Leksyon 144
Ether 2
Pasiuna
Human mibiya sa Tore sa Babel, si Jared ug ang iyang igsoong lalaki ug ang ilang mga pamilya ug mga higala gigiyahan sa Ginoo tadlas sa kamingawan. Ang Ginoo misugo sa igsoong lalaki ni Jared sa paghimo og walo ka mga kasko aron kasakyan sa iyang katawhan diha sa dagat padulong sa usa ka yuta sa saad. Samtang ang igsoong lalaki ni Jared ug ang iyang katawhan misunod sa Ginoo diha sa hugot nga pagtuo, ang Ginoo mihatag kanila sa giya ug direksyon nga gikinahanglan aron magmalampuson sa ilang panaw.
Mga Sugyot alang sa Pagtudlo
Ether 2:1–12
Ang mga Jaredite nagsugod sa ilang panaw padulong sa gisaad nga yuta
Aron matabangan ang mga estudyante nga makakita kon sa unsang paagi ang pagsunod sa mga instruksyon nga atong madawat gikan sa Dios makaandam kanato sa pagdawat og dugang nga paggiya ug direksyon gikan Kaniya, ipahigayon ang mosunod nga kalihokan:
Sa dili pa magklase, pagtago og usa ka butang nga nagrepresentar og usa ka bahandi diha sa kwarto kon asa kamo magtagbo. Pag-andam og nagsunod nga tulo o upat ka mga timailhan nga mogiya sa mga estudyante ngadto sa bahandi. Imong ihatag ang una nga timailhan ngadto sa mga estudyante. Kana nga timailhan mogiya ngadto sa sunod nga timailhan, nga mogiya ngadto sa sunod nga timailhan, ug padayon hangtud makit-an sa mga estudyante ang bahandi. Human nila makit-an ang bahandi, pangutana:
-
Unsa kaha ang mahitabo kon inyong gibaliwala ang unang timailhan? (Dili unta nila makit-an ang ikaduhang timailhan.)
Dapita ang mga estudyante sa pagribyu og hilum sa Ether 1:41–42, nga mangita sa unang han-ay sa mga instruksyon sa Ginoo aron sa paggiya sa mga Jaredite paingon sa gisaad nga yuta.
Aron matabangan ang mga estudyante nga makita kon giunsa pagsanong sa mga Jaredite niini nga mga instruksyon, dapita ang usa ka estudyante sa pagbasa og kusog sa Ether 2:1–3.
-
Giunsa pagsanong sa mga Jaredite ang unang han-ay sa mga instruksyon sa Ginoo?
Dapita ang usa ka estudyante sa pagbasa og kusog sa Ether 2:4–6. Hangyoa ang klase sa pagsunod, nga mangita sa panalangin nga nadawat sa mga Jaredite human sila misunod sa unang han-ay sa mga instruksyon.
-
Unsay nahitabo human ang mga Jaredite misunod sa unang han-ay sa mga instruksyon sa Ginoo? (Ang Ginoo mihatag kanila og dugang instruksyon pinaagi sa igsoong lalaki ni Jared.)
-
Unsay atong makat-unan gikan niini nga istorya kon unsaon pagdawat og giya gikan sa Ginoo? (Ang mga estudyante mahimong mogamit og lain-laing mga pulong, apan ang ilang mga tubag kinahanglang magpakita sa mosunod nga baruganan: Samtang kita naglihok pinaagi sa hugot nga pagtuo diha sa direksyon nga gihatag sa Ginoo kanato, makadawat kita og dugang nga giya gikan Kaniya. Mahimo nimong isugyot nga ilang isulat kini nga kamatuoran diha sa ilang mga kasulatan tupad sa Ether 2:6.)
Aron matabangan ang mga estudyante nga mas makasabut ug magamit kini nga baruganan, dapita sila sa paghunahuna og usa ka impresyon o pag-aghat nga bag-o lang nilang nadawat gikan sa Ginoo. Dayon basaha ang mosunod nga pamahayag ni Elder Richard G. Scott sa Korum sa Napulog Duha ka mga Apostoles kon sa unsang paagi kita kasagaran makadawat og pagpadayag:
“Moabut kini sa hinay-hinay, matag usa, aron kamo magtubo nga lig-on. Samtang ang matag usa pagasundan og pagtuo, dad-on kamo ngadto sa laing porsyon hangtud madawat ninyo ang tibuok tubag. Kana nga sundanan nagkinahanglan sa paggamit sa pagtuo sa kapasidad sa atong Amahan sa pagtubag. Samtang usahay kini lisud kaayo, moresulta kini sa makahuluganong personal nga pagtubo” (“Ang Paggamit sa Langitnon nga Gasa sa Pag-ampo,” Ensign o Liahona, Mayo 2007, 9).
Dapita ang mga estudyante sa pagtubag sa mosunod nga mga pangutana diha sa mga notebook o mga scripture study journal. Mahimo nimo kining isulat sa pisara o basahon kini sa hinay-hinay aron ang mga estudyante makasulat niini.
-
Kanus-a kamo misunod og espirituhanong pag-aghat ug dayon nakadawat og dugang direksyon gikan sa Dios?
-
Ngano kaha nga usahay kinahanglan kitang mosanong sa usa ka espirituhanong pag-aghat sa dili pa kita makadawat og dugang nga pagpadayag?
I-summarize ang Ether 2:8–12 pinaagi sa pagpasabut nga ang Ginoo misulti sa igsoong lalaki ni Jared nga kon ang mga Jaredite moabut na sa gisaad nga yuta, kinahanglan sila nga “moalagad kaniya, ang tinuod ug bugtong nga Dios” (Ether 2:8) aron mahimo sila nga bantugan nga nasud nga gisaad Niya nga sila mamahimo. Kon dili sila moserbisyo Kaniya, sila “pagalaglagon” sa yuta (Ether 2:8–10). Si Moroni miingon nga kini usa ka “walay katapusan nga balaod” (Ether 2:10), nagpasabut nga kini magamit ngadto sa tanan nga mopuyo niana nga yuta.
Ether 2:13–15
Ang Ginoo mipanton sa igsoong lalaki ni Jared tungod kay wala motawag Kaniya diha sa pag-ampo
Dapita ang mga estudyante sa pagbasa og hilum sa Ether 2:13–15, nga mangita kon unsay gibuhat sa mga Jaredite sa dihang miabut sila sa baybayon.
-
Unsa ang gibuhat sa mga Jaredite? (Mitukod sila sa ilang mga tolda ug mipabilin diha sa baybayon sulod sa upat ka tuig.)
-
Nganong gipanton man sa Ginoo ang igsoong lalaki ni Jared?
-
Unsa nga mga leksyon ang atong makat-unan gikan sa Ether 2:14? (Ang mga estudyante mahimong moila og lain-laing mga kamatuoran, lakip sa mosunod: Ang Ginoo gusto nga kanunay kitang motawag Kaniya diha sa pag-ampo; ang Ginoo dili mahimuot kon mapakyas kita sa pagtawag Kaniya diha sa pag-ampo; ug ang Espiritu dili mopuyo uban kanato kon kita makasasala.)
Hangyoa ang mga estudyante sa paghunahuna kabahin sa ilang kaugalingong personal nga mga pag-ampo samtang imong basahon ang mosunod nga pamahayag ni Elder Donald L. Staheli sa Seventy:
“Ang inadlaw nga kinasingkasing nga mga pag-ampo nga mangayo og pasaylo ug espesyal nga panabang ug direksyon mahinungdanon sa atong mga kinabuhi ug sa pag-amuma sa atong mga pagpamatuod. Kon magdali kita, magbalik-balik, dili kaayo tinud-anay, o malimtanon sa atong mga pag-ampo, may purohan nga mawala nato ang kasuod sa Espiritu, nga gikinahanglan kaayo sa mapadayunong direksyon nga atong gikinahanglan aron malampusong madumala ang mga hagit sa atong inadlaw-adlaw nga kinabuhi” (“Pagsiguro sa Atong mga Pagpamatuod,” Ensign o Liahona, Nob. 2004, 39).
Isulat ang mosunod nga mga pangutana diha sa pisara sa dili pa magklase. (O mahimo nimo kining andamon diha sa usa ka handout o basahon kini sa hinay aron ang mga estudyante makasulat niini.) Hatagi ang mga estudyante og duha o tulo ka minuto sa pagsulat og mugbo nga mga tubag niini nga mga pangutana diha sa mga notebook o mga scripture study journal.
Unsay inyong gibati kabahin sa kasagad sa inyong personal nga mga pag-ampo?
Unsay inyong gibati kabahin sa sinseridad sa inyong personal nga mga pag-ampo?
Sa inyong personal nga mga pag-ampo, gibati ba ninyo nga tinuoray kamong nakigsulti sa Langitnong Amahan? Ngano o nganong dili man?
Kon makahimo kamo og usa ka kausaban aron sa pagpalambo sa inyong personal nga mga pag-ampo, unsa kini?
Ether 2:16–25 (ingon man ang Ether 3:1–6; 6:4–9)
Ang mga Jaredite naghimo og mga kasko sa pagtabok sa kadagatan paingon sa gisaad nga yuta
Hangyoa ang mga estudyante sa paghunahuna og usa ka hagit nga tingali aduna sila o usa ka importanting desisyon nga kinahanglan nilang himoon, karon o sa umaabut. Sama pananglit, tingali maghunahuna sila mahitungod sa usa ka lisud nga sitwasyon sa pamilya, mga hagit sa eskwelahan, desisyon kon kinsay minyoan, o pagpili og usa ka propesyon nga kuhaon. Dapita sila sa pagpamalandong kon sa unsang paagi ang Ginoo mahimong mohatag kanila og direksyon o tabang. Samtang magtuon sila sa nahibilin sa Ether 2, awhaga sila sa pagpangita og mga baruganan nga makatabang kanila nga makadawat sa tabang sa Ginoo sa paghimo og maayong mga desisyon.
Dapita ang usa ka estudyante sa pagbasa og kusog sa Ether 2:16–17. Hangyoa ang klase sa pagsunod, nga mangita kon unsay gisulti sa Ginoo nga buhaton sa mga Jaredite aron makapadayon padulong sa gisaad nga yuta. Kon mahuman na og basa ang estudyante, pangutana kon aduna bay ganahan nga moadto sa pisara ug dayon i-drowing kon unsa kaha ang hitsura sa mga kasko.
Kopyaha ang mosunod nga tsart diha sa pisara nga dili ilakip ang mga tubag sa tulo ka linya sa ubos. Ihatag ang tsart isip handout o hangyoa ang mga estudyante sa pagkopya niini diha sa mga notebook o mga scripture study journal.
|
Problema sa mga kasko |
Solusyon |
Unsay gibuhat sa Ginoo |
Unsay gibuhat sa igsoong lalaki ni Jared |
|---|---|---|---|
|
Walay hangin |
Naghimo og mga lungag nga mahimong ablihan ug sirad-an diha sa ibabaw ug ilawom sa mga kasko |
Mihatag og mga instruksyon ngadto sa igsoong lalaki ni Jared |
Mihimo sa mga lungag |
|
Walay pangtimon |
Ang hangin mohuyop sa mga kasko paingon sa gisaad nga yuta |
Mipahuyop sa hangin |
Misalig sa Ginoo |
|
Walay kahayag |
Nag-andam og espesyal nga mga bato ug naghangyo sa Ginoo sa paghikap niini aron kini modan-ag |
Mitambag sa igsoong lalaki ni Jared mahitungod sa mga butang nga dili magamit ug misugo kaniya sa pagpangita og solusyon nga magamit Mihikap sa mga bato human kini giandam sa igsoong lalaki ni Jared |
Miandam sa mga bato ug mihangyo sa Ginoo sa paghikap niini aron kini modan-ag diha sa kangitngit |
Dapita ang mga estudyante sa pagsiksik sa Ether 2:18–19 nga sila ra aron makita ang tulo ka mga problema nga nabantayan sa igsoong lalaki ni Jared diha sa mga kasko.
-
Unsa nga mga problema ang nabantayan sa igsoong lalaki ni Jared? (Isulat ang mga tubag sa mga estudyante diha sa unang kolum sa tsart, sama sa gipakita. Awhaga sila sa pagbuhat sa ingon diha sa ilang mga kopya sa tsart.)
Human maila sa mga estudyante ang mga problema, dapita sila sa pagtuon sa Ether 2:20–25; 3:1–6; 6:4–9. (Pahinumdom: Ang mga tudling diha sa Ether 3 ug 6 mas detalyadong hisgutan diha sa mga leksyon 145 ug 147.) Hatagi sila og panahon nga tagsa-tagsa nga mokompleto sa nahibilin sa tsart.
Kon ang mga estudyante aduna nay igong panahon sa pagkompleto sa tsart, ipangutana ang mosunod aron sa pagtabang kanila sa pag-ila sa mga baruganan gikan sa kasinatian sa igsoong lalaki ni Jared:
-
Base sa solusyon sa problema mahitungod sa hangin, sa unsang paagi ang Ginoo usahay motabang kanato sa pagsulbad sa atong mga problema o motubag sa atong mga pangutana? (Usahay ang Ginoo mosulti kanato unsaon sa pagsulbad sa problema ug naglaum kanato nga mosunod sa Iyang mga instruksyon.)
-
Base sa solusyon sa problema mahitungod sa pangtimon, sa unsang paagi ang Ginoo usahay motabang kanato sa pagsulbad sa atong mga problema o motubag sa atong mga pangutana? (Usahay ang Ginoo mao Mismo ang moatiman sa solusyon.)
-
Base sa solusyon sa problema mahitungod sa kahayag, sa unsang paagi ang Ginoo usahay motabang kanato sa pagsulbad sa atong mga problema o motubag sa atong mga pangutana? (Usahay ang Ginoo magkinahanglan kanato nga maghunahuna og solusyon ug mangayo sa Iyang pag-uyon ug tabang sa pagpahigayon niini.)
Isulat ang mosunod nga baruganan sa pisara: Samtang kita mosangpit sa Ginoo ug mohimo sa atong bahin sa pagsulbad sa atong mga problema, makadawat kita sa tabang sa Ginoo. Aron matabangan ang mga estudyante sa paggamit niini nga baruganan, hangyoa sila sa pagkonsiderar sa importanting desisyon nga ilang gihunahuna pipila ka minutos ang milabay. Dayon hangyoa sila sa pagpamalandong sa mosunod nga mga pangutana:
-
Unsa kaha ang gipaabut sa Ginoo nga inyong buhaton sa paghimo niini nga desisyon?
-
Unsa kaha ang buhaton sa Ginoo sa pagtabang kaninyo?
-
Unsaon ninyo sa pagpakita og pagsalig sa Ginoo samtang maghunahuna kamo mahitungod niini nga desisyon?
Hatagi ang mga estudyante og pipila ka minuto sa pagsulat mahitungod sa unsay ilang nakat-unan karon. Ipakigbahin ang imong pagpamatuod nga kon kita matinud-anong mosangpit sa Ginoo ug mobuhat sa atong bahin sa pagsulbad sa atong mga problema, Siya mogiya kanato ug motabang kanato sumala sa Iyang kaalam ug gahum.
Komentaryo ug Background nga Impormasyon
Ether 2:4–5. Mga tubag sa mga pag-ampo
Si Elder Richard G. Scott sa Korum sa Napulog Duha ka mga Apostoles mitudlo:
“Importante kaayo nga makahibalo nga ang Ginoo sa ikatulong paagi motubag usab sa pag-ampo pinaagi sa pagpugong sa pagtubag sa panahon nga gihalad ang pag-ampo. Nganong buhaton man Niya kana?
“Siya ang hingpit nato nga Amahan. Siya nahigugma kanato lapas sa atong kapasidad sa pagsabut. Nahibalo siya unsay pinakamaayo kanato. Nakakita siya sa katapusan gikan sa sinugdanan. Gusto siya nga molihok kita aron maangkon ang gikinahanglang kasinatian:
“Kon motubag Siya og oo, kini aron sa paghatag kanato og pagsalig.
“Kon motubag Siya og dili, kini aron mapugngan ang sayop.
“Kon Siya mopugong sa pagtubag, kini aron kita motubo pinaagi sa hugot nga pagtuo diha Kaniya, pagsunod sa Iyang mga sugo, ug kaandam sa paglihok sumala sa kamatuoran. Gipaabut nga kita modawat sa pagkamay-tulubagon pinaagi sa paglihok sa usa ka desisyon nga nagsubay sa Iyang mga pagtulun-an nga wala pay kumpirmasyon. Dili kita maglingkod lang nga maghulat o magbagulbol tungod kay ang Ginoo wala mosulti. Kinahanglan kitang molihok.
“Sa kasagaran unsay atong gipili nga buhaton sakto. Mokumpirmar Siya sa pagkasakto sa atong mga pagpili sa Iyang pamaagi. Kana nga kumpirmasyon sa kasagaran moabut pinaagi sa daghang mga tabang nga moabut. Makaplagan nato kini kon kita sensitibo sa espirituhanong paagi. Sama kini og mubo nga mga sulat gikan sa mahigugmaong Amahan isip ebidensya sa Iyang pag-uyon” (“Pagkat-on sa Pag-ila sa mga Tubag sa Pag-ampo,” Ensign, Nob. 1989, 31–32).
Ether 2:14–15. Ang pagpanton sa Ginoo isip pagpadayag sa gugma
Nagpasabut sa Ether 2:14–15, si Elder Jeffrey R. Holland sa Korum sa Napulog Duha ka mga Apostoles natingala sa kalig-on sa kinaiya sa igsoong lalaki ni Jared ug sa mahigugmaong pagpasaylo sa Dios:
“Lisud hunahunaon kon sama sa unsa ang tulo ka oras nga pagbadlong gikan sa Ginoo, apan ang igsoong lalaki ni Jared nakalahutay niini. Naghinulsol dayon ug nag-ampo, kini nga propeta nangayo pag-usab og giya alang sa panaw nga gihatag kanila ug niadtong kinsa mobuhat niini. Ang Dios midawat sa iyang paghinulsol ug mahigugmaong mihatag og dugang direksyon alang sa ilang importante nga misyon” (Christ and the New Covenant: The Messianic Message of the Book of Mormon [1997], 15).
Pinaagi ni Propeta Joseph Smith, ang Ginoo mitudlo, “Kinsa kadto nga Ako naghigugma Ako usab nagpanton aron ang ilang mga sala mapasaylo, kay uban sa pagpanton Ako nag-andam og usa ka paagi alang sa ilang kaluwasan diha sa tanan nga mga butang gikan sa pagtintal, ug Ako naghigugma kaninyo” (D&P 95:1).
Ether 2:22–23. Ang pag-ampo kinahanglang ubanan og paningkamot
Daghang mga tawo miingon nga kinahanglan kitang mag-ampo nga daw ang tanan nag-agad sa Ginoo ug motrabaho nga daw ang tanan nag-agad kanato. Si Elder Russell M. Nelson sa Korum sa Napulog Duha ka mga Apostoles miingon nga kanunay siyang makadungog ni Presidente Gordon B. Hinckley nga mosulti, “Dili ako kahibalo unsaon nga adunay mahimo gawas sa pagluhod ug pagpangamuyo og tabang ug dayon mobarug ug motrabaho” (“Spiritual Capacity,” Ensign, Nob. 1997, 16).