Leksyon 78: Alma 13

Leksyon 78

Alma 13

Pasiuna

Sa unang pagtudlo ni Alma sa masinupakon nga mga katawhan sa Ammonihah, sila nakiglalis kaniya, nangutana, “Kinsa ikaw?” ug nangutana sa iyang awtoridad (tan-awa sa Alma 9:1–6). Sila anaa sa kahimtang sa apostasiya, nga mihangop sa kapunongan ni Nehor—panapi sa mga pari, uban sa tumong niini nga makapamintaha (tan-awa sa Alma 1:2–15; 15:15; 16:11). Sukwahi sa mga pagtulun-an ni Nehor, si Alma mitudlo kanila mahitungod “sa halangdon nga pagkapari sa balaan nga kapunongan sa Dios,” uban sa tumong sa pagtabang sa uban nga maghinulsol ug mosulod ngadto sa kapahulayan sa Ginoo (tan-awa sa Alma 13:6). Siya mikutlo sa ehemplo ni Melchizedek, kinsa misangyaw sa hugot nga pagtuo ug paghinulsol ug mitabang sa iyang katawhan nga magpuyo diha sa kalinaw. Si Alma mitudlo usab mahitungod sa kinabuhi nga wala pa sa yuta ug ang pagka-inordinahan nang daan. Gitapos niya ang iyang wali pinaagi sa pagdapit sa mga tawo sa pagpatalinghug sa iyang mga pulong aron sila makaandam sa pagsulod ngadto sa kapahulayan sa Ginoo.

Mga Sugyot alang sa Pagtudlo

Alma 13:1–12

Si Alma nagtudlo sa katawhan sa Ammonihah mahitungod sa calling sa mga halangdon nga mga pari

Ipasabut nga ang Alma 13 naglangkob sa mga pagtulun-an ni Alma mahitungod sa usa ka grupo sa katawhan kinsa naghatag og dakong kaayohan sa Simbahan. Sa pagkatinuod, tanang mga miyembro sa Simbahan napanalanginan pinaagi sa pagserbisyo niining mga tawhana.

Sultihi ang mga estudyante nga nakaila sila og mga tawo kinsa kabahin niining grupo. Dayon hangyoa ang mga estudyante sa pagbasa sa hilum sa Alma 13:1 aron sa pagtino kon kinsa kining mga tawhana. Human sila makagahin og panahon sa pagbasa niining bersikulo, isugyot nga sila mobasa usab sa Alma 13:10, 14 ug Doktrina ug mga Pakigsaad 107: 1–3. Mahimo nimong isugyot nga ilang isulat kining mga pakisayran sa margin tupad sa Alma 13:1.

Ipasabut nga si Alma namulong kabahin sa mga pari sunod sa balaan nga kapunongan sa Anak sa Dios, nga mao ang Melchizedek Priesthood. Sa laing pagkasulti, siya namulong kabahin sa mga kalalakin-an nga naghupot sa katungdanan sa halangdon nga pari sa Melchizedek Priesthood. Dapita ang usa ka estudyante sa pagbasa sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:

“Kini nga mga Nephite, kinsa matinud-anon ug matinuoron sa paghupot sa balaod ni Moises, adunay Melchizedek Priesthood, nagpasabut nga anaa usab kanila ang kahingpitan sa ebanghelyo. … Pipila sa atong labing maayo nga impormasyon mahitungod sa Melchizedek Priesthood makita diha sa Alma 13” (The Promised Messiah [1978], 421).

Unsa nga mga panalangin ang miabut sa inyong kinabuhi pinaagi sa Melchizedek Priesthood? (Tingali ang mga estudyante maghisgot sa gasa sa Espiritu Santo, patriyarkal nga panalangin, ubang mga panalangin sa priesthood, sa pagpangulo sa mga General Authority, sa pagpangulo sa lokal nga mga lider sama sa mga bishop o branch president, ug sa mga panalangin nga ilang nadawat pinaagi sa mga pakigsaad nga gihimo sa ilang mga ginikanan diha sa templo. Tingali maghisgot usab sila sa bunyag ug sa sakrament, nga gipahigayon pinaagi sa awtoridad sa Aaronic Priesthood apan ubos sa direksyon sa mga lider sa Melchizedek Priesthood.)

Ipakita ang mosunod nga mga pangutana diha sa pisara, o ilakip kini sa handout. Hatagi ang mga estudyante og panahon sa pagbasa sa Alma 13:2–10, ug pangitaon ang mga tubag sa mga pangutana.

Kanus-a unang gitawag ug giandam ang mga naghupot sa Melchizedek Priesthood? (Tan-awa sa Alma 13:3–5.)

Unsa ang katungdanan nga anaa sa tanang naghupot sa Melchizedek Priesthood? (Tan-awa sa Alma 13:6.)

Unsa nga mga pulong diha sa Alma 13:7 nga naghulagway sa Melchizedek Priesthood?

Unsa ang pipila ka mga kwalipikasyon aron ma-orden ngadto sa Melchizedek Priesthood? (Tan-awa sa Alma 13:10.)

Kon aduna pay oras ang mga estudyante sa pagpangita sa mga tubag sa mga pangutana, hangyoa sila sa pagreport sa ilang mga tubag. Mahimo nimong isulat ang ilang mga tubag diha sa pisara.

Aron matabangan ang mga estudyante nga mas masabtan ug mahisgutan pa unsay ilang nabasahan, ikonsiderar ang pagpangutana sa mosunod:

Sa unsang paagi nga ang pagserbisyo sa mga naghupot sa priesthood nakatabang kanato nga masayud kon unsaon sa pagtan-aw ngadto ni Jesukristo alang sa katubsanan? (Tan-awa sa Alma 13:2, 8, 16. Pinaagi sa ilang ehemplo ug mga pagtulun-an ug pinaagi sa mga ordinansa nga ilang gihimo, sila nagtudlo kanato ngadto sa Manluluwas.)
Unsay gipasabut ni Alma sa dihang siya miingon nga ang halangdong mga pari mahimong “gitawag ug giandam gikan sa katukuran sa kalibutan”? (Alma 13:3). (Siya mipasabut nga ang pipila ka mga tawo gi-orden nang daan aron makadawat og piho nga mga katungdanan sa priesthood.)

Aron matabangan ang mga estudyante nga makasabut sa pagka-inordinahan nang daan ug kon unsaon kini paggamit sa ilang kinabuhi, mahimo nimong hangyoon ang usa ka estudyante sa pagbasa sa mosunod nga pamahayag.

Si Propeta Joseph Smith mitudlo nga: “Ang matag tawo nga adunay buluhaton sa pagpangalagad sa mga lumulupyo sa kalibutan gi-orden niana gayud nga katuyoan didto sa Dakong Konseho sa langit sa wala pa ang kalibutan. Ako moingon nga ako gi-orden niini gayud nga katungdanan niadto nga Dakong Konseho” (Mga Pagtulun-an sa mga Presidente sa Simbahan: Joseph Smith [2007], 619).

Si Presidente Spencer W. Kimball miingon: “Sa kalibutan sa wala pa kita moabut dinhi, ang matinud-anong mga babaye gihatagan og piho nga mga buluhaton samtang ang matinud-anong mga lalaki gi-orden nang daan sa pihong mga tahas sa priesthood. Samtang kita dili na mahinumdom karon sa mga detalye, kini wala makapausab sa mahimayaong katinuoran nga atong gikasabutan kanhi” (Mga Pagtulun-an sa mga Presidente sa Simbahan: Spencer W. Kimball [2006], 271).

Unsay gitudlo sa Alma 13:3 mahitungod sa unsay kinahanglan natong buhaton aron sa pagtuman sa atong misyon nga gi-orden nang daan?
Kon ang usa ka tawo na-orden ngadto sa usa ka katungdanan sa priesthood, unsa kaha ang kahulugan nianang ordinasyon ngadto kaniya? (Tan-awa sa Alma 13:8. Hinumdumi nga kining pangutana matubag sa mga batan-ong babaye ingon man usab sa mga batan-ong lalaki. Tingali dunay kaayohan sa mga batan-ong lalaki ang mga tubag nga madungog gikan sa mga batan-ong babaye.)

Hangyoa ang mga estudyante sa pagbasa sa hilum sa Alma 13:11–12, nga mangita sa mga paagi nga ang mga naghupot sa Melchizedek Priesthood nga nahisgutan ni Alma nausab pinaagi sa Pag-ula ni Jesukristo.

Sa imong hunahuna unsa ang kahulugan niini alang sa usa ka tawo nga ang “mga saput nahugasan nga puti pinaagi sa dugo sa Kordero”?
Ngano kaha nga ang mga naghupot sa Melchizedek Priesthood kinahanglang mausab pinaagi sa Pag-ula ni Jesukristo? Sa unsang mga paagi nga atong masunod ang ilang mga ehemplo?

Pahinumdumi ang mga estudyante nga si Alma nagtudlo niining mga kamatuoran ngadto sa katawhan sa Ammonihah. Kadaghanan niining mga tawhana “sama og tinuohan ni Nehor” (Alma 14:18; 15:15), nagpasabut nga sila mihangop sa mga pagtulun-an ni Nehor. Si Nehor usa ka tawo kinsa mitukod og usa ka sayop nga kapunongan nga gitawag ni Alma og “panapi sa mga pari” (tan-awa sa Alma 1:12–15).

Sa unsang paagi nga ang matinud-anong mga naghupot sa Melchizedek Priesthood lahi kay sa niadtong kinsa misunod sa mga pagtulun-an ni Nehor? (Mahimo nimong dapiton ang mga estudyante sa pagribyu sa Alma 1:2–6, nga mangita sa mga kalainan tali sa pagpanapi ni Nehor ug sa Melchizedek Priesthood.)
Ang katawhan sa Ammonihah natudloan na kaniadto mahitungod sa Melchizedek Priesthood ug nakadawat og mga panalangin pinaagi sa Melchizedek Priesthood (tan-awa sa Alma 9:21; 13:1). Ngano kaha nga importante alang sa katawhan sa Ammonihah nga mapahinumduman kon unsa ang ilang nakat-unan kaniadto mahitungod sa Melchizedek Priesthood?
Unsa ang inyong nakat-unan mahitungod sa priesthood niining leksyon sa pagkakaron? (Samtang ang mga estudyante mahimong mosugyot og pipila ka mga kamatuoran, ang ilang mga tubag kinahanglang mopahayag nga ang mga ordinansa sa priesthood ug pagserbisyo sa mga naghupot sa priesthood makatabang kanato nga masayud kon unsaon sa pagtan-aw ngadto ni Jesukristo alang sa katubsanan.)

Mahimo nimong isugyot nga isulat sa mga estudyante sa mga notebook o scripture study journal kining baruganan ug uban pang mga baruganan nga ilang nahibaloan. Kon duna pay panahon, hangyoa sila sa pagsulat mahitungod kon sa unsang paagi kining mga baruganan nakaimpluwensya sa paagi sa ilang panglantaw sa gahum ug mga panalangin sa priesthood.

Alma 13:13–20

Si Alma nagtudlo mahitungod ni Melchizedek, usa ka talagsaon nga halangdong pari kinsa nakapatunhay og kalinaw sa iyang katawhan

Isulat ang mosunod nga mga pulong diha sa pisara: halangdong pari, hari, mipakita og gamhanang pagtuo, misangyaw og paghinulsol, mipatunhay og kalinaw, prinsipe sa kalinaw, naghari ubos sa iyang amahan. Hunong human sa pagsulat sa matag pulong aron tag-anon sa mga estudyante, nga dili magtan-aw sa ilang mga kasulatan, kinsa ang gihulagway ni Alma niining mga pulong. (Mihulagway siya ni Melchizedek.) Kon dili makatag-an sa husto ang mga estudyante sa dihang imong gisulat ang tanang mga pulong sa pisara, ipabasa nila ang Alma 13:14.

Kon natag-anan sa pipila ka estudyante nga si Alma nag-istorya mahitungod ni Jesukristo, pangutan-a sila nganong ang deskripsyon sa usa ka matarung nga halangdong pari mopahinumdom kanila sa Manluluwas. Tabangi sila nga makasabut nga ang mga naghupot sa Melchizedek Priesthood mao ang “sunod sa kapunongan sa Anak, ang Bugtong Anak sa Amahan” (Alma 13:9; tan-awa usab sa D&P 107: 2–4). Ipasabut nga ang mga naghupot sa Melchizedek Priesthood kinahanglang maningkamot sa pagsunod sa ehemplo ni Jesukristo diha sa ilang pagserbisyo ug sa ilang mga pagtudlo. Pahinumdumi usab ang mga estudyante nga ang mga ordinansa nga gipahigayon pinaagi sa awtoridad sa Melchizedek Priesthood nakatabang kanato nga mas maduol ngadto sa Manluluwas.

Hangyoa ang usa ka estudyante sa pagbasa og kusog sa Alma 13:14–19. Awhaga ang klase sa paghunahuna mahitungod kon sa unsang paagi ang dautang mga tawo sa Ammonihah nakabenepisyo unta gikan sa pagkat-on mahitungod ni Melchizedek.

Sa Alma 13:17, unsa nga mga pulong ang naghulagway sa katawhan ni Melchizedek? Sa unsang paagi kining mga tawhana susama sa katawhan sa Ammonihah? (Tan-awa sa Alma 8:9; 9:8.)
Unsa ang gibuhat ni Melchizedek isip lider sa iyang mga tawo? Sa unsang paagi nga ang iyang pagpangulo nakaimpluwensya sa mga tawo? Sa unsang paagi kining impluwensya lahi sa impluwensya niadtong anaa sa Ammonihah kinsa misunod sa mga pagtulun-an ni Nehor? (Tan-awa sa Alma 8:17; 10:27, 32.)

Dapita ang mga estudyante sa pag-summarize sa Alma 13:16–18, sa pagpahayag sa mga kamatuoran nga gitudlo niining mga bersikulo mahitungod sa mga responsibilidad sa mga priesthood lider. Samtang sila magsugyot og mga summary, siguroha nga kini nagpahayag nga ang mga priesthood lider makatabang kanato nga motan-aw ngadto ni Jesukristo, maghinulsol, ug magpuyo diha sa kalinaw. (Mahimo nimong awhagon ang mga estudyante sa pagsulat sa ilang mga summary diha sa ilang mga kasulatan sunod sa Alma 13:16–18.) Ipasabut nga ang ubang mga lider sa Simbahan, sama sa mga lider sa Relief Society ug sa Young Women, mga mahinungdanong partisipante niini nga paningkamot. Nagserbisyo uban sa mga priesthood lider, sila nagatabang sa paggiya sa mga indibidwal ug pamilya sa pagduol ngadto kang Kristo.

Sa unsang paagi kamo napanalanginan pinaagi sa pagserbisyo sa mga lider sa Simbahan?

Alma 13:21–31

Si Alma nagdapit sa mga tawo sa pagpatalinghug sa tingog sa Ginoo ug mosulod ngadto sa Iyang kapahulayan

Dapita ang mga estudyante sa pagpangita sa ideya nga gibalik-balik sa Alma 13:12, 13, 16, 29. Sila kinahanglang mangita sa pulong nga pahulay ug ang mga pulong nga “kapahulayan sa Ginoo.” Mahimo nimo silang awhagon sa pagmarka niining ideya sa matag bersikulo. Aron matabangan ang mga estudyante nga makasabut unsa ang gipasabut sa pagsulod sa kapahulayan sa Ginoo niining kinabuhia ug human kita mamatay, basaha ang mosunod nga mga pamahayag:

“Ang karaang mga propeta namulong kabahin sa ‘pagsulod ngadto sa kapahulayan sa Dios’ [tan-awa sa Alma 12:34; D&P 84:23–24]; unsa may buot ipasabut niini? Sa akong hunahuna, nagpasabut kini sa pagsulod ngadto sa kahibalo ug gugma sa Dios, ang pagbaton og hugot nga pagtuo diha sa iyang katuyoan ug sa iyang plano, sa ingon nga matang nga kita nasayud nga kita husto, ug kita wala mangita og lain pa” (Joseph F. Smith, Mga Pagtulun-an sa mga Presidente sa Simbahan: Joseph F. Smith [1998], 66).

“Ang tinuod nga mga santos mosulod sa kapahulayan sa Ginoo samtang anaa niini nga kinabuhi, ug pinaagi sa pagsunod sa kamatuoran, nagpadayon sila nianang bulahan nga kahimtang hangtud nga mopahulay sila uban sa Ginoo didto sa langit. … Ang kapahulayan sa Ginoo, sa kahangturan, mao ang makapanunod sa kinabuhing dayon, aron makaangkon sa kahingpitan sa himaya sa Ginoo” (Bruce R. McConkie, Mormon Doctrine, 2nd ed. [1966], 633).

Ipasabut nga si Alma miawhag sa katawhan sa Ammonihah sa paghinulsol ug pag-andam alang sa paganhi ni Jesukristo (tan-awa sa Alma 13:21–26). Dayon mipakigbahin siya sa mga baruganan nga gikinahanglan nilang sundon aron makasulod sa kapahulayan sa Ginoo.

Hangyoa ang mga estudyante sa pagbasa sa hilum sa Alma 13:27.

Unsa nga mga pulong sa Alma 13:27 nga nagpakita kon unsa ang gibati ni Alma mahitungod sa mga tawo ug sa iyang mensahe?

Dapita ang pipila ka estudyante nga magpuli-puli sa pagbasa og kusog sa Alma 13:27–29. Hangyoa ang klase sa pagpangita sa mga baruganan nga gilauman ni Alma nga sundon sa katawhan. Dayon hangyoa ang mga estudyante sa paglista sa mga baruganan nga ilang nakit-an. Sama pananglit, sila mahimong mosulti nga samtang mapainubsanon kitang motubag sa imbitasyon sa paghinulsol, ang Espiritu mogiya kanato ngadto sa kapahulayan sa Ginoo.

Dapita ang mga estudyante sa pagsulat og mga tumong kalabut kon sa unsang paagi ilang masunod ang tambag sa Alma 13:27–29. Ipamatuod nga kita makasulod ngadto sa kapahulayan sa Ginoo niining kinabuhia ug sa sunod samtang kita nagsunod sa mga baruganan nga gitudlo ni Alma.

Komentaryo ug Background nga Impormasyon

Alma 13:1. “Ako mopahinumdom kaninyo sa umaabut”

Tingali ang mga estudyante mahibulong kon nganong si Alma miingon “Ako mopahinumdom kaninyo sa umaabut” ug dayon namulong kabahin sa mga panghitabo nga milabay na (tan-awa sa Alma 13:1). Makatabang ang paghinumdom nga ang Alma 13 sumpay sa usa ka pakigpulong nga anaa usab sa Alma 11 ug 12. Ang katapusan sa Alma 12 naglangkob sa mga pulong ni Alma kabahin sa Pagkapukan ni Adan ug Eva (tan-awa sa Alma 12:22–23, 30–32). Sa sinugdanan sa Alma 13, si Alma nagpadayon sa iyang istorya, naghangyo sa mga tawo nga “mopahinumdom [kanila] sa umaabut” ngadto sa higayon human sa Pagkapukan sa dihang ang Ginoo mi-orden og mga pari aron magtudlo sa Iyang mga sugo.

Alma 13:3. Ang kabubut-on didto sa kinabuhi sa wala pa ang kalibutan

Sa pagpamulong mahitungod sa mga naghupot sa priesthood ug sa ilang pagka-inordinahan nang daan, si Alma mitudlo nga “sa unang bahin [sila] gitugtan sa pagpili sa maayo o sa dautan” (Alma 13:3). Si Presidente Joseph Fielding Smith misumpay niining kamatuoran:

“Ang Dios mihatag sa iyang mga anak sa kabubut-on bisan didto sa kalibutan sa espiritu [sa wala pa dinhi sa kalibutan], nga pinaagi niini ang tagsa-tagsa nga espiritu adunay pribilehiyo, sama sa mga tawo nga anaa dinhi, sa pagpili sa maayo ug pagsalikway sa dautan, o sa pag-ambit sa dautan aron mag-antus sa mga sangputanan sa ilang mga sala. Tungod niini, ang pipila gani didto mas matinud-anon pa kay sa uban sa pagsunod sa mga sugo sa Ginoo. …

“Ang espiritu sa mga tawo adunay kagawasan sa pagpili. … Ang espiritu sa mga tawo dili managsama. Mahimong managsama ang ilang pagsugod, ug kita nasayud nga silang tanan mga inosente sukad sa sinugdanan; apan ang katungod sa kagawasan sa pagpili nga nahatag ngadto kanila nakapahimo sa pipila nga malabwan ang uban, ug mao nga, pinaagi sa walay katapusan nga imortal nga pagpakabuhi, mamahimong mas makinaadmanon, mas matinud-anon, tungod kay sila mga gawasnon sa paglihok sa ilang mga kaugalingon, sa paghunahuna sa ilang mga kaugalingon, sa pagdawat sa kamatuoran o pagsupak batok niini” (Doctrines of Salvation, gi-compile ni. Bruce R. McConkie, 3 vols. [1954–56]1:58–59).

Alma 13:3–5. Kinabuhi sa wala pa dinhi sa yuta ug pagka-inordinahan nang daan

Si Presidente Boyd K. Packer sa Korum sa Napulog Duha ka mga Apostoles mitudlo:

“Walay mas tulukibon nga kamatuoran ang gipadangat ngari kanato diha sa pagpahiuli kay sa kahibalo mahitungod sa atong kinabuhi sa wala pa dinhi sa yuta. Walay laing simbahan nga nasayud o nagtudlo niini nga kamatuoran. Ang doktrina gihatag lamang pinaagi sa minubo nga porma, apan ang may kalabutan nga mga kamatuoran kanunayng gibalik-balik diha sa mga pinadayag aron sa pagsiguro kanato sa piho nga sukaranang mga kamatuoran.

“…Ang pipila ka importanting mga kamatuoran nga atong nahibaloan mahitungod sa atong kahimtang sa kinabuhi sa wala dinhi sa yuta mao kini: ‘Ang tawo mao usab diha sa sinugdanan uban sa Dios.’ (D&P 93:29.) Kita nagpuyo sa presensya sa Dios, ang atong Amahan sa Kahangturan; kita Iyang mga anak. Ang salabutan, o ang espiritu, na-organisar isip espiritu nga mga lawas sa wala pa ang kalibutan. (Tan-awa sa Abraham 3:22. Matag usa kanato gitugahan og kabubut-on. Gitugyan ang awtoridad ug napili ang mga lider. (Alma 13:1–4.)” (Our Father’s Plan [1984], 14–15).

Ang Matinud-anon sa Tinuhoan naglakip sa mosunod nga pagpasabut sa pagka-inordinahan nang daan:

“Sa kalibutan sa wala pa dinhi sa yuta, ang Dios mitudlo og pihong mga espiritu sa pagtuman sa tino nga mga misyon sa panahon sa ilang mortal nga mga kinabuhi. Gitawag kini og pagka-inordinahan nang daan.

“Ang pagka-inordinahan nang daan wala mogarantiya nga ang mga indibidwal makadawat sa pihong mga calling o mga responsibilidad. Ang maong mga oportunidad moabut niining kinabuhia isip resulta sa matarung nga paggamit sa kabubut-on, sama nga ang pagka-inordinahan nang daan miabut isip resulta sa pagkamatarung didto sa kinabuhi sa wala pa dinhi sa yuta. …

“Ang doktrina kabahin sa pagka-inordinahan nang daan magamit ngadto sa tanang mga miyembro sa Simbahan, dili lamang ngadto sa Manluluwas ug sa Iyang mga propeta. Sa wala pa ang paglalang sa yuta, matinud-anong mga babaye gihatagan og pihong mga responsibilidad ug matinud-anong mga lalaki gi-ordenn nang daan sa pihong mga katungdanan sa priesthood. Bisan tuod nga wala ka mahinumdom nianang panahona, sigurado kang miuyon sa pagtuman sa mahinungdanong mga buluhaton sa pagserbisyo sa imong Amahan. Samtang magpakita ka sa imong kaugalingon nga takus, hatagan ka og mga oportunidad sa pagtuman sa mga buluhaton nga nianang higayuna imong nadawat” (Matinud-anon sa Tinuhoan: Usa ka Pakisayran sa Ebanghelyo [2004], 137–138).

Si Elder Neal A. Maxwell sa Korum sa Napulog Duha ka mga Apostoles mitudlo:

“Ang kinabuhi sa wala pa dinhi sa yuta dili usa ka doktrina nga kita wala ray buhaton. Tungod kay ang matag usa kanato, adunay himoon nga mga pagpili, walay katapusan ug lisud nga mga buluhaton kinahanglang matuman, mga nagkasukwahi ug kalisdanan mahimong masinati, maayong paggahin sa panahon, ang mga talento ug mga gasa maayong pagkagamit. Tungod lang kay kita pinili ‘didto ug kaniadto’, sa pagkatinuod wala magpasabut nga kita mahimong walay pagpakabana ‘dinhi ug karon.’ Kon ang pagka-inordinahan nang daan alang sa kalalakin-an, o ang pagka-gisangunan nang daan alang sa kababayen-an, kadtong gitawag ug giandam kinahanglan usab nga momatuod nga ‘pinili, ug matinud-anon.’ (Tan-awa sa Pin. 17:14; D&P 121:34–36.)” (“Premortality, a Glorious Reality,” Ensign, Nob. 1985, 17).