4 Nephi

Pasiuna

Human sa pagpangalagad ni Jesukristo taliwala sa mga kaliwatan ni Lehi, ang katawhan misunod sa Iyang mga pagtulun-an ug nakatagamtam og sobra sa 100 ka tuig nga panaghiusa, kauswagan, ug kalipay. Nagkahiusa sila isip “mga anak ni Kristo” ug wala na magtawag sa ilang kaugalingon isip mga Nephite o mga Lamanite (4 Nephi 1:17). Bisan pa man, sa ngadto-ngadto nahimo silang magarbuhon ug nagkadautan, ug mibahin na usab sa ilang mga kaugalingon isip mga Nephite ug mga Lamanite. Mga 300 ka tuig human mibisita ang Manluluwas, hapit tanan sa katawhan nahimong dautan.

Mga Sugyot alang sa Pagtudlo

4 Nephi 1:1–18

Ang tanang katawhan nakabig ug nakasinati og kalinaw ug kalipay

Sa dili pa ang klase, pag-andam og duha ka blangko nga mga pirasong papel alang sa matag estudyante—kon mahimo, usa ka puti ug usa nga lahi og kolor (tunga sa papel mahimo na). Ibutang ang puti nga mga papel sa talad-sulatanan sa mga estudyante o sa mga lingkuranan sa dili pa sila moabut. Ipadaplin lang ang dekolor nga mga papel para gamiton unya sa leksyon. Isulat ang mosunod nga mga pangutana diha sa pisara: Unsa ang makahimo nimong tinuoray nga malipayon? Sa pagpangabut sa mga estudyante, dapita sila sa pagsulat sa ilang mga tubag sa pangutana diha sa pisara.

Sugdi ang klase pinaagi sa paghisgut sa mga tubag nga ilang gisulat sa pisara. Pangutan-a ang mga estudyante sa mosunod:

Unsa ang kalainan tali sa mga butang nga makahimo kanato nga temporaryo lang nga malipayon ug mga butang nga moresulta ngadto sa mahangturon nga kalipay? (Samtang motubag ang mga estudyante, mahimo nimong hatagan og gibug-aton nga ang tinuoray nga kalipay dili makit-an sa temporaryo nga mga butang sama sa pagka-inila, pagkaadunahan, ug materyal nga mga kabtangan.)

Ipasabut nga ang 4 Nephi usa ka rekord sa daghang henerasyon sa mga kaliwatan ni Lehi kinsa nagpuyo human sa pagbisita ni Jesukristo. Dapita ang mga estudyante sa pagbasa sa hilum sa 4 Nephi 1:16, nga mangita kon sa unsang paagi gihulagway ni Mormon ang katawhan nga nagpuyo og mga 100 ka tuig human mibisita ang Manluluwas. Mahimo nimong isugyot nga markahan sa mga estudyante ang mga pulong nga “sa pagkamatuod wala nay mga katawhan nga labaw pa ka malipayon.” Hangyoa ang mga estudyante sa pagsulat sa Wala Nay Katawhan Nga Labaw Pa Ka Malipayon sa ibabaw sa pirasong papel nga imong gihatag. Dayon pa-drowinga sila og usa ka dako nga lingin sa tunga-tunga sa ilang mga papel.

Hangyoa ang mga estudyante sa pagbasa sa 4 Nephi 1:1–2, nga mangita kon unsay gibuhat sa katawhan nga nakapahimo niini nga kalipay nga posible. Dapita sila sa paglista sa ilang mga nakit-an sulod sa lingin. (Ang mga tubag kinahanglan maglakip nga ang katawhan naghinulsol, nabunyagan, midawat sa Espiritu Santo, ug “ang tanan nga mga katawhan nakabig ngadto sa Ginoo.”

Unsa may gipasabut sa makabig?

Aron matabangan ang mga estudyante nga makasabut nga ang pagkakabig mas lawom kay sa pag-angkon lamang og pagpamatuod o sa pagkamiyembro sa Simbahan, dapita ang usa ka estudyante sa pagbasa og kusog sa mosunod nga pamahayag ni Elder Richard G. Scott sa Korum sa Napulog Duha ka mga Apostoles. Kon mahimo, hatagi ang mga estudyante og mga kopya niini nga pamahayag, ug awhaga sila sa pag-ila sa mga pulong nga nagpatin-aw sa pagkakabig.

“Ang imong kalipay karon ug sa kahangturan mag-agad sa matang sa imong pagkakabig ug sa kausaban nga nahatag niini sa imong kinabuhi. Sa unsang paagi ka nga mahimong tinuod gayud nga nakabig? Si Presidente [Marion G.] Romney naghulagway sa mga lakang nga kinahanglan nimo nga sundon:

“‘Ang pagkamiyembro sa Simbahan ug pagkakabig dili managsama og kahulugan. Ang pagkakabig ug pag-angkon og pagpamatuod dili usab managsama. Ang usa ka pagpamatuod moabut kon ang Espiritu Santo mohatag sa makugihon nga nangita og usa ka saksi sa kamatuoran. Ang buhi nga pagpamatuod makapalig-on sa pagtuo. Buot ipasabut, makaugmad kini og paghinulsol ug pagkamasulundon sa mga kasugoan. Ang pagkakabig mao ang bunga o ang ganti sa paghinulsol ug pagkamasulundon.’ [Sa Conference Report, Guatemala Area Conference 1977, 8–9.]

“Sa yano nga pagkasulti, ang tinuod nga pagkakabig mao ang bunga sa hugot nga pagtuo, paghinulsol, ug makanunayon nga pagkamasulundon. …

“Ang tinuod nga pagkakabig motugyan sa bunga sa malahutayon nga kalipay nga maangkon bisan kon ang kalibutan nagkagubot ug ang kasagaran anaa gawas ang kalipay” (“Full Conversion Brings Happiness,” Ensign, May 2002, 25, 26).

Unsa nga mga pulong ang imong nadungog nga nagpatin-aw sa pagkakabig?
Unsa sa imong hunahuna ang mahitabo kon ang tanan sa imong palibot makabig ngadto sa Ginoo?

Isulat ang mosunod nga pakisayran sa kasulatan sa pisara: 4 Nephi 1:2–3, 5, 7, 10–13, 15–18. Pagdapit og pipila ka mga estudyante sa pagpuli-puli og basa og kusog gikan niini nga mga bersikulo. Hangyoa ang klase sa pagsunod, nga mangita sa mga pulong nga naghulagway kon unsay nasinati sa katawhan tungod kay silang tanan nakabig ngadto sa Ginoo. Dapita ang mga estudyante sa pagsulat niini nga mga pulong libot sa lingin sa ilang mga papel. (Ang mga tubag mahimong maglakip sa mosunod: walay panaglalis o panagbingkil, makiangayon ang ilang pagtratar sa usag usa, aduna silay komon sa tanang butang, daghang milagro ang gibuhat sa pangalan ni Jesukristo, ang Ginoo mipauswag sa katawhan, ilang gitukod pag-usab ang mga siyudad nga nangaguba, nagminyo sila ug miistablisar og mga pamilya, midaghan sila ug nahimong lig-on, ang gugma sa Dios anaa sa ilang mga kasingkasing, ug nagmalipayon sila ug nagkahiusa.)

Hangyoa ang mga estudyante sa pag-ila og usa ka baruganan kabahin sa kalipay nga ilang nakat-unan gikan sa unang bahin sa 4 Nephi 1. Bisan og ang mga estudyante mahimong makaila og daghang mga baruganan, siguroa nga ilang ipahayag nga kon ang katawhan magtambayayong aron makabig ngadto sa Ginoo, magkahiusa sila ug makasinati og dakong kalipay. Mahimo nimong isulat kini nga baruganan sa pisara.

Unsa nga mga panalangin sa inyong hunahuna ang moabut sa atong klase kon kitang tanan magpakabuhi sama sa pagpakabuhi niining mga tawhana? Unsa nga mga panalangin sa inyong hunahuna ang moabut sa inyong pamilya? Unsa nga mga panalangin sa inyong hunahuna ang moabut sa inyong ward o branch?

Dapita ang mga estudyante sa pagsulti kabahin og usa ka higayon nga parte sila sa usa ka grupo nga nahiusa sa kamatarung, sama sa ilang pamilya, korum o klase, o grupo sa mga higala. Mahimo ka usab nga mopakigbahin og usa ka kasinatian.

Sa unsang paagi ang inyong mga paningkamot nga mahimong matarung makaimpluwensya sa kalipay ug kaayuhan niadtong nagpalibot kaninyo? (Siguroa nga masabtan sa mga estudyante nga ang atong pagkakabig ug matarung nga mga aksyon nagtampo dili lamang sa atong kaugalingon nga kalipay apan usab sa kalipay ug kaayuhan sa uban. Kon ang mga sakop sa usa ka pamilya, korum, klase, o ubang grupo nagkahiusa sa pagkamatarung, makasinati sila og mas dako nga kalipay kay sa ilang masinati sa ilang kaugalingon.)
Sa unsang paagi ang sala sa usa ka tawo makaimpluwensya sa ubang grupo nga naninguha nga mahimong matarung?

Awhaga ang mga estudyante sa pagpalig-on sa ilang pagkakabig ngadto sa Ginoo ug tabangan kadtong anaa sa ilang palibot nga mobuhat sa sama. Aron matabangan ang mga estudyante niini nga hagit, hangyoa sila sa pagribyu sa mga pulong nga ilang gilista sa ilang mga papel. Dapita sila sa pagpili og usa o duha ka hugpong sa mga pulong nga naghulagway og mga paagi sa pagpuyo nga gusto nilang masinati. Hatagi sila og pipila ka minutos nga mosulat sa mga notebook o sa mga scripture study journal kon unsaon nila sa pagtinguha sa pagpuyo niini nga mga paagi. Ipamatuod ang kalipay nga moabut gikan sa tinuod nga pagkakabig ug sa pagkahiusa sa pagkamatarung.

4 Nephi 1:19–49

Ang mga Nephite nahimong mas dautan hangtud nga pipila na lang ka matarung nga mga tawo ang nahibilin

Sa inyong hunahuna unsa kaha ang makapaguba sa usa ka katilingban sama sa gihulagway sa 4 Nephi 1:1–18?

Ipabasa sa mga estudyante sa hilum ang 4 Nephi 1:20, 23–24, nga mangita kon unsay naghulga sa panaghiusa ug kalipay sa katawhan. Mahimo nimong isugyot nga markahan nila ang ilang nakit-an. Human sila makareport sa unsay ilang nakit-an, isulat sa pisara ang mosunod nga pamahayag ni Presidente Henry B. Eyring sa Unang Kapangulohan. (Kini nga pamahayag makita sa “Ang Atong mga Kasingkasing Nabugkos diha sa Panaghiusa,” Ensign o Liahona, Nob. 2008, 70.) Mahimo nimong isugyot nga kopyahon sa mga estudyante kini nga pamahayag diha sa ilang mga kasulatan tupad sa 4 Nephi 1:24.

“Ang garbo usa ka dakong kaaway sa panaghiusa” (Presidente Henry B. Eyring).

Sa unsang mga paagi kaha nga ang garbo kaaway sa panaghiusa?

Dapita ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf sa Unang Kapangulohan. Hangyoa ang klase sa pagpaminaw alang sa usa ka paagi nga ang garbo makaguba sa panaghiusa.

“Ang kahulugan gayud niini, ang garbo usa ka sala sa pagkumpara, bisan tuod og kini sa kasagaran nagsugod sa ‘Tan-awa kon unsa ko kangilngig ug unsa kangilngig ang akong nahimo,’ ingon og kanunay kining matapos sa ‘Busa, mas maayo pa ko kay nimo.’

“Kon ang atong mga kasingkasing napuno sa garbo, nakahimo kita og dako nga sala, kay atong gisupak ang duha ka dagko nga mga sugo [tan-awa sa Mateo 22:36–40]. Imbis mosimba sa Dios ug mohigugma sa atong silingan, atong gipakita ang tinuod nga tuyo sa atong pagsimba ug gugma—sa panagway nga atong makita sa samin” (Garbo ug ang Priesthood,” Ensign o Liahona, Nob. 2010, 56).

Base sa pamahayag ni Presidente Uchtdorf, sa unsang paagi ang garbo makaguba sa panaghiusa?

Dapita ang pipila ka mga estudyante nga magpuli-puli sa pagbasa og kusog sa 4 Nephi 1:24–35, 38–45. Hangyoa ang klase sa pagsunod, nga mangita sa mga epekto sa garbo taliwala sa katawhan. Mahimo nimong isugyot nga pamarkahan sa mga estudyante ang ilang nakit-an. (Ang mga tubag mahimong maglakip sa mosunod: pagsul-ob og mahalon nga sinina, pagbahin-bahin ngadto sa sosyal nga mga klase o eksklusibo nga mga grupo sa mga higala, pagtukod og mga simbahan aron makaganansya, paglimud sa tinuod nga simbahan, paglutos sa mga matinud-anon, paghimo og tinago nga mga kalihokan ug pagkadautan.)

Sa tagsa-tagsa, hangyoa ang matag estudyante sa pagreport og usa ka butang nga iyang nakit-an. (Ang mga estudyante mahimong mosulti pag-usab sa mga tubag sa usag usa.) Samtang motubag ang matag estudyante, isulat ang iyang tubag sa usa sa dekolor nga mga pirasong papel nga imong gilain sa wala pa ang klase. Ihatag ang dekolor nga papel sa estudyante ilis sa iyang puti nga papel nga naghulagway sa kalipay ug panaghiusa sa katawhan. Usba kini nga proseso hangtud ang tanang estudyante sa klase makailis sa ilang puti nga mga papel alang sa dekolor nga mga papel.

Hangyoa ang mga estudyante sa paglingi sa palibut ug pagtan-aw nga ang matag usa sa klase adunay dekolor nga papel, nga representar sa garbo. Dapita sila sa pagpamalandong kon unsa kaha ang gibati sa tulo ka mga disipulo ni Kristo samtang nakita nila ang garbo ug kadautan nga mikatap taliwala sa katawhan nga kanhi malipayon kaayo ug nagkahiusa.

Unsa nga kamatuoran ang atong makat-unan gikan niini nga mga bersikulo? (Bisan og ang mga estudyante mogamit og lahi nga mga pulong, kinahanglang mailhan nila ang mosunod nga baruganan: Ang sala sa garbo naghimo og pagkabahin-bahin ug moresulta ngadto sa pagkadautan. Mahimo nimong isulat kini nga kamatuoran diha sa pisara.)
Sa unsang paagi ang garbo sa pipila ka mga tawo makaapekto sa kalipay sa tibuok grupo?

Dapita ang mga estudyante sa pagkonsiderar kon sa unsang paagi ang garbo sa usa ka tawo makaimpluwensya sa uban sa mosunod nga mga ehemplo:

Bisan sa pag-awhag sa iyang pamilya, ang usa ka edaran nga igsoon nga lalaki nakahukom sa pagpadayon sa hinakog nga tinguha kay sa pagserbisyo og misyon.
Usa ka miyembro sa klase sa Young Women o korum sa Aaronic Priesthood samukan kaayo, nagdumili sa pag-apil sa klase, ug dili mosunod sa mga instruksyon.
Usa ka batan-ong lalaki o babaye kanunay nga mosungog o mobiay-biay sa laing miyembro sa iyang grupo sa mga higala.

Hangyoa ang mga estudyante sa paghunahuna mahitungod sa mga panahon nga ilang nakita ang garbo nga miguba sa kalipay ug panaghiusa.

Dapita ang mga estudyante sa pagkonsiderar sa ilang mga tahas sa lain-laing grupo diin sila nahisakop, sama sa ilang mga pamilya, mga korum o mga klase, mga ward o branch, ug mga klase sa seminary. (Mahimo nimong hisgutan ang uban nga mga grupo diin nahisakop ang imong mga estudyante.) Hangyoa sila sa pagpamalandong kon nakabuhat ba sila o nagbuhat og bisan unsa nga butang nga nagpakita og garbo sa ilang relasyon sa ubang mga tawo niini nga mga grupo. Awhaga sila sa paghinulsol ug sa paghunahuna og mga paagi nga ilang mabuntog ang garbo ug mapauswag ang panaghiusa ug kamatarung niini nga mga grupo. Awhaga usab sila sa pagpamalandong sa ilang nasulat kon sa unsang paagi sila nagplano nga magpuyo nga mas sama sa mga kaliwatan ni Lehi nga nakabig ngadto sa Ginoo.

Ipamatuod nga samtang magtinguha kita nga mahimong mas makabig ngadto ni Jesukristo ug magpuyo nga nakighiusa sa uban, makasinati kita og kalipay sama sa gihulagway sa 4 Nephi 1:1–18.

Komentaryo ug Background nga Impormasyon

4 Nephi 1:1–2. “Ang tanan nga mga katawhan nakabig ngadto sa Ginoo.”

Si Presidente Marion G. Romney sa Unang Kapangulohan mipasabut sa proseso sa pagkakabig:

“Ang pagkakabig mahitabo pinaagi sa balaan nga pagpasaylo, nga mopapas sa mga sala. Ang pagkahan-ay ingon niini. Ang matinuoron nga tigpangita makadungog sa mensahe. Mangutana siya sa Ginoo pinaagi sa pag-ampo kon tinuod ba kini. Ang Balaang Espiritu mohatag kaniya og usa ka saksi. Mao kini ang usa ka pagpamatuod. Kon igo ang kalig-on sa pagpamatuod sa usa ka tawo, siya maghinulsol ug mosunod sa mga sugo. Pinaagi niana nga pagkamasulundon siya makadawat sa balaan nga pagpasaylo nga mopapas sa sala. Sa ingon siya makabig ngadto sa usa ka bag-ong kinabuhi. Ang iyang espiritu mamaayo” (sa Conference Report, Okt. 1963, 24).

4 Nephi 1:1–18. Ang panginahanglan sa panaghiusa

Si Presidente Henry B. Eyring sa Unang Kapangulohan mitudlo:

“Ang mga propeta sa Ginoo kanunay nga nagtawag alang sa paghiusa. Ang panginahanglan alang niana nga gasa nga mahatag ngari kanato ug ang hagit sa pagmintinar niini mas motubo pa sa umaabut nga mga adlaw, diin kita maandam isip mga katawhan alang sa atong mahimayaon nga padulngan. …

“… Atong nasayran gikan sa kasinatian nga ang hingpit nga kalipay moabut kon kita mapanalanginan uban sa panaghiusa. Mangandoy kita, isip espiritu nga mga anak sa atong Langitnong Amahan, alang niana nga kalipay nga anaa kanato kaniadto uban Kaniya sa kinabuhi nga wala pa dinhi sa kalibutan. Ang Iyang tinguha mao ang paghatag kanato nianang sagrado nga pangandoy nga magkahiusa gikan sa Iyang gugma alang kanato.

“Dili ni Niya mahatag ngari kanato isip mga indibidwal. Ang hingpit nga kalipay nga gusto kaayo Niyang ihatag kanato isip indibidwal dili ang pag-inusara. Kita kinahanglan nga motinguha niini ug mopasarang alang niini uban sa lain. Dili ikatingala nga ang Dios miawhag kanato sa pagpundok aron Siya makapanalangin kanato. Gusto Niya nga mapundok kita nga pamilya. Mi-establisar Siya og mga klase, mga ward, ug mga branch ug misugo kanato sa pagpundok kanunay. Sa mga panagpundok, diin ang Dios midesinyo alang kanato, anaa ang atong talagsaon nga oportunidad. Kita mahimong mag-ampo ug mobuhat alang sa panaghiusa nga maghatag kanato og hingpit nga kalipay ug mopadako sa atong gahum sa pagserbisyo” (“Ang Atong Kasingkasing Nabugkos diha sa Panaghiusa,” Ensign o Liahona, Nob. 2008, 68, 69).