Pasiuna saAng Basahon ni Jarom

Nganong tun-an kini nga basahon?

Samtang ang mga estudyante nagtuon sa basahon ni Jarom, ilang makat-unan nga ang Dios nagtuman sa Iyang saad sa pagpanalangin niadtong kinsa nagsunod sa Iyang mga sugo. Makat-unan usab nila ang mahitungod sa mga paningkamot sa mga haring Nephite, mga propeta, mga magtutudlo, ug mga pari sa panahon ni Jarom sa pagtabang sa mga katawhan sa paghinulsol ug sa paglikay sa kalaglagan.

Kinsa ang nagsulat niini nga basahon?

Ang anak nga lalaki ni Enos nga si Jarom ang misulat niini nga basahon. Sama sa iyang amahan—ug sama sa iyang apohan nga lalaki nga si Jacob ug sa iyang apohang lalaki sa tuhod nga si Lehi—si Jarom adunay espiritu sa panagna ug pagpadayag(tan-awa sa Jarom 1:2). Sa dihang nahuman niya ang iyang rekord, iyang gihatag ang mga palid ngadto sa iyang anak nga lalaki nga si Omni.

Para kang kinsa kini nga basahon gisulat ug ngano?

Miingon si Jarom nga siya nagsulat “sumala sa sugo sa [iyang] amahan, si Enos, nga ang [ilang] kasaysayan sa kagikanan matipigan” (Jarom 1:1). Gipakita usab niya nga ang iyang rekord “gisulat alang … sa kabulahanan sa [iyang] mga kaigsoonan ang mga Lamanite” (Jarom 1:2; tan-awa usab sa Enos 1:13–18). Wala mirekord si Jarom sa iyang kaugalingon nga mga pagpanagna ug mga pagpadayag, tungod kay nagtuo siya nga kadtong girekord sa iyang amahan igo nga “mipadayag sa plano [laraw] sa kaluwasan” (Jarom 1:2). Hinoon, gihulagway niya ang mga kahago sa mga lider sa Nephite sa panahon sa iyang pagpangalagad. Kini nga mga lider “lig-on nga mga tawo diha sa hugot nga pagtuo sa Ginoo” (Jarom 1:7) kinsa nagpadayon sa pag-awhag sa mga katawhan sa paghinulsol ug pagsunod sa mga sugo (tan-awa sa Jarom 1:3–5, 10–12). Giobserbahan ni Jarom nga kon ang mga katawhan mipili sa pagsunod sa tambag sa ilang matarung nga mga lider, sila miuswag ug nakahimo sa paglig-on sa ilang mga kaugalingon batok sa mga Lamanite. Gipamatuod niya, “Ang pulong sa Ginoo namatud-an, diin siya namulong ngadto sa among mga amahan, nag-ingon nga: Ingon nga kamo naghupot sa akong mga sugo kamo mouswag diha sa yuta” (Jarom 1:9; tan-awa usab sa 1 Nephi 2:19–20).

Kanus-a ug diin kini gisulat?

Ang basahon ni Jarom gibana-bana nga naglangkob og 59 ka tuig, gikan sa mga 420 B.C. ngadto sa 361 B.C. (tan-awa sa Enos 1:25; Jarom 1:13). Kini gisulat diha sa yuta sa Nephi.

Unsa ang pipila ka mga butang nga nakalahi niini nga basahon?

Ang basahon ni Jarom mao ang labing mubo nga basahon diha sa Basahon ni Mormon. Kini naghatag og mga detalye mahitungod sa pagtubo sa sibilisasyon sa Nephite, nagpahayag nga sila “midaghan sa hilabihan, ug mikatap diha sa ibabaw sa yuta” (Jarom 1:8). Nahimo usab sila nga adunahan sa mga kapanguhaan ug nahimong batid sa pagtrabaho sa kahoy ug metal, pagtukod og mga gambalay, kahanas sa makinarya, paghimo og kahimanan ug mga hinagiban (tan-awa sa Jarom 1:8).

Outline

Jarom1:1–2 Nagdawat si Jarom sa mga palid ug nagpasabut sa iyang katuyoan sa pagsulat.

Jarom 1:3–12 Nagrekord si Jarom sa katumanan sa saad sa Ginoo sa pagpanalangin ug pag-uswag sa mga Nephite samtang sila naghupot sa Iyang mga sugo. Nagpamatuod siya sa gahum sa Manluluwas sa pagluwas sa mga katawhan gikan sa sala bisan sa wala pa ang Iyang mortal nga pangalagad, nagtugot sa mga katawhan nga “motuo diha kaniya … ingon og siya mianhi na” (Jarom 1:11)

Jarom1:13–15 Nagpahayag si Jarom nga ang usa ka istorya kabahin sa mga gubat tali sa mga Nephite ug mga Lamanite gitipigan diha sa dagkong mga palid ni Nephi. Gitugyan niya ang gagmay nga mga palid ngadto sa iyang anak nga lalaki nga si Omni.