Alma 17

Pasiuna

Agi og pagpangandam sa pagsangyaw sa ebanghelyo ngadto sa mga Lamanite, ang anak nga mga lalaki ni Mosiah nagtinguha sa giya sa Ginoo pinaagi sa pagpuasa ug pag-ampo. Ang Ginoo mihupay kanila ug misaad nga sila mamahimong mga instrumento sa Iyang mga kamot “ngadto sa kaluwasan sa daghang mga kalag” (Alma 17:11). Sa sayong bahin misaad Siya kanila, pinaagi sa usa ka pagpadayag ngadto sa ilang amahan, nga Siya “moluwas [kanila] gikan sa mga kamot sa mga Lamanite” (Mosiah 28:7). Nalig-on pinaagi sa mga saad sa Ginoo ug nagsalig nga sila ugma damlag magkatagbo pag-usab, sila nagbulag sa pagpakigbahin sa ebanghelyo sa managlahing mga lugar. Si Ammon miadto sa yuta ni Ishmael, diin nangandam siya sa pagtudlo sa mga tawo pinaagi sa pagserbisyo sa ilang hari.

Mga Sugyot alang sa Pagtudlo

Alma 17:1–16

Ang anak nga mga lalaki ni Mosiah nagsiksik sa mga kasulatan, nag-ampo, ug nagpuasa aron sila masayud sa pulong sa Dios ug nagtudlo nga may gahum

Sa dili pa magklase, isulat ang mosunod nga dili kompleto nga pamahayag diha sa pisara: “Ang bugtong nga labing importanting butang nga inyong mahimo sa pagpangandam alang sa usa ka tawag aron sa pagserbisyo [og misyon] mao ang …” (Mo-refer ka niini sa ulahing bahin sa imong leksyon.)

Pangutan-a ang mga estudyante kon anaa ba sila sa dihang ang mga paryente o mga higala miuli gikan sa mga misyon human sa matinud-anong pag-alagad. Dapita ang pipila ka mga estudyante sa paghulagway sa mga Kristohanong kinaiya niining mga misyonaryo sa dihang sila mibalik na.

Unsa nga positibong mga kausaban ang inyong nakita diha kanila human sa ilang mga misyon? Unsa sa inyong hunahuna ang hinungdan niining mga kausaban?

Ipasabut nga human sa pagsangyaw sa ebanghelyo sulod sa 14 ka tuig didto sa yuta sa Nephi, ang anak nga mga lalaki ni Mosiah namalik ngadto sa Zarahemla sa dihang nahiusa sila pag-usab uban ni Alma. Kon ang mga estudyante nagkinahanglan og usa ka mubo nga ribyu sa istorya ni Alma ug sa anak nga mga lalaki ni Mosiah, ipangutana:

Unsa ang relasyon tali ni Alma ug sa anak nga mga lalaki ni Mosiah? (Kon nagkinahanglan og tabang ang mga estudyante sa pagtubag sa pangutana, ikonsiderar ang paghangyo kanila sa pagbasa sa summary sa kapitulo alang sa Mosiah 27.)

Ipasabut nga samtang si Alma nagtudlo og paghinulsol ug nagtukod sa Simbahan taliwala sa mga Nephite didto sa yuta sa Zarahemla ug sa ubang kayutaan, ang anak nga mga lalaki ni Mosiah nanagsangyaw na sa ebanghelyo ngadto sa mga Lamanite didto sa yuta sa Nephi. (Mahimo ka nga mo-refer ngadto sa bookmark sa Basahon ni Mormon isip kabahin niining pagpasabut.) Ang mga pangalan sa anak nga mga lalaki ni Mosiah mao sila si Ammon, Aaron, Omner ug Himni (tan-awa sa Mosiah 27:34). Sa Alma 17–26 gisubli sa pag-istorya ang pipila sa ilang mga misyonaryo nga kasinatian.

Dapita ang usa ka estudyante sa pagbasa og kusog sa Alma 17:1–2.

Unsa ang gibati ni Alma sa dihang iyang nakita pag-usab ang iyang mga higala? Sa inyong hunahuna ngano kaha nga siya mibati og ingon niini?

Idirekta ang pagtagad sa mga estudyante ngadto sa wala makompleto nga pamahayag nga imong gisulat sa pisara sa wala pa magsugod ang klase. Dapita ang mga estudyante sa pagsugyot og mga paagi sa pagkompleto sa pamahayag. Dayon ipakigbahin kanila kon giunsa pagkompleto ni Elder David A. Bednar sa Korum sa Napulog Duha ka mga Apostoles ang pamahayag: “Ang bugtong nga labing importanting butang nga inyong mahimo sa pagpangandam alang sa usa ka tawag aron sa pagserbisyo [sa misyon] mao ang pagkahimong usa ka misyonaryo sa dili pa nga kamo moadto sa usa ka misyon” (“Pagkahimong usa ka Misyonaryo,” Ensign o Liahona, Nob. 2005, 45). Kompletuha ang pamahayag diha sa pisara.

Ipasabut nga usa ka paagi nga kita makahibalo kon unsaon sa pagkahimong usa ka misyonaryo mao ang pagkat-on mahitungod sa pagserbisyo sa matinud-anon nga mga misyonaryo diha sa mga kasulatan. Dapita ang klase sa pagbasa sa hilum sa Alma 17:2–4, nga mangita sa mga rason nga ang anak nga mga lalaki ni Mosiah nagmalampuson sa pagdala sa mga tawo ngadto sa kasayuran sa kamatuoran.

Unsa ang gibuhat sa anak nga mga lalaki ni Mosiah nga nakatabang nila nga mahimong malampuson nga mga misyonaryo? (Ang mga tubag mahimong maglakip nga sila “makugihong nagsiksik sa mga kasulatan,” nag-ampo, ug nagpuasa.)
Unsa nga mga panalangin ang ilang nadawat tungod sa ilang pagtuon, pagpuasa, ug pag-ampo? (Samtang motubag ang mga estudyante niining pangutana, tabangi sila sa pag-ila sa mosunod nga baruganan: Samtang magsiksik kita sa mga kasulatan, mag-ampo, ug magpuasa, makadawat kita sa Espiritu Santo ug magtudlo nga may gahum.)

Hangyoa ang mga estudyante sa pagbasa sa mosunod nga pamahayag ni Elder Bednar, nga magpasabut og maayo kon unsa ang atong mahimo aron mahimong mga misyonaryo:

Imahe

Elder David A. Bednar

“Mahimo ninyong palamboon ang inyong tinguha sa pag-alagad sa Dios (tan-awa sa D&P 4:3), ug mahimo ninyong sugdan sa paghunahuna ingon sa hunahuna sa mga misyonaryo, sa pagbasa unsa ang gibasa sa mga misyonaryo, sa pag-ampo sama sa inampoan sa mga misyonaryo, ug mobati sama sa bation sa mga misyonaryo. Makalikay kamo sa mga impluwensya nga kalibutanon nga maoy hinungdan sa pagbiya sa Espiritu Santo, ug makabaton kamo og pasalig sa pag-ila ug pagtubag sa espirituhanong mga pag-aghat. Lagda human sa usa ka lagda, diyutay dinhi ug diyutay didto, kamo sa hinay-hinay mahimong misyonaryo nga inyong gipangandoy ug ang misyonaryo nga gilauman sa Manluluwas. …

“Ang pagpangandam nga akong gihulagway wala lang magpasabut sa inyong misyonaryong pagserbisyo isip usa ka 19 o 20 o 21 anyos. … Nangandam kamo alang sa tibuok ninyong kinabuhi nga misyonaryo nga buhat. … Kita mga misyonaryo kanunay” (“Pagkahimong usa ka Misyonaryo,” 46).

Aron matabangan ang mga estudyante nga magamit ang mga baruganan nga gitudlo ni Elder Bednar ug sa Alma 17:2–4, hangyoa sila sa pagsulat diha sa ilang mga notebook o scripture study journal mahitungod sa unsay ilang buhaton aron mahimong mga misyonaryo sa dili pa tawagon sa pagserbisyo.

Dapita ang mga estudyante sa pagbasa sa hilum sa Alma 17:9, nga ilhon kon unsa ang giampo sa anak nga mga lalaki ni Mosiah ug sa ilang mga kaubanan. Human makareport ang mga estudyante sa unsay ilang nakit-an, hangyoa sila sa pagbasa sa Alma 17:10–12, nga mangita sa tubag sa Ginoo sa ilang mga pag-ampo.

Ngano kaha nga ang ilang mga kasingkasing “nagmaisug sa pag-adto” sa dihang nadawat nila ang tubag sa Ginoo sa ilang mga pag-ampo?
Ang Alma 17:11 naglangkob sa mga saad sa Ginoo nga Siya mohimo niining mga misyonaryo nga mga instrumento sa Iyang mga kamot. Unsa man ang kahulugan niini nganha kaninyo? Sa unsa nga mga paagi nga kita mahimong mga instrumento diha sa mga kamot sa Ginoo?
Ang Ginoo mitudlo niining mga misyonaryo nga “makapakita og maayo nga mga panig-ingnan” (Alma 17:11). Sa inyong hunahuna ngano kaha nga ang pagpakita og maayo nga ehemplo maoy usa ka importanting bahin sa ilang misyonaryo nga buhat? (Samtang mopakigbahin ang mga estudyante sa ilang mga tubag, tabangi sila sa pag-ila sa mosunod nga baruganan: Kon kita mopakita og maayo nga ehemplo, ang Ginoo mohimo kanato nga mga instrumento sa Iyang mga kamot. Mahimo nimong isulat kining kamatuoran diha sa pisara.)
Unsa ang mga butang nga makat-unan sa mga tawo mahitungod sa ebanghelyo samtang sila makakita sa atong maayong mga ehemplo?
Kanus-a nga higayon nga ang maayong mga ehemplo sa uban nakatabang kaninyo?

Ipamatuod ang kaimportante sa pagpakita og maayo nga ehemplo, ug awhaga ang mga estudyante nga mahimong maayong mga ehemplo niadtong mga nagpalibut kanila. Kon makahunahuna ka og piho nga mga panahon diin nakita nimo ang mga estudyante nga nagpakita og maayong mga ehemplo, mahimo nimong daygon ang mga estudyante sa unsay ilang nahimo. Hinoon, ayaw ipaambit ang kinatibuk-an o walay klaro nga mga pagdayeg, nga maingon og dili na sinsero.

Hangyoa ang mga estudyante sa pagbasa sa hilum sa Alma 17:13–16, nga maghunahuna mahitungod sa kalisud sa pagtudlo sa mga Lamanite niana nga panahon.

Nganong ang anak nga mga lalaki ni Mosiah andam sa pag-antus sa mga kasakit ug miadto sa mga Lamanite? (Tan-awa sa Alma 17:16; tan-awa usab sa Mosiah 28:1–3.)

Alma 17:17–39

Si Ammon nahimong usa ka sulugoon ngadto ni Haring Lamoni ug mipatunhay sa mga panon sa hari

I-summarize ang Alma 17:18–20 pinaagi sa pagpasabut nga sa wala pa ning mga misyonaryo nagkabulag sa pagsangyaw sa ebanghelyo sa nagkalain-laing dapit, si Ammon mitudlo kanila ug mipanalangin kanila. Dayon miadto siya sa yuta nga gitawag og Ishmael. Sa dihang misulod siya sa yuta, gidakop siya ug gidala sa hari. Hangyoa ang duha ka estudyante nga magpuli-puli sa pagbasa og kusog sa Alma 17:21–25.

Sa inyong hunahuna unsa kamahinungdanon ang pagsulti ni Ammon ngadto sa hari nga “Ako mahimo nga imong sulugoon”? (Alma 17:25).
Kanus-a nga higayon nga kamo nakakita og pagserbisyo nga misangput sa mga oportunidad sa pagpakigbahin sa ebanghelyo?

I-summarize sa daklit ang Alma 17:26–27 pinaagi sa pagpasabut nga samtang si Ammon nagbantay sa mga panon sa hari, usa ka grupo sa mga Lamanite ang mikatag sa mga panon.

Bahina ang klase ngadto sa mga grupo nga magtinagutlo. Isulat ang mosunod nga pakisayran sa kasulatan diha sa pisara: Alma 17:28–32; Alma 17:33–35; Alma 17:36–39. Hangyoa ang mga estudyante sa matag grupo sa pagbahin niining mga tudling sa ilang mga kaugalingon. Ipabasa sa mga estudyante sa hilum ang mga tudling nga gi-assign kanila, nga mangita sa mga tubag sa mosunod nga mga pangutana. (Mahimo nimong isulat ang mga pangutana diha sa pisara.)

Unsa ang nahitabo sa inyong porsyon sa istorya?
Sa unsa kaha nga paagi nga kini nakatabang kaninyo nga mag-andam sa mga tawo aron modawat sa ebanghelyo?
Unsa nga mga kinaiya ang gipakita ni Ammon?

Hatagi ang mga grupo og panahon sa paghisgot sa ilang mga tubag. Dayon pangutan-a:

Unsay atong makat-unan gikan niini nga istorya? (Ang mga estudyante mahimong mopakigbahin og lain-laing mga tubag. Sama pananglit, tingali moingon sila nga pinaagi sa pagserbisyo, makatabang kita sa uban nga maandam sa pagdawat sa ebanghelyo o nga kon kita anaa sa pagserbisyo sa Ginoo, makabaton kita og kaisug ug mahimong magmadasigon. Mahimo nimong awhagon ang mga estudyante sa pagsulat niini nga baruganan diha sa ilang mga kasulatan.)

Dapita ang mga estudyante sa pagsulat diha sa ilang mga scripture study journal mahitungod sa unsa ang ilang buhaton aron makapakita og maayo nga mga ehemplo sa pagpuyo diha sa ebanghelyo. Alang sa young women, kini nga tumong makatabang kanila nga makakompleto sa dugang nga bililhong kasinatian sa Personal nga Kauswagan ubos sa “Maayong mga Buhat.” Alang sa mga priest, kini nga tumong makatabang kanila nga makat-on ug motuman sa ilang mga katungdanan sumala sa nalista sa Katungdanan ngadto sa Dios nga booklet ubos sa “Mga Katungdanan sa Priesthood” ug “Dapita ang Tanan nga Moduol ngadto kang Kristo.”

Komentaryo ug Background nga Impormasyon

Alma 17. Ang full-time nga misyonaryo nga pagserbisyo sa young men ug young women

Si Presidente Thomas S. Monson mihatag sa mosunod nga tambag ngadto sa young men ug young women mahitungod sa responsibilidad sa pagserbisyo og sa usa ka full-time nga misyon:

“Ngadto sa batan-ong mga lalaki sa Aaronic Priesthood ug nganha kaninyo batan-ong mga lalaki nga mahimo nang mga elder: akong balikon ang dugay nang gitudlo sa mga propeta—nga ang matag takus, makahimo nga batan-ong lalaki kinahanglan nga mangandam sa pagserbisyo og misyon. Ang misyonaryo nga pagserbisyo usa ka katungdanan sa priesthood—usa ka obligasyon nga gipaabut sa Ginoo kanato kinsa gihatagan og hilabihan ka daghan. Batan-ong mga lalaki, gi-awhag ko kamo sa pagpangandam alang sa pagserbisyo isip misyonaryo. Ipabilin ang inyong kaugalingon nga limpyo ug putli ug takus nga morepresentar sa Ginoo. Imintinar ang inyong kahimsug ug kalig-on. Pagtuon sa mga kasulatan. Kon kini anaa, apil sa seminary o institute. Himoa nga kamo mapamilyar sa handbook sa misyonaryo nga Isangyaw ang Akong Ebanghelyo.

“Usa ka tambag alang kaninyo batan-ong mga sister: ingon nga kamo wala sa samang responsibilidad sa priesthood sama sa batan-ong mga lalaki sa pagserbisyo isip full-time nga mga misyonaryo, makahimo usab kamo og bililhong kontribusyon isip mga misyonaryo, ug among gihangup ang inyong pagserbisyo” (“Samtang Kita Nagkatigum Pag-usab,” Ensign o Liahona, Nob. 2010, 5–6).