Leksyon 142:Mormon 9

Leksyon 142

Mormon 9

Pasiuna

Gitiwas ni Moroni ang rekord sa iyang amahan pinaagi sa pagtawag niadtong wala motuo kang Jesukristo sa pagdangup ngadto sa Ginoo pinaagi sa paghinulsol. Mitudlo siya nga ang Dios mao ang Dios sa mga milagro nga dili mausab ug nga ang mga milagro mohunong lamang tungod sa ka walay pagtuo. Miawhag siya sa katawhan sa pagtuo kang Jesukristo ug sa pag-ampo ngadto sa Amahan sa tibuok nilang kasingkasing sa pangalan ni Jesukristo aron makadawat sa mga butang nga ilang gikinahanglan.

Mga Sugyot alang sa Pagtudlo

Mormon 9:1–6

Nanawag si Moroni niadtong wala motuo kang Jesukristo sa paghinulsol

Hangyoa ang mga estudyante sa paghunahuna og usa ka sitwasyon diin mibati sila nga dili komportable. Dapita ang pipila ka mga estudyante sa pagsulti kabahin sa ilang mga kasinatian ug ipasabut nganong mibati sila nga dili komportable. Mahimo usab kang mangutana nila unsa man unta ang makahimong komportable nila niadto nga mga sitwasyon.

Dapita ang mga estudyante sa pagbasa sa hilum sa Mormon 9:1–5, nga mangita sa dili komportable nga sitwasyon nga gihulagway ni Moroni. (Mahimo usab kang modapit sa mga estudyante sa pagbasa sa Alma 12:12–15 ug mosulat niini nga pakisayran tupad sa Mormon 9:1–5.)

Sa Katapusang Paghukom, unsa kaha ang bation sa mga dautan diha sa presensya sa Dios nga Amahan ug kang Jesukristo? Nganong mobati man sila og ingon niini?

Dapita ang usa ka estudyante sa pagbasa sa mosunod nga pamahayag ni Presidente Joseph Fielding Smith:

Imahe

President Joseph Fielding Smith

“Walay kaluwasan kon walay paghinulsol. Dili makasulod ang usa ka tawo sa gingharian sa Dios diha sa iyang mga sala. Dili gayud angay alang sa usa ka tawo nga moduol sa presensya sa Amahan ug mopuyo sa presensya sa Dios nga anaa sa iyang mga sala. …

“Nagtuo ko nga adunay daghan kaayong mga tawo sa yuta, daghan kanila tingali anaa sa Simbahan—labing minos adunay pipila nga anaa sa Simbahan—kinsa may ideya nga makapadayon sila niini nga kinabuhi nga magbuhat sa ilang gusto, molapas sa mga kasugoan sa Ginoo ug unya moadto gihapon sa iyang presensya. Nagtuo sila nga mohinulsol sila, tingali sa kalibutan sa espiritu.

“Kinahanglan silang mobasa niini nga mga pulong ni Moroni [nagkutlo sa Mormon 9:3–5].

“Nagtuo ka ba nga ang usa ka tawo kansang kinabuhi napuno sa pagkadunot, kinsa masinupakon kaayo sa Dios, nga walay espiritu sa paghinulsol, magmalipayon o komportable kon tugotan sa pagduol sa presensya sa Dios?” (Doctrines of Salvation, ed. Bruce R. McConkie, 3 vols. [1954–56], 2:195–96; italics sa orihinal gitangtang).

Nganong kinahanglan man kitang maghinulsol sa atong mga sala karon ug dili mohulat hangtud sa Paghukom? (Aron sa pagtabang sa mga estudyante nga makatubag niini nga pangutana, mahimo nimong dapiton sila sa pagbasa sa Alma 34:33–38.)

Dapita ang usa ka estudyante sa pagbasa og kusog sa Mormon 9:6. Hangyoa ang klase sa pagsunod, nga mangita kon unsay kinahanglan nga buhaton niadtong dili matuohon aron mobati sila nga komportable sa presensya sa Dios. Human makareport ang mga estudyante sa unsay ilang nakit-an, hangyoa sila sa pag-ila sa mga pulong sa Mormon 9:6 nga naghulagway niadtong midangup sa Ginoo ug miampo alang sa kapasayloan. Mahimo nimong isugyot nga markahan sa mga estudyante ang mga pulong nga ilang nakit-an.

Dapita ang mga estudyante sa pagsulat og usa ka baruganan diha sa mga notebook o mga scripture study journal nga nag-summarize sa Mormon 9:6. Pagtawag og duha o tulo ka mga estudyante sa pagbasa sa ilang nasulat. Bisan og ang mga estudyante mahimong mogamit og lahi nga mga pulong, ang ilang mga tubag kinahanglan nga mopadayag sa mosunod nga kamatuoran: Kon maghinulsol kita, makit-an kita nga walay lama kon moadto kita sa presensya sa Dios.

Pagpamatuod nga pinaagi sa paghinulsol ug pagpuyo nga matarung, makapangandam kita nga makomportable sa presensya sa Ginoo. Dapita ang mga estudyante sa pagpamalandong sa unsay ilang buhaton karon aron mahimong andam sa pakigkita sa Ginoo.

Mormon 9:7–20

Namahayag si Moroni nga ang Dios nagbuhat og mga milagro ug nagtubag sa mga pag-ampo sa matinud-anon

Isulat ang mga milagro sa pisara. Pangutan-a ang mga estudyante kon unsaon nila pagpatin-aw niini nga pulong. Human makatubag ang pipila ka mga estudyante, dapita ang klase sa pagpangita sa milagro diha sa Giya Ngadto sa mga Kasulatan. Hangyoa sila sa pagbasa sa gitala, nga mangita og impormasyon nga mopaklaro o modugang ngadto sa mga depinisyon nga ilang gisugyot.

Ngano kaha nga ang ubang mga tawo dili man motuo sa mga milagro?

I-summarize ang Mormon 9:7–8 pinaagi sa pagpasabut nga si Moroni namulong ngadto sa katawhan sa katapusang mga adlaw kinsa nangangkon nga wala na gayud mahitabo ang mga pagpadayag, panagna, espirituhanong mga gasa, ug mga milagro.

Ipares-pares ang mga estudyante. Dapita ang usa ka pares sa pagbasa sa hilum sa Mormon 9:9–11, samtang ang lain mobasa sa hilum sa Mormon 9:15–19. Hangyoa ang matag estudyante sa pagsulat sa importante nga mga punto nga gihimo ni Moroni sa pagdani sa katawhan sa pagtuo sa mga milagro. Kon nakagahin na og igong oras ang mga estudyante sa paghuman, dapita sila sa pagreport ngadto sa ilang mga partner kon unsay ilang nasulat.

Sa wala nga bahin sa pisara, isulat ang Mohunong ang mga milagro kon kita …

Sa tuo nga bahin sa pisara, isulat ang Mahitabo ang mga milagro kon kita …

Dapita ang usa ka estudyante sa pagbasa og kusog sa Mormon 9:20, ug hangyoa ang klase sa pagpangita og tulo ka mga rason ngano ang Dios mohunong sa pagbuhat og mga milagro taliwala sa Iyang mga anak. Dapita ang usa ka estudyante sa pagsulat niini nga mga rason sa pisara sa pagkompleto sa pamahayag sa wala nga bahin sa pisara, ingon sa gipakita sa mosunod nga tsart.

Hangyoa ang mga estudyante sa pag-usab sa mga pulong sa matag pamahayag kabahin kon nganong mohunong ang mga milagro sa paagi nga nagpahayag og usa ka kondisyon nga makapahimo sa mga milagro nga posible. Ang ilang mga tubag kinahanglan nga susama sa mga ehemplo sa tuo nga bahin sa tsart.

Mohunong ang mga milagro kon kita …	Mahitabo ang mga milagro kon kita …
Nagkakunhod tungod sa pagkawalay pagtuo	Mopalambo sa atong hugot nga pagtuo
Mopalayo gikan sa matarung nga agianan	Magpuyo sa matarung nga paagi, o mosunod sa mga sugo sa Dios
Wala nakaila sa Dios kang kinsa kita kinahanglan nga mosalig	Makaila ug mosalig sa Dios

Dapita ang mga estudyante sa dinaliang pagribyo sa Mormon 9:9, 19, nga mangita sa mga pagtulun-an ni Moroni kabahin sa kinaiya sa Dios. Human moreport ang mga estudyante kon unsay ilang nakit-an, pangutana:

Tungod kay nahibalo kita nga ang Dios dili mausab ug nga Siya nagpahigayon og mga milagro taliwala sa Iyang mga anak sa unang panahon, unsa ang atong nahibaloan kabahin sa Iyang kaandam sa pagpahigayon og mga milagro sa atong mga kinabuhi karon? (Bisan tuod og ang mga estudyante mahimong mogamit og lahi nga mga pulong, kinahanglan silang mopahayag sa mosunod nga baruganan: Ang Dios kanunay nga nagpahigayon og mga milagro, ug tungod kay Siya dili mausab, Siya sa gihapon nagbuhat og mga milagro sumala sa atong pagtuo. Mahimo nga imong isulat kini nga baruganan diha sa pisara ug isugyot nga isulat kini sa mga estudyante tupad sa Mormon 9:19–20 sa ilang mga kasulatan.)

Ipasabut nga makasinati kita sa milagrusong gahum sa Dios sa atong mga kinabuhi sa daghang mga paagi. Aron matabangan ang mga estudyante sa pagkonsiderar og mga paagi diin ang Dios mao gihapon ang Dios sa mga milagro, dapita ang usa ka estudyante sa pagbasa sa mosunod nga pamahayag ni Sister Sydney S. Reynolds sa kinatibuk-ang kapangulohan sa Primary:

“Akong nakat-unan … nga ang Ginoo motabang nato sa matag aspeto sa atong kinabuhi kon maninguha kita sa pag-alagad Kaniya ug mobuhat sa Iyang kabubut-on.

“Nagtuo ako nga kitang tanan makapamatuod niining gagmay nga mga milagro. Nakaila kita og mga bata kinsa nag-ampo alang sa panabang sa pagpangita sa nawala nga butang ug nakit-an kini. Nakaila kita og mga batan-on kinsa nakakuha og kaisug nga mobarug isip saksi sa Dios ug mibati sa Iyang matinabangon nga kamot. Nakaila kita og mga higala kinsa mibayad sa ilang ikapulo sa katapusan nilang kwarta ug dayon, pinaagi sa usa ka milagro, nakabayad pa gihapon sa ilang bayrunon sa eskwelahan o sa ilang abangan o bisan gani may pagkaon pa alang sa ilang pamilya. Makapakigbahin kita og mga kasinatian sa mga pag-ampo nga natubag ug mga panalangin sa priesthood nga nakahatag og kaisug, nakadala og kahupayan, o nakapahiuli og maayong lawas. Kining inadlaw nga mga milagro nakapasinati kanato sa impluwensya sa Ginoo sa atong kinabuhi” (“A God of Miracles,” Ensign, Mayo 2001, 12).

Unsa ang inyong mga kasinatian nga nakapamatuod nga ang Dios mao gihapon ang Dios sa mga milagro?

Mormon 9:21–37

Nagpahimangno si Moroni sa mga dili motuo sa pagtuo kang Jesukristo ug sa pag-ampo pinaagi sa Iyang pangalan

Dapita ang usa ka estudyante sa pagbasa og kusog sa Mormon 9:21. Hangyoa ang klase sa pagsunod, nga mangita kon unsay gitudlo ni Moroni kabahin sa pag-ampo ngadto sa Langitnong Amahan.

Unsa nga saad ang gihatag ni Moroni? (Kinahanglang mopadayag ang mga tubag sa mga estudyante sa mosunod nga baruganan: Kon mag-ampo kita nga may pagtuo ug sa pangalan ni Kristo, mohatag ang Langitnong Amahan sa bisan unsa nga atong hangyoon.)

Aron sa pagtabang sa mga estudyante nga makasabut unsay gipasabut sa pag-ampo “sa pangalan ni Kristo,” dapita ang usa ka estudyante sa pagbasa sa mosunod nga pamahayag:

“Kita nag-ampo diha sa pangalan ni Kristo kon ang atong hunahuna mao ang hunahuna ni Kristo, ug ang atong mga tinguha mao ang tinguha ni Kristo—kon maanaa kanato ang Iyang mga pulong (Juan 15:7). Kita dayon mangayo sa mga butang nga posibleng ihatag sa Dios. Daghang mga pag-ampo nagpabilin nga wala matubag tungod kay wala kini sa bisan unsang paagi sa pangalan ni Kristo; wala magpaila sa iyang hunahuna, apan nagagikan hinuon gikan sa pagkahakog sa tawo” (Bible Dictionary, “Prayer”).

Mahimo kang mangutana sa mosunod:

Unsaon man nato sa pagsiguro nga ang mga butang nga atong giampo mopadayag sa unsay gusto sa Ginoo alang kanato?
Kanus-a ninyo nakita nga natuman ang saad nga gihatag diha sa Mormon 9:21? (Mahimo nimong hatagan ang mga estudyante og panahon sa pagpamalandong niini nga pangutana sa dili pa sila motubag.)

I-summarize ang Mormon 9:22–25 pinaagi sa pagpasabut nga ang Manluluwas misaad sa Iyang mga disipulo og mga panalangin sa dihang Siya mipadala kanila sa pagsangyaw sa ebanghelyo. Hangyoa ang mga estudyante sa pagpakli sa Mormon 9:22–25 ug ilhon ang pipila niadto nga mga panalangin.

Unsa ang ipasabut niini diha kanimo nga ang Manluluwas “mopamatuod sa [Iyang] mga pulong”? (Mormon 9:25).

Dapita ang mga estudyante sa pagbasa sa hilum sa Mormon 9:27–29, nga mangita sa mga kinaiya ug mga aksyon nga motabang kanila nga mokwalipay ug modawat sa tabang sa Dios. Mahimo nimong hangyoon ang mga estudyante sa pagsulat og mga summary niini nga mga bersikulo sa mga notebook o sa mga scripture study journal.

Sa pagtapos niini nga leksyon, i-summarize ang Mormon 9:30–34 pinaagi sa pagsulti sa mga estudyante nga si Moroni nabalaka nga ang ubang katawhan sa katapusan nga mga adlaw mosalikway sa mensahe sa Basahon ni Mormon tungod sa ka dili hingpit niadtong misulat niini ug sa pinulongan nga gigamit sa pagsulat niini. Dapita ang usa ka estudyante sa pagbasa og kusog sa Mormon 9:35–37. Hangyoa ang klase sa pagsunod, nga mangita sa mga rason nganong si Moroni ug ang uban nag-ampo nga ang Basahon ni Mormon moabut sa katapusan nga mga adlaw. (Aron ang kaliwatan sa ilang mga kaigsoonan, ang mga Lamanite, mahimong mapahiuli ngadto sa “kasayuran ni Kristo” ug ngadto sa mga pakigsaad nga ang Dios mihimo sa balay ni Israel.)

Aron sa pagtabang sa mga estudyante sa pag-summarize sa ilang nakat-unan karon, ipangutana ang mosunod:

Sa unsang paagi ang Basahon ni Mormon usa ka ebidensya nga ang Dios mao ang Dios sa mga milagro ug nga Siya motubag sa mga pag-ampo?
Unsa nga mga kamatuoran ang inyong nakat-unan karon nga makaimpluwensya sa inyong personal nga mga pag-ampo?

Pagribyu sa Mormon

Paggahin og panahon aron pagtabang sa mga estudyante sa pagribyu sa basahon ni Mormon. Hangyoa sila sa paghunahuna sa ilang nakat-unan gikan niini nga basahon, sa seminary ug sa ilang personal nga pagtuon sa kasulatan. Dapita sila sa pagribyu og kadali sa uban nga kapitulo nga mga summary sa Mormon aron pagtabang kanila sa paghinumdom. Hangyoa ang pipila sa mga estudyante sa pagpakigbahin og butang gikan sa Mormon nga nakahatag og kadasig kanila o nakatabang kanila nga makaangkon og mas dakong pagtuo kang Jesukristo.

Komentaryo ug Background nga Impormasyon

Mormon 9:9–10. “Ang Dios sama kagahapon, karon, ug sa kahangturan”

Namahayag si Moroni nga ang Dios dili mausab nga binuhat kinsa “sama kagahapon, karon, ug sa kahangturan” (Mormon 9:9). Sumala sa Doktrina ug mga Pakigsaad 20:11–12, ang pag-abut sa Basahon ni Mormon nagpamatuod nga ang Dios padayon nga “nagdasig sa mga tawo ug nagtawag kanila ngadto sa iyang balaan nga buhat” sa atong panahon sama sa Iyang gibuhat sa milabay nga panahon, “nagpakita nga siya mao gihapon ang Dios kagahapon, karon, ug sa kahangturan.”

Ang Lectures on Faith (Mga Lecture sa Pagtuo) nagpahayag nga aron makaangkon og hingpit nga pagtuo sa Dios, ang usa ka tawo kinahanglan nga adunay “usa ka eksakto nga ideya sa kinaiya, mga kahingpitan, ug mga hiyas. sa [Dios]” (Lectures on Faith (Mga Lecture sa Pagtuo) [1985], 38). Usa sa mga kinaiya sa Dios mao nga Siya dili gayud mausab: “[Ang Dios] walay pagkausab, ni walay pag-usab-usab diha kaniya, apan nga siya sama gikan sa walay katapusan ngadto sa walay katapusan, nga sama sa kagahapon, karon, ug sa kahangturan ug ang iyang tumong usa ka walay katapusan nga nagsunod-sunod nga buhat, sa walay pagkabalhin” (Lectures on Faith, 41).

Ikonsiderar ang mga panalangin nga nahibalo nga ang Dios nagpadayon sa Iyang balaan nga buhat sa atong panahon ug magpadayon nga sama ra kagahapon, karon, ug sa kahangturan.

Mormon 9:10–26. Mga milagro

Mihatag si Moroni og daghang ebidensya nga nagsaksi sa mga milagro sa Dios—ang paglalang sa langit ug yuta, ang paglalang sa tawo, ug ang mga milagro nga ginama ni Jesus ug sa mga Apostoles (tan-awa sa Mormon 9:17–18). Ang “Dios sa mga milagro” nga gihulagway ni Moroni makit-an ra gihapon karong panahona. Si Elder Dallin H. Oaks sa Korum sa Napulog Duha ka mga Apostoles mitudlo nga daghang mga milagro nahitabo sa atong kapanahonan ug anaa sa tinuod nga Simbahan ni Jesukristo:

“Daghang mga milagro nahitabo matag adlaw sa buhat sa atong Simbahan ug sa mga kinabuhi sa atong mga miyembro. Daghan kaninyo nakasaksi og mga milagro, tingali sobra pa sa inyong mahunahunaan.

“Ang usa ka milagro gipatin-aw nga ‘usa ka makatabang nga hitabo nga nabuhat pinaagi sa balaang gahum nga wala masabti sa mga mortal ug sa ilang kaugalingon dili makakopya.’ [sa Daniel H. Ludlow, ed., Encyclopedia of Mormonism, 5 vols. (1992), 2:908.] Ang ideya nga ang mga panghitabo nabuhat pinaagi sa balaang gahum gisalikway sa kadaghanan sa dili relihiyuso nga mga tawo ug bisan sa pipila kinsa relihiyuso. …

“… Ang mga milagro nga gibuhat pinaagi sa gahum sa priesthood anaa gayud kanunay sa tinuod nga Simbahan ni Jesukristo. [Tan-awa sa George Q. Cannon, sa Gospel Truth (1987), sel. Jerreld L. Newquist, 151–52.] Ang Basahon ni Mormon nagtudlo nga ang ‘Dios mihimo og usa ka paagi nga ang tawo, pinaagi sa hugot nga pagtuo, unta makabuhat og kahibulongan nga mga milagro’ (Mosiah 8:18). Ang ‘paagi’ nga gihatag mao ang gahum sa priesthood (tan-awa sa Santiago 5:14–15; D&P 42:43–48), ug kana nga gahum naghimo og mga milagro pinaagi sa hugot nga pagtuo (tan-awa sa Ether 12:12; Moro. 7:37)” (“Miracles,” Ensign, Hunyo 2001, 6, 8).

Mormon 9:32–34. Misulat si Moroni gamit ang inusab nga Ehiptohanon

Namahayag si Moroni nga siya adunay abilidad sa pagsulat og dili mominus duha ka pinulongan: Hebreohanon ug inusab nga Ehiptohanon. Misulat siya nga kon ang “mga palid igo pa ang gidak-on,” siya unta nakasulat sa Hebreohanon; bisan pa man, kadtong naghupot sa talaan migamit og “inusab nga Ehiptohanon” tungod sa kakulang sa luna (tan-awa sa Mormon 9:32–33). Kaniadto sa Basahon ni Mormon, silang Nephi ug Haring Benjamin miangkon sa ilang paggamit og Ehiptohanon. Namahayag si Nephi nga misulat siya sa “pinulongan sa mga Ehiptohanon” sa dihang iyang gikulit ang gagmay nga mga palid (1 Nephi 1:2). Sa pakigsulti niya sa iyang mga anak nga lalaki kabahin sa kaimportante sa tumbaga nga mga palid, si Haring Benjamin misulat nga si Lehi makabasa sa rekord tungod kay siya “natudloan sa pinulongan sa mga Ehiptohanon” (Mosiah 1:4). Busa, nakasabut kita nga si Lehi mitudlo sa ebanghelyo ug sa Ehiptohanon nga pinulongan “ngadto sa iyang mga anak, nga niana sila makatudlo niini ngadto sa ilang mga anak” (Mosiah 1:4). Sumala sa makita, kini nga sundanan mipadayon sa mga henerasyon sa mga naghupot sa rekord nga misunod hangtud nakat-un si Moroni sa pinulongan gikan sa iyang amahan. Bisan pa man, miila si Moroni nga misulat siya sa “inusab nga Ehiptohanon” nga “gitugyan ug giusab … sumala sa matang sa [ilang] pinulongan” (Mormon 9:32), nagpasabut nga ang ubang pagpahiangay sa paggamit sa pinulongan nahitabo sulod sa kaliboan ka tuig sukad pa sa panahon ni Lehi. Kini ang magpasabut nganong si Moroni mitapos sa komentaryo nga “walay lain nga mga katawhan nga nasayud sa among pinulongan” apan ang Dios “nag-andam og mga paagi” alang sa umaabut nga interpretasyon ug paghubad sa talaan (Mormon 9:34). Ang Ehiptohanon sagad nga gigamit sa panahon ni Lehi, ilabi na sa mga negosyante nga tigpanaw sa tibuok rehiyon libot sa Jerusalem. Kon, sigon sa gisugyot sa uban, ang propesyon ni Lehi nagkinahanglan kaniya nga mopanaw sa tibuok rehiyon, tingali naniguro gayud siya nga ang iyang mga anak nga lalaki makat-on sa pinulongan sa mga Ehiptohanon aron sa pagsuporta sa pangita sa pamilya.