Leksyon 68

Mosiah 28–29

Pasiuna

Ingon nga nakabig, ang anak nga mga lalaki ni Haring Mosiah mibati og lig-on nga tinguha sa pagsangyaw sa ebanghelyo ngadto sa mga Lamanite. Human nagpakisayud sa Ginoo ug nagdawat og kasigurohan nga sila mapanalanginan og kalampusan ug proteksyon, gitugutan sila ni Mosiah sa paglakaw. Sa sama niini nga panahon, si Mosiah naningkamot sa pagbantay sa sagradong mga rekord nga gisalig nganha kaniya. Gihubad niya ang mga rekord sa Jaredite ug dayon gitugyan ang tanan nga mga rekord diha ni Alma nga Batan-on. Tungod kay ang iyang anak nga mga lalaki mibalibad sa oportunidad nga mahimong hari, gitukod niya ang usa ka sistema sa mga maghuhukom isip usa ka bag-ong matang sa panggobyerno diha sa yuta.

Mga Sugyot alang sa Pagtudlo

Mosiah 28:1–9

Ang anak nga mga lalaki ni Mosiah nagtinguha sa pagsangyaw ngadto sa mga Lamanite

Sa wala pay klase, isulat ang mosunod nga mga pamahayag diha sa pisara:

1. Ako adunay sinserong tinguha alang sa mahangturong kalipay sa uban.

2. Andam ako nga mosakripisyo aron sa pagtabang sa uban.

3. Ako adunay tinguha sa pagpaambit sa ebanghelyo ngadto sa uban.

Sa pagsugod sa klase, hangyoa ang mga estudyante sa paggamit sa mga pamahayag diha sa pisara sa pagtimbang-timbang sa hilum sa ilang mga kaugalingon. Pagamita sila og rating scale gikan sa 1 ngadto sa 10, nga ang gradong 1 nagpakita nga ang pamahayag wala maghulagway kanila nga maayo ug ang grado nga 10 nagpakita nga ang pamahayag naghulagway kanila nga maayo kaayo.

Dapita ang mga estudyante sa pagbasa og hilum sa Mosiah 27:8–10.

• Unsa kaha ang grado nga makuha ni Alma ug sa anak nga mga lalaki ni Mosiah sa samang sukdanan niini nga panahon sa ilang mga kinabuhi?

Hangyoa ang usa ka estudyante sa pagbasa og kusog sa Mosiah 28:1–4.

• Unsa kaha ang grado sa anak nga mga lalaki ni Mosiah sa samang sukdanan human sa ilang pagkakabig? Hain nga mga hugpong sa mga pulong diha sa Mosiah 28:1–4 nagpakita kon unsa ka dako ang ilang kausaban?

• Ngano nga ang mga tinguha sa anak nga mga lalaki ni Mosiah nausab? (Nagpakita sila og hugot nga pagtuo diha ni Jesukristo, naghinulsol sa tanan nilang mga kasal-anan, ug nakabig; tan-awa sa Mosiah 27:34–36. Mahimo usab nga mo-refer ka ngadto sa Mosiah 28:4 aron ipasabut kon sa unsa nga paagi gi-impluwensya sila sa Espiritu sa Ginoo.)

• Gikan sa unsay inyong nakat-unan mahitungod sa mga Lamanite niini nga panahon sa ilang kasaysayan, unsa nga mga kalisud ang mahimong masugatan sa mga misyonaryo diha kanila?

• Sumala sa Mosiah 28:2, unsa nga kalainan ang gituohan sa anak nga mga lalaki ni Mosiah nga mahimo sa ilang pagsangyaw diha sa mga kinabuhi sa mga Lamanite?

• Sa unsa nga paagi nga ang pagkakabig sa anak nga mga lalaki ni Mosiah nag-impluwensya sa ilang tinguha sa pagpaambit sa ebanghelyo? Unsa nga mga baruganan ang atong makat-unan gikan sa ilang kasinatian? (I-summarize ang mga tubag sa mga estudyante pinaagi sa pagsulat sa mosunod nga baruganan diha sa pisara: Samtang ang atong pagkakabig nagkalawom, ang atong tinguha sa pagpaambit sa ebanghelyo nagkadako.)

Elder Dallin H. Oaks

Hangyoa ang usa ka estudyante sa pagbasa sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Mahimo nimong awhagon ang mga estudyante sa pagsulat niini nga pamahayag diha sa mga margin sa ilang mga kasulatan tupad sa Mosiah 28:1–4.

“Ang kakusog sa atong tinguha sa pagpaambit sa ebanghelyo usa ka mahinungdanong timailhan sa giladmon sa atong personal nga pagkakabig” (“Sharing the Gospel,” Ensign, Nob. 2001, 7).

Dapita ang mga estudyante sa pagpamalandong kon sa unsang paagi ang ilang tinguha sa pagpaambit sa ebanghelyo ngadto sa uban nagtubo samtang sila nagkaduol ngadto sa Ginoo.

• Unsa nga mga kasinatian sa inyong kinabuhi ang migiya kaninyo sa pagpaambit sa ebanghelyo ngadto sa uban?

Hangyoa ang mga estudyante sa paghanduraw nga nakaila sila og batan-ong lalaki kinsa usa ka miyembro sa Simbahan apan gamay ra ang tinguha sa pagserbisyo og full-time nga misyon.

• Unsa ang mabuhat niining batan-ong lalaki sa pagpatubo sa iyang tinguha sa pagpaambit sa ebanghelyo? (Samtang ang mga estudyante nagpaambit sa ilang mga panan-aw, awhaga sila sa paghinumdom kon unsay nakapalawom sa ilang pagkakabig ngadto sa ebanghelyo ni Jesukristo ug sa unsa nga paagi sila morekomendar og susama nga mga kalihokan o mga kasinatian alang niining batan-on nga lalaki. Tabangi sila sa pagtan-aw nga ang mas lig-on nga pagkakabig naggiya ngadto sa nagtubo nga tinguha sa pagpaambit sa ebanghelyo ngadto sa uban.)

Mga sitwasyon sa tinuod nga kinabuhi

Ang pagkonektar og usa ka baruganan sa ebanghelyo ngadto sa sitwasyon sa tinuod nga kinabuhi makatabang sa mga estudyante sa pagtuki sa baruganan ug pag-ila sa kalabutan niini sa ilang mga kinabuhi. Mahimo nimong tambagan ang mga estudyante nga kon sila mas sinsero nga motubag sa mao nga panig-ingnan, mas epektibo kini sa proseso sa ilang pagkat-on.

Mahimo nimong ipasabut giunsa nimo pagdawat ang tinguha sa pagtudlo sa ebanghelyo ngadto sa uban. Samtang ikaw naghimo sa ingon, hunahunaa ang pagpaambit sa imong pagpamatuod nga samtang kita nagkaduol ngadto sa Ginoo ug gibati ang Iyang Espiritu, ang atong tinguha sa pagpaambit sa ebanghelyo ngadto sa uban magtubo.

Ipabasa sa mga estudyante ang Mosiah 28:5–8 ug ilha kon ngano nga si Mosiah mitugot sa iyang anak nga mga lalaki sa pag-adto sa ingon ka kuyaw nga misyon.

• Agi og tubag ngadto sa pag-ampo ni Mosiah, unsa nga mga panalangin ang gisaad sa Ginoo sa anak nga mga lalaki ni Mosiah?

Mosiah 28:10–20

Naghubad si Mosiah sa mga palid sa Jaredite ug nagtugyan sa sagradong mga rekord diha ni Alma

I-drowing ang mosunod diha sa pisara:

gold plates and crown

Itudlo ang litrato sa korona, ug ipabasa sa estudyante ang Mosiah 28:10. Hangyoa ang klase sa pagpangita og usa ka problema nga ang hari aduna sa dihang mibiya ang iyang anak nga mga lalaki aron magmisyon. (Nanginahanglan siyang mangita og usa ka tawo nga mopuli kaniya isip hari.)

I-summarize ang Mosiah:11–19 pinaagi sa pagpasabut nga si Mosiah nagkatigulang, ug gibaling ang pipila sa iyang atensyon ngadto sa sagradong mga rekord nga gihatag nganha kaniya: mga rekord nga gihatag sa iyang amahan nganha kaniya ug gisultihan siya sa pag-amuma ug sa mga rekord nga gihatag ni Haring Limhi nganha kaniya. Sa iyang kapasidad isip usa ka manalagna, gihubad niya ang rekord sa mga Jaredite—ang mga palid nga nakaplagan sa grupo nga gipadala ni Haring Limhi sa pagpangita sa yuta sa Zarahemla (tan-awa sa Mosiah 8:7–9). Idirekta ang atensyon sa mga estudyante ngadto sa litrato sa mga bulawan nga mga palid diha sa pisara.

Ipasabut nga agi og dugang sa pagtudlo og lider alang sa gingharian, gikinahanglan usab ni Mosiah ang pagtudlo og tigbalantay sa mga palid. Hangyoa ang mga estudyante sa pagbasa og hilum sa Mosiah 28:20

• Kinsa ang midawat sa sagradong mga rekord?

• Nganong si Alma usa ka maayong pinili sa pag-amuma niini nga mga rekord?

Mosiah 29

Ang mga katawhan nagsunod sa tambag ni Mosiah sa pagtukod og usa ka sistema sa mga maghuhukom isip ilang matang sa panggobyerno.

Ipataas sa mga estudyante ang ilang mga kamot kon sila gusto nga mahimong hari o reyna. Pagpili og usa niadtong mga estudyante sa pag-adto sa atubangan sa klase ug pagbarug sa kilid sa korona nga gi-draw diha sa pisara (o pagbutang og korona nga papel diha sa iyang ulo). Ipahulagway sa estudyante unsa nga mga kaayohan iyang masinati gikan sa pagkahari o pagkareyna.

Hangyoa ang usa ka estudyante sa pagbasa og kusog sa Mosiah 29:1–3

• Kinsa ang gusto sa mga tawo nga mahimo nila nga hari?

• Unsa ang gibiyaan sa anak nga mga lalaki ni Mosiah aron sila makasangyaw ngadto sa mga Lamanite?

• Unsa ang pipila ka mga oportunidad ang isakripisyo o ilangan karon sa batan-ong mga lalaki ug mga babaye aron sila makaserbisyo og mga misyon?

I-summarize ang Mosiah 29:4–10 pinaagi sa pagpasabut nga si Haring Mosiah nabalaka nga ang pagtudlo og usa ka bag-ong hari moresulta ngadto sa panagbingkil ug gani sa gubat. Mihisgot usab siya og ubang mga problema nga mahimong moabut kon usa ka dili matarung nga hari ang anaa sa gahum. Ipabasa sa mga estudyante ang Mosiah 29:16–18 ug ipaila kadto nga mga problema.

Ipasabut nga si Haring Mosiah misugyot nga ang panggobyerno nga Nephite kinahanglan nga dili na ipadumala sa usa ka hari. Hinoon, girekomendar niya ang usa ka sistema sa mga maghuhukom, nga ang mga maghuhukom pilion pinaagi sa tingog sa mga katawhan.

Ipabasa sa mga estudyante og hilum ang Mosiah 29:11, 25, nga mangita kon unsaon sa mga maghuhukom sa paghukom sa mga katawhan. (“Sumala sa mga sugo sa Dios” ug “sumala sa mga balaod diin gihatag nganha kaninyo pinaagi sa atong mga amahan.”)

Isulat ang Mosiah 29:26–27, 30, 33–34, 37–38 diha sa pisara. Pares-paresa ang klase. Ipangita sa mga estudyante kini nga mga bersikulo ug ipaila ang mga responsibilidad sa mga katawhan diha sa panggobyerno nga gisugyot ni Haring Mosiah. Dayon ipahisgot sa matag parisan ang mosunod nga mga pangutana. (Mahimo usab nimong isulat kini nga mga pangutana diha sa pisara o ihatag kanila sa usa ka handout.)

• Sumala ni Haring Mosiah, unsa nga mga kaayohan ang moabut ngadto sa paghimo og mga desisyon pinaagi sa tingog sa mga katawhan? (Siya miingon nga ang tingog sa mga katawhan sa kinatibuk-an wala magtinguha og mga butang nga “supak niana diin unsa ang matarung.” Misulti usab siya mahitungod sa panginahanglan sa tanang mga tagilungsod sa pagpakigbahin sa palas-anon sa ilang panggobyerno ug sa pagbaton og “angay nga kahigayunan.”)

• Unsa nga mga sangputanan ang moabut kon ang tingog sa mga katawhan mipili og kadautan? (Ang mga paghukom sa Dios moabut diha kanila, ug sila pagalaglagon.)

• Diha sa Mosiah 29:34, unsa sa inyong hunahuna ang kahulugan sa hugpong sa mga pulong “nga ang matag tawo unta mopas-an sa iyang bahin”? Sa unsa nga paagi kini nga hugpong sa mga pulong magamit ngadto sa mga responsibilidad sa mga tagilungsod sa pag-apil diha sa ilang lokal ug nasyonal nga mga panggobyerno?

Basaha ang mosunod nga pamahayag ni Elder Neal A. Maxwell sa Korum sa Napulog Duha ka mga Apostoles:

“Kay kon unsay mahitabo sa pagkunhod sa kultura ang mga lider ug mga sumusunod sa tinuoray adunay tulubagon. … Sayon kini sa pagpanaway og ngil-ad nga mga lider, apan kinahanglan dili nato hatagan ang mga sumusunod og libreng kahigayunan” (“Repent of [Our] Selfishness,” Ensign, May 1999, 24).

• Nganong importante sa mga lider ug sa mga sumusunod nga manubag alang sa ilang mga lihok?

• Unsa ang inyong mabuhat sa pagsuporta og matarung nga mga balaod ug mga lider? (Mahimo ninyong i-refer ang mga estudyante sa Mga Artikulo sa Hugot nga Pagtuo 1:12.)

Isulti ang inyong paniguro nga samtang dili tanang mga nasud sa kalibutan ang adunay oportunidad sa pagpili sa ilang kaugalingong mga lider, ang Ginoo sa kanunay motabang niadtong kinsa nagsalig Kaniya, way pagsapayan hain sila nagpuyo.

Dapita ang usa ka estudyante sa pagbasa og kusog sa Mosiah 29:41–43

• Kinsa ang gipili sa mga katawhan nga mahimong unang labaw nga maghuhukom? Gihimo ba niya ang iyang katungdanan nga mahimong usa ka makiangayon ug matarung nga lider? Unsa ang miresulta gikan sa iyang pamunoan?

Hangyoa ang mga estudyante sa pagpasabut diha sa ilang kaugalingong mga pulong unsay ilang nakat-unan gikan sa Mosiah 29. Mahimo nilang ilhon ang pipila sa mosunod nga mga kamatuoran:

Ang dili matarung nga pamunuan magdala og panagbingkil ug sala.

Dili kini naandan alang sa tingog sa mga katawhan sa pagpili og usa ka butang nga dili matarung.

Kon ang mga katawhan nagpili og kadautan, ang mga paghukom sa Dios moabut diha kanila.

Ang matag tawo adunay katungdanan sa pagsuporta og matarung nga mga balaod ug mga lider.

Tapusa pinaagi sa pagpamatuod sa mga baruganan sa leksyon karon.

Ribyu sa Mosiah

Paggahin og pipila ka panahon sa pagtabang sa mga estudyante sa pagribyu sa basahon ni Mosiah. Hangyoa sila sa paghunahuna mahitungod sa unsay ilang nakat-unan gikan niini nga basahon, sa seminary ug sa ilang personal nga pagtuon sa kasulatan. Kon gikinahanglan, dapita sila sa paglaktaw-laktaw og basa sa basahon aron sa pagtabang kanila sa paghinumdom. Human sa igong panahon, dapita ang pipila ka mga estudyante sa pagpaambit sa ilang mga hunahuna ug mga pagbati mahitungod sa usa ka butang diha sa basahon nga nakapadani kanila.

Komentaryo ug Background nga Impormasyon

Mosiah 28:3. Ang tinguha sa pagpaambit sa ebanghelyo

Si Elder M. Russell Ballard sa Korum sa Napulog Duha ka mga Apostoles misugyot og usa ka epektibo nga paagi nga ang mga miyembro sa Simbahan makahimo sa pagpaambit sa ebanghelyo:

“Ang yawe sa malampusong misyonaryong buhat sa miyembro mao ang pagpakita og hugot nga pagtuo. Usa ka paagi sa pagpakita sa inyong hugot nga pagtuo diha sa Ginoo ug sa Iyang mga saad mao ang pagmainampuong pagtakda og petsa nga adunay tawo nga andamon para ipaila-ila sa mga misyonaryo. Nakadawat ako og gatusan ka mga sulat gikan sa mga miyembro kinsa nagpakita sa ilang hugot nga pagtuo niining yano nga paagi. Bisan tuod og ang mga pamilya walay usa ka tawo diha sa ilang hunahuna kang kinsa ilang mapaambit ang ebanghelyo, nagtakda sila og petsa, nag-ampo, ug dayon nakigsulti ngadto sa daghang pang mga tawo. Ang Ginoo mao ang Maayong Magbalantay, ug nakaila Siya sa Iyang mga karnero kinsa giandam na nga maminaw sa Iyang tingog. Mogiya Siya kanato samtang kita mosiksik sa Iyang balaanong tabang sa pagpaambit sa Iyang ebanghelyo” (“Paghimo og Mapaambiton sa Ebanghelyo nga Panimalay,” Ensign o Liahona, Mayo 2006, 86).

Mosiah 29:41–44. Ang pagmando sa mga maghuhukom

Ang kausaban diha sa panggobyerno nga gitukod pinaagi ni Haring Mosiah hilabihan ka importante nga sukad niana hangtud sa pagkatawo ni Kristo (tan-awa sa 3 Nephi 2:8) girekord sa mga Nephite ang ilang panahon kalabut ngadto sa sinugdanan sa pagmando sa mga maghuhukom. Sa miagi ang mga Nephite mitimaan sa panahon gikan sa tuig nga si Lehi mibiya sa Jerusalem.