Leksyon 72: Alma 5:37–62

Leksyon 72

Alma 5:37–62

Pasiuna

Samtang mipadayon si Alma sa pagsangyaw didto sa Zarahemla, mipasidaan siya sa katawhan nga ang desisyon sa pagsunod o pagsalikway sa iyang mga pulong adunay bug-at nga sangputanan. Mikomparar usab si Alma ni Jesukristo ngadto sa maayong magbalantay kinsa mitawag kanila ug mitinguha sa pagdala kanila balik sa iyang panon. Miawhag siya sa katawhan sa paghinulsol ug likayan ang dili limpyo nga mga butang sa kalibutan aron sila makapanunod sa gingharian sa langit.

Mga Sugyot alang sa Pagtudlo

Alma 5:37–42, 53–62

Nagpasidaan si Alma sa dautan ug nagdapit sa tanan sa pagpatalinghug ngadto sa tingog sa Maayong Magbalantay

Ipakita ang litrato nga Si Jesus Nagdala og usa ka Nawala nga Karnero (Libro sa mga Hulagway sa Ebanghelyo [2009], nu. 64).

Sa unsang mga paagi nga ang Manluluwas mao ang Maayong Magbalantay?

Human makatubag ang pipila ka mga estudyante, basaha ang mosunod nga pamahayag ni Presidente Ezra Taft Benson:

“Sa panahon ni Jesus, ang magbalantay sa Palestina naila sa iyang pagpanalipod sa iyang karnero. Dili sama sa modernong mga magbalantay [sheepherder], ang magbalantay [shepherd] kanunayng mag-una og lakaw sa iyang panon. Mogiya Siya kanila. Ang magbalantay nasayud sa matag usa sa karnero ug kasagaran hinganlan ang matag usa. Ang karnero nakahibalo sa iyang tingog ug misalig kaniya ug dili mosunod sa estranghero. Ingon man, kon siya motawag, ang karnero moduol ngadto kaniya. (Tan-awa sa Juan 10:14, 16.) …

“Si Jesus migamit niining komon nga paghulagway sa iyang panahon sa pagpahayag nga Siya mao ang Maayong Magbalantay, ang Tinuod nga Magbalantay. Tungod sa Iyang gugma sa Iyang mga igsoong lalaki ug babaye, Siya andam ug boluntaryo nga mihatag sa Iyang kinabuhi alang kanila” (“A Call to the Priesthood: ‘Feed My Sheep,’” Ensign, Mayo 1983, 43; tan-awa usab sa John R. Lasater, “Shepherds of Israel,” Ensign, Mayo 1988, 74–75).

Tabangi ang mga estudyante nga makahinumdom sa kinatibuk-ang kahulugan sa Alma 5 pinaagi sa pagpasabut nga si Alma miadto aron sa pagsangyaw ngadto sa katawhan sa Zarahemla, kinsa nahisama sa “karnero nga walay magbalantay” (Alma 5:37). Hangyoa ang mga estudyante sa paghinumdom og mga hagit nga giatubang sa katawhan sa Zarahemla ug unsa ang giawhag ni Alma nga ilang buhaton. Mahimo nimong ribyuhon og kadali ang pipila ka importanting mga bersikulo gikan sa miaging leksyon, sama sa Alma 5:14–20, aron matabangan ang mga estudyante nga mahinumduman ang pipila niini nga background. Siguroha nga ang mga estudyante makasabut nga ang katawhan sa Zarahemla anaa sa ngil-ad nga sitwasyon tungod sa ilang kadautan (tan-awa sa Alma 7:3).

Dapita ang duha o tulo ka estudyante nga magpuli-puli sa pagbasa og kusog sa Alma 5:37–42. Hangyoa ang klase sa pagpangita sa mga paagi nga ang usa ka tawo makasulti kon siya usa ba sa karnero sa Manluluwas. Human mopakigbahin ang mga estudyante unsa ang ilang nakit-an, ipangutana ang mosunod:

Sa unsang paagi ang mga tawo sama sa karnero nga nagkinahanglan og usa ka magbalantay?
Sumala sa Alma 5:37–38, sa unsang paagi nga ang Maayong Magbalantay nagpakita sa Iyang gugma ug kabalaka alang sa karnero? (Nagpadayon Siya sa pagtawag kanila sa Iyang mismong ngalan.)
Sumala sa Alma 5:41, sa unsang paagi nga kita makasulti nga kita naminaw sa tingog sa Maayong Magbalantay?
Unsa ang pipila ka mga buhat nga tingali nagpakita nga ang usa ka tawo nagsunod sa Maayong Magbalantay?

Human makatubag ang mga estudyante, paghangyo og usa ka estudyante sa pagbasa sa mosunod nga pamahayag ni Presidente Ezra Taff Benson, kinsa mihulagway sa kalalakin-an ug kababayen-an kinsa masaligon sa pagsunod ni Jesukristo. (Mahimo kang mag-andam og kopya niining pamahayag alang sa matag estudyante.)

“Kon mopili kamo sa pagsunod ni Kristo, pilion ninyo ang pag-usab. …

“Ang kalalakin-an [ug kababayen-an] nga nag-usab alang kang Kristo magiyahan pinaagi ni Kristo. …

“Ang ilang kabubut-on pagadumalaon sa Iyang kabubut-on. (Tan-awa sa Juan 5:30.)

“Gibuhat nila sa kanunay kadtong mga butang nga makapahimuot sa Ginoo. (Tan-awa sa Juan 8:29.)

“Dili lamang nga sila mamatay alang sa Ginoo, apan mas importante gusto nilang mabuhi alang Kaniya.

“Sulod sa ilang mga panimalay, ang mga litrato diha sa ilang mga bongbong, ang mga libro sa butanganan, ang musika sa palibut, ang ilang mga pulong ug mga lihok nagpakita nila isip mga Kristiyano.

“Sila mibarug isip mga saksi sa Dios sa tanang panahon, ug sa tanang mga butang, ug sa tanang mga dapit. (Tan-awa sa Mosiah 18:9.)

“Anaa si Kristo sa iIang mga hunahuna, samtang sila naglantaw Kaniya sa matag hunahuna. (Tan-awa sa D&P 6:36.)

“Anaa si Kristo sa ilang mga kasingkasing samtang ang ilang mga pagbati anaa Kaniya sa kahangturan. (Tan-awa sa Alma 37:36.)

“Hapit matag semana nag-ambit sila sa sakrament ug nagsaksi pag-usab ngadto sa ilang Mahangturong Amahan nga sila andam sa pagdala diha kanila sa ngalan sa Iyang Anak, sa kanunay naghinumdom Kaniya, ug naghupot sa Iyang mga sugo. (Tan-awa sa Moro. 4:3.)” (“Born of God,” Ensign, Nob. 1985, 5, 6–7).

Dapita ang mga estudyante sa pagbasa sa hilum sa Alma 5:53–56, nga magsiksik sa mga kinaiya ug mga lihok nga nakapahimong lisud sa usa ka tawo sa pagpaminaw sa tingog sa Manluluwas. Human sa pipila ka minuto, dapita ang pipila ka estudyante sa pagsulat sa ilang nakit-an diha sa pisara. Ipasulat nila ang ilang mga tubag aron ilang mapuno kutob sa mahimo ang pisara. Hangyoa sila sa pagdugang og bisan unsang mga kinaiya o lihok nga ilang nakita sa palibut nga makapahimo niining lisud sa pagpaminaw ngadto sa tingog sa Manluluwas. (Ang mga tubag sa mga estudyante mahimong maglakip sa pagbaliwala [wala manumbaling] sa mga patulun-an sa Dios, garbo, kakawang, pagpahimutang sa atong mga kasingkasing diha sa mga bahandi ug sa kalibutanon nga mga butang, naghunahuna nga mas maayo pa kita kay sa uban, pagpanggukod sa mga matarung, o pagtalikud sa mga kabus ug timawa. Mahimo nimong makuha ang pagtagad sa mga estudyante ngadto sa pagbalik-balik ni Alma og gamit sa pulong magpadayon, nga magpasabut og maayo nga ang katawhan sa Zarahemla nagpadayon niining makasasala nga pamatasan ug mga kinaiya.)

Paghimo og luna nga masulatan diha sa tunga-tunga sa pisara pinaagi sa pagpapas sa porsyon sa mga tubag sa mga estudyante. Niana nga luna, isulat ang mosunod sa tingog sa Maayong Magbalantay.

Dapita ang usa ka estudyante sa pagbasa og kusog sa Alma 5:57. Hangyoa ang klase sa pag-ila sa mga pulong nga nagtudlo kon unsaon nato sa pagtubag ang mga impluwensya sa dautan. (“Biya kamo gikan sa mga dautan,” “kamo palayo,” ug “ayaw paghikap sa ilang mahugaw nga mga butang.”) Mahimo kang mosugyot nga markahan sa mga estudyante kini nga mga pulong diha sa ilang mga kasulatan. Ipasabut nga kining mga pulonga nagpasabut og maayo sa panginahanglan sa paglikay sa bisan unsang butang nga modaut o mohugaw kanato sa espirituhanon nga paagi. Aron matabangan ang mga estudyante nga mahisgutan kon sa unsang paagi nga sila makapalayo sa kasamok, makalikay sa dautang mga impluwensya, ug makasunod sa tingog sa Maayong Magbalantay, ipangutana ang sama sa mosunod:

Unsa ang mabuhat sa usa ka batan-on nga Santos sa Ulahing mga Adlaw aron magpabilin nga mabulag gikan sa dautan? (Aron masuportahan ang mga tubag sa mga estudyante, ikonsiderar ang pagpakigbahin og usa ka positibo nga ehemplo nga imong nakita sa usa sa mga estudyante sa imong klase. Mahimo usab nimong dapiton ang mga estudyante sa pagpakigbahin og maayong mga ehemplo nga ilang nakita sa usag usa.)
Sumala sa Alma 5:56–57, unsa ang mga sangputanan sa pagpadayon sa pagkadautan? (Kon kita magpadayon sa kadautan, dili kita makadungog sa tingog sa Maayong Magbalantay ug kita dili maapil sa mga matarung.)

Kon aduna pay oras, hatagi ang mga estudyante og pipila ka minuto sa pagpamalandong sa mosunod nga pangutana. Mahimo nimong ipatubag nila ang pangutana diha sa ilang mga notebook o scripture study journal.

Unsa ang gusto sa Ginoo nga inyong buhaton aron mas madawat ang Iyang imbitasyon sa pagduol ngadto Kaniya? (Mahimo nimong isugyot nga ang tubag mahimong usa ka butang nga ilang nabati nga kinahanglan nilang buhaton nga mas maayo pa, o mahimong usa kini ka butang nga kinahanglan nilang hunongon sa pagbuhat.)

Dapita ang mga estudyante sa pagbasa sa hilum sa Alma 5:58–62, nga mangita sa mga panalangin nga gisaad niadtong kinsa nagpundok uban sa Ginoo ug sa Iyang katawhan. (Mahimo kang mosugyot nga markahan sa mga estudyante kini nga mga panalangin diha sa ilang mga kasulatan.)

Unsaon ninyo pag-summarize sa mga saad sa Ginoo niadtong kinsa mipatalinghug sa Iyang tingog? (Bisan og ang mga estudyante mahimong mosugyot og lain-laing mga baruganan, siguroha nga ilang masabtan nga kon mosunod kita sa tingog sa Ginoo [ang Maayong Magbalantay], pagapundukon kita ngadto sa Iyang gingharian. Mahimo nimong isulat sa pisara kini nga baruganan.)
Unsa nga mga pamatasan nga inyong napalambo nga nakatabang ninyo sa pagpatalinghug ngadto sa tingog sa Maayong Magbalantay?
Sa unsang pamaagi kini nga batasan nakatabang ninyo nga ibaliwala ang pipila sa dautan nga mga impluwensya nga nalista sa pisara?

Ipamatuod nga samtang atong patalinghugan ang mga pulong sa Manluluwas, mahisakop kita sa mga matarung kinsa pagapundukon ngadto sa gingharian sa Ginoo.

Alma 5:43–52

Gituman ni Alma ang iyang mga responsibilidad sa pagsangyaw og paghinulsol

Hangyoa ang mga estudyante sa paglista og lima ka mga pamalatian [senses] (pagtan-aw, pagdungog, paghikap, pagsimhot ug pagtilaw). Ikonsiderar ang pagdala og pipila ka mga butang nga magamit sa mga estudyante kining mga pamalatian.

Unsang butanga ang inyong nakat-unan gikan sa matag usa sa inyong lima ka mga pamalatian?
Aduna bay paagi nga makahibalo o makakat-on og usa ka butang kon dili gamiton ang inyong lima ka mga pamalatian?

Dapita ang pipila ka estudyante nga magpuli-puli sa pagbasa og kusog sa Alma 5:44–48. Hangyoa ang klase sa pagpangita kon unsay gisulti ni Alma nga iyang nahibaloan ug giunsa niya sa pagkahibalo niini.

Sumala sa Alma 5:48, unsa ang nahibaloan ni Alma?
Unsa ang gisulti ni Alma nga maoy tinubdan sa iyang pagpamatuod?
Unsay gibuhat ni Alma aron makadawat nianang pagsaksi gikan sa Espiritu Santo?
Sa unsang paagi nga ang pag-ampo ug pagpuasa makatabang kanato nga makaangkon o mapalig-on ang pagpamatuod sa ebanghelyo?
Kanus-a ninyo nabati nga napalig-on ang inyong mga pagpamatuod pinaagi sa pag-ampo o pagpuasa?

Ipamatuod nga ato mismong mahibaloan, pinaagi sa Espiritu Santo, nga si Jesukristo mao ang Manunubos sa katawhan. Aron mahatagan og importansya ang pagtinguha ug pag-angkon og usa ka personal nga pagpamatuod nga si Jesukristo mao ang Manunubos sa katawhan, basaha ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles:

“Ang indibidwal, personal nga pagpamatuod sa kamatuoran sa ebanghelyo, ilabi na sa balaanon nga kinabuhi ug misyon ni Ginoong Jesukristo, mahinungdanon sa atong kinabuhing dayon. … Sa laing pagkasulti, ang kinabuhing dayon nag-agad sa ato mismong indibidwal, personal nga kahibalo bahin sa atong Amahan sa Langit ug sa Iyang Balaan nga Anak. Ang yanong pagkahibalo mahitungod nila dili igo. Kinahanglan gayud kita nga adunay personal, espirituhanon nga mga kasinatian nga molig-on kanato. Kini moabut pinaagi sa pagtinguha niini sa samang puwersa, walay pagpaling-paling nga paagi sama sa usa ka gutom nga tawo nga nagtinguha og pagkaon” (“Feasting at the Lord’s Table,” Ensign, Mayo 1996, 80).

Hatagi ang mga estudyante og panahon sa pagsulat sa ilang mga tubag sa mosunod nga pangutana. Awhaga usab sila sa pagsulat unsa ang ilang buhaton aron makabaton o makapalig-on sa ilang mga pagpamatuod ni Jesukristo. Awhaga sila sa pagtuman sa ilang mga tumong, bisan kon kini moabut og “daghang mga adlaw” (Alma 5:46).

Kanus-a ninyo nabati ang Espiritu Santo nga nagsaksi kaninyo nga si Jesukristo mao ang Manunubos sa kalibutan?

Dapita ang mga estudyante sa pagbasa sa hilum sa Alma 5:49–52, nga mangita kon unsa ang gisulti ni Alma sa katawhan nga kinahanglan nilang andamon aron makapanunod sa gingharian sa langit.

Nganong mahinungdanon ang paghinulsol aron sa pagsulod ngadto sa gingharian sa Dios?

Aron matabangan ang mga estudyante nga magamit ang mga pagtulun-an ni Alma mahitungod sa pagpangandam sa pagsulod sa gingharian sa Dios, hangyoa ang usa ka estudyante sa pagbasa sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:

“Unsa kaha kon ang adlaw sa Iyang pag-abut ugma na? Kon kita nahibalo nga atong mahimamat ang Ginoo ugma—pinaagi sa atong kamatayon nga wala sa oras o pinaagi sa Iyang kalit nga pag-abot—unsay atong buhaton karon? Unsa nga mga pagkumpisal ang atong buhaton? Unsa nga mga buhat ang atong hunungon? Unsa nga mga problema ang atong husayon? Unsa nga pagpasaylo ang atong ihatag? Unsa nga mga pagpamatuod ang atong ipaambit?

“Kon kita mobuhat niining mga butanga nan, nganong dili man karon? Nganong dili man mangita og kalinaw samtang maangkon pa ang kalinaw?” (“Pagpangandam alang sa Ikaduhang Pag-anhi,” Ensign o Liahona, Mayo 2004, 9).

Tapusa pinaagi sa paghatag sa mga estudyante og panahon sa pagpamalandong unsa ang ilang gikinahanglang usbon sa ilang mga kinabuhi aron sa pagpangandam sa pagsugat sa Manluluwas ug sa pagsulod ngadto sa Iyang gingharian. Dapita sila sa pagsulat sa ilang mga hunahuna ug mga pagbati aron ilang mabasa pag-usab ang ilang hunahuna sa kaulahian ug mapahinumduman sa pagsunod pinaagi sa mga pag-aghat nga ilang madawat.

Komentaryo ug Background nga Impormasyon

Alma 5:46–47. “Ang espiritu sa pagpadayag”

Si Alma nakakita og usa ka anghel, apan siya mipamatuod diha sa Alma 5:46–47 nga ang iyang pagpamatuod sa matubsanong misyon ni Jesukristo napalig-on pinaagi sa Espiritu Santo, human sa daghang pagpuasa ug pag-ampo. Si Presidente Heber J. Grant miingon, “Daghang kalalakin-an nga nag-ingon: ‘Kon makakita lang ko og usa ka anghel, kon makadungog lang ko og usa ka anghel nga nagpahayag sa usa ka butang, kana makapahimo nako nga magmatinud-anon sa tanang adlaw sa akong kinabuhi!’ Wala kini epekto diha niining mga kalalakin-an [si Laman ug si Lemuel] nga wala magserbisyo sa Ginoo, ug kini walay epekto karon” (sa Conference Report, Abr. 1924, 159).

Si Presidente Joseph Fielding Smith mipasabut kon nganong ang pagsaksi sa Espiritu Santo makahimong mas gamhanan kay sa usa ka pagbisita sa anghel:

“Si Kristo… namahayag nga ang mga pagpadayag nga atong maangkon … gikan sa pagbisita sa anghel, usa ka mahikap nga nabanhaw nga nilalang, dili magbilin og impresyon … nga atong madawat pinaagi sa mga pagpadayag sa Espiritu Santo. Ang personal nga pagbisita tingali mahimong makalimtan paglabay sa panahon, apan kining giya sa Espiritu Santo mabag-o ug magpadayon, kada adlaw, kada tuig, kon kita nagpakabuhi nga takus niini” (Doctrines of Salvation, ed. Bruce R. McConkie, 3 vols. [1954–56], 1:44).

Ang mosunod nga pamahayag gikan sa Matinud-anon sa Tinuhoan nagpasabut kon sa unsang paagi nga moabut ang tinuod nga pagkakabig:

“Ang pagkakabig usa ka proseso, dili usa ka panghitabo. Ikaw nahimong kinabig isip resulta sa imong matarung nga mga paningkamot sa pagsunod sa Manluluwas. Kini nga mga paningkamot naglakip sa pagbansay sa hugot nga pagtuo kang Jesukristo, paghinulsol sa sala, pagpabunyag, pagdawat sa gasa sa Espiritu Santo, ug paglahutay hangtud sa katapusan diha sa hugot nga pagtuo.

“Bisan tuod ang pagkakabig milagroso ug makapausab sa kinabuhi, usa kini ka malinawon nga milagro. Mala-anghel nga mga pagbisita ug ubang kahibulongan nga mga panghitabo dili magdala og pagkakabig. Bisan gani si Alma, kinsa nakakita og usa ka anghel, nakabig human lamang siya ‘nagpuasa ug nag-ampo sa daghan nga mga adlaw’ alang sa usa ka pagsaksi sa kamatuoran (Alma 5:46). Ug si Pablo, nga kinsa nakakita sa nabanhaw nga Manluluwas, mitudlo nga ‘walay makaingon, si Jesus Ginoo, nga dili pinaagi sa Espiritu Santo’ (1 Mga Taga-Corinto 12:3)” (Matinud-anon sa Tinuhoan: Usa ka Pakisayran sa Ebanghelyo [2004], 139–140).

Alma 5:57. “Biya kamo gikan sa mga dautan, ug kamo palayo”

Si Elder David R. Stone sa Seventy mihisgot kon giunsa paggamit ang mga paagi sa pagtukod sa Manhattan New York Temple nga naghatag og ehemplo kon unsaon sa pagbulag sa kaugalingon gikan sa impluwensya sa kalibutan:

“Daghan kaayo nga mga tawo sa kalibutan nahimo nga sama sa Babelonia sa karaan tungod sa ilang kaugalingong mga pamaagi ug nagsunod sa usa ka dios ‘kansang hulagway sama sa kalibutan’ [D&P 1:16].

“Usa sa pinakadako nga hagit nga atong atubangon mao ang pagpuyo niana nga kalibutan apan sa laing paagi dili maanaa niana nga kalibutan. Kinahanglan magtukod kita og Zion taliwala sa Babelonia. …

“Ang akong pagkaapil sa pagtukod sa templo sa Manhattan naghatag kanako og kahigayunan nga makasulod kanunay sa wala pa ang pagpahinungod. Maanindot kaayo nga maglingkod sa celetial room ug maanaa didto nga may hingpit nga kahilum, nga walay bisan usa ka tingog nga madungog gikan sa nagkapuliki nga mga kalye sa New York. Sa unsa nga paagi nahimo nga posible ang pagkabalaanon nga kahilum sa templo nga pipila man lang ka mga yarda ang gilay-on sa kalsada ug kaguliyang sa dakong siyudad?

“Ang tubag diha ra sa desinyo sa templo. Ang templo gitukod sulod sa mga bongbong sa gitukod nang daan nga building, ug ang pinakasulod nga mga bongbong sa templo gidugtong ngadto sa gawas nga mga bongbong pinaagi lamang sa diyutay kaayo nga mga sumpay. Ingon niana ang pagpugong sa templo (Zion) sa mga epekto sa Babelonia, o sa gawas nga kalibutan.

“Mahimo nga may leksyon niini alang kanato. Makatukod kita og tinuod nga Zion taliwala kanato pinaagi sa pagpugong sa gilapdon sa impluwensya sa Babelonia diha sa atong mga kinabuhi. …

“Bisan asa kita, bisan unsa nga siyudad nga mahimo natong puy-an, makatukod kita og atong kaugalingong Zion pinaagi sa mga baruganan sa celestial nga gingharian ug kanunayng nagtinguha nga mahimong putli og kasingkasing. …

“Dili na kinahanglan nga mahimo kitang mga tawo-tawo diha sa mga kamot sa kultura sa dapit ug panahon. Mahimo kitang magmaisug ug makalakaw diha sa mga agianan sa Ginoo ug mosunod sa Iyang mga lakang” (“Zion Taliwala sa Babelonia,” Ensign o Liahona, Mayo 2006, 90–93).