Pasiuna sa Basahon ni Enos
Ngano nga kinahanglang tun-an kini nga basahon?
Ang basahon ni Enos naghulagway sa gahum sa Pag-ula ni Jesukristo nga molimpyo sa mga tawo gikan sa sala ug mohimo kanila nga limpyo. Nakigbisog si Enos sa atubangan sa Dios diha sa hilabihan nga pag-ampo sa wala pa mapasaylo ang iyang mga sala. Dayon nag-ampo siya alang sa espirituhanon nga kaayuhan sa mga Nephite ug mga Lamanite, og iyang gigamit ang nahabiling panahon sa iyang kinabuhi aron sa pagtrabaho alang sa ilang kaluwasan. Samtang nagtuon ang mga estudyante sa basahon ni Enos, makadiskubre sila og importante nga mga leksyon mahitungod sa pag-ampo, paghinulsol, ug pagpadayag. Makakat-on usab sila nga sa dihang modawat ang mga indibidwal sa mga panalangin sa Pag-ula, magtinguha sila sa pagpakigbahin niadtong mga panalangin ngadto sa uban.
Kinsa ang nagsulat niini nga basahon?
Si Enos, anak ni Jacob ug apo ni Lehi ug Sarah, misulat niini nga basahon. Girekord ni Enos nga ang iyang amahan mitudlo kaniya “diha sa pagmatuto ug pagpahimatngon sa Ginoo” (Enos 1:1). Duol sa katapusan sa iyang kinabuhi, misulat si Enos nga mipahayag siya sa “kamatuoran diin anaa kang Kristo” sa tanan niyang mga adlaw (Enos 1:26). Sa wala pa siya mamatay, gipasa ni Enos ang gagmay nga mga palid ni Nephi ngadto sa iyang anak nga si Jarom (tan-awa sa Jarom 1:1). Gitapos ni Enos ang iyang rekord pinaagi sa pagsulti nga malipayon siya sa adlaw nga mobarug siya sa atubangan sa Iyang Manunubos. Mipahayag siya, “Ug unya ako makakita sa iyang panagway nga may kahinangop, ug siya moingon ngari kanako: Duol ngari kanako ikaw nga bulahan, may dapit nga giandam alang kanimo sa mga mansyon sa akong Amahan” (Enos 1:27).
Ngadto kang kinsa kini nga basahon gisulat ug ngano?
Sa dihang gidawat ni Enos ang gagmay nga mga palid gikan sa iyang amahan, misaad siya nga mokulit lamang sa mga sinulat nga iyang gikonsiderar nga labing bililhon, diin naglakip sa sagrado nga mga pagtulun-an, pagpadayag, ug panagna (tan-awa sa Jacob 1:1–4; 7:27). Nasayud si Enos nga ang iyang mga katawhan, ang mga Nephite, sa katapusan pagalaglagon. Siya nag ampo nga ang Ginoo magtipig og usa ka rekord sa mga Nephite “nga kini unta pagadad-on ngadto sa uban nga umaabut nga adlaw ngadto sa mga Lamanite, nga, tingali, sila unta madala ngadto sa kaluwasan” (Enos 1:13).
Kanus-a ug asa man kini gisulat?
Gitapos ni Enos ang iyang rekord pinaagi sa pagpahayag nga 179 ka tuig na ang milabay sukad nga mibiya si Lehi sa Jerusalem (tan-awa sa Enos 1:25). Kana nagpasabut nga ang petsa sa iyang pagsulat gibana-bana nga gihimo sa tuig 544 B.C. (sa dihang gitapos ni Jacob ang iyang rekord) ug 421 B.C. Misulat si Enos niini nga rekord samtang nagpuyo sa yuta sa Nephi.
Unsa ang pipila sa kalainan niini nga basahon?
Ang basahon ni Enos nagpaila og usa ka sumbanan nga nagpakita kon unsaon sa mga indibidwal nga makadawat og mga panalangin sa Pag-ula ni Jesukristo ug mopakigbahin niadto nga mga panalangin ngadto sa uban. Una, natudloan si Enos sa ebanghelyo ni Jesukristo (tan-awa sa Enos 1:1, 3). Sunod, iyang gidawat ang iyang panginahanglan alang sa Manluluwas ug nag-ampo alang sa kapasayloan (tan-awa sa Enos 1:2–4). Dayon, human makadawat og kapasayloan sa iyang mga sala, makugihon siyang nag-ampo ug mitrabaho aron sa pagdala sa uban ngadto sa kaluwasan (tan-awa sa Enos 1:5–27). Kini nga sumbanan makita sa tibuok nga Basahon ni Mormon. Ang mga ehemplo naglakip ni Alma (tan-awa sa Mosiah 17:1–2; 18:1–2), ni Alma ang Batan-on ug sa mga anak nga lalaki ni Mosiah (tan-awa sa Mosiah 27–28), ug ni Lamoni ug sa iyang mga katawhan (tan-awa sa Alma 18–19).
Agig dugang, ang basahon ni Enos mao ang unang naghulagway og detalye sa apostasiya nga kahimtang sa mga kaliwat ni Laman ug Lemuel (tan-awa sa Enos 1:20). Naghisgot usab kini nga dihay “hilabihan ka daghan nga mga propeta” taliwala sa mga Nephite, bisan og ang kadaghanan sa mga Nephite “tikig og liog” kinsa kinahanglan kanunayng awhagon “aron sa pagpuyo diha sa kahadlok sa Ginoo” (Enos 1:22–23).
Outline
Enos 1:1–8 Nag-ampo si Enos alang sa kapasayloan sa iyang mga sala ug nakadawat og kapasayloan tungod sa iyang hugot nga pagtuo kang Jesukristo.
Enos 1:9–18 Nag-ampo si Enos alang sa mga Nephite ug mga Lamanite ug nangamuyo sa Ginoo nga mapreserbar ang mga rekord sa mga Nephite.
Enos 1:19–24 Gihulagway ni Enos ang kadautan sa mga Lamanite ug sa katikig sa liog sa mga Nephite. Siya ug ang ubang mga propeta padayon nga nagtrabaho alang sa ilang kaluwasan.
Enos 1:25–27 Gitapos ni Enos ang iyang rekord ug misulat sa kasigurohan sa kinabuhing dayon nga iyang nadawat pinaagi sa iyang Manunubos.