Leksyon 129
3 Nephi 20
Pasiuna
Sa ikaduhang adlaw sa Iyang pagpangalagad sa mga Nephite, si Jesukristo mipahigayon pag-usab sa sakrament ngadto sa mga katawhan. Mipamatuod Siya nga ang mga pakigsaad ug mga saad sa Amahan matuman sa katapusang mga adlaw. Pagapundukon ang Israel, ug ang tanang mga nasud sa yuta mapanalanginan.
Mga Sugyot alang sa Pagtudlo
3 Nephi 20:1–9
Ang Manluluwas mipahigayon pag-usab sa sakrament ngadto sa mga katawhan
Sa pagsugod sa leksyon, ipasabut nga gusto nimo nga ang mga batan-ong lalaki ug batan-ong babaye sa klase motubag sa managlahi nga mga pangutana. Dapita ang pipila ka mga batan-ong lalaki kinsa naghupot sa Aaronic Priesthood sa pagsulti sa klase mahitungod sa ilang mga responsibilidad sa pag-andam, pagpanalangin, o pagpaambit sa sakrament. Tabangi sila sa pagpakigbahin sa ilang mga pagbati mahitungod sa paghimo niining mga katungdanan pinaagi sa pagpangutana nila sa mosunod:
-
Unsa ang kahulugan niini nganha kaninyo sa pagtabang sa pagpahigayon sa sakrament?
-
Unsaon ninyo pagpakita ngadto sa Ginoo nga kamo nakasabut sa kasagrado niining ordinansa?
Tabangi ang pipila ka batan-ong babaye sa pagpakigbahin sa ilang mga pagbati mahitungod sa kasagrado sa sakrament pinaagi sa pagpangutana nila sa mosunod:
-
Unsa ang inyong bation kon kamo makakita og takus nga mga batan-ong lalaki nga mipahigayon sa sakrament?
-
Unsa ang inyong buhaton atol sa pagpahigayon sa sakrament aron makita nga kamo nakasabut sa kasagrado sa sakrament?
Ipasabut nga atol sa ikaduhang adlaw sa Iyang pagpangalagad taliwala sa mga Nephite, ang Manluluwas ug ang Iyang mga disipulo mipahigayon sa sakrament ngadto sa mga katawhan sa ikaduhang higayon. Dapita ang mga estudyante sa pagbasa og hilum sa 3 Nephi 20:1. Ipasabut nga ang mosunod nga mga pulong: “Ug siya misugo kanila nga sila dili mohunong sa pag-ampo diha sa ilang mga kasingkasing.”
-
Unsa ang kahulugan nganha kaninyo sa “dili mohunong sa pag-ampo” diha sa inyong kasingkasing?
Dapita ang usa ka estudyante sa pagbasa og kusog sa 3 Nephi 20:3–5.
-
Sa unsa kahang paagi nga ang pag-ampo diha sa inyong kasingkasing makaimpluwensya sa inyong sinemana nga kasinatian sa pag-ambit sa sakrament?
-
Ngano kaha nga importante ang magpabilin nga nakatutok sa Manluluwas samtang moambit kita sa sakrament?
Dapita ang usa ka estudyante sa pagbasa og kusog sa 3 Nephi 20:8. Hangyoa ang klase sa pagsunod, nga mangita kon unsay girepresentar sa pan ug bino. (Mahimong makatabang ang pagpasabut nga ang kasamtangang gibuhat sa Simbahan mao ang paggamit og tubig imbis nga bino. [Tan-awa sa D&P 27:2.])
-
Unsa ang girepresentar sa pan ug sa tubig sa sakrament? (Ang lawas ug dugo sa Manluluwas.)
Mahimo nimong basahon ang mosunod nga pamahayag ni Elder James E. Talmage sa Korum sa Napulog Duha ka mga Apostoles aron matabangan ang mga estudyante nga makasabut sa mahulagwayon nga kahulugan sa imbitasyon sa Manluluwas sa pagkaon sa Iyang unod ug sa pag-inom sa Iyang dugo:
“Ang pagkaon sa unod ug pag-inom sa dugo ni Kristo mao ang pagtuo ug pagdawat Kaniya isip literal nga Anak sa Dios ug Manluluwas sa kalibutan, ug sa pagsunod sa Iyang mga sugo. Pinaagi lamang unta niini nga ang Espiritu sa Dios mahimong magpabilin nga kabahin sa pagkanilalang sa tawo, gani sama sa kalan-on nga gikaon sa tawo nga ipahiangay sa kaunoran sa iyang lawas ” (Jesus the Christ, 3rd ed. [1916], 342; italics gidugang).
-
Unsa nga simbolo ang anaa sa pag-ambit sa pan ug tubig?
-
Sumala sa 3 Nephi 20:8, unsa ang gisaad ni Jesukristo niadtong moambit sa sakrament? (Ang ilang kalag matagbaw.)
Aron matabangan ang mga estudyante nga makasabut kon unsa ang gipasabut sa tungod kay ang ilang mga kalag matagbaw, hangyoa sila sa paghunahuna mahitungod sa gidaghanon sa pan ug tubig nga kasagaran ilang kaunon ug imnon kon sila moambit sa sakrament. Dayon ipangutana:
-
Kon kamo gigutom ug giuhaw, matagbaw ba kamo niini?
Dapita ang usa ka estudyante sa pagbasa og kusog sa 3 Nephi 20:9, ug ipangutana sa klase:
-
Unsa ang usa ka baruganan nga atong makat-unan gikan sa mga pagtulun-an sa Manluluwas diha sa 3 Nephi 20:8–9? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Kon kita takus nga moambit sa sakrament, kita mapuno sa Espiritu Santo.)
Dapita ang usa ka estudyante sa pagbasa sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Hangyoa ang klase sa pagpaminaw sa mga paagi nga kita mapanalanginan samtang kita pagatagbawon sa Espiritu:
“Atong himoong angayan ang atong kaugalingon alang sa saad sa atong Manluluwas nga pinaagi sa pag-ambit sa sakrament kita ‘pagatagbawon’ (3 Ne. 20:8; tan-awa usab sa 3 Ne. 18:9), nga nagpasabut nga kita ‘[m]apuno sa Espiritu’ (3 Ne. 20:9). Kana nga Espiritu—ang Espiritu Santo—mao ang atong maghuhupay, atong tigtultol, atong tigpama-ba, atong tighubad, atong saksi, ug atong tigpalunsay [purifier]—atong dili mapakyas nga giya ug tigbalaan sa atong mortal nga panaw ngadto sa kinabuhing dayon.
“… Gumikan sa ingon og gamay lang nga mahunahunaon ug matinahuron nga buhat sa pagbag-o sa atong mga pakigsaad sa bunyag moabut ang pagbag-o sa mga panalangin sa bunyag pinaagi sa tubig ug sa Espiritu, nga kita kanunayng makabaton sa iyang Espiritu uban kanato. Pinaagi niini kitang tanan magiyahan, ug pinaagi niini kitang tanan malimpyo” (“Always Have His Spirit,” Ensign, Nob. 1996, 61).
-
Unsa ang pipila ka mga paagi nga kita mapanalanginan kon kita mapuno sa Espiritu?
-
Kanus-a man nahitabo nga ang pag-ambit sa sakrament nakatabang kaninyo nga mapuno sa Espiritu Santo?
Ipamatuod ang mga panalangin nga imong nadawat tungod sa pag-ambit sa sakrament ug sa pagkatagbaw uban sa Espiritu. Pamatud-i nga ang pag-ampo diha sa atong kasingkasing maoy usa ka paagi nga maandam kita sa pag-ambit sa sakrament ug mapuno sa Espiritu Santo. Awhaga ang mga estudyante sa paggahin og panahon sa pag-ampo sa dili pa moambit sa sakrament.
3 Nephi 20:10–46
Ang Manluluwas nagtudlo sa mga Nephite bahin sa mga pakigsaad nga matuman sa katapusang mga adlaw
Dapita ang mga estudyante sa pagsulat diha sa mga notebook o mga scripture study journal og usa ka mubo nga paghulagway sa ilang labing importanting mga kinaiya. Inigka-human nila, dapita sila nga motan-aw sa matang sa mga kinaiya nga sila nakatutok. Pisikal ba kini nga mga kinaiya? Mga kinaiya sa personalidad? Espirituhanon mga kinaiya? (Kon aduna pay panahon, mahimo nimong dapiton ang pipila ka mga estudyante sa pagbasa kon unsa ang ilang gisulat.) Basaha ang mosunod nga pamahayag ni Elder David A. Bednar sa Korum sa Napulog Duha ka mga Apostoles, ug hangyoa ang klase sa pagpaminaw sa unsay iyang gisulti nga angayng mohulagway sa usa ka tawo:
“Mahimong malingaw kamo sa musika, mga paugnat, o mahiligon kamo sa makina, ug ugma damlag motrabaho og panginabuhi o usa ka propesyon o sa mga arte. Ang ingon niini kaimportante nga mga kalihokan ug mga panginabuhi, dili kini makahulagway kon kinsa kita. Una ug pinakauna, kita mga espirituhanong binuhat. Mga [anak] kita sa Dios ug ang binhi ni Abraham” (“Ang Pagkahimong usa ka Misyonaryo,” Ensign o Liahona, Nob. 2005, 47).
-
Giunsa paghulagway ni Elder Bednar kon kinsa kita? Ngano kaha nga importante alang kanato nga makita nato ang atong kaugalingon “una ug pinakauna” isip espirituhanong mga binuhat kinsa mga anak sa Dios?
Ipasabut nga agi og dugang sa pagsulti nga kita mga anak sa Dios, si Elder Bednar miingon nga kita mao ang binhi ni Abraham. Ipasabut nga ang mga pulong nga “binhi ni Abraham” mahimong nagpasabut sa mga tawo kinsa literal nga kaliwat ni Abraham. Mahimo usab kining nagpasabut ngadto sa mga tawo kinsa, pinaagi sa pagdawat ug pagsunod sa mga balaod ug mga ordinansa sa ebanghelyo ni Jesukristo, modawat sa kahingpitan sa ebanghelyo, ug sa samang mga saad ug mga pakigsaad nga gihimo sa Dios ngadto kang Abraham.
Sultihi ang mga estudyante nga diha sa nahibilin sa 3 Nephi 20, sila magtuon sa mga pagtulun-an sa Manluluwas ngadto sa mga Nephite mahitungod sa mga pakigsaad ug mga saad nga gihimo ngadto ni Abraham ug sa iyang mga kaliwatan (ang balay ni Israel). Siya miingon nga sila makakat-on mahitungod niining mga pakigsaad pinaagi sa pagtuon sa mga pulong ni Isaias. Dapita ang usa ka estudyante sa pagbasa og kusog sa 3 Nephi 20:11–12. Hangyoa ang klase sa pagsunod, nga mangita sa unsay gisulti sa Manluluwas nga mahitabo kon ang mga pulong ni Isaias matuman na. Human makareport ang mga estudyante kon unsa ang ilang nakit-an, mahimo nimong ipasabut nga ang mga pulong ni Isaias matuman sa katapusang mga adlaw.
Dapita ang usa ka estudyante sa pagbasa og kusog sa 3 Nephi 20:13, ug hangyoa ang mga estudyante sa pag-ila kon sa unsang paagi nga ang Langitnong Amahan motuman sa Iyang mga pakigsaad ngadto sa balay ni Israel sa katapusang mga adlaw. Hangyoa ang mga estudyante sa pag-summarize sa mga kamatuoran nga ilang nakat-unan sa 3 Nephi 20:11–13. (Ang mga tubag sa mga estudyante mahimong magkalain-lain, apan kinahanglan nilang mahibaloan ang mosunod nga kamatuoran: Ang Ginoo motuman sa Iyang pakigsaad sa pagpundok sa balay ni Israel sa katapusang mga adlaw. Ikonsiderar ang pagsulat niining kamatuoran diha sa pisara.)
-
Sumala sa 3 Nephi 20:13, unsa nga kahibalo ang maangkon sa mga katawhan sa balay ni Israel isip usa ka mahinungdanon nga bahin niining panagpundok? (Sila makaangkon “sa kasayuran sa Ginoo nga ilang Dios, kinsa mitubos kanila.”)
Aron matabangan ang mga estudyante nga makakita kon sa unsang paagi nga ang pag-angkon og kahibalo ni Jesukristo maoy usa ka mahinungdanong bahin sa panagpundok sa balay ni Israel, hangyoa ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles. Hangyoa ang mga estudyante sa pagpaminaw kon unsa ang nalambigit sa panagpundok sa Israel.
“Ang panagpundok sa Israel naglangkob sa pagtuo ug pagdawat ug pagpuyo nga nahisubay sa tanang gitanyag sa Ginoo sa iyang napili nga katawhan sa karaan. Naglangkob kini sa pagbaton og hugot nga pagtuo diha ni Ginoong Jesukristo, sa paghinulsol, sa pagpabunyag ug pagdawat sa gasa sa Espiritu Santo, ug sa paghupot sa mga sugo sa Dios. Naglangkob kini sa pagtuo sa ebanghelyo, pagpasakop sa Simbahan, ug sa pagsulod sa gingharian. Naglangkob kini sa pagdawat sa balaan nga priesthood, matugahan [endowed] diha sa balaan nga mga dapit uban sa gahum sa kahitas-an, ug sa pagdawat sa tanang panalangin ni Abraham, Isaac, ug Jacob, pinaagi sa ordinansa sa celestial nga kaminyoon. Ug mahimong naglangkob usab kini sa panagtigum ngadto sa gitakda nga dapit o yuta sa pagsimba” (A New Witness for the Articles of Faith [1985], 515).
-
Sa unsang paagi nga ang pagtuo ug pagsunod ni Jesukristo usa ka mahinungdanong bahin sa panagpundok sa Israel?
I-summarize ang 3 Nephi 20:14–22. Ipasabut nga ang Manluluwas mitudlo sa mga Nephite nga isip kabahin sa panagpundok sa Israel, ug agi og katumanan sa pakigsaad sa Ginoo ngadto ni Abraham, ang Langitnong Amahan mihatag sa mga kaliwatan ni Lehi sa yuta diin sila nagpuyo isip usa ka kabilin. Gipasabut usab niya ang laing paagi nga ang mga Nephite napanalanginan isip mga anak sa pakigsaad. Dapita ang mga estudyante sa pagbasa og hilum sa 3 Nephi 20:23–24, nga mangita kon kinsa ang gipanagna ni Moises nga mopanalangin sa balay ni Israel. Human makareport ang mga estudyante kon unsa ang ilang nakit-an, dapita sila sa pagbasa og hilum sa 3 Nephi 20:25–26. Hangyoa sila sa pag-ila kon sa unsang paagi nga ang mga kaliwat ni Lehi napanalanginan tungod sa pakigsaad nga gihimo sa Ginoo ngadto ni Abraham. Samtang magreport ang mga estudyante sa unsay ilang nakit-an, ipasabut nga ang Langitnong Amahan mipadala ni Jesukristo sa pagbisita sa mga kaliwatan ni Lehi ug sa pagluwas kanila gikan sa sala “tungod kay [sila ang] mga anak sa pakigsaad.”
-
Sa unsang paagi kita napanalanginan pinaagi sa mga pakigsaad nga atong gihimo ngadto sa Langitnong Amahan?
Dapita ang usa ka estudyante sa pagbasa og kusog sa 3 Nephi 20:27, ug hangyoa ang klase nga ilhon ang usa ka responsibilidad nga naapil sa mga pakigsaad nga atong gihimo ngadto sa Ginoo.
-
Sa higayon nga mihimo kita og mga pakigsaad sa Ginoo, unsa ang atong responsibilidad ngadto sa ubang tawo sa tibuok kalibutan? (Ang mga estudyante kinahanglang mahibalo sa mosunod nga kamatuoran: Isip binhi ni Abraham, kita adunay responsibilidad sa pakigsaad sa pagpanalangin sa tanang mga tawo sa kalibutan. Ikonsiderar ang pagsulat niining kamatuoran diha sa pisara.)
-
Sa unsang paagi kaha nga kita mahimong usa ka panalangin sa tanang mga tawo sa kalibutan? (Kon imong nasulat ang doktrinal nga pamahayag sa pisara, idugang kini sa mga pulong nga “pinaagi sa pagpakigbahin sa ebanghelyo ngadto kanila.”)
I-summarize ang 3 Nephi 20:29–46 pinaagi sa pagpasabut sa daklit nga agi og dugang sa pagtudlo sa mga Nephite mahitungod sa ilang mga panalangin ug mga responsibilidad isip mga anak sa pakigsaad, ang Manluluwas mimatuod nga angyuta nga kabilin sa mga Judeo mao ang Jerusalem. Mikutlo siya sa mga panagna ni Isaias, nga nanagna sa panahon kon kanus-a ang mga Judeo ipahiuli ngadto sa yuta nga ilang kabilin human sila motuo kang Jesukristo ug mag-ampo sa Amahan diha sa Iyang ngalan.
Sa pagtapos, hangyoa ang usa ka estudyante sa pagbasa og kusog sa 3 Nephi 20:46. Dapita ang mga estudyante sa pagsunod ug motino sa usa ka paagi nga sila makapanalangin sa kinabuhi sa laing tawo pinaagi sa ebanghelyo sulod sa sunod semana. Planoha ang pag-follow up sa mga estudyante panahon sa umaabut nga klase sa paghatag kanila og oportunidad sa pagreport sa ilang mga kasinatian. Ipamatuod ang kaimportante sa pagtuman sa atong responsibilidad nga motabang sa pagpundok sa Israel.
Komentaryo ug Background nga Impormasyon
3 Nephi 20:16. “Mahisama sa usa ka batan-on nga leon taliwala sa mga panon sa karnero”
Nagpasabut ngadto sa mga pagtulun-an sa 3 Nephi 20:16, si Elder Bruce R. McConkie sa Korum sa Napulog Duha ka mga Apostoles mitudlo:
“Kining mga pulong sa atong Ginoo ngadto sa mga Nephite mga kinutlo gikan sa Miqueas 5:8–9 ug nagpasabut ngadto sa mga kaalautan ug sa katapusang pagsunog nga molaglag sa dautan atol sa Ikaduhang Pag-anhi. Gawas lang sa pipila kinsa mga mapainubsanon nga sumusunod ni Kristo, ang mga Hentil dili mohinulsol. Sila magmaya diha sa ilang mga pagkasalawayon ug sa sala batok sa gipahiuli nga ebanghelyo, ug sila pagasunugon pinaagi sa kahayag sa pag-anhi sa atong Ginoo samtang ang mga matarung—nga gitawag dinhi og mga salin ni Jacob—makasugakod. Ug unya, sa propetikanhon nga paghulagway, kini ingon nga ang salin sa Israel milaglag sa ilang mga kaaway isip usa ka batan-on nga leon taliwala sa mga panon sa karnero” (The Millennial Messiah: The Second Coming of the Son of Man [1982], 248).
3 Nephi 20:26. Mga anak sa pakigsaad
Si Elder Russell M. Nelson sa Korum sa Napulog Duha ka mga Apostoles namulong mahitungod sa mga panalangin sa pagkahibalo nga kita mga anak sa pakigsaad:
“Kon kita makaamgo nga kita mga anak sa pakigsaad, makaila kita kon kinsa kita ug unsa ang gipaabut sa Dios nato. Ang Iyang balaod nahisulat diha sa atong mga kasingkasing. Siya mao ang atong Dios ug kita Iyang katawhan. Mapasaligong mga anak sa pakigsaad nagpabilin nga makanunayon, bisan sa panahon sa kalisdanan. Kon kana nga doktrina nahimong kabahin sa atong kinabuhi, bisan ang hapdos sa kamatayon mahupay ug ang atong espirituhanong kusog malig-on” (“Mga Pakigsaad,” Ensign o Liahona, Nob. 2011, 88).
3 Nephi 20:26–27. Pagtuman sa pakigsaad ni Abraham
Si Elder Russell M. Nelson sa Korum sa Napulog Duha ka mga Apostoles namulong sa usa ka paagi nga kita makatabang sa pagtuman sa pakigsaad ni Abraham:
“Ato ang responsibilidad sa pagtabang og tuman sa pakigsaad ni Abraham. Ang atong kaliwat giorden nang daan ug giandam sa pagpanalangin sa tanang katawhan sa kalibutan. Kana mao nganong ang katungdanan sa priesthood naglakip sa misyonaryo nga buhat. Human sa mga 4,000 ka tuig sa pagpinaabut ug pagpangandam, kini mao ang gitakda nga panahon kanus-a pagadad-on ang ebanghelyo ngadto sa mga kaliwatan dinhi sa yuta. Kini mao ang panahon sa gisaad nga pagpundok sa Israel. Ug kinahanglan kitang moapil! Dili ba kana kulbahinam? Ang Ginoo nagsalig nato ug sa atong anak nga mga lalaki—ug mapasalamaton kaayo Siya ngadto sa atong anak nga mga babaye—kinsa takus nga nagserbisyo isip mga misyonaryo niining importanting panahon sa pagpundok sa Israel” (“Mga Pakigsaad,” Ensign o Liahona, Nob. 2011, 88).
3 Nephi 20:27. Kamo adunay katungdanan sa pagpakigbahin sa ebanghelyo
Si Elder David A. Bednar sa Korum sa Napulog Duha ka mga Apostoles mimatuod sa atong katungdanan sa pagpakigbahin sa ebanghelyo ngadto sa uban:
“Kamo ug ako, karon ug sa kanunay, mopanalangin kita sa katawhan sa tanang kanasuran sa kalibutan. Kamo ug ako, karon ug sa kanunay, mopamatuod kang Jesukristo ug mosangyaw sa mensahe sa Pagpahiuli. Kamo ug ako, karon ug sa kanunay, modapit sa tanan sa pagdawat sa mga ordinansa sa kaluwasan. Ang pagsangyaw sa ebanghelyo dili usa ka obligasyon kon may panahon lang. Dili kay ordinaryo lang kini nga kalihokan nga moapil-apil kita sa mubo nga panahon o usa ka buluhaton nga kinahanglang kompletohon isip mga miyembro sa Ang Simbahan ni Jesukristo sa mga Santos sa Ulahing mga Adlaw. Kondili, ang misyonaryong buhat usa ka pagpakita sa atong espirituhanong pagkakita ug panulundon. Kita giordinahan nang daan didto sa pre-mortal nga kahimtang ug natawo dinhi nga mortal aron matuman ang pakigsaad ug saad sa Dios ngadto ni Abraham. Ania kita karon dinhi sa kalibutan niining panahona aron sa pagpadayag sa priesthood ug sa pagsangyaw sa ebanghelyo. Mao kini kita, mao kini ang hinungdan nganong ania kita—karon ug sa kanunay” (“Pagkahimong usa ka Misyonaryo,” Ensign o Liahona, Nob. 2005, 47).