Librarya
Leksyon 3: Ang Plano sa Kaluwasan

Leksyon 3

Ang Plano sa Kaluwasan

Pasiuna

Si Presidente Boyd K. Packer sa Korum sa Napulog Duha ka mga Apostoles misugo sa mga seminary teacher sa pagpresentar og mubo nga overview sa plano sa kaluwasan sa sinugdanan sa matag school year:

“Ang usa ka overview sa ‘plano sa kalipay’ … kon hisgutan kini sa pagsugod pa lang ug balikan sa panagsa, dako kaayo og bili ngadto sa imong mga estudyante. …

“Ang mga batan-on matingala ‘ngano?’—Ngano nga kita gisugo sa pagbuhat sa pipila ka mga butang, ug ngano nga kita gisugo sa dili pagbuhat sa ubang mga butang? Ang kahibalo sa plano sa kalipay, bisan anaa sa outline nga porma, makapahunahuna sa batan-ong mga hunahuna og ‘ngano’ …

“… Makahatag og mahinungdanon nga pagbati alang sa tibuok plano, bisan sa pipila lamang ka mga detalye. … Pahibaloa sila mahitungod sa unsa kini, ug dayon makasabut sila kon ‘ngano.’ …

“… Kon naningkamot ka sa paghatag kanila og ‘ngano,’ sunda [kini] nga sumbanan: ‘Ang Dios mihatag kanila og mga kasugoan, human gipahibalo kanila ang plano sa katubsanan.’ [Alma 12:32; italics gidugang.]” (“The Great Plan of Happiness” [CES Symposium on the Doctrine and Covenants/Church History, Ago. 10, 1993], 2–3, si.lds.org).

Agig tubag sa tambag ni Presidente Packer, kini nga leksyon naghatag og mubo nga overview sa plano sa kaluwasan sama sa pagkatudlo niini diha sa mga kasulatan. Kini nga leksyon nagtutok sa Pag-ula ni Jesukristo, diin mao ang “pinakamahinungdanon nga kamatuoran, ang labing mahinungdanon nga pundasyon, ug ang punoan nga doktrina sa talagsaon ug mahangturon nga plano sa kaluwasan” (Jeffrey R. Holland, “Missionary Work and the Atonement,” Ensign, Mar. 2001, 8). Samtang molambo ang pagsabut sa mga estudyante sa plano sa kaluwasan, molambo ang ilang pagtuo sa Langitnong Amahan ug kang Jesukristo. Modako ang ilang determinasyon sa paghupot sa mga kasugoan, sa pagdawat sa mga ordinansa sa kaluwasan, ug sa pagkamatinud-anon sa ilang mga pakigsaad.

Mga Sugyot alang sa Pagtudlo

Ang plano sa kaluwasan diha sa Basahon ni Mormon

Ipasabut nga sa premortal nga kalibutan sa espiritu, nakat-on kita mahitungod sa plano sa Langitnong Amahan alang sa atong kaluwasan (tan-awa sa Moises 4:1–2; Abraham 3:22–28). Pinaagi niini nga plano, posible kitang mahimong sama Kaniya ug makapuyo sa Iyang presensya sa kahangturan.

Diha sa pisara, isulat ang Ang plano sa kaluwasan naglakip sa …

Hangyoa ang mga estudyante sa pagkompleto niini nga sentence diha sa ilang mga scripture study journal o mga class notebook.

Human ang mga estudyante nahatagan og panahon sa pagsulat, ipakigbahin ang mosunod nga depinisyon sa plano sa kaluwasan. Mahimo nimo kining isulat diha sa pisara o sa usa ka poster sa dili pa magsugod ang klase.

Ang plano sa kaluwasan mao “ang kahingpitan sa ebanghelyo ni Jesukristo, gihimo aron sa pagpahinabo sa pagka-imortal sa tawo ug sa kinabuhi nga dayon. Kini naglakip sa Paglalang, Pagkapukan, ug Pag-ula, uban sa tanan nga mga balaod, mga ordinansa, ug mga doktrina, nga gihatag sa Dios. Kini nga laraw, naghimo niini nga mahimo nga sayon alang sa tanan nga mga katawhan nga pagahimayaon ug magpuyo sa kahangturan uban sa Dios” (Giya ngadto sa mga Kasulatan, “Laraw sa Katubsanan,” scriptures.lds.org).

Hangyoa ang mga estudyante sa pag-isa sa ilang mga kamot kon ang mga pulong nga ilang gisulat mitugma niini nga depinisyon sa bisan unsang paagi. Dayon ipangutana ang mosunod ngadto sa mga estudyante nga miisa sa ilang mga kamot:

  • Unsay komon sa inyong depinisyon niini nga depinisyon? Nganong gilakip man ni ninyo nga ideya sa inyong depinisyon?

I-assign ang mga estudyante sa pagpares sa pagtrabaho. Hangyoa ang usa ka estudyante sa matag pares sa pagbasa sa Alma 22:12–14 ug ang lain nga estudyante sa pagbasa sa 2 Nephi 2:25–28. (Mahimo nimong isulat kini nga mga pakisayran diha sa pisara.) Hangyoa ang mga estudyante nga mangita alang sa mga bahin sa plano sa kaluwasan nga gihisgutan sa mga tudling nga gi-assign kanila. Human ang mga estudyante nahatagan og panahon sa pagbasa, hangyoa ang mga pares nga magpuli-puli sa pagpakigbahin kon unsay ilang nahibaloan.

Isulat diha sa pisara ang mosunod nga mga pakisayran sa kasulatan: 2 Nephi 9:6; 2 Nephi 11:5; Alma 12:25; Alma 24:14; Alma 42:8; Alma 42:15. (Mahimo nimo kining isulat diha sa pisara sa dili pa magsugod ang klase.)

Ipasabut nga diha sa Basahon ni Mormon, ang mga propeta naggamit og lain-laing mga ulohan nga nagpasabut sa plano sa Langitnong Amahan. Dapita ang mga estudyante sa pagpakli ngadto sa 2 Nephi 9:6, ug hangyoa ang usa ka estudyante sa pagbasa og kusog sa bersikulo.

  • Niini nga bersikulo, unsa nga mga pulong ang nagpasabut nga plano sa Dios? (“Ang maloloy-on nga laraw sa makagagahum nga Tiglalang.” Isulat kini diha sa pisara tupad sa 2 Nephi 9:6.)

Hangyoa ang mga estudyante nga basahon sa hilum nga paagi ang ubang mga tudling sa kasulatan nga nakalista diha sa pisara, nga mangita sa mga pulong nga nagpasabut sa plano sa Langitnong Amahan. Kon ang usa ka estudyante makakita og usa ka hugpong sa mga pulong nga nagpasabut sa plano sa Langitnong Amahan, dapita siya sa pagsulat niini diha sa pisara tupad sa pakisayran sa kasulatan kon diin kini nakit-an. Ang hitsura sa nakompleto nga lista diha sa pisara kinahanglang susama niini:

(Aron matabangan ang mga estudyante nga madugangan ang ilang pagdayeg sa mga pagtulun-an diha sa Basahon ni Mormon, mahimo nimong ipasabut nga ang mga pulong sama sa “plano sa kaluwasan,” “plano sa kalipay,” ug “plano sa katubsanan” gihisgutan sa pipila ka higayon diha sa Basahon ni Mormon apan wala diha sa Biblia.)

  • Unsay gihatagan og gibug-aton niini nga mga ulohan mahitungod sa plano sa Langitnong Amahan? (Siguroa nga ang mga estudyante makasabut nga ang plano sa Langitnong Amahan gidisenyo nga mohatag sa Iyang mga anak og mahangturon nga kaluwasan ug kalipay.)

Ipamatuod nga dili kita makabalik sa presensya sa Dios ug makadawat og mahangturon nga kaluwasan kon walay balaang tabang. Dapita ang mga estudyante nga basahon ang Mosiah 3:17 sa tagsa-tagsa, nga mangita sa pinakamahinungdanon nga bahin sa plano sa kaluwasan. Human sila moreport sa unsay ilang nakit-an, ipabasa og kusog sa usa ka estudyante ang 2 Nephi 2:8. Ipasabut gayud nga si Jesukristo mao ang pinakamahinungdanon nga bahin sa plano sa kaluwasan, ug ang Iyang Pag-ula mao ang makapalihok sa plano alang sa tanang mga anak sa Dios. Hangyoa ang usa ka estudyante sa pagbasa sa mosunod nga pamahayag ni Propeta Joseph Smith:

Imahe
Propeta Joseph Smith

“Ang sukaranan nga mga baruganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug sa ubang mga butang nga may kalabutan sa atong relihiyon sumpay lamang niini” (Mga Pagtulun-an sa mga Presidente sa Simbahan: Joseph Smith [2007], 58).

Mahimo nimong ipasabut nga ang pulong sumpay nagpasabut nga usa ka butang o konsepto nga konektado sa usa ka mas importanting butang, sama sa usa ka sanga nga kabahin sa usa ka kahoy. Ang usa ka kahoy mabuhi bisan walay sanga, apan ang usa ka sanga dili mabuhi kon nabulag kini sa mga ugat ug punoan sa usa ka kahoy. Si Presidente Boyd K. Packer sa Korum sa Napulog Duha ka mga Apostoles mitudlo nga ang doktrina sa Pag-ula ni Jesukristo maoy “pinaka-ugat sa Kristiyano nga doktrina. Mahimo kamong nakahibalo og daghan mahitungod sa ebanghelyo sa dihang kini mokatap gikan niini, apan kon kamo nakahibalo lamang sa mga sanga ug kadtong mga sanga wala makadawat og nutrisyon gikan sa gamot, kon kini giputol gikan niana nga kamatuoran, walay mahimong kinabuhi ni kahulugan ni katubsanan diha niini. (“The Mediator,” Ensign, Mayo 1977, 56).

Ipasabut nga ang plano sa Langitnong Amahan kasagaran gitawag nga plano sa kaluwasan tungod kay naglakip kini sa pagluwas kanato. Isip mao ang mihimo sa kaluwasan nga posible pinaagi sa Pag-ula, si Jesukristo gitawag nga Manluluwas.

Diha sa pisara, isulat ang Kinahanglan kitang maluwas gikan sa …

Hangyoa ang usa ka estudyante sa pagbasa og kusog sa 2 Nephi 9:6–10, ug hangyoa ang lain nga estudyante sa pagbasa og kusog sa 3 Nephi 9:21–22. Dapita ang ubang mga estudyante sa pagsunod, nga mangita og mga pamaagi sa pagkompleto sa pamahayag diha sa pisara. Mahimo nimong isugyot nga markahan nila ang ilang mga nakit-an diha sa ilang mga kasulatan.

Hangyoa ang mga estudyante sa pagpakigbahin sa unsay ilang nakit-an, ug isulat ang ilang mga tubag diha sa pisara. Siguroa nga makasabut sila nga pinaagi sa Pag-ula ni Jesukristo, ang tanang katawhan maluwas gikan sa pisikal nga kamatayon. Klaroha usab nga pinaagi sa Pag-ula, maluwas kita gikan sa atong mga sala, kon wala kini imposible alang kanato nga makapuyo sa presensya sa Dios.

Basaha ang mosunod nga mga pulong gikan ni Propeta Jacob: “O pagkawalay katapusan sa kaayo sa atong Dios” (2 Nephi 9:10). “O unsa kamahinungdanon sa laraw sa atong Dios!” (2 Nephi 9:13).

  • Sa unsang paagi ang mga pulong ni Jacob diha sa 2 Nephi 9:6–10 makatabang ninyo nga makasabut nganong mohimo siya niini nga mga pamahayag?

  • Sumala sa 2 Nephi 9:7, 9, unsa kahay mahitabo kon walay Pag-ula? (Ang atong mga lawas mangamatay ug dili na gayud mobangon pag-usab, ug ang atong mga espiritu mahimong ubos sa yawa.)

Tan-awa sa katapusan nga han-ay sa mga pulong diha sa depinisyon sa plano sa kaluwasan nga imong gipakigbahin sa sayo nga bahin diha sa leksyon: “Kini nga laraw, naghimo niini nga sayon alang sa tanan nga mga katawhan nga pagahimayaon ug magpuyo sa kahangturan uban sa Dios.”

  • Nganong importante mang masabtan nga ang plano naghimo sa atong kahimayaan nga posible apan dili sigurado? (Samtang motubag ang mga estudyante niini nga pangutana, siguroa nga makasabut sila nga aduna kitay kagawasan, ang abilidad nga mopili ug molihok alang sa atong kaugalingon. Usa ka bahin sa atong kahimayaan nag-agad sa unsang paagi kita motubag sa mga panalangin nga gitanyag sa Dios kanato.)

Isulat sa pisara ang mosunod nga mga pakisayran sa mga kasulatan: 2 Nephi 2:25–28; 2 Nephi 31:17–20; Alma 34:15–16. Hangyoa ang mga estudyante sa pagtuon niini nga mga tudling sa hilum nga paagi ug sa paglista diha sa ilang mga scripture study journal sa mga butang nga gisulti niini nga mga kasulatan unsay kinahanglan natong buhaton aron madawat ang tanang gitanyag sa Dios kanato pinaagi sa Iyang plano sa kaluwasan.

Kon nahatagan na ang mga estudyante og igong panahon sa pagkompleto niini nga assignment, dapita sila sa pagpakigbahin sa ilang mga tubag ngadto sa usag usa. Samtang nagbuhat sila sa ingon, paghatag og mga ehemplo sa pagkamasulundon ngadto sa “mga balaod, mga ordinansa, ug mga doktrina” nga gihisgutan sa depinisyon nga imong gipakigbahin ganina. (Ang mga ehemplo gikan niini nga mga bersikulo naglakip sa pagpakita og hugot nga pagtuo ngadto sa paghinulsol, pagpabunyag, ug pagdawat sa Espiritu Santo.) Human makareport ang mga estudyante, ikonsiderar ang pagpangutana sa mosunod nga mga pangutana:

  • Sa unsang paagi ang atong mga lihok maka-impluwensya sa atong kasarang nga modawat sa mga panalangin sa Pag-ula? (Samtang motubag ang mga estudyante, pangita og mga higayon sa pagpamatuod nga samtang mopili kita sa pagpakabuhi sa ebanghelyo ni Jesukristo og mosunod sa plano sa Dios, nag-andam kita nga modawat sa kinabuhing dayon pinaagi sa Pag-ula sa Manluluwas.)

  • Sa unsang paagi ang pagsabut sa plano sa kaluwasan makatabang kanato nga mohupot sa mga kasugoan?

Hangyoa ang usa ka estudyante sa pagbasa og kusog sa 2 Nephi 2:25.

  • Sa unsang mga pamaagi ang pagsunod sa plano sa kaluwasan mihatag kanimo og kalipay?

Sa pagtapos sa leksyon, ipasabut nga samtang ang mga estudyante magtuon sa Basahon ni Mormon, makakat-on sila og daghan pang mga doktrina nga kalabut sa plano sa kaluwasan; kini nga leksyon mipresentar lamang og mubo nga overview. Samtang nagtuon ang mga estudyante, awhaga sila nga mangita alang sa tanang nabuhat sa Dios alang kanila isip kabahin sa Iyang plano sa kaluwasan ug mangita sa tanang kinahanglan nilang buhaton aron makadawat sa hingpit nga mga panalangin nga gi-plano sa Dios alang kanila. Ihatag ang imong pagpamatuod sa mga kamatuoran nga nahisgutan niini nga leksyon.

Iprinta