Leksyon 120

3 Nephi 11:1–17

Pasiuna

Human sa kalaglagan ug sa tulo ka adlaw nga kangitngit nga nagtimaan sa kamatayon sa Manluluwas, mga 2,500 ka mga Nephite nga kalalakin-an, kababayen-an, ug mga bata nagpundok sa palibut sa templo didto sa yuta sa Bountiful (tan-awa sa 3 Nephi 17:25). Samtang sila namulong sa usag usa, nakadungog sila sa tingog sa Langitnong Amahan nga nagpaila sa Iyang Anak, si Jesukristo, nga mipakita dayon. Si Jesukristo midapit sa mga katawhan nga makasaksi sa personal nga Siya gipatay tungod sa mga sala sa kalibutan. Tagsa-tagsa sila nga miduol Kaniya ug mibati sa samad sa Iyang kilid ug sa mga marka sa lansang sa Iyang mga kamot ug tiil.

Planuhon ang leksyon

Planoha ang matag leksyon aron ka makagahin og igong panahon sa labing importante nga mga elemento. Sama pananglit, sa katapusan niining leksyon, ang mga estudyante makahigayon sa pagpamatuod kang Jesukristo. Bisan tuod importante ang ubang bahin sa leksyon, siguroa nga mabinlan og igong panahon alang sa mga pagpamatuod.

Mga Sugyot alang sa Pagtudlo

3 Nephi 11:1–7

Ang mga Nephite nakadungog sa tingog sa Amahan nga nagpahibalo sa pagpakita sa Iyang Anak

Samtang mosulod ang mga estudyante sa klase, pagpatukar sa background og usa ka rekording sa sagradong musika o sa kinatibuk-ang komperensya—kanang igo lang madungog. Hunonga ang gipatukar nga rekording kon panahon na sa pangbukas nga pag-ampo ug sa debosyonal. Human sa pag-ampo, pangutan-a ang mga estudyante kon nakadungog ba sila sa rekording. (Kon wala kay mga kapanguhaan sa paghimo niining kalihokan, ikonsiderar ang pagsugo sa usa ka estudyante nga mobasa sa hinay nga tingog gikan sa 3 Nephi 11 samtang mosulod ang mga estudyante sa classroom. Kon ikaw mopili niining opsyon, labing maayo kon mag-assign ka usa ka adlaw sa dili pa ang klase, tingali ngadto sa usa ka estudyante nga kanunayng moabut og sayo.)

• Unsa ang buhaton sa usa ka tawo aron madungog ug masabtan ang usa ka hinay nga tingog?

• Unsa ang mensahe sa kanta (o sa pakigpulong sa kinatibuk-ang komperensya o sa tudling sa kasulatan) nga nagtukar samtang kamo misulod sa classroom karon?

• Sayon ra ba o lisud madungog ug masabut ang mga pulong samtang nangabut ang tanan sulod sa klase? Ngano man?

Dapita ang usa ka estudyante sa pagbasa og kusog sa 3 Nephi 11:1–3, Hangyoa ang klase sa pagsunod, nga mangita kon unsay nalisuran sa mga Nephite sa pagsabut.

• Giunsa paghulagway ang tingog diha sa 3 Nephi 11:3? (Mahimo nimong isugyot nga markahan sa mga estudyante ang deskripsyon sa tingog diha sa ilang mga kasulatan.)

• Unsa ang epekto sa tingog niadtong nakadungog niini?

Hangyoa ang mga estudyante sa pagbasa og hilum sa 3 Nephi 11:4–7, nga mangita kon unsay gibuhat sa mga Nephite sa lahi nga paagi aron makasabut sa tingog sa ikatulo nga higayon nga ila kining nadungog.

• Unsa ang gibuhat sa mga Nephite sa lahi nga paagi sa ikatulo nga higayon nga ilang nadungog ang tingog?

• Base sa unsay inyong nabasahan diha sa 3 Nephi 11:7, kang kinsang tingog ang nadunggan sa mga tawo? (Ilang nadungog ang tingog sa Langitnong Amahan, nga nagpaila sa Iyang Anak, nga si Jesukristo.)

Ikonsiderar ang paghangyo sa mga estudyante sa pagbasa sa Helaman 5:30, nga mangita og laing deskripsyon sa tingog sa Ginoo.

• Unsa ang pagkasusama sa tingog nga nadungog sa mga Nephite ngadto sa mga pag-aghat nga atong madawat gikan sa Espiritu Santo? (Ang mga estudyante mahimong mogamit og lain-laing mga pulong, apan kinahanglan silang mahibalo sa mosunod nga kamatuoran: Ang Espiritu Santo kasagaran mamulong kanato pinaagi sa atong mga pagbati.)

• Nganong importante man ang paghatag og pagtagad sa inspirasyon nga atong madawat gikan sa Ginoo pinaagi sa Espiritu Santo?

Dapita ang mga estudyante sa pagpakigbahin og mga kasinatian sa dihang sila mibati sa pagdasig sa Espiritu Santo nga miabut sa ilang mga hunahuna o mga kasingkasing. Hangyoa sila sa paghulagway kon unsay ilang gibati. Mahimo usab nga mopakigbahin ka og usa nimo ka kasinatian.

Dapita ang usa ka estudyante sa pagbasa sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles mahitungod sa unsay angay natong buhaton aron makapaminaw ug makasabut sa tingog sa Ginoo pinaagi sa Espiritu Santo:

President Boyd K. Packer

“Ang Espiritu dili mokuha sa atong pagtagad pinaagi sa pagsinggit. Dili gayud kini mouyog kanato sa kusgan nga kamot. Ang Espiritu mohunghong Kini malumong mohapuhap, nga kon kita bisi kaayo mahimong dili gayud nato kini mabati.

“Usahay, ang Espiritu motandog sa igong kabug-aton o kadaghanon aron lamang makuha ang atong pagtagad; apan sa akong kasinatian, kasagaran, kon kita dili mopatalinghug sa malumo nga pagbati, kon kita dili maminaw niadto nga mga pagbati, ang Espiritu mobiya ug maghulat hangtud ato kining pangitaon ug paminawon, sa atong kinaiya ug sa atong pagpahayag” (“How Does the Spirit Speak to Us?” New Era, Peb. 2010, 3).

• Unsa nga baruganan ang atong makat-unan gikan sa 3 Nephi 11:1–7 ug gikan ni Presidente Packer? (Ang mga estudyante mahimong mohatag og lain-laing mga tubag, apan siguroha nga makahibalo sila sa mosunod nga kamatuoran: Samtang nagkat-on kita unsaon sa pagpaminaw ngadto sa tingog sa Ginoo pinaagi sa Espiritu Santo, mahimo natong masabtan ang Iyang komunikasyon ngari kanato.)

• Unsa ang nakatabang kaninyo aron maandam ang inyong hunahuna ug kasingkasing sa pagdungog ug pagsabut sa mga paghunghong sa Espiritu Santo?

3 Nephi 11:8–17

Si Jesukristo mipakita ngadto sa mga Nephite ug nagdapit kanila nga tagsa-tagsang mobati sa mga marka sa samad sa Iyang mga kamot, tiil, ug kilid

Dapita ang usa ka estudyante sa pagbasa og kusog sa 3 Nephi 11:8–10. Hangyoa ang klase sa pagsunod ug sa paghunahuna kon unsa kaha kon nakauban pa sila sa mga Nephite niining panahon. I-display ang litrato nga Jesus Nagtudlo didto sa Kasadpan nga Katungang Bahin sa Kalibutan (06048; Libro sa mga Hulagway sa Ebanghelyo [2009], nu. 82) ug ipangutana:

Jesus Teaching in the Western Hemisphere

• Unsa kaha ang inyong hunahuna ug pagbati kon kamo nakauban pa sa mga Nephite sa dihang ang Manluluwas mibisita kanila?

Pahinumdumi ang mga estudyante sa kangitngit ug kalaglagan nga nasinati sa mga Nephite sa wala pa mipakita ang Manluluwas. Dayon dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles mahitungod sa kaimportante sa pagpakita sa Manluluwas ngadto sa mga Nephite:

Elder Jeffrey R. Holland

“Kana nga pagpakita ug kana nga pamahayag nag-establisar sa sentro nga punto, sa labing taas nga higayon, diha sa tibuok kasaysayan sa Basahon ni Mormon. Mao kadto ang pagpakita ug ang balaod nga nagpahibalo ug nagdasig sa matag Nephite nga propeta sa miaging unom ka gatus ka tuig, agi og dugang sa ilang mga katigulangan nga Israelite ug Jaredite sulod sa liboan ka tuig sa wala pa kana.

“Ang tanan nag-istorya bahin kaniya, mikanta bahin kaniya, nagdamgo bahin kaniya, ug nag-ampo alang sa iyang pagpakita—apan dinhi siya sa pagkatinuod. Ang adlaw sa mga adlaw! Ang Dios nga mihimo sa matag gabii ngadto sa kahayag sa kabuntagon miabut na” (Christ and the New Covenant: The Messianic Message of the Book of Mormon [1997], 250–51).

Ipasabut ngadto sa klase nga ang sunod nga bahin sa leksyon gidesinyo aron sa pagtugot kanila sa pagpamalandong sa ilang kaugalingon mahitungod sa pagbisita sa Manluluwas. Sa dili pa magklase, andama ang mosunod nga mga instruksyon ug mga pangutana diha sa usa ka handout alang sa matag estudyante (o isulat kini diha sa pisara o sa usa ka poster). Ihatag sa mga estudyante ang igong panahon sa pagbasa sa 3 Nephi 11:11–17 ug sa pagsunod sa mga instruksyon diha sa handout. Awhaga sila sa pagpamalandong og maayo sa kahulugan niining mga bersikulo samtang ila kining tun-an.

1. Basaha og hilum ang 3 Nephi 11:11–12. Pangitaa unsay gusto ni Jesukristo nga mahibaloan sa mga katawhan mahitungod Kaniya ug sa Iyang gibuhat atol sa Iyang mortal nga pangalagad. Pamalandungi ang mosunod nga mga pangutana:

   • Hain sa mga pamahayag sa Manluluwas diha sa 3 Nephi 11:11 ang labing makahuluganon alang kaninyo? Ngano man?

   • Unsay gipasabut sa Manluluwas sa dihang Siya miingon, “Ako nakainom gikan sa pait nga kopa nga gihatag sa Amahan ngari kanako”? Nganong importante man nga mahibalo nga si Jesukristo kanunay nga manunuton ngadto sa kabubut-on sa Langitnong Amahan?

2. Basaha ang 3 Nephi 11:13–15, ug pamalandungi ang mosunod nga mga pangutana:

   • Unsa ang gidapit sa Manluluwas nga buhaton sa mga Nephite? Unsa ang Iyang gusto nga ilang mahibaloan isip resulta niining kasinatian?

   • Ang mga katawhan miadto sa Manluluwas nga “tagsa-tagsa hangtud silang tanan nakaduol” (3 Nephi 11:15). Hunahunaa nga dihay mga 2,500 ka mga tawo sa pundok sa mga katawhan (tan-awa sa 3 Nephi 17:25), unsa ang gitudlo niini kaninyo mahitungod sa unsay pagbati sa Manluluwas mahitungod sa matag usa kanato?

3. Tubaga ang mosunod nga mga pangutana diha sa usa ka notebook o scripture study journal:

   • Ngano kaha nga ang Ginoo gusto nga ang mga katawhan makatan-aw ug makahikap Kaniya sa “tagsa-tagsa”?

   • Sa unsang paagi kaha kini makaapekto kaninyo nga makahikap sa mga samad nga nadawat sa Manluluwas samtang nag-ula alang sa inyong mga sala?

4. Ikonsiderar ang pagsulat sa mosunod nga kamatuoran diha sa margin sa imong mga kasulatan duol sa 3 Nephi 11:11–15. Si Jesukristo nagdapit kanako sa pagdawat og personal nga pagpamatuod nga Siya mao ang akong Manluluwas. Tubaga ang mosunod nga mga pangutana diha sa usa ka notebook o scripture study journal:

   • Unsa nga mga kasinatian ang nakapahimo kaninyo sa pag-angkon sa inyong kaugalingong pagpamatuod nga si Jesukristo mao ang inyong Manluluwas?

   • Unsa kaha ang gipasabut sa Manluluwas nga inyong buhaton aron mapalig-on ang inyong pagpamatuod mahitungod Kaniya?

   • Kanus-a ninyo nabati nga ang Manluluwas nakaila kaninyo ug mipanalangin kaninyo sa indibidwal nga paagi?

Human ang mga estudyante nakaangkon og igong panahon sa pagkompleto niining kalihokan, dapita ang usa ka estudyante sa pagbasa og kusog sa 3 Nephi 11:16–17. Hangyoa ang klase sa pagsunod, nga mangita kon unsa ang gibuhat sa mga tawo human sila nakaangkon niining personal nga kasinatian uban sa Manluluwas. Mahimo nimong ipasabut nga ang hosanna usa ka Hebreohanong pulong nga nagpasabut nga “luwasa karon” o “palihug luwasa kami” ug gigamit sa tibuok kasulatan isip usa ka pagpahayag sa pagdayeg ug pagpangaliya (tan-awa sa Bible Dictionary, “Hosanna”; Giya ngadto sa mga Kasulatan, “Hosanna,” scriptures.lds.org).

• Ngano kaha nga ang mga tawo misinggit og “hosanna” human sa ilang kasinatian uban sa Manluluwas?

Dapita ang mga estudyante nga motan-aw og maayo sa 3 Nephi 11:15. Hangyoa sila sa pagtino kon unsa ang gibuhat sa mga tawo human nila nakita ug nabati ang mga samad sa Manluluwas. (Ang mga katawhan nagpamatuod, nga mao kadto si Jesukristo.)

• Kinahanglan ba kita nga makakita ug makahikap sa Manluluwas aron makahibalo nga Siya buhi? (Tan-awa sa Moroni 10:5.) Unsaon nato sa “pagpamatuod” kang Jesukristo?

• Unsaon nato pagpahisama sa 3 Nephi 11:15 sa atong mga kaugalingon? Unsay angay buhaton sa matag usa kanato human kita makadawat og pagpamatuod kang Jesukristo? (Kon makadawat kita og personal nga pagpamatuod kang Jesukristo, atong responsibilidad ang pagpamatuod Kaniya.)

Tapusa ang klase pinaagi sa pagdapit sa mga estudyante sa pagsulti mahitungod sa mga panahon sa dihang sila mipakigbahin sa ilang mga pagpamatuod kang Jesukristo ngadto sa uban. Kon itugot sa panahon, dapita kadtong tanan nga gustong mopakigbahin og mubo nga pagpamatuod sa Manluluwas ug, tingali, mosulti kon unsay ilang gibuhat nga naangkon ang ilang mga pagpamatuod. Kon itugot sa panahon, mahimo usab nimong dapiton sila sa pagpakigbahin sa unsay ilang gisulat o gibati atol sa ilang pagtuon karon sa 3 Nephi 11.

Komentaryo ug Background nga Impormasyon

3 Nephi 11:3. “Usa ka gamay nga tingog”

Si Presidente Boyd K. Packer sa Korum sa Napulog Duha ka mga Apostoles mipasabut kon sa unsang paagi nga ang tingog sa Espiritu Santo motrabaho sa atong mga hunahuna ug mga kasingkasing:

“Ang tingog sa Espiritu moabut sama sa usa ka pagbati imbis usa ka tingog. Kamo makakat-on, sama nako, sa ‘pagpaminaw’ niana nga tingog nga mabati imbis nga madungog. …

“Ang gasa sa Espiritu Santo, kon kamo mouyon, mogiya ug manalipod, ug gani mokorihir sa inyong mga lihok. Usa kini usa ka espirituhanong tingog nga mosantup sa inyong hunahuna samtang ang panabut o pagbati ibutang sa inyong kasingkasing. …

“Wala paabuta nga moagi mo niining kinabuhia nga dili masayop, apan dili mo makahimo og dagkong sayop nga wala mapasidan-i daan pinaagi sa mga aghat sa Espiritu” (“Tambag ngadto sa mga Kabatan-onan,” Ensign o Liahona, Nob. 2011, 17–18).