Alma 11–16 (Unit 16)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila magtuon sa Alma 11–16 (unit 16) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (Alma 11)

Pinaagi sa ehemplo ni Amulek nga nakigsangka ni Zeezrom, ang mga estudyante nakat-on nga kon mosalig kita sa Espiritu Santo, makabuntog kita sa tintasyon. Sa pagtudlo bahin ni Zeezrom ug sa mga tawo sa Ammonihah, si Amulek mipasabut og maayo sa mosunod nga mga doktrina kalabut sa papel sa Manluluwas: Ang tinuod nga pagtuo diha ni Jesukristo mao ang sinugdanan sa proseso sa katubsanan gikan sa atong mga sala. Pinaagi sa Pag-ula ni Jesukristo, mabanhaw ang tanan ug hukman sumala sa ilang mga binuhatan.

Day 2 (Alma 12)

Sama ni Amulek, si Alma mitudlo ni Zeezrom ug sa mga tawo sa Ammonihah. Mipasabut siya sa mga tumong sa yawa ug mideklarar nga si Zeezrom anaa sa gahum sa yawa. Si Alma ug Amulek nakapakita sa ehemplo nga ang Espiritu Santo makatabang kanato nga makaila sa mga tintasyon sa kaaway. Si Alma mitabang sa mga tawo nga masabtan nga ang Ginoo mipadayag og espirituhanong mga kamatuoran ngari kanato sumala sa atong paghatag og pagtagad ug kakugi ngadto sa Iyang mga pulong. Gitudlo usab niya ang Katapusang Paghukom, nagpasabut nga kita may tulubagon sa Dios sa atong mga pulong, mga buhat, ug mga hunahuna. Mihatag siya og gibug-aton nga ang mortalidad mao ang panahon alang kanato sa pagpangandam sa pagsugat sa Dios.

Day 3 (Alma 13)

Mipahinumdom si Alma kang Zeezrom ug sa mga tawo nga ang Dios mi-orden og mga naghupot sa priesthood sukad pa sa katukuran sa kalibutan. Ang katawhan nga magpakita og dakong pagtuo ug mopili sa pagkamatarung makadawat sa Melchizedek Priesthood aron madala ang uban ngadto sa Dios. Nakat-on ang mga estudyante mahitungod ni Melchizedek ug sa iyang mga tawo ug mamalandong niining kamatuoran: Samtang mapainubsanon kitang motubag sa pagdapit sa paghinulsol, ang Espiritu Santo mogiya kanato ngadto sa kapahulayan sa Ginoo.

Day 4 (Alma 14–16)

Nakabasa ang mga estudyante mahitungod sa inosente nga mga babaye ug mga bata nga nangamatay sa mga kamot sa dautan nga mga tawo. Namalandong sila sa propetikanhong mga pamahayag nga nagtudlo nga ang Ginoo nagtugot sa mga matarung nga mag-antus sa mga kamot sa dautan aron ang Iyang mga paghukom mahimong makiangayon. Miobserbar ang mga estudyante sa mga kinabuhi nilang Alma ug Amulek nga kon mosalig kita sa Ginoo, Siya molig-on kanato panahon sa atong mga pagsulay. Kon kita motawag sa Ginoo diha sa hugot nga pagtuo, Siya molig-on kanato sa atong mga kasakit ug moluwas kanato sa Iyang paagi ug sa Iyang kaugalingong panahon.

Pasiuna

Samtang sila si Alma ug Amulek nagsugod sa pagtudlo sa mga tawo sa Ammonihah, ilang nahimamat ang oposisyon. Human nila mapasabut ang pipila ka mahangturong mga kamatuoran, daghang katawhan ang “misugod sa paghinulsol, ug sa pagsiksik sa mga kasulatan” (Alma 14:1). Ang mga istorya diha sa Alma 11–16 naghulagway sa sakripisyo nga ang mga tawo andam nga mohimo alang sa ilang pagpamatuod sa kamatuoran. Kini nga mga kapitulo naghatag og ebidensya nga kon ang dautan “mosalikway sa mga matarung,” sila pagahampakon sa Ginoo “pinaagi sa gutom, ug pinaagi sa kamatay, ug pinaagi sa espada” (Alma 10:23). Gipasidan-an nilang Alma ug Amulek ang mga tawo sa Ammonihah nga kon sila mapakyas sa paghinulsol, ang mga paghukom sa Dios moabut kanila. Ang pagsalikway sa tawag sa paghinulsol, ang katawhan sa Ammonihah sa kaulahian nagun-ob sa kasundalohan sa Lamanite.

Kini nga leksyon nagtutok sa Alma 14–15. Agi og dugang, mahimo nimong tudloan o ribyuhon ang mga kamatuoran sa uban nga mga kapitulo nga gitahas niining semanaha.

Mga Sugyot alang sa Pagtudlo

Alma 14–15

Ang Dios mipanalangin niadtong misalig Kaniya diha sa ilang mga kasakit

Ikonsiderar ang pagsugod sa leksyon karon pinaagi sa paghisgot sa kasamtangang panghitabo diin ang inosenteng mga tawo nag-antus tungod sa pagpili sa uban. O tingali imong hangyoon ang mga estudyante sa pagpakigbahin og mga ehemplo gikan sa mga kasulatan sa matarung nga mga tawo kinsa gipanggukod tungod sa ilang mga pagpamatuod sa ebanghelyo. Human sa paghisgot sa pipila ka ehemplo, dapita ang pipila ka estudyante nga magpuli-puli sa pagbasa og kusog sa Alma 14:7–11 ug Alma 60:13.

Ipangutana: Unsa nga mga rason ang gihatag niining mga bersikulo kon nganong ang mga matarung usahay gitugutan sa pag-antus diha sa mga kamot sa dautan? (Usa ka kamatuoran nga nakat-unan sa mga estudyante samtang nagtuon niining bahin sa Alma 14 mao nga gitugutan sa Ginoo ang mga matarung nga mag-antus diha sa mga kamot sa dautan aron ang Iyang mga paghukom mahimong makiangayon.)

Ipasabut nga ang kaangayan ug kalooy sa Dios modangat lapas pa sa kamatayon aron may tulubagon kadtong nakasala ug aron mapadangat ang kalooy ngadto sa mga matarung. Dayon ipakigbahin ang mosunod nga pamahayag ni Presidente James E. Faust sa Unang Kapangulohan:

“Karon ang tanan niining mga pag-antus mahimo sigurong dili makiangayon kon ang tanan motapuos sa kamatayon, pero dili. Ang kinabuhi dili sama sa usa ra ka yugto nga drama. Kini dunay tulo ka mga yugto. Duna kitay miaging yugto, sa dihang didto pa kita sa kinabuhi sa wala pa dinhi sa yuta; ug karon anaa kita sa ikaduhang yugto, nga mao ang pagkamortal; ug duna kitay yugto sa umaabot, kon mobalik na kita ngadto sa Dios. … Gipadala kita sa mortalidad aron masulayan ug mapamatud-an [tan-awa sa Abraham 3:25]. …

“Ang atong mga pag-antus sa miagi ug sa karon dili, sama sa giingon ni Pablo, ‘takus nga ikatandi sa himaya nga ipadayag ra unya kanato’ [Mga Taga-Roma 8:18] sa kahangturan. ‘Kay human sa daghan nga kalisdanan moabut ang mga panalangin. Busa ang adlaw moabut nga kamo pagakoronahan uban sa daghan nga himaya’ [D&P 58:4]. Busa ang kalisdanan magamit sa paagi nga makatabang kini aron makasulod sa celestial nga gingharian. …

“Dili ingon nga kon unsay mahitabo nato maoy mas bug-at kondili kon giunsa nato pag-atubang ang unsay nahitabo nato” (“Asa man Ko Maghimo og Pagpili?” Ensign o Liahona, Nob. 2004, 19–20).

Ipasabut nga ang pag-antus ug kalisud makatabang kanato sa pagkab-ot sa kahimayaan pinaagi sa pagpalig-on sa atong pagtuo. Ang pagpabilin nga matinud-anon panahon sa mga pagsulay ug mga kalisdanan nagpakita og hingpit nga pagsalig sa Dios ug sa Iyang plano, sa ingon naglig-on sa atong pagtuo ug sa atong abilidad sa paglahutay hangtud sa katapusan.

Ipangutana ang mosunod:

Sa unsang paagi nga ang pag-angkon og pagpamatuod sa plano sa kaluwasan, lakip sa kinabuhi sa wala pa dinhi ug sa kinabuhi human dinhi, makapasayon sa pag-antus nga atong masinati sa mortalidad?
Magkonsiderar kon unsa ang inyong natun-an niining semanaha sa Alma 14–15, sa unsa nga mga paagi nga ang mga matarung napanalanginan diha sa ilang mga kasakit?
Sa mga panahon sa kasakit, unsaon nato sa pagpakita nga kita mosalig sa Dios?

Ipakomparar sa mga estudyante ang pangutana nga gipangutana ni Alma sa Alma 14:26 ngadto sa gipangutana ni Joseph Smith sa Doktrina ug mga Pakigsaad 121:3. Dayon ipangutana: Sumala sa Alma 14:26, giunsa sa pagbuntog nilang Alma ug Amulek ang ilang mga kasakit?

Ipasabut nga sa dihang si Propeta Joseph Smith dili makatarunganon nga gibalhog sa bilanggoan didto sa Missouri, siya nangutana sa pangutana nga narekord sa Doktrina ug mga Pakigsaad 121:3. Dili sama nilang Alma ug Amulek, siya wala dayon napagawas sa bilanggoan. Unsay atong makat-unan gikan sa tubag sa Dios ngadto sa Iyang pag-ampo? (Tan-awa sa D&P 121:7–9; 122:4–9.) Ang mosunod nga kamatuoran naghatag og gibug-aton sa personal nga pagtuon sa mga estudyante niini nga semana: Kon kita motawag sa Ginoo sa hugot nga pagtuo, Siya molig-on kanato sa atong mga kasakit ug motubos kanato diha sa Iyang pamaagi ug sa Iyang kaugalingong panahon.

Ipangutana ang mosunod:

Giunsa kamo pagtabang sa Ginoo sa dihang nakasinati kamo og mga pagsulay?
Unsay makatabang ninyo nga mosunod sa Iyang kabubut-on ug modawat sa Iyang gitakda nga panahon?

Tabangi ang mga estudyante nga makasabut nga sila si Zeezrom ug Amulek misalig sa Dios diha sa ilang mga kasakit ug nagantihan sumala sa Iyang kabubut-on ug sa Iyang kaugalingong panahon.

Sugoa ang katunga sa klase sa pagbasa sa Alma 15:5–12 ug ipaila ang impormasyon mahitungod ni Zeezrom nga nagpakita sa iyang nagtubo nga pagsalig sa Ginoo. Sugoa ang laing katunga sa pagtuon sa Alma 15:16, 18 ug ipaila ang impormasyon mahitungod sa unsay gisakripisyo ni Amulek aron sa pagserbisyo sa Ginoo.

Awhaga ang mga estudyante sa pagsalig diha sa Ginoo ug pagdawat sa Iyang kabubut-on ug gitakda nga panahon kon ang mga kalisdanan ug mga kasakit moabut diha kanila. Pasaligi sila nga ang Dios mopadangat sa Iyang gahum ug impluwensya sa nagkalain-laing milagroso ug personal nga mga paagi.

Ribyu sa Scripture Mastery

Kini nga leksyon mao ang tunga-tungang bahin sa Basahon ni Mormon nga kurikulum sa seminary. Aron mapalig-on ang mga paningkamot sa mga estudyante sa pagkat-on ug pagsabut sa mga scripture mastery passage, ikonsiderar ang paghatag nila og usa ka eksamin aron pagsukod kon unsa na sila ka pamilyar sa 13 ka mga tudling nga ilang gitun-an. Kini mahimong usa ka yano nga berbal o sinulat nga eksamin, maghatag sa mga estudyante og usa ka timaan gikan sa bookmark ug tuguti sila sa pagsulat sa mga pakisayran, o mahimo kining usa ka ribyu sa pipila ka tudling nga ilang namemorya. Ang gitas-on niini nga leksyon mahimong magtugot og panahon alang sa pasulit nga mahatag niining semanaha, o mahimo nimong ipahibalo nga adunay umaabut nga eksamin aron ang mga estudyante makapangandam.

Sunod nga Unit (Alma 17–24)

Ang anak nga mga lalaki ni Mosiah miadto aron sa pagsangyaw ngadto sa dautan ug bangis nga mga tawo. Sa sinugdanan giantus nila ang daghang kasakit, apan samtang nagtudlo sila sa ebanghelyo ngadto sa mga Lamanite, nahitabo ang mga milagro. Hinumdumi kon unsa ka maunungon si Ammon ngadto sa Dios ug sa hari nga nagdala og daghan kaayong pagkamatarung.