1 Nephi 7–14 (Unit 3)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa 1 Nephi 7–14 (Unit3) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa mga estudyante.

Day 1 (1 Nephi 7)

Samtang ang mga estudyante nagtuon sa unsang paagi nga ang mga anak nga lalaki ni Lehi mibalik ngadto sa Jerusalem aron dad-on ang pamilya ni Ishmael uban nila ngadto sa gisaad nga yuta, ilang nakat-unan nga ang Ginoo misugo nato sa pagminyo ug pagpadako og mga anak ngadto Kaniya ug nga ang Dios motubag og mga pag-ampo sumala sa atong hugot nga pagtuo.

Day 2 (1 Nephi 8)

Ang mga estudyante nagtuon sa panan-awon ni Lehi sa kahoy sa kinabuhi. Ilang nakat-unan nga ang pagduol ngadto ni Jesukristo ug pag-ambit sa Iyang Pag-ula makahatag og hingpit nga kalipay. Samtang sila nagbasa bahin sa lain-laing mga grupo sa mga tawo diha sa damgo ug sa ilang mga kalampusan ug mga kapakyasan sa pag-adto ngadto sa kahoy sa kinabuhi ug pagkaon sa bunga, nakat-unan usab nila ang mosunod nga mga baruganan: Ang garbo, pagkakalibutanon, ug ang pagpadala ngadto sa mga tintasyon makapugong nato sa pagdawat sa mga panalangin sa Pag-ula. Kon maggunit kita pag-ayo sa pulong sa Dios, makatabang kini nato nga mabuntog ang tintasyon ug kalibutanon nga mga impluwensya. Ang paggunit pag-ayo sa pulong sa Dios makatabang nato nga mas maduol ngadto sa Ginoo ug makadawat sa mga panalangin sa Pag-ula.

Day 3 (1 Nephi 10–11)

Ang mga estudyante nakat-on unsay nahitabo sa dihang si Nephi gusto nga “makakita, ug makadungog, ug masayud” (1 Nephi 10:17) alang sa iyang kaugalingon sa mga butang nga nakita sa iyang amahan. Pinaagi sa ehemplo ni Nephi, ilang nakita nga ang Dios mopadayag sa kamatuoran ngadto niadtong kinsa matinguhaon nga mangita Kaniya. Si Nephi nakadawat og panan-awon nga nagtudlo sa gugma sa Dios alang kanato, gipadayag pinaagi sa gasa sa Iyang Anak. Ang mga estudyante adunay oportunidad sa pagsulat unsay gipasabut niini ngadto kanila.

Day 4 (1 Nephi 12–14)

Sa nahibilin sa iyang panan-awon, nakita ni Nephi kon giunsa pag-andam sa Ginoo ang agianan alang sa Pagpahiuli. Nakat-unan niya nga ang yano ug bililhon nga mga kamatuoran pagakuhaon gikan sa Biblia apan ang Basahon ni Mormon ug ang ulahing mga adlaw nga mga kasulatan mopahiuli sa yano ug bililhong mga kamatuoran nga makatabang nato nga masayud nga si Jesukristo mao ang Anak sa Dios ug makatabang nato nga moduol ngadto Kaniya. Si Nephi nakakita sa katapusang adlaw. Ang mga estudyante namalandong sa baruganan nga kon kita magpuyo nga matarung ug motuman sa sagrado nga mga pakigsaad, ang gahum sa Dios makatabang nato nga magmadaugon sa dautan.

Pasiuna

Ang tutukan sa leksyon niining semanaha mao ang panan-awon ni Lehi sa 1 Nephi 8. Samtang imong itudlo kini nga leksyon, ipasabut og maayo ang hingpit nga kalipay nga ikahatag sa Pag-ula ni Jesukristo sa atong kinabuhi ug unsaon nato nga makasinati sa mga panalangin sa Pag-ula pinaagi sa pagsunod sa pulong sa Dios. Ang mga estudyante mogamit sa ilang mga kasulatan, mga giya sa pagtuon sa estudyante, ug mga scripture study journal sa tibuok leksyon.

Mga Sugyot alang sa Pagtudlo

1 Nephi 7

Ang Ginoo misugo sa mga anak ni Lehi sa pagbalik ngadto sa Jerusalem alang kang Ishmael ug sa iyang pamilya

Ipakita ang litrato sa minyo nga magtiayon ug ilang mga anak—tingali litrato sa imong kaugalingong pamilya o sa estudyante nga imong gidapit nga magdala og litrato.

Pangutan-a ang mga estudyante: Ngano nga importante ang mga pamilya ngadto sa plano sa Dios alang sa atong kaluwasan?

Dapita ang mga estudyante sa pagribyu ug pag-summarize sa 1 Nephi 7:1–5. Pangutana kon unsa nga mga baruganan ang ilang nakat-unan gikan niini nga mga bersikulo. (Ang mga estudyante mahimong mopakigbahin sa lain-laing mga baruganan. Ang baruganan nga gipasabut og maayo sa manwal sa estudyante mao nga ang Ginoo misugo nato nga magminyo ug magpadako og mga anak ngadto Kaniya.)

Sa ilang leksyon sa day 1, ang mga estudyante gi-assign sa paghangyo og ginikanan, lider sa Simbahan, o magtutudlo sa pagsugyot og tulo ka mga paagi nga ang mga batan-on karon makaandam alang sa kaminyoon ug sa pagpadako og mga anak “ngadto sa Ginoo.” Dapita ang pipila ka mga estudyante sa pagpakigbahin unsay ilang nakat-unan.

1 Nephi 8

Si Lehi adunay panan-awon sa kahoy sa kinabuhi

Pahinumdumi ang mga estudyante nga human madala ni Nephi ug sa iyang mga igsoong lalaki si Ishmael ug ang iyang pamilya ngadto sa kamingawan, nagdamgo si Lehi. Samtang ang estudyante mobasa og kusog sa 1 Nephi 8:10–13, ipadrowing sa laing estudyante diha sa pisara o sa piraso sa papel unsay gihulagway sa mga bersikulo. Kon imong bation nga mas angay sa imong klase, mahimo nimong ipakita ang litrato sa Ang Damgo ni Lehi (62620; Libro sa Hulagway sa Ebanghelyo [2009], nu. 69) ug ipaila sa mga estudyante ang lain-laing mga imahe nga gihulagway niini nga mga bersikulo.

Pangutan-a ang mga estudyante: Unsa ang deskripsyon ni Lehi sa bunga sa kahoy nga nakapadani ninyo?

Pahinumdumi sila nga ang bunga sa kahoy nagsimbolo sa “ang labing mahinungdanon sa tanan nga mga gasa sa Dios” (1 Nephi 15:36)—ang mga panalangin sa Pag-ula ni Jesukristo. Kon duna kay estudyante nga gipadrowing sa litrato, mahimo nimong butangan og label kon unsa ang girepresentahan sa bunga diha sa drowing.

Pangutan-a ang mga estudyante: Unsay atong makat-unan sa 1 Nephi 8:10–13 mahitungod sa pagdawat sa mga panalangin sa Pag-ula? (Bisan og ang mga estudyante mogamit og lain-laing mga pulong sa pagpadayag niini, siguruha nga ang mosunod nga baruganan klaro: Ang pagduol ngadto ni Jesukristo ug pag-ambit sa Iyang Pag-ula makahatag og hingpit nga kalipay. Mahimo nimong isulat sa pisara kini nga baruganan.)

Sa ilang leksyon sa day 2, ang mga estudyante gihangyo sa pagtubag sa pangutana “Kanus-a man ang Pag-ula sa Manluluwas nakahatag og hingpit nga kalipay sa inyong kinabuhi?” Dapita ang mga estudyante sa pagpakli sa ilang mga scripture study journal ug hilum nga mobasa sa ilang mga tubag.

Sa pagtabang sa mga estudyante nga mopakigbahin og makahuluganong mga kamatuoran ug mga pagpamatuod sa usag usa, awhaga ang pipila kanila sa pagbasa o paghisgot unsay ilang gisulat. Mahimo usab ikaw nga mohisgot mahitungod sa usa ka panahon nga ang Pag-ula nakahatag og hingpit nga kalipay sa imong kinabuhi.

Ipasabut nga ang panan-awon ni Lehi wala lamang magtudlo nga ang Pag-ula makahatag og hingpit nga kalipay; nagpakita usab kini unsay kinahanglan natong buhaton aron madawat ang mga panalangin sa Pag-ula. Dapita ang mga estudyante sa pagribyu sa 1 Nephi 8:19–26 ug drowinga ang laing mga simbolo gikan sa panan-awon ni Lehi, o ipaila nila ang ubang mga simbolo diha sa litrato sa Ang Damgo ni Lehi. Samtang sila magdrowing o moila sa mga simbolo, dapita sila sa pagpasabut unsa ang gipasabut sa lain-laing mga simbolo. (Kon magkinahanglan sila og tabang, awhaga sila sa paggamit sa tsart nga ilang nakompleto diha sa giya sa pagtuon sa estudyante.)

Ipabasa og kusog sa usa ka estudyante ang 1 Nephi 8:30. Dayon pangutan-a sa mosunod nga mga pangutana:

Unsa ang tahas sa gunitanan nga puthaw—ang pulong sa Dios—diha sa panan-awon ni Lehi?
Samtang kamo magtuon sa 1 Nephi 8, unsay inyong nakat-unan mahitungod sa kaimportante sa pulong sa Dios?
Unsa nga mga pulong sa 1 Nephi 8:30 ang nagpakita unsay kinahanglan natong buhaton aron madawat ang mga panalangin sa Pag-ula?
Unsa sa inyong hunahuna ang gipasabut sa “[inyong] pagpadayon paingon sa unahan, nga sa kanunay naggunit sa gunitanan nga puthaw”?

Isulat sa pisara ang laing duha ka mga baruganan sa ebanghelyo nga ilang gitun-an sa giya sa pagtuon sa estudyante: Kon maggunit kita pag-ayo sa pulong sa Dios, makatabang kini nato sa pagbuntog sa tintasyon ug sa kalibutanon nga mga impluwensya. Ang paggunit pag-ayo sa pulong sa Dios makatabang nato nga mas maduol ngadto sa Ginoo ug makadawat sa mga panalangin sa Pag-ula.

Hangyoa ang mga estudyante sa paghunahuna nga sila mga misyonaryo ug dunay oportunidad sa pagpamatuod mahitungod sa kaimportante sa pagtuon sa pulong sa Dios ug sa pagsunod sumala sa mga baruganan niini. Sultihi sila sa pagpakigbahin unsay ilang gusto nga isulti, base sa ilang kaugalingon nga mga kasinatian. Ikonsiderar ang pagpakigbahin sa inyong mga pagbati mahitungod sa gahum sa mga kasulatan ug sa mga pulong sa mga propeta sa pagtabang ninyo nga mas maduol ngadto sa Manluluwas.

1 Nephi 10–14

Tungod sa iyang hugot nga pagtuo ug kakugi, nakadawat si Nephi og personal nga pagpadayag mahitungod sa mga butang nga gitudlo sa iyang amahan ug daghan pang laing mga butang.

Dapita ang usa ka estudyante sa pagbasa og kusog sa 1 Nephi 10:17, 19. Ipaila sa klase ang mga panalangin nga moabut kon magkugi kita sa pagtinguha sa giya sa Ginoo. Hangyoa ang usa o duha ka mga estudyante sa pagpakigbahin unsay ilang pagtuo nga gipasabut sa “makugihon nga paagi mangita.” (Atol sa ilang leksyon sa day 3, gihangyo sila sa pagsulat unsay gipasabut niini diha sa ilang giya sa pagtuon sa estudyante.)

I-summarize ang 1 Nephi 11–14 pinaagi sa pagpahayag nga si Nephi nakadawat og personal nga pagpadayag tungod kay siya makugihon nga nangita sa Ginoo. Nakita niya ang pangalagad ug Pag-ula ni Jesukristo (1 Nephi 11), ang umaabut nga kalaglagan sa iyang katawhan tungod sa ilang garbo ug pagkadautan (1 Nephi 12), ang unang mga colonizer nga hentil sa yuta sa saad ug ang pagpahiuli sa yano ug bililhong mga kamatuoran (1 Nephi 13), ug matarung nga katawhan nga nakig-away batok sa mga binuhatan sa dako ug salawayon nga simbahan sa katapusang mga adlaw (1 Nephi 14).

Pahibalo: Sa pag-andam sa mosunod nga kalihokan, mahimo nimong ribyuhon ang nagtukma nga leksyon niini nga manwal ug sa mga materyal sa giya sa pagtuon sa estudyante alang sa day 4 niini nga unit.

Hangyoa ang mga estudyante sa pagpili og usa sa mga kapitulo sa 1 Nephi 11–14 ug sa paghimo sa mosunod. (Mahimo nimong ipabuhat kini nila sa pisara o sa piraso sa papel.)

Mosulat sa summary sa kapitulo nga napili.
Mosulat sa usa sa mga baruganan sa ebanghelyo nga gitudlo niana nga kapitulo. (Mahimong mogamit sila og baruganan nga gipasabut sa giya sa pagtuon o sa pag-ila og usa sa ilang kaugalingon.)
Mosulat kon sa unsa nga paagi kana nga baruganan magamit nato karon.

Kon duna silay igong panahon sa pag-andam, dapita ang mga estudyante sa pagpakigbahin unsay ilang gisulat. Dapita ang usa o duha ka mga estudyante sa pagpakigbahin sa ilang mga pagpamatuod sa mga baruganan nga ilang nakat-unan samtang sila nagtuon sa 1 Nephi 7–14 niining semanaha.

Sa dili pa buhian ang imong klase, hinumdumi ang pagkolekta sa ilang mga scripture study journal ug sa pag-follow up sa bisan unsa nga mga assignment.

Sunod nga Unit (1 Nephi 15–19)

Sa sunod nga unit, ang mga estudyante magtuon pa mahitungod sa mga pagsulay ni Lehi ug sa iyang katawhan samtang sila nagpadayon sa ilang panaw diha sa kamingawan ug paglawig ngadto sa yuta sa saad. Hunahunaa ang ilang kasurprisa sa dihang nahigmata usa ka buntag niana ug nakadiskobre og usa ka “bola nga maayo pagkahimo”—ang Liahona. Sa unsa nga paagi ang Liahona mitrabaho, ug giunsa niini paggiya kanila? Nganong gibadlong ni Nephi ang iyang mga igsoong lalaki diha sa barko? Giunsa paghulagway ni Nephi ang yuta sa saad?