Moroni 7:1–19

Pasiuna

Girekord ni Moroni ang usa ka wali nga gipamulong sa iyang amahan, si Mormon, daghang katuigan nang milabay. Kini nga leksyon naglakip sa unang bahin sa wali, diin gitudlo ni Mormon ang mahitungod sa paghimo og matarung nga mga buhat uban ang tinuod nga katuyoan ug mahitungod sa pag-ila tali sa maayo ug sa dautan. Ang leksyon 156 naglakip sa nahibilin nga bahin sa wali.

Mga Sugyot alang sa Pagtudlo

Moroni 7:1–11

Gitudloan ni Mormon ang mga sumusunod ni Jesukristo sa paghimo og maayong mga buhat uban ang tinuod nga katuyoan

Pag-display og usa ka pirasong prutas nga nindot tan-awon ang gawas.

Nakadiskubre ba kamo sukad nga ang usa ka pirasong prutas dili sama ka maayo sa sulod kaysa makita sa gawas? (Dapita ang pipila ka mga estudyante sa pagpakigbahin og mga ehemplo. Mahimo nimong ipakigbahin ang usa ka kasinatian nga imong kaugalingon.)
Sa unsa kaha nga mga paagi nga ang tawo masama sa usa ka pirasong prutas nga nindot tan-awon sa gawas apan dunot sa sulod?

Ipasabut nga girekord ni Moroni ang mga pulong sa iyang amahan, si Mormon, mahitungod sa importansya sa pagkamatarung diha sa atong mga kasingkasing ingon man sa paghimo og matarung nga mga buhat. Dapita ang usa ka estudyante sa pagbasa og kusog sa Moroni 7:2–3, ug hangyoa ang klase sa pag-ila sa pundok nga gipakigsultihan ni Moroni. (Nakigsulti siya ngadto sa mga miyembro sa Simbahan.)

Human ang mga estudyante makareport kon unsay ilang nakat-unan, hangyoa ang usa ka estudyante sa pagbasa og kusog sa Moroni 7:4–5. Dapita ang klase sa pagsunod ug sa pagdeterminar giunsa ni Mormon paghibalo nga kining mga tawhana “malinawon nga mga sakop ni Kristo” (Moroni 7:3).

Isulat ang pulong tinuod nga katuyoan diha sa pisara.

Sa inyong hunahuna unsa ang gipasabut niini nga mga pulong?

Samtang ang mga estudyante naghisgot niini nga pangutana, mahimo nimong hangyoon ang usa kanila sa pagbasa sa mosunod nga pagpasabut ni Elder Dallin H. Oaks sa Korum sa Napulog Duha ka mga Apostoles:

“Dili lamang gayud kita mobuhat og unsay matarung. Kinahanglan gayud kita nga molihok tungod sa matarung nga mga rason. Ang moderno nga pulong mao ang maayong motibo. Ang mga kasulatan kasagaran nagpasabut niining angay nga mental nga panglihok uban sa mga pulong hingpit nga katuyoan sa kasingkasing o tinuod nga katuyoan.

“Giklaro sa mga kasulatan nga ang Dios nakasabut sa atong mga motibo ug mohukom sa atong mga lihok sumala niana” (Pure in Heart [1988], 15).

Dapita ang mga estudyante sa pagpangita og hilum sa Moroni 7:6–10, nga mangita sa mga pasidaan sa Ginoo ngadto sa mga tawo kinsa naghimo og maayong mga buhat nga walay tinuod nga katuyoan.

Unsa nga mga pasidaan ang gihatag sa Ginoo ngadto niadtong nanaghimo og maayong mga buhat nga walay tinuod nga katuyoan? (Mipasidaan Siya nga ang ilang mga buhat dili mohatag og kaayohan kanila ug nga ang ilang mga buhat pagailhon nga dautan kaysa pagkamatarung.)
Unsa nga baruganan ang atong makat-unan gikan niini nga mga bersikulo? (Samtang ang mga estudyante mahimong mohisgot og pipila ka mga kamatuoran, tabangi sila sa pag-ila sa mosunod nga baruganan: Aron mapanalanginan alang sa atong maayong mga buhat, kinahanglan gayud kitang molihok uban ang tinuod nga katuyoan.)
Agi og dugang sa pagtinguha og mga panalangin gikan sa Ginoo, ngano kaha nga importante ang paghimo og maayong mga buhat uban ang tinuod nga katuyoan?
Unsay inyong namatikdan nga kalainan dihang kamo nakahimo og maayong mga buhat uban ang tinuod nga katuyoan?

Ipasabut nga giawhag kita ni Mormon sa pag-ampo uban ang tinuod nga katuyoan (tan-awa sa Moroni 7:9). Paghangyo og usa ka estudyante sa pagbasa sa mosunod nga tambag gikan ni Presidente Brigham Young:

“Dili igsapayan kon ikaw o ako ganahan nga mag-ampo, kon ang panahon moabut aron mag-ampo, pag-ampo. Kon kita dili ganahan nga mobuhat niini, kinahanglang mag-ampo kita hangtud nga kita ganahan” (Mga Pagtulun-an sa mga Presidente sa Simbahan: Brigham Young [1997], 53).

Sa unsang paagi nga ang pagpili nga mag-ampo bisan kon kita dili ganahan magtabang kanato sa kadugayan nga mag-ampo uban ang tinuod nga katuyoan?
Sa unsa kaha nga paagi nga ang tambag ni Presidente Brigham Young may kalabutan sa pagsunod sa ubang mga sugo gawas sa pag-ampo? (Kon ang mga estudyante maglisud sa pagtubag niini nga pangutana, hunahunaa ang pagpakigbahin sa mosunod nga ehemplo: Pipila sa mga tawo tingali dili mosimba uban ang tinuod nga katuyoan. Hinoon, kon sila magpadayon sa pagsimba ug buhaton nila ang tanan aron makaapil ug makasimba, makabaton sila og mga kasinatian nga makatabang kanila sa pagkaplag og hingpit nga kalipay sa pagsimba. Ang ilang mga rason sa pagsimba mausab. Mosimba sila tungod kay gusto silang moadto didto—gusto nilang simbahon ang Dios, bag-uhon ang ilang mga pakigsaad, ug alagaran ang uban.)

Aron matabangan ang mga estudyante sa paggamit sa mga pagtulun-an ni Mormon sa paghimo og maayong mga buhat uban ang tinuod nga katuyoan, andama ang mosunod nga kalihokan sa wala pay klase: Andama ang daghang gagmay nga mga piraso sa papel. Sa matag pirasong papel, isulat ang usa ka sugo. Ang mga ehemplo mahimong maglakip sa pagpuasa, pagbayad og ikapulo, pag-alagad sa uban, pagtuon sa mga kasulatan, pagtahud sa mga ginikanan, ug ang ubang bisan unsa nga sugo nga gihunahuna nimong makatabang nga hisgutan sa mga estudyante. Ibutang ang mga pirasong papel sa usa ka sudlanan.

Diha sa klase, dapita ang usa ka estudyante sa pag-adto sa atubangan sa kwarto. Hangyoa siya sa pagkuha og usa ka pirasong papel gikan sa sudlanan ug pagbasa niini ngadto sa klase. Dayon hangyoa ang klase sa paghimo og usa o duha sa mosunod:

Ipakigbahin unsa ang ilang gibati kon sila nagsunod niana nga sugo uban ang tinuod nga katuyoan.
Pagsugyot og mga paagi sa pagsunod nianang sugo uban ang tinuod nga katuyoan.

Mahimo nimong balikon kini nga kalihokan sa pipila ka mga higayon.

Human niini nga kalihokan, ikonsiderar ang pakigbahin og kasinatian nga ikaw aduna sa dihang gisunod nimo ang sugo sa Dios uban ang tinuod nga katuyoan.

Moroni 7:12–19

Gitudlo ni Mormon kon unsaon sa paghukom tali sa maayo ug sa dautan

Ipasabut nga gipanagna ni Isaias nga sa katapusang mga adlaw, ang pipila sa mga tawo motawag sa dautan og maayo ug ang maayo dautan (tan-awa sa Isaias 5:20; 2 Nephi 15:20).

Unsa ang pipila ka mga ehemplo sa pagtawag sa mga tawo sa dautan og maayo ug sa maayo dautan?
Ngano kaha nga importante nga dili malibug sa maayo ug sa dautan?

Dapita ang pipila ka mga estudyante sa pagpuli-pulig basa og kusog sa Moroni 7:12–17. Hangyoa ang klase sa pagsunod ug sa pag-ila sa mga baruganan nga makatabang kanato sa paghukom sa maayo gikan sa dautan. Mahimo nimong awhagon sila sa pagmarka sa mga pulong nga labing makahuluganon ngadto kanila. Aron matabangan ang mga estudyante sa pagreport sa unsay ilang nakit-an, ipangutana ang mosunod:

Unsaon nato pagkahibalo nga ang usa ka butang gikan sa Dios? (Siguroha nga mailhan sa mga estudyante ang mosunod nga mga kamatuoran: Ang butang nga iya sa Dios nagdapit kanato sa pagbuhat og maayo, sa pagtuo kang Jesukristo, ug paghigugma ug pag-alagad sa Dios.)
Unsaon nato pagkahibalo nga ang usa ka butang gikan sa yawa? (Siguroa nga mailhan sa mga estudyante ang mosunod nga kamatuoran: Ang bisan unsa nga nagdani kanato sa paghimo og dautan, paglimud ni Jesukristo, o pakig-away batok sa Dios nagagikan sa yawa.)
Unsa ang pipila ka mga paagi nga ang Dios nagdapit ug nagkabig kanato sa pagpadayon sa paghimo og maayo?
Sa unsang paagi ang panulay nagdapit ug nagkabig kanato sa pagpakasala?

Aron matabangan ang mga estudyante sa paggamit sa mga pagtulun-an ni Mormon sa paghukom tali sa maayo ug sa dautan, dapita sila sa paglista sa ilang paboritong mga salida sa telebisyon, mga sine, mga awit, mga grupong mag-aawit, mga Internet site, mga apps, mga video game, o personal nga mga katigayunan. (Mahimo nimong lainon kini nga lista sumala sa mga panginahanglan ug interes sa mga estudyante.) Human ang mga estudyante adunay igong panahon sa pagsulat, hangyoa sila sa pagpadaplin una sa ilang mga lista. Sultihi sila nga makabaton sila og oportunidad sa paghunahuna pa mahitungod sa ilang mga lista sulod sa pipila ka mga minuto.

Sumala sa Moroni 7:16, unsa ang gihatag ngadto sa matag tawo aron sa pagtabang kanato nga mahibalo sa maayo gikan sa dautan?

Ipasabut nga ang Espiritu ni Kristo gitawag usab og Kahayag ni Kristo (tan-awa sa Moroni 7:18). Aron matabangan ang mga estudyante sa pagsabut sa Kahayag ni Kristo, basaha ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:

“Ang Espiritu Santo ug ang Kahayag ni Kristo lahi sa usag usa. …

“Walay pagsapayan kon kini bang pangsulod nga kahayag, kining kahibalo sa matarung ug sa sayop, gitawag og Kahayag ni Kristo, moral nga pagbati, o konsensya, makagiya kanato sa pagpugong sa atong mga lihok—gawas kon, kana, atong buntugon o kalimtan kini. …

“Kada tawo, babaye ug bata sa kada nasud, tinuohan o kolor—kada usa bisan sila magpuyo o unsay ilang gituohan o ilang gibuhat—anaa kanila ang dili mahanaw nga kahayag ni Kristo” (“Ang Kahayag ni Kristo,” Liahona, Abr. 2005, 8–10).

Unsaon kaha sa usa ka tawo sa pagbuntog o paghilum sa Kahayag ni Kristo diha sulod sa iyang kaugalingon?

Dapita ang mga estudyante sa pagbasa og hilum sa Moroni 7:18–19 ug sa pag-ila sa tambag ni Mormon mahitungod kon unsaon sa pagtubag ngadto sa Kahayag ni Kristo nga anaa sulod kanato. Hangyoa ang mga estudyante sa pagreport unsay ilang nakat-unan.

Unsa kaha ang gipasabut sa “magmakugihon sa pagpangita diha sa kahayag ni Kristo”?
Unsa nga mga baruganan ang atong makat-unan gikan sa Moroni 7:19? (Ang mga estudyante kinahanglan nga makaila sa mosunod nga mga baruganan: Samtang kita magmakugihon sa pagpangita diha sa kahayag ni Kristo, kita makasabut tali sa maayo ug sa dautan. Kon atong huptan ang tanan nga maayong butang, mahimo kitang mga anak ni Kristo. Kon ang mga estudyante nagkinahanglan og tabang sa pagsabut sa mga pulong “anak ni Kristo,”mahimo kang mo-refer ngadto sa leksyon 55 niini nga manwal.)
Kanus-a kamo naninguha nga mahibalo kon ang usa ka butang maayo ba o angay? Unsay inyong gibuhat nga “magmakugihon sa pagpangita” aron makat-unan kon kini maayo ba o angay?

Hangyoa ang mga estudyante sa pag-refer ngadto sa mga lista nga gihimo nila og una. Ipakita o basaha og kusog ang mosunod nga mga pangutana, ug dapita ang mga estudyante nga “magmakugihon sa pagpangita diha sa kahayag ni Kristo” (Moroni 7:19) samtang nagrekord sila sa ilang mga tubag niini nga mga pangutana. Ayaw og dalia kini nga kalihokan. Hatagi ang mga estudyante og igo nga panahon sa pagpamalandong ug sa pagsulat. Pahibaloa ang mga estudyante nga dili ikaw ang mohangyo kanila sa pagpakigbahin unsay ilang gisulat.

Unsa ka maayo ang pagdapit niining mga butanga diha kaninyo sa pagbuhat og maayo, sa pagtuo kang Jesukristo, ug sa paghigugma sa Dios ug sa pag-alagad Kaniya?
Aduna bay bisan hain niining mga butanga ang misulay sa paghaylo kaninyo sa pagbuhat og dautan, sa pagduhaduha ni Jesukristo, o sa paghunong sa pag-alagad sa Dios?
Gibati ba ninyo nga kinahanglan ninyong wad-on ang bisan hain niining mga butanga gikan sa inyong kinabuhi? Kon mao, unsaon ninyo sa pagbuhat niini?

Ipasabut nga usahay tingali lisud ang pagbuhat sa unsay atong nahibaloan nga maayo kon kini nagkinahanglan sa pagbiya sa usa ka butang nga kita nalipay. Aron sa pagtabang sa mga estudyante sa pagsuporta sa usag usa niini nga paningkamot, ipangutana:

Unsa nga tambag ang inyong ikahatag aron sa pagtabang sa usa ka tawo sa pagbiya sa mga butang nga dili maayo o angay?

Sa pagtapos, ipanghimatuod nga samtang kita nagsunod sa Kahayag ni Kristo, makaila kita niana nga maayo, makalikay sa mga panglingla ni Satanas, ug makapuyo isip mga sumusunod ni Jesukristo.

Komentaryo ug Background nga Impormasyon

Moroni 7:17. Ang yawa walay gihaylo sa pagbuhat og maayo

Si Elder Jeffrey R. Holland sa Korum sa Napulog Duha ka mga Apostoles mitudlo:

“Si Satanas, o Lucifer, o ang amahan sa mga bakak—bisan unsay itawag ninyo kaniya—tinuod gayud, siya gayud ang representasyon sa dautan. Ang iyang mga motibo sa tanang paagi dautan. … Hangtud sa hangtud supak siya sa gugma sa Dios, sa Pag-ula ni Jesukristo, ug sa buhat sa kalinaw ug kaluwasan. Makigbatok siya niini bisan kanus-a ug bisan asa kutob sa iyang mahimo. Nahibalo siya nga siya mapildi ug palayason sa katapusan, apan determinado siya nga modala og daghan uban kaniya kutob sa iyang mahimo” (“Apil Kitang Tanan,” Ensign o Liahona, Nob. 2011, 44).