Mosiah 2

Pasiuna

Sa nagsingabut ang katapusan sa kinabuhi ni Haring Benjamin, mitinguha siya sa paghatag og usa ka katapusang sermon ngadto sa iyang mga katawhan. Ang iyang sermon, nga girekord diha sa Mosiah 2–5, mao ang hilisgutan niini nga leksyon ug mga leksyon sa 53–55. Diha sa sinugdanan sa sermon, misulti siya kalabut sa iyang pangalagad sa mga katawhan, naghatag og gibug-aton nga kita nagserbisyo sa Dios kon kita nagserbisyo sa uban. Mipamatuod usab siya sa malipayong kahimtang niadtong nagsunod sa mga sugo sa Dios.

Mga Sugyot alang sa Pagtudlo

Pahinumdom: Ang mosunod nga summary mahimong makatabang kon mopili ka sa paghatag og overview sa pakigpulong ni Haring Benjamin diha sa sinugdanan niini nga leksyon.

Paingon sa katapusan sa iyang kinabuhi, namulong si Haring Benjamin sa mga katawhan sa iyang gingharian duol sa templo sa Zarahemla. Mihatag siya og subay sa iyang serbisyo ngadto sa mga katawhan ug sa iyang limpyo nga konsyensya sa atubangan sa Dios, ug mipaila sa iyang anak nga lalaki nga si Mosiah isip ang bag-ong hari sa mga katawhan. Sa iyang katapusan nga pakigpulong, nga makita diha sa Mosiah 2–5, mipakigbahin si Haring Benjamin og mga mensahe sa pipila ka mga hilisgutan, lakip ang importansya sa serbisyo ngadto sa uban, ang atong walay katapusang pagkautangan ngadto sa atong Langitnong Amahan, ang mortal nga pangalagad ug Pag-ula ni Jesukristo, ang panginahanglan nga isalikway ang kinaiyanhong pagkatawo, pagtuo diha sa Dios alang sa kaluwasan, pakigbahin sa kabtangan alang sa kahupayan sa mga kabus, pagbaton og kapasayloan sa mga sala, ug mahimong anak nga mga lalaki ug babaye ni Kristo pinaagi sa hugot nga pagtuo ug makanunayon nga maayong mga buhat. Kalabut sa linaing pahinumdom, ang Mosiah 3 naglangkob og mensahe nga nadawat ni Haring Benjamin gikan sa anghel.

Mosiah 2:1–9

Mga pamilya nagpundok ug nangandam sa pagdawat sa mga pulong ni Haring Benjamin

Isulat ang mosunod nga mga pangutana tadlas sa ibabaw sa pisara: Kinsa? Asa? Unsa Ngano?

Hangyoa ang mga estudyante sa pagsiksik og hilum sa Mosiah 2:1–6, nga mangita sa mga detalye nga motubag sa mga pangutana diha sa pisara. Human nila mabasa, dapita ang pipila ka mga estudyante sa pagrekord diha sa pisara og daghang mga detalye kutob sa ilang mahimo ubos sa matag pangutana. (Mahimong kinahanglan nimong ipasabut nga ang mga katawhan nangandam sa pagdawat sa mga pulong ni Haring Benjamin pinaagi sa paghalad og mga sakripisyo nga kalabut sa balaod ni Moises. Sa paghimo niini nga mga sakripisyo, ang mga katawhan mipadayag og pasalamat ngadto sa Dios ug mihalad sa ilang mga kaugalingon ngadto Kaniya.)

Dapita ang mga estudyante sa pagbasa og hilum sa Mosiah 2:9, nga mangita sa mga pulong ug sa hugpong sa mga pulong nga nagpakita unsay gusto ni Haring Benjamin nga buhaton sa mga katawhan samtang sila namati ngadto sa iyang mga pulong.

Gikan sa mga pulong nga inyong nakit-an, unsa sa inyong hunahuna ang gibati ni Haring Benjamin mahitungod sa iyang mensahe?
Sumala sa katapusang bahin sa Mosiah 2:9, unsay gituohan ni Haring Benjamin nga mahitabo kon ang mga katawhan moabli sa ilang mga dunggan ug sa ilang mga kasingkasing ngadto sa iyang mensahe?
Unsa sa inyong hunahuna ang kahulugan sa pag-abli sa atong mga dunggan ug mga kasingkasing ngadto niadtong kinsa gitawag sa pagtudlo?

Awhaga ang mga estudyante nga hinumduman ang imbitasyon ni Haring Benjamin samtang sila nagtuon sa iyang mensahe ug samtang sila namati ngadto sa mga pulong sa mga propeta sa ulahing adlaw.

Mosiah 2:10–28

Nagtudlo si Haring Benjamin mahitungod sa importansya sa pagserbisyo sa Dios ug sa usag usa ug mahitungod sa atong walay katapusang pagkautangan ngadto sa Dios.

Imahe

King Benjamin Addresses His People

Pakit-a ang mga estudyante sa litrato ni Haring Benjamin Namulong sa Iyang mga Katawhan (62298; Libro sa mga Hulagway sa Ebanghelyo [2009], no. 74). Pahinumdumi ang mga estudyante nga gitawag ni Haring Benjamin ang iyang mga katawhan sa pagpundok aron sa pagpahayag nga ang iyang anak nga lalaki nga si Mosiah mopuli sa iyang dapit isip hari ug sa paghatag kanila og usa ka “ngalan, nga pinaagi niana sila unta mailhan ibabaw sa tanan nga mga katawhan diin ang Ginoong Dios midala gikan sa yuta sa Jerusalem” (tan-awa sa Mosiah 1:9–12).

Basaha og kusog ang Mosiah 2:10–15 ngadto sa klase. Hangyoa ang mga estudyante sa pag-ila og mga pulong nga nagpakita sa kabalaka ni Haring Benjamin mahitungod sa pagserbisyo sa mga katawhan, dili mahitungod sa iyang kaugalingong kahimtang o pagkanailhan. Dapita sila sa pagpataas sa ilang mga kamot sa matag higayon nga madungog nila ang usa niini nga mga hugpong sa mga pulong. Kon ipataas nila ang ilang mga kamot, hunonga ang pagbasa ug hangyoa sila sa pagpasabut kon unsa ang ilang nailhan ug kon unsa ang gipadayag niini mahitungod ni Haring Benjamin.

Isip kabahin niini nga paghisgot, ipakigbahin ang mosunod nga pamahayag ni Presidente Howard W. Hunter:

“Ayaw kaayo kabalaka bahin sa kahimtang. … Importante nga madayeg. Apan ang atong tutokan kinahanglan diha sa pagkamatarung, dili ang pagkanailhan; diha sa serbisyo, dili sa kahimtang” (“To the Women of the Church,” Ensign, Nob. 1992, 96).

Dapita ang mga estudyante sa pagbasa og hilum sa Mosiah 2:16–17 ug sa pagpangita kon unsay gusto ni Haring Benjamin nga makat-unan sa iyang mga katawhan. Tabangi silang makakita nga kon kita nag-alagad sa uban, kita nag-alagad sa Dios. Isulat kini nga pamahayag diha sa pisara. Ipasabut nga ang Mosiah 2:17 usa ka scripture mastery passage. Mahimo nimong awhagon ang mga estudyante sa pagmarka niini nga tudling sa lahi nga paagi aron dali nilang madumduman kini.)

Dapita ang mga estudyante sa paghunahuna sa mga panahon sa dihang sila nakaserbisyo sa ubang mga tawo.

Sa dihang mihatag kamo niini nga serbisyo ngadto sa uban, sa unsa nga paagi kamo nagserbisyo usab sa Dios?
Kanus-a nakapanalangin ang ubang mga tawo sa inyong kinabuhi pinaagi sa serbisyo? Sa dihang miserbisyo sila kaninyo, sa unsa nga paagi sila usab nagserbisyo sa Dios?

Dapita ang pipila ka mga estudyante sa pagpuli-puli sa pagbasa og kusog gikan sa Mosiah 2:18–24, 34.

Ngano nga ipasabut ni Haring Benjamin ang iyang kaugalingon ug ang iyang mga katawhan isip ang “dili mapuslanon nga mga sulugoon”? (Mahimong kinahanglan nimong ipasabut nga ang mga katawhan nakapahimulos kon sila makadawat og mas labaw pa kay sa ilang gihatag. Kita dili mapuslanong mga sulugoon ngadto sa atong Langitnong Amahan tungod kay ang bili sa mga panalangin nga Iyang gihatag kanato sa kanunay molapas og dako kaayo sa bili sa serbisyo nga Iyang nadawat gikan kanato.)
Unsa nga mga panalangin ang inyong nadawat diin gibati ninyo nga nakautang sa Dios?
Nganong importante nga makaamgo nga kita sa kahangturan nakautang ngadto sa Dios? (Ang mga tubag mahimong maglakip nga kon kita makaamgo nga nakautang kita ngadto sa Dios, ang atong pagpasalamat magtubo, magtinguha kita sa pagsunod sa mga sugo, ug buot kitang mas moserbisyo pa sa uban.

Ipasabut nga sa Mosiah 2:34, ang pulong pagtugyan nagpasabut og paghatag o pagtuman. Dapita ang mga estudyante sa pagpamalandong kon sa unsa nga paagi sila mahimong “motugyan ngadto sa [Langitnong Amahan] sa tanan nga [sila] aduna ug nahimo.” Ipamatuod nga kon kita mosunod sa mga sugo sa Dios ug maninguha sa paghatag og sinsero nga serbisyo, magpanalangin Siya kanato.

Mosiah 2:29–41

Nag-awhag si Haring Benjamin sa iyang mga katawhan nga magmasulundon ngadto sa Dios.

Isulat ang PAGBANTAY diha sa pisara. Hangyoa ang mga estudyante sa pagsaysay og mga panahon nga sila nakakita og timaan nga migamit niini nga pulong o mipaambit niini nga ideya. Ipasabut nga ang ingon nga mga pahimangno makapanalipod kanato o makaluwas sa atong mga kinabuhi.

Dapita ang mga estudyante sa pagbasa og hilum sa Mosiah 2:32–33, 36–38, nga mangita sa unsay gisulti ni Haring Benjamin sa iyang mga katawhan nga pagabantayan. Mahimong kinahanglan nimong ipasabut nga sa Mosiah 2:33, ang pulong kaalautan nagpasabut og kaguol ug kasakit.

Unsa nga mga pahimangno ang gihatag ni Haring Benjamin sa iyang mga katawhan?
Sa unsa kaha nga paagi kita mahibalo kon kita nagsugod sa pagsunod sa sayop nga espiritu? Nganong importante ang pag-ila niini og sayo?
Sumala sa Mosiah 2:38, unsa nga mga sangputanan ang moabut ngadto niadtong kinsa namatay diha sa ilang mga sala?

Mahimong gusto nimong hatagan og gibug-aton ang pagtulun-an diha sa Mosiah 2:36 nga ang usa ka indibidwal, pinaagi sa iyang kaugalingon nga batasan makapalayo gikan sa Espiritu sa Ginoo. Mikomentaryo si Elder David A. Bednar sa Korum sa Napulog Duha ka mga Apostoles sa importansya sa pag-ila kon kita nagpalayo ba gikan sa Espiritu.

“Kita kinahanglan nga … manlimbasog sa pag-ila kon kita ‘mopahilayo sa [atong mga kaugalingon] gikan sa Espiritu sa Ginoo, nga kini mahimo nga wala nay dapit diha [kanato] aron sa pag-agak [kanato] diha sa mga agianan sa kaalam aron [kita] mapanalanginan, mouswag, ug matunhay’ (Mosiah 2:36). …

“… Kon adunay butang nga mahunahuna, makita, madungog, o mabuhat nato nga makapalayo nato sa Espiritu Santo, nan moundang kita sa paghunahuna, pagtan-aw, pagpaminaw, o pagbuhat sa mao nga butang. Kon kanang butang gituyo aron sa paglingaw, pananglitan, makapabulag kanato sa Balaang Espiritu, nan sigurado kana nga kalingawan dili para kanato. Tungod kay ang Espiritu dili makapuyo nianang bulgar, mahugaw, o dili ligdong, nan klaro nga ang ingon nga mga butang dili gayud para kanato. Tungod kay atong gibugaw ang Espiritu sa Ginoo kon kita mohimo og mga kalihokan nga nahibaloan nato nga dili angay, nan ang ingon nga mga butang dili gayud para kanato” (“Nga Kita Unta sa Kanunay Makabaton sa Iyang Espiritu Uban Kanato,” Ensign o Liahona, Mayo 2006, 30).

Unsay gisulti ni Elder Bednar nga mopalayo kanato gikan sa Espiritu Santo?
Unsaon nato sa pagkahibalo kon kita nagpahilayo sa atong mga kaugalingon gikan sa Espiritu Santo?

Isulat ang HINUMDUMI ug ang HUNAHUNAA diha sa pisara tupad sa PAGBANTAY.

Dapita ang usa ka estudyante sa pagbasa og kusog sa Mosiah 2:40–41. Hangyoa ang klase sa pag-ila kon unsa ang gusto ni Haring Benjamin nga hunahunaon sa iyang mga katawhan ug unsa ang gusto niya nga ilang hinumduman. Samtang nagtubag ang mga estudyante, mahimong hatagan nimo og gibug-aton ang pagtulun-an ni Haring Benjamin pinaagi sa pagsulat sa mosunod nga kamatuoran diha sa pisara: Kon kita mosunod sa mga sugo, kita mapanalanginan sa temporal ug espiritwal nga paagi.

Kanus-a kamo nakasaksi o nakasinati og kalipay nga miabut gikan sa pagkamasulundon sa mga sugo sa Ginoo?

Ipamatuod ang pagkatinuod sa mga butang nga gihisgutan sa mga estudyante karong adlawa. Taposa pinaagi sa pag-awhag sa mga estudyante sa paghimo og piho nga mga tumong nga mahimong mas masulundon sa usa ka dapit nga malisud alang kanila sa pagtinguha nga molambo diha sa usa ka dapit nga ginganlan og Personal nga Kauswagan (alang sa young women) o Katungdanan ngadto sa Dios (alang sa young men).

Scripture Mastery—Mosiah 2:17

Dapita ang mga estudyante sa pagbasa sa Mosiah 2:17, Mateo 22:36–40, ug Mateo 25:40. Ang mga tudling diha sa Mateo nagtabang sa pagpatin-aw sa doktrina, pag-abli sa salabutan, ug sa pagtino sa kahulugan sa Mosiah 2:17. Mahimo nimong awhagon ang mga estudyante sa paghimo og kutay sa kasulatan pinaagi sa pagsulat sa Mateo 22:36–40 tupad sa Mosiah 2:17, Mateo 25:40 tupad sa Mateo 22:36–40, ug Mosiah 2:17 tupad sa Mateo 25:40.

Hangyoa ang pipila ka mga estudyante sa pagsaysay mahitungod sa mga panahon nga ilang gibati nga sila nagserbisyo sa Dios pinaagi sa pag-alagad sa ubang mga katawhan.

Dapita ang mga estudyante sa pagserbisyo og usa ka tawo sa wala pa ang sunod nga klase sa seminary. Isugyot nga mag-andam sila sa pagpakigbahin sa ilang mga kasinatian uban niini nga assignment (apan siguroha nga sila wala kinahanglana nga mapugos sa pagpakigbahin og mga kasinatian nga personal kaayo o pribado).

Mahimo usab nga imong hagiton ang mga estudyante sa pagsag-ulo sa Mosiah 2:17 sa wala pa ang sunod nga panahon nga magkita isip usa ka klase.

Ipamatuod nga kon kita sa sinsero nga paagi magserbisyo sa uban, nagserbisyo kita sa Ginoo.

Pahinumdom: Tungod sa matang ug gitas-on niini nga leksyon, mahimong gamiton nimo kini nga kalihokan sa laing adlaw, kon ikaw adunay sobra nga panahon.

Komentaryo ug Background nga Impormasyon

Mosiah 2:33, 38–39. “Walay katapusan nga silot,” “walay pagkapalong nga kalayo,” ug “walay katapusan nga kahasol”

Sa usa ka pahimangno mahitungod sa mga sangputanan sa pagsukol batok sa Dios, gigamit ni Haring Benjamin ang mga pulong “walay katapusan nga silot” (Mosiah 2:33), “walay pagkapalong nga kalayo” (Mosiah 2:38), ug “walay katapusan nga kahasol” (Mosiah 2:39). Aron sa pag-angkon og mas maayo nga pagsabut niini nga mga pulong, tan-awa ang mga pulong sa Ginoo diha sa Doktrina ug mga Pakigsaad 19:6–12.