Leksyon 19
1 Nephi 18
Pasiuna
Nagsunod sa direksyon sa Ginoo, si Nephi ug ang uban mihuman sa pagbuhat sa barko ug milayag padulong sa gisaad nga yuta. Atol sa ilang panaw, sila si Laman ug Lemuel ug ang mga anak nga lalaki ni Ishmael ug ilang mga asawa misukol batok sa Ginoo. Sa dihang gipanton sila ni Nephi, sila si Laman ug Lemuel migapos kaniya. Isip sangputanan, ang Liahona mihunong sa paglihok ug wala sila makahibalo unsaon sa paggiya sa barko. Sa dihang ang dakong unos nakahulga sa mga kinabuhi sa tanan diha sa barko, naghinulsol sila ug gibuhian si Nephi. Nag-ampo si Nephi aron mokalma ang unos, ug ang Ginoo migiya pag-usab sa ilang panaw padulong sa gisaad nga yuta.
Mga Sugyot alang sa Pagtudlo
1 Nephi 18:1–8
Ang pamilya ni Lehi nangandam sa paglayag ngadto sa gisaad nga yuta
Isulat ang gahum sa Ginoo ug akong paningkamot diha sa pisara. Hangyoa ang mga estudyante sa paghunahuna og usa ka problema nga ilang nasinati. Dapita sila sa pagpili unsa ang mas epektibo (ang gahum sa Ginoo o akong paningkamot) sa pagsulbad sa problema, ug hangyoa sila sa pagpasabut ngano. Human sa mubo nga panaghisgot, dapita ang mga estudyante sa pagpangita og mga paagi nga ang ehemplo ni Nephi diha sa 1 Nephi 18 makatabang nila pagtubag sa mga hagit nga ilang giatubang.
Ipakita ang litrato Lehi ug Iyang mga Katawhan Miabut sa Gisaad nga Yuta (62045; Libro sa mga Hulagway sa Ebanghelyo [2009], nu. 71).
Dapita ang mga estudyante sa pagbasa sa hilum sa 1 Nephi 18:1–8. Hangyoa sila sa pagpangita sa (1) unsay gibuhat ni Nephi ug sa iyang pamilya sa pagpangandam alang sa ilang panaw ngadto sa gisaad nga yuta ug (2) unsay gibuhat sa Ginoo sa pagtabang nila.
-
Ngano sa inyong hunahuna nga importante nga si Nephi makadawat og pagpadayag “matag karon ug unya”?
-
Sa 1 Nephi 18:2–3, unsa nga relasyon ang inyong nakita tali sa mga aksyon ni Nephi ug sa tabang nga iyang nadawat gikan sa Ginoo?
-
Sa unsa nga paagi nga ang giya sa Ginoo ug ang kaugalingong paningkamot ni Nephi pareho nga importante sa pagtapos sa barko ug paghimo sa ilang panaw ngadto sa gisaad nga yuta?
Hangyoa ang mga estudyante sa pag-summarize og pipila ka mga baruganan nga atong makat-unan gikan sa ehemplo ni Nephi. Kon ang mga estudyante duna nay kahigayunan sa pag-ila sa mga kamatuoran nga ilang nakat-unan, isulat ang mosunod nga baruganan sa pisara: Aron matuman unsay gisugo sa Ginoo, kinahanglan kita nga mangayo sa Iyang tabang ug mohimo sa atong kaugalingong paningkamot.
-
Kanus-a kamo nakadawat og giya o direksyon gikan sa Ginoo ug gikinahanglan usab nga magpakita sa inyong kaugalingong paningkamot aron sa pagtuman sa usa sa Iyang mga sugo?
Dapita ang mga estudyante sa pagrekord sa mga tubag sa usag usa sa pangutana sa ibabaw diha sa ilang mga scripture study journal o mga class notebook.
Ipasabut nga kitang tanan nagkinahanglan sa tabang sa Dios sa pagtuman sa Iyang mga sugo ug sa pagsunod sa mga sumbanan sa ebanghelyo nga gilatid diha sa Alang sa Kalig-on sa mga Kabatan-onan. (Mahimo kang magkuha ug magribyu og usa ka kopya sa booklet sa Alang sa Kalig-on sa mga Kabatan-onan sa dili pa ang klase.) Awhaga ang mga estudyante sa pag-ila og usa ka sugo o sumbanan sa ebanghelyo nga ilang sundon nga nagkinahanglan og tabang sa Dios. Hatagi sila og panahon sa pagsulat diha sa ilang mga scripture study journal mahitungod sa (1) unsay ilang mabuhat sa pagpangayo og tabang sa Ginoo sa pagsunod niini ug (2) unsa nga personal nga mga paningkamot ang ilang gikinahanglang himoon sa pagsunod niini.
1 Nephi 18:9–25
Sila si Laman ug Lemuel nangulo sa pagsukol nga nakapugong sa panaw ngadto sa gisaad nga yuta
Ipangutana ang mosunod:
-
Unsa sa inyong hunahuna ang pipila ka mga rason nga kita makasinati og mga kalisud?
Human sa pipila ka panaghisgot, dapita ang usa ka estudyante sa pagbasa sa mosunod nga pamahayag ni Elder L. Whitney Clayton sa Seventy. Hangyoa ang klase sa pagpaminaw sa tulo ka mga rason nga gihatag ni Elder Clayton sa kalisud nga atong nasinati:
“Sa kinatibuk-ang panglantaw, ang atong mga alantuson nagagikan sa tulo ka tinubdan. [1] Ang ubang alantuson resulta sa natural nga mga kondisyon sa kalibutan nga atong gipuy-an. Sakit, pisikal nga kakulang, mga unos, ug mga linog moabut matag karon ug unya nga dili nato sayop. …
“[2] Ang ubang mga alantuson gipahamtang diri kanato tungod sa pagpabadlong sa uban. Ang pag-abuso ug pagka-adik makahimo sa atong mga panimalay sa bisan unsa gawas lamang sa usa ka langit dinhi sa yuta alang sa mga inosente nga mga sakop sa pamilya. Ang sala, sayop nga mga tradisyon, pagdaug-daog, ug krimen nagpakatap og alantuson sa mga biktima diha sa dalan sa kinabuhi. …
“[3] Ang atong kaugalingong mga sayop ug kakulangan maoy makaingon sa atong mga problema ug makahatag og bug-at nga mga alantuson sa atong kaugalingong mga abaga. Ang pinakalisud nga alantuson nga atong gipahamtang sa atong kaugalingon mao ang palas-anon sa sala” (“Nga ang Inyong mga Alantuson Mahimo nga Magaan,” Ensign o Liahona, Nob. 2009, 13).
Isulat sa pisara ang (1) mga kondisyon sa kalibutan, (2) pagpabadlong sa uban, ug (3) atong kaugalingong mga sayop ug kakulangan.
Ipasabut nga human ang pamilya ni Lehi misugod sa ilang panaw sa dagat, sila si Laman, Lemuel, ug ang uban mihimo og dili maayo nga mga pagpili nga miresulta sa kalisud sa tanan diha sa barko. Dapita ang usa ka estudyante sa pagbasa og kusog sa 1 Nephi 18:9. Awhaga ang mga etudyante sa pagpataas sa ilang mga kamot kon makadungog sila og ehemplo sa usa ka tawo nga naghimo og sayop nga pagpili.
-
Unsa nga sayop nga pagpili ang gihimo nila ni Laman, Lemuel, sa mga anak nga lalaki ni Ishmael, ug sa ilang mga asawa? Nganong sayop man kini?
Tabangi ang mga estudyante nga makasabut nga dili sayop ang pagsayaw, pagpaminaw og musika, o paglingaw-lingaw, apan kini nga bersikulo nagpakita nga sila si Laman, Lemuel, ug ang uban mihimo niining mga butanga “inubanan sa daghan nga malaw-ay” (1 Nephi 18:9). Ipasabut nga niini nga konteksto ang pulong nga malaw-ay nagpasabut nga bulgar o dili maayo. Ang kaaway makagamit sa sayaw, musika, ug sa paagi sa atong pagsulti sa paghugaw sa atong mga kasingkasing ug mga hunahuna ug makapawala sa atong pakig-uban sa Espiritu Santo.
Dapita ang usa ka estudyante sa pagbasa og kusog sa 1 Nephi 18:10.
-
Sumala sa 1 Nephi 18:10, unsa ang gikahadlokan ni Nephi nga mahitabo kon kadtong misukol dili maghinulsol?
-
Unsa ang gibuhat ni Nephi sa pagtabang kanila? (Makatabang tingali sa mga estudyante nga makahibalo nga ang mga pulong nga dako nga kaligdong nagpasabut nga pagkaseryoso.)
Dapita ang mga estudyante sa pagpamalandong unsaon nila sa pagtubag kon ang usa ka sakop sa pamilya o lider sa Simbahan mohangyo nila nga ilisan ang musika nga ilang gipaminaw, ang paagi sa ilang pagsayaw, o ang paagi sa ilang pagsulti. Awhaga sila sa pagpamalandong kon andam ba sila nga maminaw ug mag-usab.
Dapita ang usa ka estudyante sa pagbasa og kusog sa 1 Nephi 18:11.
-
Sumala sa 1 Nephi 18:10–11, giunsa nila ni Laman ug Lemuel pagtubag ang tambag ni Nephi?
-
Ngano nga ang Ginoo mitugot kang Laman ug Lemuel nga mogapos ni Nephi?
Dapita ang pipila ka mga estudyante nga magpuli-puli sa pagbasa og kusog gikan sa 1 Nephi 18:12–14, 17–19. Hangyoa ang mga estudyante sa pagpangita sa mga pulong nga nagpakita sa mga sangputanan sa kinaiya nila ni Laman ug Lemuel. Dapita ang mga estudyante sa pag-ila sa mga baruganan sa ebanghelyo nga ilang makat-unan gikan niini nga asoy. Usa ka tubag tingali mao nga ang sala mosangpot nga mag-antus ang atong kaugalingon ug usahay ang uban usab. Sa pagtabang sa mga estudyante nga magamit kini nga baruganan, ikaw mahimong mangutana sama sa:
-
Sa unsa nga paagi nga ang masukulon nga mga aksyon sa pipila makaapekto sa tibuok grupo?
-
Sa unsa nga paagi nga ang dili maalamon o ang masukulon nga mga pagpili makabalda sa atong abilidad sa pagdawat og pagpadayag?
Isip kabahin niini nga panaghisgutan, ikonsiderar ang pagbasa sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:
“Nakakita na kita og mga sumbanan sa matang sa balaan nga pagtahud ug walay balaan nga pagtahud diha sa Simbahan. Samtang daghan ang angay nga daygon, kita nagkalayo. Kita dunay rason nga mabalaka pag-ayo.
“Ang kalibutan nagkasaba. Ang sininaan ug pamustura nagkalawlaw ug ang kinaiya nagkabati ug mas nagkalaw-ay. Banha nga musika … bulgar nga mga lyric molanog gikan sa mga amplifier. … Kining nagkalahilahing mga butang gidawat na sa kadaghanan ug nakaimpluwensya sa atong mga kabatan-onan. …
“Kining uso nga mas saba, daghang makapaukyab, daghang panagbingkil, wala kaayoy pagpugong, wala kaayoy kaligdong, wala kaayoy pagkapormal dili sulagma ni inosente ni dili makadaot.
“Ang unang mando nga ihatag sa kumander nga nagplano sa pang-ataki mao ang paglubog sa mga agianan sa komunikasyon niadtong gusto niyang buntugon.
“Ang walay balaan nga pagtahud mohaum sa mga katuyoan sa kaaway pinaagi sa pagpugong sa importanting mga agianan sa pagpadayag sa hunahuna ug sa espiritu” (“Reverence Invites Revelation,” Ensign, Nob. 1991, 22).
-
Kon kamo masukulon ug masinupakon, sa unsa nga paagi kaha makaapekto kini sa inyong pamilya? Sa unsa nga paagi kaha kini makaapekto sa inyong mga higala? Sa unsa nga paagi kaha kini makaapekto sa inyong klase o korum?
Balik ngadto sa tulo ka mga tinubdan sa kalisud nga gilista sa pisara. Ipasabut nga ang nahibilin niini nga kapitulo makatabang nato nga makakat-on sa unsang paagi kita kinahanglang makatubag kon moabut ang kalisud, bisan kon resulta kini sa atong kaugalingon nga mga pagpili o sa mga pagpili sa uban. Dapita ang mga estudyante sa pagbasa sa tagsa-tagsa sa 1 Nephi 18:15–16, 20–23. Awhaga sila sa pagpangita sa mga kamatuoran nga magamit sa bisan hain nga sitwasyon. Hangyoa sila sa pagpakigbahin sa ilang kaugalingong mga pulong unsay ilang nakat-unan. Ang ilang mga tubag mahimong maglakip sa mosunod:
-
Makatan-aw kita sa Dios ug magpabiling matinud-anon sa atong mga pagsulay.
-
Ang pag-ampo makatabang nato sa pagpangita og kalinaw panahon sa atong mga pagsulay.
Samtang ang mga estudyante mopakigbahin sa ilang mga ideya, siguroha nga mopasabut og maayo sa matarung nga ehemplo ni Nephi panahon sa iyang pagsulay. Dapita ang usa ka estudyante sa pagbasa sa mosunod nga pagpamatuod ni Elder L. Whitney Clayton. Ipapangita sa klase unsa ang gitambag ni Elder Clayton kanato kon kita mag-atubang og mga pagsulay:
“Bisan unsa nga mga alantuson nga atong gisagubang sa kinabuhi agi og sangputanan sa natural nga mga kondisyon, ang pagpabadlong sa uban, o sa atong kaugalingong mga sayop ug pagkulang, kitang tanan mga anak sa mahigugmaong Langitnong Amahan, kinsa mipadala kanato sa yuta isip kabahin sa Iyang mahangturong plano alang sa atong pagtubo ug pag-uswag. Ang atong talagsaong indibidwal nga mga kasinatian makatabang kanato sa pagpagandam sa pagbalik ngadto Kaniya. … Kinahanglang buhaton nato ang tanan nga atong mahimo nga molahutay ‘pag-ayo’ sa atong mga alantuson [tan-awa sa D&P 121:7–8]. …
“… Ako nasayud nga kon kita mosunod sa mga sugo sa Dios ug sa atong mga pakigsaad, Siya motabang nato sa atong mga alantuson. Siya mopalig-on kanato. Kon kita maghinulsol, Siya mopasaylo kanato ug mopanalangin kanato uban sa kalinaw sa tanlag ug hingpit nga kalipay” (“Nga ang Inyong mga Alantuson Mahimo nga Magaan,” 13–14).
Dapita ang mga estudyante sa paghunahuna mahitungod sa usa sa mga kamatuoran nga ilang nakat-unan gikan niini nga leksyon.
-
Kanus-a ninyo nakita kini nga kamatuoran sa inyong kinabuhi o sa kinabuhi sa usa ka tawo nga inyong nailhan?
Mahimong nimong idugang ang imong pagpamatuod nga ang Dios makatabang nato pinaagi sa atong mga pagsulay samtang kita magmatinud-anon ug samtang kita maghinulsol ug mobalik ngadto Kaniya.
Sa pagtapos, pahinumdumi ang mga estudyante nga bisan pa sa kalisud nga giatubang ni Nephi ug sa iyang pamilya, sa katapusan nakaabut ra sila sa gisaad nga yuta. Ipamatuod nga samtang kita magtinguha sa direksyon sa Ginoo ug magkugi sa pagsunod niini, kita usab makakompleto nga malampuson sa panaw nga gusto sa Ginoo nga atong masinati sa pagpadala nato sa yuta.
Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).