Leksyon 40
2 Nephi 31
Pasiuna
Daghang katuigan sa wala pa matawo si Jesukristo, nakadawat si Nephi og pinadayag bahin sa bunyag sa Manluluwas. Samtang nagsulti si Nephi sa iyang katawhan bahin niini nga pinadayag, nagtudlo siya sa unsay iyang gitawag nga “ang doktrina ni Kristo”—nga aron makadawat og kinabuhing dayon, kinahanglan gayud nga ipakita nato ang hugot nga pagtuo diha ni Jesukristo, maghinulsol sa atong mga sala, magpabunyag, modawat sa Espiritu Santo, ug molahutay hangtud sa katapusan.
Mga Sugyot alang sa Pagtudlo
2 Nephi 31:1–13
Nagtudlo si Nephi nga kon mabunyagan kita, gisunod nato ang ehemplo sa Manluluwas
Sugdi ang klase pinaagi sa pagpangutana sa mga estudyante sa mosunod:
-
Unsay inyong mahinumduman bahin sa inyong bunyag? Unsa ang inyong gibati sa dihang gibunyagan kamo?
Ipasabut nga sa dihang nabunyagan ang mga estudyante, nagsunod sila og sumbanan nga kanunay nang kabahin sa ebanghelyo ni Jesukristo. Migamit si Nephi og piho nga mga pulong nga nagpasabut ngadto niini nga sumbanan. Dapita ang mga estudyante sa pagpangita sa mga pulong diha sa 2 Nephi 31:2 ug 2 Nephi 31:21. Human nila matino ang mga pulong nga “ang doktrina ni Kristo,” ipangutana:
-
Unsa nga mga pulong diha sa 2 Nephi 31:2, 21 ang nagsugyot sa kaimportante sa “doktrina ni Kristo”? (Ang mga tubag mahimong maglakip sa “ako kinahanglan nga mamulong mahitungod sa,” “walay lain nga agianan,” ug “mao lamang ang tinuod nga doktrina.”)
I-display ang litrato nga Si Juan Bautista Nagbunyag ni Jesus (62133; Libro sa mga Hulagway sa Ebanghelyo [2009], nu. 35). Dapita ang mga estudyante sa pagtuon og hilum sa 2 Nephi 31:5–9, nga mangita sa mga pulong nganong gibunyagan si Jesukristo. (Mahimo nimong isugyot nga ilang markahan kini nga mga pulong.) Human sa pipila ka minuto, hangyoa ang mga estudyante sa pagbasa sa mga pulong nga ilang nakit-an.
-
Sa inyong hunahuna unsa ang gipasabut sa “pagtuman sa tanan nga pagkamatarung”? (Human makatubag ang mga estudyante, mahimo nimong ipasabut nga nagpasabut kini sa pagtuman sa mga sugo. Miingon si Presidente Joseph F. Smith nga ang “pagtuman sa tanan nga pagkamatarung” mao ang “pagtuman sa balaod” [sa Conference Report, Abr. 1912, 9].)
Dapita ang usa ka estudyante sa pagbasa og kusog sa 2 Nephi 31:10–12.
-
Sa unsang paagi nga kining mga bersikulo nagpasabut sa kaimportante sa bunyag? (Nagtudlo si Nephi nga ang bunyag usa ka sugo gikan sa Langitnong Amahan, nga gikinahanglan kini aron makadawat sa gasa sa Espiritu Santo, ug gikinahanglan kini sa atong mga paningkamot nga mosunod ni Jesukristo.)
Hangyoa ang mga estudyante sa pag-summarize sa mga doktrina ug mga baruganan nga ilang nakat-unan gikan sa 2 Nephi 31:5–12. Samtang nagpakigbahin sila sa ilang mga ideya, siguroha nga ilang nasabtan ang mosunod nga mga baruganan:
Gipakita ni Jesukristo ang hingpit nga ehemplo sa pagkamasulundon nga angayan natong sundon.
Kinahanglan gayud natong sundon si Jesukristo, magpabunyag, ug modawat sa Espiritu Santo.
Si Jesukristo, bisan walay sala, gibunyagan aron sa pagtuman sa tanang pagkamatarung.
Hangyoa ang usa ka estudyante sa pagbasa og kusog sa 2 Nephi 31:13. Idirekta ang atensyon sa mga estudyante ngadto sa mga pulong nga “uban ang hingpit nga katuyoan sa kasingkasing,” “sa walay pagpakaaron-ingnon ug walay pagpanglimbong sa atubangan sa Dios,” ug “uban sa tinuod nga katuyoan.” Mahimo nimong isugyot nga markahan nila kini nga mga pulong.
-
Unsa man ang gipasabut niining mga pulong nganha kaninyo? (Mahimo nimong ipasabut nga ang tulo ka hugpong sa mga pulong nagpasabut sa panginahanglan nga mahimong sinsero sa atong mga paningkamot sa pagpakita og hugot nga pagtuo diha sa Manluluwas, maghinulsol sa atong mga sala, ug mosunod sa ehemplo sa Manluluwas.
Aron matabangan ang mga estudyante nga mas mapalawman ang ilang panabut kon unsaon pagsunod sa ehemplo sa Manluluwas sa nagkadaiyang mga sitwasyon, ipangutana ang sama sa mosunod:
-
Sa unsang paagi nga kining mga pulong magamit sa ingon nga mga kalihokan sama sa inadlaw nga pagtuon sa kasulatan ug pagtambong sa Simbahan?
-
Unsa ang kalainan tali sa “paglitok og pag-ampo” ug pag-ampo “uban ang hingpit nga katuyoan sa kasingkasing”?
-
Unsay kalainan tali sa pagkaon sa pan sa sakrament ug pag-ambit sa pan sa sakrament “uban sa tinuod nga katuyoan”?
-
Unsa ang kalainan tali sa pag-ingon nga pasensya bahin sa butang nga inyong nabuhat ug sa paghinulsol “uban ang hingpit nga katuyoan sa kasingkasing”?
2 Nephi 31:14–21
Nagtudlo si Nephi nga human sa bunyag, kinahanglan natong dawaton ang Espiritu Santo ug magpadayon sa pagsund sa ehemplo sa Manluluwas
Ipasabut nga namulong si Nephi bahin sa ganghaan nga miabli ngadto sa usa ka dalan. Dapita ang usa ka estudyante sa pagbasa og kusog sa 2 Nephi 31:17–18. Kon mahuman na sa pagbasa ang estudyante, pagdrowing og yano nga paghulagway sama sa mosunod diha sa pisara:
-
Base sa 2 Nephi 31:17, unsa man ang ganghaan? (Paghinulsol ug bunyag. Isulat ang Paghinulsol ug Bunyag sa ubos sa ganghaan.) Sa unsang paagi nga ang paghinulsol ug bunyag sama sa usa ka sa ganghaan?
-
Sumala sa 2 Nephi 31:18, asa man padulong ang dalan? (Kinabuhing dayon. Isulat ang Kinabuhing Dayon diha sa tumoy sa dalan. Mahimo nimong ipasabut nga ang mga pulong nga “kinabuhing dayon” nagpasabut sa kahimayaan diha sa celestial nga gingharian.)
-
Nagtudlo si Nephi nga human sa bunyag, madawat nato ang gasa sa Espiritu Santo (tan-awa sa 2 Nephi 31:13–14). Sumala sa 2 Nephi 31:17–18, unsa may mabuhat sa Espiritu Santo alang kanato? (Tabangi ang mga estudyante nga makasabut nga ang Espiritu Santo nagsaksi sa Amahan ug sa Anak ug nagdala og kapasayloan sa mga sala.)
-
Nganong importante man nga madawat nato ang pagpamatuod bahin sa Amahan ug sa Anak pinaagi sa Espiritu Santo?
Aron matabangan ang mga estudyante nga makasabut sa tahas sa Espiritu Santo diha sa kapasayloan sa mga sala, mahimo nimong ipasabut ang mga pulong nga “bunyag sa kalayo ug sa Espiritu Santo” (2 Nephi 31:13–14; tan-awa usab sa bersikulo 17). Dapita ang usa ka estudyante sa pagbasa sa mosunod nga pamahayag ni Elder David A. Bednar sa Korum sa Napulog Duha ka mga Apostoles: Hangyoa ang klase sa pagpaminaw kon unsay gipasabut sa mabunyagan sa kalayo ug sa Espiritu Santo.
Ang ganghaan sa bunyag magdala ngadto sa higpit ug pig-ot nga dalan. …
“Kita gimandoan ug gitudloan nga magpakabuhi nga ang atong nalaglag nga kinaiya mausab pinaagi sa balaanong gahum sa Espiritu Santo. Si Presidente Marion G. Romney nagtudlo nga ang bunyag sa kalayo pinaagi sa Espiritu Santo ‘nag-usab [kanato] gikan sa pagkatawhanon ngadto sa pagkaespirituhanon. Kini naglimpyo, nag-ayo, ug nagputli sa kalag. … Ang hugot nga pagtuo kang Ginoong Jesukristo, paghinulsol, ug bunyag sa tubig mga pasiuna ug gikinahanglan ngadto niini, apan [kini nga pagbunyag sa kalayo] ang katumanan. Ang pagdawat [sa pagbunyag sa kalayo] mao ang paghugas sa saput sa tawo pinaagi sa pag-ula sa dugo ni Jesukristo’ (Learning for the Eternities, comp. George J. Romney [1977], 133; tan-awa usab sa 3 Nephi 27:19–20).
“Busa, kita natawo pag-usab ug maningkamot nga kanunay makabaton sa Iyang Espiritu nga mag-uban kanato, ang Espiritu Santo maglimpyo ug maglunsay sa atong mga kalag sama sa kalayo (tan-awa sa 2 Nephi 31:13–14, 17). Sa katapusan, kita mobarug nga walay lama sa atubangan sa Dios” Ensign o Liahona, Nob. 2007, 81).
-
Unsay gisulti nila ni Elder Bednar ug Presidente Romney nga mabuhat sa “bunyag sa kalayo” alang kanato?
-
Unsay dugang nga mga panalangin ang atong madawat pinaagi sa impluwensya sa Espiritu Santo?
-
Sa unsang paagi kamo “maningkamot nga kanunay makabaton sa Iyang Espiritu” uban kaninyo?
-
Kanus-a kamo mibati sa Espiritu Santo nga milihok diha sa inyong kinabuhi?
Ipasabut nga diha sa 2 Nephi 31:18, ang pulong nga higpit nagpasabut og pig-ot, istrikto, tukma, ug wala tuguti ang pagsimang. Gigamit ni Nephi kini nga pulong aron sa paghulagway sa dalan nga kinahanglan natong agian human sa bunyag aron makadawat og kinabuhing dayon. Hangyoa ang mga estudyante nga mamalandong sa hilum sa mosunod nga pangutana:
-
Unsa ang kinahanglan natong buhaton human sa bunyag aron magpadayon diha sa dalan paingon sa kinabuhing dayon?
Samtang mamalandong ang mga estudyante niini nga pangutana, dapita sila sa pagpangita sa mga tubag diha sa 2 Nephi 31:15–16, 19–21. Mahimo nimong isugyot nga ilang markahan ang mga pulong nga nagpasabut kon unsay angay gayud natong buhaton aron makadawat og kinabuhing dayon. Human sa igong panahon, dapita ang pipila ka mga estudyante sa pagpakigbahin sa unsay ilang gimarkahan. Samtang motubag sila, isulat sa pisara ang ilang mga tubag. Ang imong paghulagway kinahanglang ingon ani tan-awon:
Siguroha nga nasabtan sa mga estudyante nga kon magpuyo kita sumala sa doktrina ni Kristo, makadawat kita og kinabuhing dayon.
Sa pagtapos sa leksyon, hangyoa ang usa ka estudyante sa pagbasa og kusog sa 2 Nephi 31:20. Ipasabut nga ang 2 Nephi 31:19–20 usa ka scripture mastery passage. Mahimo nimong awhagon ang mga estudyante sa pagmarka niini nga tudling sa lahi nga paagi aron dali nila kining madumduman. Dapita sila sa pagtubag sa usa sa mosunod nga mga pangutana diha sa ilang mga scripture study journal o mga class notebook:
-
Base sa unsay inyong natun-an niini nga leksyon, unsay nakahatag ninyo og paglaum nga makadawat kamo og kinabuhing dayon?
-
Sa unsang paagi nga ang pakigsaad nga inyong gihimo atol sa bunyag nakaimpluwensya sa inyong kinabuhi?
Scripture Mastery—2 Nephi 31:19–20
Ipakigbahin ang mosunod nga pamahayag ni Elder Richard G. Scott sa Korum sa Napulog Duha ka mga Apostoles:
“Talagsaong gahum moabut gikan sa pagmemorya og mga kasulatan. Ang pagmemorya og kasulatan mao ang paghulma og bag-ong pakighigala. Sama sa pagdiskobre og bag-ong tawo nga makatabang panahon sa panginahanglan, makahatag og inspirasyon ug kahupayan, ug mahimong tinubdan sa kadasig sa gikinahanglan nga kausaban” (“Ang Gahum sa Kasulatan,” Ensign or Liahona, Nob. 2011, 6).
Diha sa usa ka poster (o usa ka piraso nga papel), isulat ang Namemorya nako ang 2 Nephi 31:19–20. Ibutang ang poster sa dapit nga makita kini sa mga estudyante. Hagita ang mga estudyante sa pagmemorya niini nga tudling nga sila ra o uban sa ilang mga pamilya. Dapita sila sa pagpirma sa poster sa umaabut nga mga adlaw kon mamemorya na nila ang tudling. Kon magtrabaho sila uban sa ilang mga pamilya aron mamemorya kini, mahimo usab nilang isulat ang mga ngalan sa mga sakop sa ilang pamilya diha sa poster. Hinumdumi ang pagpahiangay niini nga hagit ngadto sa mga kapabilidad ug mga kahimtang sa mga indibidwal aron magmalampuson ang matag estudyante.
Ipakigbahin ang imong pagpamatuod bahin sa bili sa pagmemorya sa mga kasulatan, sama sa 2 Nephi 31:19–20, nga naglangkob og mga pulong sa paglaum.
Pahinumdom: Tungod sa matang ug gitas-on sa leksyon karon, mahimo nimong gamiton kini nga kalihokan sa laing adlaw, kon kamo dunay sobra nga oras.
Komentaryo ug Background nga Impormasyon
2 Nephi 31:2, 21. “Ang doktrina ni Kristo”
Mipasabut si Elder Jeffrey R. Holland sa Korum sa Napulog Duha ka mga Apostoles:
“Ang ‘doktrina ni Kristo’ sigun sa gitudlo ni Nephi diha sa iyang tiningub nga pakigpulong nag-focus sa hugot nga pagtuo diha ni Ginoong Jesukristo, paghinulsol, bunyag pinaagi sa pagpaunlod, pagdawat sa gasa sa Espiritu Santo, ug paglahutay hangtud sa katapusan. Wala kini mosulay, diha niini nga pamahayag, sa pag-apil sa tibuok plano sa kaluwasan, tanang mga hiyas sa Kristohanong kinabuhi, o sa mga ganti nga naghulat kanato sa nagkalahing mga ang-ang sa langitnong himaya. Wala kini maglakip, diha niini nga pamahayag, sa mga katungdanan sa priesthood, sa mga ordinansa sa templo, o daghan pang tinuod nga mga doktrina. Kining tanan importante, apan sigun sa gigamit diha sa Basahon ni Mormon, ‘ang doktrina ni Kristo’ yano ug direkta. Nag-focus lang gayud kini sa unang mga baruganan sa ebanghelyo, lakip sa pagpahayag sa pag-awhag nga molahutay, magmakanunayon, magpadayon. Sa pagkatinuod, diha kini sa pagkaklaro ug pagkayano sa ‘doktrina ni Kristo’ nga makita ang epekto niini. Nahibalo si Nephi nga mao kini ang mahitabo. Misulat siya, ‘Ako mamulong nganha kaninyo sa yano nga paagi, sumala sa kayano sa akong pagpanagna’ [2 Nephi 31:2]” (Christ and the New Covenant: The Messianic Message of the Book of Mormon [1997], 49–50).
2 Nephi 31:13. “Sa walay pagpakaaron-ingnon”
Namulong si Elder Joseph B. Wirthlin sa Korum sa Napulog Duha ka mga Apostoles bahin sa walay pagpakaaron-ingnon:
“Kita ba, sa pagkatinuod, aktwal nga nagsunod sa ebanghelyo, o kita igo lang nagpakita sa panagway sa pagkamatarung aron kadtong anaa sa atong palibut maghunahuna nga matinud-anon kita nga, sa tinuod lang, ang atong kasingkasing ug wala makita nga mga lihok dili matinuoron ngadto sa mga pagtulun-an sa Ginoo?
“Igo lang ba kitang nagpakita sa ‘hulagway sa pagkadiosnon’ samtang nanghimakak sa ‘gahum niana’? [Joseph Smith—Kasaysayan 1:19.]
“Tinuod ba gayud kita nga matarung, o nagpakaaron-ingnon lang kita nga nagtuman kon naghunahuna kita nga nagtan-aw ang uban?
“Giklaro sa Ginoo nga dili Siya mabinuangan pinaagi sa unsay mga makita, ug mipasidaan Siya kanato nga dili magpakaaron-ingnon ngadto Kaniya o sa uban. Gipasidan-an kita Niya nga magbantay niadtong nagpakaaron-ingnon lang sa atubangan, kinsa nagpakita og hayag nga pagtakuban nga nagtago og mas dulom nga kamatuoran” (“True to the Truth,” Ensign, Mayo 1997, 15–16).
Nagtambag sa mga miyembro nga molihok uban sa tinuod nga tinguha ug dili kay basta lang nga naglihok, miingon si Elder Jeffrey R. Holland sa Korum sa Napulog Duha ka mga Apostoles:
“Sa pagsunod niining importanteng pagtulun-an, ang masanagon nga pakigdugtong ngadto ni Kristo mobukas nga maangkon nato sa daghang pamaagi: ang pag-ampo ug pagpuasa ug pamalandong sa Iyang mga katuyoan, mosulay sa mga kasulatan, pagpangalagad sa uban, ‘pagtabang sa maluyahon, [pag]pataas sa mga kamot sa nawad-an og paglaum, … [pag]lig-on sa mga tuhod nga nagkahuyang.’ [D&P 81:5.] Labaw niining tanan, paghigugma nga may ‘tiunay nga gugma ni Kristo,’ kana nga gasa ‘molahutay sa kahangturan,’ nga kana nga gasa ‘mainantuson sa tanan nga mga butang, malaumon sa tanan nga mga butang, molaum sa tanan nga mga butang, [ug] molahutay sa tanan nga mga butang.’ [Tan-awa sa Moroni 7:45–47.] Sa dili madugay, niana nga matang sa gugma, kita makaamgo nga sa atong mga kinabuhi daghang mga pamaagi paingon ngadto sa Ginoo ug sa kada higayon nga kita mopaduol, bisan maluyahon, ngadto Kaniya, atong mamatngunan nga Siya mahingawaon nga naninguha sa pagpaduol kanato. …
“Ang akong tinguha karon alang kanatong tanan … aron adunay tinuoray nga personal nga kasinatian sa ehemplo sa Manluluwas. Usahay mangita kita sa langit sa dili mao nga paagi [dili direkta], pinaagi sa mga nanghitabo o kasaysayan o sa kasinatian sa uban. Kana mga bililhon apan dili ingon kabililhon sama sa personal nga kasinatian, sa tinuod nga pagkadisipulo, ug ang kalig-on nga gikan sa kaugalingong kasinatian sa gahum sa Iyang pagtandog” (“Mga Butang nga Guba Mahimong Ayohon,” Ensign o Liahona, Mayo 2006, 70).
2 Nephi 31:13, 17–18. “Dawata ang Espiritu Santo”
Nagtudlo si Elder David A. Bednar:
“Ang ordinansa sa pagkumpirma sa usa ka bag-ong miyembro sa Simbahan ug ang pagtugyan sa gasa sa Espiritu Santo pareho nga yano ug lawom. Ang takus nga mga naghupot sa Melchizedek Priesthood mopandong sa ilang mga kamot sa ulo sa indibidwal ug tawagon siya sa iyang ngalan. Dayon, sa katungod sa balaang priesthood ug sa ngalan sa Manluluwas, ang indibidwal kumpirmahan nga sakop sa Ang Simbahan ni Jesukristo sa mga Santos sa Ulahing mga Adlaw, ug kining importante nga hugpong sa pulong ang litukon: ‘Dawata ang Espiritu Santo.’
“Ang pagkayano niini nga ordinansa maoy hinungdan nga mataligam-an ang kahulugan niini. Kining upat ka mga pulong—‘Dawata ang Espiritu Santo’— dili usa ka lumalabay lamang nga pahayag; hinoon, naglangkob kini og usa ka mando sa priesthood—usa ka awtorisado nga awhag sa paglihok nga dili pagaaghaton (tan-awa sa 2 Nephi 2:26). Ang Espiritu Santo wala himoa nga kanunayng maglihok sa atong kinabuhi tungod lamang kay gipandungan na kita sa mga kamot sa atong ulo ug gipamulong na kadtong importanting mga pulong. Sa atong pagdawat niini nga ordinansa, ang matag usa kanato midawat og usa ka sagrado ug padayong responsibilidad sa pagtinguha, sa pagpangita, sa pagtrabaho, ug sa pagkinabuhi nga kita sa pagkatinuod ‘nakadawat sa Espiritu Santo’ ug sa espirituhanong mga gasa nga anaa. …
“Ang pag-ampo, pagtuon, pagpundok, pagsimba, pagserbisyo, ug pagtuman dili bulag ug dili independente nga mga butang diha sa listahanan sa ebanghelyo. sa mga butang nga buhatunon. Apan hinoon, ang matag usa niining matarung nga mga buluhaton mao ang importante nga elemento sa hilabihan ka kurbadahon nga espirituhanong pagpangita aron pagtuman sa sugo sa pagdawat sa Espiritu Santo. Ang mga sugo sa Dios nga atong gituman ug ang dinasig nga mga tambag gikan sa mga lider sa Simbahan nga atong gisunod sa kasagaran nagtumong alang sa pag-angkon og pakig-uban sa Espiritu. Labaw sa tanan, ang tanang pagtulun-an sa ebanghelyo ug mga kalihokan gitumong alang sa umaabut natong pagdawat sa Espiritu Santo sa atong kinabuhi” (“Dawata ang Espiritu Santo,” Ensign o Liahona, Nob. 2010, 95, 97).
Ang mosunod nga pamahayag naglista sa pipila ka mga panalangin nga atong madawat kon takus kita sa pakig-uban sa Espiritu Santo:
“Makahimo [ang Espiritu Santo] sa paggiya kanimo sa imong mga desisyon ug makapanalipod kanimo gikan sa pisikal ug espirituhanong kakuyaw. …
“Siya mao ang Maghuhupay (Juan 14:26). … Ang mga inspirasyon sa Espiritu makapakalma sa imong mga kahadlok, makapahilum sa makapahasol nga mga kabalaka sa imong kinabuhi, ug mohupay kanimo kon ikaw nagbangutan. Ang Espiritu Santo makapuno kanimo ‘uban sa paglaum ug hingpit nga gugma’ ug ‘motudlo kanimo sa malinawon nga mga butang sa gingharian’ (Moroni 8:26; D&P 36:2). …
“Ang hingpit nga pagtagamtam sa gasa sa Espiritu Santo naglakip sa pagdawat og pinadayag ug kahupayan, pagserbisyo ug pagpanalangin sa uban pinaagi sa espirituhanong mga gasa, ug ginahinloan gikan sa sala ug gihimong angayan alang sa kahimayaan didto sa celestial nga gingharian” (Matinud-anon sa Tinuhoan: Usa ka Pakisayran sa Ebanghelyo [2004], 32–33).
2 Nephi 31:15–16. “Molahutay hangtud sa katapusan”
Ang mga pulong nga “molahutay hangtud sa katapusan” kanunayng gigamit sa pagsugyot sa panginahanglan nga mapailubong mag-antus sa mga kalisdanan sa tibuok natong kinabuhi. Gipasabut ni Elder Joseph B. Wirthlin nga ang paglahutay hangtud sa katapusan nagpasabut usab sa pagpadayon diha sa pagkamatinud-anon kang Kristo:
“Ang paglahutay hangtud sa katapusan mao ang doktrina sa pagpadayon diha sa agianan paingon sa kinabuhing dayon human nga ang usa ka tawo misulod ngadto sa agianan pinaagi sa pagtuo, paghinulsol, bunyag ug pagdawat sa Espiritu Santo. Ang paglahutay hangtud sa katapusan nanginahanglan sa atong tibuok kasingkasing, o, sama sa gitudlo sa propeta sa Basahon ni Mormon nga si Amaleki, kinahanglan kitang ‘moduol ngadto kaniya, ug mohalad sa [atong] tibuok nga mga kalag ingon nga usa ka paghalad ngadto kaniya, ug pagpadayon diha sa pagpuasa ug pag-ampo, ug paglahutay hangtud sa katapusan; ug ingon nga ang Ginoo buhi [kita] maluwas.’ [Omni 1:26.]
“Ang paglahutay hangtud sa katapusan nagpasabut nga maayo natong pagkatisok ang atong mga kinabuhi diha sa mga doktrina sa ebanghelyo, nagtuman sa gidawat nga mga doktrina sa Simbahan, mapainubsanong nagserbisyo sa atong isigkatawo, nagpuyo og mga kinabuhi nga sama kang Kristo, ug nagtuman sa atong mga pakigsaad. Kadtong molahutay balansyado, mapadayunon, mapainubsanon, kanunayng naglambo, ug walay pagkamalimbungon. Ang ilang pagpamatuod wala gibase sa kalibutanon nga mga rason—gibase kini sa kamatuoran, kahibalo, kasinatian, ug sa Espiritu” (“Magpadayon,” Ensign o Liahona, Nob. 2004, 101).
2 Nephi 31–33. Ang Espiritu Santo
Ang katapusang mga pagtulun-an ni Nephi diha sa Basahon ni Mormon naglakip sa daghang kamatuoran bahin sa Espiritu Santo. Sama pananglit:
-
Ang Espiritu Santo makapahimo kaninyo sa pagpamulong sa “pinulongan sa mga anghel” (tan-awa sa 2 Nephi 31:13).
-
Ang kapasayloan sa sala moabut pinaagi sa gahum sa Espiritu Santo (tan-awa sa 2 Nephi 31:17).
-
Ang Espiritu Santo mosaksi sa Amahan ug sa Anak (tan-awa sa 2 Nephi 31:18).
-
Ang Espiritu Santo mopakita nganha kaninyo sa tanang mga butang nga kinahanglan ninyong buhaton (tan-awa sa 2 Nephi 32:5).
-
Ang Espiritu Santo magtudlo sa mga tawo sa pag-ampo (tan-awa sa 2 Nephi 32:8).
-
Kon ang usa ka tawo mamulong pinaagi sa gahum sa Espiritu Santo, ang Espiritu Santo modala sa mensahe ngadto sa kasingkasing sa uban (tan-awa sa 2 Nephi 33:1).