Leksyon 83

Alma 19–20

Pasiuna

Si Haring Lamoni nakasinati og usa ka pagbag-o sa kasingkasing, misangput ngadto sa pagkakabig sa iyang asawa ug daghan sa iyang mga tawo. Sila si Ammon ug Haring Lamoni mibiyahe dayon ngadto sa Middoni aron sa pagtubos sa nabilanggo nga kaigsoonan ni Ammon. Sa ilang pagpadulong, ilang nahimamat ang amahan ni Lamoni, ang hari sa tanang kayutaan. Ang hari nahingangha sa mga pulong ni Lamoni ug ni Ammon, pinaagi sa kusog ni Ammon, ug pinaagi sa gugma ni Ammon alang kang Lamoni. Nahumok ang iyang kasingkasing, ug mipasalig siya nga ang mga igsoon nga mga lalaki ni Ammon mabuhian gikan sa pagkabilanggo. Mipahayag siya og tinguha aron sa pagkat-on mahitungod sa mga pulong nga iyang nadungog gikan sa iyang anak nga lalaki ug ni Ammon.

Mga Sugyot alang sa Pagtudlo

Alma 19

Si Haring Lamoni ug daghan sa iyang mga katawhan naghinulsol ug nabunyagan

Pangutan-a ang mga estudyante:

• Kon inyong ihagbong ang usa ka bato ngadto sa usa ka linaw sa tubig, unsa ang mahitabo sa tubig?

Samtang maghulagway ang mga estudyante sa epekto sa usa ka bato nga gihagbong ngadto sa tubig, drowinga ang mosunod nga diagram sa pisara, dili sulatan og mga pulong.

Isulat sa pisara ang mosunod:

Pinaagi sa pagpakigbahin sa atong mga pagpamatuod ug pagpakita og matarung nga mga ehemplo, makahimo kita …

Dapita ang mga estudyante sa paghinumdom niining pamahayag sa tibuok leksyon ug ikonsiderar kon unsaon nila kini pagkompleto.

• Sa unsang paagi nga ang binuhatan sa tawo nahisama sa bato nga gihagbong ngadto sa tubig? (Tabangi ang mga estudyante nga makita nga, sama sa gagmayng mga balud gikan sa pagtimpasaw sa usa ka bato, ang uban nga mga tawo mahimong maimpluwensyahan pinaagi sa atong mga linihukan.)

Isulat ang Ammon diha sa unang lingin sa diagram.

• Kinsa ang unang natudloan ni Ammon? (Kon ang mga estudyante nagkinahanglan og tabang sa pagtubag niining pangutana, mahimo nimong isugyot nga ribyuhon nila ang summary sa kapitulo sa Alma 18. Isulat ang Haring Lamoni diha sa ikaduhang lingin sa diagram.)

I-summarize ang Alma 18:40–43 ug ang 19:1–5 pinaagi sa pagpasabut nga sa dihang si Haring Lamoni naminaw ngadto ni Ammon, nakaamgo siya sa iyang kaugalingong pagkamakasasala ug sa iyang panginahanglan sa Manluluwas. Nangamuyo siya ngadto sa Ginoo alang sa kalooy ug unya natumba ngadto sa yuta. Nagtuo nga patay na siya, ang iyang mga sulugoon midala kaniya ngadto sa iyang asawa ug gipahigda siya diha sa higdaanan. Duha ka adlaw ug duha ka gabii ang milabay, ang mga sulugoon modala na unta sa iyang lawas ngadto sa lubnganan sa dihang ang rayna miingon nga gusto siyang makig-istorya ni Ammon. Wala siya mituo nga si Lamoni namatay, ug siya gusto nga moadto si Ammon kaniya.

Hangyoa ang mga estudyante sa pagbasa sa hilum sa Alma 19:6, nga mangita sa mga pulong nga ilang gibati nga naghulagway gayud sa kasinatian ni Lamoni. Pagtawag og pipila ka mga estudyante sa pagbasa sa mga pulong nga ilang napili. Pangutan-a sila nganong mipili sila niadtong partikular nga mga pulong.

Sa diagram, isulat ang rayna sa sunod nga lingin. Hangyoa ang mga estudyante sa pagsiksik sa Alma 19:7–11 aron makita kon sa unsang paagi nga kining kasinatian nakaimpluwensya sa rayna.

• Unsa ang atong nakat-unan mahitungod sa rayna gikan niini nga mga bersikulo? (Ang mga tubag mahimong maglakip nga siya nahigugma sa iyang bana, nga siya misalig ni Ammon, ug nga siya adunay talagsaong hugot nga pagtuo.)

Hangyoa ang usa ka estudyante sa pagbasa og kusog sa Alma 19:12–14. Dapita ang ubang mga estudyante sa pagsunod, nga maghatag og espesyal nga pagtagad ngadto sa pagpahayag sa hugot nga pagtuo ni Lamoni.

• Unsa nga mga kamatuoran ang nakat-unan ni Lamoni atol sa miaging duha ka adlaw?

• Si Lamoni, ang rayna, ug si Ammon “gidaug pinaagi sa Espiritu” ug “gidaug uban sa hingpit nga kalipay.” Kanus-a ang higayon nga inyong nabati ang impluwensya sa Espiritu sa gamhanang paagi? Kanus-a ang higayon nga inyong nabati ang dakong kalipay?

Isulat ang mga sulugoon ni Lamoni sa sunod nga lingin diha sa diagram. Dapita ang usa ka estudyante sa pagbasa og kusog sa Alma 19:15–16. Hangyoa ang klase sa pagpangita og ebidensya nga kining mga sulugoon nakabig ngadto sa Dios.

• Unsa nga mga pulong nga nagpakita nga ang mga sulugoon nakabig ngadto sa Dios?

Isulat ang Abish sa sunod nga lingin. Dapita ang usa ka estudyante sa pagbasa og kusog sa Alma 19:17. Dapita ang klase sa pagpangita kon sa unsang paagi si Abish naimpluwensyahan pinaagi niining panghitabo.

• Unsa ang gihimo ni Abish? Unsa ang iyang gilauman nga mahitabo tungod sa iyang mga gibuhat?

Ikonsiderar ang paghatag sa mga estudyante og oportunidad sa pag-summarize sa Alma 19:18–28. Hatagi sila og panahon nga basahon sa hilum kining mga bersikulo. Dayon paghangyo og usa ka boluntaryo nga mosaysay diha sa iyang kaugalingong mga pulong. Tuguti ang ubang mga estudyante sa pagtabang. Kon gikinahanglan, tabangi sila nga ilakip ang mosunod nga impormasyon: Human sa pagkadungog sa mga balita gikan ni Abish, ang mga tawo nagpundok diha sa balay sa hari. Dihang nakita nila si Ammon, ang hari, ang rayna, ug ang mga sulugoon nga walay panimuot, may dakong panagbingkil ang mitumaw diha kanila. Usa ka tawo misulay sa pagpatay ni Ammon apan sa paghana namatay. Ang pipila miingon nga si Ammon mao ang Gamhanang Espiritu, ang uban miingon nga siya usa ka mangtas. Dihang nakita ni Abish ang tanang panagbingkil nga misangput gumikan sa iyang pagpundok sa mga tawo, siya nagmasulub-on kaayo.

Ipakonsiderar sa mga estudyante kon unsa ang ilang buhaton sa sitwasyon ni Abish. Dayon hangyoa ang usa ka estudyante sa pagbasa og kusog sa Alma 19:29.

• Sa unsang paagi nga ang gibuhat ni Abish nagpakita sa kalig-on sa iyang pagpamatuod? Sa unsang paagi ang rayna mipakita nga siya nakadawat og usa ka pagpamatuod?

Basaha og kusog ang Alma 19:30–36. Hangyoa ang mga estudyante sa pagsunod ug ikonsiderar ang epekto sa pagpamatuod ug ehemplo ni Ammon ngadto sa uban.

Isulat ang daghan pang uban nga mga Lamanite diha sa katapusang lingin sa diagram.

Hangyoa ang mga estudyante sa pagkompleto sa pamahayag nga imong gisulat sa pisara sa pagsugod sa klase. Usa ka baruganan nga tingali ilang ipahayag mao nga pinaagi sa pagpakigbahin sa atong mga pagpamatuod ug pagpakita og matarung nga mga ehemplo, makatabang kita sa uban nga makabig ngadto sa Ginoo.

• Kanus-a nga higayon nga ang ehemplo o pagpamatuod sa usa ka tawo nakaimpluwensya kaninyo alang sa kaayohan?

Dapita ang mga estudyante sa pagpamalandong kon sa unsang paagi nga ang ilang mga pagpamatuod ug mga ehemplo makaimpluwensya sa ilang mga sakop sa pamilya, mga higala, ug komunidad. Hangyoa sila sa pagsulat sa mga tubag sa mosunod nga pangutana diha sa ilang mga notebook o scripture study journal:

• Unsa ang inyong mahimo karon nga tingali adunay maayong impluwensya sa mga tawo sa inyong palibut?

Awhaga ang mga estudyante nga itugot ang ilang mga pagpamatuod ug matarung nga mga ehemplo aron makaimpluwensya sa uban, sama sa bato nga mihimo og gagmayng mga balud diha sa usa ka linaw. Sultihi ang mga estudyante nga sa umaabut nga leksyon (leksyon 85), basin maghangyo ka nga moreport sila sa ilang mga paningkamot.

Alma 20

Ang amahan ni Haring Lamoni nagtinguha sa pagkat-on mahitungod sa ebanghelyo ug nagsugod sa pagsinati og kausaban sa kasingkasing

Dapita ang mga estudyante sa paghunahuna og usa ka higayon nga ilang gibati nga sila gitratar sa ngil-ad o sa dili makiangayon nga paagi.

Ipasabut nga si Ammon ug si Lamoni nag-atubang sa usa ka sitwasyon diin sila gitratar sa ubos nga paagi. Ipasabut nga makakat-on kita og importanting mga leksyon gikan sa ilang mga tubag ngadto sa paagi nga sila gitratar.

Aron matabangan ang mga estudyante nga makapamilyar sa istorya sa Alma 20, i-summarize ang Alma 20:1–7 sumala sa mosunod: Si Lamoni gustong dad-on si Ammon aron mahimamat ang iyang amahan, kinsa mao ang hari sa tanang kayutaan. Ang Ginoo mipadayag ngadto ni Ammon nga si Ammon dili moadto tungod kay ang amahan ni Lamoni mosulay sa pagpatay kaniya. Ang Ginoo mipadayag usab nga ang igsoon nga mga lalaki ni Ammon nga si Aaron ug ang duha ka mga kauban nabilanggo didto sa yuta sa Middoni. Gusto ni Ammon nga mabuhian ang iyang kaigsoonan. Sa pagkadungog nga nahibaloan ni Ammon kining mga butanga pinaagi sa pagpadayag, si Lamoni miadto aron sa pagtabang ni Ammon nga mabuhian ang iyang igsoon nga mga lalaki.

Sa dili pa magsugod ang klase, kopyaha ang mosunod nga tsart diha sa pisara o diha sa handout sa matag estudyante:

1. Alma 20:8–13	Unsa ang inyong bation kon kamo pa diha sa kahimtang ni Ammon ug adunay tawo nga mipasangil ninyo nga bakakon ug usa ka kawatan?
2. Alma 20:14–16	Unsa nga mga leksyon ang atong makat-unan gikan sa tubag ni Lamoni ngadto sa iyang amahan?
3. Alma 20:17–25	Sa dihang nakita sa amahan ni Lamoni nga si Ammon mahimong mopatay niya, unsa ang iyang gitanyag kang Ammon? Unsa man hinoon ang gihangyo ni Ammon?
4. Alma 20:26–27	Sa unsang paagi nga ang gugma ni Ammon alang kang Lamoni nakaimpluwensya sa amahan ni Lamoni? Sa unsa nga mga paagi nga ang mga pulong ni Ammon ug ni Lamoni nakaimpluwensya sa amahan ni Lamoni?

I-assign ang mga estudyante nga magpares sa pagtrabaho. Niining panagpares, ipabasa nila ang mga bersikulo nga nalista sa mga row 1–2 ug hisgutan ang mga tubag sa gilakip nga mga pangutana. Awhaga sila sa pagpangandam sa pagpakigbahin sa ilang mga tubag sa tibuok klase.

Human ang managpares nakahisgot sa mga row 1–2, hangyoa ang pipila kanila sa pagreport unsa ang ilang nakat-unan. Dayon ipangutana:

• Unsa nga mga baruganan ang atong makat-unan gikan niini nga mga bersikulo? (Ang mga estudyante mahimong mopakigbahin og pipila ka tubag, apan tabangi sila nga mailhan ang mosunod nga mga baruganan: Mahimo kitang mohatag sa atong mga pagpamatuod pinaagi sa pulong ug ehemplo bisan kon ang uban mosulay sa pag-agni kanato sa pagbuhat kon unsay sayop. Mahimo nimong isugyot nga ilang isulat kining baruganan tupad sa Alma 20:15.)

Dapita ang managpares sa pagtuon sa mga bersikulo nga nalista sa mga row 3–4 ug hisguti ang nalakip nga mga pangutana. Hangyoa sila sa pagreport kon unsay ilang nakit-an. Dayon ipangutana:

• Unsa nga mga baruganan ang atong makat-unan gikan niini nga mga bersikulo? (Bisan og ang mga estudyante mahimong mopakigbahin og lain-laing mga baruganan, siguroha nga maklaro ang mosunod: Samtang magpakita kita sa gugma ug magtudlo sa kamatuoran, makatabang kita sa uban nga mohumok ang ilang mga kasingkasing ug mahimong andam nga modawat sa ebanghelyo. Mahimo nimong awhagon ang mga estudyante sa pagsulat niini nga baruganan tupad sa Alma 20:26–27.)

Dapita ang mga estudyante sa pagpakigbahin sa ilang mga kasinatian nga nagpakita sa kamatuoran sa usa sa mga baruganan nga ilang nailhan diha sa Alma 20. Mahimong ikaw usab gustong mopakigbahin og usa ka kasinatian nga imong kaugalingon.

Tapusa pinaagi sa pag-awhag sa mga estudyante sa pagtinguha sa giya sa Espiritu mahitungod kon unsaon nila sa paggamit niining duha ka mga baruganan diha sa ilang mga kinabuhi.

Dugang nga mga Ideya sa Pagtudlo

Alma 19:36. “Tanan nga mga katawhan kinsa mohinulsol ug motuo sa iyang ngalan”

Ipangutana sa mga estudyante kon aduna bay higayon nga mihukom sila nga dili mopakigbahin sa ebanghelyo sa tawo tungod kay wala sila maghunahuna nga ang tawo maminaw o modawat sa ebanghelyo. Ipasabut nga tingali mohimo kita og ingon nianang paghukom base sa hitsura o kinaiya sa tawo. Dayon pahinumdumi ang mga estudyante nga ang mga anak nga lalaki ni Mosiah miadto sa pagsangyaw sa mga Lamanite. Dapita ang usa ka estudyante sa pagbasa og kusog sa Alma 17:14. Hangyoa ang klase sa pagpangita og mga pulong nga naghulagway sa mga Lamanite.

Ipasabut nga si Mormon nagtudlo og usa ka importanting baruganan human sa pagpakigbahin sa istorya sa pagkakabig ni Haring Lamoni ug sa iyang mga tawo. Dapita ang usa ka estudyante sa pagbasa og kusog sa Alma 19:36. Hangyoa ang klase sa pagpangita sa baruganan nga gitudlo ni Mormon mahitungod sa Ginoo dinhi niining bersikulo.

• Niining bersikulo, unsa nga baruganan ang gitudlo ni Mormon mahitungod sa Ginoo? (Mahimo nimong awhagon ang mga estudyante sa pagmarka sa mosunod nga baruganan diha sa ilang mga kasulatan: “Ang Iyang bukton gipatuy-od ngadto sa tanan nga mga katawhan kinsa mohinulsol ug motuo sa iyang ngalan.”)

Dapita ang usa ka estudyante sa pagbasa sa mosunod nga istorya, nga naghulagway niining baruganan:

“Taud-taud na ang akong bishop ug ang adviser sa korum sa mga priest mihagit sa among korum sa pagpanghatag og duha ka Basahon ni Mormon sulod sa usa ka tuig. Gidawat nako ang hagit ug sa kanunay aduna koy Basahon ni Mormon nga dala (sa sakyanan, sa akong bag, ubp.). Pipila ka mga tawo ang midawat og kopya, apan wala gayuy nagpakita nga interesado nga mopadayon.

“Unya usa ka adlaw sa Hunyo, nagpagasolina ko gikan sa trabaho ug nakakita og usa ka kauban sa trabaho nga mipalit og sigarilyo. Tungod sa iyang pagpanigarilyo ug bagsik nga pagkatawo, wala ko naghunahuna sa pagpakigbahin sa ebanghelyo niya. Miduol siya ug nakig-istorya nako, ug nag-istoryahanay mi mahitungod sa musika ug mga salida. Sa dihang mipasabut ko nga dili ko motan-aw og salida nga dunay pamalikas, bayolente, o imoralidad, ang hilisgutan nausab ngadto sa relihiyon. Gikuha nako ang Basahon ni Mormon didto sa luyo nga lingkuranan sa akong sakyanan, misulat sa akong pagpamatuod sa sulod sa hapin, ug gihatag ngadto niya.

“Sa sunod higayon nga nakigtrabaho ko niya, nangutana ko kon iya bang nabasa kini. Miingon siya, ‘Jeff, gibasa nako ang pasiuna, ug nakahibalo ko nga kini tinuod. Gusto kong makahibalo pa og dugang ug magpabunyag.’

“Nakapahikurat gyud kana nako. Akong gihatag sa mga misyonaryo ang iyang pinuy-anan aron sila makatudlo niya, ug ako siyang gidala ngadto sa simbahan. Nagustuhan niya kini. Gitakda niya ang petsa sa iyang bunyag.

“Sa wala pa ang iyang bunyag, miingon siya nako nga gitanyagan siya og nindot kaayo nga trabaho, apan kinahanglan siya nga molihok dayon. Adto kini sa Alaska, ug mobiya na siya sulod sa duha ka adlaw. Mao nga among gipangita ang address sa meetinghouse sa lungsod, ug dayon mibiya na siya.

“Paglabay sa pipila ka bulan nagsinulatay kami, apan wala siyay pag-uswag nga mabunyagan. Unya usa ka adlaw mitawag siya og miingon nako nga nakontak na niya ang mga misyonaryo ug mabunyagan na siya nianang Sabado.

“Karon naghupot na siya og Aaronic Priesthood ug nakapanalangin na sa sakrament sa pipila ka higayon.

“Nagpakita lang kini nga dili nimo mahibaloan kon kinsa ang modawat sa ebanghelyo, busa ipakigbahin kini sa tanan, ug ang Dios mohatag og paagi” (Jeffrey Olson, “Invite All to Come unto Christ: You Never Know,” New Era, Sept 2011, AP14).

Awhaga ang mga estudyante sa pagpangita og mga oportunidad sa pagdapit sa uban sa pagduol ni Kristo.

Alma 19:31–36. Pagtabang sa uban nga moduol ngadto sa Ginoo

Aron matabangan ang mga estudyante nga makita kon sa unsang paagi nga ang atong mga pagpamatuod ug matarung nga mga ehemplo makatabang sa uban nga moduol ngadto sa Ginoo, ipasalida ang video nga giulohan og “Inviting All to Come unto Christ: Sharing the Gospel,” nga makita sa lds.org/youth/video/inviting-all-to-come-unto-christ-sharing-the-gospel. Samtang nanan-aw ang mga estudyante sa video, awhaga sila sa paghunahuna mahitungod kon unsaon nila sa pagpakigbahin ang ilang mga pagpamatuod ug pagpakita og matarung nga mga ehemplo sa mga sakop sa pamilya ug mga higala. Kini nga video nagpakita kon giunsa sa 20 ka batan-ong mga lalaki sa pag-apil sa Simbahan o mibalik sa pagkaaktibo sa Simbahan tungod sa usa ka batan-ong lalaki nga mipakigbahin sa iyang pagpamatuod.