Helaman 11–12

Pasiuna

Ang mga kapitulo 11 ug 12 sa basahon ni Helaman naglangkob sa 14 ka tuig nga kasaysayan sa mga Nephite diin ang mga tawo miagi sa pabalik-balik nga cycle sa pagkamatarung ug pagkadautan. Kini nga kasaysayan nagpakita nga ang mga tawo dali ra kaayong makalimot sa Ginoo ug sa unsang paagi Siya mopanton kanila aron matabangan sila nga makahinulsol ug makabalik Kaniya.

Mga Sugyot alang sa Pagtudlo

Helaman 11

Ang mga Nephite miagi sa pabalik-balik nga cycle sa pagkamatarung ug pagkadautan

Kopyaha ang mosunod nga diagram diha sa pisara. Ipasabut nga nagrepresentar kini nga diagram sa unsay sagad nga gitawag og cycle sa garbo.

Imahe

Righteous Cycle

Hangyoa ang mga estudyante sa paghunahuna kon unsay ilang isulat alang sa ikaupat nga elemento sa cycle. Tuguti ang mga estudyante sa paghisgot sa posibling mga tubag. Human sa pipila ka diskusyon, isulat ang Pagpaubos ug Paghinulsol tupad sa numero 4 diha sa diagram. Ipasabut nga ang sunod nga scripture activity magpakita sa unsang paagi ang mga tawo sa Basahon ni Mormon miagi niining pabalik-balik nga cycle. Ipasabut nga kini nga cycle sagad nga makita sa dagkong mga katilingban, apan makita usab kini sa dagan sa kinabuhi sa mga pamilya ug mga indibidwal.

Pahinumdumi ang mga estudyante nga bisan sa pagkahuman og sulti ni Nephi sa mga tawo mahitungod sa pagkamatay sa ilang labaw nga maghuhukom, “sila mipatig-a sa ilang mga kasingkasing ug wala mopatalinghug ngadto sa mga pulong sa Ginoo” (Helaman 10:13). Sa katapusan sa ika-71 nga tuig sa pagmando sa mga maghuhukom, ang mga tawo “nabahin batok sa ilang mga kaugalingon ug misugod sa pagpatay sa usag usa uban sa espada” (Helaman 10:18).

Niining panahona, asa kahang dapita kini nga garbo sa mga Nephite diha sa pabalik-balik nga cycle?

Sa dili pa magklase, kopyaha ang mosunod nga tsart diha sa pisara. Ayaw ilakip ang naka-italicize nga mga tubag diha sa ikatulo ug ikaupat nga kolum. Kon mahimo, paghimo og kopya sa tsart isip usa ka handout para sa matag estudyante. Kon kini dili man mahimo, hangyoa sila nga kopyahon ang tsart diha sa ilang mga class notebook o mga scripture study journal.

Ipakita kon unsaon sa pagkompleto ang tsart pinaagi sa tibuok klase nga pagtinabangay sa unang linya. Dapita ang usa ka estudyante sa pagbasa og kusog sa Helaman 11:1–2. Hangyoa ang klase sa paghatag og mubo nga summary sa kahimtang sa mga tawo sumala sa gihulagway dinhi niini nga mga bersikulo. Isulat sa tsart ang ilang mga tubag. Dayon hangyoa ang mga estudyante sa pag-ila kon asa nga ang-ang o mga ang-ang sa mao nga cycle nahimutang ang mga tawo. Isulat ang ilang mga tubag diha sa tsart.

Kon masabtan na sa mga estudyante unsaon sa pagkompleto ang tsart, hatagi sila og panahon sa paghimo niini. Mahimo nimo silang hangyoon sa pagtrabaho nga magtinagsa, nga may kaparis o sa ginagmay nga grupo, o magtinabangay ang tibuok klase.

Mga katuigan sa pagmando sa mga maghuhukom	Mga bersikulo sa Helaman 11	Deskripsyon sa kahimtang sa mga tawo	(Mga) ang-ang sa cycle
72–73	1–2	Ang panagbingkil ug mga gubat nagkagrabe, ug ang tinago nga pundok sa mga tulisan nagpadayon sa buhat sa pagpangdaut.	2, 3
73–75	3–6	Tungod sa hangyo ni Nephi ngadto sa Ginoo, ang kagutom mipuli sa gubat, ug liboan ang nagsugod sa pagkamatay tungod sa kagutom.	2, 3
75	7–11	Ang mga tawo nagsugod sa paghinumdom sa Ginoo ug mipaubos sa ilang mga kaugalingon, ug ilang gipalayas ang mga tulisan ni Gadianton.	3, 4
76	17–20	Nagmaya ang katawhan ug gihimaya ang Dios. Mga matarung sila, ug nagsugod na usab sila sa paglambo.	4, 1
77–79	21–23	Ang kalamboan ug kalinaw nabalik na. Gamay na lang ang panagbingkil, ug nasulbad ra kini pinaagi sa mga pagpadayag ug sa pagtudlo sa ebanghelyo.	1
80	24–26	Nahimong garbuso ang mga tawo, masuk-anon, ug dautan na usab. Usa ka pundok sa mga tulisan namugna na usab tali sa mga katawhan, gamit ang mga pagpatay ug sekreto o tinago nga mga plano.	2, 3
80–81	27–35	Ang mga tulisan mimugna og kasamok ug mga kadaut, ug ang mga sundalo nga Nephite ug Lamanite wala makabungkag sa dautang pundok. Ang mga tulisan mipatay og daghang tawo ug midala sa ubang mga tawo, lakip ang mga babaye ug mga bata, nga giulipon ngadto sa kamingawan. Ang mga pagsulay midala sa mga tawo sa paghinumdom sa Ginoo.	3, 4

Human makompleto sa mga estudyante ang tsart, hangyoa sila sa pagreport unsay ilang nakat-unan gikan niana nga kalihokan. Dayon ipangutana ang mosunod nga mga pangutana:

Sumala sa Helaman 11:4, nganong nag-ampo man si Nephi og kagutom? (Nanghinaot siya nga ang kagutom modala sa mga tawo sa paghinumdom sa Ginoo ug maghinulsol.)
Unsa kaha unta ang mahimo sa mga tawo aron malikay sa “pag-antus ug kalaglagan” nga usa ka ang-ang sa mao nga cycle?

Mahimong motanyag ang mga estudyante og daghang maayo nga tubag niini nga pangutana. Siguroa nga mahibaloan nila ang mosunod nga baruganan: Pinaagi sa pagpaubos ug paghinulsol, malikay kita sa garbo ug kalaglagan. Ipasabut nga ang mga Nephite malikay unta sa ikaduha o ikatulong ang-ang sa mao nga cycle. Mahimo ra unta silang magpakabuhing matarung ug kanunayng mapainubsanon, maghinulsol sa walay paglangay kon sila makasala. Kon sila nagpakabuhi pa unta nga sama niini, masinati gihapon nila ang ubang mga pagsulay, apan dili unta kinahanglan nga mag-antus pa sila sa grabing pag-antus ug kalaglagan nga misangput tungod sa ilang kadautan.

Dapita ang usa ka estudyante sa pagbasa og kusog sa Helaman 11:36–37. Hangyoa ang klase sa pagsunod, nga mangita sa kausaban nga nahitabo sa mubo nga panahon.

Unsa kadugayon human mahinumdom sa Dios ang mga Nephite nga sila “nagkahinog pag-usab alang sa kalaglagan”? (Upat ka tuig.)
Asa nga ang-ang diha sa cycle sa garbo ang gihulagway dapit sa katapusan sa Helaman 11?

Hangyoa ang mga estudyante sa pag-ila ug paghunahuna sa piho nga mga panahon dihang nakita nila ang cycle sa pipila ka ang-ang diha sa kaugalingon nilang kinabuhi o sa kinabuhi sa mga tawo nga ilang nailhan. Dapita sila sa pagpamalandong unsay ilang mahimo aron malikay sa ikaduha o sa ikatulong ang-ang sa mao nga cycle. Awhaga sila sa pagsulat og piho nga mga ideya nga ilang nadawat samtang namalandong sila.

Helaman 12

Gipasabut ni Mormon nganong mopanton ang Ginoo sa mga tawo

Isulat sa pisara ang mosunod: “Ug sa ingon kita makakita …” Ipasabut nga gigamit ni Mormon kini nga mga pulong aron mapakita ang mga leksyon nga makat-unan gikan sa mga istorya nga iyang girekord.

Base sa Helaman 11, unsaon man ninyo sa pagkompleto kini nga pamahayag?

Dapita ang usa ka estudyante sa pagbasa og kusog sa Helaman 12:1, ug hangyoa ang klase sa pagpangita og paagi giunsa ni Mormon sa pagkompleto ang pamayahag.

Unsa ang buot ipasabut diha ninyo sa mga pulong nga “pagkadili makanunayon sa mga kasingkasing sa katawhan”?
Unsa man ang makatabang sa inyong kasingkasing aron magpabiling makanunayon sa debosyon ngadto sa Ginoo?

Hangyoa ang mga estudyante sa pagbasa sa hilum nga paagi sa Helaman 12:2–3, nga mangita sa ubang mga leksyon nga gusto ni Mormon nga atong makat-unan gikan sa kasaysayan sa mga Nephite. Pahinumdumi ang mga estudyante nga sa kasagaran mogamit si Mormon og mga pulong sama sa “kita mahimo nga makakita” (bersikulo 2) ug “sa ingon kita makakita” (bersikulo 3) dihang gipaambit niya ang mga kamatuoran nga atong makat-unan gikan sa mga istorya diha sa kasulatan.

Sa kaugalingon ninyong mga pulong, unsa nga mga leksyon ang gusto ni Mormon nga atong makat-unan? (Tingali motubag ang mga estudyante og sama sa mosunod: Kon dili kita magmatngon, ang atong paglambo modala kanato sa paghikalimot sa Ginoo; ang Ginoo mopanton sa Iyang katawhan aron sila mahinumdom Kaniya.)
Ngano kaha nga ang mga tawo nga malamboon usahay makalimot man sa Ginoo?
Ngano kaha nga ang mga tawo usahay nagkinahanglan man nga mapanton sa dili pa sila makahinumdom sa Ginoo? (Mahimo nimong ipasabut nga ang pulong nga pagpanton nagpasabut sa pagkorihir pinaagi sa pagsilot o pag-antus sa pipila ka matang.)

Hangyoa ang mga estudyante sa pagpamalandong sa mosunod nga pangutana:

Sa unsang paagi ang Ginoo mopanton kanato karon?

Aron matabangan ang mga estudyante nga matubag kini nga pangutana, basaha ang pamahayag ni Elder D. Todd Christofferson sa Korum sa Napulog Duha ka mga Apostoles:

“Ang balaanon nga pagpanton adunay labing minus tulo ka mga katuyoan: (1) aron sa pag-awhag kanato sa paghinulsol, (2) aron sa paglimpyo ug sa pagbalaan kanato, ug (3) usahay aron sa pagpasubay kanato og balik sa dalan sa kinabuhi sa unsay nahibaloan sa Dios nga mas maayo nga dalan” (“Ako Nagabadlong ug Nagapanton sa Akong Gihigugma,” Ensign o Liahona, Mayo 2011, 98).

Sa unsang paagi ang pagpanton sa Ginoo usa ka ebidensya sa Iyang gugma?

Dapita ang usa ka estudyante sa pagbasa og kusog sa Helaman 12:4–6. Hangyoa ang klase sa pagsunod, nga mangita sa mga kinaiya nga naghimong lisud sa mga tawo sa paghinumdom sa Dios. Dapita ang mga estudyante sa pagreport unsa ang ilang nakit-an.

Ipasabut nga gihulagway ni Mormon ang mga tawo kinsa wala motugot nga ang Ginoo maoy mogiya kanila isip “ubos nga kahimtang kay sa abug sa yuta” (Helaman 12:7). Hangyoa ang usa ka estudyante sa pagbasa og kusog sa Helaman 12:7–8.

Ngano nga ang ingon ana nga mga tawo ikakonsiderar man nga “ubos nga kahimtang kay sa abug sa yuta”? (Tabangi nga masabtan sa mga estudyante nga si Mormon wala magtudlo nga ang mga tawo ubos og bili para sa Langitnong Amahan kay sa abug sa yuta. Hinoon, gihatagan niya og pagtagad ang kamatuoran nga ang abug kanunay nga mosunod sa mando sa Dios, apan sa kasagaran ang mga tawo dili.)

I-summarize ang Helaman 12:9–22 pinaagi sa paghisgot nga niini nga mga bersikulo gipahinumduman kita ni Mormon sa talagsaong gahum sa Ginoo—nga ang Ginoo makamando sa pisikal nga mga elemento sa pagpairug o pag-usab ug nga Siya makahimo sa pagpahimulag sa makasasala nga tawo gikan sa Iyang presensya. Dapita ang mga estudyante sa pagsiksik sa Helaman 12:23–26, nga mangita sa ebidensya nga kita mas dako og bili kay sa abug sa yuta. Mahimo nimong isugyot nga markahan sa mga estudyante ang mga pulong nga importante para kanila.

Unsa man nga gasa ang atong madawat kon maghinulsol kita ug mopatalinghug sa tingog sa Ginoo?
Sa unsang paagi nahimo kini nga usa ka ebidensya sa atong kabililhon ngadto sa Dios?

Isulat sa pisara kining mosunod nga dili kompleto nga mga pamahayag. Dapita ang mga estudyante sa pagsulat og usa ka panapos alang sa leksyon karon pinaagi sa paghuman niini nga mga pamahayag diha sa ilang mga notebook o scripture study journal.

Ug sa ingon ako nakakita diha sa Helaman 11–12 nga …

Ug busa ako …

Ipamatuod nga kon hinumduman nato ang Ginoo, patalinghugan ang Iyang tingog, ug maghinulsol, atong gipahayag ang atong pagpaubos ug hugot nga pagtuo Kaniya. Agig balus, Siya motuman sa Iyang saad nga kita panalanginan ug kita pauswagon, sa katapusan hatagan kita og kinabuhing dayon.