Librarya
Leksyon 125: 3 Nephi 15–16

Leksyon 125

3 Nephi 15–16

Pasiuna

Sa pagpadayon ni Jesukristo sa pagtudlo sa mga katawhan didto sa templo sa yuta sa Bountiful, mipahayag Siya nga ang balaod ni Moises natuman ug nga Siya mao ang kahayag ug ang balaod nga kinahanglang tan-awon sa mga katawhan. Dayon iyang gipasabut ngadto sa napulog duha ka mga disipulo nga ang mga katawhan sa Amerika mao ang “ubang mga karnero” nga Iyang gipamulong didto sa Jerusalem (tan-awa sa Juan 10:14–16). Misaad usab siya nga kadtong maghinulsol ug mobalik ngadto Kaniya pagaiphon taliwala sa Iyang mga katawhan sa pakigsaad.

Mga Sugyot alang sa Pagtudlo

3 Nephi 15:1–10

Ang Manluluwas namahayag nga Siya mituman sa balaod ni Moises

Sa dili pa magsugod ang klase, isulat ang mosunod nga mga pangutana diha sa pisara:

Nganong mobayad sa ikapulo? Nganong ibalaan ang Adlaw nga Igpapahulay? Nganong tahuron ang inyong mga ginikanan?

Sa pagsugod sa leksyon, tudloa ang mga pangutana diha sa pisara ug ipangutana:

  • Ang pipila sa mga tawo tingali maghunahuna kon nganong ang Ginoo naghatag og mga sugo. Unsaon kaha ninyo sa pagpasabut sa katuyoan sa mga sugo?

Sultihi ang mga estudyante nga samtang si Jesukristo mitudlo sa mga Nephite, Siya mitudlo kanila nga usa sa katuyoan sa Iyang mga sugo mao ang paggiya sa mga katawhan ngadto Kaniya. Dapita ang mga estudyante sa pagpangita niini nga katuyoan samtang magtuon sila sa 3 Nephi 15.

Ipasabut nga samtang ang Manluluwas namulong ngadto sa pundok sa mga katawhan, nakasabut Siya nga ang pipila kanila adunay pangutana. Hangyoa ang mga estudyante sa pagbasa sa 3 Nephi 15:1–2 sa pagsuta kon unsa ang gustong masayran niining mga tawhana. (Ilang gihunahuna kon unsay gusto sa Manluluwas nga ilang buhaton “mahitungod sa balaod ni Moises.” Ang pagsimba sa mga Nephite, mga tulumanon, ug organisasyon sa Simbahan natukod diha sa balaod ni Moises sa pag-andam sa mga katawhan alang sa pag-anhi ni Jesukristo ug sa pagtabang nila nga magtinguha sa Iyang maulaong sakripisyo. Dayag kaayo, nga ang pipila naglibug kon unsay angay nilang buhaton agi og puli sa paghupot sa balaod ni Moises.)

Hangyoa ang usa ka estudyante sa pagbasa og kusog sa 3 Nephi 15:3–5, 9. Dapita ang klase sa pagsunod, nga mangita sa mga pulong diha sa pagpasabut sa Manluluwas nga tingali mipasalig sa mga Nephite nga ang ilang hugot nga pagtuo dili na kinahanglang usbon. Paghangyo og pipila ka mga estudyante nga mopakigbahin sa mga pulong nga ilang nahibaloan. Hangyoa sila sa pagpasabut nganong kini nga mga pulong nakatabang unta sa mga Nephite.

  • Unsa kaha ang gitudlo ni Jesus dihang Siya mipahayag nga Siya mao “ang balaod”? (3 Nephi 15:9).

Ang mga estudyante mahimong mohatag og lain-laing mga tubag. Samtang motubag sila, tabangi sila nga mahibaloan ang mosunod nga kamatuoran (isulat kini nga mga kamatuoran diha sa pisara): Si Jesukristo mao ang tinubdan sa balaod. Ang tanang balaod sa ebanghelyo nagtudlo kanato ngadto ni Jesukristo ug sa Iyang Pag-ula. Kon kita mosunod sa Iyang mga sugo, atong madawat ang kinabuhing dayon.

  • Ngano nga kining mga kamatuoran importanting masabtan sa mga Nephite niining panahona? (Mahimo nimong ipasabut nga sama sa balaod ni Moises, ang bag-o nga balaod nagtudlo ngadto sa Manluluwas ug sa Iyang Pag-ula. Samtang ang pipila ka mga paagi sa pagsimba sa mga katawhan nausab, sila nagpadayon sa pagpakita og hugot nga pagtuo kang Jesukristo ug nagsimba sa Amahan pinaagi sa Iyang ngalan.)

I-summarize ang 3 Nephi 15:6–8 pinaagi sa pagpasabut nga ang Manluluwas mipasalig sa mga katawhan nga pinasikad sa mga gipamulong sa mga propeta kalabut sa usa ka Manunubos natuman diha Kaniya, mahinabo usab ang ilang mga panagna mahitungod sa umaabut nga mga panghitabo. Mipasabut usab Siya nga ang pakigsaad nga Iyang gihimo ngadto sa Iyang mga katawhan ipatuman gihapon.

Dapita ang usa ka estudyante sa pagbasa og kusog sa 3 Nephi 15:9–10. Hangyoa ang klase sa pagsunod, nga mangita kon unsay gusto sa Manluluwas nga buhaton sa Iyang mga katawhan sa ilang kahibalo sa mga kamatuoran nga gisulat sa pisara.

  • Unsay gipasabut nganha kaninyo sa “tan-aw ngadto” kang Kristo?

Hangyoa ang mga estudyante sa pagribyu sa 3 Nephi 15:9–10 ug i-summarize kon unsay gusto sa Ginoo nga paagi nga kita magpakabuhi sa ebanghelyo ug sa panalangin nga moabut isip resulta. (Mahimong i-summarize sa mga estudyante kini nga tudling sa lahi nga paagi, apan ang ilang mga tubag kinahanglang magpakita sa mosunod nga baruganan: Kon kita motan-aw ngadto kang Jesukristo pinaagi sa pagsunod sa Iyang mga sugo ug sa paglahutay hangtud sa katapusan, Siya mohatag kanato og kinabuhing dayon.)

  • Posible ba ang pagsunod ni Jesukristo nga dili motuman sa Iyang mga sugo? Nganong dili man?

Dapita ang mga estudyante sa pagkonsiderar sa mga pangutana nga imong gisulat diha sa pisara sa dili pa magklase.

  • Posible ba nga ang usa ka tawo magpakita nga nagtuman sa mga sugo nga walay pagpanglantaw ngadto kang Jesukristo?

  • Unsa ang pipila ka mga rason nga ang tawo mahimong magpakita nga nagtuman sa mga sugo nga dili motan-aw ngadto kang Jesukristo? (Ang mga tubag mahimong maglakip sa katungdanan, kahadlok sa silot, usa ka tinguha nga mahiangay o pagpakita lang sa uban aron ingnon nga matarung, o usa ka gugma sa mga lagda.)

  • Unsay angay nga mga rason nga kita mosunod sa mga sugo? (Kinahanglan kita nga motuman sa mga sugo tungod kay kita nahigugma sa Ginoo, nagtinguha kita sa pagpahimuot Kaniya, ug gusto nato nga moduol ngadto Kaniya.)

  • Sa unsang paagi kamo napanalanginan sa dihang kamo mituman sa mga sugo uban sa tinuod nga tinguha?

Dapita ang mga estudyante sa paghunahuna og usa ka sugo o sumbanan sa ebanghelyo nga naglisud sila sa pagsabut ug sa pagsunod. Dapita sila sa pagkonsiderar kon sa unsang paagi nga ang ilang mga pagbati bahin niini nga sugo o sumbanan mahimong mausab kon ang ilang gugma sa Ginoo mao ang mahimo nilang rason sa pagsunod. Awhaga sila sa pagsunod sa mga sugo tungod sa paghigugma sa Ginoo. Ipakigbahin ang mga paagi nga ang mga kasugoan nakatabang nimo nga mas mahiduol ngadto sa Langitnong Amahan ug sa Manluluwas.

3 Nephi 15:11–16:5

Si Jesukristo nakigsulti ngadto sa Iyang mga disipulo mahitungod sa Iyang lain nga karnero

Hangyoa ang mga estudyante sa pag-isa sa ilang kamot kon sila mibati nga dili kaayo importante kay sa uban. Hangyoa sila sa pagkonsiderar kon mibati na ba sila nga nakalimtan o nag-inusara o kon sila naghunahuna ba kon ang Langitnong Amahan nakaila kon si kinsa sila.

Isulat ang mosunod nga pamahayag sa pisara: Ang Dios nagpakabana sa tanan Niyang mga anak, ug Siya mopakita sa Iyang kaugalingon ngadto kanila. Ipasalig sa mga estudyante ang kamatuoran niining pamahayag, ug dapita sila nga magbantay sa ebidensya sa kamatuoran niini samtang sila magtuon sa nahibilin sa 3 Nephi 15 ug sa sinugdanan sa 3 Nephi 16.

Dapita ang usa ka estudyante sa pagbasa sa 3 Nephi 15:11–17, ug hangyoa ang mga estudyante sa pagtino sa unsay gisulti sa Ginoo ngadto sa mga katawhan sa Jerusalem mahitungod sa Iyang mga katawhan sa Amerika. Mahimo usab nimong ipabasa sa mga estudyante ang Juan 10:14–16. (Tabangi ang mga estudyante nga makasabut nga ang “ubang mga karnero” usa ka pakisayran sa laing sumusunod sa Magbalantay, nga si Jesukristo. Ang pulong nga panon mahimong nagpasabut ngadto sa usa ka toril sa karnero, apan kini usab nagpasabut sa grupo sa mga katawhan nga may usa ka komon nga gituohan.)

  • Sumala sa 3 Nephi 15:17, giunsa pagsaad sa Ginoo nga mopakita sa Iyang kaugalingon ngadto sa Iyang laing karnero o sumusunod? (Sila maminaw sa Iyang tingog.)

Hangyoa ang usa ka estudyante sa pagbasa og kusog sa 3 Nephi 15:18–19. Hangyoa ang klase sa pagsunod, nga mangita sa rason nganong ang Langitnong Amahan misugo ni Jesukristo nga dili ipahibalo sa mga tawo sa Jerusalem mahitungod sa Iyang lain nga karnero. Human makareport ang mga estudyante sa unsay ilang nakit-an, ipangutana:

  • Unsa nga baruganan ang atong makat-unan gikan niini? (Ang mga tubag sa mga estudyante kinahanglang magpakita sa mosunod nga baruganan: Ang Dios naghatag kanato og kahibalo ug kamatuoran sumala sa atong hugot nga pagtuo ug kamasulundon.)

I-summarize ang 3 Nephi 15:21–23 pinaagi sa pagpasabut nga ang Ginoo misulti sa mga Nephite nga sila mao ang lain nga karnero nga Iyang gipamulong; hinoon, ang mga Judeo sa Jerusalem naghunahuna nga Siya namulong mahitungod sa mga Hentil, o dili mga Israelite. Wala nila masabti nga dili personal nga madungog sa mga Hentil ang Iyang tingog.

Dapita ang usa ka estudyante sa pagbasa og kusog sa 3 Nephi 15:24, ug hangyoa ang klase sa pagpaminaw kon giunsa sa Ginoo sa pagpasalig sa mga Nephite bahin sa Iyang pagpakabana kanila. Mahimo nimong pangutan-on ang mga estudyante kon unsa kaha ang ilang bation kon ilang madungog ang Ginoo nga magsulti niining mga pulong ngadto kanila.

Hangyoa ang mga estudyante sa pagbasa og hilum sa 3 Nephi 16:1–3 ug ipapangita kon kinsa pa ang makadungog sa tingog sa Manluluwas. Ipasabut nga wala kitay rekord sa ubang mga dapit ug mga katawhan nga nabisitahan sa Manluluwas, apan klaro nga Siya mibisita sa ubang mga grupo o “mga panon.”

Sa pagpaila sa ideya nga ang Manluluwas mopakita usab sa iyang Kaugalingon ngadto niadtong dili makadungog sa Iyang tingog, ipangutana ang mosunod sa dili pa magdapit sa mga estudyante sa pagsiksik sa mga kasulatan alang sa mga tubag:

  • Unsa man ang mahitabo niadtong wala makadungog sa tingog sa Manluluwas? Giunsa Niya pagpakita nila nga Siya nagpakabana kanila?

Dapita ang mga estudyante sa pagsiksik sa 3 Nephi 15:22–23 ug 3 Nephi 16:4, nga mangita kon sa unsang paagi nga ang Ginoo mipahayag nga Siya unta mopakita sa iyang Kaugalingon ngadto sa mga Hentil (pinaagi sa pagsangyaw sa uban, pinaagi sa pagsaksi sa Espiritu Santo, ug pinaagi sa mga sinulat sa mga propeta).

  • Sa unsang paagi nga kining mga pagpakita sa Dios nagpakita sa Iyang pagpakabana sa tanan Niyang mga anak?

  • Sa unsang mga paagi nga ang Ginoo nakapakita sa Iyang kaugalingon nganha kaninyo ug sa inyong pamilya?

  • Sa unsang paagi nga makatabang kamo sa paningkamot sa Ginoo nga makapakita sa Iyang kaugalingon ngadto sa tanan Niyang mga katawhan?

3 Nephi 16:6–20

Si Jesukristo mipahayag sa mga panalangin ug mga pasidaan ngadto sa mga Hentil kinsa modawat sa ebanghelyo sa ulahing mga adlaw

Ipangutana sa mga estudyante kon nakasulay na ba sila nga gustong moapil sa usa ka grupo, club, o team. Pangutan-a kon unsa ang mga kwalipikasyon nga gikinahanglan aron mahimong usa ka sakop sa grupo nga gusto nilang apilan. Isugyot nga ang labing importanting grupo nga mahimo natong apilan mao ang mga katawhan sa pakigsaad sa Ginoo.

Dapita ang usa ka estudyante sa pagbasa og kusog sa 3 Nephi 16:6–7. Hangyoa ang klase sa pagsunod, nga mangita kon unsa ang gisulti sa Ginoo nga mahitabo sa katapusang mga adlaw tungod kay ang mga Hentil motuo Kaniya ug ang balay ni Israel dili motuo Kaniya. (Mahimo nimong ipasabut nga ang mga propeta sa Basahon ni Mormon migamit sa pulong nga mga Hentil nga nagpasabut sa mga tawo nga dili gikan sa Balaan nga Yuta. Busa, ang pulong mahimong nagpasabut sa mga miyembro sa Simbahan ingon man usab sa mga dili tumutuo ug mga miyembro sa laing tinuohan.) Human makatubag ang mga estudyante, i-summarize ang 3 Nephi 16:8–9 pinaagi sa pagpasabut nga si Jesukristo nanagna nga adunay dili matuohon nga mga Hentil sa ulahing mga adlaw nga mopatibulaag ug mopasakit sa mga sakop sa balay ni Israel. Dapita ang usa ka estudyante sa pagbasa og kusog sa 3 Nephi 16:10. Hangyoa ang klase sa pagsunod, nga mangita sa unsay mahitabo niining dili matuohon nga mga Hentil.

  • Unsa ang gipamahayag sa Ginoo nga mawala sa dili tumutuo nga mga Hentil?

  • Sa unsa kaha nga paagi nga kini mahitabo niadtong nakahibalo sa kamatuoran apan nagpasulabi sa garbo?

Ipasabut nga ang Ginoo misaad sa pagtuman sa Iyang pakigsaad ngadto sa balay ni Israel sa pagdala sa ebanghelyo ngadto kanila (tan-awa sa 3 Nephi 16:11–12). Dapita ang usa ka estudyante sa pagbasa og kusog sa 3 Nephi 16:13. Hangyoa ang klase sa pagsunod, nga mangita kon unsay gikinahanglan sa usa ka tawo aron mahimong usa ka sakop sa mga katawhan sa pagkigsaad sa Ginoo. Isulat sa pisara ang mosunod: “Kon kita …, nan kita …” Hangyoa ang mga estudyante sa paggamit sa 3 Nephi 16:13 sa pagkompleto niini nga pamahayag. Ang mga estudyante kinahanglang makahibalo sa mosunod nga kamatuoran: Kon kita maghinulsol ug mobalik ngadto ni Jesukristo, nan kita pagaiphon taliwala sa Iyang mga katawhan.

  • Nganong usa ka panalangin ang maisip nga katawhan sa Ginoo?

Tapusa pinaagi sa pagpakigbahin sa imong pagpamatuod sa mga kamatuoran nga gitudlo niini nga leksyon karon.

Komentaryo ug Background nga Impormasyon

3 Nephi 15:1–2. “Ang daan nga mga butang milabay na, ug ang tanan nga mga butang nahimo nga bag-o”

Sa panahon sa mortal nga pagpangalagad sa Manluluwas, ang balaod ni Moises maoy nahimong sukaranan sa relihiyuso ug sosyal nga kinabuhi sa mga Israelite kapin sa liboan ka mga tuig. Ang mga Nephite nanag-iya sa mga rekord sa balaod diha sa mga palid nga tumbaga, ug ang mga propeta nga Nephite mitudlo ug misunod sa balaod. Sa dihang ang Manluluwas mibisita sa mga Nephite, Siya mitudlo kanila nga ang balaod hingpit nang natuman diha Kaniya. Apan, dili nila angayng hunahunaon nga ang balaod ni Moises naguba o “milabay na” (3 Nephi 12:17–18). Sa unsang paagi nga ang Manluluwas “mituman” apan wala “miguba” sa balaod ni Moises? Ang balaod ni Moises naglakip sa moral ug ritwal nga mga aspeto.

Ang moral nga mga aspeto naglakip sa ingon nga mga sugo sama sa “Kamo dili magpatay” ug “Kamo dili manapaw.” Si Jesukristo mitudlo sa mga Nephite nga sila maglikay dili lang sa pagpatay ug pagpanapaw, apan sa pagkasuko ug sa kahigal—mga pagbati nga moresulta sa pagpatay ug pagpanapaw (tan-awa sa 3 Nephi 12:21–30). Sa ingon ang ebanghelyo ni Jesukristo mituman sa balaod sa paagi nga gipalapdan niini ang moral nga mga aspeto sa balaod ni Moises tungod kay kini usa ka mas taas nga balaod; kini naglakip sa moral nga panginahanglan sa balaod ni Moises ug mibutang niini sa konteksto sa mas lapad nga mga baruganan sa ebanghelyo nga nagkinahanglan og kausaban sa kasingkasing.

Ang ritwal nga aspeto sa balaod ni Moises naglakip sa mga sugo mahitungod sa pagsakripisyo og hayop ug sinunog nga mga halad—nga gitawag ni Abinadi og “mga kahimoan” ug “mga ordinansa” (Mosiah 13:30). Ang mga propeta nga Nephite nakasabut nga ang katuyoan niini nga bahin sa balaod ni Moises mao ang pagtabang sa mga tawo nga naglantaw ngadto sa maulaong sakripisyo ni Jesukristo (tan-awa sa 2 Nephi 25:24; Jacob 4:5; Mosiah 16:14–15). Busa, sa dihang nakompleto na ang mortal nga misyon sa Manluluwas, kining mga ordinansa alang sa umaabut nga panghitabo dili na pagahimoon sa umaabut—ang kalihokan nahitabo na. Sa ingon ang Manluluwas mitudlo sa mga Nephite nga ang mga pagsakripisyo sa mga hayop ug mga halad nga sinunog “pagahunungon” ug nga ang Iyang mga sumusunod maghalad hinoon sa “sakripisyo” sa “usa ka masulub-on nga kasingkasing ug usa ka mahinulsulon nga espiritu” (3 Nephi 9:19–20). Agi og puli sa mga ordinansa nga naglantaw sa Pag-ula, ang Manluluwas mipasiugda sa sakrament, usa ka ordinansa sa paghinumdom, sa paghinumdom sa maulaong sakripisyo sa Manluluwas (tan-awa sa 3 Nephi 18:1–11).

Si Elder Bruce R. McConkie namahayag: “Si Jesus mianhi aron sa pagpahiuli nianang kahingpitan sa ebanghelyo nga natagamtaman sa mga tawo sa wala pa ang panahon ni Moises, sa wala pa ang panahon sa mas ubos nga han-ay. Dayag lang nga wala siya moanhi aron sa pagguba sa unsay iya mismong gipadayag ngadto kang Moises sama sa usa ka propesor sa kolehiyo nga moguba sa arithmetic pinaagi sa pagpadayag sa mga baruganan sa integral calculus ngadto sa iyang mga estudyante. Si Jesus mianhi aron sa pagdugang sa pundasyon nga gipahimutang ni Moises. Pinaagi sa pagpahiuli sa kahingpitan sa ebanghelyo gituman niya ang panginahanglan sa pagsunod sa mga lagda ug kondisyon sa ebanghelyo sa pagpangandam. Wala nay kinahanglan nga maglakaw sa kahayag sa bulan, kay ang adlaw misanag na diha sa tanang katahum niini” (Doctrinal New Testament Commentary, 3 vols. [1965–73], 1: 219–20; tan-awa usab sa Stephen E. Robinson, “The Law after Christ,” Ensign, Sept. 1983, 69–73).

3 Nephi 15:1–10. Si Jesukristo mihatag ug mituman sa balaod ni Moises

Ang nag-unang mga propeta sa Basahon ni Mormon nagtudlo nga ang balaod ni Moises sa katapusan matuman. Si Nephi, Jacob, ug Abinadi miandam sa ilang mga katawhan nga sa katapusan modawat sa pagkatapos sa balaod ni Moises. Si Elder Jeffrey R. Holland sa Korum sa Napulog Duha ka mga Apostoles miila sa mga rason nga nakapahimo sa mga Nephite sa paghunong sa daan nga balaod ug sa paghangop sa bag-o:

“Klaro nga ang kongregasyon sa mga Nephite mas daling nakasabut niini kay sa mga Judeo, tungod kay ang mga propeta nga Nephite maampingon kaayo sa pagtudlo nga kini nga balaod mausab gayud. Si Abinadi miingon, ‘Kini kinahanglan nga kamo maghupot sa balaod ni Moises sa pagkakaron; apan ako moingon nganha kaninyo, nga ang panahon moabut nga kini dili na kinahanglan nga maghupot sa balaod ni Moises.’ [Mosiah 13:27; italics gidugang.] Diha sa samang diwa si Nephi mipasabut og maayo, ‘Kami namulong mahitungod sa balaod aron ang among mga anak mahimo nga masayud sa ka patay sa balaod; ug sila, pinaagi sa pagkasayud sa ka patay sa balaod, molantaw unta sa umaabut ngadto niana nga kinabuhi nga anaa diha kang Kristo, ug masayud sa unsa nga katuyoan ang balaod gikahatag. Ug human ang balaod matuman diha kang Kristo, nga sila dili kinahanglan magpatig-a sa ilang mga kasingkasing batok kaniya sa panahon nga ang balaod kinahanglan mawala na.’ [2 Nephi 25:27; italics gidugang.]

“Kana nga matang sa pagtudlo—usa ka pahimangno batok sa pagpatig-a sa kasingkasing batok ni Kristo sa walay alamag nga pagdepensa sa balaod ni Moises—mitagana (ug miluwas) unta sa daghang buhi sa karaang panahon ug sa mga buhi sa panahon karon” (Christ and the New Covenant: The Messianic Message of the Book of Mormon [1997], 156–57).

3 Nephi 15:5–8. Ang pakigsaad wala pa matuman ang tanan

Unsa ang gipasabut ni Jesus sa dihang Siya miingon, “Ang pakigsaad diin Ako mihimo uban sa akong mga katawhan wala pa matuman ang tanan”? (3 Nephi 15:8). Si Jehova mihimo og pakigsaad ngadto kang Abraham sa karaan. Si Abraham gisaaran og (1) mahangturon nga kaliwatan, (2) usa ka yuta nga kabilin, ug (3) gahum sa priesthood sa Dios. Kini nga mga saad gihimo usab ngadto sa kaliwatan ni Abraham (tan-awa sa D&P 132:30–31) ug matuman sa umaabut.

Iprinta