Leksyon 49
Enos
Pasiuna
Human makapamalandong sa mga pulong sa iyang amahan, nag-ampo si Enos alang sa kapasayloan sa iyang mga sala ug nakadawat sa ingon. Dayon nag-ampo siya alang sa espirituhanon nga kaayohan sa mga Nephite ug mga Lamanite ug gigamit niya ang nahibilin sa iyang kinabuhi sa pagtrabaho alang sa ilang kaluwasan.
Mga Sugyot alang sa Pagtudlo
Enos 1:1–8
Human makapamalandong sa mga pulong sa iyang amahan, nag-ampo si Enos ug nakadawat og kapasayloan sa iyang mga sala
Isulat ang mga pulong nga ang akong kalag gigutom diha sa pisara. Dapita ang mga estudyante sa paghunahuna og higayon nga mibati sila og grabe nga kagutom.
-
Unsay pipila ka mga pulong ang inyong gamiton aron sa paghulagway kon unsay inyong bation kon gigutom kamo? (Mahimong ihulagway sa mga estudyante ang kagutom isip usa ka pagbati sa kahaw-ang, sakit, kaluya, o tinguha nga mabusog.)
-
Unsa kahay buot ipasabut sa tawo sa pag-ingon nga “ang akong kalag gigutom”? (Mga pagbati sa espirituhanon nga kahaw-ang, sakit, o kaluya o usa ka tinguha nga mabusog sa espirituhanon nga paagi.)
Dapita ang mga estudyante sa paghunahuna og higayon nga gigutom ang ilang mga kalag. Ipasabut nga karong adlawa tun-an nila ang kasinatian sa usa ka tawo kansang kalag gigutom. Ipakita ang litrato Enos Nag-ampo (62604; Libro sa mga Hulagway sa Ebanghelyo [2009], nu. 72).
-
Unsa ang inyong nahibaloan mahitungod sa tawo diha sa litrato? (Kon dili sigurado ang mga estudyante, ipasabut nga mao kini ang litrato ni Enos, kinsa apo ni Lehi ug Sariah ug anak ni Jacob. Gisaligan siya sa gagmay nga mga palid sa dihang duol na ang kamatayon sa iyang amahan [tan-awa sa Jacob 7:27].)
Dapita ang usa ka estudyante sa pagbasa og kusog sa Enos 1:1, 3. Hangyoa ang klase nga mangita kon sa unsang paagi nakaimpluwensya si Jacob kang Enos. Dapita ang pipila ka mga estudyante sa pagsulti ngadto sa klase kon unsay ilang nakit-an.
I-display ang mosunod nga tsart diha sa pisara. (Aron makadaginot og panahon, mahimo nimong ibutang ang tsart diha sa pisara sa dili pa magklase.) Gidisenyo ang tsart aron motabang sa mga grupo sa mga estudyante nga makatutok sa lainlaing mga detalye sa kasinatian ni Enos samtang nagtuon sila sa Enos 1:2–8.
|
Unsay gitinguha ni Enos |
Unsay gibuhat ni Enos |
Mga resulta sa unsay gibuhat ni Enos |
|---|---|---|
Ipasabut nga samtang naghunahuna si Enos mahitungod sa mga pagtulun-an sa iyang amahan, nakasinati siya og espirituhanon nga mga pagbati nga midala kaniya sa pagbuhat og piho nga mga butang, diin usab namunga og piho nga mga resulta diha sa iyang kinabuhi.
Bahina ang klase ngadto sa tulo ka grupo. Basaha og kusog ang Enos 1:2–8. Samtang nagbasa ka, ipapangita sa unang grupo ang mga hugpong sa mga pulong nga nagpahayag sa mga tinguha ni Enos. Dapita ang ikaduhang grupo nga mangita sa unsay gibuhat ni Enos. Hangyoa ang ikatulong grupo nga mangita sa mga resulta sa mga tinguha ug mga buhat ni Enos. (Ipasabut nga ang mga bersikulo nga nakalista diha sa tsart naglangkob og impormasyon kalabut sa assignment sa matag grupo.)
Human sa imong pagbasa sa Enos 1:2–8, dapita ang mga estudyante diha sa unang grupo nga ireport ang mga pulong nga ilang nakit-an kabahin sa mga tinguha ni Enos. Samtang maghisgot ang mga estudyante niini nga mga pulong, ipasulat nila ang mga pulong diha sa pisara. Mahimo nimong awhagon ang mga estudyante sa pagmarka niini nga mga pulong diha sa ilang mga kasulatan. Tingali maghisgot ang mga estudyante og mga pulong sama sa “kapasayloan sa akong mga sala,” “kinabuhi nga dayon,” ug “hingpit nga kalipay sa mga santos.”
Human mapuno ang una nga kolum, dapita ang klase nga laktawan og basa ang sinugdanan sa Enos 1:4. Ipapangita nila kon unsay nasinati ni Enos samtang ang mga pulong sa iyang amahan “mahitungod sa kinabuhi nga dayon, ug ang hingpit nga kalipay sa mga santos, mituhop gayud pag-ayo sa [iyang] kasingkasing” (Enos 1:3). Kinahanglang mamatikdan sa mga estudyante ang mga pulong nga “ug ang akong kalag gigutom.” (Mahimo nimong awhagon ang mga estudyante sa pagmarka niini nga mga pulong diha sa ilang mga kasulatan.)
-
Sa unsa kahang paagi ang pagpamalandong sa mga pagtulun-an sa mga propeta kabahin sa kinabuhing dayon ug sa hingpit nga kalipay sa mga Santos makapagutom sa kalag sa usa ka tawo? (Mahimo kining makatabang sa usa ka tawo nga magtinguha nga mahimong takus nga makauban ang Ginoo ug magtinguha sa kalipay nga moabut gikan sa pagsunod sa ebanghelyo.)
Ipasabut nga nagtinguha usab si Enos sa kapasayloan sa iyang mga sala. Ipasabut nga ang mga pulong nga “ang akong kalag gigutom” mahimong nagpahayag og pagbati sa espirituhanong kahaw-ang nga miresulta tungod sa sala. Mahimo usab kining nagpahayag sa pangandoy sa usa ka tawo nga maduol sa Ginoo ug magkat-on mahitungod Kaniya.
-
Ngano man nga ang sala makahatag kanato og pagbati sa espirituhanong kahaw-ang? (Ang sala makapabiya sa Espiritu Santo gikan kanato ug mobati kita nga napalayo gikan sa Ginoo.)
Aron matabangan ang mga estudyante nga ikapahisama ang kasinatian ni Enos ngadto sa ilang mga kaugalingon, hangyoa sila sa pagkonsiderar sa hilum nga paagi kon aduna ba silay pipila sa samang mga pagbati sa espirituhanon nga kagutom nga gihulagway ni Enos.
Aron matabangan ang klase nga makakita kon unsay gibuhat ni Enos aron matagbaw ang iyang espirituhanon nga kagutom, dapita ang mga estudyante sa ikaduhang grupo nga moreport sa ilang mga nakit-an ug isulat ang ilang mga tubag diha sa pisara. Ang mga tubag kinahanglang maglakip sa mosunod: “pagpakigbisog … sa atubangan sa Dios,” “nangamuyo ngadto kaniya sa hilabihan nga pag-ampo,” ug “[pagpakita] og hugot nga pagtuo ni Kristo.”
-
Sa unsa kaha nga paagi ang mga pulong nga “pagpakigbisog … sa atubangan sa Dios” naghulagway sa paningkamot sa usa ka tawo nga makadawat og kapasayloan sa iyang mga sala? (Ipasabut nga si Enos wala makigbisog uban sa Dios, apan sa atubangan sa Dios diha sa pag-ampo. Kini nga pagpakigbisog nagpahayag sa pagpanlimbasog ni Enos aron mapakita sa Langitnong Amahan ang kasinsero sa iyang mga tinguha ug sa iyang kaandam nga maghinulsol pinaagi sa paghimo sa gikinahanglan nga mga kausaban diha sa iyang kinabuhi.) Ngano man nga ang pakigbisog usa ka maayo nga pulong sa paghulagway sa atong mga paningkamot sa paghinulsol?
-
Diha sa Enos 1:4, unsa nga ebidensya ang inyong makita nga sinsero si Enos samtang nagtinguha siya sa kapasayloan sa iyang mga sala? (Tingali kinahanglan nimong tabangan ang mga estudyante nga makasabut nga ang nangaliya nagkahulugan nga mapainubsanong naghangyo ug uban sa dakong tinguha.)
-
Sa unsang mga pamaagi nato mapakita ang atong kasinsero samtang atong gitinguha ang kapasayloan sa Ginoo? (Mahimo nimong ipasabut nga dili kinahanglan nga ang atong mga pag-ampo sama kataas sa pag-ampo ni Enos, apan kinahanglan kining sinsero.)
Aron matabangan ang klase nga makakita kon unsay mga resulta sa gibuhat ni Enos, dapita ang mga estudyante sa ikatulong grupo nga moreport sa ilang mga nakit-an ug isulat ang ilang mga tubag diha sa pisara. Ang mga tubag kinahanglang maglakip sa mosunod: “ang imong mga sala gipasaylo na,” “ang akong kasaypanan nakuha sa hingpit,” ug “ang imong hugot nga pagtuo nakahimo kanimo nga hinlo.” (Mahimo nimong ipasabut nga ang mahimong hinlo nagpasabut nga maayo o maputli gikan sa sala.)
-
Sumala sa Enos 1:7–8, unsay nakapahimo ni Enos nga mapasaylo ug mahinlo? (Ang iyang hugot nga pagtuo diha kang Jesukristo.)
-
Unsa nga mga leksyon ang atong makat-unan gikan ni Enos mahitungod sa proseso sa pagdawat og kapasayloan sa atong mga sala? (Agig dugang sa ubang mga kamatuoran nga mahimong mahisgutan sa mga estudyante, siguroa nga makasabut sila nga samtang nagpakita kita og hugot nga pagtuo kang Jesukristo, mahimong mapasaylo ang atong mga sala ug mahimo kitang hinlo.) Ngano man nga kinahanglan kitang magpakita og hugot nga pagtuo kang Jesukristo aron madawat nato kini nga mga panalangin? (Si Jesukristo mitubos sa atong mga sala. Mahimo kitang hinlo pinaagi lamang sa Iyang Pag-ula.)
-
Sumala sa Enos 1:5–6, giunsa pagkahibalo ni Enos nga napasaylo na ang iyang mga sala? (Mahimo nimong ipasabut nga ang tingog nga gihisgutan diha sa Enos 1:5 mao ang usa ka tingog nga miabut sa hunahuna ni Enos [tan-awa sa Enos 1:10].)
-
Unsaon ninyo pagkahibalo nga napasaylo na ang inyong mga sala?
Isip kabahin sa panaghisgot sa katapusan nga pangutana diha sa ibabaw, basaha ang mosunod nga pamahayag ni Presidente Dieter F. Uchtdorf sa Unang Kapangulohan:
“Sa higayon nga nakahinulsol na kita sa tinuoray nga paagi, si Kristo mokuha sa kabug-at sa kahasol tungod sa atong mga sala. Masayud kita sa atong mga kaugalingon nga napasaylo na kita ug nahimo na nga limpyo. Ang Espiritu Santo mopanghimatuod niini ngari kanato; Siya mao ang Tigbalaan. Walay pagpamatuod sa pagpasaylo nga mas labaw pa” (”Punto sa Luwas nga Pagbalik,” Ensign o Liahona, Mayo 2007, 101).
-
Nganong makatabang man ang kahibalo nga tangtangon ni Kristo ang palas-anon sa pagkasad-an sa atong mga sala human kita tinud-anay nga naghinulsol?
Hangyoa ang mga estudyante nga pamalandungan sa hilum ang mosunod nga mga pangutana:
-
Kanus-a kamo mibati nga gipasaylo na kamo sa Ginoo sa inyong mga sala?
-
Giunsa ninyo pagpakita og hugot nga pagtuo diha sa Pag-ula ni Jesukristo?
-
Giunsa ninyo pagkahibalo nga napasaylo na kamo?
-
Sa bag-o lang mibati ba kamo sa pagpasaylo sa Ginoo?
Ipamatuod nga pasayloon kita kon magpakita kita og hugot nga pagtuo kang Jesukristo ug tinud-anay nga maghinulsol sa atong mga sala. Tungod sa Manluluwas, mahimong mawala ang atong pagkasad-an ug mahimo kitang hinlo.
Enos 1:9–27
Nag-ampo si Enos alang sa espirituhanon nga kaayohan sa mga Nephite ug mga Lamanite, ug makugihon siyang nagtrabaho alang sa ilang kaluwasan
Drowinga sa pisara ang mosunod nga diagram. Ipasabut nga human si Enos nag-ampo alang sa iyang kaugalingon, gidugangan pa niya ang iyang mga pag-ampo aron malakip ang mga pangamuyo alang sa kaayohan sa uban. I-assign ang mga estudyante nga magpares sa pagtrabaho. Dapita ang mga estudyante sa matag pares nga magpuli-puli sa pagbasa og kusog gikan sa Enos 1:9–14. Hangyoa sila sa pag-ila sa duha ka grupo sa mga katawhan nga giampoan ni Enos ug kon unsay iyang giampo alang sa matag sitwasyon. Samtang nagreport ang mga estudyante kon unsay ilang nakat-unan, idugang ang mga pulong Mga Nephite ug Mga Lamanite puli sa mga question mark diha sa diagram.
-
Sumala sa Enos 1:14, unsay mga tinguha sa mga Lamanite ngadto sa mga Nephite?
-
Unsay atong makat-unan mahitungod ni Enos gikan sa iyang pag-ampo alang sa mga Lamanite?
Basaha ang mosunod nga pamahayag gikan ni Presidente Howard W. Hunter. Hangyoa ang mga estudyante sa pagpaminaw alang sa unsang paagi kini may kalabutan sa kasinatian ni Enos:
“Sa matag karon ug unya atong masinati ang mga panalangin sa Pag-ula sa atong kinabuhi, dili nato mapugngan nga kita maghunahuna sa kaayohan sa uban. …
“Usa ka mahinungdanong timailhan sa personal nga pagkakabig sa usa ka tawo mao ang tinguha sa pagpaambit sa ebanghelyo sa ubang mga tawo” (The Teachings of Howard W. Hunter, ed. Clyde J. Williams [1997], 248–49).
-
Sa unsang paagi kini nga pamahayag may kalabutan ngadto sa kasinatian ni Enos? (Gipakita ni Enos nga sa dihang makasinati kita sa mga panalangin sa Pag-ula ni Jesukristo, magtinguha kita sa pagtabang sa uban nga makadawat og kaluwasan. Mahimo nimong awhagon ang mga estudyante sa pagsulat niini nga baruganan diha sa ilang mga kasulatan.)
Hangyoa ang mga estudyante sa pagtuon sa Enos 1:12, 15–20 sa hilum nga paagi, nga mangita kon unsay gipakita ni Enos mahitungod sa relasyon tali sa pag-ampo, hugot nga pagtuo, ug kakugi.
-
Unsa kahay gipasabut sa pag-ampo diha sa hugot nga pagtuo?
-
Sumala sa Enos 1:12, 19–20, giunsa ni Enos pagpakita og kakugi sa panahon ug human sa iyang pag-ampo?
-
Unsay atong makat-unan mahitungod sa pag-ampo gikan sa ehemplo ni Enos? (Kinahanglang makita sa mga estudyante nga ang Ginoo motubag sa atong mga pag-ampo sumala sa atong hugot nga pagtuo ug kakugi.)
Aron matabangan ang mga estudyante sa paghunahuna og mga pamaagi nga makasunod sila sa ehemplo ni Enos, isulat sa pisara ang mosunod nga mga pamahayag o ihatag kini isip handout. Dapita ang mga estudyante nga mopili og usa ka pamahayag ug tubagon kini diha sa ilang mga scripture study journal.
-
Sama ni Enos, nagtinguha ko nga makadawat og kapasayloan sa akong mga sala. Ipakita nako sa Ginoo nga sinsero ko niini nga tinguha pinaagi sa…
-
Sama ni Enos, nagtinguha ko nga motabang sa mga miyembro sa akong pamilya ug mga higala nga moduol kang Kristo. Ang usa ka tawo nga akong tinguhaon sa pagtabang mao si … Akong tinguhaon ang pagtabang niini nga tawo pinaagi sa…
-
Nag-ampo si Enos alang sa mga Lamanite, kinsa gikonsiderar nga iyang mga kaaway. Sama ni Enos, gusto kong mopakita sa gugma sa Ginoo niadtong kinsa dili mabination kanako. Usa ka pamaagi nga buhaton kini mao ang…
Pagkahuman og sulat sa mga estudyante, ipabasa sa usa ka estudyante ang Enos 1:26–27. Dapita ang mga estudyante nga mangita og ebidensya sa hingpit nga kalipay nga nasinati ni Enos tungod sa iyang mga paningkamot. Human moreport ang mga estudyante sa unsay ilang nakit-an, awhaga sila nga tumanon kon unsay ilang gisulat diha sa ilang mga scripture study journal. Ipamatuod nga kon mopakita kita og hugot nga pagtuo kang Jesukristo, makasinati kita og kapasayloan ug hingpit nga kalipay, ug molambo ang atong mga tinguha nga motabang sa uban nga moduol kang Kristo.
Komentaryo ug Background nga Impormasyon
Enos 1:2. “Ako [nakadawat] sa kapasayloan sa akong mga sala.”
Wala maghisgot si Enos kon unsa ug unsay gidak-on sa iyang mga sala, apan hinoon mihulagway sa proseso sa paghinulsol nga kinahanglan natong buhaton aron makadawat og balaan nga kapasayloan. Si Presidente Spencer W. Kimball mitudlo:
“Ganahan gayud kaayo ko sa istorya ni Enos, kinsa adunay dakong panginahanglan. Sama kanatong tanan—kay walay usa kanato nga hingpit—siya nahisalaag. Wala ko masayud kon unsa ka kabug-at ang iyang mga sala, apan misulat siya, ‘Ako mosulti kaninyo sa akong pagpakigbisog sa atubangan sa Dios, sa wala pa ako makadawat sa kapasayloan sa akong mga sala’ [Enos 1:2]. …
“Pagkadakong panalangin og kalipay alang sa matag usa kanato nga masayud nga ang atong Amahan buhi ug nga nahigugma siya kanato, nga mopasaylo siya kanato kon padulong na ang paghinulsol, nga kanunay siyang andam motabang ug mohatag og paghigugma sa iyang hinigugmang mga anak” (“Pray Always,” Ensign, Okt. 1981, 6).