Leksyon 156: Moroni 7:20–48

Leksyon 156

Moroni 7:20–48

Pasiuna

Girekord ni Moroni ang panapos sa wali nga gipamulong sa iyang amahan, si Mormon, sa usa ka sinagoga sa unang mga katuigan. Diha sa wali o sermon, gitudloan ni Mormon ang iyang mga tigpaminaw sa “paghupot sa matag maayo nga butang” (Moroni 7:20, 25). Gipasabut niya ang kalabutan tali sa hugot nga pagtuo, paglaum, ug gugma nga putli, ug gitapos uban sa pangamuyo ngadto sa iyang mga katawhan sa pag-ampo ngadto sa Amahan uban sa tanang kusog sa kasingkasing alang sa gasa sa gugma nga putli, “ang tiunay nga gugma ni Kristo” (Moroni 7:47).

Mga Sugyot alang sa Pagtudlo

Moroni 7:20–39

Nagtudlo si Mormon nga pinaagi sa hugot nga pagtuo diha ni Jesukristo, makahupot kita sa matag maayo nga butang

Sa dili pa magklase, isulat sa pisara ang mosunod nga pangutana:

Unsa ang pipila ka maayong mga butang nga gipanalangin sa Langitnong Amahan kaninyo?

Sa sinugdan sa klase, hatagi ang mga estudyante og usa o duha ka minuto sa pagtubag niining pangutana diha sa mga notebook o mga scripture study journal. Dayon dapita sila sa pagbasa og pipila sa mga butang nga ilang gilista.

Basaha og kusog ang Moroni 7:24. Hangyoa ang klase sa pagsunod, mangita sa tinubdan sa tanang butang nga maayo nga miabut diha kanila.

Kinsa ang tinubdan sa tanang maayo nga mga butang nga miabut diha kaninyo? (Ang mga tubag sa mga estudyante mahimong magkalain-lain apan kinahanglan gayud nga kini nagpahayag sa mosunod nga kamatuoran: Ang tanan nga maayong mga butang miabut tungod ni Jesukristo.)

Aron matabangan ang mga estudyante nga masabtan pa ang doktrina nga gitudlo diha sa Moroni 7:24, ipasabut nga isip mga kaliwat ni Adan ug ni Eva, kita mga “napukan” ug dili makadawat og bisan unsa nga mga panalangin sa atong kaugalingon (tan-awa usab sa Alma 22:14; Ether 3:2; Artikulo sa Hugot nga Pagtuo 1:3). Kon wala si Jesukristo ug ang Iyang Pag-ula,“walay maayo nga butang nga modangat ngari [kanato].” Ang tanang maayo nga atong sukad nadawat gikan sa atong Langitnong Amahan miabut pinaagi sa Manluluwas ug sa Iyang Pag-ula.

Ipasabut nga ang Langitnong Amahan adunay daghang mga panalangin nga giandam alang kanato. Siya gusto kanato nga “maghupot sa matag maayo nga butang” (Moroni 7:19), ug gusto Siya nga mohatag kanato sa tanang butang nga Siya aduna (tan-awa sa D&P 84:38).

Dapita ang usa ka estudyante sa pagbasa og kusog sa pangutana ni Mormon diha sa Moroni 7:20. Dayon dapita ang mga estudyante sa pagbasa og hilum sa Moroni 7:21–24, nga mangita kon unsay gitudlo niini nga mga bersikulo mahitungod sa unsa nga paagi kita makahupot sa matag maayo nga butang.

Base sa unsay inyong nabasa sa Moroni 7:21–24, unsaon ninyo pagtubag ang pangutana ni Mormon diha sa Moroni 7:20? (Samtang ang mga estudyante nagtubag, tabangi sila sa pag-ila sa mosunod nga baruganan: Samtang kita nagpakita og hugot nga pagtuo diha ni Jesukristo, kita makahupot sa matag maayo nga butang.)

Aron matabangan ang mga estudyante sa pagsabut kon unsaon nila sa “paghupot sa matag maayo nga butang,” hangyoa ang pipila kanila sa pagbanos-banos sa pagbasa og kusog gikan sa Moroni 7:25–26, 32–38. Dapita ang katunga sa klase sa pag-ila og mga paagi nga kita kinahanglan nga magpakita sa atong hugot nga pagtuo diha ni Jesukristo. Dapita ang lain nga katunga sa pagpangita sa maayo nga mga butang nga miabut kanato agi og resulta. (Kon ang usa ka estudyante nagbasa sa bersikulo 33, mahimo nimong ipasabut nga ang mga pulong “maayo ngari kanako” nag-refer sa mga butang nga uyon sa kabubut-on sa Ginoo.)

Human sa pagreport sa mga estudyante sa unsay ilang nakit-an, ikonsiderar ang paghangyo kanila sa pagsulat og tumong nga motabang kanila sa pagpakita og mas dakong hugot nga pagtuo diha ni Jesukristo ug sa paghupot sa tanang maayo nga mga butang nga ang Langitnong Amahan nagtinguha sa paghatag kanila. Ipakigbahin ang imong pagpamatuod nga dagkong mga panalangin moabut pinaagi sa Manluluwas, sa Iyang ebanghelyo, ug sa Iyang Pag-ula. Awhaga ang mga estudyante sa pagpakita og mas dakong hugot nga pagtuo diha Kaniya.

Moroni 7:40–43

Nagtudlo si Mormon nga ang hugot nga pagtuo diha ni Jesukristo naggiya kanato sa pagbaton og paglaum alang sa kinabuhing dayon

Pagdrowing og hulagway sa bangkito nga tulo og tiil diha sa pisara (o pagpakita og bangkito nga tulo ang tiil).

Imahe

three-legged stool

Basaha ang mosunod nga istorya ni Elder Russell M. Ballard, sa Korum sa Napulog Duha ka mga Apostoles:

Imahe

Elder M. Russell Ballard

“Tulo ka balaang mga baruganan nagporma og pundasyon diin kita makatukod sa tukuran sa atong mga kinabuhi. … Nagtambayayong kini sa pagsanggâ nga nagsuporta kanato sama sa mga tiil sa bangkito nga tulo ang tiil” (“The Joy of Hope Fulfilled,” Ensign, Nob. 1992, 33).

Butangi og ngalan ang usa sa mga tiil sa bangkito sa mga pulong nga Hugot nga pagtuo diha ni Jesukristo. Hangyoa ang mga estudyante sa paghunahuna kon unsa kaha ang girepresentaran sa laing duha ka mga tiil. Dayon dapita ang mga estudyante sa pagbasa og hilum sa Moroni 7:40 aron sa pagpangita kon unsa ang girepresentar sa ikaduhang tiil. (Ang ikaduhang tiil nagrepresentar sa paglaum.)

Basaha og kusog ang mosunod nga mga pagpahayag sa paglaum. Dapita ang mga estudyante sa pagpaminaw sa mga kalainan niining duha ka mga pahayag.

Naglaum akong moulan karon.
Ako adunay paglaum sa saad sa Ginoo nga bation nako ang kalinaw pinaagi sa paghinulsol.

Sa unsang mga paagi kini nga mga pahayag magkalahi? (Tabangi nga makita sa mga estudyante nga diha sa unang ehemplo, ang pulong nga paglaum nag-refer sa usa ka walay kasigurohang tinguha. Sa ikaduhang ehemplo, ang pulong nga paglaum usa ka pagpahayag sa pagkamasaligon. Usa kini ka awhag sa paglihok, ug nakasentro kini sa Pag-ula ni Jesukristo.)

Aron matabangan ang mga estudyante sa pagsabut sa pulong nga paglaum ingon nga kini gigamit diha sa mga kasulatan, dapita ang usa ka estudyante sa pagbasa og kusog sa mosunod nga pamahayag ni Presidente Diether F. Uchtdorf sa Unang Kapangulohan:

Imahe

Presidente Dieter F. Uchtdorf

“Ang paglaum usa ka gasa sa Espiritu. …

“Ang paglaum dili kaalam, apan hinoon, ang kanunayng pagsalig nga ang Ginoo motuman sa Iyang saad ngari kanato. Kini ang kamasaligon nga kon kita magkinabuhi sigun sa mga balaod sa Dios ug sa mga pulong sa mga propeta karon, kita makadawat sa gitinguhang mga panalangin sa umaabut. Kini mao ang pagtuo ug pagdahum nga ang atong atong mga pag-ampo pagatubagon. Kini makita diha sa pagkamasaligon, positibo nga hunahuna, pagkamadasigon, ug mapailubon nga pagpadayon.” (“Ang Walay Kinutubang Gahum sa Paglaum,” Ensign o Liahona, Nob. 2008, 21–22).

Dapita ang usa ka estudyante sa pagbasa og kusog sa Moroni 7:41. Hangyoa ang klase sa pagsunod, nga mangita kon unsa ang gitudlo ni Mormon nga atong panganduyon. Samtang ang mga estudyante nagreport sa unsay ilang nakit-an, butangi og ngalan ang ikaduhang tiil sa bangkito sa mga pulong Paglaum alang sa Kinabuhing Dayon.

Ipasabut nga ang Moroni 7:41 usa ka scripture mastery passage. Mahimo nimong isugyot nga markahan sa mga estudyante kini nga bersikulo sa lahi nga paagi aron dali ra nila kining pangitaon.

Sumala sa Moroni 7:41, unsaon nato sa pagbaton og paglaum aron mabayaw ngadto sa kinabuhing dayon? (Bisan og ang mga estudyante mogamit og lahi nga mga pulong, kinahanglan ilang ilhon ang mosunod nga baruganan: Kon kita magpakita og hugot nga pagtuo kang Jesukristo, makabaton kita og paglaum pinaagi sa Iyang Pag-ula nga pagabayawon ngadto sa kinabuhing dayon.)

Dapita ang mga estudyante sa pagbasa diha sa ilang kaugalingon sa Moroni 7:42–43 mangita alang sa mga kinaiya nga atong gikinahanglan aron makabaton og hugot nga pagtuo ug paglaum. Hangyoa sila sa pagreport kon unsay ilang nakit-an. (Mahimo nimong ipasabut nga ang magmaaghup ug magmapainubsanon sa kasingkasing nagpasabut nga magpaubos, malumo, ug manunuton ngadto sa kabubut-on sa Ginoo.)

Ngano kaha nga ang pagkamaaghup ug pagkamapainubsanon sa kasingkasing gikinahanglan aron makabaton og hugot nga pagtuo ug paglaum diha sa Pag-ula ni Jesukristo?

Dapita ang mga estudyante sa pagtubag sa mosunod nga mga pangutana diha sa mga scripture study journal:

Sa unsang paagi ang inyong hugot nga pagtuo diha ni Jesukristo ug sa Iyang Pag-ula maghatag kaninyo og paglaum nga makadawat kamo og kinabuhing dayon?

Moroni 7:44–48

Si Mormon nagtudlo sa importansya sa gugma nga putli

I-refer og balik ngadto sa tulo og tiil nga bangkito. Dapita ang mga estudyante sa pagbasa og hilum sa Moroni 7:44 ug sa pag-ila og ngalan alang sa ikatulo nga tiil sa bangkito. Samtang ang mga estudyante nagreport unsay ilang nakit-an, butangi og ngalan ang ikatulo nga tiil sa pulong nga Gugma nga Putli. Hangyoa sila sa paghatag og depinisyon sa gugma nga putli sa ilang kaugalingong mga pulong.

Dapita ang usa ka estudyante sa pagbasa og kusog sa Moroni 7:45–47. Hangyoa ang klase sa pagsunod, nga mangita kon giunsa ni Mormon paghulagway ug paghatag og depinisyon sa gugma nga putli.

Giunsa ni Mormon sa paghatag og depinisyon ang gugma nga putli diha sa Moroni 7:47? (“Ang gugma nga putli ni Kristo.”)
Unsa sa inyong hunahuna ang gipasabut nga ang gugma nga putli dili mapakyas?
Ngano sa inyong hunahuna kita walay kapuslanan kon kita walay gugma nga putli?

Dapita ang mga estudyante sa pagpili og mga deskripsyon sa gugma nga putli diha sa Moroni 7:45 ug sa pagpasabut unsay ilang hunahuna ang kahulugan niadto nga mga deskripsyon. Ipatin-aw ang ilang mga pagpasabut kon gikinahanglan. (Sama pananglit, “mainantuson” nangahulugan nga ang usa ka tawo naglahutay sa mga pagsulay sa mapainubsanong paagi. “Dili masinahon” nangahulugan nga ang usa ka tawo dili mangigi sa uban. “Dili manghambog” nangahulugan nga ang usa ka tawo mapainubsanon. “Dili magtinguha sa iyang kaugalingon” naghulagway sa kalidad sa pagbutang sa Dios ug sa uban sa dili pa ang kaugalingon. “Dili dali nga masuko” nangahulugan nga dili dali nga maglagot. “Motuo sa tanang mga butang” naghulagway sa usa ka tawo kinsa modawat sa tanang kamatuoran.)

Pangutan-a ang mga estudyante unsaon kaha nila pagtubag ang matag usa sa mosunod nga mga sitwasyon kon sila kulang og gugma nga putli. Dayon pangutan-a unsaon kaha nila pagtubag kon sila puno sa gugma nga putli. (Mahimo nimong ipahiangay kini nga mga sitwasyon sumala sa mga panginahanglan ug mga interes sa mga estudyante nga imong gitudloan.)

Ang mga tawo nagbugal-bugal nimo o sa laing tawo sa eskwelahan.
Ikaw adunay igsoong lalaki o babaye kinsa kanunay nga mosamok kanimo.
Usa ka tawo nga imong kaila nakahimo og seryosong sala.
Wala nimo gustohi ang bag-ong korum o adviser sa klase sama sa pagkagusto nimo sa unang adviser.

Dapita ang usa ka estudyante sa pagbasa og kusog sa Moroni 7:48. Hangyoa ang klase sa pagsunod, ug sa pag-ila unsay atong kinahanglan nga buhaton aron mapanalanginan sa gasa nga gugma nga putli. Samtang ang mga estudyante maghatag og mga tubag, siguroha nga maklaro ang mosunod nga baruganan: Kon kita mag-ampo ngadto sa Amahan uban sa tibuok kusog sa kasingkasing ug magpuyo isip tinuod nga mga sumusunod ni Jesukristo, kita mapuno sa gugma nga putli.

Ipasabut nga ang Moroni 7:45, 47–48 usa ka scripture mastery passage. Mahimo nimong isugyot nga markahan sa mga estudyante kini nga bersikulo sa lahi nga paagi aron dali ra nila kining pangitaon.

Ngano kaha nga kita nagkinahanglan nga mag-ampo alang sa gasa sa gugma nga putli uban sa tibuok kusog sa atong kasingkasing?
Kanus-a kamo nakasaksi og mga ehemplo sa gugma nga putli? (Dapita ang pipila ka mga estudyante sa pagpakigbahin og mga kasinatian. Mahimo ka usab mopakigbahin og usa ka kasinatian nga imong kaugalingon.)
Kanus-a ninyo gibati nga ang Ginoo nagtabang kaninyo sa pagbati og dugang nga gugma nga putli ngadto sa uban?

Hangyoa ang mga estudyante sa pagribyu sa Moroni 7:45 ug sa pagpili og usa ka bahin sa gugma nga putli nga kinahanglan nilang palamboon. Awhaga sila sa pag-ampo alang sa gasa sa gugma nga putli samtang sila naningkamot sa pagpalambo niini nga bahin. Ipamatuod ang impluwensya sa hugot nga pagtuo, paglaum, ug gugma nga putli diha sa inyong kinabuhi.

Scripture Mastery—Moroni 7:41

Tabangi ang mga estudyante sa pagmemorya sa Moroni 7:41. Ikonsiderar ang paggamit sa usa sa mga pamaagi nga gipasabut diha sa appendix nga anaa sa katapusan niini nga manwal.

Scripture Mastery—Moroni 7:45, 47–48

Dapita ang mga estudyante sa pagpili og usa ka indibidwal gikan sa mosunod nga lista kinsa gusto nila nga makabaton og dugang nga gugma nga putli: usa ka sakop sa pamilya, sa korum o sakop sa klase, usa ka kauban sa klase sa eskwelahan, usa ka higala, o usa ka silingan. Awhaga sila sa paghunahuna mahitungod sa tawo nga ilang napili samtang nagbasa sila sa Moroni 7:45 ug ikonsiderar ang mga paagi nga ilang mapakita sa tawo ang dugang nga Kristohanong gugma. Dapita sila sa pagsulat diha sa mga notebook o mga scriture study journal og usa o duha ka mga paagi nga sila makapakita og gugma nga putli alang sa tawo nga ilang napili. Dapita sila sa paghimo niini nga paningkamot nga usa ka bahin sa ilang mga pag-ampo sa umaabut nga semana. Mahimo nimong ikonsiderar ang paghatag sa mga estudyante og oportunidad sa pagpakigbahin sa ilang mga kasinatian sa umaabut nga mga adlaw.

Mubo nga sulat: Tungod sa gitas-on niini nga leksyon, mahimo nimong gamiton kini nga kalihokan sa laing adlaw, kon ikaw adunay sobra nga oras.

Komentaryo ug Background nga Impormasyon

Moroni 7:29–31. Ang pangalagad sa mga anghel

Si Elder Dallin H. Oaks sa Korum sa Napulog Duha ka mga Apostoles mihulagway sa pangalagad sa mga anghel:

“‘Ang pulong “anghel” gigamit diha sa mga kasulatan alang sa bisan hain nga langitnong binuhat nga nagdala sa mensahe sa Dios’ (George Q. Cannon, Gospel Truth, sel. Jerreld L. Newquist [1987], 54). Ang mga kasulatan nag-asoy og daghang mga higayon diin ang anghel personal nga mipakita. Ang mga pagpakita sa anghel ngadto ni Zacarias ug Maria (tan-awa sa Lucas 1) ug ngadto ni Haring Benjamin ug Nephi, ang anak nga lalaki ni Helaman (tan-awa sa Mosiah 3:2; 3 Ne. 7:17–18) mga pipila lamang ka mga ehemplo. …

“… Ang pagpangalagad sa mga anghel mahimo usab nga dili makita. Ang mga mensahe sa anghel mapadala usab pinaagi sa usa ka tingog o pinaagi lamang sa mga hunahuna o mga pagbati nga ipahayag ngadto sa salabutan. Gihulagway ni Presidente John Taylor ‘ang lihok sa mga anghel, o mga mensahero sa Dios, diha sa atong mga hunahuna, aron ang kasingkasing makasabut og … mga pagpadayag gikan sa walay katapusan nga kalibutan’ (Gospel Kingdom, sel. G. Homer Durham [1987], 31).

“Gihulagway ni Nephi ang tulo ka mga pagpakita sa pagpangalagad sa mga anghel sa dihang gipahinumduman niya ang iyang masupilong igsoon nga mga lalaki nga (1) sila ‘nakakita og usa ka anghel,’ (2) sila ‘nakadungog sa iyang tingog matag karon og unya,’ ug (3) usab nga usa ka anghel ‘namulong ngadto [kanila] sa usa ka hinay nga hinagawhaw nga tingog’ bisan sila ingon og ‘walay pagbati’ ug ‘dili makabati sa iyang mga pulong’ (1 Ne. 17:45). Ang mga kasulatan naglangkob og daghan pang uban nga mga pahayag nga ang mga anghel gipadala aron sa pagtudlo sa ebanghelyo ug pagdala sa mga tawo ngadto ni Kristo (tan-awa sa Heb. 1:14; Alma 39:19; Moro. 7:25, 29, 31–32; D&P 20:35). Kadaghanan sa mga pahayag sa anghel bation o madungog kay sa makita” (“The Aaronic Priesthood and the Sacrament,” Ensign, Nob. 1998, 38–39).

Moroni 7:45–48. Ang gugma nga putli ,“ang tiunay nga gugma ni Kristo”

Si Presidente Thomas S. Monson mitudlo mahitungod sa panginahanglan alang sa gasa sa gugma nga putli:

“Adunay seryusong pangihangalan sa gugma nga putli nga naghatag og pagtagad sa mga wala matagad, paglaum alang sa mga nawad-an paglaum, tabang sa mga may sakit. Ang tinuod nga gugma nga putli mao ang gugma nga inubanan sa buhat. Ang panginahanglan sa gugma nga putli anaa sa tanang dapit. …

“Ang gugma nga putli mao ang pag-angkon og pailub ngadto sa tawo nga mipakaubos kanato. Kini ang pagbatok sa aghat sa pagkadaling masilo. Kini ang pagdawat sa kahuyang ug mga kasaypanan. Kini ang pagdawat sa mga tawo kon unsa man gayud sila. Kini ang pagtan-aw lapas sa pisikal nga panagway ngadto sa mga kinaiya nga dili mapalong sa pagdagan sa panahon. Mao kini ang pagbatok sa pagbati nga adunay palabihon. …

“… Ang kinabuhi sa tanan kanato dili hingpit. Kay sa magmahukmanon ug magsinawayay sa usag usa, unta anaa kanato ang tiunay nga gugma ni Kristo alang sa atong isig ka tigbiyahe niini nga panaw sa kinabuhi. …

“… Hinaut nga kining [gugma nga putli] mogiya kaninyo sa tanan ninyong pagabuhaton. Hinaut nga kini mopuno sa inyong mismong mga kalag ug makakaplag og hulagway sa tanan ninyong mga hunahuna ug mga buhat” (“Ang Gugma nga Putli Dili Gayud Mopakyas,” Ensign o Liahona, Nob. 2010, 124–25).

Si Elder Marvin J. Ashton sa Korum sa Napulog Duha ka mga Apostoles milista og mga paagi nga kita makapakita og gugma nga putli:

“Ang tinuod nga gugma nga putli dili usa ka butang nga imong ihatag, kini usa ka butang nga imong naangkon ug mahimong usa ka bahin sa imong kaugalingon. …

“Tingali ang labing maayo nga gugma nga putli moabut kon kita magmabination sa usag usa, kon kita dili mohukom o mopalabi og ubang tawo, kon kita lamang mohatag sa usag usa sa kapuslanan sa pagduda o sa pagpabilin nga hilum. Ang gugma nga putli mao ang pagdawat sa mga kalainan, mga kahuyang, ug mga kakulangan; ang pagbaton og pasensya sa usa ka tawo kinsa nagpakyas kanato; o sa pagpugong sa pagbati nga masakitan kon wala himoa sa usa ka tawo ang usa ka butang sa paagi nga ato untang gilauman. Ang gugma nga putli mao ang pagdumili sa pagpahimulos sa kahuyang sa uban ug pagkaandam sa pagpasaylo sa usa ka tawo kinsa nakapasakit kanato. Ang gugma nga putli mao ang pagpaabut sa labing maayo sa usag usa” (“The Tongue Can Be a Sharp Sword,” Ensign, Mayo 1992, 19).

Moroni 7:45–48. “Ang mas maayong depinisyon sa ‘tiunay nga gugma ni Kristo’”

Nag-refer sa mga pulong ni Mormon diha sa Moroni 7:45–48, si Elder Jeffrey R. Holland sa Korum sa Napulog Duha ka mga Apostoles mitudlo:

“Kini makahatag og pagtulun-an nga mahibalo nga ang gugma nga putli, o ‘ang tiunay nga gugma ni Kristo,’ nga kinahanglan nga atong mahalon mahimong hubaron sa duha ka mga paagi. Usa sa mga kahulugan niini mao ang matang sa maloloy-on, mapasayloong gugma nga ang mga disipulo ni Kristo kinahanglan nga aduna sa usag usa. Kana mao, ang tanang mga Kristyanos kinahanglan nga maninguha sa paghigugma sama nga ang Manluluwas naghigugma, nagpakita og putli, matubsanong kapuangod alang sa tanan. Sa kaalaot, pipila, kon adunay, mga mortal nga sa hingpit malampuson niini nga paningkamot, apan kini usa ka pagdapit nga ang tanan kinahanglan nga motubag.

“Ang mas maayong depinisyon sa ‘tiunay nga gugma ni Kristo,’ hinoon, dili ang unsay atong gipaninguha isip mga Kristyanos nga sa kadaghanan napakyas sa pagpakita niini ngadto sa uban apan hinoon unsa ang hingpit nga kalampusan ni Kristo ang gipakita ngari kanato. Ang tinuod nga gugma nga putli nahibaloan lamang sa makausa. Kini gipakita sa hingpit ug sa lunsay nga paagi diha sa dili mapakyas, dili katupngan, ug maulaong gugma ni Kristo alang kanato. Mao kini ang gugma ni Kristo alang kanato nga ‘mapailubon, ug mapuangoron, ug dili masinahon.’ Mao kini ang iyang gugma alang kanato nga dili ‘tigpaburot … , dili masuk-anon, wala magakalipay sa dili matarung.’ Mao kini ang gugma ni Kristo alang kanato nga ‘mopailub sa tanang mga butang, motuo sa tanang mga butang, molaum sa tanang mga butang, moantus sa tanang mga butang.’ Mao kini sigun sa gipakita ni Kristo nga ‘ang gugma nga putli dili gayud mopakyas.’ Mao kini ang gugma nga putli—iyang tiunay nga gugma alang kanato—kon wala kini kita walay kapuslanan, walay paglaum, sa tanan nga mga lalaki ug babaye mao ang labing alaut. Sa pagkatinuod, kadtong kinsa naghupot sa mga panalangin sa iyang gugma sa katapusang adlaw— ang Pag-ula, ang Pagkabanhaw, kinabuhing dayon, mahangturong saad—sa tinuod kini maayo alang kanila.

“Kini sa bisan unsa nga paagi dili mopakunhod sa sugo nga kita kinahanglan nga maningkamot sa pagbaton niining matang sa gugma alang sa usag usa. Kinahanglan kita “mag-ampo ngadto sa Amahan uban sa tibuok kusog sa kasingkasing, nga kita unta mapuno niini nga gugma.’ [1 Mga Taga-Corinto 13:4–5, 7–8; Moroni 7:48.] Kinahanglan kitang maningkamot nga mas makanunayon ug dili mapakyason, mas mainantuson ug mabination, dili masinahon ug tigpanghambug diha sa atong mga relasyon ngadto sa uban. Sama sa pagpakabuhi ni Kristo kinahanglan nga mao usab ang atong pagpakabuhi, ug sama sa paghigugma ni Kristo kinahanglan nga mao usab ang atong paghigugma. Apan ang ‘tiunay nga gugma ni Kristo’ nga gipamulong ni Mormon mao gayud kanang —gugma ni Kristo. Uban nianang balaan nga gasa, kana nga matubsanong pagtuga, anaa kanato ang tanan; kon wala kini wala kitay maangkon ug sa kaulahian walay kapuslanan gawas sa katapusan ‘mahimong mga yawa [ug] mga anghel ngadto sa usa ka yawa.’ [2 Nephi 9:9.]

“Ang kinabuhi adunay iyang bahin sa mga kahadlok ug mga kapakyasan. Usahay ang mga butang magkulang. Usahay ang mga tawo mopakyas kanato, o mga ekonomiya o mga negosyo o ang mga gobyerno mopakyas kanato. Apan usa ka butang dinhi o sa kahangturan dili mopakyas kanato—ang gugma nga putli ni Kristo. …

“… Ang milagro sa gugma nga putli ni Kristo nagluwas ug nag-usab kanato. Ang Iyang maulaong gugma ang nagluwas kanato gikan sa kamatayon ug sa impiyerno ingon man gikan sa kalibutanon, mahilayon, ug yawan-on nga kinaiya. Kanang matubsanong gugma usab nag-usab sa kalag, nagbayaw kini labaw sa nagkaubos nga mga sumbanan ngadto sa usa ka butang nga mas labaw ka.dungganon, mas labaw ka balaan. Busa, kita kinahanglan gayud nga ‘mounong ngadto sa gugma nga putli ni Kristo’—sa tiunay nga gugma ni Kristo kanato ug sa atong hugot nga panglimbasog ngadto sa putli nga gugma kaniya ug sa tanan—kay kon wala kini, kita walay kapuslanan, ug ang atong plano alang sa mahangturong kalipay sa hingpit makawang. Kon wala ang matubsanong gugma ni Kristo sa atong kinabuhi ang ubang mga kalidad ug dalaygon nga maayong mga buhat—dili paigo alang sa pag-angkon og kaluwasan ug kalipay” (Christ and the New Covenant: The Messianic Message of the Book of Mormon [1997], 336–37).