Librarya
Leksyon 5: Overview sa Basahon ni Mormon

Leksyon 5

Overview sa Basahon ni Mormon

Pasiuna

Kini nga leksyon naghatag og usa ka overview sa Basahon ni Mormon. Tun-an sa mga estudyante ang pagpamatuod ni Joseph Smith mahitungod sa pagtungha sa Basahon ni Mormon. Makat-on usab sila sa unsang paagi ang basahon nahugpong ug napamubo pinaagi sa langitnon nga direksyon. Nakita sa mga tagsulat sa Basahon ni Mormon ang ulahing mga adlaw, ug ilang gilakip ang mga istorya ug mga pagtulun-an nga sila nasayud nga kita makabenepisyo pag-ayo.

Mga Sugyot alang sa Pagtudlo

Ang Pagpamatuod ni Propeta Joseph Smith

Sa dili pa magklase, pagbutang og Basahon ni Mormon sulod sa kahon ug pusta kini sama sa usa ka regalo. I-display ang regalo sa lamesa sa atubangan sa klase, ug sultihi ang mga estudyante nga kini usa ka bililhon nga regalo.

  • Unsa ang labing bililhon nga mga regalo ang inyong nadawat?

  • Unsa ang makapahimo sa usa ka regalo nga labing bililhon?

  • Unsay inyong bation kon mohatag mo og regalo nga inyong gi-konsiderar nga bililhon ug ang gihatagan midawat niini uban ang kalipay?

Dapita ang usa ka estudyante sa pag-abli sa regalo ug ipakita sa ubang mga estudyante unsay sulod niini.

  • Kinsay mihatag kanato niini nga regalo?

  • Ngano mang gibati ninyo nga bililhon kini nga regalo?

Ipakita ang litrato nga si Moroni Nagpakita ni Joseph Smith didto sa Iyang Lawak (62492; Libro sa mga Hulagway sa Ebanghelyo [2009], nu. 91).

The Angel Moroni Appears to Joseph Smith

  • Unsa nga panghitabo ang gipakita niini nga litrato?

  • Unsay natampo niini nga panghitabo sa Pagpahiuli sa ebanghelyo?

Ipasabut sa mga estudyante nga mobasa na sila karon sa kaugalingong mga pulong ni Propeta Joseph Smith mahitungod sa pagtungha sa Basahon ni Mormon. Sultihi sila nga ang pagpamatuod ni Propeta Joseph Smith nga makita diha sa sinugdanan sa Basahon ni Mormon gikuha gikan sa Joseph Smith—Kasaysayan diha sa Ang Perlas nga Labing Bililhon. Kon makompleto na sa mga estudyante ang mosunod nga kalihokan, pabasaha sila gikan sa Ang Perlas nga Labing Bililhon.

I-assign ang mga estudyante sa pagpares sa pagtrabaho Dapita ang usa ka estudyante sa matag pares sa pagbasa sa Joseph Smith—Kasaysayan 1:30, 32–35, 42 sa hilum nga paagi. Dapita ang laing estudyante sa matag pares sa pagbasa sa Joseph Smith—Kasaysayan 1:51–54, 59–60 sa hilum nga paagi. Pasabta nga kon mahuman na sila og basa, ang matag kauban kinahanglang motudlo ngadto sa usa mahitungod sa unsay iyang nabasa.

Human sila dunay igong panahon sa pagbasa ug paghisgot, ipangutana:

  • Sa unsa kahang paagi nakatabang kang Joseph Smith ang pagpaabut og upat ka tuig sa dili pa niya madala sa panimalay ang bulawang mga palid? (Nianang panahona gitudloan si Joseph ni Moroni, ug mihamtong siya diha sa daghang mga pamaagi. Tan-awa sa Joseph Smith—Kasaysayan 1:54.)

  • Sa istorya ni Joseph Smith, unsa nga ebidensya ang inyong makita nga gipanalipdan sa Ginoo ang Basahon ni Mormon nga motungha sa ulahing mga adlaw?

  • Sa istorya ni Joseph Smith, unsa nga ebidensya ang inyong makita nga mitungha ang Basahon ni Mormon pinaagi sa gahum sa Dios?

Mubo nga Pagpasabut mahitungod sa Basahon ni Mormon

Aron matabangan ang mga estudyante nga makasabut kon sa unsang paagi nahugpong ang Basahon ni Mormon, papaklia sila ngadto sa “Mubo nga Pagpasabut mahitungod sa Basahon ni Mormon” diha sa pasiuna nga mga pahina sa Basahon ni Mormon. Dapita ang upat ka estudyante nga magpuli-puli sa pagbasa og kusog sa item 1–4. Samtang nagbasa sila, papaminawa ang uban diha sa klase sa mga pamaagi nga ang matag set sa mga palid importante sa Basahon ni Mormon. Ang appendix niini nga manwal naglakip og usa ka paghulagway nga giulohan og “Ang mga Palid ug ang Relasyon Niini ngadto sa Gimantala nga Basahon ni Mormon.” Kini nga paghulagway makatabang sa mga estudyante nga maka-visualize sa mga palid nga gihisgutan diha sa “Mubo nga Pagpasabut mahitungod sa Basahon ni Mormon.” (Kon imong gibati nga makatabang kini isip kabahin niini nga diskusyon, hisguti ang katapusan nga paragraph diha sa mubo nga pagpasabut, magsugod sa mga pulong nga “Mahitungod niini nga edisyon.” Ipasabut nga ang matag edisyon sa Basahon ni Mormon nakalakip og gagmay nga mga koreksyon sa mga sayop sa spelling ug sa pag-type.)

Mormon Abridging the Plates

I-display ang litrato nga Mormon Mipamubo sa mga Palid (62520; Libro sa mga Hulagway sa Ebanghelyo, nu. 73). Ipasabut nga daghang mga indibidwal ang mi-preserbar sa mga rekord nga sa katapusan nahimong Basahon ni Mormon. Isulat sa pisara ang mosunod nga mga pakisayran sa kasulatan. Hangyoa ang mga estudyante sa pagbasa niini sa hilum nga paagi, nga mangita sa pipila ka mga baruganan nga nakatabang sa mga tagsulat sa Basahon ni Mormon nga matino kon unsay ilakip sa ilang mga rekord. Dapita ang mga estudyante sa pagpakigbahin kon unsay ilang nakit-an. (Mahimo nimong isulat ang ilang mga tubag diha sa pisara.)

  • Sa unsa kaha nga paagi ang pagsabut niining giya nga mga baruganan makatabang kaninyo samtang nagtuon kamo sa Basahon ni Mormon?

Ipakigbahin ang imong pagpamatuod nga nakita sa mga tagsulat sa Basahon ni Mormon ang atong panahon ug misulat kon unsay makatabang gayud kanato. Dapita ang usa ka estudyante sa pagbasa og kusog sa Mormon 8:35–38.

  • Unsa nga mga problema ang nakita ni Moroni diha sa mga katawhan sa atong panahon?

  • Nganong importante mang mahibaloan nga si Moroni ug ang ubang mga tagsulat sa Basahon ni Mormon nasayud sa mga problema nga atong atubangon?

Dapita ang usa ka estudyante sa pagbasa sa mosunod nga pamahayag ni Presidente Ezra Taft Benson kon unsaon sa pagtuon ang Basahon ni Mormon:

President Ezra Taft Benson

“Kon sila nakakita sa atong panahon ug mipili niadtong mga butang nga bililhon kaayo alang kanato, dili ba angayan lang nga ingon niana ang atong pagtuon sa Basahon ni Mormon? Kinahanglan nga kanunay natong pangutan-on ang atong kaugalingon, ‘Ngano man ang Ginoo nagdasig ni Mormon (o ni Moroni o ni Alma) sa paglakip niana sa iyang rekord? Unsa nga leksyon ang akong makat-unan gikan niana nga makatabang kanako sa pagpakabuhi niining panahona?’” (“The Book of Mormon—Keystone of Our Religion,” Ensign, Nob. 1986, 6).

Sultihi ang mga estudyante nga ang mga katawhan diha sa Basahon ni Mormon nagsagubang og mga problema nga susama sa atong mga problema. Bisan og ang Basahon ni Mormon usa ka karaan nga dokumento, ang mga doktrina, kasaysayan, ug mga istorya niini adunay dakong bili karon.

Hangyoa ang usa ka estudyante sa pagbasa og kusog sa mosunod nga pamahayag ni Presidente Ezra Taft Benson. (Mahimo nimong hatagan og kopya sa pamahayag ang matag estudyante.) Papaminawa ang klase alang sa mga panalangin nga gisaad ni Presidente Benson alang niadtong mosugod og usa ka seryuso nga pagtuon sa Basahon ni Mormon.

“Ang Basahon ni Mormon wala lamang magtudlo kanato sa kamatuoran, bisan tuod naghimo kini niana. Ang Basahon ni Mormon wala lamang magpamatuod kang Kristo, bisan tuod naghimo usab kini niana. Apan adunay mga butang nga mas labaw pa. Adunay gahum sa basahon nga magsugod sa pagdagayday sa inyong kinabuhi sa higayon nga sugdan ninyo ang tinuoray nga pagtuon sa basahon. Makaplagan ninyo ang mas dako nga gahum sa pagpakigbatok sa pagsulay. Makaplagan ninyo ang gahum sa paglikay sa panglingla. Makaplagan ninyo ang gahum nga magpabilin sa higpit og pig-ot nga dalan. Ang mga kasulatan gitawag og ‘mga pulong sa kinabuhi’ (tan-awa sa D&P 84:85), ug walay laing mas tinuod pa kay sa Basahon ni Mormon. Kon kamo magsugod sa pagkagutom ug pagkauhaw niana nga mga pulong, kamo makakaplag sa kinabuhi nga mas mabungahon” (“The Book of Mormon—Keystone of Our Religion,” 7).

  • Kanus-a man kamo nakasinati og mga panalangin gikan sa pagtuon sa Basahon ni Mormon?

Ipakigbahin ang imong pagpamatuod nga ang Basahon ni Mormon naghatag kanato og mas dakong gahum sa pagpakigbatok sa pagsulay, paglikay sa panglingla, ug magpabilin sa higpit og pig-ot nga dalan. Istoryahe ang mga estudyante mahitungod sa usa ka panahon sa dihang ikaw nakadawat niini nga mga panalangin isip resulta sa pagtuon sa Basahon ni Mormon.

Sa dili pa magklase, isulat diha sa pisara ang mosunod nga lista sa mga pangutana ug mga kasulatan:

Ipasabut nga agig dugang sa mga panalangin nga gihisgutan na, ang Basahon ni Mormon naglangkob sa mga tubag sa labing mahinungdanon nga mga pangutana sa kinabuhi. Dapita ang mga estudyante nga tagsa-tagsang mopili og usa o duha ka mga pangutana ug pangitaon ang katugma nga mga tudling sa kasulatan alang sa mga tubag. Hatagi sila og pipila ka minuto sa pagpangita sa mga tubag. Mahimo kang maglakaw-lakaw libut sa classroom, mohatag og tabang kon gikinahanglan.

  • Sa unsang paagi ang Basahon ni Mormon nagtubag sa mga pangutana nga inyong gipili?

Basaha ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles. Dihang gihimo niya kini nga pamahayag, nakigpulong siya ngadto sa mga magtutudlo sa seminary ug institute mahitungod sa gahum sa mga kasulatan sa pagtubag sa labing mahinungdanon nga mga pangutana sa kinabuhi.

“Kon ang imong mga estudyante nakasinati sa mga pagpadayag, walay pangutana—ma-personal o politikanhon o panarbaho—nga dili matubag. Diha niana anaa ang kahingpitan sa walay katapusan nga ebanghelyo. Diha niana atong makita ang mga baruganan sa kamatuoran nga makasulbad sa tanang kalibug ug sa tanang problema nga atubangon sa tawhanong pamilya o ni bisan kinsa nga indibidwal” (“Teach the Scriptures” [pakigpulong ngadto sa mga CES religious educator, Okt. 14, 1977], 3–4, si.lds.org).

Ipakigbahin sa unsang paagi ang Basahon ni Mormon nakapanalangin sa imong kinabuhi. Pahinumdumi ang mga estudyante sa ilang tumong nga basahon ang Basahon ni Mormon matag adlaw ug nga basahon ang tibuok Basahon ni Mormon og labing minus kausa karong tuiga.

Komentaryo ug Background nga Impormasyon

Mubo nga Pagpasabut mahitungod sa Basahon ni Mormon. “Mahitungod niini nga edisyon”

Adunay duha ka manuskrito sa Basahon ni Mormon: ang orihinal nga manuskrito ug ang manuskrito sa tig-imprinta [printer]. Usa ka gamayng bahin sa typesetting alang sa 1830 nga edisyon sa Basahon ni Mormon gibase sa orihinal nga manuskrito, ug ang uban gibase sa manuskrito sa tig-imprinta, nga usa ka kopya sa orihinal nga manuskrito. Sa dihang giandam ni Joseph Smith ang 1840 nga edisyon sa Basahon ni Mormon, migamit siya sa orihinal nga manuskrito aron sa pagkorihir sa wala tuyoa nga mga sayop ug mga pagtangtang nga nahitabo sa 1830 nga edisyon. Alang sa 1981 nga edisyon, ang orihinal nga manuskrito gi-konsulta pag-usab aron sa pagpahiuli sa orihinal nga mga pulong diha sa mga 20 ka mga dapit. Ang bisan usa nga mga sayop diha sa Basahon ni Mormon mao ang mga sayop sa tawo, ug ang mga pag-usab gihimo lamang aron sa pagpahiuli sa Basahon ni Mormon ngadto sa orihinal nga kahulugan ug katuyoan niini. (Tan-awa sa Book of Mormon Reference Companion, ed. Dennis Largey [2003], 124–25.)

Si Presidente Joseph Fielding Smith misulat:

“Aduna gayuy pipila ka mga sayop sa pag-type [typographical errors] sa unang edisyon [sa Basahon ni Mormon], ug tingali nataligam-an ang usa o duha ka mga pulong. Kadtong kinsa nakamantala og mga basahon ubos sa hilabihan nga pag-amping ug maayo nga kahimtang, nakakita, sa ilang kaguol, og mga sayop, sa pag-type [typographical] man o mekanikal, ang pipila niini nahitabo human nahimo ang katapusan nga pagsusi.

“… Usa ka mabinantayon nga pagsusi sa lista sa mga pag-usab … nagpakita nga walay usa ka pag-usab o pagdugang nga wala hingpit nahiuyon ngadto sa orihinal nga teksto. Gihimo ang mga pag-usab sa punctuation ug pipila ka gagmay nga mga butang nga nagkinahanglan og koreksyon, apan walay bisan unsa nga pag-usab o pagdugang nga nakapausab sa bisan usa ka orihinal nga ideya. Sa atong panglantaw, gihimo ang mga pag-usab … aron mahimong mas klaro ang teksto ug nagpahayag nga kini gipanangtang. Sigurado ko nga sa dakong bahin ang mga sayop ug mga panangtang sa unang edisyon maoy sayop sa compositor o sa tig-imprinta. Daghan niini nga mga sayop diin didto sa unang mga pagsusi nasakpan ni Propeta Joseph Smith mismo, ug mihimo siya og mga koreksyon” (Answers to Gospel Questions, comp. Joseph Fielding Smith Jr., 5 vols. [1957–66], 2:199–200; mga italic diha sa orihinal).