Leksyon 29: 2 Nephi 9:1–26

Leksyon 29

2 Nephi 9:1–26

Pasiuna

Sa usa ka wali ngadto sa mga Nephite, gisugdan ni Jacob pinaagi sa pagkutlo sa pipila sa mga panagna ni Isaias bahin sa pagtubos sa Ginoo sa Iyang mga katawhan sa pakigsaad. Kining kabahin sa wali ni Jacob narekord diha sa 2 Nephi 6–8 (tan-awa sa leksyon 28 niini nga manwal). Ang sumpay niining duha ka adlaw nga wali makita diha sa 2 Nephi 9–10. Human makutlo si Isaias, gipakigbahin ni Jacob ang kaugalingon niyang pagpamatuod bahin sa Pag-ula ni Jesukristo—bahin sa gahum sa Manluluwas sa pagtubos kanato gikan sa mga epekto sa Pagkapukan ug sa mga sangputanan sa atong mga sala. Si Presidente Joseph Fielding Smith nagtudlo nga ang 2 Nephi 9 naglangkob sa “usa sa labing makapalamdag nga mga diskurso nga nahatag sukad kalabut sa pag-ula.” Miingon siya, “Kinahanglan kining basahon og maayo sa tanang tawo nga nagtinguha og kaluwasan” (Answers to Gospel Questions, comp. Joseph Fielding Smith Jr., 5 vols. [1957–66], 4:57).

Mga Sugyot alang sa Pagtudlo

2 Nephi 9:1–9

Gipasabut ni Jacob ang mga epekto sa Pagkapukan

Sa dili pa magsugod ang klase, isulat ang makalilisang nga mangtas diha sa tunga sa pisara.

Sugdi ang leksyon pinaagi sa pagpasabut nga ang 2 Nephi 9 naglangkob sa sumpay sa wali nga gisugdan pagtuon sa mga estudyante sa miaging leksyon. Pahinumdumi ang mga estudyante nga sa unang bahin sa wali, nga makita diha sa 2 Nephi 6–8, gikutlo ni Jacob si Isaias sa pagtudlo bahin sa kalooy sa Ginoo ug sa Iyang gahum sa pagpalingkawas sa Iyang mga katawhan sa pakigsaad gikan sa ilang kahimtang sa pagkahisalaag ug pagkatibulaag. Samtang nagpadayon siya sa iyang wali, gitudlo ni Jacob kon giunsa sa Manluluwas pagtubos kanatong tanan gikan sa atong kahimtang sa pagkapukan ug pagkamakasasala.

Idirekta ang atensyon sa mga estudyante ngadto sa mga pulong nga imong gisulat diha sa pisara.

Unsa ang mosantup sa hunahuna kon maghunahuna kamo og makalilisang nga mangtas?

Agig tubag niini nga pangutana, ang mga estudyante mahimong mohisgot og mga minugna-mugna nga mga nilalang. Kon ilang buhaton, ipasabut nga ang ubang mga butang nga tinuod mahimong mas makalilisang kay sa minugna-mugna nga mga nilalang tungod kay mahimo kining makadala og malungtarong kadaut. Pahibaloa ang mga estudyante nga gigamit ni Jacob ang mga pulong nga “makalilisang nga mangtas” aron sa paghulagway sa kahimtang nga giatubang natong tanan ug sa malungtarong kadaut nga mahimong moresulta gumikan niini. Hangyoa ang mga estudyante sa pagbasa og hilum sa 2 Nephi 9:10, nga mangita sa duha ka elemento sa mangtas nga gihulagway ni Jacob. Kon mopakigbahin ang mga estudyante sa ilang nakit-an, idugang ang mga tubag diha sa pisara sama sa gipakita sa ubos:

Aron matabangan ang mga estudyante nga makasabut sa paggamit ni Jacob sa mga termino nga kamatayon ug impyerno, ipasabut nga ang duha ka mga termino nagpasabut og matang sa panagbulag. Sa dihang gigamit ni Jacob ang pulong nga kamatayon diha niini nga wali, nagpasabut siya sa “kamatayon sa lawas,” nga mao ang panagbulag sa pisikal nga lawas gikan sa espiritu. Sa dihang gigamit niya ang pulong nga impyerno, nagpasabut siya sa “kamatayon sa espiritu,” nga mao ang pagkabulag sa tawo gikan sa presensya sa Dios. Diha sa mga kasulatan, kini nga panagbulag sa kasagaran nagpasabut isip “espirituhanong kamatayon.”

Dapita ang mga estudyante sa pagbasa og hilum sa 2 Nephi 9:6. Hangyoa sila sa pagpangita sa hinungdan sa pisikal nga kamatayon ug sa espirituhanong kamatayon.

Unsa nga panghitabo ang nagdala sa pisikal nga kamatayon ug sa espirituhanong kamatayon kanatong tanan? (Mahimong kinahanglan nimong ipasabut nga isip resulta sa Pagkapukan, ang tanang katawhan ipahimulag gikan sa presensya sa Dios ug ang tanang katawhan sa katapusan mamatay sa pisikal nga paagi.)

Ipasabut nga diha sa 2 Nephi 9:7–9, nagtudlo si Jacob kon unsay mahitabo kanato kon wala pa ang Pag-ula ug ang mga epekto sa Pagkapukan magpabilin sa kahangturan. Aron maandam ang mga estudyante sa pagtuon niining mga bersikulo, mahimo nimong hatagan ug kahulugan ang pipila ka mga termino diha sa bersikulo 7: Sa dihang naghisgot si Jacob bahin sa “ang unang hukom nga midangat sa tawo,” nagpasabut siya sa mga resulta sa Pagkapukan ni Adan ug ni Eva. Sa dihang naghisgot siya bahin sa “madunuton,” nagpasabut siya sa atong mortal nga mga lawas, nga mamatay. Sa dihang naghisgot siya bahin sa “dili madunuton,” nagpasabut siya sa atong mabanhaw nga mga lawas, nga mabuhi sa kahangturan.

Hangyoa ang usa ka estudyante sa pagbasa og kusog sa 2 Nephi 9:7–9. Dapita ang klase sa pagpangita sa mga pulong nga naghulagway kon unsay mahitabo sa atong mga lawas ug mga espiritu kon ang pisikal ug espirituhanong kamatayon magpabilin sa kahangturan.

Kon wala pa ang Pag-ula, unsa may mahitabo sa atong mga lawas?
Kon wala pa ang Pag-ula, unsa may mahitabo sa atong mga espiritu?

Aron mahatagan og gibug-aton kon unsa ang mahimo natong kapalaran kon wala pa ang Pag-ula ni Jesukristo, hangyoa ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles.

“Kon ang pagkahibulag nato gikan sa Dios ug ang atong pisikal nga kamatayon permanente, ang moral nga kabubut-on walay pulos. Oo, mahimo kitang gawasnon sa paghimo og mga pagpili, apan unsa may kapuslanan? Ang katapusang resulta kanunay nga pareha ra bisan unsa pay atong mga lihok: kamatayon nga walay lauman nga pagkabanhaw ug walay lauman nga langit. Mamaayo o madautan man ang atong pilion, sa katapusan kitang tanan mahimo ra nga ‘mga anghel ngadto sa usa ka yawa.’ [2 Nephi 9:9.]” (“Moral Agency,” Ensign, Hunyo 2009, 50).

2 Nephi 9:10–26

Nagtudlo si Jacob nga pinaagi sa Pag-ula, ang Manluluwas mipalingkawas kanato gikan sa mga epekto sa Pagkapukan ug mitanyag kanato og kapasayloan sa atong mga sala

Dapita ang mga estudyante sa pagbasa og usab sa 2 Nephi 9:10.

Sumala niini nga bersikulo, unsa may giandam sa Dios alang kanato?

Hatagi og gibug-aton nga ang nag-unang mensahe ni Jacob niini nga wali mao nga ang Dios miandam “og paagi aron kita makalingkawas gikan sa pagkupot niini nga … kamatayon ug impyerno.” Kini nga pagkalingkawas—gikan sa pisikal ug sa espirituhanong kamatayon nga gidala sa Pagkapukan—napaniguro tungod sa maulaong sakripisyo ni Jesukristo.

Bahina ang klase ngadto sa duha ka grupo. Dapita ang unang grupo sa pagbasa og hilum sa 2 Nephi 9:5, 19–21, nga mangita sa mga paghulagway bahin sa sakripisyo sa Manluluwas alang kanato. Dapita ang ikaduhang grupo sa pagbasa og hilum sa 2 Nephi 9:11–12, 15, 22, nga mangita sa mga pulong bahin ni Jesukristo nga nagluwas kanato gikan sa pisikal nga kamatayon. (Mahimo nga makatabang ang pagsulat niini nga mga reference diha sa pisara.)

Kon mahatagan na og panahon ang mga estudyante nga makabasa, pangutan-a ang unang grupo sa mosunod nga mga pangutana:

Unsa may andam nga antuson sa Manluluwas aron nga makapalingkawas Siya kanato gikan sa pisikal ug espirituhanong kamatayon? Unsa nga mga paghulagway ang inyong nakit-an nga makahuluganon nganha kaninyo?
Gihatagan og gibug-aton ni Jacob nga si Jesukristo nag-antus sa mga kasakit sa tanang mga katawhan. Unsa man ang kahulugan niini nganha kaninyo? Sa unsang paagi nga kini nga kahibalo nakaimpluwensya sa inyong mga pagbati bahin sa Manluluwas? (Aron matabangan ang mga estudyante nga makapamalandong sa gibug-aton sa sakripisyo sa Manluluwas, mahimo nimong hunungon og kadiyot ang panaghisgutan ug hatagi og gibug-aton nga ang Manluluwas nag-antus sa mga kasakit sa tanan kinsa natawo ug matawo pa dinhi sa yuta. Aron matabangan ang mga estudyante nga makapamalandong sa personal nga kahimtang sa sakripisyo sa Manluluwas, ikonsiderar ang pagdapit kanila sa pagsulat sa ilang pangalan diha sa margin tupad sa 2 Nephi 9:21, isip usa ka pahinumdom nga ang Manluluwas nag-antus sa ilang mga kasakit.)

Pangutan-a ang ikaduhang grupo sa mosunod nga mga pangutana:

Unsa nga mga pulong ang inyong nakit-an bahin sa pagluwas ni Jesukristo kanato gikan sa pisikal nga kamatayon?
Sumala sa 2 Nephi 9:22, kinsa man ang mabanhaw ug pagadad-on og balik ngadto sa presensya sa Dios?

I-refer og balik ngadto sa mga pulong nga “makalilisang nga mangtas” diha sa pisara. Dapita ang mga estudyante sa pagpahayag, diha sa ilang kaugalingong mga pulong, kon unsay gitudlo ni Jacob kon sa unsang paagi kita maluwas gikan niining “mangtas.” Siguroha nga nasabtan sa mga estudyante nga pinaagi sa Pag-ula, gipalingkawas ni Jesukristo ang tanang katawhan gikan sa pisikal ug espirituhanong kamatayon nga miresulta pinaagi sa Pagkapukan. Dapita ang usa ka estudyante sa pagsulat niini nga kamatuoran diha sa pisara.

Pahinumdumi ang mga estudyante nga agig dugang sa pagpalingkawas sa tanang katawhan gikan sa pisikal ug espirituhanong kamatayon nga miresulta tungod sa Pagkapukan, si Jesukristo makapalingkawas kanato gikan sa espirituhanong kamatayon nga miresulta tungod sa kaugalingon natong mga sala.

Ipasabut nga gihulagway ni Jacob ang kahimtang sa mga tawo nga mobarug atubangan sa Dios diha sa ilang mga sala. Dapita ang mga estudyante sa pagpangita niining mga paghulagway samtang ang usa ka estudyante mobasa og kusog sa 2 Nephi 9:15–16, 27.

Giunsa sa paghulagway ni Jacob ang kahimtang sa mga tawo nga mobarug atubangan sa Dios diha sa ilang mga sala?

Ipasabut nga gihulagway usab ni Jacob ang kahimtang sa mga tawo nga mobarug atubangan sa Dios diha sa kaputli. Dapita ang mga estudyante sa pagpangita niining mga paghulagway samtang ang usa ka estudyante mobasa og kusog sa 2 Nephi 9:14, 18.

Giunsa sa paghulagway ni Jacob ang kahimtang sa mga tawo nga mobarug atubangan sa Dios diha sa kaputli?

Ipasabut nga samtang ang pagkalingkawas gikan sa Pagkapukan usa ka gasa sa tanang katawhan, ang atong pagkalingkawas gikan sa mga sangputanan sa atong mga sala magdepende ang uban niini sa atong mga tinguha ug mga lihok. Isulat sa pisara ang mosunod: Pinaagi sa Pag-ula ni Jesukristo, atong mabuntog ang mga sangputanan sa atong mga sala samtang kita …

Dapita ang usa ka estudyante sa pagbasa og kusog sa 2 Nephi 9:21, 23–24. Hangyoa ang klase sa pagpangita sa mga pulong aron sa pagkompleto sa sentence diha sa pisara.

Sumala niini nga mga bersikulo, unsaon man ninyo sa pagkompleto niini nga sentence? (Ang mga tubag sa mga estudyante kinahanglang mopakita sa mosunod nga pagkompleto sa sentence: Pinaagi sa Pag-ula ni Jesukristo, atong mabuntog ang mga sangputanan sa atong mga sala samtang kita magbaton og hugot nga pagtuo diha ni Jesukristo, maghinusol, magpabunyag, ug molahutay hangtud sa katapusan. Samtang magpakigbahin sila sa ilang mga tubag, kompletuha ang pamahayag diha sa pisara.)

Tapusa kini nga leksyon pinaagi sa pagpili sa usa sa mosunod nga mga kalihokan. Ang duha ka mga kalihokan gitumong aron matabangan ang mga estudyante nga makapamalandong kon unsay kahulugan ngadto kanila sa Pag-ula sa Manluluwas ug sa pagpakigbahin sa ilang mga pagbati mahitungod Kaniya.

Hangyoa ang mga estudyante nga mobasa og daklit sa 2 Nephi 9:1–22 ug mangita sa tanang mga bersikulo nga nagsugod sa pulong nga O. Dapita ang mga estudyante nga basahon og kusog ang unang mga sentence niadtong mga bersikulo.

Dapita ang mga estudyante sa pagsulat og susama nga mga pamahayag diha sa ilang mga scripture study journal o mga class notebook, nga maghulagway sa ilang personal nga mga pagbati sa pasalamat alang sa Manluluwas ug sa Iyang sakripisyo alang kanila. Hangyoa sila sa pagsunod sa sumbanan ni Jacob, nga sugdan ang matag pamahayag gamit ang pulong nga O ug tapuson gamit ang usa ka exclamation point. Hangyoa ang pipila ka mga estudyante sa pagpakigbahin sa ilang mga pamahayag kon angay. Siguroha nga ilang nasabtan nga dili sila kinahanglang mobati nga obligado nga mopakigbahin og mga kasinatian nga pribado o personal kaayo.
Isip usa ka klase, kantaha o basaha ang mga pulong sa “I Stand All Amazed [Ako Nagpabilin nga Natingala]” (Hymns, nu. 193) o laing himno bahin sa Pag-ula ni Jesukristo. Dapita ang mga estudyante sa pagpili og mga linya gikan sa himno nga nagpakita sa ilang mga pagbati bahin sa Manluluwas ug sa Iyang maulaong sakripisyo. Tuguti sila sa pagsulti sa klase bahin sa mga linya nga ilang gipili ug sa pagpasabut sa mga rason nganong nakadayeg sila niadtong mga linya.

Komentaryo ug Background nga Impormasyon

2 Nephi 9:7. Unsa ang “walay kinutuban nga pag-ula”?

Sa mosunod nga mga pamahayag, si Elder Russell M. Nelson sa Korum sa Napulog Duha ka mga Apostoles mipasabut sa mahangturong kahimtang sa Pag-ula ug sa talagsaong abilidad sa Manluluwas sa pagpahinabo sa Pag-ula:

“Ang Iyang Pag-ula walay kinutuban—walay katapusan. [Tan-awa sa 2 Nephi 9:7; 25:16; Alma 34:10, 12, 14.] Wala usab kini kinutuban nga ang tanang katawhan maluwas gikan sa walay katapusang kamatayon. Wala kini kinutuban diha sa hilabihan Niya nga pag-antus. Wala kini kinutuban sa panahon, mitapos sa nag-una nga sundanan sa pagsakripisyo og hayop. Wala kini kinutuban sa gidak-on—kinahanglan kining pagahimuon sa usa ka higayon alang sa tanan. [Tan-awa sa Mga Hebreohanon 10:10.] Ug ang kalooy sa Pag-ula modangat dili lamang sa usa ka walay kinutuban nga gidaghanon sa katawhan, apan sa usa usab ka walay kinutuban nga gidaghanon sa mga kalibutan nga Iyang gilalang. [Tan-awa sa D&P 76:24; Moises 1:33.] Wala kini kinutuban lapas pa sa bisan unsa nga sukdanan sa tawo o mortal nga panabut.

“Si Jesus mao lamang ang tawo sa kalibutan ang makatanyag sa ingon nga walay kinutuban nga pag-ula, kay Siya natawo sa usa ka mortal nga inahan ug usa ka imortal nga Amahan. Tungod nianang talagsaong katungod sa pagkatawo, si Jesus usa ka walay kinutuban nga Nilalang” (“The Atonement,” Ensign, Nob. 1996, 35).

“Sumala sa mahangturong balaod, kana nga pag-ula nagkinahanglan og personal nga sakripisyo sa usa ka imortal nga nilalang nga dili mapaubos sa kamatayon. Apan kinahanglan gayud Siya nga mamatay ug mokuha og balik sa Iyang kaugalingong lawas. Ang Manluluwas lamang ang bugtong tawo nga makatuman niini. Gikan sa Iyang inahan napanunod Niya ang gahum nga mamatay. Gikan sa Iyang Amahan napanunod Niya ang gahum ibabaw sa kamatayon” (“Constancy amid Change,” Ensign, Nob. 1993, 34).

2 Nephi 9:7. Unsa man ang mga epekto sa Pagkapukan kon wala ang Pag-ula?

Si Elder D. Todd Christofferson sa Korum sa Napulog Duha ka mga Apostoles mipasabut kon unsa ang atong kapalaran kon wala ang Pag-ula ni Jesukristo.

“Ingon nga ang kamatayon mopanghimaraut kanato ug mohimo sa atong kabubut-on nga walay pulos apan alang sa katubsanan ni Kristo, bisan pa man niana, kon wala ang Iyang grasya, ang atong mga sala ug dili maayo nga mga pagpili mopabilin kanato nga mawala sa kahangturan. Wala gayuy paagi nga hingpit nga maulian gikan sa atong mga sayop, ug kay mahugaw man, dili na gayud kita makapuyo pag-usab sa presensya sa [Dios].

“… Nagkinahanglan kita og Manluluwas, usa ka Tigpataliwala nga makabuntog sa mga epekto sa atong mga sala ug mga sayop aron dili kini ingon nga makalaglag gayud. Tungod kini sa Pag-ula ni Kristo nga maulian kita gikan sa dili maayo nga mga pagpili ug mahatagan og kaangayan ubos sa balaod nga morag wala kita makasala” (“Moral Agency,” Ensign, Hunyo 2009, 50).

2 Nephi 9:10. “O pagkawalay katapusan sa kaayo sa atong Dios”

Gipahayag ni Presidente Gordon B. Hinckley ang pasalamat alang sa tahas sa Manluluwas sa pagtuman sa Pag-ula:

“Salamat sa Dios alang sa katalagsaon ug kahalangdon sa Iyang mahangturong plano. Pasalamati ug himayaa ang Iyang Pinalanggang Anak, kinsa, uban sa dili mahulagway nga pag-antus, mihatag sa Iyang kinabuhi didto sa krus sa Kalbaryo aron ibayad sa utang sa mortal nga sala. Siya kadto kinsa, pinaagi sa Iyang maulaong sakripisyo, mibadbad sa mga higot sa kamatayon ug uban sa diosnong gahum mibangon nga nagmadaugon gikan sa lubnganan. Siya ang atong Manunubos, ang Manunubos sa tanang katawhan. Siya ang Manluluwas sa kalibutan. Siya ang Anak sa Dios, ang Tigpasiugda sa atong kaluwasan” (“The Victory over Death,” Ensign, Mayo 1985, 51).

2 Nephi 9:22. “Nga silang tanan makabarug sa atubangan kaniya”

Ang tanang mga tawo mibiya sa presensya sa Dios isip resulta sa Pagkapukan ni Adan ug ni Eva. Tungod sa Pag-ula ni Jesukristo, ang tanang mga tawo mobalik sa presensya sa Dios aron pagahukman. Alang sa dugang pa mahitungod niini nga hilisgutan, tan-awa ang mosunod nga mga tudling: 2 Nephi 2:9–10; 9:15, 22, 38; Alma 11:43–44; 12:12–15, 24; 42:23; Helaman 14:15–17; 3 Nephi 26:4; Mormon 9:12–13.