Leksyon 146: Ether 4–5

Leksyon 146

Ether 4–5

Pasiuna

Ang Ginoo misugo kang Moroni sa pagsilyo sa narekord nga panan-awon sa igsoong lalaki ni Jared ug mipasabut nga kini nga mga sinulat ipadayag kon ang mga tawo adunay hugot nga pagtuo sama sa igsoong lalaki ni Jared. Gipanagna ni Moroni nga tulo ka mga saksi mopamatuod sa katinuod sa Basahon ni Mormon sa ulahing mga adlaw.

Mga Sugyot alang sa Pagtudlo

Ether 4:1–7

Si Moroni nagrekord ug nagsilyo sa hingpit nga istorya sa panan-awon sa igsoong lalaki ni Jared

Dapita ang mga estudyante sa paghunahuna og usa ka butang nga bililhon kaayo kanila o sa ilang pamilya ug nga dili nila gustong mahilabtan sa gagmayng mga bata. Pananglitan, mahimo nimong ipakita o ihulagway ang usa ka butang nga bililhon kanimo.

Nganong dili man ninyo tugutan ang usa ka bata nga gunitan ang ingon nga butang?
Unsay gikinahanglang makat-unan o buhaton sa bata sa dili pa ninyo isalig kaniya ang butang?

Ipasabut nga ang mga kamatuoran sa ebanghelyo bililhon ngadto sa Ginoo. Gusto Niyang ipakigbahin ang tanan ngari kanato, apan maghulat Siya hangtud nga andam na kita sa pagdawat niini. Samtang ang mga estudyante magtuon sa Ether 4 atol niini nga leksyon, awhaga sila sa pagpangita og mga baruganan nga makatabang kanila nga maandam sa pagdawat og kamatuoran gikan sa Ginoo.

Dapita ang usa ka estudyante sa pagbasa sa Ether 4:1–5, ug hangyoa ang klase sa pagpangita kon unsay gisugo sa Ginoo nga i-rekord ug silyuhan ni Moroni.

Unsa man ang gisugo kang Moroni nga “[silyuhan]”?

Ipasabut nga gilakip ni Moroni ang rekord sa igsoong lalaki ni Jared diha sa kasagarang gitawag nga sinilyuhang bahin sa Basahon ni Mormon. (Mahimo nimong ipakita ang tsart nga giulohan og Mga Tinubdan sa Basahon ni Mormon, nga anaa sa appendix sa katapusan niini nga manwal.)

Giunsa paghulagway ni Moroni ang nakita sa igsoong lalaki ni Jared? (Tan-awa sa Ether 4:4.)

Aron matabangan ang mga estudyante nga dugang makat-on kon unsay gipakita sa Ginoo ngadto sa igsoong lalaki ni Jared, dapita sila sa pagbasa og hilum sa Ether 3:25–26 ug 2 Nephi 27:8–10. Dayon pangutan-a sa mosunod:

Sumala sa Ether 3:25–26, unsay gipakita sa Ginoo ngadto sa igsoong lalaki ni Jared?
Sumala sa 2 Nephi 27:10, unsay naglangkob sa gisilyuhan nga bahin sa Basahon ni Mormon?

Dapita ang usa ka estudyante sa pagbasa og kusog sa Ether 4:6–7. Hangyoa ang klase sa pagsunod ug pag-ila sa mga kondisyon nga kinahanglan gayud nga anaa sa dili pa ipahibalo ang mga pagpadayag nga gihatag ngadto sa igsoong lalaki ni Jared. Mahimo nimong awhagon ang mga estudyante sa pagmarka sa unsay ilang nahibaloan diha sa ilang mga kasulatan.

Unsa ang mga kondisyon nga inyong nailhan?
Unsa nga mga baruganan mahitungod sa pagdawat og pagpadayag ang atong makat-unan gikan niini nga tudling? (Tabangi ang mga estudyante nga makakita nga samtang maghinulsol kita ug mopakita og hugot nga pagtuo kang Jesukristo, makadawat kita og dugang nga pagpadayag.)
Ngano kaha nga kinahanglan kitang maghinulsol ug mahimong limpyo aron makadawat og dugang pagpadayag?

Aron matabangan ang mga estudyante nga makasabut kon unsay gipasabut sa “maghupot sa hugot nga pagtuo … gani ingon sa gihimo sa igsoon nga lalaki ni Jared” (Ether 4:7), dapita sila sa paglista diha sa mga notebook o mga scripture study journal og mga paagi kutob sa ilang mahinumduman nga ang igsoong lalaki ni Jared mipakita og hugot nga pagtuo sa Ginoo. Mahimo nimong isugyot nga ribyuhon nila ang Ether 1–3 samtang maghimo sila sa ilang mga lista. Kon aduna na silay igong panahon sa pagpamalandong ug pagsulat, dapita ang pipila ka estudyante sa pagbasa sa pipila ka mga ehemplo nga ilang gisulat ug sa pagpasabut nganong giganahan kaayo sila niadto nga mga ehemplo.

Pahinumdumi ang mga estudyante sa bililhong butang nga ilang gihunahuna sa pagsugod sa klase ug ang mga kondisyon aron ila kining isalig sa bata. Ipamatuod nga sa samang paagi, ang Ginoo nagkinahanglan sa Iyang mga anak nga makab-ot ang pihong mga kondisyon sa dili pa Niya ipadayag ang tanan Niyang kamatuoran ngadto kanila. Nagkinahanglan Siya kanato nga mopakita sa atong espirituhanong kaandam ug hugot nga pagtuo.

Ether 4:8–19

Ang Ginoo nagtudlo unsay kinahanglan gayud natong buhaton aron makadawat og dugang nga pagpadayag

Ipataas ang usa ka piraso nga panapton. Ipasabut nga ang Ginoo mitudlo og mga baruganan nga makatabang nato nga makadawat og pagpadayag. Sa dihang mitudlo Siya niini nga mga baruganan, naghisgut Siya og usa ka tabil. Ang tabil maoy usa ka kurtina o piraso sa panapton nga gigamit sa pagtabon o pagtago og usa ka butang.

Dapita ang mga estudyante sa pagbasa og hilum sa Ether 4:15 ug pagpangita sa mga pulong nga naglakip sa pulong nga tabil.

Unsa nga matang sa tabil ang gipasabut sa Ginoo? (Usa ka “tabil sa pagkawalay pagtuo.”) Sa unsang paagi ang pagkawalay pagtuo sama sa usa ka tabil?
Ang pulong nga mogisi nagpasabut nga molaksi o mopikas. Unsa kaha ang gipasabut sa “mogisi [sa] tabil sa pagkawalay pagtuo”?

Dapita ang usa ka estudyante sa pagbasa og kusog sa Ether 4:8, ang laing estudyante sa pagbasa og kusog sa Ether 4:11, ug laing estudyante sa pagbasa og kusog sa Ether 4:15. Hangyoa ang klase sa pagsunod ug pagpangita kon unsay makapugong kanato sa pagdawat og pagpadayag ug unsay makatabang kanato nga “mogisi [sa] tabil sa pagkawalay pagtuo” ug modawat og dugang nga pagpadayag.

Unsa kaha ang gipasabut sa “makigbisog batok sa pulong sa Ginoo”? (Ether 4:8).
Sumala sa Ether 4:8, unsa nga mga sangputanan ang atong atubangon kon makigbisog kita batok sa pulong sa Ginoo?
Sumala sa Ether 4:11, unsang usa ka panalangin ang atong madawat kon motuo kita sa mga pulong sa Ginoo?

Isulat sa pisara ang mosunod nga dili kompleto nga pamahayag:

Kon motuo kita sa pulong sa Ginoo, …

Hangyoa ang mga estudyante sa pagkompleto niini nga pamahayag sumala sa ilang nakat-unan niini nga mga bersikulo. Bisan kon magkalain-lain ang tubag sa mga estudyante, siguroa nga mailhan nila ang mosunod nga baruganan: Kon motuo kita sa pulong sa Ginoo, ang Ginoo mopanalangin kanato og dugang nga pagpadayag. Isulat kini nga baruganan diha sa pisara. Mahimo usab nimong awhagon ang mga estudyante sa pagsulat niini diha sa ilang mga kasulatan tupad sa Ether 4:11.

Aron matabangan ang mga estudyante nga makasabut niini nga baruganan, pangutan-a:

Ngano kaha nga kinahanglan kitang motuo sa mga kamatuoran nga ato nang nadawat una pa ang Ginoo mohatag kanato og dugang?

Hangyoa ang usa ka estudyante nga isulat sa pisara ang mosunod nga mga ehemplo sa pagpakita og hugot nga pagtuo sa pulong sa Ginoo: personal nga pagtuon sa kasulatan; pagsunod sa mga aghat sa Espiritu Santo; pagsunod sa lokal nga mga lider sa Simbahan; pagtuon sa mga kasulatan diha sa simbahan ug seminary; pagsunod sa mga pulong sa mga propeta sa ulahing mga adlaw.

Dapita ang mga estudyante sa pagpamalandong kon sa unsang paagi ang pagpakita og pagtuo sa pulong sa Ginoo sa usa niini nga mga paagi miresulta nga nakadawat sila og dugang nga pagpadayag. Awhaga ang pipila ka mga estudyante sa pagpakigbahin sa unsay ilang nasinati.

Balik ngadto sa mga ehemplo nga gisulat diha sa pisara. Hangyoa ang mga estudyante sa pagkonsiderar niadto nga mga ehemplo samtang hilum silang mamalandong kon unsa nila kamaayo nga gipakita ang ilang pagtuo sa pulong sa Dios. Isugyot nga sa matag ehemplo, graduhan nila ang ilang kaugalingon sa sukdanan nga 1 ngadto 10, nga ang grado nga 10 nangahulugan nga ang ehemplo nagpasabut sa butang nga maayo nilang nabuhat. Dapita ang mga estudyante sa pagsulat diha sa mga notebook o mga scripture study journal mahitungod sa usa ka paagi nga makapakita sila og dugang pagtuo sa direksyon nga nadawat na nila gikan sa Ginoo. Ipakigbahin ang imong pagpamatuod sa baruganan nga imong gisulat sa pisara, ug awhaga ang mga estudyante sa pagbuhat sa mga tumong nga ilang gisulat.

Papasa ang mga pulong nga “motuo sa pulong sa Ginoo” gikan sa pisara. Ipasabut nga ang Ginoo mitudlo og dugang nga mga baruganan mahitungod sa pagdawat og pagpadayag. Hangyoa ang mga estudyante sa pagbasa og hilum sa Ether 4:13–15, nga mangita sa ubang mga butang nga ilang mahimo aron makadawat og pagpadayag gikan sa Ginoo.

Kon ang mga estudyante nahuman na sa pagbasa, hangyoa sila sa pagsugyot og mga paagi sa pagkompleto sa pamahayag. Ang mga tubag mahimong maglakip sa mosunod nga mga baruganan: Kon kita moduol sa Ginoo, ang Ginoo mopanalangin kanato og dugang pagpadayag. Kon kita mapainubsanong mag-ampo, ang Ginoo mopanalangin kanato og dugang pagpadayag.

Aron matabangan ang mga estudyante nga mas makasabut niini nga mga baruganan, ikonsiderar ang pagpangutana sa mosunod:

Unsay ipasabut diha kaninyo sa pagduol ngadto kang Kristo? (Ang mga tubag mahimong maglakip sa pagtuon sa Iyang mga pulong, pagpadangup sa atong mga kasingkasing ngadto Kaniya, paghinulsol, ug pagsunod ug pagtuman Kaniya.)
Unsay gipasabut sa pagbaton og masulub-on nga kasingkasing ug mahinulsulon nga espiritu? (Magmapainubsanon, mahinulsulon, ug andam modawat sa kabubut-on sa Ginoo.) Nganong mahinungdanon man kini nga mga kinaiya samtang mag-ampo kita alang sa padayon nga pagpadayag gikan sa Ginoo?

Dapita ang mga estudyante sa pagpamalandong kon unsaon nila paglakip niini nga mga baruganan sa ilang mga paningkamot sa pagdawat og pagpadayag.

I-summarize ang Ether 4:17–19 pinaagi sa pagpasabut nga ang Ginoo mipahayag nga ang pagtungha sa Basahon ni Mormon usa ka timailhan nga nagsugod na ang buhat sa Dios sa ulahing mga adlaw. Miawhag usab Siya sa tanang katawhan nga maghinulsol ug moduol Kaniya.

Ether 5

Mideklarar si Moroni nga tulo ka mga saksi makakita ug mopamatuod sa mga palid

Ipataas ang litrato nga Joseph Smith Naghubad sa Basahon ni Mormon (Libro sa mga Hulagway sa Ebanghelyo [2009], nu. 92). Dapita ang usa ka estudyante sa pagbasa og kusog sa Ether 5:1–3. Hangyoa ang klase sa pagsunod ug sa paghunahuna kon sama sa unsa kaha alang ni Joseph Smith ang paghubad sa Basahon ni Mormon ug pagkaamgo nga kini nga tambag direkta nga gisulat ni Moroni ngadto kaniya sobra 1,400 ka tuig ang milabay.

Imahe

Joseph Smith Translating the Book of Mormon

Unsay gisulti ni Moroni mahitungod sa mga palid nga iyang “[gisilyuhan]”?
Sumala sa Ether 5:2–3, unsa ang pribilehiyo ni Joseph nga buhaton sa mga palid?

Pangutan-a ang mga estudyante kon makahingalan ba sila sa Tulo ka mga Saksi sa Basahon ni Mormon ug makahinumdom kon unsay ilang nasinati. (Kon magkinahanglan og tabang ang mga estudyante, dapita sila sa pagbasa sa “Ang Pagpamatuod sa Tulo ka mga Saksi” diha sa atubangan sa Basahon ni Mormon.) Mahimo nimong ipasabut nga agig dugang sa Tulo ka mga Saksi, ang uban mipamatuod sa katinuod sa mga palid nga bulawan, lakip sa mga sakop sa Dios nga Kapangulohan (tan-awa sa Ether 5:4), Moroni (tan-awa sa Ether 5:6), Joseph Smith, ug ang Walo ka mga Saksi.

Sa unsang mga paagi nga mahimo kamong saksi sa Basahon ni Mormon, bisan wala makakita sa mga palid? Sa unsang paagi ang inyong pagsaksi sa Basahon ni Mormon makaimpluwensya sa ubang mga tawo?

Sa pagtapos niini nga leksyon, hangyoa ang pipila ka estudyante nga mopakigbahin sa ilang pagsaksi sa Basahon ni Mormon.

Komentaryo ug Background nga Impormasyon

Ether 5. Ang Pagpamatuod sa Tulo ka mga Saksi

Si Presidente James E. Faust sa Unang Kapangulohan miingon:

“Isip batan-ong Aaronic Priesthood nga lalaki, nakadawat ako mismo og kumpirmasyon sa talagsaon nga pagpamatuod sa Tulo ka mga Saksi kabahin sa katinuod sa Basahon ni Mormon. Ang akong presidente sa stake mao si Presidente Henry D. Moyle, ug ang iyang amahan mao si James H. Moyle. Panahon sa ting-init si Brother James H. Moyle mobisita sa iyang pamilya, ug mosimba siya uban kanamo sa among gamay nga ward sa silangang habagatan nga bahin sa Walog sa Salt Lake.

“Usa ka Dominggo, si Brother James H. Moyle mipakigbahin kanamo og usa ka talagsaong kasinatian. Sa batan-on pa siyang lalaki mitambong siya sa University of Michigan aron sa pagtuon og abogasiya. Sa hapit na mahuman ang iyang pag-eskwela, ang iyang amahan misulti kaniya nga si David Whitmer, usa sa mga saksi sa Basahon ni Mormon, buhi pa. Misugyot ang amahan sa iyang anak nga mohapit siya sa iyang pagpauli sa Siyudad sa Salt Lake aron personal nga makig-istorya kang David Whitmer. Ang tuyo ni Brother Moyle mao ang pagpangutana kaniya mahitungod sa iyang pagpamatuod kabahin sa mga palid nga bulawan ug sa Basahon ni Mormon.

“Niadto nga pagbisita, si Brother Moyle miingon kang David Whitmer: ‘ Sir, tigulang ka na, ug ako batan-on pa. Kanunay akong nagtuon mahitungod sa mga saksi ug mga pagpamatuod. Palihug sultihi ko sa tinuod kabahin sa imong pagpamatuod isip usa sa mga saksi sa Basahon ni Mormon.’ Si David Whitmer dayon misulti niining batan-ong lalaki: ‘ Oo, akong nahuptan ang bulawang mga palid sa akong mga kamot, ug gipakita kini kanamo pinaagi sa usa ka anghel. Ang akong pagpamatuod kabahin sa Basahon ni Mormon tinuod.’ Si David Whitmer mipahawa sa Simbahan, apan wala gayud niya ilimod ang iyang pagpamatuod sa pagduaw sa anghel, sa paggunit sa mga palid nga bulawan, o sa katinuod sa Basahon ni Mormon. Ang pagkadungog sa akong kaugalingong mga dunggan niining talagsaon nga kasinatian nga gikan gayud sa ba-ba ni Brother Moyle adunay kusganon, nanghimatuod nga epekto diha sa akong nagtubo nga pagpamatuod. Kay nakadungog niini, gibati nako nga mahinungdanon kini kanako”(“A Growing Testimony,” Ensign, Nob. 2000, 54).

Si Presidente Henry B. Eyring sa Unang Kapangulohan miingon:

“Ang Tulo ka mga Saksi wala gayud molimud sa ilang pagpamatuod sa Basahon ni Mormon. Dili sila makahimo sa paglimud kay nasayud sila nga kini tinuod. Nagsakripisyo sila ug miatubang og mga kalisdanan nga labaw pa sa nahibaloan sa kadaghanan sa mga tawo. Si Oliver Cowdery mihatag sa sama nga pagpamatuod mahitungod sa balaan nga gigikanan sa Basahon ni Mormon sa dihang himatyon na siya. … Nga sila mipadayon sa pagmatuod sa unsay ilang nakita ug nadungog niadtong talagsaon nga kasinatian, sulod sa hataas nga panahon nga nabulag gikan sa Simbahan ug gikan kang Joseph, nakahimo sa ilang pagpamatuod nga mas gamhanan” (“Usa ka Malungtarong Pagpamatuod sa Misyon ni Propeta Joseph,” Ensign o Liahona, Nob. 2003, 90).