Pasiuna sa Basahon ni Alma
Ngano nga kinahanglang tun-an kini nga basahon?
Pinaagi sa pagtuon sa basahon ni Alma, ang mga estudyante makakat-on mahitungod ni Jesukristo ug sa panginahanglan sa Iyang Pag-ula ug Pagkabanhaw diha sa plano sa kaluwasan. Makat-unan usab nila ang mahitungod sa gahum sa pulong sa Dios sa pagbuntog sa panapi sa mga pari, mini nga doktrina, sala, kasilag, ug apostasiya ug sa pagdala sa mga indibidwal aron makasinati og dako nga kausaban sa kasingkasing. Ang mga estudyante mapalig-on ug madasig samtang sila magbasa mahitungod sa misyonaryo nga mga paningkamot ni Alma, Amulek, ug sa mga anak nga lalaki ni Mosiah, ingon man usab ang pagkakabig ug kamatinud-anon sa mga Anti-Nephi-Lehi (ang katawhan ni Ammon). Samtang magtuon sila sa mga kapitulo nga nagdetalye sa gubat tali sa mga Nephite ug sa mga Lamanite, sila makakat-on sa mga baruganan nga mogiya nila sa malisud nga mga panahon diin sila nagpakabuhi ug magtabang nila nga modaug diha sa ilang personal nga mga gubat batok sa mga kaaway.
Kinsa ang nagsulat niini nga basahon?
Si Mormon mihugpong ug giminubo ang mga rekord gikan sa dagkong mga palid ni Nephi aron sa paghimo sa basahon ni Alma. Ang basahon ginganlan og Alma, kinsa, isip ang anak ni Alma, sa kanunay gitawag og Alma nga Batan-on. Sa dihang si Haring Mosiah mipasiugda sa paghari sa mga maghuhukom diha sa mga Nephite, si Alma nga Batan-on nahimong unang labaw nga maghuhukom ug misunod sa iyang amahan isip halangdon nga pari sa tibuok Simbahan (tan-awa sa Mosiah 29:42). Sa katapusan mibiya siya sa iyang posisyon isip labaw nga maghuhukom aron sa pagpahinungod sa iyang kaugalingon “sa kinatibuk-an ngadto sa halangdon nga pagkapari” ug “sa paghatag sa pulong sa Dios ngadto sa mga katawhan” sa tibuok kayutaan sa mga Nephite (Alma 4:20; 5:1). Migamit si Mormon sa mga rekord sa pagpangalagad ni Alma (tan-awa sa Alma 1–44) ug ang mga sinulat sa anak nga mga lalaki ni Alma nga si Helaman (tan-awa sa Alma 45–62) ug Shiblon (tan-awa sa Alma 63) aron mahimo ang basahon ni Alma.
Para kang kinsa kini gisulat ug ngano?
Wala namulong si Mormon diha sa basahon ni Alma ngadto sa piho nga tigbasa o gipamahayag nganong gisulat niya kini. Hinoon, ang daghang mga pagtulun-an sa basahon bahin sa matubsanong misyon ni Jesukristo nakatampo ngadto sa katuyoan sa Basahon ni Mormon, nga mao ang pagpamatuod “nga si Jesus mao ang Kristo, ang Dios sa Kahangturan” (ulohan nga pahina sa Basahon ni Mormon; tan-awa usab sa Alma 5; 7; 13; 32–34; 36; 39–42).
Kanus-a ug asa man kini gisulat?
Ang orihinal nga mga rekord gigamit isip mga kapanguhaan sa basahon ni Alma nga tingali nahisulat sa tunga-tunga sa mga 91 B.C. ug 52 B.C. Giminubo ni Mormon kadtong mga rekord sa tunga-tunga sa mga A.D. 345 ug A.D. 385. Wala girekord ni Mormon kon diin siya sa dihang iyang gihugpong kini nga basahon.
Unsa ang pipila sa kalainan niini nga basahon?
Bisan og ang basahon ni Alma mao ang kinatas-an sa Basahon ni Mormon, kini naglangkob lamang sa 39 ka tuig—gibana-bana nga sa 91 B.C. hangtud sa 52 B.C. Ang basahon nag-asoy sa unang higayon sa malampusong misyonaryo nga mga paningkamot taliwala sa mga Lamanite. Naghatag usab kini og gibug-aton sa kamatinud-anon sa nakabig nga mga Lamanite sa paghupot sa ilang mga pakigsaad (tan-awa sa Alma 23:6–7; 24). Dugang pa, ang basahon ni Alma naglakip sa mga pagtulun-an mahitungod sa doktrina sa pagka-inordinahan nang daan ug sa pagpangalagad sa Melchizedek (tan-awa sa Alma 13); ang gahum sa pulong sa Dios (tan-awa sa Alma 31); unsaon sa pagpalambo sa pagtuo kang Jesukristo (tan-awa sa Alma 32–34); ang kabug-aton sa paglapas sa balaod sa kaputli (tan-awa sa Alma 39); ang kahimtang sa atong espiritu human sa kamatayon (tan-awa sa Alma 40); ang mga doktrina sa pagkabanhaw ug pagpahiuli (see Alma 40–41); ug ang papel sa kaangayan ug kalooy sa plano sa katubsanan sa Langitnong Amahan (tan-awa sa Alma 42). Kini nga basahon naglangkob usab sa mga instruksyon sa Ginoo kalabut sa pagdepensa sa kaugalingon ug sa paghatag og kapaangayan sa gubat (tan-awa sa Alma 43:45–47).
Outline
Alma 1–3 Si Nehor mipasiugda sa panapi sa mga pari diha sa mga Nephite. Nangulo si Alma sa matarung nga mga Nephite sa pagpanalipod sa ilang mga kaugalingon batok ni Amlici ug sa iyang mga sumusunod, kinsa nakig-abin sa usa ka kasundalohan sa Lamanite. Human nga napakyas ang pagsulay ni Amlici nga mahimong hari ug sa pagguba sa Simbahan, ang mga Nephite milupig sa laing kasundalohan sa Lamanite.
Alma 4–16 Si Alma miluwat sa katungdanan isip labaw nga maghuhukom. Mibiyahe siya sa tibuok kayutaan sa mga Nephite aron sa pakigbatok sa garbo ug kadautan pinaagi sa pagsangyaw sa pulong sa Dios. Miapil si Amulek ni Alma, ug sila nagtudlo sa Pag-ula ni Jesukristo, sa Pagkabanhaw, ug sa panginahanglan sa hugot nga pagtuo diha sa Ginoo ug paghinulsol. Si Zeezrom nakabig ug nabunyagan.
Alma 17–28 Ang anak nga mga lalaki ni Mosiah ug ang uban nagsangyaw sa pulong sa Dios diha sa mga Lamanite sa yuta sa Nephi. Liboan ang nakabig ngadto sa Ginoo. Ang mga kinabig mibiya sa ilang mga hinagiban sa gubat ug nanimuyo kauban sa mga Nephite. Daghang mga tawo ang nangamatay sa gubat tali sa mga Nephite ug mga Lamanite.
Alma 29–42 Nagtinguha si Alma nga makadala og mga kalag ngadto sa paghinulsol. Siya milibug ni Korihor, usa ka anti-Kristo. Samtang nagtudlo sa mga Zoramite, usa ka grupo nga mibulag sa mga Nephite, si Alma mitandi sa pulong sa Dios ngadto sa usa ka binhi nga kinahanglang maatiman pinaagi sa hugot nga pagtuo. Nagpamatuod si Amulek sa Pag-ula ug nagtudlo sa mga Zoramite sa paggamit sa hugot nga pagtuo ngadto sa paghinulsol. Naghatag si Alma og tagsa-tagsa nga tambag ug pagpamatuod ngadto sa iyang anak nga mga lalaki nga sila si Helaman, Shiblon, ug Corianton. Gisalig ni Alma ang sagradong mga rekord ngadto ni Helaman. Nagtudlo siya mahitungod sa kalibutan sa espiritu nga kinabuhi human dinhi, pagkabanhaw, ug ang papel sa kaangayan ug kalooy diha sa plano sa Dios.
Alma 43–45 Gisulsolan ngadto sa kasuko sa mibulag nga mga Nephite, ang mga Lamanite nagkiggubat batok sa mga Nephite. Nangulo si Moroni sa mga Nephite ngadto sa kadaugan batok sa kasundalohan ni Zerahemnah. Si Alma nag-interbyu ug mipanalangin ni Helaman, nanagna sa pagkagun-ob sa mga Nephite, ug mibiya sa yuta.
Alma 46–63 Sila si Moroni, Lehi, Teancum, Helaman, ug Pahoran nangulo sa mga Nephite ngadto sa kadaugan batok sa kasundalohan sa mga Lamanite nga gikontrolar ni Amalickiah ug Ammoron. Sila si Moroni ug Pahoran mipuhag sa rebelyon sa mibulag nga mga Nephite nga giila isip king-men. Nadawat ni Shiblon ang mga rekord sa Nephite ug sa kaulahian mihatag niini sa anak nga lalaki ni Helaman nga si Helaman. Ang kasundalohan ni Moronihah milupig sa mga Lamanite sa laing gubat.