Leksyon 17
1 Nephi 16
Pasiuna
Human masakiti ang ilang mga kasingkasing sa mga pulong ni Nephi, sila si Laman ug Lemuel nagpaubos sa ilang mga kaugalingon sa atubangan sa Ginoo. Ang pamilya mipadayon sa ilang panaw ngadto sa kamingawan, ug ang Ginoo mipanalangin kanila sa Liahona, pinaagi niini Siya migiya kanila sa ilang panaw. Samtang sila nagpanaw, nakasinati sila og mga kalisud, lakip na sa pagkaguba sa pana ni Nephi, nga mao ang ilang labing gisaligan sa pagkuha og pagkaon. Kadaghanan sa pamilya—bisan si Lehi—nagsugod sa pagbagulbol batok sa Ginoo. Gipanton ni Nephi ang iyang mga igsoon nga lalaki tungod sa pagbagulbol, mibuhat og bag-ong pana, ug nangayo og tambag sa iyang amahan kon asa siya mangayam.
Mga Sugyot alang sa Pagtudlo
1 Nephi 16:1−6
Tubag ni Nephi sa pagbagulbol sa iyang mga igsoong lalaki
Hangyoa ang mga estudyante sa paghunahuna mahitungod sa usa ka panahon sa dihang sila gibadlong sa pagbuhat og butang nga sayop ug giunsa nila kini pagtubag. Dayon hangyoa ang usa ka estudyante sa pagbasa og kusog sa 1 Nephi 16:1. Sa dili pa siya mobasa, dapita ang klase sa pagpaminaw sa tubag nila ni Laman ug Lemuel sa mga pagtulun-an ni Nephi. Pahinumdumi ang mga estudyante nga si Nephi mitudlo nga ang dautan lainon gikan sa matarung ug isalikway gikan sa presensya sa Dios (tan-awa sa 1 Nephi 15:33–36).
Dapita ang mga estudyante sa pagbasa sa hilum sa 1 Nephi 16:2. Mahimo nimong isugyot nga markahan nila ang mga pulong nga gigamit ni Nephi sa paghulagway kon unsa ang reaksyon sa ubang mga tawo sa pagkadungog sa kamatuoran nga wala nila sunda.
-
Unsa sa inyong hunahuna ang gipasabut sa “ang mga nakasala naghunahuna nga ang kamatuoran malisud”? Unsa sa inyong hunahuna ang gipasabut sa mga pulong “kini mopasakit kanila sa ilang kasingkasing”?
-
Unsa ang pipila ka mga paagi nga kita makatubag kon ang kamatuoran lisud dawaton?
Dapita ang mga estudyante sa pagbasa sa hilum sa 1 Nephi 16:3–4. Mahimo nimong isugyot nga ilang markahan ang mga pulong kon ug busa sa bersikulo 3. Awhaga sila sa pagpangita sa tambag ni Nephi nga iyang gihatag sa iyang mga igsoong lalaki kabahin sa unsa nga paagi sila motubag sa “malisud nga mga butang” nga iyang gisulti. Dapita ang usa ka estudyante sa pagpasabut sa iyang kaugalingong mga pulong unsa ang gitudlo ni Nephi sa iyang mga igsoong lalaki.
-
Sumala sa 1 Nephi 16:5, giunsa pagtubag sa mga igsoong lalaki ni Nephi ang iyang panudlo?
-
Unsa ang gisugyot sa 1 Nephi 16:5 kon unsaon nato pagtubag kon ang kamatuoran “mopasakit [nato] sa kasingkasing”?
1 Nephi 16:7−33
Ang Ginoo migiya sa pamilya ni Lehi pinaagi sa Liahona
Dapita ang usa ka estudyante sa pagbasa og kusog sa 1 Nephi 16:9–10. Ipakita ang litrato sa Ang Liahona (62041; Libro sa mga Hulagway sa Ebanghelyo [2009], nu. 68). Itudlo ang representasyon sa artist sa Liahona.
-
Sa unsa nga mga pamaagi sa inyong hunahuna nga ang maong gasa nakatabang ngadto ni Lehi ug sa iyang pamilya sa ilang mga kahimtang?
Dapita ang pipila ka mga estudyante nga magpuli-puli sa pagbasa og kusog sa 1 Nephi 16:16–19.
-
Sa unsa nga paagi nga ang Liahona nakahatag og kaayohan sa pamilya ni Lehi?
-
Human madawat sa pamilya ni Lehi ang Liahona, nahimo bang sayon o lisud ang ilang panaw? Unsa ang giasoy ni Nephi sa 1 Nephi 16:17–19 sa pagsuporta sa inyong tubag?
-
Ngano sa inyong hunahuna nga ang matarung nga mga tawo sama nila ni Lehi ug Nephi, usahay kinahanglang moatubang og mga pagsulay? (Mahimo nimong ipasabut nga daghang mga pagsulay nga atong giatubang dili kinahanglang sangputanan sa sayop nga mga pagpili. Hinoon, kini mga kahigayunan sa pagkat-on ug pagtubo isip kabahin sa atong mortal nga panaw.)
Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).
Dapita ang katunga sa klase sa pagsiksik sa hilum nga paagi sa 1 Nephi 16:20–22 mangita kon unsa ang reaksyon sa ubang pamilya ni Lehi sa pagsulay tungod sa naguba nga pana ni Nephi. Dapita ang laing katunga sa klase sa pagsiksik sa 1 Nephi 16:23–25, 30–32, mangita sa tubag ni Nephi niini nga pagsulay ug sa unsa nga paagi nga ang iyang tubag nakaapekto sa iyang pamilya. Human makareport ang matag grupo sa unsay ilang nadiskobrehan, ipangutana:
-
Unsay atong makat-unan pinaagi sa pagtandi niining duha ka mga tubag ngadto sa samang pagsulay?
-
Ngano nga importante nga si Nephi miduol sa iyang amahan alang sa direksyon, bisan og si Lehi nagbagulbol? Unsa nga mga baruganan ang atong makat-unan gikan niini nga magamit sa atong mga kinabuhi? (Mahimo nimong ipasabut nga pinaagi sa pagduol ngadto ni Lehi alang sa direksyon, si Nephi nagpakita og pagtahud kaniya ug nagtabang sa pagpahinumdom kaniya sa pagbalik ngadto sa Ginoo. Ang pagpangayo og tambag gikan sa mga ginikanan ug sa mga lider sa priesthood, bisan pa sa ilang pagkadili hingpit, mao ang paagi sa pagtahud kanila ug paggamit og hugot nga pagtuo diha sa Ginoo.)
-
Unsa nga dugang nga mga baruganan ang atong makat-unan gikan sa tubag ni Nephi ngadto sa kalisdanan sa iyang pamilya? (Samtang ang mga estudyante mopakigbahin sa ilang mga ideya, siguroha ang pagpasabut og maayo nga kon buhaton nato ang tanan kutob sa atong mahimo ug mangayo sa direksyon sa Ginoo, nan Siya motabang nato sa atong mga kalisud.)
Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).
Hangyoa ang usa ka estudyante sa pagbasa og kusog sa 1 Nephi 16:26–29. Dapita ang klase sa pagpangita sa mga detalye kon giunsa sa Ginoo paggamit ang Liahona sa paggiya sa pamilya ni Lehi. Sa pagtabang sa mga estudyante nga makasabut ug magamit unsay gitudlo niini nga mga bersikulo mahitungod sa pagdawat sa giya sa Ginoo, ipangutana ang mosunod nga mga pangutana:
-
Unsa ang kalainan tali sa kaswal nga pagsunod sa direksyon sa Ginoo ug sa pagsunod sa direksyon sa Ginoo uban ang hugot nga pagtuo ug kakugi?
Dapita ang mga estudyante sa pagbasa sa hilum sa 1 Nephi 16:29, Alma 37:6–7, ug Alma 37:38–41, nga mangita sa baruganan nga gitudlo sa tanang tulo ka mga tudling.
-
Unsa nga baruganan ang gitudlo niining tulo ka mga tudling? (Siguroha nga ang mga estudyante nakasabut nga pinaagi sa gagmay nga mga paagi, ang Ginoo makapahinabo sa mahinungdanon nga mga butang. Mahimo nimong isulat sa pisara kini nga baruganan.)
-
Sumala niining mga bersikulo, unsa ang “gagmay nga mga paagi” ang gihatag sa Ginoo aron kahatagan kita og giya?
Isulat ang mosunod nga mga pangutana diha sa pisara, moklaro nga ang matag pangutana dunay nawala nga usa ka pulong o mga pulong. (Mahimo nimong buhaton kini sa dili pa ang klase.)
-
Unsa ang duha o tulo ka mga paagi nga … kini sama sa Liahona?
-
Unsa ang pipila ka mga butang nga maoy mahimong hinungdan nga dili nato makit-an ang importante nga mga mensahe gikan sa … ?
-
Kanus-a kamo gipanalanginan pinaagi sa pagsunod sa giya sa … ?
Bahina ang klase ngadto sa tulo ka mga grupo, uban sa usa ka lider sa matag grupo. Hatagi ang matag lider og kopya sa mosunod nga mga assignment, diin ang ilang grupo magtuon sa “gagmay nga mga paagi” nga gigamit sa Ginoo sa paggiya nato. (Kon dako ang imong klase, mahimo nimong bahinon ang mga estudyante ngadto sa labaw sa tulo ka mga grupo aron makunhuran ang gidak-on sa grupo. Kon imong buhaton, kinahanglan nimong hatagan ang usa o daghang grupo sa samang assignment.)
Grupo 1: Patriyarkal nga Panalangin
Basaha sa grupo ang mosunod nga pamahayag ni Presidente Thomas S. Monson:
“Ang sama nga Ginoo kinsa nag-andam og Liahona para kang Lehi nag-andam para ninyo ug nako karon og talagsaon ug bililhon nga gasa nga naghatag og direksyon sa atong kinabuhi, nagmarka sa mga peligro sa atong kaluwasan, ug nagplano sa mga paagi, gani luwas nga agianan—dili ngadto sa usa ka yuta nga saad, apan ngadto sa atong langitnong panimalay. Ang gasa nga akong gipasabut mao ang inyong patriyarkal nga panalangin. …
“… Ang inyong panalangin dili ayohon sa pagpilo ug dayon tagoan. Kini dili ikwadro o imantala. Hinoon, kini angay nga basahon. Kini angay nga higugmaon. Kini angay nga sundon. Ang inyong patriyarkal nga panalangin makatabang kaninyo sa inyong labing lisud nga pagsulay. Kini makagiya kaninyo sa mga kakuyaw sa kinabuhi. … Ang inyong patriyarkal nga panalangin mao ang inyong personal nga Liahona aron maplano ang inyong padulngan ug moggiya sa inyong agianan” (“Your Patriarchal Blessing: A Liahona of Light,” Ensign, Nob. 1986, 65–66).
Ipahiangay sa pisara ang mga pangutana aron kini mahitungod sa patriyarkal nga mga panalangin. Isip grupo, hisguti kini nga mga pangutana. Pagtudlo og usa ka tawo sa inyong grupo nga maoy mopakigbahin sa nahibilin sa klase unsa ang nakat-unan sa inyong grupo. Pagdapit usab og usa ka tawo sa inyong grupo nga mopakigbahin sa iyang kasinatian sa ika-3 nga pangutana.
Grupo 2: Ang mga Kasulatan ug ang mga Pulong sa mga Propeta sa Ulahing mga Adlaw
Basaha ngadto sa grupo ang mosunod nga pamahayag ni Elder W. Rolfe Kerr sa Seventy:
“Ang mga pulong ni Kristo mahimong usa ka personal nga Liahona alang sa matag usa kanato, nagpakita nato sa agianan. Dili kita magtinapulan tungod sa kasayon sa agianan. Himoon nato diha sa hugot nga pagtuo ang mga pulong ni Kristo sa sulod sa atong mga hunahuna ug sa atong mga kasingkasing sama sa gitala sa sagradong kasulatan ug ingon nga gipamulong sa buhing mga propeta, mga manalagna, ug mga tigpadayag. Atong batonan ang hugot nga pagtuo ug kakugi sa pagbusog sa mga pulong ni Kristo, kay ang mga pulong ni Kristo ang mahimo natong espirituhanon nga Liahona nga nagsulti kanato sa tanang mga butang nga kinahanglang atong buhaton” (“Ang mga Pulong ni Kristo—Atong Espirituhanong Liahona,” Ensign o Liahona, Mayo 2004, 37).
Ipahiangay sa pisara ang mga pangutana aron kini mahitungod sa mga kasulatan ug sa mga pulong sa mga propeta sa ulahing mga adlaw. Isip grupo, hisguti kadto nga mga pangutana. Pagtudlo og usa ka tawo sa inyong grupo nga maoy mopakigbahin sa nahibilin sa klase unsay nakat-unan sa inyong grupo. Pagdapit usab og usa ka tawo sa inyong grupo nga mopakigbahin sa iyang kasinatian sa ika-3 nga pangutana.
Ikatulong Grupo: Ang Espiritu Santo
Basaha diha sa grupo ang mosunod nga pamahayag ni Elder David A. Bednar sa Korum sa Napulog Duha ka mga Apostoles:
“Samtang kita maningkamot sa pagpahiangay sa atong mga kinaiya ug mga lihok diha sa pagkamatarung, nan ang Espiritu Santo mamahimong para kanato karon sa unsa ang Liahona kaniadto alang kang Lehi ug sa iyang pamilya sa ilang panahon. Ang mismong mga hinungdan nga nakapalihok sa Liahona para kang Lehi moimbitar usab sa Espiritu Santo sa atong kinabuhi. Ug ang mismong mga hinungdan nga nakapahunong sa pagdagan sa Liahona kaniadto makapahilayo usab kanato sa Espiritu Santo karon” (“Nga Kita Unta sa Kanunay Makabaton sa Iyang Espiritu uban Kanato,” Ensign o Liahona, Mayo 2006, 30).
Ipahiangay sa pisara ang mga pangutana aron kini mahitungod sa Espiritu Santo. Isip grupo, hisguti kadto nga mga pangutana. Pagtudlo og usa ka tawo sa inyong grupo nga maoy mopakigbahin sa nahibilin sa klase unsay nakat-unan sa inyong grupo. Pagdapit usab og usa ka tawo sa inyong grupo nga mopakigbahin sa iyang kasinatian sa ika-3 nga pangutana.
Pahibalo ngadto sa magtutudlo: Human sa mga unom ngadto sa walo ka minuto, hangyoa ang matag grupo sa pagtudlo sa klase unsay ilang nakat-unan gikan sa ilang panaghisgutanay. Mahimo usab nga imong dapiton ang mga estudyante sa pagsulat diha sa ilang mga scripture study journal o mga class notebook mahitungod sa usa ka panahon sa dihang ang Ginoo migiya kanila pinaagi sa gagmay nga mga paagi. Ikonsiderar ang pagsulti sa usa ka panahon sa dihang imong nadawat ang giya gikan sa Ginoo pinaagi sa gagmay nga mga paagi.
Komentaryo ug Background nga Impormasyon
1 Nephi 16:10. Usa ka personal nga Liahona
Si Presidente Spencer W. Kimball mipahisama sa atong konsensya ngadto sa Liahona:
“Kinahanglang makahibalo kamo nga kamo dunay sama sa kompas, sama sa Liahona, sa inyong sistema. Ang matag anak gihatagan niini. Kon siya mag-edad na og otso anyos, siya nasayud sa maayo gikan sa dautan, kon ang iyang mga ginikanan nagtudlo niya og maayo. Kon iyang ibaliwala ang Liahona nga anaa kaniya tungod sa iyang kaugalingon, sa katapusan dili na kini mohunghong kaniya. Apan kon kita mahinumdom nga kitang tanan aduna sa butang nga mogiya kaniya sa sakto, ang atong barko dili mahisalaag ug ang pag-antus dili mahitabo ug ang mga dulong sa barko dili mabali ug ang mga pamilya dili magpaninggit og pagkaon—kon kita maminaw sa mga pagdiktar sa atong kaugalingong Liahona, nga gitawag nato nga tanlag” (“Our Own Liahona,” Ensign, Nob. 1976, 79).