Alma 33–38 (Unit 19)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa Alma 33–38 (unit 19) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (Alma 33–35)

Si Alma mitudlo sa mga Zoramite nga makapadayon kita sa pagsimba sa Dios pinaagi sa pag-ampo. Dayon mitudlo si Alma nga atong madawat ang kalooy sa Langitnong Amahan, maglakip sa kapasayloan sa atong mga sala, tungod sa Pag-ula ni Jesukristo. Si Amulek mitudlo sa mga Zoramite nga ang walay kinutuban ug mahangturon nga Pag-ula ni Jesukristo nakahatag og kaluwasan sa tanang katawhan. Nakat-unan usab sa mga estudyante nga aron makadawat sa kahingpitan sa mga panalangin sa Pag-ula, kita kinahanglang magpakita og hugot nga pagtuo ngadto sa paghinulsol.

Day 2 (Alma 36)

Gikan sa istorya sa pagkakabig ni Alma, ang mga estudyante nakat-on nga ang sala makahatag og dakong kasakit ug pagmahay. Agi og dugang, nakat-on sila nga kon atong ipakita ang hugot nga pagtuo diha sa Pag-ula ni Jesukristo, Siya moluwas kanato gikan sa kasakit sa atong mga sala ug mopuno kanato sa hingpit nga kalipay. Sama ni Alma, makadawat kita og dakong kalipay samtang magtinguha kita sa pagdala sa uban ngadto kang Kristo.

Day 3 (Alma 37)

Mihatag si Alma sa iyang anak nga si Helaman og usa ka mando sa paghupot ug pagpatunhay sa sagradong mga rekord. Pinaagi sa pagtuon sa mga pulong ni Alma, ang mga estudyante nakat-on nga aron mapatuman ang Iyang mahangturon nga mga katuyoan, ang Ginoo nagtrabaho pinaagi sa gagmay ug yano nga mga pamaagi. Nakat-unan usab nila nga kon kita mosunod sa mga sugo sa Ginoo, kita mouswag. Si Alma mitudlo sa iyang anak nga lalaki nga kita kinahanglang makat-on sa atong pagkabatan-on sa paghupot sa mga kasugoan sa Dios ug kon atong patalinghugan ang mga pulong ni Jesukristo, kini magtudlo kanato aron makadawat og kinabuhing dayon.

Day 4 (Alma 38)

Samtang nagtuon ang mga estudyante sa tambag ni Alma ngadto kang Shiblon, ilang nakat-unan nga kon sila magsugod sa pagkamakanunayon ug pagkamatinud-anon sa paghupot sa mga sugo sa ilang pagkabatan-on, makahatag sila og dakong kalipay sa ilang mga ginikanan. Mipamatuod si Alma ngadto sa iyang anak nga mga lalaki nga ang Dios moluwas sa mga indibidwal gikan sa mga pagsulay, kasamok, ug mga kasakit kon sila moantus sa tanang butang uban sa pagpailub ug pagsalig diha Kaniya. Mipamatuod usab si Alma nga aron makadawat og kapasayloan sa atong mga sala ug kalinaw sa atong mga kalag, kinahanglan nga mag-ampo kita ngadto sa Ginoo alang sa kalooy. Sa katapusan, ang mga estudyante nakat-on nga ang pagpalambo og matarung nga mga kinaiya makaandam kanato sa pagtudlo ug pagserbisyo sa uban.

Pasiuna

Si Amulek mitudlo sa mga Zoramite nga ang Pag-ula mao ang “walay kinutuban ug walay katapusan nga sakripisyo” (Alma 34:10). Nakat-unan sa mga estudyante kining kamatuoran diha sa ilang sinemana nga pagtuon, ug kini nga leksyon makahatag nila og dugang nga oportunidad sa pagsabut ug pagpasalamat sa Pag-ula ni Jesukristo.

Mga Sugyot alang sa Pagtudlo

Alma 33–35

Sila si Alma ug Amulek nagtudlo sa mga Zoramite mahitungod sa Pag-ula ni Jesukristo.

Ipangutana: Ngano nga si Jesukristo mao lamang ang makaula alang sa mga sala sa kalibutan?

Pahinumdumi ang mga estudyante nga, isip kabahin sa ilang sinemanang buluhaton, sila nagbasa sa Alma 34:10–14 ug nagmarka sa mga pulong nga walay kinutuban ug mahangturon. Hangyoa ang mga estudyante sa pagbasa og kusog niining mga bersikulo, ug unya hangyoa ang mga estudyante sa pagpakigbahin sa mga pulong nga ilang nahibaloan.

Dapita ang usa ka estudyante sa pagbasa sa mosunod nga pamahayag ni Elder Russell M. Nelson sa Korum sa Napulog Duha ka mga Apostoles aron matabangan sila nga masabtan kon sa unsang paagi nga ang Pag-ula ni Jesukristo walay kinutuban ug mahangturon:

“Ang Iyang Pag-ula walay kinutuban—walay katapusan. Wala usab kini kinutuban diha sa pagluwas sa tanang katawhan gikan sa walay katapusan nga kamatayon. Wala kini kinutuban sa paagi nga dili masukod ang Iyang pag-antus. … Walay kinutuban ang kalapdon niini—kinahanglan kausa lamang kining buhaton alang sa tanan. Ug ang kalooy sa Pag-ula makaabut dili lang sa walay kinutuban nga gidaghanon sa mga tawo, apan ngadto usab sa walay kinutuban nga gidaghanon sa mga kalibutan nga Iyang gilalang. Wala kini kinutuban lapas pa sa bisan unsang pagsukod sa tawo o mortal nga salabutan.

“Si Jesus mao lamang ang bugtong ikahalad sa ingon nga pag-ula nga walay kinutuban, gumikan kay gipakatawo Siya sa mortal nga inahan ug usa ka imortal nga Amahan. Tungod nianang pagkalahi nga pagkaanak, si Jesus mao ang walay kinutuban nga Nilalang” (“The Atonement,” Ensign, Nob. 1996, 35).

Ipangutana: Sa unsang paagi nga ang mga pagtulun-an ni Amulek ug kining pagpasabut ni Elder Nelson makatabang kanato nga masabtan kon ngano nga si Jesukristo mao lamang ang bugtong makaula sa mga sala sa kalibutan?

Ipa-summarize sa mga estudyante kon unsa ang ilang nakat-unan gikan sa Alma 34 mahitungod sa Pag-ula ni Jesukristo. Ipasabut nga usa ka importanting baruganan nga atong makat-unan gikan niining seksyon mao nga ang walay kinutuban ug mahangturon nga Pag-ula ni Jesukristo nakapahimong posible sa kaluwasan alang sa tanang katawhan.

Isulat ang mosunod nga mga pulong diha sa pisara o sa usa ka pirasong papel: Hunahunaa ang kinabuhi nga walay …

Guniti pataas ang usa ka butang nga bililhon sa daghang mga batan-on (sama sa cell phone). Ipangutana: Unsa kaha ang mahitabo sa kinabuhi kon wala kining butanga?

Sunod, guniti pataas ang usa ka botelya o baso nga naay tubig (o butang nga importante sa pagpatunhay sa kinabuhi). Ipangutana: Unsa kaha ang mahitabo sa kinabuhi kon walay tubig?

Human makatubag ang mga estudyante niining mga pangutana, kompletuha ang pamahayag diha sa pisara: Hunahunaa ang kinabuhi kon wala ang Pag-ula ni Jesukristo.

Ipangutana ang mosunod:

Unsaon ninyo paghunahuna sa pagtan-aw sa mga tawo sa kinabuhi kon sila wala makaila ni Jesukristo o kon sila dili motuo nga adunay Dios?
Unsaon ninyo paghunahuna ang kalahian sa kinabuhi alang kaninyo kon wala ang Pag-ula ni Jesukristo? (Hatagi ang mga estudyante og panahon sa pagpamalandong niining pangutana sa dili pa mangayo sa mga tubag.)

Ipasabut nga si Amulek nagtudlo sa mga Zoramite nga sila nagkinahanglan sa paghinulsol aron mahatud ang mga panalangin sa Pag-ula ngadto sa ilang mga kinabuhi (tan-awa sa Alma 34:15–17). Pangutan-a ang mga estudyante kon sila milangay-langay ba sa ilang paghinulsol tungod kay nahadlok sila nga mokumpisal sa ilang mga sala o nahadlok sila nga dili igo ang ilang kalig-on sa pag-usab. Dayon ipangutana: Nganong makuyaw ang paglangay sa paghinulsol?

Dapita ang mga estudyante nga magpuli-puli sa pagbasa og kusog sa Alma 34:30–35, nga mangita sa unsa ang gitudlo ni Amulek mahitungod kon nganong dili gayud nato ilangay ang atong paghinulsol. Hisguti kining mga bersikulo pinaagi sa pagpangutana sa mosunod

Tan-awa ang Alma 34:32. Nganong kinahanglan man kitang maghinulsol karon? (Sa pagtubag sa mga estudyante, tabangi sila nga masabtan kining baruganan: Kini nga kinabuhi mao ang panahon alang kanato sa pagpangandam sa pagsugat sa Dios.)
Tan-awa ang Alma 34:33. Unsay katuyoan niining kinabuhi? Unsay mahitabo niadtong kinsa maglangay sa paghinulsol?
Tan-awa ang Alma 34:31. Unsa ang saad nga gihatag niadtong maghinulsol karon?

Basaha ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:

“Wala gikinahanglan nga mahibaloan ninyo ang tanang butang sa dili pa moepekto diha kaninyo ang gahum sa Pag-ula. Pagbaton og hugot nga pagtuo kang Kristo; magsugod kini sa pag-epekto sa adlaw nga inyo kining pangayoon!” (”Washed Clean,” Ensign, Mayo 1997, 10.)

Ipangutana: Unsa ang gitudlo niining pamahayag ni Presidente Packer diha ninyo? Nganong importante man kini kaninyo?

Alma 36

Si Alma mitambag sa iyang anak nga lalaki nga si Helaman

Ang imong mga estudyante nakatuon sa tambag ni Alma ngadto sa iyang anak nga lalaki nga si Helaman, nga narekord sa Alma 36, ug nakat-on mahitungod sa kalipay nga nabati ni Alma samtang kinasingkasing siya nga naghinulsol sa iyang mga sala. Ang mga estudyante gihangyo sa pagbasa sa Alma 36:19–22 ug dayon ipasulat sa ilang mga scripture study journal kon unsa ang gitudlo niining mga bersikulo ngadto nila mahitungod sa gahum sa Pag-ula (day 2, assignment 3). Dapita ang pipila ka estudyante sa pagpakigbahin kon unsa ang ilang nasulat. Tapusa uban sa imong pagpamatuod sa Pag-ula ni Jesukristo ug sa kalipay nga moabut gikan sa paghinulsol.

Sunod nga Unit (Alma 39–44)

Hangyoa ang mga estudyante sa paghunahuna kon unsaon kaha sa usa ka nagpakabana ug mahigugmaong ginikanan sa pagkorihir sa usa ka anak nga lalaki o babaye kinsa nakahimo og bug-at nga sekswal nga mga kalapasan. Si Alma miatubang niining sitwasyon ug mitudlo og importanting mga kamatuoran ngadto sa iyang anak nga lalaki nga si Corianton, kinsa nakasala samtang nagserbisyo sa misyon.