Leksyon 87

Alma 27–29

Pasiuna

Sa dihang ang mga Lamanite wala milampus sa ilang pag-ataki sa mga Nephite, ilang gipamungot ang ilang kasuko ngadto sa mga Anti-Nephi-Lehi. Tungod sa pakigsaad nga gihimo sa mga Anti-Nephi-Lehi nga dili na gayud mousab sa pagpaagas og dugo sa uban, sila midumili sa paggunit sa ilang mga hinagiban aron sa pagpanalipod sa ilang mga kaugalingon. Si Ammon nangulo sa mga Anti-Nephi-Lehi ngadto sa Zarahemla, diin nakadawat sila og proteksyon gikan sa mga Nephite ug nahimong inila isip ang katawhan ni Ammon. Samtang ang mga Nephite nanalipod sa katawhan ni Ammon batok sa mga Lamanite, liboan ka mga Nephite ug Lamanite ang nangamatay sa gubat. Bisan pa sa kasub-anan nga nabati sa mga Nephite tungod sa kamatayon sa ilang mga minahal, daghan kanila ang nakakaplag og paglaum ug hingpit nga kalipay diha sa saad sa Ginoo nga ang mga matarung “pagabanhawon aron mopuyo diha sa tuo nga kamot sa Dios, sa usa ka kahimtang sa walay katapusan nga kalipay” (Alma 28:12)

Mga Sugyot alang sa Pagtudlo

Alma 27

Gipangulohan ni Ammon ang katawhan sa Anti-Nephi-Lehi ngadto sa luwas nga dapit diha sa mga Nephite

Hangyoa ang mga estudyante sa pag-isa sa ilang mga kamot kon sila adunay kaila nga mihimo og usa ka saad ngadto nila ug dayon miguba niana nga saad. Unya hangyoa ang mga estudyante sa pag-isa sa ilang mga kamot kon sila adunay kaila nga mihimo og usa ka saad ngadto nila ug dayon mituman niini.

• Unsa ang inyong bation sa tawo kinsa mituman sa ilang mga saad? Ngano man?

• Sa inyong hunahuna unsa kaha ang bation sa Ginoo mahitungod niadtong motuman sa ilang mga saad ngadto Kaniya?

Ipaila ang Alma 27 pinaagi sa pagpasabut nga human ang mga Lamanite wala milampos sa pagpaningkamot sa paglaglag sa mga Nephite, sila miataki sa mga Anti-Nephi-Lehi, ang mga Lamanite kinsa nakabig pinaagi sa pagserbisyo ni Ammon ug sa iyang mga igsoon nga mga lalaki. Hangyoa ang mga estudyante sa paghinumdom kon unsa ang gibuhat sa mga Anti-Nephi-Lehi aron sa pagpakita sa Ginoo nga sila motuman sa ilang mga pakigsaad nga dili na gayud “mogamit og mga hinagiban … alang sa pagpaagas sa dugo sa tawo” (Alma 24:18). (Sila milubong sa ilang mga hinagiban sa gubat.) Aron masusi kon unsa ka determinado ang mga Anti-Nephi-Lehi sa pagtuman sa ilang mga saad, dapita ang usa ka estudyante sa pagbasa og kusog sa Alma 27:2–3. (Mahimo usab nimong isugyot nga basahon sa mga estudyante ang Alma 24:18–19 ug isulat kining pakisayran diha sa margin tupad sa Alma 27:3.)

• Kon kamo usa sa mga Anti-Nephi-Lehi, unsa kaha kalisud alang kaninyo ang pagtuman sa inyong pakigsaad ug dili makiggubat aron pagpanalipod sa inyong kaugalingon ug sa inyong mga minahal?

Dapita ang mga estudyante sa pagbasa sa hilum sa Alma 27:4–10, nga mangita sa gitanyag ni Ammon nga buhaton aron mapanalipdan ang mga Anti-Nephi-Lehi ug matabangan sila sa pagtuman sa ilang mga pakigsaad. Hangyoa ang usa ka estudyante sa pag-summarize niining tudling.

Dapita ang usa ka estudyante sa pagbasa og kusog sa Alma 27:11–12, ug hangyoa ang klase sa pagpangita sa instruksyon nga nadawat ni Ammon gikan sa Ginoo. Ipasabut nga ang mga Anti-Nephi-Lehi misunod ni Ammon ngadto sa Zarahemla (tan-awa sa Alma 27:13–15). (Mahimo usab nimong i-summarize ang Alma 27:16–19, nga magpasabut nga ubos kadto niining mga sirkumstansya nga si Ammon ug ang ubang anak nga mga lalaki ni Mosiah nahiusa uban ni Alma, sumala sa naistorya sa Alma 17:1–4.)

Ipasabut nga ang labaw nga maghuhukom sa mga Nephite mihangyo sa katawhan kon sila motugot sa mga Anti-Nephi-Lehi nga mopuyo uban nila. Dapita ang mga estudyante sa pagbasa sa hilum sa Alma 27:22–24, nga mangita sa tubag sa mga Nephite ngadto sa pamahayag sa labaw nga maghuhukom.

• Giunsa pagsulti sa mga Nephite nga sila motabang sa mga Anti-Nephi-Lehi?

• Nganong ang mga Nephite andam manalipod sa ilang kanhi kaaway?

Hangyoa ang mga estudyante sa pagbasa sa hilum sa Alma 27:26 aron sa pagdiskubre unsa ang tawag sa mga Nephite sa mga Anti-Nephi-Lehi.

Hangyoa ang pipila ka estudyante nga magpuli-puli sa pagbasa og kusog sa Alma 27:27–30. Hangyoa ang klase sa pagsunod, nga mangita kon unsay nakapahimong inila sa katawhan ni Ammon. Dapita ang mga estudyante sa pagreport unsa ang ilang nakit-an.

• Unsay inyong ganahan mahitungod sa katawhan ni Ammon? Ngano man?

• Unsa ang gitudlo sa Alma 27:27–30 mahitungod sa relasyon tali sa pagkakinabig ngadto sa Ginoo ug sa pagtuman sa mga pakigsaad? (Ang mga estudyante mahimong mogamit og lain-laing mga pulong, apan kinahanglan ilang ipakita nga ilang nasabtan ang mosunod nga kamatuoran: Kon hingpit kitang nakabig ngadto sa Ginoo, maghupot kita sa mga pakigsaad nga atong gihimo uban Kaniya. Mahimo nimong isulat sa pisara kini nga baruganan.)

• Kinsa sa inyong kinabuhi ang nahimong ehemplo niining baruganan?

Alma 28

Ang mga Nephite milupig sa mga Lamanite sa dakong gubat

Ipasabut nga bisan tuod og daghang mga Nephite ang nagmatinud-anon, sila nag-atubang gihapon og lisud nga mga pagsulay.

Ipasabut nga si Presidente Thomas S. Monson mipakigbahin sa mosunod nga istorya sa iyang kasinatian sa batan-on pa siya. Pagkadungog nga ang iyang higala nga si Arthur Patton namatay sa Ikaduhang Gubat sa Kalibutan, ang batan-ong Thomas Monson mibisita sa inahan ni Arthur, kinsa dili miyembro sa Simbahan. Unya nahinumdom siya:

“Nawala ang kahayag sa kinabuhi ni Mrs. Patton. Nag-antus siya sa kasubo ug nawad-an og paglaum.

Uban sa pag-ampo sa akong kasingkasing, naglakaw ako sa sinati nga agianan padulong sa balay sa mga Patton, naghunahuna kon unsa nga pulong sa kahupayan ang mogawas gikan sa mga ngabil sa usa lang ka batan-on.

“Miabli ang pultahan, ug si Mrs. Patton migakos kanako sama sa iyang kaugalingong anak. Ang panimalay nahimong chapel samtang ang nagsubo nga inahan ug dili kaayo sangkap nga batan-on nangluhod aron mag-ampo.

“Nanindog gikan sa pag-ampo, si Mrs. Patton mitan-aw sa akong mga mata ug miingon: ‘Tommy, wala akoy simbahan, apan ikaw aduna. Sultihi ko, mabuhi ba pag-usab si Arthur?’” (“Mrs. Patton—ang Istorya Nagpadayon,” Ensign o Liahona, Nob. 2007, 22).

• Unsaon ninyo pagtubag sa pangutana ni Mrs. Patton?

Basaha ang tubag ni Presidente Monson:

“Sa akong pinakamaayong abilidad, ako mipamatuod ngadto kaniya nga si Arthur mabuhi pag-usab” (“Mrs. Patton—ang Istorya Nagpadayon,” 22).

• Sa unsang paagi nga ang plano sa kaluwasan makausab sa panglantaw niadtong mga minahal nga nangamatay na?

Hangyoa ang pipila ka estudyante nga magpuli-puli sa pagbasa og kusog sa Alma 28:1–3. Hangyoa ang klase sa pagpangita sa ganti sa mga Nephite bugti sa pagtabang sa katawhan ni Ammon sa pagtuman sa ilang mga pakigsaad. Dapita ang mga estudyante sa pagbasa sa hilum sa Alma 28:4–6, nga mangita kon sa unsang paagi nga ang dakong kamatay nakaapekto sa mga Nephite. Hangyoa ang mga estudyante sa pagsiksik sa Alma 28:11–12 alang sa mga rason nganong ang pipila ka tawo mahimong makasinati og kahadlok kon ang usa ka minahal mamatay, samtang ang uban mobati og paglaum.

• Ngano kaha nga ang pipila ka tawo masinati ang kahadlok kon ang minahal mamatay?

• Ngano kaha nga ang pipila ka tawo mobati og paglaum kon ang ilang mga minahal mamatay? (Mahimong mogamit ang mga estudyante og lain-laing mga pulong, apan kinahanglan sila nga mopahayag nga kon kita magbaton og hugot nga pagtuo ni Jesukristo ug sa mga saad sa Ginoo, makaangkon kita og paglaum ug hingpit nga kalipay sa panahon sa kamatayon.)

Isulat sa pisara ang mosunod nga dili kompleto nga sentence: Ug sa ingon kita nakasabut …

Pangutan-a ang mga estudyante kon unsaon nila pagkompleto ang hugpong sa mga pulong base sa ilang natun-an sa Alma 28.

Pagkahuman nga ang mga estudyante nakagahin og panahon sa pagtubag, dapita ang usa ka estudyante sa pagbasa sa Alma 28:13–14. Ipatandi sa mga estudyante ang ilang mga tubag ngadto sa mga baruganan nga gitudlo niining mga bersikulo. (Mahimo nimong isugyot nga markahan sa mga estudyante ang mga pulong “ug sa ingon kita nakasabut” sa matag higayon nga kini makita niining mga bersikulo. Ipasabut nga si Mormon kanunayng migamit niining mga pulong sa pagpaila sa importanting mga leksyon nga atong makat-unan gikan sa mga istorya diha sa Basahon ni Mormon.)

Tabangi ang mga estudyante sa pag-ila sa mga baruganan nga gitudlo diha sa mga kasulatan

Sa ubang kahimtang, ang mga baruganan sa ebanghelyo nga gitudlo diha sa mga kasulatan giunhan sa mga pulong nga “ug sa ingon kita nakasabut.” Sama pananglit, sa Alma 28:13–14, si Mormon naggamit sa “ug sa ingon kita nakasabut” aron makuha ang atong pagtagad ngadto sa mga baruganan nga atong makat-unan gikan sa mga kasinatian ni Ammon ug sa mga Anti-Nephi-Lehi. Tudloi ang mga estudyante nga samtang sila magtuon ug mamalandong sa mga kasulatan, sila mismo ang makakita sa mga baruganan pinaagi sa pagpangutana sa ilang mga kaugalingon, “Unsa ang gitudlo niining mga bersikulo kanako?”

• Unsa ang inyong nabasa sa Alma 27–28 nga mosuporta sa mga pamahayag ni Mormon nga “ug sa ingon kita nakasabut”?

• Kanus-a kamo nakakita og usa ka tawo nga nagsagubang sa iyang kaugalingong kamatayon o sa kamatayon sa usa ka minahal inubanan sa paglaum tungod sa hugot nga pagtuo ni Jesukristo?

• Unsaon ninyo pagpasabut sa pagkabanhaw sa pagtabang sa usa ka tawo aron makabaton og paglaum diha sa pagsagubang sa iyang kamatayon o sa kamatayon sa usa ka minahal?

Alma 29

Si Alma naghimaya sa pagdala og mga kalag ngadto sa Dios

Sultihi ang mga estudyante nga ang Alma 29 naglangkob sa mga pagpahayag ni Alma sa iyang tinguha nga mahimong usa ka instrumento sa mga kamot sa Ginoo. Dapita ang usa ka estudyante sa pagbasa og kusog sa Alma 29:1–3. Ipapangita sa klase kon unsa pa unta ang nahimo ni Alma kon natuman pa ang “pangandoy sa [iyang] kasingkasing.” (Siya unta “[mosinggit] og paghinulsol ngadto sa matag katawhan.”)

• Sumala sa Alma 29:2, nganong nagtinguha si Alma niini?

Ipabasa sa mga estudyante sa hilum ang Alma 29:4–5, nga mangita kon unsa ang gitugot sa Ginoo niadtong adunay matarung nga mga tinguha. (Kon ang mga estudyante nagkinahanglan og tabang sa pagtubag niining pangutana, mahimo nimong ipasabut ang mga pulong “Ako nasayud nga siya mohatag ngadto sa mga tawo sumala sa ilang gitinguha.” Ipasabut nga kon kita magtinguha og matarung nga mga butang, ang Ginoo mopanalangin kanato sumala niadtong mga tinguha. Ipasabut nga kon ang tanan natong tinguha nga matarung dili matuman niining kinabuhia, kini matuman didto sa mga kahangturan.)

Hangyoa ang mga estudyante sa pagsiksik og tagsa-tagsa ang Alma 29:10, 14, 16, nga mangita sa panalangin nga nadawat ni Alma samtang siya mitabang sa uban nga moduol ngadto kang Kristo. Hangyoa ang mga estudyante sa pagreport unsay ilang nakit-an.

• Unsa nga pulong ang gigamit ni Alma sa paghulagway kon unsa ang iyang gibati mahitungod sa pagtabang sa uban sa pagduol ngadto kang Kristo? (Mahimo nimong isugyot nga markahan sa mga estudyante sa matag gamit sa pulong nga hingpit nga kalipay niini nga mga bersikulo.)

• Unsa nga baruganan ang atong makat-unan gikan sa kasinatian ni Alma sa pagtabang sa uban nga maghinulsol ug moduol ngadto kang Jesukristo? (Ang mga estudyante mahimong mogamit og lain-laing mga pulong, apan kinahanglan silang mopakita nga ilang nasabtan ang mosunod nga baruganan: Makasinati kita og hingpit nga kalipay samtang motabang kita sa uban nga maghinulsol ug moduol ngadto kang Jesukristo.)

• Kanus-a ninyo nabati ang hingpit nga kalipay nga miabut gikan sa pagtabang sa uban nga moduol ngadto kang Kristo?

Awhaga ang mga estudyante sa pagpangita og oportunidad sa pagtabang sa uban sa pagduol ngadto ni Jesukristo. Ikonsiderar ang pagpakigbahin og usa ka malipayon nimo nga misyonaryong kasinatian.

Komentaryo ug Background nga Impormasyon

Alma 28:11–12. Pagkaplag og kalinaw kon ang kamatayon moabut

Si Elder Russell M. Nelson sa Korum sa Napulog Duha ka mga Apostoles namulong mahitungod kon unsaon nga ang atong mga buhat niini nga kinabuhi makahatag og kalinaw kon ang kamatayon moabut:

“Mga kaigsoonan, mabuhi kita aron mamatay ug mamatay kita aron mabuhi—sa laing gingharian. Kon andam kaayo kita, ang kamatayon dili magdala og kalisang. Gikan sa usa ka mahangturong panglantaw, ang kamatayon moabut nga sayo ra kaayo ngadto lamang niadtong dili andam sa pagsugat sa Dios.

“Karon mao ang panahon sa pagpangandam. Unya, kon moabut na ang kamatayon, makaadto kita sa celestial nga himaya nga giandam sa Langitnong Amahan alang sa Iyang matinud-anong mga anak. Samtang alang sa nagsubo … ang kahapdos sa kamatayon gihupay sa usa ka makanunayon nga pagtuo kang Kristo, usa ka hingpit nga kahayag sa paglaum, usa ka gugma sa Dios ug sa tanang katawhan, ug usa ka kinasingkasing nga tinguha sa pagserbisyo kanila” (“Karon Mao ang Panahon sa Pagpangandam,” Ensign o Liahona, Mayo 2005, 18).

Si Elder Wilford W. Andersen sa Seventy misaysay kon giunsa sa iyang mga higala sa pagsagubang sa kamatayon sa ilang amahan:

“Dili pa lang dugay usa ka minahal kong higala namatay tungod sa kanser. Siya ug ang iyang pamilya mga tawo nga adunay hilabihan ka hugot nga pagtuo. Makadasig kining tan-awon kon sa unsang paagi nga ang ilang hugot nga pagtuo miagak kanila nga makasugakod niining hilabihan ka lisud nga panahon. Sila napuno sa kalinaw sa hunahuna nga nakapatunhay ug nakapalig-on kanila. Uban sa ilang pagtugot gusto ko nga mobasa og sulat gikan sa usa ka miyembro sa pamilya nga gisulat pipila lamang ka adlaw sa wala pa ang iyang amahan mamatay:

“‘Ang katapusang pipila ka adlaw nahimong hilabihan ka lisud. … Kagabii samtang nagpundok kami tapad sa katre ni Papa, ang Espiritu sa Ginoo mabati ug tinuod nga nahimo gayud nga among maghuhupay. Kami nagmalinawon. … Kini mao ang labing lisud nga butang nga sukad nasinati ni bisan kinsa kanamo, apan among gibati ang kalinaw sa kahibalo nga … ang atong Amahan sa Langit misaad nga manag-uban kami pag-usab og puyo isip usa ka pamilya. Human ang doktor misulti ni Papa didto sa ospital nga wala nay lain pa nga mahimo, ang among amahan mitan-aw namong tanan uban sa hingpit nga hugot nga pagtuo ug maisugon nga nangutana, “Aduna bay bisan kinsa niining lawak nga may problema sa plano sa kaluwasan?” Kami … mapasalamaton alang sa amahan ug inahan kinsa mitudlo kanamo sa pagbaton og hingpit nga pagsalig sa plano’” (“Ang Sukaranan sa Atong Manunubos,” Ensign o Liahona, Mayo 2010, 17–18).

Dugang nga mga Ideya sa Pagtudlo

Alma 27:30. “Usa ka pinalabi nga mga katawhan sa Ginoo”

Isulat ang mosunod nga baruganan diha sa pisara: Kon kita nagmatinud-anon sa atong mga pakigsaad, kita mamahimong pinalabi sa Ginoo.

Dapita ang usa ka estudyante sa pagbasa og kusog sa Alma 27:30. Ipangutana sa klase:

• Unsa ang kahulugan niini nganha kaninyo nga mahimong “pinalabi nga katawhan sa Ginoo”?

• Ngano nga kining katawhan pinalabi sa Ginoo? (Tan-awa sa Alma 27:27.)

Alma 28:11–12. Nagbangutan sa kamatayon sa mga minahal nga matarung

Sa imong pagtudlo sa Alma 28:11–12, pagmabatyagon sa mga panginahanglan sa mga estudyante kinsa nagbangutan sa mga kamatayon sa mga minahal. Kon imong gibati nga makatabang sa mga estudyante, mahimo nimong basahon ngadto kanila ang Doktrina ug mga Pakigsaad 42:44–46 aron matabangan sila nga makasabut sa hingpit nga kalipay nga nasinati sa mga matarung nga mga tawo nga nangamatay.

Alma 29:4–5. Ang Dios mohatag sa atong mga tinguha, maayo man kini o madautan

Hangyoa ang mga estudyante sa paghimo og mubo nga lista sa mga butang nga ilang gitinguha og maayo. (Awhaga sila sa paglista sa espirituhanon nga mga tinguha ingon man ang temporal nga mga tinguha.)

• Kon kita magtinguha gayud og bisan unsang butang, sa unsang paagi nga ang atong tinguha makaimpluwensya sa atong mga lihok?

• Unsa ang inyong gibuhat karon aron matabangan kamo nga sa katapusan makab-ot ang inyong mga tinguha?

Dapita ang mga estudyante sa pagbasa sa Alma 29:4–5 ug itandi kining mga bersikulo ngadto sa mosunod nga mga pamahayag. (Mahimo nimong isulat kini nga mga pamahayag sa pisara sa dili pa magklase.)

“Ang mga tinguha ang momando sa atong mga prayoridad, ang mga prayoridad mohulma sa atong mga pagpili, ug ang mga pagpili motino sa atong mga binuhatan. Ang mga tinguha nga atong gihimo motino sa atong kausaban, sa atong kalampusan, ug kon unsa kita mamahimo” (Dallin H. Oaks, “Tinguha,” Ensign o Liahona, Mayo 2011, 42).

“Kon unsa ang atong gitinguha pag-ayo, paglabay sa panahon, maoy atong makab-ot sa katapusan ug maoy atong madawat didto sa kahangturan. … Pinaagi lamang sa pag-edukar ug pagbansay sa atong mga tinguha nga kini mahimo nga dapig kanato imbis kaaway!” (Neal A. Maxwell, “According to the Desire of [Our] Hearts,” Ensign, Nob. 1996, 21–22).

• Unsa kaha ang gipasabut sa pag-edukar ug pagbansay sa atong mga tinguha? Unsaon man nato sa paghimo niana?

Dapita ang mga estudyante sa pagkonsiderar kon ang ilang kinabuhi karon nagpakita ba sa unsa gayud ang ilang tinud-anay nga tinguha.

Alma 29:10, 13–16. Ang hingpit nga kalipay sa pagpakigbahin sa ebanghelyo

Aron matabangan ang mga estudyante nga mobati nga mas komportable sa pagtabang sa uban sa pagduol ngadto kang Jesukristo, bahina sila nga magpares-pares ug dapita sila sa pagpraktis sa pagpakigbahin sa ebanghelyo sa mosunod nga mga sitwasyon. (Ikonsiderar ang paghatag sa matag parisan og handout nga may lista niining mga sitwasyon.)

1. Imong namatngunan nga ang usa ka suod nga higala dili malipayon bag-ohay lang. Tudloi siya mahitungod sa Basahon ni Mormon. Tabangi siya nga makasabut nga ang pagbasa ug ang pagsunod sa mga pagtulun-an niini makahatag og kalipay.

2. Ang imong higala, kinsa usa ka miyembro sa Simbahan, naglisud sa pagsunod sa Pulong sa Kaalam. Ipakigbahin kaniya kon sa unsang paagi nga ang Pulong sa Kaalam nakatabang nimo nga mas maduol ngadto sa Ginoo.

3. Usa ka higala nangutana kanimo mahitungod sa imong gituohan nga relihiyon. Human nimong gipasabut ang imong pagtuo sa Langitnong Amahan ug ni Jesukristo, ang imong higala miingon, “Kanunay kong naghunahuna nga tingali dunay Dios, apan wala gayud ko makasiguro mahitungod niini sama nimo.” Tabangi ang imong higala nga makasabut kon unsaon niya sa pagkahibalo sa iyang kaugalingon mahitungod sa unsay imong gitudlo.