Leksyon 38: 2 Nephi 28

Leksyon 38

2 Nephi 28

Pasiuna

Nanagna si Nephi bahin sa uban nga mahagitong mga kahimtang sa ulahing mga adlaw, lakip na sa sayop nga mga pagtulun-an ug garbo sa daghang mga simbahan nga pagatukuron. Nagtudlo siya kon unsaon pag-ila ang sayop nga mga doktrina ug kalibutanong mga kinaiya, ug mipasidaan siya batok sa mga paagi nga si Satanas mosulay sa pagbalda kanato gikan sa pagkamatarung.

Mga Sugyot alang sa Pagtudlo

2 Nephi 28:1–19

Gihulagway ni Nephi ang sayop nga mga simbahan ug sayop nga mga ideya sa atong panahon

Diha sa pisara, pagdrowing og mga timaan sa pasidaan [warning signs] nga pamilyar sa inyong kultura. Pananglitan, mahimo kang magdrowing og usa ka traffic sign o simbolo nga magpasabut nga ang usa ka butang makadaut o makahilo.

Unsa ang katuyoan niining mga timaan?

Ipasabut nga ang Basahon ni Mormon makatabang kanato nga makakita sa mga timaan sa pasidaan sa makadaut sa espiritu nga mga impluwensya. Gipasabut ni Presidente Ezra Taft Benson nga usa sa mga katuyoan sa Basahon ni Mormon mao ang pagbutyag kon unsaon pagtrabaho sa kontra ug sa ubang mga kaaway ni Kristo sa ulahing mga adlaw. Dapita ang usa ka estudyante sa pagbasa sa mosunod nga pamahayag ni Presidente Benson:

“Ang Basahon ni Mormon nagbutyag sa mga kaaway ni Kristo. Mobatok kini sa sayop nga mga doktrina. … Molig-on kini sa mapainubsanon nga mga sumusunod ni Kristo batok sa dautang mga laraw, mga estratehiya, ug mga doktrina sa yawa sa atong panahon. Ang matang sa mga mibiya sa kamatuoran [apostates] diha sa Basahon ni Mormon susama sa matang nga anaa kanato karon” (“The Book of Mormon Is the Word of God,” Ensign, Ene. 1988, 3).

Giunsa pagbutyag sa Basahon ni Mormon ang mga kaaway ni Kristo? (Naglakip kini sa mga istorya bahin sa mga tawo nga misulay sa pagdala sa uban palayo gikan sa hugot nga pagtuo diha ni Jesukristo. Nagtugot kini kanato nga makita ang ilang mga sipyat ug sayop nga mga ideya.)
Giunsa kita paglig-on sa Basahon ni Mormon batok sa kaaway?

Ipamatuod nga ang Basahon ni Mormon nagbutyag sa sayop nga mga ideya sa yawa ug naglig-on kanato batok sa dautang mga laraw. Ipasabut nga makita sa mga estudyante ang ehemplo niini diha sa 2 Nephi 28. Kini nga kapitulo naglangkob sa usa sa mga panagna ni Nephi bahin sa ulahing mga adlaw. Dinhi niini nga panagna, mipasidaan si Nephi bahin sa sayop nga mga pagtulun-an nga maglabi sa atong panahon.

Dapita ang mga estudyante sa pagpangita og hilum sa 2 Nephi 28:3–9, nga mangita sa mga pasidaan ni Nephi bahin sa sayop nga mga pagtulun-an. Ipasabut nga ang 2 Nephi 28:7–9 usa ka scripture mastery passage. Mahimo nimong awhagon ang mga estudyante sa pagmarka niini nga tudling sa lahi nga paagi aron dali nila kining madumduman. Human nga ang mga estudyante dunay igong panahon sa pagtuon niini nga tudling, dapita ang pipila ka mga estudyante ngadto sa pisara. Hangyoa ang matag usa kanila sa pagsulat og usa ka sayop nga pagtulun-an o ideya gikan niini nga tudling, lakip na ang bersikulo kon asa kini makit-an. Dayon hangyoa ang ubang mga estudyante kon nakabantay ba sila sa ubang sayop nga mga pagtulun-an o mga ideya diha sa tudling. Kon nakabantay sila, dapita sila sa pagdugang ngadto sa lista diha sa pisara.

Aron matabangan ang mga estudyante sa paghisgot sa pipila niining sayop nga mga doktrina ug mga ideya, ipangutana ang mosunod:

Unsa ang ehemplo sa modernong panahon sa usa niining sayop nga mga ideya? (Siguroha nga ang klase dili mohingalan og piho nga mga simbahan kon motubag sila niini nga pangutana.)
Sa unsang paagi nga kining sayop nga ideya makapugong sa mga tawo sa pagsunod sa plano sa atong Langitnong Amahan?

Hangyoa ang usa ka estudyante sa pagbasa og kusog sa 2 Nephi 28:12–14. Dapita ang klase sa pagpangita sa pasidaan ni Nephi kon unsay mahitabo sa daghang mga simbahan ug mga tawo sa katapusang mga adlaw tungod sa garbo ug sayop nga mga doktrina.

Sa unsang mga paagi nga ang garbo ug sayop nga mga pagtulun-an makaimpluwensya sa mga tawo?
Nganong ang “mapainubsanon nga mga sumusunod ni Kristo” dili man mapahisalaag pinaagi sa garbo ug pagkadautan? Unsaon man nato sa paglikay nga malingla “sa mga lagda sa mga tawo”? (Mahimo nimong ipasabut nga ang mga pulong nga “mga lagda sa mga tawo” nagpasabut sa mga pagtulun-an sa mga tawo—nga sukwahi sa mga pagtulun-an sa Ginoo.)

Dapita ang mga estudyante sa pagbasa og hilum sa 2 Nephi 28:15–16, 19, nga mangita sa mga sangputanan sa sayop nga mga pagtulun-an.

Unsa nga mga pulong ang inyong makita diha niini nga mga bersikulo nga naghulagway sa mga resulta sa garbo ug sayop nga mga pagtulun-an?

2 Nephi 28:20–32

Nagpasidaan si Nephi kon sa unsang paagi nga si Satanas mosulay sa paglingla kanato

Ipakigbahin ang mosunod nga istorya ngadto sa mga estudyante.

Samtang didto sa usa ka assignment sa Africa, si Presidente Boyd K. Packer miadto aron makakita og mga hayop sa usa ka game reserve. Nakabantay siya nga ang mga hayop diha sa mabaw nga tubig nangahadlok. Sa dihang nangutana siya sa guide nganong wala manginom ang mga hayop, miingon ang guide nga tungod kini sa mga buaya. Nahinumdom si Presidente Packer:

“Basin nangomedya ra siya ug seryuso nako siyang gipangutana, ‘Unsa man diay problema?’ Mao gihapon ang tubag: ‘Mga buaya.’ …

“Nakabantay siya nga wala ko motuo niya ug gisiguro, sa akong pagtuo, aron matudloan ko og leksyon. Nangadto mi sa laing lokasyon diin ang sakyanan diha sa may pilapilan ibabaw sa lapukon nga lungag diin makatan-aw kami sa ubos. ‘Diha,’ miingon siya. ‘Tan-awa aron imong masuta.’

“Wala koy laing makita kondili ang lapok, gamayng tubig, ug nangahadlok nga mga hayop didto sa layo. Dayon sa kalit nakita ko kini!—dako kaayong buaya, nagluob sa lapok, naghulat og mga hayop nga giuhaw kaayo para moinom.

“Sa kalit lang mituo na ko! Sa dihang nakita niya nga andam na kong maminaw, mipadayon siya sa leksyon. ‘Dunay mga buaya sa tibuok nga parke,’ miingon siya, ‘dili lang sa mga suba. Wala mi tubig nga walay buaya nga duol niini, ug mas maayo gyud kon timan-an na nimo.’ …

“Sa laing biyahe didto sa Africa gihisgutan nako kini nga kasinatian ngadto sa usa ka game ranger sa lain nga parke. …

“Gipakita dayon ko niya sa usa ka dapit diin nahitabo ang usa ka trahedya. Usa ka batan-ong lalaki gikan sa England ang nagtrabaho sa usa ka hotel sa mubong panahon. Bisan pa man sa kanunay ug gibalik-balik nga mga pasidaan, milabang siya sa koral sa compound aron susihon ang usa ka butang tabok sa usa ka mabaw nga tubigan nga wala molapas sa iyang sapatos nga pang-tennis.

“‘Wala pa gani siya makalakang og kaduha,’ miingon ang ranger, ‘sa dihang giataki siya sa buaya, ug wala mi nabuhat aron luwason siya’” (“Spiritual Crocodiles,” Ensign, Mayo 1976, 30–31).

Unsa man ang hinungdan nga kining batan-on nabiktima sa buaya? Sa unsang paagi unta niya malikayan kini nga trahedya? (Pinaagi sa pagsunod sa mga pasidaan nga gihatag kaniya.)

Dapita ang usa ka estudyante sa pagbasa og kusog sa mosunod nga tambag gikan ni Presidente Packer:

“Ang nanag-una kaninyo niini nga kinabuhi makapasidaan bahin sa mga peligro nga mahimo ninyong masugatan bahin sa mga buaya. Dili lang ang dako, abuhon nga mga buaya nga makakunis-kunis kaninyo, apan ang espirituhanong mga buaya, nga labihan pa ka peligro, ug labaw ka malinglahon ug dili kaayo makita, gani, labaw pa kay sa maayong motakuban nga mga buaya sa Africa.

“Kining espirituhanong mga buaya makapatay o makaguba sa inyong mga kalag. Makawagtang kini sa kalinaw sa inyong hunahuna ug sa kalinaw sa hunahuna sa mga nahigugma kaninyo. Mao kini ang angayan nga ipasidaan, ug walay dapit dinhi sa mortalidad karon nga wala puy-i niini” (“Spiritual Crocodiles,” 31).

Sa unsang mga paagi nga ang mga buaya diha sa istorya ni Presidente Packer susama sa mga tintasyon ug mga taktika ni Satanas? Unsa nga mga pasidaan ang atong madawat nga makatabang kanato nga malikayan ang espirituhanong peligro?

Basaha og kusog ang 2 Nephi 28:19 samtang magsunod ang mga estudyante. Dayon isulat diha sa pisara ang Si Satanas nagtinguha sa paggapos kanato diha sa iyang gahum pinaagi sa …

Ipasabut nga samtang nagpadayon si Nephi sa iyang panagna, naghisgot siya bahin sa mga taktika nga gamiton ni Satanas batok kanato sa ulahing mga adlaw. Ipares-pares ang mga estudyante. Dapita ang matag pares sa pagbasa sa 2 Nephi 28:20–29, nga mangita sa mga paagi sa pagkompleto sa sentence diha sa pisara.

Human sa pipila ka minuto, dapita ang mga mag-partner sa pagreport kon giunsa nila sa pagkompleto ang pamahayag diha sa pisara. Isip kabahin niini nga panaghisgutan, siguroha nga nasabtan sa mga estudyante nga mogamit si Satanas og daghang mga taktika aron sa pagsulay sa pagbuntog kanato, sama sa pag-aghat kanato nga masuko, paghupay kanato ug pagpakatulog kanato, ug pag-ulog-ulog kanato.

Unsa ang pipila ka mga ehemplo nga si Satanas misulay sa “[pag-aghat sa mga tawo] ngadto sa kasuko batok niana nga maayo”? Sa unsang paagi nga ang kasuko mopalibog sa mga tawo bahin sa unsay maayo ug unsay dautan?
Sa inyong hunahuna nganong peligro man alang sa mga tawo nga “nagpakahamugaway sa Zion,” nga naghunahuna nga walay kalamboan nga gikinahanglan? Sa inyong hunahuna ngano kaha nga si Satanas makahimo man sa pagdala kanila “nga mabinantayon paingon sa impyerno”?
Unsa ang buot ipasabut sa pag-ulog-ulog sa uban? (Ang paghatag og dili sinsero nga pagdayeg ug mga pahalipay.) Sa inyong hunahuna ngano nga ang pag-ulog-ulog makapahilayo man gikan sa Ginoo?
Nganong mosulay man si Satanas sa pagkumbinsir sa mga tawo nga wala siya?
Unsa ang pipila ka mga butang nga atong mahimo aron makabantay batok sa kasuko? Unsaon nato sa pagbantay batok sa pagbati nga ang tanan maayo ra? Unsaon nato sa pagbantay batok sa pag-ulog-ulog?

Sa pagtapos sa leksyon, pahibaloa ang mga estudyante nga ang katapusan sa 2 Nephi 28 naglangkob og katapusang pasidaan ug usa ka kasiguroan gikan sa Ginoo. Dapita ang mga estudyante sa pagbasa og hilum sa 2 Nephi 28:30–32.

Ang Ginoo motahud sa atong kabubut-on ug sa atong mga paningkamot nga makakat-on bahin Kaniya. Sumala sa 2 Nephi 28:30, nagtudlo Siya kanato “pagtulun-an human sa usa ka pagtulun-an, lagda human sa usa ka lagda.” Unsa man ang ipasabut niana nganha kaninyo? Sumala niini nga bersikulo, unsa man ang mahitabo niadtong moingon, “Kami adunay igo na”?
Diha sa 2 Nephi 28:32, namulong ang Ginoo ngadto sa mga tawo nga milimud Kaniya. Dinhi niini nga bersikulo, sa inyong hunahuna unsa man ang Iyang gipasabut sa dihang miingon Siya nga, “Ako molugway sa akong bukton ngadto kanila adlaw-adlaw”? (Dinhi niini nga bersikulo, naghisgot ang Ginoo bahin sa Iyang kalooy ug sa Iyang kaandam nga motabang kanato matag adlaw samtang magtinguha kita sa pagsunod sa Iyang kabubut-on, bisan kon gisalikway nato Siya kaniadto. Tabangi ang mga estudyante nga makasabut nga ang Ginoo magmaloloy-on sa tanang katawhan nga maghinulsol ug moduol Kaniya.

Isulat sa pisara ang mosunod: Tungod sa akong nakat-unan karon, akong … Dapita ang mga estudyante sa paghuman niini nga sentence diha sa ilang mga scripture study journal o mga class notebook pinaagi sa paghulagway kon unsay ilang buhaton isip resulta sa pagtuon sa panagna ni Nephi diha sa 2 Nephi 28. Mahimo nimong dapiton ang pipila ka mga estudyante sa pagpakigbahin ngadto sa klase kon unsa ang ilang gisulat. Bisan pa man niana, siguroha nga ilang nasabtan nga dili sila kinahanglang mobati nga obligado nga mopakigbahin og hunahuna o mga kasinatian nga personal o pribado kaayo.

Ipamatuod nga uban sa giya ug kalig-on gikan sa Ginoo, makabuntog kita sa tintasyon. Ug bisan kon makasala kita, ang Ginoo magmaloloy-on kanato kon sinsero kita nga maghinulsol.

Scripture Mastery—2 Nephi 28:7–9

Ipasabut nga usahay ipangatarungan sa mga tawo ang sala pinaagi sa pagsulti sa ilang kaugalingon nga ang tanan nagbuhat niini o nga makahinulsol ra sila human niana. Bahina ang klase ngadto sa gagmayng mga grupo. Dapita ang mga grupo sa pagbasa og dungan sa 2 Nephi 28:7–9, nga mangita sa mga pulong nga may kalabutan niining sayop nga mga ideya. Dapita ang mga estudyante sa paghisgot sa mosunod nga mga pangutana diha sa ilang mga grupo (mahimo nimong isulat sa pisara ang mga pangutana sa dili pa magklase):

Unsa ang peligro sa paghimo og “gamay nga sala”?
Hatagan ba sa Dios og kaangayan ang atong paghimo og ginagmay o panagsa ra nga mga sala? (Hangyoa ang mga estudyante sa pagbasa sa Doktrina ug mga Pakigsaad 1:31 alang sa dugang nga ideya.)
Unsaon man sa usa ka tawo sa “pagpahimulos sa usa tungod sa iyang mga pulong”? Unsaon kaha nato usahay “pagkalot og gahong alang sa [atong] silingan”?

Dapita ang matag grupo sa pagsulat og usab sa mga bersikulo sa pinulongan nga gamiton sa mga tawo karon aron sa pag-agni sa kabatan-onan nga mosunod niining binuang nga mga doktrina.

Hangyoa ang mga estudyante sa paghunahuna og panahon sa dihang napabilin nila ang ilang espirituhanong kalig-on bisan pa man sa sayop nga mga ideya sa eskwelahan, diha sa media, o gikan sa mga higala. Dapita sila sa pagsulat bahin niining mga kasinatian diha sa ilang mga scripture study journal o mga class notebook. Ikonsiderar ang pagpangutana sa pipila ka mga estudyante sa pagpakigbahin sa unsay ilang gisulat.

Pahinumdom: Mahimo nimong gamiton kini nga ideya panahon sa leksyon samtang ipaila nimo ang scripture mastery passage, o mahimo nimo kining gamiton sa katapusan sa leksyon.

Komentaryo ug Background nga Impormasyon

2 Nephi 28:7–9. Ang peligro sa paghimo og sala

Gibutyag ni Nephi ang pipila sa “sayop ug kawang ug binuang nga mga doktrina” (2 Nephi 28:9) nga gihangop ni Satanas ug padayon nga gamiton. Ang mga pulong nga makita diha sa 2 Nephi 28:7–9 naghatag og makuyaw nga pilosopiya sa espirituhanong paagi. Ang mga propeta sa ulahing mga adlaw miila usab niining mga sayop ug namulong batok niini.

“Kaon, inom, ug paglipay, kay ugma kita mamatay” (2 Nephi 28:7). Si Elder Neal A. Maxwell sa Korum sa Napulog Duha ka mga Apostoles mipasidaan batok niini nga kinaiya:

“Ang pilosopiya sa ritual prodigalism mao ang ‘kaon, inom, ug paglipay, … [ug] ang Dios molatigo kanato uban sa pipila ka mga latos.’ Usa kini ka matahapon ug mabaw nga panglantaw bahin sa Dios, sa kaugalingon, ug sa kinabuhi. Ang Dios dili gayud mohatag og kaangayan kanato ‘diha sa pagbuhat og usa ka gamay nga sala.’ (2 Ne. 28:8.) Siya ang Dios sa universe, dili ubos og kahimtang nga maghuhukom nga atong masabut-sabut ug mahangyo!

“Siyempre ang Dios mapasayluon! Apan nasayud Siya sa mga tinguha sa atong kasingkasing. Nasayud usab Siya kon unsa nga kaayo ang ato untang nahimo samtang nag-AWOL [absent without leave]. Sa bisan unsa nga kahimtang, unsay gibuhat sa uban dili ikapangatarungan alang sa disipulo diin daghan ang gikinahanglan. (Tan-awa sa Alma 39:4.) Gawas pa, diha sa higpit ug pig-ot nga dalan, walay dapit nga kalaktawan. (Tan-awa sa D&P 82:3.)” (“Answer Me,” Ensign, Nob. 1988, 33).

“Ang Dios … mohatag og kaangayan diha sa pagbuhat og usa ka gamay nga sala” (2 Nephi 28:8). Ang Doktrina ug mga Pakigsaad klaro:

“Kay Ako ang Ginoo dili makatan-aw diha sa sala uban sa labing gamay nga matang sa pagtugot; bisan pa niana, siya nga maghinulsol ug magbuhat sa mga sugo sa Ginoo mapasaylo” (D&P 1:31–32).

Si Elder Dallin H. Oaks sa Korum sa Napulog Duha ka mga Apostoles mikomentaryo bahin sa kabuang sa paghunahuna nga nahimo kitang mas maayo human sa pagpakasala tungod sa unsay atong nakat-unan gikan sa kasinatian:

“Ang ideya nga ang usa ka tawo nahimong mas maayo human siya nakasala ug naghinulsol usa ka yawan-ong bakak sa kaaway. Duna bay tawo dinhi nga naghunahuna nga mas maayo nga makakat-on nga aktwal gayud nga ang piho nga pagbunal makabali og bukog o ang piho nga pagsagol sa kemikal mobuto ug makapaso sa atong panit? Nahimo ba kitang mas maayo human kita nakaangkon ug dayon naayo sa ingon nga mga pagkaangol? Nagtuo ko nga makita natong tanan nga mas maayo nga mopatalinghug sa mga pasidaan sa maalamong mga tawo kinsa nasayud sa mga epekto diha sa atong lawas” (“Sin and Suffering,” [pakigpulong sa fireside sa Brigham Young University, Ago. 5, 1990], 6, speeches.byu.edu).

“Pamakak og gamay” (2 Nephi 28:8). Giawhag kita ni Presidente Gordon B. Hinckley nga batukan ang tintasyon nga mamakak og gamay:

“Gihulagway gayud ni Nephi ang katawhan sa iyang panahon, sama sa paghulagway usab niya sa daghan kaayo sa atong panahon. Pagkasayon ra nato nga moingon, ‘Kami nagtuo sa pagkamatinuoron, pagkamatinud-anon, pagkaputli, pagkamanggiloloy-on.’ (A of F 1:13.) Apan pagkalisud alang sa daghan kanato sa pagbatok sa tintasyon nga mamakak og gamay, manikas og gamay, mangawat og gamay, mohatag og sayop nga pagsaksi diha sa pagpanglibak bahin sa uban. Batuki kini. … Magmalig-on diha sa yano nga hiyas sa pagkamatinuoron” (“Building Your Tabernacle,” Ensign, Nob. 1992, 52).

“Ang Dios molatigo kanato uban sa pipila ka mga latos, ug sa katapusan kita maluwas” (2 Nephi 28:8). Si Presidente James E. Faust sa Unang Kapangulohan namulong bahin niini nga sayop:

“[Usa ka pagpanglingla] mao ang sayop nga gitawag sa uban nga ‘gihunahuna nang daan nga paghinulsol.’ Walay ingon nga doktrina dinhi niini nga Simbahan. Morag nindot kining paminawon, apan sa tinuod lang kini makadaut ug usa ka sayop nga konsepto. Ang tumong niini mao ang pag-agni kanato nga mahimo kita nga sa mahunahunaon ug tinuyo nga paagi molapas uban sa nag-unang hunahuna nga ang dali nga paghinulsol motugot kanato nga makatagamtam sa hingpit nga mga panalangin sa ebanghelyo, sama sa mga panalangin sa templo o usa ka misyon. Ang tinuod nga paghinulsol mahimong taas, sakit nga proseso. Kining binuang nga doktrina nakita nang daan ni Nephi:

“‘Ug usab adunay daghan nga moingon: Kaon, inom, ug paglipay; bisan pa niana, kahadloki ang Dios—siya mohatag og kaangayan diha sa pagbuhat og usa ka gamay nga sala; … walay dautan niini; ug buhata kining tanan, kay ugma kita mamatay; ug kon kini mao nga kita adunay sayop, ang Dios molatigo kanato uban sa pipila ka mga latos, ug sa katapusan kita maluwas diha sa gingharian sa Dios’ [2 Nephi 28:8].

“… Tanan natong mga pakigsaad kinahanglan gayud nga dili lamang pagadawaton pinaagi sa mga ordinansa apan aron mahimong mahangturon kinahanglan gayud usab nga masilyo pinaagi sa Balaang Espiritu sa Panaad. Kining balaanong pagtugot gibutang diha sa atong mga ordinansa ug mga pakigsaad pinaagi lamang sa pagkamatinud-anon. Ang sayop nga ideya sa gitawag og gihunahuna nang daan nga paghinulsol naglambigit og elemento sa pagpanglingla, apan ang Balaang Espiritu sa Panaad dili malingla” (“The Enemy Within,” Ensign, Nob. 2000, 46).

2 Nephi 28:21–22. “Ang uban siya mohupay. … Ang uban siya moulog-ulog”

Si Bishop Richard C. Edgley, usa ka counselor sa Presiding Bishopric, namulong bahin sa mga peligro nga mahupay ug maulog-ulogan:

“Matag lihok, maayo o dautan, dunay sangputanan. Ang matag maayo nga lihok makapalambo sa atong abilidad sa paghimo og maayo ug mas lig-ong mobarug batok sa sala o kapakyasan. Ang matag kalapasan, bisan unsa pa kagamay, mopahimo kanato nga mas mapaubos sa impluwensya ni Satanas sa sunod nga higayon nga motintal siya kanato. Hinay-hinayon kita ni Satanas, molingla kanato kalabut sa mga sangputanan sa gitawag og ginagmay nga mga sala hangtud nga siya mobihag kanato sa dinagkong mga kalapasan. Gihulagway ni Nephi kini nga pamaagi nga usa ka paghupay, pagpakatulog, ug pag-ulog-ulog kanato hangtud nga si Satanas ‘mogunit [kanato] uban sa iyang makalilisang nga mga kadena, diin walay kalingkawasan’ (2 Ne. 28:22; tan-awa usab sa v. 21)” (“That Thy Confidence Wax Strong,” Ensign, Nob. 1994, 40).