1 Nephi 15–19 (Unit 4)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa 1 Nephi 15–19 (Unit 4) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa mga estudyante.

Day 1 (1 Nephi 15)

Si Nephi ug ang iyang mga igsoong lalaki lahi-lahi og tubag sa mga panagna ni Lehi. Pinaagi sa pagtuon sa mga aksyon ni Nephi, nadiskobrehan sa mga estudyante nga kon kita mangutana sa Ginoo pinaagi sa hugot nga pagtuo ug sa pagsunod sa Iyang mga sugo, maandam kita sa pagdawat og pagpadayag ug giya gikan Kaniya. Gipasabut ni Nephi ang kahulugan sa gunitanan nga puthaw, nagpakita nga ang pagtuon ug pagsunod sa pulong sa Dios kada adlaw makapalig-on nato batok sa mga pagtintal ni Satanas.

Day 2 (1 Nephi 16)

Sa reaksyon nila ni Laman ug Lemuel ngadto sa mga pagtulun-an ni Nephi, ang mga estudyante nakakita nga “ang mga nakasala naghunahuna nga ang kamatuoran malisud” (1 Nephi 16:2). Sa dihang nabali ni Nephi ang iyang pana, gipakita niya nga kon buhaton nato ang tanan nga atong mahimo ug tinguhaon ang direksyon sa Ginoo, ang Ginoo motabang nato sa atong mga kalisud. Pinaagi sa pagtuon kon sa unsa nga paagi nga ang Liahona migiya sa pamilya ni Lehi, ang mga estudyante nakat-on nga “pinaagi sa gagmay nga mga paagi ang Ginoo makapahinabo sa mahinungdanon nga mga butang.” (1 Nephi 16:29).

Day 3 (1 Nephi 17)

Si Nephi misaysay sa pagpuyo sa iyang pamilya didto sa kamingawan ug pag-abut sa yuta sa Bountiful. Sa dihang gimandoan siya nga magbuhat og barko, gipakita niya nga kon kita motuman sa mga sugo, nan ang Ginoo molig-on nato ug mohatag og mga paagi nato nga matuman ang Iyang gisugo kanato. Ang Ginoo mitawag sa mga igsoong lalaki ni Nephi nga maghinulsol sa daghang mga paagi. Ang mga estudyante nakat-on nga ang Espiritu Santo sa kasagaran mamulong sa hinay, hinagawhaw nga tingog nga mas atong mabati kay sa atong madungog. Gilista nila ang mga sitwasyon ug mga dapit nga makapugong nila sa pag-ila sa hinay, hinagawhaw nga tingog.

Day 4 (1 Nephi 18–19)

Ang ehemplo ni Nephi sa pagbuhat og barko nagpakita sa mga estudyante nga sa pagtuman sa unsay gisugo sa Ginoo, kinahanglan kita nga mangayo sa Iyang tabang ug mopakita sa atong kaugalingong paningkamot. Ang pagtuon sa panaw sa pamilya ni Lehi ngadto sa gisaad nga yuta nagtudlo nga ang sala mosangput ngadto sa pag-antus sa atong kaugalingon ug usahay sa uban. Ang ehemplo ni Nephi sa dihang siya gigukod sa iyang mga igsoong lalaki nagtudlo nga kita makatan-aw ngadto sa Dios ug magpabilin nga matinud-anon panahon sa atong mga pagsulay ug nga ang pag-ampo makatabang nato sa pagpangita og kalinaw panahon sa atong mga pagsulay.

Pasiuna

Niini nga semana ang mga estudyante nakatuon sa importante nga mga panghitabo nga nahitabo samtang ang pamilya ni Lehi mipanaw agi sa kamingawan ug tabok sa lawod ngadto sa gisaad nga yuta. Kini nga leksyon makatabang sa mga estudyante nga maribyu kadto nga mga panghitabo ug makahisgot ug makapamatuod sa mga baruganan nga ilang nakat-unan. Tabangi ang mga estudyante nga makaila sa unsang paagi nga si Nephi nagpabilin nga matinud-anon sa malisud nga mga sirkumstansya. Awhaga sila sa pagsunod sa iyang ehemplo sa pagkamasulundon ug pagsalig sa Ginoo atol sa malisud nga mga panahon.

Mga Sugyot alang sa Pagtudlo

1 Nephi 15–18

Gipakita ni Nephi ang pagkamasulundon ug pagsalig sa Ginoo taliwala sa mga pagsulay

Kon ang mosunod nga mga hulagway anaa, pangandam sa pagpakita niini:

Ang Liahona (62041; Libro sa mga Hulagway sa Ebanghelyo [2009], nu. 68)
Si Nephi Mibuntog sa Iyang Masinupakon nga Igsoong mga Lalaki (62044; Libro sa Hulagway sa ebanghelyo, nu. 70)
Lehi ug ang Iyang Katawhan Miabut sa Gisaad nga Yuta (62045; Libro sa mga Hulagway sa Ebanghelyo, nu. 71)

Sa pagtabang sa mga estudyante sa pagribyu ug pagsabut sa background sa unsay ilang natun-an niining semanaha, sa random nga paagi ipakita ang mga hulagway ug ipahan-ay sa mga estudyante sa chronological nga paagi. Dapita sila sa paghunahuna nga sila mga news editor ug kinahanglang mosulat og tulo ngadto sa unom ka pulong nga headline alang sa kada hulagway. Ipakita ang mga hulagway nga nagsunod-sunod, ug hangyoa ang klase sa paghatag og headline. Mahimo nimong basahon og kusog ang mga summary sa kapitulo alang sa 1 Nephi 15–18 sa paghatag kanila og pipila ka mga ideya.

Sa pag-andam sa mga estudyante sa paghisgot sa 1 Nephi 15, pasultiha sila og usa ka kalihokan nga ilang giapilan nga nagkinahanglan og paningkamot sa ilang bahin sa dili pa sila makatagamtam og kalipay sa mga resulta. Mahimong maglakip kini sa mga kalihokan sama sa schoolwork, pagpatukar og instrumento, o mga pang-atleta.

Isulat ang 1 Nephi 15:2–3, 7–11 sa pisara, ug hatagi og panahon ang mga estudyante sa pagbasa niini nga mga bersikulo. Pangutan-a sila ngano nga ang mga igsoong lalaki ni Nephi wala makadawat og samang pagsabut nga nadawat ni Nephi mahitungod sa mga pagpadayag ni Lehi.

Human maminaw sa ilang mga tubag, tabangi sila sa pag-ila nga ang pagdawat og inspirasyon ug direksyon gikan sa Ginoo nagkinahanglan una og matarung nga pagpuyo, paningkamot, ug hugot nga pagtuo sa atong bahin. Mahimo nimong hatagan og importansya kini nga baruganan pinaagi sa pagsulat niini sa pisara.

Hangyoa ang mga estudyante sa pagpamalandong ug pagtubag sa mosunod nga pangutana: Unsa nga mga kasinatian ang inyong nasinati nga nakatabang ninyo nga masayud nga kini nga baruganan tinuod?

Isulat ang pulong malahutayon (resilient) sa pisara. Pangutan-a ang mga estudyante unsay gipasabut sa malahutayon. Human sa ilang mga tubag, isulat sa pisara ang: lig-on ug dili maunsa sa mga sitwasyon sa kalisud o pagpamugos.

Sa pagtabang sa mga estudyante nga makasabut kon sa unsa nga paagi nga ang pulong malahutayon may kalabutan ngadto ni Nephi, i-assign ang usa sa mosunod nga mga kapitulo ngadto sa kada estudyante: 1 Nephi 16, 17, o 18. Kon ikaw dunay dako nga klase, makatabang siguro nga grupuhon ang mga estudyante ug patabangi nila ang usa ka kapitulo.

Isulat ang mosunod nga mga pangutana sa pisara. Awhaga ang mga estudyante sa paggamit sa ilang na-assign nga kapitulo ug sa materyal sa manwal sa estudyante sa pagtubag sa mga pangutana.

Unsa nga mga pagsulay ang giatubang ni Nephi sa kapitulo nga inyong giribyu?
Giunsa ni Nephi pagpakita og hugot nga pagtuo niana nga sirkumstansya? Unsa nga mga bersikulo o mga pulong ang nagpakita og ebidensya nga ang hugot nga pagtuo ni Nephi malahutayon?
Unsa nga mga baruganan sa ebanghelyo ang gipakita niini nga kapitulo? Unsa nga mga kasinatian ang inyong nasinati uban niini nga mga baruganan nga nakapadugang sa inyong pagpamatuod?

Hatagi og igong panahon ang mga estudyante sa pagkompleto niini nga buluhaton. Dayon hangyoa ang bisan usa ka estudyante nga na-assign sa kada kapitulo sa pagpakigbahin sa iyang mga tubag. (Kon ikaw dunay igong mga estudyante, mahimong lain-lain nga estudyante ang moreport sa kada pangutana alang sa kada kapitulo.)

Dapita ang usa ka estudyante sa pagbasa og kusog sa mosunod nga pamahayag ni Elder Russell M. Nelson sa Korum sa Napulog Duha ka mga Apostoles:

“Nganong nagkinahanglan man kita nianang malahutayon nga hugot nga pagtuo? Tungod kay ang malisud nga mga adlaw anaa sa unahan. Panagsa ra unya sa umaabut nga mahimong sayon o sikat ang mamahimong Santos sa Ulahing mga Adlaw. Matag usa kanato pagasulayan. … Kana nga paglutos mahimong mobitad kaninyo ngadto sa pagkahuyang o modasig kaninyo nga mas sulundon ug maisugon sa inyong inadlaw-adlaw nga kinabuhi.

“Giunsa ninyo sa pag-atubang ang mga pagsulay sa kinabuhi maoy kabahin sa pagpalambo sa inyong pagtuo. Ang kalig-on moabut kon kamo makahinumdom nga kamo adunay balaanon nga kinaiya, usa ka panulundon nga labing bililhon” (“Atubanga ang Umaabot uban sa Hugot nga Pagtuo,” Ensign o Liahona, Mayo 2011, 35–36).

Dapita ang mga estudyante sa pagpakigbahin og mga ideya mahitungod kon unsaon nila sa pag-atubang sa mga hagit sa kinabuhi ug personal nga mga pagsulay sama sa gibuhat ni Nephi.

1 Nephi 19

Si Nephi nagrekord og mga panagna mahitungod ni Jesukristo sa pag-agni nato sa paghinumdom Kaniya

Kon duna pay panahon, hangyoa ang mga estudyante sa pagribyu sa unsay ilang gisulat sa ilang mga scripture study journal alang sa day 4, assignment 5. Pangutan-a kon duna ba nila ang andam nga mopakigbahin sa unsay ilang gisulat mahitungod sa ilang gugma alang sa Manluluwas. Dayon ipakigbahin ang imong mga pagbati mahitungod sa Manluluwas.

Si Nephi nahigugma sa Manluluwas ug nahinumdom Kaniya sa iyang mga pagsulay. Ipamatuod nga samtang atong higugmaon ug hinumduman ang Manluluwas, Siya motabang ug mosuporta kanato sa atong mga pagsulay.

Sunod Unit (1 Nephi 20–2 Nephi 3)

Sa sunod nga unit, ang mga estudyante magtuon sa pipila sa katapusang mga pulong ni Lehi ngadto sa iyang pamilya sa wala pa siya namatay. Basahon usab nila ang usa ka panagna nga karaan kaayo, sa wala pa gani si Kristo, mahitungod ni Propeta Joseph Smith.