Alma 14

Pasiuna

Human nga nadunggan ang pagsangyaw ni Alma ug ni Amulek, ang pipila sa mga katawhan didto sa Ammonihah mituo ug naghinulsol. Kadaghanan sa mga tawo nangasuko ug nagtinguha sa pagdaut nilang Alma, Amulek, ug kadtong mga mituo sa ilang mga pulong. Gidakop si Alma ug si Amulek, gihukman, ug sa katapusan gibilanggo. Ang dautan nga mga tawo sa Ammonihah misalikway sa mga katawhan kinsa mituo ug misunog sa ilang mga asawa, mga anak, ug sa mga kasulatan samtang si Alma ug si Amulek gipugos sa pagpatan-aw. Paglabay sa mga adlaw, ang Ginoo miluwas ni Alma ug ni Amulek gikan sa bilanggoan ug milaglag sa dautang mga lider sa Ammonihah.

Mga Sugyot alang sa Pagtudlo

Alma 14:1–13

Gibilanggo sila si Alma ug si Amulek, ug ang mga Ammonihahite nga mituo gisalikway o gisunog

Dapita ang mga estudyante sa paghunahuna og mga hagit nga ilang giatubang karon. Unya dapita ang usa ka estudyante sa pagbasa og kusog sa mosunod nga pamahayag:

“Ang kalisdanan naggikan sa nagkalain-laing mga tinubdan. Usahay makasugat ka og mga pagsulay isip sangputanan sa imong kaugalingong pagkamapahitas-on ug pagkamasinupakon. Kini nga mga pagsulay mahimong malikayan pinaagi sa matarung nga pagpuyo. Ang ubang mga pagsulay mga natural nga bahin sa kinabuhi ug mahimong moabot sa panahon nga ikaw nagpakabuhi nga matarung. Sama pananglit, mahimong makasinati ka og mga pagsulay diha sa panahon sa pagkamasakiton o walay kasigurohan o sa pagkamatay sa usa ka minahal sa kinabuhi. Ang kalisdanan mahimong moabot usahay tungod sa dili maayo nga mga pagpili ug makapasakit nga mga istorya ug mga binuhatan sa uban.

“Ang imong kalampusan ug kalipay, sa karon ug sa kahangturan, nag-agad pag-ayo sa imong mga tubag sa mga kalisdanan sa kinabuhi” (Matinud-anon sa Tinuhoan: Usa ka Pakisayran sa Ebanghelyo [2004], 73–74).

Ipasabut nga sa leksyon karon, ang mga estudyante mohisgot og usa ka istorya sa mga tawo nga nakasinati og grabe nga mga pagsulay. Ang nakaingon sa kadaghanan niining mga pagsulay mao ang ubang tawo. Awhaga ang mga estudyante sa pagkonsiderar kon sa unsang paagi nga ang mga kamatuoran nga ilang hisgutan niining leksyon may kalabutan ngadto nila, bisan unsa pa ang mga pagsulay nga mahimo nilang atubangon.

Isulat sa pisara ang mosunod:

Alma ug Amulek

Zeezrom

Lalaki nga mga kinabig

Babaye nga mga kinabig ug mga bata

Dapita ang pipila ka estudyante nga magpuli-puli sa pagbasa og kusog sa Alma 14:1–10. Hangyoa ang klase sa pagsunod, nga mangita sa mga ehemplo sa pag-antus nga nasinati sa katawhan nga nalista diha sa pisara.

Unsa ang giantus niining mga tawhana? (Ilista sa pisara ang mga tubag sa mga estudyante.)

Ipasabut nga sa dihang nakita ni Amulek ang mga pag-antus sa mga kababayen-an ug mga bata, gusto niya nga mogamit sa gahum sa priesthood aron sila maluwas. Dapita ang usa ka estudyante sa pagbasa og kusog sa Alma 14:11 ug hangyoa ang klase sa pagpangita sa tubag ni Alma ngadto sa hangyo ni Amulek.

Nganong ang Ginoo mitugot niining mga babaye ug mga bata nga masunog? (Mahimo nga kinahanglan nimong ipasabut nga dinhi niining bersikulo, ang mga pulong “siya mitugot” nagpasabut nga “iyang gitugutan.” Mitugot ang Ginoo nga mag-antus ang mga tawo aron ang ilang kamatayon mobarug isip usa ka saksi batok sa mga tawo nga mipatay kanila. Tan-awa usab sa Alma 60:13.)
Sumala sa Alma, sa unsang paagi nga ang mga babaye ug mga bata mahimong mapanalanginan sa ilang pagsalig sa Ginoo?

Mahimo nimong ipasabut og maayo nga dinhi niining piho nga kahimtang, kini kabubut-on sa Ginoo nga itugot nga ang mga tawo mag-antus. Hinoon, dili gayud kanunay nga ingon niini. Isiguro sa mga estudyante nga ang Ginoo nahigugma kanila ug gusto nga sila magmalipayon ug makaangkon ug kalinaw sa ilang kinabuhi. Kon nasakitan sila o giabusaran sa bisan unsang paagi, gikinahanglan nga sila mangayo og tabang gikan sa usa ka ginikanan o lider sa Simbahan aron ilang masulbad ang problema.

Unsa ang ubang mga rason ngano nga ang Ginoo lagmit motugot kanato nga mag-antus? (Ang mga tubag mahimong maglakip nga gusto Siya nga atong masabtan ang mga sangputanan sa dili maalamon nga mga desisyon, nga gusto Siya nga makaugmad kita og pailub, nga gusto Siya nga makaugmad kita og pagbati alang sa uban nga nag-antus, ug nga gusto Siya nga atong masabtan nga kita kinahanglan nga mosalig Kaniya.)

Isulat ang mosunod nga kamatuoran diha sa pisara: Kon mosalig kita sa Ginoo, Siya molig-on kanato panahon sa atong mga pagsulay. Dayon hangyoa ang usa ka estudyante sa pagbasa og kusog sa Alma 14:12–13.

Sa unsang paagi nga ang mga pulong ni Alma nagpakita sa iyang pagsalig sa Ginoo?

Mahimo nimong hangyoon ang usa ka estudyante sa pagbasa sa mosunod nga pamahayag ni Elder Richard G. Scott sa Korum sa Napulog Duha ka mga Apostoles:

Imahe

Elder Richard G. Scott

“Ang ehemplo ni Alma ug ni Amulek makapalamdag. Samtang nanglimbasug sa paghimo og maayo sa mga katawhan sa Ammonihah, sila gihimong binihag. Misalig si Amulek sa iyang mas sinati nga kauban, si Alma, kinsa midala kaniya ngadto sa mas dako nga pagsalig sa Ginoo. Napugos sa pagsud-ong sa mga babaye ug mga bata nga gilamoy sa kalayo, si Amulek miingon, ‘Tingali sila mosunog usab kanato.’ Si Alma mitubag: ‘Mahimo kini sumala sa kabubut-on sa Ginoo’—nga usa ka mahinungdanon nga baruganan. ‘Apan … ang atong buhat wala pa matapos; busa sila dili makasunog kanato’ [Alma 14:12–13; emphasis gidugang]” (“To Be Healed,” Ensign, Mayo 1994, 8).

“Kini nga kinabuhi mao ang usa ka kasinatian sa lawom nga pagsalig—pagsalig diha kang Jesukristo. … Ang pagsalig nagpasabut nga andam nga mosunod nga walay kasayuran sa katapusan gikan sa sinugdanan (tan-awa sa Prob. 3:5–7 Aron makita ang bunga, ang inyong pagsalig sa Ginoo kinahanglang mas gamhanan ug makalahutay kay sa inyong pagsalig sa inyong kaugalingong personal nga mga pagbati ug kasinatian” (“Trust in the Lord,” Ensign, Nob. 1995, 17).

Ipasabut nga sa Alma 14:14–29, makita sa mga estudyante ang mas daghang ehemplo ni Alma ug ni Amulek nga nagsalig sa Ginoo. Makita usab nila kon sa unsang paagi ang Ginoo mipalig-on kanila aron makahimo sila sa Iyang buhat.

Alma 14:14–29

Ang Dios miluwas ni Alma ug ni Amulek gikan sa ug mibilanggoanlaglag sa dautang mga lider sa Ammonihah

Tungaa ang klase. Hangyoa ang katunga sa klase sa pagsiksik sa Alma 14:14–19 samtang ang laing katunga sa pagsiksik sa Alma 14:20–25. Hangyoa ang duha ka grupo sa pagpangita kon unsa ang mga giantus ni Alma ug ni Amulek sa mga kamot sa dautan nga mga lider sa Ammonihah. Kon ang mga estudyante nakagahin na og oras sa pagbasa, dapita sila sa pagpakigbahin unsa ang ilang nakit-an. Ilista ang ilang mga tubag diha sa pisara ubos sa “Alma ug Amulek.”

Hain niining mga pagsulay nga mahimong labing lisud alang kaninyo? Ngano man?
Kanus-a ang higayon nga nakakita mo og mga tawo nga nag-antus og mga pagsulay bisan tuod og nanlimbasug sila nga magmatarung?

Dapita ang mga estudyante nga magpuli-puli sa pagbasa og kusog sa Alma 14:25–29. Hangyoa ang klase sa pagsunod, nga mangita kon unsay gibuhat sa Ginoo sa pagluwas ni Alma ug ni Amulek gikan sa bilanggoan. Aron matabangan ang mga estudyante nga makaila ug makasabut sa mga baruganan niining mga bersikulo, ipangutana ang pipila o ang tanan sa mosunod nga mga pangutana:

Nganong nakadawat sila si Alma ug Amulek og gahum ug kusog gikan sa Ginoo? Tan-awa sa Alma 14:26, 28.)
Unsa nga mga baruganan ang atong makat-unan gikan sa kasinatian ni Alma ug ni Amulek sa bilanggoan? (Mahimong magkalain-lain ang mga tubag sa mga estudyante, apan kinahanglang makita niini ang kamatuoran nga kon kita motawag sa Ginoo diha sa hugot nga pagtuo, Siya molig-on kanato sa atong mga kasakit ug moluwas kanato sa Iyang paagi ug sa Iyang kaugalingong panahon. Mahimo nimong isugyot nga markahan sa mga estudyante ang hugpong sa mga pulong sa Alma 14:26, 28 nga naghatag og gibug-aton niini nga baruganan.)
Unsay pipila ka pamaagi nga ang mga tawo makagamit sa hugot nga pagtuo kang Jesukristo panahon sa kalisdanan?

Dapita ang mga estudyante sa pagpakigbahin sa ilang mga kasinatian sa dihang sila nakasaksi sa kalig-on nga moabut sa atong mga kinabuhi samtang kita nagpakita og hugot nga pagtuo kang Jesukristo ug mapainubsanon nga naghulat Kaniya. Mahimo nilang ipakigbahin ang ilang kaugalingong mga kasinatian o kasinatian gikan sa mga kinabuhi sa mga tawo nga ilang nailhan. Mahimo usab nimong ipakigbahin ang kasinatian sa imong kinabuhi o ang kinabuhi sa usa ka tawo nga imong nailhan.

Tapusa pinaagi sa pagpamatuod sa gahum sa Ginoo sa paghatag kanato og kalig-on ug pagluwas kanato gikan sa mga pagsulay sa Iyang kaugalingong pamaagi ug sa Iyang kaugalingong panahon. Isiguro sa mga estudyante nga samtang kita mosalig sa kabubut-on sa Ginoo, Iyang dugangan ang atong kalig-on ug gahum sa paglahutay sa mga kalisdanan.

Komentaryo ug Background nga Impormasyon

Alma 14:7–11. “Ang Ginoo midawat kanila ngadto sa iyang kaugalingon”

Bisan og nagbangutan kita sa kamatayon sa mga matarung, nagmaya kita sa pagkahibalo sa ilang mga ganti sa kalibutan sa mga espiritu (tan-awa sa Alma 40:12) ug ang ilang katapusan nga kahimtang diha sa celestial nga gingharian (tan-awa sa D&P 76:50–70). Ang Ginoo miingon, “Kadtong namatay tungod kanako dili makatilaw og kamatayon, kay kini matam-is ngadto kanila.”D&P 42:46). Si Presidente Joseph F. Smith mipasabut:

“Tinuod kini, ako huyang ra kaayo nga mohilak sa kamatayon sa akong mga higala ug pamilya. Ako tingali makahilak kon akong makita ang kaguol sa uban. Ako adunay simpatiya diha sa akong kalag alang sa katawhan. Ako mahimong mohilak uban kanila kon sila maghilak; ako mahimong maglipay uban kanila kon sila nalipay; apan ako walay hinungdan aron magbangutan, ni maguol tungod kay ang kamatayon moabut ngadto sa kalibutan. … Ang tanang kahadlok niining kamatayon nakuha na gikan sa mga Santos sa Ulahing mga Adlaw. Wala silay kalisang sa temporal nga kamatayon, tungod kay nasayud sila nga ang kamatayon moabut kanila gumikan sa kalapasan ni Adan, busa pinaagi sa pagkamatarung ni Jesukristo ang kinabuhi moabut ngadto kanila, ug bisan mamatay man sila mabuhi sila pag-usab. Sa pag-angkon niini nga kahibalo, sila adunay hingpit nga kalipay diha sa kamatayon, tungod kay sila nasayud nga sila mobangon pag-usab ug magkahimamat pag-usab lapas sa lubnganan” (sa Conference Report, Okt. 1899, 70).

Si Elder Bruce R. McConkie sa Korum sa Napulog Duha ka mga Apostoles mitudlo:

“Usahay ang katawhan sa Ginoo gigukod ug gilutos. Usahay Iyang itugot nga ang Iyang matinud-anon nga mga santos magpabilin ug mag-antus, sa lawas ug espiritu, aron mapamatud-an sila sa tanang butang, ug aron makita kon sila mosunod sa Iyang pakigsaad, bisan ngadto sa kamatayon, nga sila makita nga takus sa kinabuhing dayon. Kon mao kana ang dangatan ni bisan kinsa nato, dawaton na lang” (“The Dead Who Die in the Lord,” Ensign, Nob. 1976, 108).