder Robert D. Hales sa Korum sa Napulog Duha ka mga Apostoles mipakigbahin sa asoy ni Lehi sa pagpangita sa tumbaga nga mga palid:
“Sa dihang si Nephi ug ang iyang mga igsoong lalaki mipauli na [gikan sa Jerusalem dala ang tumbaga nga mga palid], si Lehi, ang ilang amahan, nalipay. Nagsugod siya sa pagsusi sa balaang mga kasulatan ‘gikan sa sinugdanan,’ ug ‘nakakita nga maayo; oo, gani labi nga bililhon … sa ingon nga si [Lehi ug ang iyang kaliwatan] makapasunod sa mga sugo sa Ginoo ngadto sa [ilang] mga anak.’
“Sa tinuod, ang mga palid nga tumbaga mga talaan kadto sa mga kagikan ni Lehi, lakip ang ilang pinulongan, kaliwatan, ug, mas importante, ang ebanghelyo nga gitudlo sa balaang mga propeta sa Dios. Samtang si Lehi nagsusi sa mga palid, iyang nakat-unan unsa ang tanan natong nakat-unan pinaagi sa pagtuon sa mga kasulatan:
“• Kinsa kita.
“• Mahimo kitang unsa.
“• Mga panagna alang kanato ug sa atong mga kaliwatan.
“• Ang mga sugo, mga balaod, mga ordinansa, ug mga pakigsaad nga atong puy-an aron makabaton sa kinabuhing dayon.
“• Ug unsaon nato pagpuyo aron makalahutay sa katapusan ug mobalik sa atong Langitnong Amahan nga dungganon.
“Gikinahanglan kini pag-ayo nga mga kamatuoran nga ang Langitnong Amahan mihatag ni Lehi ug ni Nephi og klarong mga panan-awon nga nagrepresentar sa pulong sa Dios isip ang gunitanan nga puthaw. Ang amahan ug ang anak nakakat-on nga ang paghupot niining lig-on, dili mabali, hingpit nga masaligan nga giya mao lamang ang agianan aron pabiling magsubay nianang higpit ug pig-ot nga dalan nga modala ngadto sa atong Manluluwas” (“Balaan nga mga Kasulatan: Ang Gahum sa Dios alang sa Atong Kaluwasan,” Ensign o Liahona, Nob. 2006, 25).
1 Nephi 5:18–19. Ang tumbaga nga mga palid
Si Elder Bruce R. McConkie sa Korum sa Napulog Duha ka mga Apostoles mipamatuod sa kaimportante sa pamilya ni Lehi sa pagkuha sa mga palid nga tumbaga:
“Ang bili sa Tumbaga nga mga Palid ngadto sa mga Nephite dili mabasta-basta. Pinaagi niini nakahimo sila sa pagpreserbar sa ilang pinulongan (1 Ne. 3:19), kadaghanan sa sibilisasyon, ug relihiyoso nga kahibalo sa mga katawhan diin sila gikan. (1 Ne. 22:30.) Sa pagtandi, ang mga Mulekite, kinsa migawas gikan sa Jerusalem mga 11 ka tuig human sa pagbiya ni Lehi, ug kinsa walay rekord susama sa Tumbaga nga mga Palid, sa wala madugay nagkakunhod sa pag-apostasiya ug pagkawalay pagtuo ug nawala ang ilang pinulongan, sibilisasyon, ug relihiyon. (Omni 14–18.)
“Gikan sa usa ka propeta ngadto sa laing propeta ug henerasyon ngadto sa laing henerasyon ang Tumbaga nga mga Palid gipasa-pasa ug gipreserbar sa mga Nephite. (Mosiah 1:16; 28:20; 3 Ne. 1:2.) Sa umaabut nga adlaw ang Ginoo misaad sa pagpagawas niini, wala molubad sa panahon ug nagpabilin ang orihinal nga kahayag, ug ang mga asoy sa kasulatan nga narekord niini ‘motungha ngadto sa matag kanasuran, kaliwatan, pinulongan, ug mga katawhan.’ (Alma 37:3–5; 1 Ne. 5:18–19.)” (Mormon Doctrine, 2nd ed. [1966], 103).