Leksyon 26

2 Nephi 4

Pasiuna

Human sa kamatayon ni Lehi, si Laman ug si Lemuel nasuko kang Nephi “tungod sa mga pahimangno sa Ginoo” nga gipamulong ni Nephi ngadto kanila (tan-awa sa 2 Nephi 4:13–14). Nabalaka tungod sa mga kinaiya ug mga lihok sa iyang mga igsoong lalaki ug sa iyang kaugalingong mga kahuyang ug mga sala, girekord ni Nephi ang iyang mga gibati diha sa mapadayagon ug balaknon nga pinulongan. Gihulagway niya ang iyang gugma alang sa mga kasulatan ug ang iyang pasalamat alang sa mga panalangin ug kalig-on nga iyang nadawat gikan sa Ginoo (tan-awa sa 2 Nephi 4:15–35).

Mga Sugyot alang sa Pagtudlo

2 Nephi 4:1–11

Gitambagan ug gipanalanginan ni Lehi ang iyang pamilya

Sa dili pa magsugod ang klase, isulat ang mosunod nga pangutana diha sa pisara:

Kon usa kamo ka matinud-anong apohan ug ang inyong mga anak wala magsunod sumala sa mga sumbanan sa ebanghelyo, unsa nga tambag ang inyong ihatag sa inyong mga apo?

Pagsulat sa pisara

Ang usa ka makapahunahuna nga kinutlo o pangutana diha sa pisara makatabang sa mga estudyante nga mahimong interesado sa leksyon ug mapabilin ang ilang atensyon. Mahimo usab nga makatabang ang pagbutang og materyal sa leksyon sama sa mga scripture reference, mga tsart, ug mga diagram diha sa pisara. Depende sa gitas-on ug gamit sa materyal, mahimo nimo kining ibutang diha sa pisara sa dili pa magsugod ang klase. Makatabang kini nimo nga maka-save og oras atol sa klase ug malikayan ang wala kinahanglana nga pagkabalda.

Sugdi ang klase pinaagi sa pagdapit sa mga estudyante sa pagtubag sa pangutana diha sa pisara. Human makatubag ang mga estudyante, ipangutana:

• Unsa nga mga responsibilidad ang anaa sa mga ginikanan ug mga apohan sa pagtudlo ug pagtambag sa ilang mga anak ug mga apo?

Isip kabahin niini nga panaghisgutan, mahimo nimong basahon o hangyuon ang usa ka estudyante sa pagbasa sa mosunod nga pamahayag:

“Ang mga ginikanan adunay sagrado nga katungdanan sa pag-amuma sa ilang mga anak sa paghigugma ug pagkamatarung, sa pagsangkap alang sa ilang pisikal ug espirituhanon nga mga panginahanglan, ug sa pagtudlo kanila sa paghigugma ug pag-alagad sa usag usa, pagsunod sa mga sugo sa Dios, ug kinsa mosunod sa mga balaod sa ilang nasud bisan asa sila magpuyo. Mga bana ug mga asawa—mga inahan ug mga amahan—adunay tulubagon sa atubangan sa Dios sa pagtuman niini nga mga kapangakohan.” … Ang uban nga mga kapamilya kinahanglan nga motabang kon gikinahanglan” (“Ang Pamilya: Usa ka Pamahayag ngadto sa Kalibutan,” Ensign, Nob. 2010, 129).

Ipaila ang 2 Nephi 4 pinaagi sa pagpasabut nga sa wala pa mamatay si Lehi, gitambagan niya ang iyang kaliwatan sa pagsunod sa mga sugo. Dapita ang mga estudyante sa pagbasa sa 2 Nephi 4:3–11, nga ilhon ang mga tawo nga gitudloan ni Lehi ug sa tambag nga iyang gihatag ngadto kanila.

• Kinsa man ang gitudloan ni Lehi? (Tan-awa sa 2 Nephi 4:3, 8, 10–11.)

• Unsa nga saad ang gihatag ni Lehi ngadto sa mga anak nila ni Laman ug Lemuel? (Tan-awa sa 2 Nephi 4:7, 9.)

• Base sa 2 Nephi 4:5, unsay inyong masulti nga responsibilidad nga gihatag sa Ginoo ngadto sa mga ginikanan? (Ang mga estudyante mahimong mogamit og lain-laing mga pulong sa pagtubag niining pangutana, apan siguroha nga nasabtan nila nga ang mga ginikanan dunay hinatag sa Dios nga responsibilidad sa pagtudlo sa ebanghelyo ngadto sa ilang mga anak.)

• Unsa ang ubang mga kamatuoran nga inyong nakat-unan gikan sa inyong mga ginikanan o mga apohan?

Awhaga ang mga estudyante nga mahimong lig-on nga mga koneksyon diha sa pagsumpay sa ilang mga pamilya—sa pagtuman sa ebanghelyo ug sa pag-andam nga mahimong matarung nga mga ginikanan. Mahimo nimong i-display kining poster nga giulohan og “Be a Strong Link” (tan-awa sa http://lds.org/liahona/2003/09/poster).

2 Nephi 4:12–35

Giila ni Nephi ang iyang mga kahuyang ug mipahayag sa iyang pagsalig sa Ginoo

Diha sa pisara, isulat ang Ang akong kalag nalipay sa …

Hangyoa ang mga estudyante sa pagsulat niini nga mga pulong diha sa ilang mga scripture study journal o mga class notebook ug tiwason ang pamahayag, maglista sa mga butang nga makapalipay sa ilang mga kalag.

Hangyoa ang usa ka estudyante sa pagbasa og kusog sa 2 Nephi 4:15–16 aron mahibalo kon giunsa ni Nephi paghuman kini nga mga pulong.

• Unsa ang pipila ka mga butang nga mahimo natong buhaton kon nalipay kita sa mga kasulatan?

• Unsay buot ipasabut niini nganha kaninyo nga malipay sa mga butang sa Ginoo?

• Miingon si Nephi nga ang iyang kasingkasing namalandong sa mga butang nga iyang nakita ug nadungog. Unsa man ang kahulugan niini nganha kaninyo?

Ipasabut nga nasinati ni Nephi ang hilabihan nga kalipay diha sa iyang kinabuhi. Hinoon, gisagubang usab niya ang mga kalisdanan. Ipabasa og hilum sa mga estudyante ang 2 Nephi 4:12–13 aron makita ang pipila ka mga hagit nga nasagubangan ni Nephi niining higayuna sa iyang kinabuhi. (Ang kamatayon ni Lehi ug ang kasuko nila ni Laman, Lemuel, ug sa mga anak nga lalaki ni Ishmael.)

Daghan sa mga pagsulay ni Nephi miresulta gikan sa mga lihok ug mga kinaiya sa iyang magulang nga mga igsoong lalaki. Apan mibati usab si Nephi og kasubo tungod sa iyang kaugalingong mga kahuyang. Isulat sa pisara ang Ang akong kalag nagmagul-anon tungod …

Dapita ang mga estudyante sa pagbasa sa 2 Nephi 4:17–18 ug ug mangita sa mga rason nganong mibati si Nephi og kasubo.

Kon ang mga estudyante duna nay igong panahon sa pagbasa niining mga bersikulo, pangutan-a sila kon unsa ang ilang nakit-an. Itumong ang ilang pagtagad ngadto sa mga pulong nga pagkaalaot, pagkahuyang, ug mohasol diha niini nga mga bersikulo. Ipasabut nga ang pulong pagkaalaot nagpasabut nga uyamot o minos og kalidad. Diha sa kasulatan, ang pulong nga pagkahuyang sa kasagaran nag-refer sa atong kahuyang tungod kay nagpuyo kita sa usa ka napukan nga kahimtang. Ang pulong nga mohasol nagpasabut nga molibut o modutdot gikan sa tanang habig.

• Unsa ang pipila ka mga ehemplo sa mga kalisdanan nga makapahasol kanato? (Ang mga tubag mahimong maglakip sa kasamok sa panimalay, pagpamugos sa kaedad, lisud nga buhatunon sa eskwelahan, ug mga tintasyon.)

Ipabasa sa usa ka estudyante ang 2 Nephi 4:19. Mahimo nimong awhagon ang mga estudyante sa pag-highlight sa pamahayag nga “Bisan pa niana, ako nasayud kang kinsa ako mosalig.” Ipasabut nga sa 2 Nephi 4:19, ang mga pulong ni Nephi nausab gikan sa pagkaguol ngadto sa paglaum.

• Unsa man sa inyong hunahuna ang gipasabut ni Nephi sa dihang siya miingon “Ako nasayud kang kinsa ako mosalig”?

• Sa unsang paagi nga ang paghinumdom sa Ginoo ug sa Iyang kaayo nakatabang kanato sa panahon sa pagkawalay kadasig?

Basaha og kusog ang 2 Nephi 4:20–25. Hangyoa ang mga estudyante nga magsunod diha sa ilang mga kasulatan. Dapita sila sa pagpangita sa mga pulong nga nagpakita nga ang Dios mosuporta niadtong misalig diha Kaniya.

Pagbasa og kusog sa mga kasulatan

Matag karon ug unya, basaha og kusog ang mga tudling sa kasulatan ngadto sa imong mga estudyante. Mopresentar kini og kahigayunan alang kanila nga makadungog ug mobati sa imong gugma alang sa mga kasulatan, ug makapadasig kini kanila sa pagbasa sa mga kasulatan nga sila mismo. Makahatag usab kini og mga oportunidad aron sa pagsiguro nga ang usa ka piho nga punto, kamatuoran, o paggamit nahatagan og gibug-aton. Ang mga estudyante makabenepisyo usab gikan sa pagbasa og kusog sa mga kasulatan ngadto sa usag usa ug bisan diha sa ilang personal nga pagtuon.

• Unsa nga mga pulong diha sa 2 Nephi 4:20–25 ang inyong nakita nga makahuluganon? Ngano man?

• Paghunahuna og usa ka higayon sa dihang ang Ginoo misuporta kaninyo o mitabang kaninyo sa usa ka panahon sa kalisud. Giunsa man Niya sa pagtabang kaninyo? Sa unsang paagi nga kana nga kasinatian nakaimpluwensya kaninyo?

Mahimong makatabang ang paghatag sa mga estudyante og panahon sa paghunahuna bahin sa maong mga kasinatian ug morekord niini diha sa ilang mga scripture study journal. Ang mga etudyante mahimo usab nga makabenepisyo kon imo silang sultihan bahin sa usa ka higayon sa dihang ang Dios misuporta o mipatunhay kanimo.

Tabangi ang mga estudyante nga makasabut nga ang abilidad ni Nephi sa paghinumdom ug pagpasalamat sa unsay nabuhat sa Ginoo alang kaniya sa nangagi nakahatag kaniya og paglaum ug nakapadasig kaniya nga mahimong mas maayo pa. Dapita ang mga estudyante sa pagbasa og hilum sa 2 Nephi 4:26–30, nga mangita kon sa unsang paagi nga ang mga kasinatian ni Nephi nakaapekto sa iyang tinguha nga mahimong matarung. Hangyoa ang pipila ka mga estudyante sa pagpakigbahin sa unsay ilang nadiskubrihan.

Hangyoa ang pipila ka mga estudyante nga magpuli-puli sa pagbasa og kusog gikan sa 2 Nephi 4:30–35. Isip usa ka klase, hibaloi ang mga pasalig nga gihimo ni Nephi ngadto sa Ginoo ug ang mga panalangin nga iyang gihangyo.

• Unsa ang atong makat-unan gikan niini nga pag-ampo nga makatabang nato sa atong personal nga mga pag-ampo? (Ang mga estudyante mahimong mogamit og lain-laing mga pulong sa pagtubag niining pangutana, apan siguroha nga nasabtan nila nga ang sinsero nga pag-ampo makapalig-on sa atong pasalig sa pagbuntog sa sala ug pagkawalay kadasig.)

Dapita ang mga estudyante sa paghunahuna og higayon sa dihang ang pag-ampo nakatabang kanila nga mabuntog ang sala o pagkawalay kadasig. Mahimo nimong isugyot nga ilang ipakigbahin ang ilang mga kasinatian o irekord kini diha sa ilang mga scripture study journal.

Hatagi ang mga estudyante og higayon sa pagpangita og usa ka tudling diha sa 2 Nephi 4 nga nagpakita sa usa ka tinguha nga aduna sila. Human sa igong panahon, basaha ang mosunod nga pamahayag ni Elder David A. Bednar sa Korum sa Napulog Duha ka mga Apostoles kon sa unsang paagi nga ang pag-ampo makaugmad og espirituhanon nga pagtubo:

“Tingali adunay mga butang sa atong kinaiya, sa atong pamatasan, o kalabut sa atong espirituhanon nga pagtubo diin kita nanginahanglan sa pagpakitambag ngadto sa Langitnong Amahan diha sa pag-ampo sa buntag. Human sa pagpahayag og tukma nga pagpasalamat alang sa mga panalangin nga nadawat, kita mangamuyo alang sa pagsabut, panudlo, ug panabang sa pagbuhat sa mga butang nga dili nato mabuhat sa atong kaugalingong kusog nga mag-inusara. Sama pananglit, samtang kita nag-ampo, kita tingali:

“• Mamalandong niadtong mga higayon sa diha nga misulti kita sa masakit o dili tukma nga paagi ngadto kinsa atong labing gimahal.

“• Moangkon nga kita mas labaw nga nakahibalo niini, apan kita dili sa kanunay molihok pinasubay sa unsay atong nahibaloan.

“• Mopahayag og pagbasol sa atong mga kahuyang ug sa wala pagbiya sa atong kinaiyanhon nga pagkatawo sa labaw ka matinguhaon.

“• Mohukom sa pagpasubay sa atong kinabuhi sunod sa Manluluwas sa mas hingpit nga paagi.

“• Mangamuyo alang sa mas dako nga kalig-on sa pagbuhat ug sa paghimo og mas labaw ka maayo” (“Ampo sa Kanunay,” Ensign o Liahona, Nob 2008, 41–42).

Tapusa pinaagi sa pag-refer ngadto sa mga pulong nga imong gisulat sa mas sayo pa diha sa leksyon (“Ang akong kalag nalipay sa …” ug “Ang akong kalag nagmagul-anon tungod …”). Ipahayag ang imong pagsalig nga bisan kon mag-atubang kita og lisud nga mga sitwasyon, makasinati kita og kalipay ug kalinaw samtang magtinguha kita sa panabang sa Ginoo.

Ribyu sa Scripture Mastery

Pahinumdom: Ang gitas-on niini nga leksyon mahimong motugot og panahon alang sa mosunod nga kalihokan sa pagribyu sa scripture mastery. Mahimo nimong ipahigayon ang kalihokan atol sa pagsugod sa klase, isip break tali sa mga seksyon sa leksyon, o atol sa pagtapus sa klase. Siguroha nga mubo ra kini aron makatugot og panahon alang sa leksyon. Alang sa uban nga pangribyu nga mga kalihokan, tan-awa ang appendix sa katapusan niining manwal.

Ang mga quiz makatabang sa mga estudyante nga mahinumduman kon unsay ilang nakat-unan ug masukod ang ilang nakat-unan. Pagpili og pipila ka bag-ong mga scripture mastery passage, ug dapita ang mga estudyante nga basahon ug markahan kini diha sa ilang mga kasulatan. Dayon hatagi sila og verbal quiz bahin niadtong mga tudling ug sa ubang mga scripture mastery passage nga ila nang nakat-unan. Alang sa matag tudling, basaha ang mahinungdanon nga pulong o mga pulong gikan sa seminary bookmark. Dayon hangyoa ang mga estudyante sa pagpangita sa husto nga tudling diha sa ilang mga kasulatan.

Komentaryo ug Background nga Impormasyon

2 Nephi 4:16–35. Pagbuntog sa atong mga sala ug mga kahuyang

Samtang magtuon kita sa kinasingkasing nga pangamuyo ni Nephi aron tabangan siya sa Ginoo nga mabuntog ang iyang mga sala ug mga kahuyang, atong makita nga makaadto kita sa Ginoo alang nianang sama nga tabang. Ang mga pulong ni Nephi gisubli diha sa mga pulong sa mga propeta sa ulahing mga adlaw.

Si Propeta Joseph Smith nagtudlo:

“Kon magkaduol ang tawo sa kahingpitan, mas labaw pa ka tin-aw ang iyang mga panglantaw, ug mas hilabihan pa ang iyang kalipay, hangtud nga iyang mabuntog ang mga kadautan sa iyang kinabuhi ug mawala ang matag tinguha sa pagpakasala” (Mga Pagtulun-an sa mga Presidente sa Simbahan: Joseph Smith [2007], 251–52).

Si Elder Richard G. Scott sa Korum sa Napulog Duha ka mga Apostoles mipamatuod bahin sa mga panalangin nga atong madawat kon maghinulsol kita:

“Nganong ang atong Amahan ug ang Iyang Anak misugo man kanato nga maghinulsol? Tungod kay nahigugma sila kanato. Nasayud sila nga kitang tanan mosupak sa mahangturong mga balaod. Magamay man kini o madako, ang hustisya nagkinahanglan nga ang matag balaod nga nasupak kinahanglang mahatagan og kaangayan aron mapabilin ang saad sa hingpit nga kalipay niining kinabuhia ug ang pribilehiyo nga makabalik sa Amahan sa Langit. Kon dili mahatagan og kaangayan, sa Adlaw sa Paghukom ang hustisya maoy hinungdan nga kita isalikway gikan sa presensya sa Dios ubos sa pagkontrolar ni Satanas [tan-awa sa 2 Nephi 9:8–10; 2 Nephi 2:5].

“Ang atong Agalon ug ang Iyang matubsanong buhat ang mihimong posible aron makalikay kita sa maong panghimaraut. Mahimo kini pinaagi sa hugot nga pagtuo diha ni Jesukristo, pagsunod sa Iyang mga sugo, ug paglahutay diha sa pagkamatarung hangtud sa katapusan.

“Hingpit ba ninyong gipahimuslan ang matubsanong gahum sa paghinulsol diha sa inyong kinabuhi aron makabaton kamo og dugang kalinaw ug hingpit nga kalipay? Ang mga pagbati sa kasamok ug kawalay paglaum sa kasagaran mohatag og timailhan sa panginahanglan alang sa paghinulsol. Ang kakulang usab sa espirituhanong giya nga inyong gitinguha sa inyong kinabuhi mahimong moresulta gumikan sa nasupak nga mga balaod. Kon gikinahanglan, ang hingpit nga paghinulsol maoy mopatunhay og balik sa inyong kinabuhi. Sulbaron niini ang tanang komplikado nga espirituhanong mga kasakit nga miabut gumikan sa kalapasan. Apan niining kinabuhia dili kini makatambal sa pipila sa pisikal nga mga sangputanan nga mahimong mahitabo gumikan sa bug-at nga sala. Magmaalamon ug kanunayng magpakabuhi sa maayong paagi nga anaa sa utlanan sa pagkamatarung nga gitakda sa Ginoo” (“The Path to Peace and Joy,” Ensign, Nob. 2000, 25).