Leksyon 121: 3 Nephi 11:18–41

Leksyon 121

3 Nephi 11:18–41

Pasiuna

Pagkahuman og duol sa mga Nephite ug mibati sa mga marka sa samad sa mga kamot, tiil, ug kilirang bahin sa Manluluwas, ang Ginoo mihatag ni Nephi ug sa uban og gahum sa pagbunyag ug sa pagpahigayon og ubang mga buluhaton sa priesthood. Ang Manluluwas mipasidaan usab sa mga katawhan sa paglikay sa panagbingkil ug misaad nga kadtong nagpakabuhi sumala sa Iyang doktrina makapanunod sa gingharian sa Dios.

Mga Sugyot alang sa Pagtudlo

3 Nephi 11:18–27

Si Jesukristo naghatag ni Nephi ug sa uban og gahum sa pagbunyag

Sa dili pa magsugod ang klase, isulat ang mosunod nga mga pangutana sa pisara: Kinsa ang makabunyag kanako? Sa unsang paagi himoon ang pagbunyag?

Kon ikaw nagtudlo og usa o mas daghang estudyante kinsa bag-ohay lang nga mipasakop sa Simbahan, mahimo nimong sugdan kining leksyon pinaagi sa paghangyo kanila sa pagpakigbahin og pipila sa ilang kasinatian samtang nagkat-on mahitungod sa Simbahan. Pangutan-a sila kon gihunahuna ba nila ang mahitungod sa mga tubag sa duha ka pangutana diha sa pisara sa dihang mihukom sila sa pagpabunyag.

Mahimo usab nimong sugdan kining leksyon pinaagi sa pagdapit sa mga estudyante sa paghunahuna nga ang usa sa ilang mga higala bag-ohay lang nga mihukom nga magpamiyembro sa Simbahan ug nangutana nianang duha ka pangutana diha sa pisara. Hangyoa ang mga estudyante sa pagpasabut kon unsaon kaha nila pagtubag kining mga pangutana. O mahimo nimong dapiton ang duha ka mga estudyante nga i-role-play ang usa ka panaghisgot tali sa usa ka miyembro sa Simbahan ug sa iyang higala gamit kining mga pangutana.

Pahinumdumi ang mga estudyante nga sa miaging leksyon ilang nakat-unan ang mahitungod sa pagpakita ni Jesukristo sa usa ka grupo sa mga Nephite. Si Jesukristo midapit kanila nga sila mismo mosaksi sa Iyang Pagkabanhaw ug kabalaan pinaagi sa pagbati sa mga marka sa samad sa Iyang mga kamot, tiil, ug kilid. Ipasabut nga ang misunod dayon niini nga kasinatian, ang Manluluwas mitudlo sa katawhan sa Iyang doktrina, nga mao ang pagtuo Kaniya, magpabunyag, ug modawat sa Espiritu Santo.

Dapita ang usa ka estudyante sa pagbasa og kusog sa 3 Nephi 11:18–22. Hangyoa ang klase sa pagsunod, nga mangita sa mga tubag sa pangutana nga Kinsa ang makabunyag kanako? Ipasulat sa usa ka estudyante ang mga tubag diha sa pisara ubos sa pangutana. Bisan tuod nga ang mga estudyante mahimong mogamit og lain-laing mga pulong, kinahanglan ilang mahibaloan ang mosunod nga kamatuoran: Ang pagbunyag kinahanglang himoon sa usa ka tawo kinsa naghupot sa tukma nga awtoridad. (Kon kini nga ideya wala pa nasulat diha sa pisara, mahimo nimong idugang kini ngadto sa lista sa mga tubag.)

Aron matabangan ang mga estudyante nga mas makasabut niining kamatuoran, mahimo nimong ipasabut sa daklit nga ang bunyag mahimong ipahigayon pinaagi lamang sa usa ka tawo nga naghupot sa katungdanan sa priest sa Aaronic Priesthood (tan-awa sa D&P 20:46) o pinaagi sa usa ka tawo kinsa natugyanan na sa Melchizedek Priesthood (tan-awa sa D&P 20:38–39; 107: 10–11). Dugang pa, kini nga tawo kinahanglang molihok ubos sa direksyon sa priesthood lider kinsa naghupot sa mga yawe nga gikinahanglan sa pagtugot sa ordinansa (sama sa usa ka bishop, presidente sa branch, o presidente sa misyon).

Ngano kaha nga ang Ginoo nagkinahanglan nga ang ordinansa sa bunyag ipahigayon pinaagi sa usa ka awtorisado nga naghupot sa priesthood?

Dapita ang usa ka estudyante sa pagbasa og kusog sa 3 Nephi 11:23–27. Hangyoa ang klase sa pagsunod, nga mangita sa mga tubag sa pangutana nga Sa unsang paagi himoon ang pagbunyag? Ipasulat sa usa ka estudyante ang mga tubag diha sa pisara ubos sa pangutana.

Unsay buhaton atol sa usa ka pagbunyag kon ang mga pulong sa ordinansa dili husto nga malitok o kon ang tawo nga gibunyagan dili hingpit nga maunlod sa tubig? (Ang ordinansa usbon.) Unsa nga kamatuoran ang atong makat-unan gikan niini? (Bisan og ang mga estudyante mahimong mogamit og lain-laing mga pulong, kinahanglan nilang mahibaloan ang mosunod nga kamatuoran: Ang bunyag kinahanglan gayud nga buhaton diha sa pamaagi nga gitakda sa Ginoo. Mahimo nimong isulat kining pamahayag diha sa pisara.)
Ngano kaha nga importante nga ang bunyag ipahigayon gayud nga tukma sa pamaagi nga gitakda sa Ginoo?

Aron matabangan ang mga estudyante nga mobati sa kaimportante sa mga kamatuoran nga inyong gihisgutan diha sa 3 Nephi 11:18–27, mahimo nimong ipangutana ang mosunod:

Unsay inyong gibati sa dihang kamo gibunyagan? Unsay kahulugan niini nganha kaninyo nga masayud nga kamo gibunyagan pinaagi sa usa ka tawo nga naghupot sa tukma nga awtoridad ug sa pamaagi nga gitakda sa Ginoo?
Nakasaksi ba kamo og bag-ohay lang nga bunyag? Unsa ang inyong gibati?

Kon adunay usa sa imong mga estudyante nga naghupot og katungdanan nga priest sa Aaronic Priesthood, pangutan-a:

Sa unsang paagi nga nakaimpluwensya ninyo ang pagkahibalo nga kamo adunay awtoridad sa pagbunyag? (Mahimo nimong susihon kon aduna bay mga estudyante sa imong klase nga nakabunyag na og usa ka tawo. Kon nakasulay na sila, dapita sila sa pagpakigbahin kon unsa ang ilang gibati ug nakat-unan atol sa ilang kasinatian.)

Mahimo kang mopakigbahin sa imong mga kasinatian ug mga pagbati mahitungod sa sagradong ordinansa sa bunyag.

3 Nephi 11:28–30

Si Jesukristo mipasidaan nga ang panagbingkil iya sa yawa

Isulat ang pulong nga panagbingkil diha sa pisara.

Unsa ang panagbingkil? (Argumento, panagbangi, o panaglalis.)

Dapita ang mga estudyante sa paglista sa daklit diha sa mga notebook o mga scripture study journal og pipila ka mga sitwasyon o mga kalihokan diin ang panagbingkil mahimong motumaw. Human ang mga estudyante dunay igong panahon sa pagsulat, hangyoa ang usa ka estudyante sa pagbasa og kusog sa 3 Nephi 11:28–30. Dapita ang klase sa pagsunod ug mangita sa pipila ka mga butang nga gilalisan sa mga Nephite.

Unsa ang pipila ka mga butang nga klarong gilalisan sa mga Nephite? (Ang ordinansa sa bunyag [tan-awa usab sa 3 Nephi 11:22] ug ang doktrina ni Kristo.)
Sumala sa 3 Nephi 11:29, diin naggikan ang espiritu sa panagbingkil? (Isulat ang mosunod nga kamatuoran diha sa pisara: Ang espiritu sa panagbingkil dili iya sa Dios, apan iya sa yawa. Mahimo nimong isugyot nga markahan sa mga estudyante kini nga kamatuoran diha sa 3 Nephi 11:29.)
Ngano kaha nga importante nga likayan ang panagbingkil kon maghisgot sa ebanghelyo uban sa laing mga tawo? Nganong ang pakiglalis sayop nga paagi sa pagtudlo sa ebanghelyo? (Ang mga estudyante mahimong mohatag og lain-laing mga tubag, apan siguroa nga sila makasabut nga kon kita makig-away o makiglalis ngadto sa uban mahitungod sa ebanghelyo, wala diha ang Espiritu Santo aron motabang kanato sa pagtudlo o sa pagpamatuod sa kamatuoran diha sa mga kasingkasing niadtong atong gitudloan.)

Sa pagpasabut sa importanting sangputanan sa panagbingkil, isulat sa pisara ang mosunod nga pamahayag ni Presidente James E. Faust sa Unang Kapangulohan. Mahimo nimong dapiton ang mga estudyante nga isulat kini nga pamahayag diha sa ilang mga kasulatan tupad sa 3 Nephi 11:29. (Ang pamahayag makita sa “What I Want My Son to Know before He Leaves on His Mission,” Ensign, Mayo 1996, 41).

“Kon adunay panagbingkil, ang Espiritu sa Ginoo mobiya, nga dili magsapayan kon si kinsay nasayop” (Presidente James E. Faust).

Kanus-a ninyo nabati nga ang Espiritu sa Ginoo mibiya tungod sa panagbingkil? Giunsa ninyo pagkahibalo nga ang Espiritu mibiya na?

Ipasabut ang pamahayag sa Manluluwas mahitungod sa panagbingkil diha sa 3 Nephi 11:30: “Mao kini ang akong doktrina, nga ang ingon niini nga mga butang pagahunungon.”

Sa unsang paagi nga atong “pagahunungon” ang panagbingkil ug panaglalis? (Ang mga tubag mahimong maglakip sa mosunod: Makapaningkamot kita nga mahimong tigpasiugda og kalinaw [tan-awa sa 3 Nephi 12:9]. Makaampo kita alang sa kaalam ug pailub sa pagbuntog sa panagbingkil. Maningkamot kita nga malikayan ang mga sitwasyon diin matintal kita sa pagpakig-away sa uban.)
Kanus-a ninyo nabati nga napanalanginan tungod sa inyong mga paningkamot sa paglikay o pagbuntog sa panagbingkil?
Sa unsang paagi nga ang paghinumdom sa mga pagtulun-an sa Manluluwas diha sa 3 Nephi 11:29–30 makatabang kaninyo kon kamo anaa sa usa ka sitwasyon nga kamo mahimong makigbingkil?

Mahimo kang mopakigbahin og kasinatian sa dihang mibati ka nga napanalanginan tungod sa imong paningkamot sa paglikay o pagbuntog sa panagbingkil. Aron madasig ang mga estudyante sa paggamit kon unsay ilang nakat-unan gikan sa 3 Nephi 11:28–30, dapita sila nga mo-refer og balik ngadto sa ilang nalista nga mga sitwasyon o mga kalihokan nga lagmit masinati nila ang panagbingkil. Dapita sila sa pagtakda ug sa pagsulat og usa ka tumong alang sa paagi nga sila maningkamot sa paglikay o pagbuntog sa panagbingkil sa usa ka sitwasyon o kalihokan nga ilang nalista.

3 Nephi 11:31–41

Si Jesukristo namahayag sa Iyang doktrina

Aron maandam ang mga estudyante sa pagtuon sa 3 Nephi 11:31–41, isulat ang mosunod diha sa pisara:

Dapita ang mga estudyante nga isulti sa daklit ngadto sa usa ka classmate ang usa ka butang nga bag-ohay lang nilang gibuhat nga miresulta sa positibong sangputanan ug ipasabut kon unsa kana nga sangputanan. Mahimo usab nimo silang hangyuon sa pagsulti mahitungod sa usa ka butang nga ilang gibuhat o nakita nga miresulta sa negatibong sangputanan. (Pahimangnoi ang mga estudyante nga dili mopakigbahin sa bisan unsang butang nga tingali dili tukma o personal ra kaayo.)

Basaha og kusog ngadto sa klase ang 3 Nephi 11:31. Ipasabut nga ang nahibilin sa 3 Nephi 11 naglangkob sa pamahayag ni Jesukristo bahin sa Iyang doktrina ngadto sa mga katawhan ni Nephi. Kini nga kapitulo naghan-ay usab sa mga sangputanan sa pagdawat o pagsalikway sa Iyang doktrina.

Isulat ang mosunod nga mga pakisayran sa kasulatan diha sa pisara: 3 Nephi 11:32–34; 3 Nephi 11:35–36; 3 Nephi 11:37–38; 3 Nephi 11:39–40. Ipares-pares ang mga estudyante, ug i-assign ang matag parisan sa pagtuon sa usa sa mga tudling sa kasulatan. Hangyoa sila sa pagtino sa mga aksyon ug mga sangputanan nga gitudlo ni Jesukristo. (Mahimo nimong isugyot nga ikumpara sa mga estudyante kining mga pagtulun-an ngadto sa ikaupat nga artikulo sa hugot nga pagtuo.)

Human makaangkon og igong panahon ang mga estudyante sa pagtuon, hangyoa ang pipila kanila sa pagreport sa mga aksyon ug mga sangputanan nga ilang nakit-an diha sa na-assign nila nga mga bersikulo. Dapita sila sa pagsulat sa ilang mga tubag diha sa pisara ubos sa Aksyon o Sangputanan. Samtang moreport ang mga estudyante sa matag tudling, ipangutana ang katugbang nga mga pangutana sa ubos:

Alang sa mga parisan nga na-assign sa 3 Nephi 11:32–34, ipangutana:

Sa unsang paagi nga ang Espiritu Santo makatabang kanato nga motuo diha kang Jesukristo ug sa Langitnong Amahan? (Ang Espiritu Santo nagpamatuod sa Langitnong Amahan ug ni Jesukristo.) Kanus-a nga ang Espiritu Santo misaksi nganha kaninyo sa katinuod ug sa gugma sa Langitnong Amahan ug ni Jesukristo?

Alang sa mga parisan nga na-assign sa 3 Nephi 11:35–36, ipangutana:

Sumala niini nga mga bersikulo, sa unsang paagi nga ang pagpili nga motuo diha sa Langitnong Amahan ug ni Jesukristo nagdapit sa impluwensya sa Espiritu Santo sa atong kinabuhi?

Alang sa mga parisan nga na-assign sa 3 Nephi 11:37–38, ipangutana:

Unsa ang inyong nakita nga susama tali sa 3 Nephi 11:37 ug 3 Nephi 11:38?
Unsa ang maayong mga hiyas sa usa ka gamayng bata? Ngano kaha nga importante nga “mahimo nga sama sa usa ka gamay nga bata”?

Alang sa mga parisan nga na-assign sa 3 Nephi 11:39–40, ipangutana:

Sa unsang paagi nga ang mga pagtulun-an sa Manluluwas dinhi niining mga bersikulo naghatag og gibug-aton sa kaimportante sa atong pagpili sa pagsunod o dili pagsunod sa Iyang doktrina?

Hangyoa ang mga estudyante sa pag-summarize sa importante nga mga aksyon nga gitudlo ni Jesus nga angay natong buhaton aron makasulod sa gingharian sa langit. Ang mga estudyante mahimong mogamit og lain-laing mga pulong, apan kinahanglan nilang ipahayag ang mosunod nga kamatuoran: Aron makasulod sa gingharian sa langit, kinahanglan kita nga maghinulsol, motuo ni Jesukristo, magpabunyag, ug modawat sa Espiritu Santo. Mahimo nimong tapuson pinaagi sa pagpakigbahin sa imong pagpamatuod bahin niini nga kamatuoran. Awhaga ang mga estudyante sa pagpakabuhi sumala sa doktrina ni Jesukristo aron sila makapanunod sa gingharian sa Dios. Mahimo usab nimong pahinumduman sila sa pagtrabaho sa ilang mga tumong sa paglikay ug pabuntog sa panagbingkil.

Komentaryo ug Background nga Impormasyon

3 Nephi 11:19–22. Si Jesukristo mihatag sa mga Nephite og awtoridad sa pagbunyag

Nganong si propeta Nephi ug ang uban kinahanglan nga makadawat og awtoridad sa pagbunyag kon sila naghimo na niana nga ordinansa sa wala pa miabut ang Manluluwas? Ikonsiderar ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Bisan og kining mga Nephite adunay awtoridad sa pagbunyag base sa karaang dispensasyon ni Moises, si Kristo midapit ni Nephi nga moduol aron ipanghimatuod ang iyang awtoridad sa priesthood sa pagbunyag diha sa bag-ong dispensasyon sa ebanghelyo, ug tingali sa pag-orden kaniya ngadto sa pagka-apostol sa samang higayon. Dayon siya mitawag og laing grupo sa pagduol, nagtudlo kanila kon unsaon pagbunyag ug nagpasidaan nga walay mahimong ‘panagbingkil’ diha kanila kabahin niining mahinungdanong doktrina” (Christ and the New Covenant: The Messianic Message of the Book of Mormon [1997], 259–60).

3 Nephi 11:28. Ayaw pakiglalis bahin sa mga punto sa doktrina

Si Elder Robert D. Hales sa Korum sa Napulog Duha ka mga Apostoles mipasabut kon nganong importante sa mga Santos sa Ulahing mga Adlaw sa paglikay sa panagbingkil:

“Tungod kay … [ang] gahum anaa sa Espiritu sa Ginoo, kinahanglan dili kita mahimong tiglantugi kon maghisgot kabahin sa atong pagtuo. Sama sa nahibaloan sa hapit tanang mga misyonaryo, ang panaglantugi sa Biblia kanunay nga moabug sa Espiritu. Ang Manluluwas nag-ingon, ‘Siya nga may espiritu sa panagbingkil dili gikan kanako’ (3 Nephi 11:29). Makapaanugon kaayo nga ang Simbahan giakusahan sa pagkadili Kristiyano diin ang mga miyembro motubag niana nga mga akusasyon sa dili Kristohanon nga paagi! Hinaut nga ang atong pakigsultihanay sa uban kanunay nga giniyahan sa bunga sa Espiritu—‘gugma, kalipay, kalinaw, pailub, pagkamapuanguron, pagkamaayo, hugot nga pagtuo, kaaghup, [ug] pagpugong sa kaugalingon’ (Mga Taga-Galacia 5:22–23)” (“Kristohanong Kaisug: Ang Bugti sa Pagkadisipulo,” Ensign o Liahona, Nob. 2008, 73).

3 Nephi 11:33–34. Ang ordinansa sa bunyag mahinungdanon

Si Propeta Joseph Smith mitudlo nga ang ordinansa sa bunyag mahinungdanon sa pagsulod sa gingharian sa Dios:

“Ang bunyag usa ka timailhan ngadto sa Dios, ngadto sa mga anghel, ug ngadto sa langit nga kita mobuhat sa kabubut-on sa Dios, ug walay laing paagi ubos sa kalangitan diin ang Dios mi-ordinar sa tawo sa pagduol ngadto Kaniya ug maluwas, ug sa pagsulod ngadto sa gingharian sa Dios, gawas sa hugot nga pagtuo diha ni Jesukristo, paghinulsol, ug bunyag alang sa kapasayloan sa mga sala, ug ang bisan unsang lain nga mga paagi makawang; dayon kamo makaangkon sa saad sa gasa sa Espiritu Santo” (Mga Pagtulun-an sa mga Presidente sa Simbahan: Joseph Smith [2007], 108).