Jacob 5–Omni (Unit 10)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa Jacob 5–Omni (unit 10) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa mga estudyante.

Day 1 (Jacob 5–6)

Sa leksyon nila kabahin sa pasumbingay sa mga kahoy nga oliba diha sa Jacob 5, ang mga estudyante nagpunting diha sa baruganan nga ang Ginoo nahigugma kanato ug naghago sa kakugi alang sa atong kaluwasan. Girekord sa mga estudyante unsa ang ilang nakat-unan gikan sa Jacob 5 kalabut sa paghigugma sa Ginoo alang kanila. Sa Jacob 6, nakat-unan sa mga estudyante nga kita maalamon sa pag-andam karon alang sa paghukom pinaagi sa paghinulsol ug pagdawat sa kalooy sa Ginoo.

Day 2 (Jacob 7)

Gitun-an sa mga estudyante ang pakig-atubang ni Jacob kang Sherem, usa ka anti-Kristo. Gikat-unan nila nga samtang kita nagsalig diha sa Ginoo, makabuntog kita sa mga hagit sa atong hugot nga pagtuo. Gikan sa ehemplo ni Jacob, gikat-unan usab nila nga kita dili matarug sa atong hugot nga pagtuo kon ang atong mga pagpamatuod gibase sa pagpadayag ug tinuod nga espiritwal nga mga kasinatian. Agi og pagdugang, nakita sa mga estudyante ang paghulagway sa baruganan nga samtang kita nagtubag ngadto sa mga pangutana o mga pagsaway sa atong hugot nga pagtuo sa mga paagi nga nagdapit sa Espiritu, makatabang kita sa uban sa pagbalik ngadto sa Ginoo. Gisulat sa mga estudyante ang mahitungod kon unsaon nila sa paggamit ang usa ka baruganan nga ilang giila diha sa Jacob 7:15–23.

Day 3 (Enos)

Gikan sa ehemplo ni Enos, gikat-unan sa mga estudyante nga samtang kita nagpakita og hugot nga pagtuo diha ni Jesukristo, ang atong mga sala mapasaylo ug kita mahimong hingpit. Gikat-unan usab nila nga samtang kita nagsinati sa mga panalangin sa Pag-ula ni Jesukristo, maninguha kita sa pagtabang sa uban nga madawat ang kaluwasan. Gisulat sa mga estudyante ang mahitungod sa usa ka paagi nga sila mahimong mogamit niini nga mga baruganan.

Day 4 (Jarom ug Omni)

Sa ilang pagtuon ni Jarom ug Omni, giila sa mga estudyante ang mosunod nga mga kamatuoran: Samtang kita nagsunod sa mga sugo sa Dios, kita mouswag. Girekord nila kon sa unsa nga paagi ang Ginoo nagpanalangin kanila tungod sa pagsunod sa Iyang mga sugo. Sa daklit gitun-an usab sa mga estudyante ang paglangyaw sa Nephite ngadto sa yuta sa Zarahemla ug nakamatngon sa mga katawhan sa Zarahemla, ang mga Jaredite, ug usa ka grupo sa mga Nephite (ang mga katawhan ni Zeniff) kinsa mibalik ngadto sa yuta sa Nephi. Gikat-unan usab sa mga estudyante ang mosunod nga baruganan: Kon kita moduol ngadto ni Kristo ug molahutay hangtud sa katapusan, maluwas kita. Gitapos nila kini nga leksyon pinaagi sa pagsulat og usa ngadto sa duha ka minuto nga pakigpulong kabahin sa mga paagi kita giawhag ni Amaleki sa pagduol ngadto ni Kristo.

Pasiuna

Niini nga leksyon, ang mga estudyante makabaton og oportunidad sa paghunahuna sa gugma sa Ginoo alang kanila ingon nga gipakita diha sa Jacob 5. Kon itugot sa panahon, mahimo usab nga imong itudlo kanila gikan sa Jacob 5 ang mahitungod sa ilang tahas isip mga sulugoon sa Ginoo. Makahimo sa paghisgot ang mga estudyante sa mga kamatuoran gikan sa Jacob 7 nga makatabang kanila kon ang uban mangutana o manaway sa ilang mga tinuohan. Makabaton usab sila og higayon sa pagsulti sa klase kon giunsa nila paggamit ang unsay ilang nakat-unan gikan sa basahon ni Enos. Dugang pa, mahimong makapaambit ang mga estudyante og mga pakigpulong nga ilang giandam mahitungod sa unsa nga paagi kita makapatalinghug sa pagdapit nga gihatag diha sa Omni sa pagduol ngadto ni Kristo. Kon buot ka nga buhaton nila ang mao, makatabang ang pagtawag og una sa mga estudyante ug dapiton sila sa pag-andam sa pagpaambit sa ilang mga pakigpulong ngadto sa klase.

Mga Sugyot alang sa Pagtudlo

Jacob 5–6

Nagkutlo si Jacob sa pasumbingay kabahin sa mga kahoy nga oliba sa pagpakita nga ang Ginoo naghago sa kakugi alang sa atong kaluwasan

Pahinumdumi ang mga estudyante nga diha sa pasumbingay kabahin sa mga kahoy nga oliba, ang mga sanga sa maayo nga kahoy nga oliba nagkatag diha sa tibuok ubasan. Kini nagrepresentar sa pagkatibulaag sa katawhan sa pakigsaad sa Dios—mga sakop sa balay ni Israel—sa tibuok kalibutan. Sa kadugayan, hinoon, ang tanang mga kahoy diha sa ubasan nahimong dautan (tan-awa sa Jacob 5:46). Ipasabut nga kini nagrepresentar sa yugto sa Dakong Apostasiya.

Dapita ang mga estudyante sa pagbasa og hilum sa Jacob 5:61–62, nga mangita sa unsay gitudlo sa Ginoo sa Iyang sulugoon (Iyang propeta) nga buhaton aron sa pagtabang sa mga kahoy nga mamunga og maayong bunga pag-usab. Dayon ipangutana ang mosunod:

Kinsa sa inyong hunahuna ang gipasabut niini nga “mga sulugoon”? (Mga lider sa Simbahan, mga misyonaryo, ug ang tanang miyembro sa Simbahan.)
Unsa ang talagsaon mahitungod sa panahon diin kini nga mga sulugoon gitawag sa paghago?

Sa daklit ipasabut nga kini nga mga paningkamot nagrepresentar sa pagpundok sa Israel. Aron matabangan ang mga estudyante nga makasabut nga sila kabahin sa grupo sa mga sulugoon kinsa gitawag sa paghago diha sa ubasan sa Ginoo, basaha ang mosunod nga pamahayag ni Elder Dean L. Larsen sa Seventy. Hangyoa ang mga estudyante sa pagpaminaw kon kinsa ang iyang giila isip “ang katapusang mga mamumuo diha sa ubasan.”

“[Karon] mao ang yugto nga ang Ginoo ug ang iyang mga sulugoon mohimo og katapusang mahinungdanon kaayong paningkamot sa pagdala sa mensahe sa kamatuoran ngadto sa tanang mga katawhan sa yuta ug sa pagbawi sa mga kaliwat sa karaang Israel kinsa nawad-an sa ilang tinuod nga pagkatawo. …

Kamo naanhi sa yuta sa dihang ang katukuran gipahimutang alang niining mahinungdanon kaayong buhat. Ang ebanghelyo gipahiuli sa katapusang panahon. Ang Simbahan gitukod sa hapit tanang dapit sa kalibutan. Ang entablado gipahimutang alang sa katapusang mahinuklugon nga mga sitwasyon nga pagadulaon. Kamo ang labing importanting mga magdudula. Kamo ang usa sa katapusang mga mamumuo diha sa ubasan. … Kini mao ang serbisyo nga kamo gipili” (“A Royal Generation,” Ensign, Mayo 1983, 33).

Ipangutana ang mosunod:

Kinsa ang giingon ni Elder Larsen nga mga sulugoon, o “katapusang mga mamumuo,” nga gitawag sa pagtrabaho diha sa ubasan?
Unsa nga mga oportunidad kamo aduna sa pagserbisyo sa Ginoo ug pagtabang sa uban nga mamunga og “maayong bunga”?

Isip usa ka klase, basaha og kusog ang Jacob 5:71. Dapita ang mga estudyante sa pag-ila unsa ang gisaad sa Ginoo niadtong kinsa naghago uban Kaniya. Pangutan-a ang mga estudyante kanus-a gibati nila nga napanalanginan sa ilang mga kahago sa pagserbisyo sa Ginoo.

Jacob 7

Nagsalig si Jacob diha sa Ginoo samtang nakig-atubang ni Sherem ug nangulo sa dakong pundok sa mga Nephite sa pagbalik ngadto sa Ginoo

Pahinumdom: Sa Jacob 7 nakat-unan sa mga estudyante ang mahitungod sa unsa nga paagi gibuntog ni Jacob ang pagsupak sa iyang hugot nga pagtuo ni Jesukristo gikan sa usa ka tawo nga ginganlan og Sherem, usa ka anti-Kristo. Samtang kini nga leksyon wala magpunting sa kasinatian ni Jacob kang Sherem, mahimo nimong dapiton ang mga estudyante sa pag-summarize sa mga panghitabo ug sa pag-ila og kamatuoran nga ilang nakat-unan gikan sa panig-ingnan ni Jacob. Sa piho, mahimo nimong hatagan og gibug-aton ang kamatuoran nga kita dili matarug sa atong hugot nga pagtuo kon ang atong mga pagpamatuod gibase sa pagpadayag ug tinuod nga espiritwal nga mga kasinatian.

Enos

Human makadawat og kapasayloan sa iyang mga sala, nag-ampo si Enos alang sa uban ug naghago alang sa ilang kaluwasan

Imahe

prayer diagram

I-drowing kini nga diagram diha sa pisara o diha sa usa ka palid nga papel. Hangyoa ang mga estudyante s pagpasabut kon sa unsa nga paagi kini may kalabutan ngadto sa kasinatian ni Enos.

Bahina ang mga estudyante ngadto sa tulo ka mga grupo. (Kon gamay ang imong klase, ang grupo mahimong maglangkob og usa ka tawo.) Hangyoa ang unang grupo sa pagbasa sa Enos 1:4–6 ug mangandam sa pagpasabut og kamatuoran nga atong makat-unan gikan sa pag-ampo ni Enos alang sa iyang kaugalingon. Hangyoa ang ikaduhang grupo sa pagbasa sa Enos 1:9–10 ug mangandam sa pagpasabut og kamatuoran nga atong makat-unan gikan niana nga bahin sa pag-ampo ni Enos. Hangyoa ang mga anaa sa ikatulong grupo sa pagbasa sa Enos 1:11–14 ug mangandam sa pagpasabut og kamatuoran nga atong makat-unan gikan niana nga bahin sa pag-ampo ni Enos. Dayon hangyoa ang usa ka miyembro sa matag grupo sa pagpakigbahin sa unsay ilang giandam. Hangyoa ang mga estudyante sa pagribyu sa day 3, assignment 9 diha sa ilang mga scripture study journal, ug dapita ang pipila sa pagpakigbahin kon unsaon nila sa paggamit ang mga kamatuoran gikan sa basahon ni Enos.

Jarom ug Omni

Ang mga tigtipig sa mga rekord nag-istorya sa mga pakigbisog ug mga panalangin sa mga Nephite.

Kon ang mga estudyante adunay mga pangutana mahitungod sa mga panaw sa nagkalain-laing mga tawo ngadto sa mga yuta sa Kasadpang Katunga sa Kalibutan, mahimo nimo nga ihisgot kanila ang materyal diha sa manwal sa estudyante mahitungod sa Omni 1:1–30, lakip ang pamahayag ni Presidente Anthony W. Ivins sa Unang Kapangulohan.

Dapita ang mga estudyante sa pagribyu sa mga pakigpulong nga ilang giandam mahitungod sa pagduol ngadto ni Kristo (day 4, assignment 4). Kon itugot sa panahon, mahimo nimong hangyoon ang pipila sa mga estudyante sa paghatag sa ilang mga pakigpulong ngadto sa klase. Kon hangyoon nimo og una ang mga estudyante sa paghatag sa ilang mga pakigpulong, siguroha sa paghatag og igo nga panahon alang kanila sa pagbuhat sa ingon.

Siguroha ang pagpasalamat sa mga estudyante alang sa ilang pag-apil. Pagpamatuod sa gugma sa Langitnong Amahan ug ni Jesukristo nga anaa alang sa matag usa sa imong mga estudyante, ug ipasalig kanila nga samtang sila moduol ngadto ni Kristo uban sa tibuok nilang mga kalag, maluwas sila ngadto sa Iyang gingharian.

Sunod nga Unit (Mga Pulong ni Mormon–Mosiah 6)

Sa sunod nga unit, ang mga estudyante mobasa kabahin sa usa ka anghel sa Dios nga nagpakita ngadto ni Haring Benjamin, nagtudlo kaniya, ug nagsulti kaniya kon unsa ang isulti ngadto sa iyang mga katawhan (tan-awa sa Mosiah 3). Gipamulong kini nga mga pulong ni Haring Benjamin ngadto sa iyang mga katawhan, kinsa nakasinati og dakong kausaban sa ilang mga kasingkasing.