Leksyon 93: Alma 36

Leksyon 93

Alma 36

Pasiuna

Human sa iyang misyon ngadto sa mga Zoramite, si Alma mitambag sa matag usa sa iyang mga anak. Ang iyang tambag ngadto sa iyang anak nga lalaki nga si Helaman makita sa Alma 36 ug 37. Mipamatuod si Alma ngadto ni Helaman nga ang Dios motubos niadtong kinsa mosalig Kaniya. Sa pagpakita niining kamatuoran, si Alma mihulagway sa iyang kasinatian sa mga katuigang nanglabay sa dihang siya giluwas gikan sa kasakit sa iyang mga sala pinaagi sa Pag-ula ni Jesukristo. Misulti usab siya sa iyang mga paningkamot sa pagdala sa uban ngadto ni Kristo ug sa pagsinati og kalipay sa paghinulsol alang sa ilang mga kaugalingon.

Pahinumdom: Ang leksyon 94 naghatag og oportunidad alang sa tulo ka estudyante sa pagtudlo. Kon wala pa nimo nabuhat ang ingon, mahimo ka nga magpili og tulo ka mga estudyante karon ug hatagi sila og mga kopya sa gitagana nga porsyon sa leksyon 94 aron sila makapangandam. Awhaga sila nga tun-an ang materyal sa leksyon sa mainampoong paagi ug tinguhaon ang giya sa Espiritu Santo aron sila makahibalo unsaon sa pagpahiangay sa leksyon ngadto sa mga panginahanglan sa ilang mga kaklase.

Mga Sugyot alang sa Pagtudlo

Alma 36:1–5

Si Alma nagtudlo ni Helaman mahitungod sa makatubos nga gahum sa Dios

Hangyoa ang mga estudyante sa paghunahuna mahitungod sa positibo nga mga paagi diin ang pagpamatuod o usa ka piho nga pagtulun-an sa ilang mga ginikanan nakaimpluwensya kanila. Dapita ang usa o duha ka mga estudyante sa pagpakigbahin sa ilang mga hunahuna diha sa klase.

Ipasabut nga ang mga kapitulo 36–42 diha sa basahon ni Alma naglangkob sa tambag gikan ni Alma ngadto sa iyang anak nga mga lalaki. Ang mga kapitulo 36–37 mga pakigpulong ngadto kang Helaman, ang kapitulo 38 pakigpulong ngadto kang Shiblon, ug ang mga kapitulo 39–42 mga pakigpulong ngadto kang Corianton.

Awhaga ang mga estudyante nga hunahunaon ang ilang kaugalingon sa dapit ni Helaman samtang siya naminaw ngadto sa pagpamatuod sa iyang amahan sa Alma 36:1–5. Ipabasa sa hilum sa mga estudyante kining mga bersikulo, nga mangita kon unsa ang ilang nagustuhan mahitungod sa pagpamatuod ni Alma.

Dinhi niining mga bersikulo, unsa ang labing nindot alang ninyo? Ngano man?

Alma 36:6–22

Si Alma naghulagway sa iyang pagrebelde ug nagpasabut kon giunsa niya pagdawat sa kapasayloan.

Ipasabut nga samtang padayon ang pagpamatuod sa gahum sa Dios sa pagtubos niadtong misalig Kaniya, si Alma mipakigbahin sa iyang kasinatian sa pagkatubos gikan sa kasakit sa iyang mga sala. Hangyoa ang mga estudyante sa pagbasa og kadali sa Alma 36:6–9 ug i-summarize unsa ang nahitabo ngadto ni Alma samtang siya ug ang anak nga mga lalaki ni Mosiah nagtinguha sa pagdaut sa Simbahan.

Dapita ang usa ka estudyante sa pagbasa og kusog sa Alma 36:10. Hangyoa ang klase sa pagpangita kon unsa ka dugay nag-antus si Alma sa iyang mga sala. Ipasabut nga sa Alma 36:11–17 atong madawat ang mas daghang detalye sa istorya sa unsay nasinati ni Alma panahon sa tulo ka adlaw ug tulo ka gabii sa iyang pag-antus kay sa atong makit-an sa laing istorya sa iyang pagkakabig (tan-awa sa Mosiah 27 ug Alma 38). I-assign ang mga estudyante nga magpares sa pagtrabaho. Dapita ang parisan sa pagtuon sa Alma 36:11–17, nga mangita sa pagpahayag ni Alma sa iyang kahadlok o kasakit. Mahimo nimong isugyot nga markahan sa mga estudyante unsa ang ilang nadiskubrihan. Ipareport sa mga estudyante ang mga pulong nga ilang nakit-an. (Mahimo nimo kining isulat diha sa pisara.) Mahimo nimong ipangutana ang mosunod aron mapalawman ang pagsabut sa mga estudyante sa mga pulong nga ilang ireport.

Sa inyong hunahuna unsa kaha ang gipasabut sa mga pulong (o pulong)? Unsa ang hinungdan nga mibati si Alma nianang paagiha?

Aron matabangan ang mga estudyante nga mas makasabut sa mga pulong nga gisakit, gisamok, ug gihasol, basaha ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:

“Ang giuyog nagpasabut og ‘gipaantus.’ Sa karaang panahon ang usa ka rack mao ang usa ka bayanan diin ipahigda ang biktima nga ang matag buol-buol ug pulsohan gigapos ngadto sa usa ka buburan [spindle] diin kon tuyukon makahimo og tumang kasakit.

“Ang karas [harrow] mao ang usa ka bayanan nga may mga tusok kini. Kon guyuron diha sa yuta, makalkal ang yuta. Ang mga kasulatan kanunayng naghisgot sa mga kalag ug mga hunahuna nga ‘gikaras’ tungod sa kahasol sa konsensya.

“Ang gihasol nagpasabut sa ‘paglubag,’ usa ka paagi sa pagpaantus nga hilabihan kasakit nga gani ang inosente makatug-an” (“The Touch of the Master’s Hand,” Ensign, Mayo 2001, 23).

Unsa ang ikatudlo sa mga kasinatian ni Alma ngari kanato mahitungod sa epekto sa sala? (Tabangi ang mga estudyante sa pag-ila sa mosunod nga kamatuoran: Ang sala mosangput sa dakong kasakit, pag-antus, ug pagmahay.)
Makita ba nga si Alma nakasinati og kasakit ug pagmahay alang sa iyang mga sala diha dayon human nga siya nakahimo niini? Sa inyong hunahuna ngano kaha nga importante ang maamguhan nga mahimong dili nato mabati ang mga epekto sa atong mga sala diha-diha dayon?

Hangyoa ang mga estudyante sa pagpamalandong sa mga kasinatian diin ilang nabati ang kasakit o pagmahay gumikan sa ilang mga sala. Dayon basaha ang mosunod nga pamahayag ni Presidente Packer:

“Kada usa kanato nakasulay na sa kasakit sa tanlag nga nagsunod sa atong mga kasaypanan. …

“Kon kamo nabudlay uban sa makapahiubos nga mga pagbati sa konsensya o kahigawad, sa kapakyasan o kaulaw, adunay usa ka tambal” (“The Touch of the Master’s Hand,” 22).

Ipasabut nga samtang si Alma mibati og hilabihang kasakit ug pagbasol gumikan sa iyang mga sala, nakahinumdom siya sa tambal alang sa iyang kasakit.

Sumala sa Alma 36:17, unsa ang iyang nahinumduman?

Ipabasa og kusog sa usa ka estudyante ang Alma 36:18. Dapita ang klase sa pagpangita sa unsay gibuhat ni Alma sa pagbuhat sa mga pagtulun-an sa iyang amahan. Aron matabangan ang mga estudyante nga mas masabtan kini nga mga bersikulo, paghangyo og usa ka estudyante sa pagbasa sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

Imahe

Elder Jeffrey R. Holland

“Natandog si Alma sa pagtulun-an sa iyang amahan, apan kini importante ilabi na nga ang propesiya nga iyang nahinumduman mao ang mahitungod ‘sa pag-anhi sa usa ka Jesukristo, usa ka Anak sa Dios, aron sa pag-ula sa iyang dugo alang sa mga sala sa kalibutan.’ (Alma 36:17.) Mao kana ang pangalan ug kana ang mensahe nga kinahanglan gayud madungog sa kada tawo. … Bisan unsa pa nga pag-ampo nga atong gihalad, bisan unsa pa ang atong mga panginahanglan, ang tanan bisan unsaon pa nag-agad gayud niana nga pangamuyo: ‘O Jesus, ikaw nga Anak sa Dios, malooy ka kanako.’ Siya andam sa paghatag niana nga kalooy. Iyang gibayad ang iyang kinabuhi aron mahatag kini” (However Long and Hard the Road [1985], 85).

Sa inyong hunahuna ngano kaha nga importante alang kanato nga dili basta lang makat-on mahitungod ni Jesukristo apan mangayo usab sa mga panalangin sa Iyang Pag-ula?

Awhaga ang mga estudyante nga ikonsiderar sa hilum kon sila nag-ampo ba aron makadawat sa mga panalangin sa Pag-ula ni Jesukristo, lakip na ang panalangin sa kapasayloan.

Dapita ang mga estudyante sa pagsiksik sa hilum ang Alma 36:19–22 nga mangita sa mga pulong nga naghulagway kon sa unsang paagi nga nausab ang mga pagbati ni Alma human siya nag-ampo alang sa kalooy.

Unsa nga mga pulong ang inyong nakit-an nga naghulagway kon sa unsang paagi nausab ang mga pagbati ni Alma?

Ipangutana ang mosunod mahitungod sa matag pulong nga nakit-an sa mga estudyante:

Unsa ang gitudlo niana nga mga pulong diha kaninyo mahitungod sa gahum sa Pag-ula sa Manluluwas? (Samtang motubag ang mga estudyante, tabangi sila nga makita nga dili lang ang kasakit ni Alma ang nakuha, siya napuno usab sa hingpit nga kalipay.)

Isulat sa pisara ang mosunod nga dili kompletong pamahayag: Kon magpakita kita og pagtuo kang Jesukristo ug sa Iyang Pag-ula, nan Siya mo …

Gikan sa kasinatian ni Alma, unsa ang atong makat-unan mahitungod sa buhaton sa Ginoo alang kanato samtang kinasingkasing kitang naghinulsol? (Ang mga estudyante mahimong mopakigbahin og lain-laing mga baruganan, apan siguroha nga sila mopadayag nga kon kita mopakita og hugot nga pagtuo ni Jesukristo ug sa Iyang Pag-ula, nan Siya motubos kanato gikan sa kasakit sa atong mga sala ug mopuno kanato sa hingpit nga kalipay. (Mahimo nimong kompletuhon ang pamahayag diha sa pisara.)
Unsa ang atong mahimo sa pagpakita og hugot nga pagtuo ni Jesukristo aron kita matubos gikan sa pagbati og kasakit o kahasol nga misangput tungod sa atong mga sala?

Basaha og kusog ang mosunod nga sitwasyon, ug hangyoa ang mga estudyante sa pagkonsiderar kon unsaon nila pagtubag:

Usa ka higala kinsa nagbasahan sa Basahon ni Mormon mipahayag og kabalaka mahitungod sa mga pulong ni Alma sa Alma 36:19. Ang imong higala nangutana nimo, “Kon makahinumdom ko sa akong mga sala ug mobati pa gihapon og kasubo tungod niini, nagpasabut ba kini nga wala pa ko mapasaylo?”

Hangyoa ang mga estudyante sa pagpasabut kon sa unsang paagi nga ang mga kasinatian ni Alma may kalabutan niini nga sitwasyon. Human makatubag ang mga estudyante, basaha ang mosunod nga pamahayag ni Presidente Dieter F. Uchtdorf sa Unang Kapangulohan:

Imahe

President Dieter F. Uchtdorf

“Si Satanas mosulay sa pagpatuo kanato nga ang atong mga sala wala mapasaylo tungod kay ato man kining mahinumduman. Si Satanas bakakon; mosulay siya sa pagpahanap sa atong panan-aw ug modala kanato palayo sa dalan sa paghinulsol ug kapasayloan. Ang Dios wala mosaad nga dili kita mahinumdom sa atong mga sala. Ang paghinumdom motabang kanato nga malikayan ang pagbuhat pag-usab sa sama nga mga sayop. Apan kon magpabilin kita nga matinuoron ug matinud-anon, ang paghinumdom sa atong mga sala magkaanam og kawala sa paglabay sa panahon. Mahimo kining kabahin sa gikinahanglan nga proseso sa pag-ayo ug paglimpyo. Si Alma nagpamatuod nga human siya mituaw ngadto kang Jesus alang sa kalooy, makahinumdom pa gihapon siya sa iyang mga sala, apan ang paghinumdom sa iyang mga sala wala na mohasol ug mosakit pa kaniya, tungod kay nasayud siya nga siya gipasaylo na (tan-awa sa Alma 36:17–19).

“Ato kining responsibilidad ang paglikay sa bisan unsang butang nga makapabalik sa karaang mga paghinumdom sa pagkamakasasala. Kon magpadayon kita sa pagbaton og ‘masulub-on nga kasingkasing ug mahinulsulon nga espiritu’ (3 Nephi 12:19), mahimo kitang mosalig nga ang Dios dili na mahinumdom sa [atong mga sala]’” (“Punto sa Luwas nga Pagbalik,” Ensign o Liahona, Mayo 2007, 101).

Base sa pamahayag ni Presidente Uchtdorf, unsaon ninyo sa pagpasabut unsay ipasabut sa “wala na [gi]samok sa panumduman sa [atong] mga sala”? (Alma 36:19.

Ipamatuod nga kon kita magpakita sa hugot nga pagtuo diha ni Jesukristo ug sa Iyang Pag-ula, Siya moluwas kanato gikan sa kasakit sa atong mga sala ug mopuno kanato sa hingpit nga kalipay. Awhaga ang mga estudyante sa paghunahuna kon unsaon nga ilang magamit unsa ang ilang nakat-unan gikan sa kasinatian ni Alma. Kon duna pay oras, ipakanta sa klase ang “Where Can I Turn for Peace?” (Hymns, nu. 129).

Alma 36:23–30

Mipasabut si Alma nganong padayon siyang naghago sa pagdala sa uban ngadto sa paghinulsol

Aron matabangan ang mga estudyante nga masabtan nganong naghago si Alma sa pagdala sa uban ngadto sa paghinulsol, ikonsiderar ang paggamit sa mosunod nga kalihokan. (Kon dili posible ang paghatag og pagkaon sa imong klase, mahimo nimong ihulagway ang kalihokan.)

Pagpakita og usa ka pagkaon (sama sa usa ka cookie o piraso nga kendi) ug pangutana ni bisan kinsa sa klase kon duna bay ganahan niining matang sa pagkaon. Tilawi, ug isulti kon unsa kini ka lami. Sultihi ang klase nga ang pagkaon lami kaayo nga ganahan nimo nga ipakigbahin kini sa tibuok klase. Pagpakita pa og dugang sa samang pagkaon, ug pangutana kon duna pa bay laing gustong motilaw niini. Ipakigbahin ang pagkaon sa tanan nga ganahang makatilaw.

Dapita ang usa ka estudyante sa pagbasa og kusog sa Alma 36:23–24. Hangyoa ang klase sa pagsunod, nga mangita kon sa unsang paagi ang kalihokan sa pagtilaw may kalabutan sa kasinatian ni Alma human sa iyang pagkakabig.

Sa unsang paagi nga ang mga lihok ni Alma susama sa kalihokan sa pagtilaw? Unsa ang gusto ni Alma nga matilawan sa ubang mga tawo?

Dapita ang usa ka estudyante sa pagbasa og kusog sa Alma 36:25–26. Hangyoa ang klase sa pag-ila kon sa unsang paagi nga ang paningkamot ni Alma sa pagtudlo sa ebanghelyo nakaimpluwensya kaniya ug sa uban.

Sa unsang paagi nga ang pagtudlo ni Alma nakaimpluwensya kaniya ug sa uban?
Unsa nga mga baruganan ang atong makat-unan gikan niini nga mga bersikulo? (Ang mga estudyante mahimong mogamit og lain-laing mga pulong, apan siguroha nga ilang ipahayag nga makadawat kita og dakong kalipay kon atong tinguhaon nga madala ang uban ngadto ni Kristo.)

I-summarize ang Alma 36:27–30 pinaagi sa pagpasabut nga si Alma mipamatuod pag-usab ngadto kang Helaman nga ang Ginoo moluwas niadtong kinsa mosalig Kaniya. Ipamatuod ang hingpit nga kalipay nga atong masinati kon atong ipakita ang hugot nga pagtuo ni Jesukristo ug kon atong awhagon ang uban sa pagbuhat usab sa ingon. Aron matabangan ang mga estudyante sa paggamit unsa ang ilang nakat-unan gikan sa Alma 36, dapita sila sa pagkompleto sa usa sa mga kalihokan sa ubos. (Mahimo nimo kining isulat sa pisara.)

Ikonsiderar kon kamo mibati ba nga ang Manluluwas moluwas kaninyo gikan sa sala ug mopuno kaninyo sa kalipay. Sa imong scripture study journal, ipasabut unsa ang imong buhaton aron makadawat niining mga panalangin.
Paghunahuna og usa ka tawo (sama sa usa ka higala, igsoon, o miyembro sa ward) nga tingali makabenepisyo gikan sa imong pagpamatuod sa Manluluwas. Sulati kining tawhana ug ilakip ang imong pagpamatuod kon sa unsang paagi si Jesukristo moluwas kanato gikan sa kasakit sa sala ug mopuno kanato sa kalipay.

Komentaryo ug Background nga Impormasyon

Alma 36:12. “Ang akong kalag … gisakit uban sa tanan kong mga sala”

Si Elder Dallin H. Oaks sa Korum sa Napulog Duha ka mga Apostoles mitudlo nga ang pipila ka ang-ang sa pag-antus gumikan sa atong mga sala mao ang usa ka importanting aspeto sa paghinulsol:

“Ang kaangayan nagkinahanglan nga ang dili mahinulsulon nga malapason mag-antus sa iyang kaugalingong mga sala [tan-awa sa D&P 19:16–19]. …

“… Unsa kaha ang mahinulsulon nga mga malapason? Silutan ba sila? Kinahanglan ba gayud siyang mag-antus? …

“… Ang tawo nga maghinulsol wala kinahanglana nga mag-antus ‘bisan ingon’ sa pag-antus sa Manluluwas alang niana nga sala. Ang mga makasasala nga naghinulsol makasinati og mga pag-antus, apan, tungod sa ilang paghinulsol ug tungod sa Pag-ula, dili sila makasinati sa tibuok nga ‘labaw ka hapdos’ nga epekto sa walay katapusang kasakit nga giantus sa Manluluwas alang niana nga mga sala.

“Si Presidente Spencer W. Kimball, kinsa mihatag sa ingon ka komprehensibo nga mga pagtulun-an mahitungod sa paghinulsol ug kapasayloan, miingon nga ang personal nga pag-antus ‘usa ka importante kaayo nga bahin sa paghinulsol. Ang tawo dili magsugod sa paghinulsol hangtud siya nakaantus pag-ayo alang sa iyang mga sala.’ (Teachings of Spencer W. Kimball, p. 88).

“‘Kon ang usa ka tawo wala pa nakaantus, wala pa siya makahinulsol. … Kinahanglan pa siya nga moagi sa usa ka pagbag-o sa iyang sistema diin siya mag-antus ug dayon ang kapasayloan aduna nay posibilidad’ (Teachings of Spencer W. Kimball, p. 99). …

“Ang tanan natong kasinatian nagkumpirmar sa katinuod nga kita kinahanglang molahutay sa personal nga pag-antus diha sa proseso sa paghinulsol—ug alang sa bug-at nga mga kalapasan nga ang pag-antus mahimong grabe ug madugay-dugay. Nagtuo ako nga ang kada usa kanato kinsa tinuod gayud nga matinuoron sa iyang kaugalingon nakaila sa kamatuoran niining baruganan. Nabati nato kini sa atong mga kinabuhi, ug nakita nato kini sa mga kinabuhi sa uban.

“Kinahanglan usab natong obserbaran nga ang atong personal nga pag-antus sa sala pribado, dili publiko. Sa kasagaran bugtong ang makasasala lamang ug ang Ginoo ug ang sulugoon sa Ginoo ang nasayud unsa ang nahitabo. Agi og kalahian ngadto sa publikong kinaiyahan sa silot nga ipahamtang pinaagi sa mga balaod sa tawo, ang pag-antus nga mosangput ngadto sa kalooy ubos sa mga balaod sa Dios hilabihan ka personal” (“Sins, Crimes, and Atonement” [pakigpulong sa mga CES religious educator, Peb. 7, 1992], 4–6, si.lds.org).

Alma 36. Chiasmus

Ang chiasmus (usahay gitawag og binali nga estraktura sa pulong) mao ang estraktura sa pagsulat nga sagad gamiton sa karaang Semitic ug Greek nga balak ingon man sa literatura sa ubang mga kultura. Sa chiasmus, ang mga pulong o mga ideya gihan-ay sa piho nga pagkasunod ug unya gibalik sa bali nga pagkasunod. Kini nga pagbalik-balik naghatag og gibug-aton sa importanting mga ideya ug mga pulong. Ang kinatibuk-ang ideya sa tagsulat kasagaran mahimutang dapit sa tunga-tunga sa chiasmus. Sa tsart diha sa ubos, hinumdumi nga ang sentro nga mensahe sa chiasmus sa Alma 36 nagtutok sa panahon sa kinabuhi ni Alma sa dihang mibalik siya ngadto ni Jesukristo alang sa kahupayan.

A. bersikulo 1
 B. bersikulo 2
  C. bersikulo 3
   D. bersikulo 4–5
    E. bersikulo 6
     F. bersikulo 10
      G. bersikulo 14
       H. bersikulo 16
        I. bersikulo 17
        I. bersikulo 18
       H. bersikulo 19–21
      G. bersikulo 22
     F. bersikulo 23
    E. bersikulo 24
   D. bersikulo 26
  C. bersikulo 27
 B. bersikulo 28–29
A. bersikulo 30